تازيون خبرون

Daily Archives: April 16, 2015

پرڏيهي قوتون پاڪستان کي غير مستحڪم ڪرڻ جي ڪوششن کان پاسو ڪن: آرمي چيف

ڪوئٽا (مانيٽرنگ ڊيسڪ) آرمي چيف جنرل راحيل شريف پرڏيهي ايجنسين ۽ ملڪن کي خبردار ڪيو آهي ته اهي بلوچستان ۾ دهشتگردن جي حمايت ڪري پاڪستان کي غيرمستحڪم ڪرڻ جي ڪوشش کان باز رهن، آءِ ايس پي آر جي مطابق، آرمي چيف جنرل راحيل شريف پنهنجي ڪوئٽا جي دوري دوران گورنر بلوچستان، وزيراعليٰ، ڪمانڊر سدرن ڪمانڊ سان ملاقاتون ڪيون، جڏهن ته ايف سي هيڊڪوارٽرز جو دورو ڪري صوبي جي سيڪيورٽي صورتحال جو جائزو ورتو، آرمي چيف تربت ۾ دهشتگردن هٿان قتل ڪيل مزورن جي مارجڻ تي ڏک جو اظهار ڪندي عزم ظاهر ڪيو ته بلوچستان جي حۡڪومت جي معاونت ڪندي ان عناصرن جو صفايو ڪيو ويندو، هن چيو ته بلوچستان ۾ دهشتگردن کي مدد فراهم ڪندڙ سمورين غيرملڪي ايجنسين ۽ ملڪن کي شڪست ڏئي رهنداسين، آرمي چيف صوبي ۾ امن امان جي صورتحال  ۾ بهتري تي ايف سي ۽ ليويز کي ساراهيندي چيو ته پاڪ فوج صوبي ۾ امن ۽ ترقي جي لاءِ بلوچستان جي عوام سان گڏ بيٺي آهي، جڏهن ته ايف ڊبليو او هتي پنهنجي منصوبن تي ڪم جاري رکندي، آرمي چيف چيو ته دهشتگردن، ان جي مددگارن، همدردن، فنانسرز ڪنهن به ملڪ ۾ لڪڻ جي جڳهه نه ملندي ۽ رياستي رٽ کي بحال ڪرڻ جي لاءِ هر حد تائين وينداسين، بلوچڌستان ۾ سيڪيورٽي چئلينجز کي بيان ڪندي راحيل شريف سول ۽ عسڪري قيادت کي مربوط حڪمت عملي تي زور ڏنو ته بلوچستان ام جو قيام مممڪن بڻائي سگهجي.

 

26 اپريل تي لياري ۾ جلسي جو اعلان، رينجرز جي تجويزن تي عمل نٿا ڪري سگهون: وڏو وزير

