تازيون خبرون

Daily Archives: April 14, 2015

پي ايس بي اڪيڊمي لمز جي ٽيم کي وومين فٽ بال ميچ ۾ 0-3 تان هارائي ڇڏيو

اسلام آباد (اسپورٽس نيوز) پاڪستان اسپورٽس بورڊ (پي ايس بي) اڪيڊمي وومين فٽ بال نمائش ميچ ۾ لمز کي 0-3 گول تان هارائيڇڏيو، پي ايس بي جي ايمان شاندار ڪارڪردگي جو مظاهرو هيٽ ٽرڪ ڪئي، پاڪستان اسپورٽس ڪمپليڪس ۾کيڏيل ميچ ۾ وقفي تائين پي ايس بي اڪيڊمي لمز خلاف 0-1 جي سرسي حاصل ڪئي هئي، ٻئي هاف ۾ پي ايس بي وڌيڪ ٻه گول ڪري مقابلو 0-3 تان کٽي ورتو، پي ايس بي طرفان ٽئي گول ايمان ڪيا.

 

قومي عورتن واري ٽيم فيڊ ڪپ ۾ شاندار ڪارڪردگي جو مظاهرو ڪندي: انعام الحق

اسلام آباد (اسپورٽس نيوز) ڪوچ انعام الحق چيو آهي ته قومي عورتن واري ٽيم فيڊ ڪپ ۾ شاندار ڪارڪردگي جو مظاهرو ڪندي، فيڊ ڪپ 14 کان 18 اپريل تائين ڀارت جي شهر حيدرآباد دکن ۾ کيڏيو ويندو، هن چيو ته ٽن ميمبرن واري قومي ٽيم ۾ روشنا سهيل، ايمان قريشي ۽ ساره منصور شامل آهن، هن چيو ته رانديگرن تربيتي ڪيمپ ۾ ڀرپور محنت ڪئي آهي ۽ اميد آهي ته رانديگرياڻيون فيڊ ڪپ ۾ شاندار ڪارڪردگي جو مظاهرو ڪنديون.

 

غير قانوني طور هلندڙ فيڪٽريون ۽ داءُ تي لڳل انساني جانيون

 

ڪراچي جي ڪورنگي واري علائقي الله والا ٽائون ۾ هڪ فيڪٽري مان ڪيميڪل جي ٽينڪ مان 7 ڄڻن جا لاش مليا آهن، جن مان 5 جي سڃاڻپ ٿي وئي آهي. ذريعن موجب ڪيميڪل جي ٽينڪ ۾ 7 لاش ملڻ جو اطلاع فيڪٽري انتظاميا کي ڏنو ويو، جنهن کانپوءِ ريسڪيو ٽيمون پهچي ويون، جن 7 ئي لاشن کين ٽينڪ مان ٻاهر ڪڍي اسپتال منتقل ڪري ڇڏيو، هٿ آيل لاشن مان 5 جي سڃاڻپ سهيل، نواز، عمران، عدنان ۽ مهتاب جي نالن سان ٿي آهي. پولييس جا وڏا اٽالا به اطلاع ملڻ تي فيڪٽري پهچي ويا، جتي سيڪيورٽي جا انتهائي سخت انتظام ڪندي جاچ شروع ڪئي وئي آهي. اها خبر ناهي پئجي سگهي ته اهي لاش فيڪٽري ۾ ڪيميڪل جي ٽينڪ تائين ڪيئن پهتا ۽ مارجي ويلن جو تعلق ڪهڙي علائقي سان آهي، اها به جاچ ڪئي پئي وڃي ته اهو حادثو آهي يا وري انهن ماڻهن کي قتل ڪري لاش ٽينڪ ۾ لڪايا ويا . جناح اسپتال جي حادثن واري شعبي جي سربراهه ڊاڪٽر سيمي جمالي ان ڳالهه جي تصديق ڪئي آهي ته 6 پورهيتن جا لاش اسپتال آندا ويا آهن انهن جي فوت ٿيڻ جو ڪارڻ معلوم ڪرڻ لاءِ پوسٽ مارٽم ڪيو پيو وڃي. ابتدائي طور موت جو سبب ساهه ٻوساٽجڻ ئي لڳي رهيو آهي. پيپلز پارٽي جي مرڪزي اڳواڻ فريال ٽالپر ڪورنگي جي الله والا ٽائون جي فيڪٽري ۾ پورهيتن جي فوت ٿيڻ واري واقعي تي گهري ڏک ۽ افسوس جو اظاهر ڪيو آهي. آچار فيڪٽري ۾ ڪرندڙ 7 پورهيتن مان هڪ پورهيت جنهن کي الله رکي ان کي ڪير چکي جي چواڻي بابت زنده نڪري آيو. اطلاعن مطابق کوهه ۾ هڪ مزدور ڪريو هو جنهن کي بچائڻ لاءِ هڪ کانپوءِ ٻيو ڪرندو ويو ۽ جملي طور 7 مزدور ڪري پيا شروعاتي طور تي چيو ويو ته 7 ئي ماڻهو فوت ٿي ويا جڏهن ته امدادي ڪارروائين دوران هڪ مزدور جيئرو نڪري آيو، مزدور هن وقت سخت ذهني دٻاءَ جو شڪار آهي ذهني حالت بهتر ٿيڻ تي مزدور جو بيان به رڪارڊ ڪيو ويندو. حادثي جو شڪار ٿيل فيڪٽري غيرقانوني طور رهائشي علائقي ۾ قائم ڪئي وئي هئي. فيڪٽري ۾ هوا جي اچ وڃ جو ڪو به مناسب بندوبست نه هو، جنهن جي ڪري فيڪٽري ملازم هڪ ٻئي کي بچائيندي ساهه ٻوساٽجڻ کانپوءِ فوت ٿي ويا. ذريعن مطابق حادثي جو شڪار ٿيل فيڪٽري جو مالڪ مهتاب جي رهائش دهلي ڪالوني ۾ آهي جڏهن ته فيڪٽري غيرقانوني طور رهائشي علائقي ۾ قائم ڪئي وئي هئي. ذريعن مطابق غيرقانوني طور تي فيڪٽري جي تعمير ۾ قاعدن ۽ قانونن جا بکيا اڊيريا ويا هئا ۽ فيڪٽري ۾ هوا جي اچ وڃ جو ڪو به بندوبست نه هو

 

حالتِ جنگ ؛واحد پارس هيسباڻي

تربت ويجهو سهراب ڊيم تي مزدوري لاءِ ويل سنڌ جي 7 مزدورن سميت 20 پورهيتن جو دهشتگردن هٿان قتل وارو واقعو دهشتگردي جي ڀيانڪ صورتحال جو تازو مثال آهي. هي دهشتگردي جيڪا نه اسان کي سڪون سان عبادتگاهن ۾ عبادت ڪرڻ ڏئي ٿي، نه سڪون سان اسڪولن ۾ تعليم حاصل ڪرڻ ڏئي ٿي ۽ نه سڪون سان محنت مزدوري ڪرڻ ڏئي ٿي، ان مان اسان جي جان ڪڏهن ڇُٽندي؟ اهو اهڙو سوال آهي جنهن جو ڪنهن وٽ به مطمئن ڪندڙ جواب ناهي. اها اهڙي ڳڻتي آهي جيڪا هر امن پسند ماڻهو جي دل جو روڳ بڻجي رهي آهي.

