تازيون خبرون

Daily Archives: April 17, 2015

هنگو ويجهو فورسز جي ڪارروائي، 10 دهشتگرد مارجي ويا

هنگو (مانيٽرنگ ڊيسڪ) هنگو ويجهو شيخان واري علائقي ۾ سڪيورٽي فورسز جي ڪارروائي جي نتيجي ۾ 10 دهشتگرد مارجي ويا ۽ 12 ٺڪاڻا تباهه ٿي ويا، فورسز 6 دهشتگردن کي گرفتار ڪري علائقي جو ڪنٽرول پڻ سنڀالي ورتو آهي. ذريعن موجب، سڪيورٽي فورسز شيخان واري علائقي زميني ڪارروائي ڪئي، جنهن دوران 10 دهشتگرد مارجي ويا. سڪيورٽي ذريعن موجب، ڪارروائي دوران 6 خطرناڪ دهشتگردن کي گرفتار پڻ ڪيو ويو، جڏهن ته ڪارروائي دوران دهشتگردن جي 12 ٿاڪن کي پڻ تباهه ڪيو ويو. سڪيورٽي فورسز علائقي جو ڪنٽرول پڻ سنڀالي ورتو آهي. فورسز عزم جو اظهار ڪندي چيو ته قانون جي رٽ کي هر صورت ۾ بحال ڪيو ويندو، دهشتگردن جا ڏينهن هاڻي پورا آهن.

 

پنجاب جي مختلف جيلن ۾ ٽي قيدي ڦاهي چڙهي ويا، آخري وقت ۾ 2 جي روڪي وئي

لاهور (مانيٽرنگ ڊيسڪ) ملڪ ۾ ڏوهارين کي ڦاهيون ڏيڻ جو سلسلو جاري آهي، پنجاب جِي مختلف جيلن ۾ قتل جَي وڌيڪ ٽِن جوابدارن کي ڦاهيءَ تي چاڙهيو ويو. گـُجرانوالا جِي سينٽرل جيل ۾ صبح جو سوير قتل جَي ٻن جوابدارن اعجاز ۽ عبدالجبار کي ڦاهيون ڏنيون ويون. جوابدار عبدالجبار 2001ع ۾ پنهنجي دوست کي قتل ڪيو هو، جڏهن ته اعجاز عرف ججي 1995ع ۾ ذوالفقار نالي هڪ شخص کان حياتي کسي هئي. فيصل آباد جِي سينٽرل جيل به قتل جَي هڪ جوابدار ظفر اقبال کي ڦاهيءَ  تي لٽڪايو ويو، هـُن 2005ع ۾ ڦر دوران مزاحمت تي عورت کي قتل ڪيو هو. ساڳئي ئي جيل ۾ موت جِي سزا ٻڌايل ٻن قيدين نظام الدين ۽ محمد حسين جِي وارثن ٺاهه ٿيڻ ڪري ڦاهي روڪي وئي. ياد رهي ته ملڪ ۾ موت جِي سزا تي عملدرآمد شروع ٿيڻ بعد هاڻ تائين 60 کان وڌيڪ ڏوهارين کي ڦاهيءَ تي لٽڪايو ويو آهي.

 

ڪراچي:ڊمپر جي ٽڪر ۾ اسڪول ويندڙ ڀاءُ ڀيڻ اجل جو شڪار

ڪراچي (اسٽاف رپورٽر) ڪراچيءَ ۾ سـُپر هاءِ وي تي گلشن معمار موڙ وٽ ڊمپر جي ٽڪر ۾ 2 اسڪولي ٻارڙا فوت ٿي ويا. سپر هاءِ وي تي سبزي منڊ ويجهو گلشن معمار موڙ تي تيز رفتار ڊمپر جي ٽڪر سبب 2 ٻارڙا فوت ٿي ويا. فوت ٿي ويل ٻارڙا ڀيڻ ڀاءُ هئا جن جون عمريون 12 کان 13 سال ٻـُڌائي پئي وڃي. امدادي ٽيمن جي اهلڪارن، لاشن کي بنا دير عباسي شهيد اسپتال منتقل ڪيو جڏهن ته ڊمپر ڊرائيور موقعي تي فرار ٿيڻ ۾ ڪامياب ٿي ويو.

 

پريانڪا چوپڙا شرڌا ڪپور ۽ پٽاخه گڏيءَ کان پوءِ هاڻي اداڪارا تبوءَ به مائيڪ کڻي ورتي