حيدرآباد (بيورو)  سنڌ جي وڏي وزير سيد قائم علي شاهه  چيو آهي ته ڪراچي جي اين اي 246 تي ضمني چونڊن جي حوالي سان  رينجرز سنڌ حڪومت کي پولنگ اسٽيشنن  ۾ سي سي ٽي ڪيمرائون ۽ بائيو ميٽرڪ نظام لڳائڻ جون  جون تجويزون ڏنيون آهن  ۽ ان سلسلي ۾ رينجرز اليڪشن ڪميشن سان پڻ رابطو ڪيو آهي جڏهن ته ضمني چونڊن ۾ وقت گهٽ هجڻ سبب انهن ٻنهي تجويزن تي عمل نٿو ٿي سگهي ۽ جيڪڏهن ان طرز جا قدم کنيا ويا ته عام چونڊن دوران سڄي ملڪي ۾ اهڙا قدم کڻڻ لاءِ وفاق توڙي صوبائي حڪومت وٽ ايترا وسيلا ئي نه هوندا ، هن اهڙو اظهار اڄ  ضلعي ڄامشورو ۾ سپر هاءِ وي تي 13 نمبر پوليس چوڪي وٽ خوراڪ واري عالمي تنظيم  طرفان ڪينئڊا ، آسٽريليا ، ڊين مارڪ ، جاپان ، نائيدر لينڊ ۽ آمريڪا  جي گڏيل سهڪار سان سنڌ اندر قدرتي آفتن  جي نقصانن کي گهٽ ڪرڻ ۽ فوري طور امدادي سرگرميون شروع ڪرڻ لاءِ قائم ڪيل (هيومن ٽرين ، رسپانس فيسلٽي ) ويئر هائوسز جي پراونشل ڊزاسٽرمينجمينٽ  اٿارٽي (پي ڊي ايم اي) حڪومت سنڌ جي حوالي ڪرڻ ۽ ان جي افتتاحي تقريب جي موقعي تي ميڊيا سان ڳالهائيندي ڪيو _ سنڌ جي وڏي وزير سيد قائم علي شاهه وڌيڪ چيو ته ڪراچي جي ضمني چونڊن دوران  پاڪستان آرمي کي مقرر ڪرڻ جو مطالبو سمورين پارٽين گڏيل طور تي ڪيو جڏهن ته ملڪ جي اترين علائقن ۾ آپريشن ضرب عضب سبب پاڪستان آرمي مصروف آهي تنهنڪري ضمني چونڊن جي ذميواري رينجرز حوالي ڪئي وئي آهي  ۽ سنڌ حڪومت جي اولين ڪوشش رهندي ته پر امن طريقي سان شفاف چونڊن کي يقيني بڻايو وڃي _هڪ سوال تي هن چيو ته سنڌ اندر نيشنل ايڪشن پلان تحت  آپريشن سان امن امان جي صورتحال ۾ بهتري آئي آهي ۽ آپريشن جو اهو سلسلو برقرار رکيو ويندو ته جيئن سنڌ مان ڏوهن جو جڙ کان خاتمو آندو وڃي ۽ ان سلسلي ۾ پارٽي شريڪ چيئرمين آصف علي زرداري  پڻ واضح هدايتون ڏنيون آهن ته سنڌ جي امن امان تي ڪنهن به قسم جي سوديبازي نه ڪئي ويندي _هڪ ٻئي سوال تي هن چيو ته متحدهه اڳواڻ عمران فاروق جي قتل ڪيس جي جاچ لنڊن ۾ هلندڙ آهي ۽ وفاق جو گهرو وزير  ان حوالي سان ڳالهائڻ جو مجاز آهي _ هڪ ٻئي سوال تي هن چيو ته سنڌ اندر  ڪڻڪ جي خريداري لاءِ هر شهر ۾ خريداري مرڪز قائم ڪيا ويا آهن جيتوڻيڪ بارداني جي ورڇ بابت  ڪجهه شڪايتون پڻ مليون آهن ۽ اميد آهي ته ايندڙ هڪ هفتي اندر بارداني جو مسئلو حل ڪيو ويندو جڏهن ته مليل شڪايتن کي نظر ۾ رکندي 6 ڊسٽرڪٽ فوڊ ڪنٽرولر ۽ 17 فوڊ انسپيڪٽرن کي معطل پڻ ڪيو ويو آهي _ هن وڌيڪ چيو ته  سنڌ اندر گذريل سال جي 10 لک ٽن ڪڻڪ پڻ موجود آهي جيڪا وڪرو نه ٿي سگهي  جنهن ۾ وفاق طرفان يوڪرين کان خريد ڪيل 7 لک ٽن ڪڻڪ پڻ شامل آهي _ هن چيو ته يوڪرين جي ڪڻڪ کائڻ جي لائق نه هئي تنهن باوجود به يوڪرين کان امپورٽ ٿيل سموري ڪڻڪ سنڌ حوالي ڪئي وئي ۽ واپارين گهٽ اگهه جي لالچ رکي اها ڪڻڪ خريد ڪئي _ان حوالي سان سنڌ حڪومت گڏيل مفادن واري ڪائونسل ۾ پڻ پنهنجو رڪارڊ احتجاج ڪرايو ۽ وزير اعظم ڏانهن پڻ خط لکيا آهن _ هن چيو ته هلندڙ سال سنڌ اندر ڪڻڪ جو اضافو فصل ٿيو آهي  ۽ سنڌ حڪومت ڪڻڪ جي خريداري جو هدف پڻ مقرر ڪري ڇڏيو آهي جڏهن ته سرڪاري گودامن ۾ ڪڻڪ جو وڏو ذخيرو هجڻ جي باوجود به ڪڻڪ جو اگهه ساڍا 12 سئو کان 13 سئو ڪيو ويو آهي  جيڪو سڄي ملڪ ۾ سڀ کان وڌيڪ اگهه آهي  _ هن آبادگارن کي خاطري ڪرائي ته مقرر ڪيل هدف کان وڌيڪ ڪڻڪ خريد ڪرڻ جي ضرورت محسوس ڪئي وئي ته اها پڻ ڪئي ويندي. وڏي وزير چيو ته پيپلز پارٽي 26 اپريل تي لياري ۾ جلسي جو اعلان ڪري ڇڏيو آهي، وڏي وزير سيد قائم علي شاهه  چيو آهي ته آصف زرداري جلسي دوران اهم اعلان ڪندو، وڏي وزير چيو آهي ته ماڻهو ڀلي ناراض ٿين پر وفاق ڪراچي آپريشن لاءِ ٽڪو به ڏنو آهي. وزيراعليٰ هائوس ڪراچي ۾ پريس ڪانفرنس ڪندي وڏي وزير سيد قائم علي شاهه چيو ته لياري پيپلزپارٽي جو ڳڙهه رهيو آهي ۽ رهندو ۽ 26 اپريل تي ٿيندڙ جلسي کي آصف زرداري ۽ ٻيا اڳواڻ خطاب ڪندا، جنهن دوران پارٽي جو شريڪ چيئرمين اهم اعلان ڪندو. هن چيو ته ڪراچي آپريشن جو ڪريڊٽ ڪير به کڻي پر عملي ڪم سنڌ حڪومت ڪيو آهي، ماڻهن ڀلي مٿن ناراض ٿين پر وفاق ان آپريشن لاءِ ٽڪو به ناهي ڏنو. سيد قائم علي شاهه چيو ته اڳ به ٽارگيٽيڊ آپريشن سندن سرپرستي ۾ ٿي رهيو آهي ۽ وزيراعظم کيس ڪپتان جو نالو ڏنو، هاڻي به سندن پوليس ۽ رينجرز ڪارروائي ڪري رهي آهي. هڪ سوال جي جواب ۾ وڏي وزير چيو ته نبيل گبول خلاف ڳالهائڻ لاءِ وٽس گهڻو مواد آهي پر هو ان تي نٿو ڳالهائڻ چاهي.