هن واقعي ۾ اسلام ڪوٽ تعلقي جي ڳوٺ چوڻهار جي ٻن ڀائرن مجنون، صوبيدار سميت ساڳئي ڪٽنب جا 5 ڀاتي اجل جو شڪار بڻيا آهن. هي مسڪين ۽ پورهيت ماڻهو جيڪي پيٽ گذر لاءِ سهراب ڊيم تي مزدوردي لاءِ ويل هئا، جن جي گهر ڀاتين کي آسرو هيو ته اهي ٻه ڏوڪڙ ڪمائي آڻيندا جنهن مان گهر جو سيڌو سامان وٺڻ سان گڏ ٻيون ضروررتون پوريون ڪبيون. جڏهن انهن جا لاش وارثن سامهون پهتا هوندا ته انهن جي ڪيفيت ڇا جڙندي هوندي؟ بس ٿورڙو انساني دل سان تصور ڪرڻ جي ضرورت آهي،  جتي حالت اها ٿي وڃي جو جيڪڏهن نه ڪمائجي ته بک مري وڃجي ۽ اگر ڪمائجي ته دهشتگردن هٿان مارجي وڃجي ته اتي زندگي جو ڇا مقصد باقي رهجي وڃي ٿو. پاڻ هاڻي اهڙي ديس جا رهواسي بڻجي ويا آهيون جتي نه مرضي سان جي سگهجي ٿو ۽ نه مرضي سان مري سگهجي ٿو. ڪنهن به وقت ڪجهه به ٿي وڃڻ وارو خيال ذهنن ۾ واسو ڪري چڪو آهي. مون کي سمجهه ۾ نٿو اچي ته هنن مسڪين پورهيتن انهن دهشتگردن جو نيٺ بگاڙيو ڇا هو جن کي ائين آڌي رات جو ننڊ ۾ ستل هجڻ دوران بيدردي سان قتل ڪيو ويو. هن معاملي ۾ سوال اهو به اڀري رهيو آهي ته جن ماڻهن هنن کي مزدوري لاءِ گهرايو هو انهن هنن جي تحفظ جي حوالي سان ڪهڙا بندوبست ڪيا هئا؟! هتي ماڻهن کي ائين ننڌڻڪائي واري عالم ۾ مارجڻ لاءِ ڇڏي ڏيڻ ڪٿان جو انصاف آهي!؟ بلوچستان جي گهرو وزير چيو آهي ته هن واقعي ۾ ڀارتي ايجنسي ”را“ ملوث آهي. اسان وٽ وڏو مسئلو اهو به آهي ته هتي معاملي جي جاچ کان اڳ ذميواري ڪنهن نه ڪنهن جي ڳچي ۾ وجهي پاڻ آجو ٿيڻ جي ڪوشش ڪئي ويندي آهي. جيڪڏهن هن واقعي ۾ واقعي به ”را“ ملوث آهي ته ان جون ثابتيون ڪهڙيون آهن؟ ۽ جيڪڏهن ڪي ثابتيون آهن ته پاڻ واري انتظاميه ڇا ڪري رهي هئي؟ ڪنهن به ڏيهي يا پرڏيهي دهشتگرد گروپ طرفان ان انداز ۾ ڪارروائي ڪرڻ ڇا اسان جي انتظامي ڪوتاهي کي ظاهر نه پئي ڪري؟ جنهن ديس ۾ اهڙا واقعا روز جو معمول بڻجي وڃن، اتي به جيڪڏهن سيڪيورٽي جو اهو عالم هجي جو دهشتگرد جڏهن به ۽ جتي به چاهين واقعو ڪرڻ ۾ ڪامياب ٿي وڃن ته اتي تحفظ جي ڪهڙي ۽ ڪنهن مان اُميد رکجي!

