تازيون خبرون

Daily Archives: April 21, 2015

پاڪستان ۽ چين اربين ڊالرز جي ڪيترن ئي معاهدن تي صحيحون ڪري ڇڏيون

اسلام آباد (بيورو) پاڪستان ۽ چين وچ ۾ اربين ڊالرز جا ڪئين معاهدن طي ٿي ويا، وزيراعظم نواز شريف ۽ چيني صدر شي چن پنگ وزيراعظم آفيس ۾ 8  منصوبن جي واکاڻ ڪئي، ٻنهي اڳواڻن ويڊيو لنڪ ذريعي توانائي جي 5  وڏن منصوبن جو به سنگ بنياد رکيو. سومر ڏينهن وزيراعظم هائوس ۾ پاڪستان ۽ چين وچ ۾ اربين ڊالرز جي ڪئين منصوبن تي صحيحن جي تقريب ٿي، جنهن ۾ وزيراعظم نواز شريف، چيني صدر شي چن پنگ ۽ ٻنهي ملڪن جي ڪابينا جي وفدن شرڪت ڪئي. تقريب ۾ وزيراعظم نواز شريف ۽ چيني صدر شي چن پنگ 8  منصوبن جي نقاب ڪشائي ڪئي انهن 8  منصوبن ۾ لاهور ميٽرو اورينج لائين ريلوي نظام، قائداعظم شمسي توانائي جو منصوبو، لاهور ۾ انڊسٽريل ڪمرشل بئنڪ چائينا جي برانچ کولڻ، ننڍي پن بجلي جي منصوبن لاءِ پاڪ چين گڏيل تحقيقي مرڪز جو افتتاح ۽ پاڪستان ۾ چين جي ثقافتي مرڪز جي قيام جو آغاز به شامل آهي، جڏهن ته ٻنهي ملڪن وچ ۾ آپٽيڪل فائبر ڪيبل منصوبي جو به آغاز ٿي ويو، ريڊيو پاڪستان ۽ چائينا ريڊيو انٽرنيشنل جي ايف ايم 8 9  دوستي چينل اسٽوڊيو جي افتتاح سميت چيني صدر ۽ وزيراعظم نواز شريف 5  توانائي منصوبن جو به سنگ بنياد رکي ڇڏيو، پاڪستان ۾ ڊجيٽل ٽرميٽر سيل ملٽي ميڊيا براڊ ڪاسٽ منصوبي جو افتتاح به ڪيو ويو، ان کان علاوه ٻنهي اڳواڻن ويڊيو لنڪ ذريعي توانائي جي تمام منصوبن جو سنگ بنياد رکيو. تقريب ۾ پرڏيهي صلاحڪار سرتاج عزيز ۽ چيني پرڏيهي وزير گڏيل پڌرنامي تي صحيحون ڪيون، اسٽريٽجڪ تعاون جي شراڪتداري جي گڏيل پڌرنامي تي به صحيحون ٿيون، بنيادي ڍانچي جي ترقي جي وڏي منصوبن لاءِ سهڪار جي فريم ورڪ جو معاهدو به طي ٿي ويو، انهن منصوبن تي منصوبابندي وزير احسن اقبال ۽ چيني اداري اين ڊي آر سي جي چيئرمين صحيحون ڪيون، ان سان گڏ پاڪستان ۽ چين وچ ۾ اقتصادي ٽيڪنيڪي معاهدي تي به صحيحون ڪيون ويون، ناڻي وزير اسحاق ڊار ۽ چين جي تجارت وزير هوچنگ صحيحون ڪيون. چين جي صدر شي چن پنگ چيو آهي ته پاڪستان ۽ چين جي دوستي اسان جو گڏيل اثاثو آهي پاڪ چين دوستي وڌائڻ اسان جي گڏيل مستقبل جو ايجنڊا آهي هن اها ڳالهه وزيراعظم نوازشريف سان ملاقات جي موقعي تي ڪئي ملاقات جي موقعي تي وزيراعظم نوازشريف چيو ته چيني صدر شي چن پنگ ۽ ان جي زال جو پاڪستان اچڻ تي ڀليڪار چئون ٿا چين جو عوام هميشه اسان جو شاندار استقبال ڪيو چين اسان جو بااعتماد ۽ بهترين دوست آهي هن چيو ته اميد آهي ته اوهان جي دوري سان پاڪستان ۽ چين وچ ۾ پهريان کان اڃا وڌيڪ مضبوط لاڳاپا ٿيندا وزيراعظم چيو ته هو دوستي جي رشتي کي وڌيڪ وڌائڻ لاءِ پرعزم آهي. ان موقعي تي چيني صدر چيو ته پاڪستان ۽ چين جي دوستي اسان جو گڏيل اثاثو آهي پاڪ چين دوستي کي هٿي ڏيڻ اسان جي گڏيل مستقبل جو ايجنڊا آهن.