 

جان ڪيري جو وزيراعظم سان ٽيليفونڪ رابطو، يمن صورتحال تي ڳالهيون

اسلام آباد (بيورو) آمريڪي پرڏيهي وزير جان ڪيري اڄ وزيراعظم نوازشريف کي ٽيليفون ڪري ساڻس يمن جي صورتحال تي خيالن جي ڏي وٽ ڪئي.. ذريعن مطابق وزيراعظم يمن جي معاملي تي عرب اتحاد پاران پاڪستان سان تعاون جي درخواست ۽ پارليمنٽ جي گڏيل اجلاس جي ٺهراءَ جي حوالي سان آمريڪي پرڏيهي وزير کي آگاهه ڪيو. جان ڪيري يمن جي بحران جي حل جي لاءِ پاڪستاني ڪوششن کي ساراهيو.

 

 الله تعاليٰ مختلف عقيدن جي ماڻهن کي هڪٻئي جو وسيلو بڻايو آهي: پرويز رشيد

اسلام آباد (بيورو) سڌ سماءَ واري وزير  پرويز رشيد چيو آهي ته مختلف عقيدن سان تعلق رکندڙ ماڻهن کي رب جي ذات هڪٻئي جو وسيلو بڻايو آهي.تفصيل مطابق بين المذاهب هم آهنگي ڪانفرنس سان خطاب ڪندي پرويز رشيد چيو ته ڪجهه ماڻهن پاڪستان جي ساک خراب ڪرن جي ڪوشش ڪئي ۽ اسان جي ڪجهه ڪمن جي ڪري پاڪستان جو تاثر خارب ٿيو ،هاڻي دنيا کي اهو ثابت ڪري ڏيکارڻو آهي ته پاڪستان نيڪ ۽ روشن آهي. هن چيو ته اسلام امن جو سبق ڏئي ٿو ۽ الله پاڪ به  مخلتف عقيدن سان لاڳاپيل ماڻهن کي هڪٻئي جو وسيلو بڻايو آهي. مذهب جي بنياد تي نفرت ڪرڻ ۽ تشدد ڦهلائڻ جي بلڪل اجازت ناهي ۽ اهو انسانيت جي به خلاف آهي.

 

پاڪستان پاران 13 سئو ڪلو ميٽرز تائين حدف کي آساني سان نشانو بڻائيندڙ غوري ميزائل جو ڪامياب تجربو

راولپنڊي (مانيٽرنگ ڊيسڪ) پاڪستان 13 سئو ڪلو ميٽرز تائين حدف کي آساني سان نشانو بڻائيندڙ غوري ميزائل جو ڪامياب تجربو ڪري ورتو، آءِ ايس پي آر چيو آهي ته ميزائل ۾ ايٽمي ۽ روايتي هٿيار کڻي وڃڻ جي صلاحيت موجود آهي، جڏهن ته صدر ۽ وزيراعظم پاران ڪامياب تجربي تي  سائنسدان، انجنيئرز ۽ پاڪ فوج کي واڌايون ڏنيون ويون آهن. آءِ ايس پي آر  پاران جاري ڪيل بيان موجب، پاڪ فوج پاران غوري ميزائل جو تجربو ڪيو ويو، جنهن ڪاميابي سان پنهنجي حدف کي نشانو بڻايو. آءِ ايس پي آر چيو ته ميزائل 13 سئو ڪلو ميٽرن تائين آساني سان پنهنجي هدف کي نشانو بڻائي سگهي ٿو. آءِ ايس پي آر جو چوڻ آهي ته ميزائيل ۾ ايٽمي ۽ روايتي هٿيار رکڻ وڃڻ جي صلاحيت موجود آهي. ڪامياب تجربي تي وزيراعظم نواز شريف ۽ صدر ممنون حسين انجنيئرز، سائنسدان ۽ پاڪ فوج کي واڌايو ڏيندي چيو آهي ته تجربي سان پاڪ فوج جو دفاع وڌيڪ مضبوط ٿيندو.

 

سپريم ڪورٽ: پوليس ۾ ميرٽ تي ڀرتين سميت سمورين سفارشن تي عملدرآمد جو حڪم

اسلام آباد (بيورو) سـُپريم ڪورٽ، ڪراچي ۾ ڀنگ لاءِ اغوا وارو ڪيس اڪلائيندي پوليس ۾ ميرٽ تي ڀرتين ۽ جديد اوزارن جي فراهمي سميت سمورين سفارشن تي عملدرآمد جو حڪم ڏيندي سفارشون سنڌ سرڪار ڏانهن موڪلي ڇڏيون آهن. جسٽس انور ظهير جمالي جي سربراهي ۾ سپريم ڪورٽ جي ٽي رڪني بينچ ڪراچي ۾ ڀـُنگ لاءِ اغوا بابت ڪيس جي ٻڌڻي ڪئي. ٻڌڻيءَ دوران ايس ايس پي انويسٽيگيشن الطاف قريشي ڪراچي عدالتي حڪم تحت سنڌ پوليس جون سفارشون پيش ڪيون. ايس ايس پي چيو ته پوليس کي ميرٽ تي ڀرتين، جديد هٿيارن جي ضرورت آهي، هر ضلعي ۾ فرازنڪ ليبارٽري قائم ڪئي وڃي ته پوليس جي ڪاڪردگي بهتر ٿي سگهي ٿي. جسٽس عمر عطا بنديال پڇاڻو ڪيو ته توهان حڪومت ڏانهن سفارشون موڪليون، انهن تي ڪهڙو جواب مليو.؟ ايس ايس پي انويسٽيگيشن چيو ته حڪومت چيو ته سفارشن تي غور ٿي رهيو آهي ۽ سمورا قدم پائيپ لائين ۾ آهن.جسٽس انور ظهير جمالي ريمارڪس ڏنا ته پائيپ  لائين وارا منصوبا هميشه پائيپ لائين ۾ ئي رهندا آهن. ايدووڪيٽ جنرل سنڌ عدالت کي آگاهي ڏني ته حڪومت، پوليس جي سفارشن تي غور ڪري رهي آهي، جنهن تي جسٽس انور ظهير جمالي چيو ته توهان رڳو غور ئي ڪندا رهو. عدالت، پوليس جون سموريون سفارشون سنڌ جي چيف سيڪريٽري ۽ گهرو سيڪريٽري ڏانهن موڪلڻ جو حڪم ڏيندي چيو ته سرڪار ان جو جائزو وٺي ۽ عملدرآمد ڪري، جنهن بعد عدالت ڪيس اُڪلائي ڇڏيو.

