تازيون خبرون

Daily Archives: April 18, 2015

پابندي مڙهيل تنظيمن جي سرپرستي ڪندڙن خلاف ڪارروائي جو فيصلو

ڪراچي (اسٽاف رپورٽر) سنڌ جي وڏي وزير سيد قائم علي شاهه جي صدارت ۾ ايپڪس ڪميٽي جو اجلاس ٿيو جنهن ۾ پابندي مڙهيل تنظيمن جي سرپرستي ڪندڙن خلاف ڪارروائي سميت اهم فيصلا به ڪيا ويا. سنڌ جي وڏي وزير سيد قائم علي شاهه جي صدارت ۾ ايپڪس ڪميٽي جو اجلاس ٿيو جنهن ۾ سنڌ جي گورنر ڊاڪٽر عشرت العباد، شرجيل ميمڻ، چيف سيڪريٽري، گهرو سيڪريٽري، ڊي جي رينجرز، آئي جي سنڌ، ڪورڪمانڊر ڪراچي ليفٽيننٽ جنرل نويد مختيار به شرڪت ڪئي جڏهن ته پيپلزپارٽي جي نائب صدر شيري رحمان به خاص طور تي اجلاس ۾ شريڪ ٿي. ايپڪس ڪميٽي جي اجلاس ۾ فوجي عدالتن ۾ وڌيڪ ڪيس موڪلڻ ۽ نيشنل ايڪشن پلان تي عملدرآمد بابت معاملن تي غور ڪيو ويو جڏهن ته ايپڪس جي ذيلي ڪميٽين، انٽيليجنس ۽ ليگل ڪميٽين اجلاس کي بريفنگ ڏني.صوبائي ايپڪس ڪميٽي  جي اجلاس ۾ اهم فيصلا ڪيا ويا جن ۾ پابندي مڙهيل تنظيمن جي سرپرستي ڪندڙن ۽ دهشتگردن کي معاونت فراهم ڪندڙن خلاف ڪارروائي جو فيصلو ڪيو ويو جڏهن ته ڪميٽي ڪراچي ۾ غيرقانوني هٿيار جمع ڪرائڻ لاءِ آخري موقعو ڏيڻ ۽ هٿيارن جي نمائش ڪندڙن خلاف ڪارروائي تيز ڪرڻ جو به حڪم ڏنو. ان کان اڳ ۾ وڏي وزير سيد قائم علي شاهه، گورنر ڊاڪٽر عشرت العباد خان ۽ ڊي جي رينجرز بلاول اڪبر وچ ۾ ملاقات ٿي جنهن ۾ صوبي ۽ خاص طور تي ڪراچي ۾ جاري ٽارگيٽڊ آپريسن سميت اهم معاملن تي خيالن جي ڏي وٺ ڪئي وئي.

 