ممبئي (شوبز نيوز) پريانڪا چوپڙا شرڌا ڪپور ۽ پٽاخه گڏيءَ کان پوءِ هاڻي اداڪارا تبوءَ به مائيڪ کڻي ورتي آهي ۽ هوءَ نريج پانڊي جي نئين ايندڙ فلم ۾ پنهنجي آواز جو جادو جاڳائيندي. شرڌا ڪپور مائيڪ تي اچي اهڙا ته سُر وکيريا جو ٻڌندڙ حيران رهجي ويا، شرڌا فلم ”عاشقي-2“ ۾  پنهنجي آواز ۾ گيت رڪارڊ ڪرايو هو. جنهن کان پوءِ وري عاليه ڀٽ فلم ”هاءِ وي“ جي اڙانگھن رستن کي نرالي انداز ۾ بيان ڪيو هو.جڏهن ته بالي ووڊ جي ”ميري ڪوم“ فيم گرل پريانچا پڻ ڪامياب سُرن جي ورکا ڪري چڪي آهي، هاڻي وري بالي ووڊ جي سينيئر اداڪارا تبو به ان ميدان ۾ قدم رکڻ جون تياريون ڪري ورتيون آهن، خبر آهي ته هدايتڪار نريج پانڊي نئين فلم ٺاهي رهيو آهي، جنهن ۾ تبو پنهنجي آواز ۾ گيت رڪارڊ ڪرائڻ جو پلان ٺاهيو آهي، جنهن جي لاءِ هن تبوءَ سان رابطو ڪيو آهي ۽ کيس اڃا تبوءَ جي جواب جو انتظار آهي.

 

بالي ووڊ سپر اسٽار سلمان خان خلاف ”هٽ اينڊ رن“ ڪيس ۾ اهم موڙ اچي ويو

ممبئي (شوبز نيوز) بالي ووڊ سپر اسٽار سلمان خان خلاف ”هٽ اينڊ رن“ ڪيس ۾ اهم موڙ اچي ويو آهي، امڪان آهي ته اڄ ڪيس جي آخري ٻڌڻي هجي. بالي ووڊ جي دبنگ خان خلاف حادثي ڪيس جي ٻڌڻي اڄ عدالت ۾ ٿي رهي آهي. اڄ سلمان خان جو وڪيل دليل جاري رکندو. گذريل ٻڌڻيءَ ۾ صفائي وڪيل جو چوڻ هو ته 28 سيپٽمبر 2002ع تي ٿيل حادثي وقت گاڏيءَ ۾ ڊرائيور سميت 4 ماڻهو موجود هئا. پر صفائي وڪيل جو چوڻ هو ته گاڏيءَ ۾ سلمان خان، ان جو باڊي گارڊ ۽ ڳائڻو ڪمال خان سميت 3 ڄڻا سوار هئا. حادثي ۾ سلمان خان جي گاڏي فٽ پاٿ تي ستل ماڻهن کي لتاڙيو، جنهن جي ڪري هڪ ڄڻو موقعي تي مارجي ويو ۽ 4 ڄڻا زخمي ٿي پيا هئا.

 

بالي ووڊ اداڪارا ڪاجول جي 5 سالن کان پوءِ سلور اسڪرين تي واپسي

ممبئي (شوبز نيوز) بالي ووڊ اداڪارا ڪاجول جي 5 سالن کان پوءِ سلور اسڪرين تي واپسي ٿي رهي آهي. هن فلم ”دل والي“ ۾ ڪم ڪرڻ لاءِ فلمساز کان 5 ڪروڙ رپيا گھري ورتا آهن. وڌندڙ عمر ۽ سلور اسڪرين کان 5 سال پري رهڻ کان پوءِ به اداڪارا ڪاجول جي گھر ۾ گھٽتائي ناهي آئي. هدايتڪار روهت شيٺيءَ جي فلم ”دل والي“ ۾ ڪم جي لاءِ ڪاجول اهڙو ئي معاوضو گھريو آهي جيڪو اڄ ڪلهه ڪترينا ڪيف يا ڪرينا ڪپور وٺي رهيون آهن. فلم ”دل والي“ ۾ ڪاجول شاهه رخ خان جي هيروئن بڻجندي، فلم ۾ ورن ڌون ۽ اداڪارا ڪيرتي سينن به اهم ڪردارن ۾ نظر ايندا.

 

بالي ووڊ ۾ باهه لڳائيندڙ سني ليون پنهنجي نئين فلمن ”ايڪ پهيلي ليلا“ جي ڪري سون ٻُهاريندي

ممبئي (شوبز نيوز) بالي ووڊ ۾ باهه لڳائيندڙ سني ليون پنهنجي نئين فلمن ”ايڪ پهيلي ليلا“ جي ڪري سون ٻُهاري رهي آهي، جنهن باڪس آفيس تي گھٽ ۾ گھٽ 20.49 ڪروڙ رپيا ميڙڻ ۾ ڪامياب وئي آهي، ماضيءَ ۾ عريانيءَ جو ٺپو لڳندڙ اداڪارا ڀارتي فلم انڊسٽريءَ ۾ پنهنجي صلاحيتن سان ڌاڪو ڄمائي رهي آهي، فلم ”ايڪ پهيلي ليلا“ گذريل جمعي تي رليز ڪئي وئي هئي، فلم پنجن ڏينهن دوران بهترين ناڻو ڪمائي سني ليون جي بالي ووڊ  قد ڪاٺ کي اڃا به مٿانهون ڪري رهي آهي. هڪ اندازي موجب ”ايڪ پهيلي ليلا“ ۾ سني ليون کي فلم مارڪون نه نه ٿيون ڏئي سگھجن، پر هاڻي فلمي حلقا مڃڻ لڳا آهن ته سني ليون بالي ووڊ فلمن ۾ ڪم ڪري پنهنجي اداڪاريءَ کي چمڪائي رهي آهي.