 

اين اي 246 جي چونڊ: اليڪشن ڪميشن بائيو ميٽرڪ ذريعي ووٽنگ کان نابري واري ڇڏي

ڪراچي (اين اين آءِ) اليڪشن ڪميشن اين اي 246 ۾ بائيو ميٽرڪ مشين ذريعي ووٽنگ ڪرائڻ کان انڪار ڪري ڇڏيو آهي. عملدارن جو چوڻ آهي ته بائيو ميٽرڪ سان آڱوٺن جي تصديق ڏکي آهي چيف اليڪشن ڪمشنر سردار رضا جلد ڪراچي جو دورو ڪندو. تفصيل مطابق ڪراچي جي تڪ اين اي 246 ۾ رينجرز سنڌ بائيو ميٽرڪ ووٽنگ جي درخواست تي اليڪشن ڪميشن جي عملدارن جو چوڻ آهي ته في الحال ضمني چونڊ بائيو ميٽرڪ سسٽم ذڙيعي نه ٿي ڪرائي سگهجي بائيو ميٽرڪ سسٽم ذريعي ماضي ۾ جيڪا مشق ڪئي وئي ان ۾ ڪافي ڏکيائي ٿي بائيو ميٽرڪ سان آڱوٺن جي تصديق ڪرڻ مشڪل آهي. اليڪشن ڪميشن مطابق اين اي 246 ضمني چونڊن ۾  معياري مس استعمال ڪئي ويندي. جيڪا پاڪستان ڪائونسل آف سائنٽفڪ اينڊ انڊسٽريل ريسرچ تيار ڪئي آهي. اها مس بلديا جي چونڊن ۾ به استعمال ٿيندي جڏهن ته چيف اليڪشن ڪمشنر سردار رضا خان جلد ڪراچي جو دورو ڪندو ۽ اين اي 246 جي چونڊ انتظامن جو جائزو وٺندو.

 

برطانوي هاءِ ڪمشنر سان ٿيل ملاقات جو الطاف حسين جي پيشيءَ سان ڪو به واسطو ناهي: چوڌري نثار

