تازيون خبرون

Daily Archives: April 20, 2015

پوليس جي بهترين ڪارڪردگي سبب صوبي ۾ امن قائم ٿيو آهي: قائم علي شاهه

خيرپور(ڊ.ر) سنڌ جي وڏي وزير سيد قائم علي شاهه چيو آهي ته پيپلزپارٽي حڪومت اچڻ کان اڳ ۾ صوبي اندر رُڳو 3 سرڪاري يونيورسٽيون هيون جڏهن ته اسانجي حڪومت جي اچڻ سان 9 نيون يونيورسٽيون قائم ڪيون ويون آهن، خيرپور ميڊيڪل ڪاليج صوبي جو بهترين ميڊيڪل ڪاليج ثابت ٿيندو جنهن لاءِ فيڪلٽي جي وڌ کان وڌ محنت جي ضرورت آهي. هن اهڙو اظهار خيرپور ميڊيڪل ڪاليج جي ڪانفرنس هال ۾ ميڊيڪل ڪاليج جي بريفنگ بابت ڪوٺايل تقريب کي خطاب دوران ڪيو. هن چيو ته خيرپور ميڊيڪل ڪاليج کي هڪ نئون ۽ سٺو نالو ڏنو ويندو ۽ هتانجو ڪاليج هن علائقي جي ماڻهن لاءِ بهترين تحفو آهي. هن چيو ته پيپلزپارٽي جي حڪومت هميشه تعليم ۽ صحت جي شعبن ۾ بهتري آڻڻ جي ڪوشش ڪئي آهي جڏهن ته شهيد محترمه بينظيرڀٽو شهيد ٿيڻ کان اڳ ۾ هڪ پارٽي منشور جاري ڪيو هو جنهن ۾ “تعليم سڀني  جي لاءِ” ۽ “ روزگار سڀني جي لاءِ” انهن ٻنهي نقطن تي عمل ڪندي پيپلزپارٽي حڪومت عوام جي لاءِ بهترين ۽ معياري تعليمي ادارا جوڙيا آهن جڏهن ته روزگار جا موقعا پڻ فراهم ڪيا ويا آهن. هن وڌيڪ چيو ته صوبي اندر امن امان جي صورتحال بهتر بڻائڻ لاءِ وڌ کان وڌ قدم کنيا ويا آهن ۽ هن وقت صوبي ۾ ڪوبه سنگين ڏوهن جي ڪابه واردات نه ٿي آهي ۽ نه ئي ڀنگ لاءِ ڪنهن ماڻهو کي اغوا ڪيو پيو وڃي، سنڌ پوليس جي بهترين ڪارڪردگي جي نتيجي ۾ صوبي اندر امن قائم ٿيو آهي. وڏي وزير ان موقعي تي خيرپور ميڊيڪل ڪاليج جي نئين ڀرتي ٿيل فيڪلٽي ميمبرن ۽ ٻئي اسٽاف کي جلد ريگيولر ڪرڻ ۽ ٻيا مطالبا مڃڻ جو يقين ڏياريو. ان موقعي تي وڏي وزير خيرپور ۾ قائم ٿيندڙ جديد سهولتن سان ڀرپور سول اسپتال جي پراجيڪٽ ڊائريڪٽر ڊاڪٽر سريش ڪمار کي ڊسمبر 2015ع تائين ترقياتي ڪم مڪمل ڪرڻ جي هدايت پڻ ڪئي. تقريب ۾ خيرپور ميڊيڪل ڪاليج جي پرنسپال پروفيسر ڊاڪٽر مشور عالم شاهه بريفنگ ڏني ته