 

پاڪستان توانائي جي سخت بحران کي منهن ڏئي رهيو آهي: نوازشريف

اسلام آباد (بيورو) وزيراعظم ميان محمد نواز شريف چيو آهي ته پاڪستان کي توانائي جي سخت بحران سان  منهن ڏيڻوآهي، حڪومت عوام سان لوڊشيڊ نگ جي خاتمي جو واعدو ڪيو آهي، پنهنجي موجوده دور ۾ بجلي جي بحران تي ڪنٽرول ڪرڻ لاءِ ڪوشان آهي، سومر ڏينهن چين جي نالي وارين 3 ڪمپنين هوانگ گروپ، آءِ سي بي سي ڪارپوريشن، زونرجي ڪارپوريشن جي چيف ايگزيڪيٽوز هتي وزيراعظم نواز شريف کان الڳ الڳ ملاقا ت ڪئي آهي جنهن ۾ پاڪ چين تعلقات، اقتصاد ي تعا ون، اقتصاد ي راهد اري سميت نون منصوبن تي خيالن جي ڏي وٺ ڪئي وئي، وزيراعظم نواز شريف ٽنهي ڪمپنين جي چيف ايگزيڪيٽوز کي پاڪستان ۾ سرمايه ڪاري ۽ نئون منصوبو ڪرڻ تي ڀليڪار ڪندي چيو ته چين جي ڪمپنين کي پاڪستان ۾ حڪومت پاران هر قسم جي تعاون ۽ فلو پروف سيڪيورٽي فراهم ڪئي ويندي، وزيراعظم چيو ته هن وقت پاڪستان کي توانائي جي سخت ضرورت آهي ۽ موجوده حڪومت عوام کان لوڊ شيڊ نگ جي خاتمي لاءِ واعد و ڪري رکيو آهي ۽ ان واعدي تي قائم رهند ي لوڊشيڊ نگ جي خاتمي لاءِ پرعزم آهي ان حوالي سان بجلي منصوبا وقت تي مڪمل ڪرڻ لاءِ زور ڏ نو پيو وڃي.

 

چين پاڪستان اقتصادي لنگهه منصوبو خطي ۾ تبديلي جو اهڃاڻ ثابت ٿيندو: صدر ممنون حسين

اسلام آباد (بيورو) صدر ممنون حسين چيو آهي ته چين پاڪستان اقتصادي لنگهه منصوبو خطي ۾ تبديلي جو اهڃاڻ ثابت ٿيندو، هو ڪالهه هتي پاڪستاني فرينڊز جي نمائندن سان ملاقات دوران ڳالهائي رهيو هو ان موقعي تي عوامي جمهوريه چين جو صدر شي چن پنگ به موجود هئا، حڪومت ۽ عوام طرفان چيني صدر جي پاڪستان جي دوري جي آجيان ڪندي صدر ممنون حسين چيو ته چين پاڪستان اقتصادي لنگهه منصوبو خوشحالي جو نئون باب هوندو، علائقائي رابطي ۽ اقتصادي وحدت لاءِ هي منصوبو گيم چينجر جي حيثيت رکي ٿو، صدر چيو ته علائقائي رابطي، عالمي امن ۽ ترقي جي چين جي خواب سان اجتماعي ترقي ۽ خوشحالي جو ڳاٽ اونچو ٿيندو، پاڪستان چيني صدر جي شاهراهه ريشم روڊ اقتصادي پٽي ۽ سامونڊي رستي جي خواب کي تعبير ڪرڻ ۾ مڪمل تعاون ڪيو آهي، صدر چيو ته چيني صدر جو دورو پاڪستان ۽ چين جي وچ ۾ ٻه طرفي گهري دوستاڻن لاڳاپن ۾ هڪ نئين باب جو اضافو آهي، ان موقعي تي پاڪستان ۽ چين جي صدرن ٻنهي ملڪن جي وچ ۾ دوستي کي وڌيڪ مستحڪم ڪرڻ لاءِ ڪردار ادا ڪندڙن ۾ دوستي ايوارڊ به ورهايا.