اسلام آباد (بيورو) وفاقي گهرو وزير چوڌري نثار چيو آهي ته برطانوي هاءِ ڪمشنر سان ٿيل ملاقات جو الطاف حسين جي پيشيءَ سان ڪو به واسطو ناهي، عمران فاروق کي قتل ڪندڙ جوابدارن وٽ لنڊن وڃڻ جو ڪرايو به نه هو، بعد ۾ اڪائونٽس کولرائي رقم منتقل ڪئي وئي، ڪيس ۾ گرفتار معظم علي مک جوابدار آهي، برطانيه سان جوابدارن جي حوالگي سان معاهدو ناهي، هاءِ ڪمشنر تي واضح ڪيو آهي ته جوابدارن جي بدلي توهان کي به سهڪار ڪرڻو پوندو. اسلام آباد ۾ ميڊيا سان ڳالهائيندي  چوڌري نثار چيو ته گهرو وزير جي حيثيت سان هـُو ڪنهن پرڏيهي سفير کي بريفنگ نٿو ڏئي سگهي، آئين ۽ قانون تحت هـُو رڳو صدر، ڪابينا ۽ پارليامينٽ کي ئي جواب ڏيڻ جو پابند آهي.  هن چيو ته  هن وقت تائين  سان عمران فاروق قتل ڪيس ۾ برطانيه سان جيڪا ڄاڻ جي مٽا سٽا ٿي آهي،   اهو حڪومت جو فيصلو هو، ڪيس کي انجام تائين پهچائڻ لاءِ کين جيڪو ڪجهه ڪرڻو پوندو هو ڪرڻ لاءِ تيار آهن. وفاقي گهرو وزير چيو ته ائين نٿو ٿي سگهي ته برطانيه کي گهربل جوابدار پاڪستان فراهم ڪري ۽ بدلي ۾ ساڻن ڪو به سهڪار نه ڪيو وڃي، هاءِ ڪمشنر آڏو واضح ڪيو آهي ته جيڪڏهن جوابدار گهربل آهن ته  بدلي ۾ پاڪسان سان به سهڪار ڪرڻو پوندو. چوڌري نثار چيو ته عمران فاروق کي قتل ڪندڙ جوابدارن کي هوائي سفر ڪرڻ لاءِ ڪرائي جا پئسا به نه هئا، بعد ۾ انهن جا اڪائونٽس کولرايا ويا ۽ رقم منتقل ٿي، اهي ماڻهو ڪنهن اداري وٽ ويا،حڪومت وٽ اهو رڪارڊ به موجود  آهي. وفاقي گهرو وزير چيو ته عمران فاروق قتل ڪيس گذريل ٽن سالن کان بلائينڊ ڪيس بڻجي ويو هو، اسڪاٽ لينڊ يارڊ لاءِ روشندان پاڪستاني سڪيورٽي ادارن  ڪيو،  ڪيس کي اڳتي وڌائڻ جو ڪريڊٽ به هتان جي سڪيورٽي ادارن ڏانهن وڃي ٿو. هڪ سوال جي جواب ۾ چوڌري نثار چيو ته عمران فاروق قتل ڪيس ۾ جوابدار معظم علي جي گرفتاري انتهائي اهم ڪاميابي آهي، جوابدار  ڪيس ۾ اهم ڪردار آهي ، کيس فون ٽريس ڪري دستاويزن جي بنياد تي گرفتار ڪيو ويو آهي. هڪ ٻي سوال جي جواب ۾ چوڌري نثار چيو ته عمران فاروق قتل ڪيس کي انجام تائين پهچائڻ بابت هو ايم ڪيو ايم ۽ الطاف حسين جي بيان جي آجيان ڪري ٿو پر متحده جا ڪجهه ماڻهو آجيان ڪن ٿا ۽ ڪجهه شڪ ظاهر ڪري رهيا آهن، جيڪڏهن هو ان معاملي تي سياسي ڳالهيون ڪرڻ چاهي ته وٽس ڳالهائڻ لاءِ گهڻو ڪجهه آهي. چوڌري نثار چيو ته عمران فاروق قتل ۽ شفقت حسين ڦاهي ڪيس ۾ پاڪستان جي ساک ۽ عدالتي نظام تي سوال اٿاريا ويا، عمران فاروق ڪيس کي انجام تائين پهچائڻ لاءِ هر ممڪن قدم کنيا ويندا.

 