ڪاليج مان 944 داخلا فارم جاري ڪيا ويا آهن، جڏهن ته 165 فارم جمع ٿيا آهن، جنهن ۾ وڌ ۾ وڌ شاگردياڻين جي دلچسپي ظاهر ٿي آهي. هن ڪاليج جي ٻي نئين بلڊنگ لاءِ 28 ايڪڙ زمين پڻ منظور ٿي وئي آهي، جڏهن ته موجوده بلڊنگ 1.65 ايڪڙن تي ٻڌل آهي، جنهن ۾ مختلف شعبا ۽ گرلز هاسٽل پڻ شامل آهي. هن وڌيڪ ٻڌايو ته خيرپور ميڊيڪل ڪاليج اندر جلد رهيل سينئر پوسٽون ڀريون وينديون، جڏهن ته پرنسپال وڏي وزير کان ڪاليج جي مختلف سائنسي ليبارٽرين جي اوزارن جي فراهمي جي گذارش ڪئي ۽ فيڪلٽي ميمبرن جي رهائش لاءِ سول اسپتال خيرپور ڀرسان رهائشي ڪالوني جي پڻ گذارش ڪئي. ان موقعي تي ڪمشنر سکر ڊويزن محمد عباس بلوچ خطاب ڪندي چيو ته خيرپور ميڊيڪل ڪاليج سنڌ جي وڏي وزير قائم علي شاهه جو هڪ پراڻو خواب هيو، جيڪو پورو ٿيو آهي ۽ گذريل پنجن سالن ۾ خيرپور اندر جديد تعليمي اداران جو ڄار وڇايو ويو آهي. تقريب کانپوءِ سنڌ جي وڏي وزير سيد قائم علي شاهه خيرپور ميڊيڪل ڪاليج جا مختلف شعبا، هاسٽل ۽ ڪلاس روم گهمي ڏٺا ۽ لاڳاپيل اختيارين کان بريفنگ ورتي. ان موقعي تي ميڊيا سان ڳالهائيندي وڏي وزير سيد قائم علي شاهه چيو ته خيرپور جا تعليمي ادارا مضبوط ڪيا ويا آهن ۽ اُنهن جون سموريون ضرورتون پوريون ڪندا سون، خيرپور 1955 جيان تعليمي ميدان ۾ سڀني کان اڳتي نڪري ويندو، شهيد ذوالفقار علي ڀٽو ۽ شهيد راڻي محترمه بينظيرڀٽو جي نظرين تي عمل ڪيو پيو وڃي. هن چيو ته خيرپور ميڊيڪل ڪاليج ايڊوانس ڪارڪردگي ڏيکاري تعليمي ميدان ۾ پنهنجو پاڻ مڃرائيندي. وڏي وزير چيو ته خيرپور وارن لاءِ خوشي جهڙي ڳالهه آهي جو هتي ميڊيڪل، انجنيئرنگ ۽ زرعي ڪاليجن سميت ڪيڊٽ ڪاليج، آءِ ٽي ۽ آءِ بي اي سميت ٻيا وڏا تعليمي ادارا قائم ڪيا ويا آهن. ان موقعي تي وڏي وزير سان سندس پوليٽيڪل سيڪريٽري لعل بخش منگي، ڊپٽي ڪمشنر خيرپور منور علي مٺاڻي، پرسنل سيڪريٽري مظهر خان ، ڊي ايڇ او ڊاڪٽر صدرالدين صديقي، ايم ايس ڊاڪٽر غلام جعفر سومرو ۽ ٻيا ساڻس گڏ هئا.