حيرت جهڙي ڳالهه اها به آهي ته جتي حڪومت پنهنجي عوام کي تحفظ ڏيڻ ۾ ئي ناڪام بڻيل هجي اتي پرائي جنگ ۾ حصو ڳنڍڻ تي غور ويچار ڪرڻ ڪيڏو نه عجيب آهي. سعودي عرب سميت سموري دنيا ڄاڻي به ٿي ۽ پنهنجي اکين سان به ڏسي رهي آهي ته اسين هن وقت خود حالت جنگ ۾ آهيون، دهشتگردي روزانو ڪيترين ئي معصوم جانين کي پنهنجو کاڄ بڻائي رهي آهي. ان صورتحال ۾ اسان کي جنگ ۾ ساٿ ڏيڻ لاءِ زور ڀرڻ ڪيڏو نه عجيب آهي. هن معاملي تي پارليامينٽ جيڪو متفقه طور تي فيصلو ڪيو آهي اهو نه صرف اسان جي پنهنجي زميني حقيقتن جي عين مطابق آهي پر اهو اسان جي مفاد ۾ به بهتر آهي ڇو ته ماضي ۾ بنا سوچ ويچار جي پرائي جنگ ۾ ڪُڏي اسان ڪيترو ئي نقصان ڀوڳي چڪا آهيون. دهشتگردي جو ڪيس جيڪو ڀيانڪ مهانڊو اسان جي سامهون آهي، اهو ان جو ئي نتيجو آهي، اسان وٽ هي خودڪش واقعا نائين اليون کانپوءِ ئي ٿيڻ شروع ٿيا آهن، تڏهوڪي ڊڪٽيٽر آمريڪا جي هڪڙي فون ڪال تي جهڙي نموني پوري قوم کي مصيبت ۾ وڌو اڄ اسين ان جو ئي ڪيتو ڀوڳي رهيا آهيون. جهڙي نموني يمن واري صورتحال تي فيصلو پارليامينٽ تي ڇڏيو ويو ۽ سڀني ڌرين کي اتحاد ۾ ورتو ويو، جيڪڏهن ان وقت به اهو ئي طريقو اختيار ڪيو وڃي ها ته اڄ دهشتگردي جا اهڙا واقعا نه ٿين ها، اگر پارلياماني سيٽ اپ نه هو ته آل پارٽيز ڪانفرنس ذريعي سياسي پارٽين کان صلاح مشورو ورتو وڃي ها ته ان سان آمريڪا اڳيان به اهو پيغام وڃي ها ته پاڪستان سندس ڪالوني ناهي، جنهن کي هو جڏهن به ۽ جنهن وقت به چاهي پنهنجي مرضي سان هلائي سگهجي ٿو ۽ پنهنجي مفادن لاءِ استعمال ڪري سگهي ٿو، ان سان گڏوگڏ هن معاملي جو گڏيل نموني صحيح فيصلو به ٿي سگهي ها. جيڪڏهن آمريڪا سان ساٿ ڏيڻ ضروري به بڻجي وڃي ها، تڏهن به اهو ساٿ ڪن شرطن تي ڏنو وڃي ها ۽ مستقبل ۾ دهشتگردي کان بچڻ لاءِ ڪي حفاظتي تدبيرون اختيار ڪجن ها پر فرد واحد پنهنجو اقتدار بچائڻ لاءِ پنهنجي مرضي جو فيصلو ڪري پوري قوم کي هڪ اهڙي باهه ۾ ڌڪي ڇڏيو، جنهن هينئر تائين ڪيترن ئي گهرن کي ساڙي ڇڏيو آهي. ان کان اڳ ڊڪٽيٽر ضياءَ به ائين ئي ڪيو هو. افغانستان مان روس کي ڀڄائڻ ۽ آمريڪا جي حاڪميت قائم ڪرڻ لاءِ جيڪو طالبان نالي سان فيڪٽر اڀاريو ويو، اهو اڳتي هلي اسان جي پنهنجي ڳچيءَ ۾ پئجي ويو، جيڪي هٿيار اسان جي ذريعي انهن کي روس سان وڙهڻ لاءِ مليا اهي هن پوءِ اسان تي ئي استعمال ڪرڻ شروع ڪيا.

خبر آهي ته يمن مسئلي تي غير جانبدار رهڻ تي متحده عرب امارات پاڪستان کي ان جي قيمت ادا ڪرڻ جي ڌمڪي ڏني آهي ۽ پاڪستاني پارليامينٽ طرفان يمن بحران ۾ غير جانبدار رهڻ جي قرارداد منظور ڪرڻ کي ايران جو ساٿ ڏيڻ جي عڪاسي ۽ علامت قرار ڏنو آهي.