 

چيني صدر جي هٿياربند فوجن جي سربراهن سان ملاقات، دهشتگردي خلاف جنگ ۾ تعاون جي خاطري

اسلام آباد (بيورو) پاڪ فوج جي ترجمان موجب چيني صدر شي چنگ پنگ ٽنهي هٿياربند فوج جي سربراهن سان ملاقات ڪئي جنهن ۾ هن خطي ۾ امن لاءِ پاڪ فوج جي ڪوششن کي ساراهيندي دهشتگردي خلاف جنگ ۾ پاڪستان سان تعاون جاري رکڻ جو يقين ڏياروي. پاڪ فوج جي ترجمان ميجر جنرل عاصم باوجوده موجب چيني صدر سان ٿيندڙ ان اهم ملاقات ۾ چيئرمين جوائنٽ چيفس اسٽاف ڪميٽي جنرل راشد محمود، آرمي چيف جنرل راحيل شريف، نيول چيف ايڊمرل ذڪا الله ۽ ايئرچيف مارشل سهيل امان به شريڪ ٿيا جڏهن ته ملاقات ۾ چيني صدر دهشتگردي جي خاتمي ۽ امن لاءِ پاڪ فوج جي ڪوششن کي ساراهيو. ترجمان موجب چيني صدر آپريشن  ضرب عضب کي انتهائي اهم ۽ گيم چينجر قرار ڏيندي چيو ته آپريشن پاڪستان جي اقتصادي ترقي ۾ اهم ڪردار ادا ڪندو. ترجمان موجب چيني صدر شي چنگ پنگ عسڪري قيادت کي دهشتگردي خلاف جنگ ۾ تعاون جاري رکڻ جو يقين ڏياريندي چيو ته چين هر معاملي ۾ پاڪستان سان گڏ آهي ۽ هر چئلينج ۾ به ساڻس بيٺل هوندو.

 

چيني ڪمپنين سان 20 ارب ڊالرز کان وڌيڪ جا معاهدا ٿيندا: خواجه آصف

اسلام آباد (بيورو) پاڻي ۽ بجلي واري وفاقي وزير خواجه آصف چيو آهي ته پاڪستان ۽ چين ۾ اقتصادي راهداري منصوبو تقدير بدلائي ڇڏيندو،  مٽياري کان لاهور ۽ فيصل آباد تائين ٽرانسميشن لائينز به وڇايون وينديون. اسلام آباد ۾ ميڊيا سان ڳالهائيندي وفاقي وزير خواجه آصف چيو ته چيني ڪمپنين سان 20 ارب ڊالرز کان وڌيڪ جا معاهدا ٿيندا، ٽن سالن ۾ 8 هزار 300ميگاواٽ بجلي سسٽم ۾ ايندي. هن چيو ته حڪومت، عوام سان جيڪي واعدا ڪيا آهن، انهن کي پورو ڪرڻ ۽ ملڪ مان اونڌاهي جو خاتمو ڪرڻ جو وقت اچي ويو آهي. خواجه آصف چيو ته چيني صدر جي موجودگي ۾ معاهدن جي مٽاسٽا ٿيندي، ٻنهي ملڪن معاشي شعبي ۾ نئين تاريخ رقم ڪئي آهي. خواجه آصف چيو ته اقتصادي راهداري منصوبو خطي جي ترقي لاءِ سٺو ثابت ٿيندو، جڏهن ته مٽياري کان فيصل آباد ۽ مٽياري کان لاهور تائين به ٽرانسميشن لائينز وڇايون وينديون. وفاقي وزير  خواجه آصف اهو به چيو ته آءِ ايم ايف ۽ ٻين تي ڀاڙڻ جو وقت ختم ٿي ويو، پاڪستان کي هاڻي پاڻ ڀرو ٿي ويندو.