 

نئين پاڪستان جو خواب ڪراچي کانسواءِ پورو نٿو ٿي سگهي: عمران خان

ڪراچي (اسٽاف رپورٽر) تحريڪ انصاف جو ايم ڪيو ايم جي ڳڙهه عائشه منزل تي ڀرپور طاقت جو مظاهرو، جلسي ۾ هزارين ماڻهن جي شرڪت. جلسي کي خطاب ڪندي تحريڪ انصاف جي چيئرمين عمران خان چيو آهي ته هڪ سيٽ کٽڻ سان تحريڪ انصاف کي ڪوبه فرق نه پوندو پر رينجرز جي موجودگي ۾ 23 اپريل تي ڏسون ٿا ته ايم ڪيو ايم کي ڪيترا ووٽن ٿا پون. عائشه منزل تي جلسي کي خطاب ڪندي عمران خان جو چوڻ هو ته هندوستان مان هجرت ڪري ايندڙن ڪراچي شهر کي ٺاهيو يو ۽ محنت ۽ جدوجد سان اُهي سب تيزي سان مٿي ويا، فوج، ڪرڪٽ، هاڪي، بيوروڪريٽس سميت هر شعبي ۾ مهاجر سڀ کان اڳتي هئا پر کين ڇا ٿيو، 1985 تائين جيڪو شهر ملڪ کي ليڊرشپ ڏيندو هو اُن کي ڇا ٿي ويو، اُهو شهر جتي سڄي پاڪستان ماڻهو نوڪرين جي ڳولا ۾ ايندا هئا، جڏهن کان مهاجرن جي نالي تي سياست ٿي اُن کانپوءِ مهاجرن جون صلاحيتون مٿي وڇڻ بجاءِ هيٺ اچي ويون. عمران خان چيو ته ڪراچي پاڪستان جو معاشي حب آهي جيڪڏهن هتي امن نه ٿيندو ته ملڪ اڳتي نه وڌندو جيڪڏهن امن نه هوندو ته سرمائيڪار پاڪستان ۾ نه ايندا، ڪراچي ۾ وڏا وڏا سرمائيڪار رهن ٿا اُنهن کان پڇو ڇو اُهي ٻاهر وڃي رهيا آهن. هن چيو ته گذريل ڏينهن الطاف حسين جي تقرير ٻڌي، ڪڏهن الطاف حسين سنجيده ٿي وڃي ٿو ته ڪڏهن روئڻ شروع ڪري ڏي ٿو. ڪڏهن مذاق ڪري ٿو ته ڪڏهن گانا شروع ڪري ڏي ٿو، مون ريحام خان کي چيو ته هي اُهو شهر آهي جتي سڀ کان وڌيڪ پڙهيل لکيل ماڻهو رهندا هئا اُهي اُها تقرير ڪيئن ٻڌي رهيا آهن. دنيا ۾ ڪابه اهڙي مثال ناهي ته 23 سال تائين ليڊر باهر ويٺل هجي ۽ سندس پارٽي حڪومت ۾ ويٺل هجي. عمران خان چيو ته اين اي 246 جي ماڻهن کي چوان ٿو ته ڪراچي جي مستقبل جي فيصلن لاءِ 23 اپريل تي گهرن مان ٻاهر نڪري ووٽ ڏيڻو آهي. مجلس وحدت المسلمين اسان جي حمايت ڪئي جنهن تي سندن ٿورائتو آهيان. اين اي 246 ۾ رهندڙ اسماعيلن کي به چوندس ته اُهي 23 اپريل تي ٻاهر نڪرن ۽ اسانجو ساٿ ڏين. ارُدو ڳالهائيندڙن کي به اپيل آهي ته اُهي اسان جو ساٿ ڏين.  ان کان اڳ ۾ جلسي کي خطاب ڪندي تحريڪ انصاف جي وائيس چيئرمين شاهه محمود قريشي جو چوڻ هو ته جڏهن ڪراچي ڳالهائيندو آهي ته پاڪستان ٻڌندو آهي، تاريخ ٻڌائي ٿي ته هر تحريڪ ڪراچي کان شروع ٿي پر هاڻي شهر جي سياست تحريڪن کي محدود ڪري رکيو آهي، پاڪستان ايوب خان جي جهولي ۾ ۽ ڪراچي محترمه فاطمه جناح سان گڏ هو، جڏهن ته ڪراچي ۾ گذريل 3 ڏهائين کان ايم ڪيو ايم اقتدار ۾ آهي ۽ موجوده حالتن جي ذميوار به اُها ئي آهي. جلسي کي خطاب ڪندي اين اين اي 246 جي اميدوار عمران اسماعيل جو چوڻ هو ته مخالف هاڻي ڪراچي بند ڪري ڏيکارين هاڻي ڪنهن کان به ڊڄڻ وارا ناهيون، چيو وڃي ٿو ته ايم ڪيو ايم غريبن جي پارٽي آهي پر اُن ۾ اچڻ کانپوءِ ڪيترائي ماڻهو سرمائيڪار بڻجي ويا جڏهن ته عام چونڊن ۾ کين نبيل گبول اميدوار مليو جيڪو گهر وٺي هڪ لک کان ووٽ ووٽ حاصل ڪيا.