سي جي لنڪ ڪئنال ۾ پاڻي ڇوڙ تي سنڌ اسيمبلي ميمبر هڪ ٿي ويا، احتجاج، ٺهراءُ منظور

ڪراچي (اسٽاف رپورٽر) سنڌ اسيمبلي چشما جهلم لنڪ ڪئنال ۾ پاڻي ڇوڙ ڪرڻ واري ارسا جي فيصلي خلاف ٺهراءُ منظور ڪري ورتو، جنهن ۾ مطالبو ڪيو ويو آهي ته ارسا جي فيصلي کي ڪالعدم قرار ڏنو وڃي، جڏهن ته حساس جاين جي سڪيورٽي انتظامن بابت بل 2015ع پڻ پاس ڪيو ويو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو. اجلاس دوران پيپلز پارٽي پاران سينيئر صوبائي وزير نثار کهڙي چشما جهلم لنڪ ڪئنال ۾ پاڻي ڇڏڻ واري ارسا جي فيصلي خلاف ٺهراءُ پيش ڪيو. صوبائي وزير نثار کهڙي چيو ته 8 هزار ڪيوسڪ پاڻي ڇڏڻ وارو مطالبو هڪ صوبي طرفان ڪيو ويو، چشما جهلم  لنڪ ڪئنال برساتي ڪئنال آهي جتي صوبن جي ضرورت پوري ڪرڻ کانسواءِ پاڻي نه ٿو ڇڏي سگهجي. هن چيو ته خريف جي مـُند شروع ٿي چـُڪي آهي، سنڌ جي حصي مان پاڻي جي ڪٽوتي ناانصافي آهي. نثار کهڙي چيو ته ارسا قانون جي ڀڃڪڙي ڪندي چشما جهلم لنڪ ڪئنال ۾ پاڻي ڇڏڻ جو فيصلو ڪيو آهي، سنڌ حڪومت کي فيصلي خلاف گڏيل مفادن واري ڪائونسل ۾ آواز اٿارڻ گهـُرجي. سينيئر صوبائي وزير مطالبو ڪيو ته چشما جهلم ڪئنال ۾ پاڻي وهائڻ واري ارسا جي فيصلي کي ڪالعدم قرار ڏنو وڃي. سندس چوڻ هو ته بجلي جي پيداوار جي نالي تي پاڻي جي غير منصفاڻي ورڇ ڪري سنڌ کي بحران ۾ وڌو پيو وڃي. صوبائي وزير ڊاڪٽر سڪندر مينڌري چيو ته چشما جهلم لنڪ ڪئنال کي هوڏ تحت هلائڻ ماضي جي عادت بڻيل آهي. هن چيو ته پنجاب طرفان هڪ طرفو ۽ من پسند فيصلو ڪيو ويندو آهي، سـِي جـَي لنڪ ڪئنال کي وهائڻ سنڌ جي پاڻي جي حق تي ڌاڙو هڻڻ برابر آهي. متحده ميمبر سيد سردار احمد چيو ته ارسا طئي ٿيل معاهدي جي ڀڃڪڙي ڪئي آهي، ارسا کي گڏيل فيصلو ڪرڻ گهرجي ۽ تڪراري فيصلي کان پاسو ڪيو وڃي. مهتاب اڪبر راشدي چيو ته ارسا ۾ سنڌ جو نمائندو ڇا پيو ڪري؟ اڪثر ڏٺو ويو آهي ته سنڌ جو نمائندو اجلاس دوران منهن ۾ آڱر وجهي دٻائي ويهندو آهي. هن چيو ته ڪوٽڙي ڊائون اسٽريم ۾ پاڻي ڇڏڻ وارو معاملو به تڪراري بڻايو پيو وڃي، ڪوٽڙي ڊائون اسٽريم ۾ پاڻي نه ڇڏڻ سبب لکين ايڪڙ زمين سمنڊ ڳڙڪائي رهيو آهي. ڪجهه دير بحث کانپوءِ ايوان چشما جهلم لنڪ ڪئنال کي اتفاق راءِ سان منظور ڪري ورتو. اجلاس دوران صوبائي وزير ڊاڪٽر سڪندر مينڌري، سنڌ جي حساس جاين جي سڪيورٽي انتظامن بابت بل 2015ع پيش ڪيو جيڪو اتفاق راءِ سان منظور ڪيو ويو.

 

چيني صدر جو دورو پاڪستان اقتصادي راهداري جي منصوبن تي 46 بلين ڊالر سرمايه ڪاري جو امڪان

لاهور (م.ڊ) چيني صدر زي جنگ پنگ پاڪستان جو دوري دوران 32 منصوبن تي دستخط ڪيا ويندا. ۽ دوست ملڪ چين اقتصادي راهداري جي منصوبن تي 46 بلين ڊالر جي سرمايه ڪاري جو اعلان ڪندو. ذريعن موجب چيني صدر جو دورو پاڪستان ۾ توانائي بحران جو خاتمي جي لاءِ وزارت پاڻي ۽ بجلي سان گڏ 15 منصوبن تي دستخط ڪيا ويندا.  جڏهن ته خزاني وارو وزير سان گڏ 5 منصوبن تي دستخط ڪندو ان کان علاوه وزارت منصوبه بندي و ترقي سان گڏ 4، وزارت پورٽس اينڊ شپنگ سان گڏ 2 جڏهن اٽامڪ انرجي ڪميشن سان گڏ 3 ۽ پاڪستان ريلوي ۽ پنجاب حڪومت سان گڏ متعدد منصوبن تي دستخط ڪيا ويندا. مهمان صدر جو دورو پاڪستان سان اقتصادي راهداري جي منصوبن جو به افتتاح ڪيوويندو. ان کان علاوه چين جي تعاون سان پاڪستان ۾ شروع ٿيڻ واري متعدد منصوبن جو افتتاح به ڪيو ويندو. چين خطي ۾ نئين اقتصادي رستا کولڻ چاهي ٿو جنهن جو مقصد امريڪا اجاره داري کي چيلنج ڪرڻ آهي.