 

يمن جي معاملي تي پاڪستان ۽ ترڪي مصلحتي ڪردار ادا ڪري رهيا آهن: ناڻي وزير

اسلام آباد (بيورو) وفاقي ناڻي وزير سينيٽر اسحاق ڊار چيو آهي ته يمن جي معاملي تي پاڪستان ۽ ترڪي مصالحتي ڪردار ادا ڪري رهيا آهن ٻنهي گروپن کي ڳالهين جي ميز تي آڻڻ چاهيون ٿا خليجي ملڪن مان پاڪستانين کي بيدخل ڪرڻ جو ڪوئي امڪان نه آهي گناهگار ماڻهو آهيان حرمين شريفين جو دفاع ڪندي مرڻ لاءِ تيار آهيان پاڪستان جي سعودي عرب سان خاص ويجها لاڳاپا هئا قائم رکڻ چاهيونٿا حوثين جي مذمت ڪيون ٿا حڪومت جي برطرفي جي ڪنهن  هٿياربند گروپ کي اجازت نه هئڻ گهرجي آمريڪا جي دوري جي پڄاڻي تي ميڊيا سان ڳالهائيندي هڪ صحافي جي سوال جي جواب ۾ اسحاق ڊار چيو ته يمن جي تقرار ۾ پاڪستان جي موقف جي بنياد تي سينٽرل اوڀر ۾ ڪم ڪندڙ پاڪستاني ورڪرز جي اتان نڪرڻ تي مجبور نه ڪيو ويندو ناڻي وزير ٻڌايو ته پاڪستان ۽ سعودي عرب 1982 ۾ هڪ فوجي معاهدي تي صحيحون ڪيون هيون جنهن تحت سعودي عرب کي پاڪستاني فوجين جون خدمتون حاصل ڪرڻ جو حقدار قرار ڏنو ويو هو هن چيو ته هي انتظام هڪ مختلف مقصدن لاءِ هئا ۽ ان بابت ڳالهائڻ قومي مفاد ۾ نه آهي.

 

نادرا 73 تڪن جي فرانزڪ رپورٽ جوڊيشل ڪميشن ۾ جمع ڪرائي ڇڏي

اسلام آباد (بيورو) نادرا 73  تڪن جي فرانزڪ رپورٽ جوڊيشل ڪميشن ۾ جمع ڪرائي ڇڏي. نادرا ذريعن موجب جوڊيشل ڪميشن ۾ جمع ڪرايل رپورٽ 8 هزار کان وڌيڪ صفحن تي ٻڌل آهي، ياد رهي ته تحريڪ انصاف جي وڪيل عبدالحفيظ پيرزاده جوڊيشل ڪميشن ۾ پهرين ٻڌڻي جي موقعي تي اهو مطالبو ڪيو هو ته نادرا 73  تڪن جي فرانزڪ رپورٽ ناهي ڏئي رهيو جنهن تي جوڊيشل ڪميشن نادرا کي اها هدايت ڪري ڇڏي هئي ته آڱوٺن جي تصديق جو رڪارڊ ٽن ڏينهن اندر ڪميشن ۾ پيش ڪيو وڃي جنهن تي نادرا جي حڪام اها رپورٽ جمع ڪرائي ڇڏي.