هن خبر تي پاڻ واري سرڪار طرفان اڃا تائين ڪو به ردعمل يا موقف سامهون نه آيو آهي پر حقيقت ۾ هي سڀ ڪجهه اسان جي اندروني معاملن ۾ مداخلت ڪرڻ آهي پاڪستان هڪ آزاد رياست آهي، ڪهڙي معاملي تي هي ڪهڙو موقف اختيار ڪري ٿي ان معاملي ۾ هي آزاد ۽ خودمختيار آهي، زوري زبردستي ان کي مجبور نه ٿو ڪري سگهجي. گڏيل عرب امارات طرفان وڏي قيمت ادا ڪرڻ واري ڌمڪي کي سنجيدگي سان وٺڻ جي ضرورت آهي ۽ هي معاملو عالمي برادري اڳيان رکڻ جي گهرج آهي. پاڪستان ۾ هن وقت جمهوري سسٽم هلي رهيو آهي. پارليامينٽ خودمختيار آهي اها جيڪڏهن يمن واري معاملي تي غير جانبدار رهڻ جو ٺهراءُ پاس ڪري رهي آهي ته اهو ان جو قانوني ۽ آئيني اختيار آهي، ان تي ڪنهن به ٻاهرين طاقت جي ناراض ٿيڻ جو ڪو به جواز ناهي. سڌي سنئين ڳالهه آهي هي ملڪ اهو ئي فيصلو ڪندو جيڪو هن جي حق ۾ هوندو. اهڙين حالتن ۾ جڏهن هي ملڪ خود جنگي حالتن کي منهن ڏئي رهيو آهي. دهشتگردن سان هڪ وڏي ويڙهه وڙهي رهيو آهي، انهن حالتن ۾ هي ڪنهن ٻاهرين ڌر جو ساٿ ڪٿان ڏئي سگهي ٿو.

هن صورتحال ۾ حڪومت کي پنهنجو ڀرپور موقف دنيا سامهون رکڻ جي ضرورت آهي. ملڪ کي اندروني يا بيروني جيڪا به خطرا آهن يا اهڙو ڪو به امڪان آهي ته ان لاءِ پارليامينٽ ذريعي ئي اپاءُ وٺڻ جي گهرج آهي، ڪنهن به پريشر ۾ اچي جيڪڏهن ماضي واري ڪا غلطي دهرائي وڃي ٿي ته ان جو تمام وڏو نقصان ٿي سگهي ٿو ۽ ان ڪري هن معاملي ۾ هوشياري سان اڳتي وڌڻ جي گهرج آهي.

تربت ويجهو جيڪو دهشتگردي جو ايڏو وڏو واقعو ٿيو آهي ان جي اعليٰ سطحي جاچ ڪرڻ جي گهرج آهي. بلوچستان جو گهرو وزير جيڪو هن واقعي ۾ ڀارتي ايجنسي ”را“ جي ملوث هجڻ جي ڳالهه ڪري رهيو آهي جيڪڏهن اهڙي واقعي به ڪا ثابتي ملي ٿي ته نه رڳو ڀارت آڏو ان معاملي تي احتجاج ڪرڻ جي گهرج آهي پر هي معاملو عالمي فورم تي به کڻي وڃڻ جي گهرج آهي، ڀارت هڪ طرف ڳالهين واري سلسلي کي اڳتي وڌائڻ جو چئي رهيو آهي ۽ ٻئي طرف اهڙن واقعن ۾ به ملوث آهي ته اها انتهائي منافقت واري صورتحال آهي. هن معاملي ۾ ڀارت سان سفارتي سطح تي هڪ هڪاڻي ڪرڻ جي گهرج آهي. جيڪڏهن هن واقعي ۾ ڪو ٻيو فيڪٽر ملوث آهي ته ان جي به جاچ ٿيڻ گهرجي. مسڪين مزدورن جو ان انداز ۾ بيدردي سان مارجي وڃڻ هڪ وڏو الميو آهي نه صرف هنن جي قاتلن کان حساب ڪتاب ٿيڻ گهرجي پر هنن جي حفاظت لاءِ ذميوار انتظاميه کان به پڇاڻو ٿيڻ گهرجي ٿر سان واسطو رکندڙ مسڪين خاندانن جي هنن نوجوانن جي وارثن جي مالي مدد ڪرڻ جي به ضرورت آهي ڇو ته هنن مان اڪثر پنهنجي گهرن جا اڪيلا ڪمائيندڙ هئا. هڪڙي گهر جا ته ٻه ڀائر مارجي ويا آهن. دهشتگردي جيڪا عوام لاءِ هڪ عذاب بڻجي وئي آهي، ان مان ان کي ڇوٽڪارو ڏيارڻ جي گهرج آهي. تازي واقعي ۾ ڪير به ملوث هجي اهو ظاهر ٿيڻ کپي ۽ ان کي سزا ملڻ کپي، عوام کي دهشتگردي جي واقعن کان محفوظ رکڻ لاءِ سيڪيورٽي جي سسٽم کي وڌائڻ جي گهرج آهي.