 

سول ۽ فوجي لاڳاپن ۾ بهتري لاءِ ڪابينا ۽ سلامتي ڪميٽي ڪافي نه آهن: رضا رباني

اسلام آباد (بيورو) سينيٽ چيئرمين رضا رباني چيو آهي ته سول ۽ فوجي لاڳاپن ۾ بهتري لاءِ ڪابينا ۽ سلامتي ڪميٽي ڪافي نه آهن، ماضي ۾ فوج جو پاسو ڳرو رهيو آهي، انتهاپسندي خلاف جنگ ۾  رڳو دهشتگردن کي مارڻ ڪافي ناهي، قوم جي حيثيت سان غلطين مان سبق نه سکيو ته خطرناڪ نتيجا نڪرندا. اسلام آباد ۾ تقريب کي خطاب ڪندي سينيٽ چيئرمين رضا رباني چيو ته ملڪي سلامتي کي خطرو آهي، پاڪستان هن وقت ڪيترن ئي محاذن تي جنگ وڙهي رهيو آهي. هن چيو ته ملڪ جي موجوده صورتحال ۾ ميڊيا کي اهم ڪردار ادا ڪرڻو پوندو. سينيٽ چيئرمين چيو ته سياستدان پنهنجيون غلطيون تسليم ڪرڻ لاءِ تيار آهي پر سوال اهو آهي ته ڇا ٻيا به پنهنجي غلطيون تسليم ڪندا؟، ماضي جي غلطين مان سبق نه سکيو ته ايندڙ نسل ذميوار قرار ڏيندو. ميان رضا رباني چيو ته سڀني کي ملڪي آئين ۽ قانون کي تسليم ڪرڻ پوندو، ڪو به قانون کان مٿانهون ناهي. سينيٽ چيئرمين جو اهو به چوڻ آهي ته انتهاپسندي خلاف جنگ ۾ رڳو دهشتگردن کي مارڻ ڪافي ناهي. رضا رباني چيو ته سول ۽ فوجي لاڳاپن ۾ بهتري لاءِ ڪابينا ۽ سلامتي ڪميٽي ڪافي نه آهن، ماضي ۾ سول ۽ فوجي لاڳاپن ۾ ملٽري جو پاسو ڳرو رهيو.

 

جيڪڏهن ڌانڌلي ثابت ٿي ته حڪومت کي وڃڻو پوندو: خورشيد شاهه

اسلام آباد(بيورو) مخالف ڌر جي اڳواڻ خورشيد شاهه چيو آهي ته جيڪڏهن ڌانڌلي ثابت ٿي ته حڪومت کي وڃڻو پوندو.تفصيل مطابق خورشيد شاهه جو چوڻ هو ته پاڪستان تحريڪ انصاف کي واپسي تي ڀليڪار ڪيو. پي ٽي آءِ جي ميمبرن جي رڪنيت جي ختم ٿيڻ واري تحريڪ جي حمايت نه ڪنداسين. هن جو چوڻ هو ته پي ٽي آءِ جي پارليامينٽ اچڻ جا رستا  صاف آهن، هنن کي قومي اسيمبلي مان ڪڍڻ  جي حمايت نٿا ڪري سگهون.خورشيد شاهه جو چوڻ هو ته جوڊيشنل ڪميشن مان تمامگهڻيون اميدون آهن، حڪومت کي پنهنجو مدو پورو ڪرڻ گهرجي پر جيڪڏهن ڌانڌلي ثابت ٿي ته حڪومت کي وڃڻو پوندو.