 

پهرين مئي کان تيل اگهن ۾ لاٿ جو امڪان

اسلام آباد (بيورو) پهرين مئي کان پيٽروليم مصنوعات جي قيمتن ۾ ردوبدل جو امڪان آهي، پيٽرول هڪ رپيو 7 6  پئسا ۽ هاءِ اسپيڊ ڊيزل جي قيمت ۾ 2  رپيا 1 2  پئسا في ليٽر گهٽتائي جو امڪان آهي. ذريعن موجب پهرين مئي  ان پيٽروليم مصنوعات جي قيمتن ۾ تبديلي جو امڪان آهي، جنهن ۾ هاءِ اوڪٽين جي قيمت ۾ 7  رپيا 0 2  پئسا في ليٽر واڌ جڏهن ته هاءِ اسپيڊ ڊيزل جي قيمت ۾ 2  رپيا 1 2  پئسا گهٽتائي جو امڪان آهي ۽ لائيٽ ڊيزل 2  رپيا 5 3  پئسا في ليٽر مهانگي، پيٽرولي هڪ رپيو 7 6  پئسا سستو ٿيڻ جو امڪان آهي، گاسليٽ به هڪ رپيو 0 6  پئسا مهانگو ٿيڻ جو امڪان آهي.

 

رينجرز پاران ڪراچي جي شهرين کي شناختي ڪارڊ ساڻ رکڻ جي هدايت

ڪراچي (اسٽاف رپورٽر) رينجرز ترجمان پاران ڪراچي جي شهرين کي هر وقت پنهنجو شناختي ڪارڊ ساڻ رکڻ جي هدايت ڪئي وئي آهي. رينجرز ترجمان پاران جاري ڪيل بيان ۾ چيو ويو آهي ته ڪراچي جا شهري پنهنجو سڃاڻپ ڪارڊ هر وقت پاڻ سان گڏ رکن، شناختي ڪارڊ جي ڪاپي قابل قبول نه هوندي ۽ جيڪڏهن ڪنهن وٽ شناختي ڪارڊ نه ملندو ته کيس حراست ۾ ورتو ويندو جڏهن ته سڃاڻپ ثابت نه ٿيڻ تي کيس حراست ۾ رکيو ويندو. ترجمان جو چوڻ هو ته قانون لاڳو ڪندڙ ادارا شهر ۾ امن امان جي قيام لاءِ ڏينهن رات محنت ڪري رهيا آهن، شهري به اُن ۾ سيڪيورٽي ادارن جو ساٿ ڏين.

 

سپريم ڪورٽ گئس ڪمپنين کي چوري ۽ ليڪيج روڪڻ لاءِ حڪمت عملي جوڙڻ جو حڪم ڏيئي ڇڏيو

اسلام آباد (بيورو) سپريم ڪورٽ آف پاڪستان گئس ڪمپني کي چوري ۽ ليڪيج روڪڻ لاءِ حڪمت عملي بنائڻ جو حڪم ڏيئي ڇڏيو جڏهن ته جسٽس دوست محمد چيو ته گئس جي ليڪيج ۽ چوري قومي خزاني ۽ انساني جانين لاءِ نقصانڪار آهي شهري کي 40 لک رپيا بل موڪلڻ بابت ڪيس ۾ پشاور هاءِ ڪورٽ جي فيصلي جي خلاف ايس اين جي پي ايل جي درخواست تي ٻڌڻي جسٽس دوستمحمد جي سربراهي ۾ ٽه رڪني بئنچ ڪندي جسٽس دوست محمد ريمارڪس ڏنا ته گئس ڪمپني هڪ شهري کي 40 لک رپين جو بل اماڻيو جيتوڻيڪ ان شهري جي ماهوار آمدني صرف 16 هزار رپيا هئي ججز ڪالوني ۾ گئس پائيپ لائينس ان ليڪيج جي شڪايت جي باوجود ڪوئي چيڪ ڪرڻ نه آيو گئس ڪمپنين جو ليڪيج چيڪ ڪرڻ جو ڪوئي مڪينيزم نه آهي عدالت قرار ڏنو ته گئس جي ليڪيج ۽ چوري قومي خزاني ۽ انساني جانين لاءِ نقصانڪار آهي گئس ڪمپنيون ماهوار بنيادن تي پائيپ لائينز سان ليڪيج چيڪ ڪن سپريم ڪورٽ گئس ڪمپني کي چوري ۽ ليڪيج روڪڻ لاءِ حڪمت عملي جوڙڻ جو حڪم ڏيندي 40 لک رپيا بل بابت سوئي نادرن گئس ڪمپني جي اپيل اڪلائي ڇڏي.