 

هليري ڪلنٽن هڪ اُميد ؛وينگس

”اسان سڀئي ان ڪري ماريا نه وينداسين ته اسان جي مٿان هٿيارن سان حملا ڪيا ويندا پر اسان جو موت، ان ڏينهن ٿيندو، جڏهن اسان جي دلين مان اُميد جي ڪوئل سڏ ڏيڻ بند ڪري ڇڏيندي. ان ڏينهن موت حقيقي روپ ۾ ايندو. اُميد هڪ طاقتور جوت آهي.“مون کي مٿيون سٽون ذهن تي ان وقت تري آيون، جڏهن خبر پڙهي ته آچر ڏهاڙي هليري ڪلنٽن، آمريڪي صدارتي چونڊن ۾ حصو وٺڻ جو اعلان ڪندي.اِها صرف هڪ خبر نه هئي پر ان خبر هر ان چهري تي مسڪراهٽ آڻي ڇڏي جن ڪيترن سالن کان وٺي هليري ڪلنٽن کي آمريڪا جي پهرين عورت صدر طور ڏسڻ پئي چاهيو. مون کي ياد اچي پيو ته ”جڏهن مان آمريڪا ۾ هئس ان وقت هليري ڪلنٽن جي صدر نه ٿيڻ تي بحث هلي رهيو هو ۽ مان پنهنجن آمريڪي دوستن سان بحث ڪيو، آخر توهان هليري ڪلنٽن کي ووٽ ڏئي، آمريڪا جي پهرين عورت صدر ڇو نه ٿا چونڊيو؟ اسان کي ڏسو، اسان شهيد بينظير ڀٽو کي ٻه ڀيرا وزيراعظم لاءِ ووٽ ڏنو، جيتوڻيڪ هڪ اهڙو ملڪ جتي دقيانوسي سوچ رکندڙ گروپ کان شهيد محترمه بينظير ڀٽو جي حڪومت هضم نه ٿي پر هوءَ وڙهندي رهي ۽ ان جي ويڙهه صرف ڪجهه ماڻهن سان نه هئي پر هر پاسي کان ان جي خلاف هٿيار اُڀا ڪيا ويا ڪن مذهب کي استعمال ڪيو ته ڪن عورت جي نالي کي استعمال ڪيو، ڪن الزام هنيا ته ڪن محترمه بينظير ڀٽو کي ڪمزور ڪرڻ جي پوري ڪوشش ڪئي.شهيد محترمه بينظير ڀٽو آمريت جي خلاف وڙهي، پاڪستان جي تاريخ ئي نه پر ٻين ملڪن جي تاريخ کڻي ڏسو توهان کي گهٽ نظر ايندو، جن آمرن خلاف ويڙهه ڪئي هجي.هڪ اهڙي رياست ۾ جتي هر پاسي کان ٻوساٽيل ماحول ۽ جنهن جي تاريخ منجهيل هجي اهڙي رياست ۾ شهيد محترمه بينظير ڀٽو اُٿي کڙي ٿي. ”توهان آمريڪن وٽ بهترين سسٽم آهي توهان جي سماج ۾ انسان کي آزاد زندگي گذارڻ جو پورو حق آهي. ايترو ئي نه پر توهان جا ماڻهو جمهوري ۽ لبرل ازم جي پروي ڪندڙ پڻ آهن.آمريڪا جو هر قدم دنيا ۾ نئين تاريخ رقم ڪري ٿو پوءِ توهان هليري ڪلنٽن کي ووٽ ڇو نه ڏنو ۽ ان کي صدر ڇو نه ٿا بڻايو؟“ان دوران هڪ آمريڪي دوست خوشيءَ ۾ مسڪراهٽ ڏيندي چيو ته ڳالهه تنهنجي درست آهي پر اسان هن ڀيري ووٽ نه ڏنوسين هاڻي جيڪڏهن هليري ڪلنٽن ٻيهر اُٿي ته شايد آمريڪن عوام هليري ڪلنٽن کي ڀرپور موٽ ڏئي سگهي ٿو.ان وقت مون خوش ٿي ڪري چيو ته ڳالهه صرف هڪ عورت جي صدر ٿيڻ جي ناهي پر ان سان پوري دنيا ۾ هڪ بهترين پيغام ۽ اُميد جاڳي پوندي خاص طور تي عورتن جي حقن جي حوالي سان هڪ مضبوط سهارو اڳيان ايندو.