 

شرجيل ميمڻ پاران هڪ ڀيرو ٻيهر گوسڙو ملازمن خلاف ايڪشن جو اعلان

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته بلديه عظميٰ ڪراچي( ڪي ايم سي) ۾ اکيون بند ڪري ڀرتيون ۽ ترقيون ڏنيون ويون. گھوسٽ ملازمن کي مان نه بخشيندس چاهي منهنجو سڳو ڀاءُ ئي ڇو نه هجي، جيڪو سرڪاري ملازم آهي اهو ڪم ڪري نه ته موڪل ڪري. هو جمعي واري ڏينهن سنڌ اسيمبلي ۾ مختلف ميمبرن جي سوالن جا جواب ڏئي رهيو هو. شرجيل انعام ميمڻ چيو ته ڪي ايم سي ۾ گريڊ 18 ۾ ڊائريڪٽ ڀرتيون ٿيون.هڪ شخص ڪجھ عرصو پهرين 14 گريڊ ۾ ڀرتي ٿيو ۽ هاڻ هو 20 گريڊ ۾ آهي. هڪ شخص 7 گريڊ ۾ ڀرتي ٿيو هاڻ هو 18 گريڊ ۾ آهي. ڪي ايم سي ۾ اختيارن جي لتاڙ ڪئي وئي آهي. هڪ آفيسر پنهنجو پاڻ کي 20 گريڊ ۾ ترقي ڏئي ڇڏي. سيڪريٽري بلديات، چيف سيڪريٽري ۽ وزير اعليٰ سنڌ تائين ڪا به سمري نه اماڻي وئي. هن چيو ته هڪ شخص 20 گريڊ جو آفيسر آهي ان بابت اها ڄاڻ ئي ناهي ته هو ڪڏهن ۽ ڪهڙي گريڊ ۾ ڀرتي ٿيو. ڪڏهن ان جي ترقي ٿي، سندس ڪو رڪارڊ ئي موجود ناهي. هن چيو ته ڪي ايم سي جا معاملا ٺيڪ ڪرڻ لاءِ هڪ ڪميٽي جوڙي وئي آهي ڪميٽي کي هدايتون ڏنوين ويون آهن ته ترقي ماڻيندڙ آفيسرن کي رڪارڊ سميت گھرائي . او پي ايس ۽ ڊيپيوٽيشن تي مقررين جو رڪارڊ به جوڙيو پيو وڃي. شرجيل انعام ميمڻ چيو ته سنڌ ۾ صفائي مهم، ”صاف سرسبز سنڌ، پر امن سنڌ“ جو مدو هڪ هفتي مان وڌائي هڪ سال ڪيو ويو آهي ان جا سٺا نتيجا اچي رهيا آهن. ڪراچي ۾ بهتري آئي آهي. ميرپور خاص ۾ ڪچرو کنيو پيو وڃي، وڏي سيوريج لائينن جي صفائي ڪئي وئي آهي. پر مان ميرپور خاص ۾ ڪيل ڪمن مان اڃان به مطمئن ناهيان. هن چيو ته حيدرآباد ۾ جيڪو ڪم ٿي رهيو آهي ان مان مطمئن آهيان. اتي صفائي جيڪري بهتري آئي آهي. هن چيو ته سموري صوبي مان قبضن جو خاتمو ڪيو پيو وڃي بلديات کاتو جهڙي ريت ڪم ڪري رهيو آهي ان جو مثال ماضي ۾ ملڻ مشڪل آهي. هن چيو ته سکر، خيرپور ۽ اتر سنڌ کي اسان نادرن سنڌ اربن سروسز ڪارپوريشن(نساسڪ) نالي اداري جي رحم  تي نٿا ڇڏي سگھون. هي ادارو پنهنجو ڪم نٿو ڪري ، اسان ڪمشنرن ۽ ڊپٽي ڪمشنرن کي هدايتون ڏنيون آهن ته هو ڄاڻايل اداري تي نه ڀاڙين ۽ پنهنجي سر شهرن ۽ ڳوٺن جي حالت بهتر ڪرڻ جي ڪوشش ڪن. سکر ۾ ڪچرو کڻڻ ۽ سيوريج جا مسئلا حل ڪرڻ لاءِ بلديات کاتو ڪم ڪري رهيو آهي جنهن جا بهتر نتيجا ايندا.

