تازيون خبرون

Daily Archives: April 14, 2015

سعودي عرب جي سالميت کي خطرو ٿيو ته سخت جواب ڏينداسين: نواز شريف

اسلام آباد (بيورو) وزيراعظم نوازشريف چيو آهي ته سعودي عرب اسانجو اهم اسٽريٽيجڪ اتحادي آهي ساڻس ڪُلهو ڪُلهي ۾ ملائي هلنداسين جڏهن ته اُن جي خودمختياري ۽ سالميت اسانجي پرڏيهي پاليسي جو به اهم حصو آهي. يمن جي صورتحال تي پاليسي بيان ڏيندي وزيراعظم نوازشريف جو چوڻ هو ته حڪومت وچ اوڀر جي صورتحال جو مختلف پهلوئن کان جائزو ورتو، پارليامينٽ جي گڏيل قرارداد حڪومتي پاليسي موجب آهي پر خليجي اتحادي ان قرارداد کي صحيح طور تي نه سمجهي سگهيا، قراداد کانپوءِ به ڪيترائي بيان آڏو آيا ۽ سمن جي صورتحال تي ميڊيا ۾ به گهڻو ڪجهه ٻڌو ۽ انهيءَ حوالي سان گهڻو ڪجهه واضح ڪرڻ ضروري آهي. وزيراعظم جو چوڻ هو ته پاڪستان يمن ۾ حوثين جي ڪارروائين جي مذمت ڪري ٿو، يمن جو مسئلو ڳالهين ذريعي حل ڪرڻ چاهيون ٿا پر سعودي عرب جي سالميت کي ڪوبه خطرو ٿيو ته اُن جو خت جواب ڏنو ويندو. هن چيو ته سعودي عرب اسانجو ويجهو اتحادي آهي اڻ سان ڪُلهو ڪلهي ۾ ملائي هلنداسين. جڏهن ته سعودي عرب جي خودمختياري ۽ سالميت اسانجي پرڏيهي پاليسي جو به اهم حصو آهي. وزيراعظم پاليسي بيان ۾ چيو ته اسان بنا ڪنهن شڪ ۽ شبهي جي خليجي رياستن سان گڏ بيٺل آهيون ۽ انهيءَ ڏکئي وقت ۾ دوست ملڪن کي اڪيلو نه ڏينداسين، زميني صورتحال جو جائزو وٺڻ لاءِ سعودي عرب سان گڏ لاڳيتو رابطي ۾ آهيون ۽ سعودي ڀائرن کي يقين ڏياريون ٿا ته اسين ساڻن گڏ بيٺل هونداسين. هن چيو ته پاڪستان ايران تي حوثي باغين کي ڳالهين جي ميز تي آڻڻ ۾ ڪردار ادا ڪرڻ لاءِ زور ڏئير هيا آهن. اسين يمن ۾ منصور هادي جي حڪومت جي بحالي تي يقين رکن ٿا ڇو ته اُن جي حڪومت جي بحالي امن ڏانهن هڪ اهم قدم هوندو.