 

بي بي سي اليون هٿان پريڪٽس ميچ ۾ شڪست ويڪ اپ ڪال آهي: محمد حفيظ

ميرپور(اسپورٽس نيوز) پاڪستاني ٽيم جي اسٽار اوپننگ بيٽسمين محمد حفيظ چيو آهي ته بي بي سي اليون هٿان پريڪٽس ميچ ۾ شڪست ويڪ اپ ڪال آهي. ون ڊي سيريز کٽڻ لاءِ مربوط حڪمت عملي اختيار ڪرڻي پوندي. ٽيم جي بالنگ ۽ فلڊنگ ۾ خاميون آهن، جن کي ختم ڪرڻو پوندو. پنهنجي هڪ بيان ۾ محمد حفيظ چيو ته 269 رنسن جي هدف جو دفاع ڪري سگهجي ٿو پر خراب فلڊنگ ۽ بالنگ جي ڪري اسان نه ڪري سگهياسين، اها شڪست ويڪ اپ ڪال آهي. بنگلاديش خلاف ون ڊي سيريز کٽڻ لاءِ مربوط حڪمت عملي اختيار ڪرڻي پوندي. هن وڌيڪ چيو ته ون ڊي سيريز ۾ ٽيم بهترين نتيجو ڏيندي جڏهن ته مقصد حاصل ڪرڻ لاءِ فلڊنگ جي شعبي ۾ بهتري آڻڻي پوندي.

 

بگ بيش ليگ جيسن گيلپسي ايڊيليڊ اسٽرائيڪرز جي ڪوچنگ جي تصديق ڪري ڇڏي

ميلبورن(اسپورٽس نيوز) اڳوڻي آسٽريلوي فاسٽ بالر جيسن گيلپسي هلندڙ سال بگ بيش ٽي 20 ليگ ۾ ايڊيليڊ اسٽرائيڪرز جي ڪوچنگ جي تصديق ڪري ڇڏي آهي. جيسن گيلپسي پنهنجي بيان ۾ چيو ته ڊوميسٽڪ سطح تي ڪنهن به ٽيم جي ڪوچنگ ۾ دلچسپي رکان ٿو، جڏهن ته هاڻي موقعو ملڻ تي تمام گهڻو خوش آهيان. ٽي وي تي بگ بيش ليگ ڏسي خوش ٿيندو آهيان ۽ ان جو حصو بڻجڻ منهنجي لاءِ هڪ شاندار موقعو هوندو. هن چيو ته ڪوچ طور منهنجي ڪوشش هوندي ته ٽيم ٽائيٽل پنهنجي نالي ڪرڻ ۾ ڪامياب ٿئي.

 

بنگلاديش ۽ پاڪستان جي ڪرڪيٽ ٽيمن وچ ۾ پهرين ون ڊي ميچ اڄ کيڏي ويندي

ميرپور(اسپورٽس نيوز) بنگلاديش ۽ پاڪستان جي ڪرڪيٽ ٽيمن وچ ۾ ٽن ون ڊي ميچن تي ٻَڌل سيريز جي پهرين ون ڊي ميچ (اڄ)جمعي تي شيير بنگال نيشنل اسٽيڊيم ميرپور ۾ کيڏي ويندي. ٻنهي ٽيمن وچ ۾ ون ڊي سيريز کان اڳ کيڏيل ٽور ميچ ۾ ميچ ۾ بنگلاديش ڪرڪيٽ بورڊ اليون جي ٽيم پاڪستان ٽيم کي هڪ وڪيٽ کان شڪست ڏني. پاڪستان ڪرڪيٽ ٽيم اڄڪلهه بنگلاديش جي دؤري تي آهي جتي هو بنگلاديش خلاف 3 ون ڊي مي، هڪ ٽي 20 ۽ 2 ٽيسٽ ميچن جي سيريز ۾ شرڪت ڪندي. بنگلاديش ۽ پاڪستان جي ڪرڪيٽ ٽيمن وچ ۾ 3 ون ڊي سيريز جي پهرين ميچ 17 اپريل تي ميرپور، ٻين ميچ 19 اپريل تي ميرپور، جڏهن ته ٽين ۽ آخري ميچ 22 اپريل تي شير بنگلا نيشنل اسٽيڊيم ميرپور ۾ کيڏي ويندي. ٻنهي ٽيمن وچ ۾ واحد ٽي 20 ڪرڪيٽ ميچ 24 اپريل تي ساڳي هنڌ کيڏي ويندي. ان کانپوءِ ٻنهي ٽيمن وچ ۾ 2 ٽيسٽ ميچن جي سيريز جي پهرين ميچ 28 اپريل کان 2 مئي، جڏهن ته ٻي ۽ آخري ٽيسٽ 6 مئي کان شير بنگلا نيشنل اسٽيڊيم ميرپور ۾ شروع ٿيندي.