چين جو صدر زي جن پنگ اڄ سرڪاري دوري تي اسلام آباد پهچندو

اسلام آباد (بيورو) چين جو صدر پاڪستان جي ٻن ڏينهن جي سرڪاري دوري تي اڄ اسلام آباد پهچندو، زي جن پِنگ جو چوڻ آهي ته پاڪ – چين دوستي مضبوط وڻ جيان بڻجي چـُڪي آهي. پاڪستان آمد تي چيني صدر جي شاندار آجيان ڪئي ويندي جنهن لاءِ سموريون تياريون مڪمل ڪيون ويون آهن. وفاقي گادي واري شهر جي شاهراهن کي ڪنوار جيان سجايو ويو آهي، جڏهن ته زي جن پنگ کي ايوان صدر ۾ خاص تقريب دوران پاڪستان جو سڀ کان وڏي سول اعزاز نشان پاڪستان سان نوازيو ويندو. چيني صدر جو هــِي هڪ هلندڙ سال جو پهريون پرڏيهي دورو هوندو، ساڻس گڏ خاتون اول، وزير، ڪميونسٽ پارٽي جا اڳواڻ، اعليٰ سرڪاري عملدار ۽ سيڙپڪار ڪمپنين جا سربراهه به هوندا. چيني صدر زي جن پِنگ جي مان ۾ صدر ممنون حسين مانجهاندو ڏيندو جتي ٻنهي سربراهن وچ ۾ ملاقات ٿيندي. ان کان پوءِ چيني صدر وزيراعظم نواز شريف سان باضابطا ملاقات ڪندو جڏهن ته زي جن پِنگ پارليامينٽ جي گڏيل اجلاس کي به خطاب ڪندو. چيني صدر زي جن پِنگ جوائنٽ چيفس آف اسٽاف ڪميٽي جنرل راشد محمود، آرمي چيف جنرل راحيل شريف، ايئرچيف مارشل سهيل امان ۽ نيول چيف ايڊمرل ذڪاءُ الله سان به ملاقاتون ڪندو. چيني صدر جي دوري دوران ٻنهي ملڪن وچ ۾ توانائي، مواصلات، بنيادي ڍانچي سميت مختلف شعبن ۾ اربين ڊالرز جي 47 معاهدن تي صحيحين جو امڪان آهي. چيني صدر زي جن پنگ جو چوڻ آهي ته پاڪ چين دوستي مضبوط وڻ جيان بڻجي چـُڪي آهي. هڪ بيان ۾ چيني صدر چيو ته هـُو جواني ۾ پاڪ چين دوستي جون ڪهاڻيون ٻـُڌندو هو. زي جن پنگ جو چوڻ آهي ته چيني عوام پاڪستان کي وفادار دوست سمجهي ٿو، گڏيل قومن ۾ پاڪستان چين جي حقن جي حمايت ڪئي.

 

يمني باغي ڪمزور ٿي چڪا : سعودي فوجي ترجمان

رياض (م.ڊ) سعودي اتحادي فوج جي ترجمان چيو آهي ته يمني باغي ڪمزور ٿي چڪا آهن ڪنهن کي سعودي عرب جي فضائي حدن جي خلاف ورزي نه ڪرڻ ڏينداسين ميڊيا کي بريفنگ ڏيندي سعودي اتحادي فوج جي ترجمان  برگيڊيئر جنرل احمد العسيري چيو ته حوثي باغين يمن جي علائقي لهج کان ڪيترائي رضاڪار اغوا ڪيا آهن حوثي باغي شخصت کان پوءِ صنعا مان جنگي سامان کڻي ٻين علائقن ڏانهن ڀڄي رهيا آهن هن چيو ته آمريڪي ملڪ جيوتي اتحادي فوج لاءِ زميني ۽ فضائي رستا کولي ڇڏيا آهن يمني فضائي حدن ۾ داخلا لاءِ جهازن کي اتحادي ملڪن کان اجازت وٺڻي پوندي ڪنهن کي سعودي عرب جي فضائي حدن جي خلاف ورزي جي اجازت نه ڏني ويندي.