الطاف حسين ڀارت ته وڃي سگهي ٿو پر ڪراچي نٿو اچي سگهي: سراج الحق

ڪراچي (اسٽاف رپورٽر) جماعت اسلامي جي امير سراج الحق جو چوڻ آهي ته ڪراچي جي قسم جو فيصلو هاڻي لنڊن ۾ نه پر سهر جي گهٽين ۾ ئي ٿيندو جنهن جو فيصلو 23 اپريل تي عوام ڏيندو جڏهن ته ايم ڪيو ايم جو سربراهه الطاف حسين ڀارت ته وڃي سگهي ٿو پر ڪراچي نٿو اچي سگهي. ڪراچي ۾ شاهراهه پاڪستان تي جماعت اسلامي جي عورتن جي جلسي  کي خطاب ڪندي سراج الحق جو چوڻ هو ته اڄ جي جلسي خوف ۽ دهشتگردي جي بت کي ڪيرائي ڇڏيو آهي، ڪراچي مان غنڊه گردي ۽ فساد جي سياست ختم ٿيڻ واري آهي هاڻي شهر ۾ شرافت ۽ خدمت جي سياست ٿيڻ گهرجي. هن چيو ته الطاف حسين 9 ڀيرا استعيٰ ڏئي واپس ورتي پر هاڻي هو ٻيهر 23 اپريل تي استعيفيٰ ڏئي واپس وٺندو ڇو ته اُن ڏينهن ڪراچي جو عوام فيصلو ڪندو ته شهر جي قسمت جو فيصلو لنڊن ۾ نه پر هتي گهٽين ۾ ٿيندو اسين ووٽ جي طاقت سان 23 اپريل تي جبر جو قلعو ڪيرائي ڇڏينداسين. سراج الحق جو چوڻ هو ته هي اليڪشن عوام آڏو ۽ پاڪستان لاءِ خوشخبري جو پيغام هوندو ۽ هن ڀيري ايم ڪيو ايم کي ماضي وانگر ٺپا هڻڻ جو موقعو نه ملندو جڏهن ته اسين نٿا سمجهون ته الطاف حسين ڪڏهن ڪراچي جو رخ ڪندو ڇو ته هو ڀارت ته وڃي سگهي ٿو پر هتي نٿو اچي سگهي. هن چيو ته ڪراچي جون عورتون تبديلي چاهين ٿيون ته جماعت اسلامي کي ووٽ ڏين، اسين عورتن کي تعليم يافته، خودمختيار ڏسڻ چاهيون ٿا جڏهن ته جيڪڏهن اسان حڪومت آئي ته عورتن جي ملازمت جي وقت ۾ گهٽتائي ڪنداسين.

 