دنيا ڪيتري به ترقي ڪري، پوءِ به عورتن جي حيثيت ٻئي درجي جي آهي، اڄ به عورت جي طاقت ۽ ذهانت تي ضرب هڻڻ جي ڪوشش ٿئي پئي. ڪير ڪيترو به چوي ته اهي عورتن جي برابري جي موقف کي تسليم ڪن ٿا، پر ڪٿي نه ڪٿي اهي سڀئي سماج جي دقيانوسي سوچ تي قدم رکن ٿا، انهن جي اندر ۾ صدين واري پراڻي بوگس سوچ سامهون اچي وڃي ٿي.ان ڪري اهو چوڻ ته اسان جي سماج ۾ پروگريسو سوچ رکندڙ عورتن جي برابري کي تسليم ڪن ٿا ته پوءِ توهان سڀئي انهن جي عملي زندگي ۾ جهاتي پائي ڏسو خبر پئجي ويندي، اهي ڪيتري برابري جي موقف تي قائم آهن…!هاڻوڪي دنيا هڪ ڄار ۾ ڦاسي پئي آهي، جيڪو ڄار دهشتگردي آهي، جنهن ۾ عورتون ۽ ٻارن جي وڏي قيمت لڳي پئي. عراق ۽ شام جي حالتن کي ڏسو جتي عورتن سان داعش دهشتگردن ڪيتري نه تذليل ڪئي آهي.کڻي سعودي عرب ملڪ کي ڏسو، جتي اڄ به عورتن جي آزادي تي بندش آهي. اهي ملڪ جيڪي غريب آهن اتي عورتن جي ڪيتري حيثيت آهي، مون کي ياد آهي ته پوڙهي عورت جنهن جو نالو سورٺ مائي هو، ان مون کي چيو ته ”ڌيءَ اسان (عورتن) جي حيثيت هڪ جانور کان به گهٽ آهي.“افغانستان ۾ فرخنده سان ڇا ٿيو؟ سرعام کيس قتل ڪيو ويو، هڪ مولوي جي الزام تي ڪنهن جي زندگي کي فل اسٽاپ ڏنو ويو ۽ ان کي مذهب جو رنگ ڏئي معصوم عورت جي قتل تي پردو رکڻ جي ڪوشش ڪئي وئي.اسان هڪ اهڙي سماج ۾ ساهه کڻون ٿا، جتي عورتن جي اڄ به قيمت لڳي پئي پوءِ اها قيمت ڪهڙي به سڪي جو روپ وٺي اچي، صليب تي چڙهيل عورتون ئي آهن.نائيجيريا ۾ 200 کان مٿي شاگردياڻين کي بوڪو حرام اغوا ڪيو. هليري ڪلنٽن انهن شاگردياڻين لاءِ آواز اُٿاريندي چيو ته ”اسان جون نينگريون واپس آڻي ڏيو.“ هليري جي آواز پوري دنيا کي هڪ ڪري ڇڏيو.هليري ڪلنٽن جي صدارتي مهم ۾ پير رکڻ سان انهن سڀني کي ڀرپور جواب ملندو، جن اهو سمجهيو پئي ته هليري ڪلنٽن هاڻي اڳيان نه ايندي پر تاريخ جي ورقن تي هڪ ڀيرو ٻيهر باب لکجي پيو ته هڪ ليڊي وري ٻيهر پنهنجي پوري طاقت سان اڳيان اچي پئي، ان پنهنجي اُميد جي جوت کي وسامڻ نه ڏنو.هليري ڪلنٽن جي صدارتي اميدوار مهم ۾ حصو وٺڻ سان دقيانوسي سوچ رکندڙ کي جواب آهي ته دنيا جي سياسي واڳ کي هوءَ هلائي سگهي ٿي ۽ خاص طور تي داعش جهڙيون دهشتگرد تنظيمون جيڪي عورتن جي تذليل ڪن پيون، انهن جي خلاف هليري ڪلنٽن جي اڳيان اچڻ ضروري آهي، جيئن دنيا جي هر عورت جي اندر ۾ اُميد جاڳي ۽ هوءَ پاڻ کي ڪمزور نه سمجهي.