 

والاريل ڪشمير ۾ تشدد سان آزادي واري تحريڪ کي دٻائي نه ٿو سگهجي:پاڪستان

اسلام آباد (بيورو) پرڏيهي کاتي جي ترجمان تسنيم اسلم چيو آهي ته والاريل ڪشمير ۾ ڀارتي فوج طرفان آزادي واري تحريڪ کي دٻائڻ لاءِ طاقت جو وحشياڻو استعمال ڪيو ويو پر ان سان تحريڪ کي نه ٿو روڪي سگهجي. پرڏيهي ترجمان تسنيم اسلم پنهنجي بيان ۾ چيو ته پاڪستان ڀارتي فوج هٿان بي گناهه ڪشميرين جي قتل جي مذمت ڪري ٿو. هن چيو ته پاڪستان ڪشميرين جي سياسي، اخلاقي ۽ سفارتي حمايت جاري رکندو، ڀارتي فوج جي طاقت جو وحشياڻو استعمال انساني حقن جي ڀڃڪڙي آهي. سندس چوڻ هو ته پاڪستاني حڪومت کي قابض فوجين هٿان ٻن ڪشميري نوجوانن جي شهادت تي انتهائي افسوس ۽ سوڳوار خاندانن سان دلي همدردي آهي. تسنيم اسلم چيو ته ڪشمير مسئلو عوامي خواهشن موجب حل ٿيڻ گهرجي، پاڪستان مسئلي جي حل لاءِ هميشه ڳالهين جي حمايت ڪئي آهي ڇو ته ظلم سان ڪشميرين جي جدوجهد آزادي کي دٻائي نه ٿو سگهجي.

 

چيني حڪومت توانائي، دفاع ۽ اسٽريٽجڪ شعبن سميت مختلف شعبن ۾ 45 ارب ڊالرن جي سيڙپڪاري ڪندي: پرويز رشيد

اسلام آباد (بيورو) سڌسماءَ جي وفاقي وزير پرويز رشيد چيو آهي ته چيني حڪومت توانائي دفاع ۽ اسٽريٽجڪ شعبن سميت مختلف شعبن ۾ 45 ارب ڊالرن جي سيڙپڪاري ڪندي حڪومت جو عوام جي خدمت تي يقين آهي عام ماڻهن جي فائدي لاءِ انهيءَ جذبي سان ڪم ڪندي رهندي هن چيو ته پاڪستان ۽ ڇين وچ ۾ مضبوط دوستي آهي هن چيني صدر زي جن پنگ جي ايندڙ پاڪستان جي دوري کي وڏي اهميت وارو دورو قرار ڏنو جنهن دوران مختلف منصوبن تي صحيحون ٿينديون هن چيو ته چيني حڪومت توانائي دفاع ۽ اسٽريٽرڪ شعبن سميت مختلف شعبن ۾ 45 ارب ڊالرن جي سيڙپڪاري ڪندي چين پاران هي وڏي سيڙپڪاري هوندي جنهن ۾ سمورو انفرااسٽريڪچر ۽ سماجي اقتصادي ترقي جا شعبا شامل هوندا.