پاڪ افغان عسڪري قيادت جي ملاقات، خطي جي صورتحال تي ڳالهيون

راولپنڊي (م.ڊ) افغانستان جي چيف آف جنرل اسٽاف جنرل شير محمد ڪريمي آرمي چيف جنرل راحيل شريف سان جي ايڇ ڪيو ۾ ملاقات ڪئي.پاڪ فو ج  لاڳاپن واري شعبي( آئي ايس پي آر) مطابق افغان جنرل شير محمد ڪريمي جنرل هيڊ ڪواٽرز( جي ايڇ ڪيو) ۾ پاڪ فوج جي سپهه سالار جنرل راحيل شريف سان ملاقات ڪئي، ملاقات دوارن علائقي  ۾ امن امان جي صورتحال تي خيالن جي ڏي وٺ ٿي. آئي ايس پي آر پاران جاري پڌرائي مطابق ٻنهي ملڪن جي فوجي اڳواڻن ملاقات دوران پاڪ افغان سرحدي معاملن، بچاءَ، سهڪار ۽ فوجي ٽرينگ تي به غور ڪيو ويو. جي ايڇ  ڪيو اچڻ تي خاص مهمان کي  پاڪ فوج جي ڦڙتيلي ۽ چست فوجيدستي گارڊ آف آنر به ڏنو. افغان چيف آف اسٽاف شهيدن جي يادگارن تي چادرون به چاڙهيون. فوجي ترجمان مطابق جنرل شير محمد ڪريمي ڪل پاڪستان ملٽري اڪيڊمي ڪاڪول ۾ ٿيندڙ پاسنگ آئوٽ پريڊ ۾ مهمانِ خاص هوندو، جنرل شير محمد ڪريميان تقريب ۾ خطاب پڻ ڪندو. ياد رهي ته ڪنهن به افغاني  فوجي اڳواڻ جو ڪاڪول اڪيڊمي جو هي پهريون دورو هوندو .شفقت حسين  پاران درخواست ڏني وئي ته هن جي عمر جي حوالي سان جوڊيشنل جاچ ڪرائي وڃي. عدالت شفقت حسين  جي عمر جي حوالي سان ايف آءِ آر جي تحقيق تي مطمئن نه ٿيندي صدر ممنون حسين ۽ وزير اعظم نواز شريف سوڌو 9 ڌرين کي نوٽس جاري ڪندي 15 ڏينهن ۾ جواب گهريو. واضع رهي ته شفقت حسين  کي موت جي سزا  تي گذريل مهيني جي 18 تاريخ تي عمل ٿيڻو هو پر صدر ممنون حسين  عمر جي ڄاڻ  جي لاءِ ڏوهاري جي  ڦاهي  واري  عمل تي هڪ مهينو اڳتي ڪري ڇڏيو

 

احتساب عدالت آصف زرداري جي اثاثن بابت ريفرنس ٻيهر کولي ڇڏيو،17 اپريل تي طلب

راولپنڊي (مانيٽرنگ ڊيسڪ) راولپنڊي جي احتساب عدالت، آصف علي زرداري جي اثاثن بابت ريفرنس کولڻ واري نيب جي درخواست منظور  ڪندي اڳوڻي صدر کي 27 اپريل تي پيش ٿيڻ جو حڪم ڏئي ڇڏيو آهي. احتساب عدالت جي جج راجا اخلاق حسين اڳوڻي صدر آصف علي زرداري جي اثاثن بابت نيب چيئرمين پاران داخل ڪرايل ريفرنس تي ٻڌڻي ڪئي. نيب جي پراسڪيوٽر عدالت کي آگاهي ڏني ته آصف علي زرداري هاڻي صدر ناهي رهيو ۽ ان جي ڇوٽ ختم ٿي وئي آهي، ان خلاف ريفرنس ٻيهر کولڻ جو حڪم ڏنو وڃي. عدالت، نيب جي درخواست ٻڌڻيءَ لاءِ منظور ڪندي اڳوڻي صدر آصف علي زرداري کي 27 اپريل تي پيش ٿيڻ جو حڪم ڏنو آهي. واضح رهي ته نيب پاران آصف علي زرداري خلاف مشرف دور دوران 2001 ۾ اثاثن بابت ريفرنس داخل ڪيو ويو هو.

 

وزيراعظم آمريڪي شهري تي حملي جو نوٽس وٺي ڇڏيو، رپورٽ طلب

اسلام آباد (بيورو) وزيراعظم نواز شريف گذريل ڏينهن ڪراچي ۾ جناح ميڊيڪل اينڊ ڊينٽل ڪاليج جي ايسوسيئيٽ پروفيسر، آمريڪي  شهري مسز ڊيبرا لوبو تي قاتلاڻي حملي جي شديد لفظن ۾ مذمت ڪئي.وزير اعظم هائوس مان جاري ٿيل بيان ۾ وزيراعظم نواز شريف واقعي جي رورٽ گهري ڏوهارين کي ترت گرفتاري جو حڪم ڏئي ڇڏيو.وزيراعظم مسز لوبو جي جلد تندرست ٿيڻ جي دعا ڪندي  بهترين طبعي سهولتون ڏيڻ جون به هدايتون جاري ڪيون. ياد رهي ته جناح ميڊيڪل اينڊ ڊينٽل ڪاليج جي هڪ آمريڪي ايسوسئيٽ پروفيسر ڊيبرا لوبو گذريل ڏينهن شهيد ملت روڊ تي اڻ ڄاڻ هٿايرن بندن هٿان  ڪيل فائرنگ ۾ زخمي ٿي هئي.