ڪراچي ۾ دهشتگردن جو خاتمو ڪري ئي سک جو ساهه کڻنداسين: شرجيل ميمڻ

ڪراچي (اسٽاف رپورٽر) صوبائي وزير شرجيل ميمڻ چيو آهي ته ٽارگيٽڊ آپريشن ڪنهن به سياسي  جماعت خلاف نه آهي، سڀ کان وڌيڪ ڪارروايون لياري ۾ ٿيون آهن، جڏهن ته ماضيءَ ۾ علائقي واسين کي نظر انداز پڻ ڪيو ويو. لياري جي ڪڪري گرائونڊ جو دورو ڪرڻ بعد ميڊيا سان ڳالهائيندي شرجيل ميمڻ چيو ته پيپلز پارٽي 26  اپريل تي لياري ۾ جلسو ڪندي. هن چيو ته قبضا مافيا خلاف پوري سنڌ ۾ آپريشن هلي رهيو آهي، جڏهن ته سنڌ ۾ هڪ هزار کان وڌيڪ گوسڙو ملازمن جي نشاندهي ڪئي وئي آهي. صوبائي وزير چيو ته هو ڪراچي کي رول ماڊل بڻائڻ چاهين ٿا، ڇو ته ڪراچي معاشي حب آهي. هن چيو ته سندن ترقياتي ڪمن لاءِ پوري سنڌ ۾ مهم جاري آهي. شرجيل ميمڻ چيو ته پوري سنڌ ۾ امن قائم ڪرڻ لاءِ ڏوهارين خلاف ڪارروائي جو سلسلو بند نه ٿيندو. ڏوهارين خلاف آهي ۽ ڪراچي ۾ سڀ کان وڌيڪ ٽارگيٽيڊ آپريشن لياري ۾ ٿيا ، نبيل گبول جي بيانن جي باري ۾ هن چيو ته نبيل گبول ڪوڙو ماڻهو آهي، ان کي جواب ڏيڻ ان جو قد وڌائڻ برابر آهي.

 

پي ٽي آءِ جو پرنٽنگ ڪارپوريشن ڪراچي کان ٻاهر منتقل ڪرڻ جو مطالبو

ڪراچي (اسٽاف رپورٽر) پي ٽي آءِ ڪراچي جي ڇانوڻي بورڊز جي چونڊن لاءِ اميدوارن جو اعلان ڪري ڇڏيو آهي، عارف علوي ۽ علي زيدي جو چوڻ آهي ته پ پ فنڊ هڙپ ڪرڻ لاءِ مڪاني چونڊن تي ڪو به ڌيان نه ڏنو، پرنٽنگ ڪارپوريشنز تي 80 سيڪڙو متحده ڪارڪن ڪم ڪري رهيا آهن، تنهنڪري بيلٽ پيپر ڪراچي بجاءِ ٻين شهرن مان ڇپرايا وڃن. ڪراچي ۾ ايم اين اي عارف علي، ايم پي اي قمر علي خان ۽ علي زيدي پريس ڪانفرنس ڪندي چيو ته پي ٽي آءِ جا 18 اميدوار ڪراچي ڇانوڻي  بورڊز جي چونڊن ۾ حصو وٺندا. هنن چيو ته پيپلز پارٽي پنهنجي حڪومتي دور ۾ مڪاني چونڊن تي ڪو به ڌيان نه ڏنو ته جئين سندن اڳواڻ فنڊ کائيندا رهن. عارف علوي ۽ علي زيدي جو چوڻ هو ته سندن مڪاني چونڊن بابت نامزد ڪيل اميدوارن کي ڌمڪيون ملي رهيون آهن. هنن چيو ته مڪاني چونڊن سان ئي عوام جا مسئلا حل ٿي سگهن ٿا،  جڏهن ته هنن ڪي پي ڪي ۾ بائيو ميٽرڪ سسٽم جي تجويز ڏني آهي. پي ٽي آءِ اڳواڻن چيو ته جمهوري حڪومت ۾ به سپريم ڪورٽ جي حڪم تي مڪاني چونڊون ٿي رهيون آهن. اڳواڻ چيو ته هنن بوگس ووٽن بابت اليڪشن ڪميشن کي خط لکيو آهي، کين اميد آهي ته ساڻس انصاف ٿيندو. هنن چيو ته ڪراچي لاءِ بيلٽ پيپرن جي هن وقت تائين ڇپائي نه ٿي سگهي آهي. اڳواڻن چيو ته بيلٽ پيپر ڪراچي ۾ ڇپجي رهيا آهن آهن جتي 80 سيڪڙو ايم ڪيو ايم ڪارڪن ڪم ڪري رهيا آهن. عارف علوي ۽ علي زيدي جو چوڻ هو ته بيلٽ پيپلزن جي ڇپائي ڪراچي بجاءِ ٻين شهرن ۾ ڪرائي وڃي.