 

پاڪستان ۽ ڀارت بامقصد ڳالهيون ٻيهر شروع ڪرڻ جي ضرورت آهي: اسحاق ڊار

اسلام آباد (بيورو) وفاقي ناڻي وزير سينيٽر اسحاق ڊار چيو آهي ته پاڪستان ۽ ڀارت بامقصد  ڳالهيون ٻيهر شروع ڪرڻ جي ضرورت آهي جنهن ۾ واپار ۽ ڪشمير جي مسئلي سميت سمورا اشوز شامل ٿيڻ گهرجن وفاقي ناڻي وزير سينيٽر اسحاق ڊار آمريڪي نائب پرڏيهي وزير مس ڪيٿرين نوويل سان ملاقات ڪئي ۽ 22 مهينن دوران پاڪستان جي معاشي ڪارڪردگي جي تفصيل کان آگاهه ڪيو ناڻي وزير آمريڪي نائب پرڏيهي وزير کي پرڏيهي ناڻي مٽا سٽا جي ذخيرن ۾ واڌ ناڻي واڌ جي شرح ۾ لاٿ ۽ ٻين قدمن کان آگاهه ڪيو. هن چيو ته آمريڪا پاران پاڪستان کي آمريڪا پاڪستان ڪلين توانائي چئلينج ۾ پاڪستان کي شامل ٿيڻ جي تجويز ڏني جنهن جي تحت آمريڪا خاص طور تي قابل تجديد توانائي جي منصوبن ۾ تعاون ڪندو.

 

25 اپريل تي ڪنٽومينٽ بورڊز جي چونڊن ۾ ن ليگ تاريخي ڪاميابي ماڻيندي: سعد رفيق

اسلام آباد (بيورو) وفاقي ريلوي وزير خواجه سعد رفيق چيو آهي ته 25 اپريل تي ڪنٽومينٽ بورڊز جي چونڊن ۾ مسلم ليگ (ن) انشاءُالله تاريخي ڪاميابي ماڻيندي جيڪا 2013 جي عام چونڊن ۾ پاڪستان مسلم ليگ (ن) کي ملندڙ مينڊيٽ جي توثيق ثابت ٿيندي آچر تي هڪ جاري ٿيان بيان ۾ هن چيو ته شينهن جو نشان ئي مضبوط ۽ مستحڪم پاڪستان جي ضمانت آهي هن چيو ته وزيراعظم محمد نوازشريف جي قيادت ۾ پاڪ چين دوستي جي شاهراه تي ترقي خوشحالي جي عظيم سفر جو آغاز ٿي ويو آهي.

 