*****************

هڪ پاسي هليري ڪلنٽن جتي هوءَ عورتن جي حقن جو آواز ٿي اُڀرندي پر ان سان گڏوگڏ هليري ڪلنٽن عالمي سياست تي بهترين ڪمانڊ رکندڙ آهي، جيڪڏهن هليري ڪلنٽن جي دور، جنهن ۾ هوءَ foreign minister هئي، ان دوران هن رڪارڊ ٽوڙ ملڪن جا دورا ڪيا ۽ ان وقت هليري ڪلنٽن بهترين  پرڏيهي پاليسي تحت ملڪن سان دوستاڻا ناتا رکيا پڻ عالمي ميڊيا کان وٺي لوڪل ميڊيا تائين هليري ڪلنٽن، خبرن ۾ رهي ۽ هر مسئلي کي سوچي سمجهي حل ڪيو.

جڏهن هليري ڪلنٽن پرڏيهي وزير هئي ته ان وقت مون لکيو هو ته “She has art of diplomacy” ، ايترا حساس مسئلا هئا جن کي هليري ڪلنٽن پنهنجي ذهانت سان حل ڪرڻ ۾ ڪامياب ٿي.

هليري ڪلنٽن انسان جي آزادي تي پورو يقين رکي ٿي، هوءَ بوگس روايتن جي آڙ ۾ انسان تي بندش جي خلاف آهي. دنيا ۾ فقدان انسان جي آزادي تي لڳندڙ ضرب جو آهي.

جيڪڏهن هليري ڪلنٽن صدارتي چونڊن ۾ کٽي وڃي ٿي، جيتوڻيڪ اهو چوڻ وقت کان اڳ جي ڳالهه آهي پر جيڪڏهن هليري ڪلنٽن صدر ٿي وڃي ٿي ته ان سان هڪ جمهوري ۽ انسان حقن جي لاءِ بهترين اُميد هوندي.

هليري ڪلنٽن جي آمريڪي صدارتي چونڊن ۾ حصو وٺڻ صرف آمريڪا جي لاءِ ئي خوبصورت اُميد ناهي، پر پوري دنيا جي لاءِ به هڪ اُميد آهي. هڪ اهڙي جوت جنهن سان دنيا ۾ ٻين اُميدن جي سهارو ملندو.

هليري ڪلنٽن جي هار مڃڻ کان انڪار ڪري هڪ ڀيرو وري اڳيان آئي آهي، يقينن ان دنيا کي اهو به پيغام ڏنو آهي ته عورت جيڪا ڪڏهن به پير پٺتي نه ٿي ڪري، هوءَ آخر ساهه تائين اُميد کي قائم ڪري زندگي کي سهارو ڏيندي رهندي.

ويلڊن ڊيئر هليري ڪلنٽن،

هليري صدارتي چونڊن جي مهم ۾ حصو وٺي، هڪ اُميد ۽ خواب کي ٻيهر جاڳايو آهي. اسان سڀني جي لاءِ اها ئي هڪ وڏي ڪاميابي آهي ته هليري ڪلنٽن ٻيهر واپس اچي رهي آهي.