اين اي246: ن ليگ جماعت اسلامي جي حمايت ڪري ڇڏي

ڪراچي (اسٽاف رپورٽر) پاڪستان مسلم ليگ ن ۽ جميعت علماءِ پاڪستان اين اي 246 جي ضمني چنڊن ۾ جماعت اسلامي جي اميدوار راشد نسيم جي حمايت جو اعلان ڪري ڇڏيو آهي. اهڙو اعلان مسلم ليگ (ن) سنڌ جي صدر اسماعيل راهو مسلم ليگ هائوس ۾ حافظ نعيم الرحمان جي قيادت ۾ جماعت اسلامي جي وفد سان ملاقات بعد پريس بريفنگ دوران ڪيو جڏهن ته جميعت علماءِ پاڪستان جي اڳواڻ قاضي احمد نوراني ، مولانا شوڪت مغل سان گڏ اداره نور حق ۾ ملاقات بعد پريس بريفنگ دوران ڪيو . مسلم ليگ ن جي هائوس ۾ ملاقات جي موقعي تي مسلم ليگ ن سنڌ جو جنرل سيڪريٽري نهال هاشمي ، سينيٽر سليم ضياءَ،  جماعت اسلامي ڪراچي جو اميدوار راشد نسيم، نائب امير جماعت اسلامي سنڌ محمد حسين محنتي ، ڪراچي جا نائب امير برجيس حمد ۽ مسلم پرويز، سيڪريٽري عبد الوهاب ، ضلعي امير منعم ظفر ۽ ٻيا پڻ موجود هئا.امير جماعت اسلامي ڪراچي حافظ نعيم الرحمان ۽ اين اي 246 جي اميدوار راشد نسيم تڪ اين اي 246 ۾ جماعت اسلامي جي اميدوار جي حمايت ڪرڻ تي پاڪستان مسلم ليگ (ن) ۽ جميعت علماءِ پاڪستان جو شڪريو ادا ڪيو ۽ چيو ته اسان ڪراچي شهر جي تعمير ۽ ترقي ۾ پهريون به پنهنجو ڪردار ادا ڪري رهيا آهيون ۽ اڳتي به ڪندا رهنداسين. هن چيو ته 23 اپريل تي ڪراچي ۾ هڪ نئين تاريخ رقم ٿيندي هن چيو ته ٻنهي پارٽين جماعت اسلامي جي حمايت ڪري ثابت ڪيو آهي ته هو پر امن ڪراچي ، خوشحال پاڪستان جي خواب جي ساڀيان چاهين ٿا. مسلم ليگ ن سنڌ جي صدر اسماعيل راهو چيو ته اسان ڪراچي شهر ۾ خوشحالي ۽ امن جي خاطر تڪ اين اي 246 تي جماعت اسلامي جي اميدوار راشد نسيم جي مڪمل طور تي حمايت ڪيون ٿا ۽ اها حمايت صرف پريس ڪانفرنس تاين محدود نه هوندي پر راشد نسيم جي مڪمل طور تي سپورٽ ۽ ان جي چنڊ مهم ۾ پڻ ڀرپور حصو وٺنداسين جڏهن ته اڄ جماعت اسلامي پاران نڪرندڙ ريلي ۾ به مسلم ليگ ن جا ڪارڪن وڏي انگ ۾ شرڪت ڪندا هن چيو ته تڪ اين اي 246 جي عوام کي سوچي سمجهي فيصلو ڪرڻ گهرجي ته هو انهن ماڻهن کي ووٽ ڏين جيڪي شهر کي خوشحال ۽ پر امن بنائڻ چاني ٿا.شهر ۾ امن جي خاطر اسان کي اڳتي به گڏجي ڪري ڪم ڪرڻ جي ضرورت آهي هن چيو ته اسان کي اميد آهي ته اسان جو حمايت يافته جماعت اسلامي جو اميدوار راشد نسيم 23 اپريل تي تڪ 246 تان ڪاميابي ماڻيندو.قاضي احمد نوراني چيو ته جماعت اسلامي هميشه ڪراچي جي امن ۽ خوشحالي وارو ماحول پيدا ڪرڻ ۾ اهم ڪردار رهيو آَهي ، جميعت علماءِ پاڪستان ، جماعت اسلامي جي نامزد ڪيل اميدوار راشد نسيم جي حمايت جو اعلان ڪري ٿي ۽ عوام کي اپيل آهي ته 23 اپريل تي ڪراچي جي وسيع تر مفاد جي خاطر ۽ شهر ۾ امن امان جي لاءِ ( ترازو) کي ڪامياب بنائي

 

خيبر ايجنسي ۾ فورسز سان چڪريون، 5 دهشتگرد مارجي ويا، 3 اهلڪار زخمي

خيبرايجني (مانيٽرنگ ڊيسڪ) خيبر ايجنسي جي تيره ماٿري ۾ سڪيورٽي فورسز سان چڪرين دوران 5 دهشتگرد مارجي ويا جڏهن ته 3 اهلڪار زخمي ٿي پيا. تيره ماٿري جي نيري بابا واري علائقي ۾ سڪيورٽي فورسز ۽ دهشتگردن وچ ۾ چڪريون ٿيون. چڪرين دوران 5 دهشتگرد مارجي ويا جڏهن ته 3 سڪيورٽي اهلڪار زخمي ٿي پيا جن کي سي ايم ايڇ پشاور منتقل ڪيو ويو جتي کين طبي امداد فراهم ڪئي پئي وڃي. ياد رهي ته اتر وزيرستان وانگر خيبر ايجنسي ۾ به دهشتگردن خلاف آپريشن جاري آهي جنهن ۾ هن وقت تائين ڪيترن ئي دهشتگردن کي انجام تائين پهچايو ويو آهي.