سنڌ اسيمبليءَ ۾ گهر ۽ ملڪيتون مسواڙ تي ڏيڻ بابت بل 2015ع منظور

ڪراچي (اسٽاف رپورٽر) سنڌ اسيمبلي گهر ۽ ملڪيتون مسواڙ تي ڏيڻ بابت بل 2015ع منظور ڪري ورتو، بل تحت ملڪيتون مسواڙ تي ڏيڻ جو اطلاع پوليس کي ڏيڻو پوندو قانون جي ڀڃڪڙي ڪندڙن کي 6 مهينا قيد ۽ 45 هزار رپيا ڏنڊ وڌو ويندو، جڏهن ته ايوان هڪ ٻيو بل ۽ 4 ٺهراءَ به پاس ڪري ورتا. سنڌ اسيمبليءَ جو اجلاس اسپيڪر آغا سراج دراني جي هيٺ ٿيو. اجلاس ۾ تربت ۽ ڪورنگي واقعن جي سخت مذمت ۽ فاتحه خواني ڪرائي وئي جڏهن ته تعليمي ماهر ۽ دانشور علامه آءِ آءِ قاضي جي ورسي تي اسيمبلي ۾ دعا به پڙهائي وئي. اسيمبلي اجلاس دوران صوبائي وزير سڪندر مينڌري گهر ۽ ملڪيتون مسواڙ تي ڏيڻ بابت بل 2015 ع پيش ڪيو جيڪو منظور ڪيو ويو. بل جي متن ۾ چيو ويو آهي ته هوٽل، گيسٽ هائوسز، هاسٽلز، گهر ۽ ٻيون ملڪيتون مسواڙ تي ڏيڻ جو اطلاع پوليس کي ڏيڻو پوندو. بل موجب مهمانن ۽ مسواڙ تي رهندڙ ماڻهن جي ڊيٽا پوليس کي ٽن ڪلاڪن ۾ فراهم ڪرڻي پوندي جنهن جي ڀڃڪڙي ڪندڙن تي 6 مهينا قيد ۽ 45 هزار رپيا ڏنڊ وڌو ويندو. ايم ڪيو ايم ۽ فنڪشنل ليگ ملڪيتون مسواڙ تي ڏيڻ بابت بل ۾ ڪيتريون ترميمون پيش ڪيون جيڪي رد ڪيون ويون. سيد سردار احمد جو چوڻ هو ته پوليس کي اطلاع ڏيڻ جو ٽائيم فريم ٽن ڪلاڪن بدران 24 ڪلاڪ هئڻ گهرجي، لامحدود اختيار پوليس کي ڏيڻ سان صوبو پوليس اسٽيٽ بڻجي ويندو. اپوزيشن ليڊر شهريار مهر ٽائيم فريم ٽن ڪلاڪن ۾ واڌ لاءِ ترميم پيش جيڪا رد ڪئي وئي ۽ بل اڪثريت راءِ سان منظور ڪيو ويو. اسيمبلي اجلاس دوران صوبائي وزير سڪندر مينڌري اَي او پوسٽ گريجوئيٽ انسٽييوٽ آف آرٿوپيڊڪ بل 2015ع پيش ڪيو جيڪو منظور ڪيو ويو. لاڙڪاڻي مان نيشنل بينڪ جي زونل آفيس سکر منتقل ڪرڻ خلاف خورشيد جوڻيجي ٺهراءُ پيش ڪيو جيڪو پڻ پاس ڪيو ويو. خورشيد جوڻيجي چيو ته وفاقي ناڻي واري وزارت آفيس جي سکر منتقلي واري فيصلي تي نظرثاني ڪري، آفيس جي منتقلي سان لاڙڪاڻي جي آبادگارن کي ڏکيائيون ٿينديون. صوبائي وزير سڪندر مينڌري پاران پيش ڪيل گزيٽ جي ڇپائي جو اختيار وفاق کي ڏيڻ جو ٺهراءُ ايوان اتفاق راءِ سان منظور ڪري ورتو. پ پ ميمبر خير النساءِ مغل پنجاب جي فيڪٽرين مان زهريلا پاڻي گهوٽڪي ۾ ڇوڙ ڪرڻ خلاف ٺهراءُ پيش ڪيو جيڪو پڻ منظور ڪيو ويو. خير النساءِ مغل چيو ته گهوٽڪي ضلعي ۾ هزارين ايڪڙ تي فصل تباهه ٿي رهيو آهي، پنجاب حڪومت جي رويني خلاف هـُو احتجاج ڪن ٿا. اسٽريٽ چلڊرين جي عالمي ڏينهن جي موقعي تي ٻارن جي ڀلائي ۽ بحالي لاءِ اسيمبلي ۾ ٺهراءُ پيش ڪيو ويو. ٺهراءُ ايم ڪيو ايم جي سميتا افضال پيش ڪيو جنهن ۾ مطالبو ڪيو ويو ته اسٽريٽ چلڊرين لاءِ زباني جمع خرچ بدران عملي قدم کنيا وڃن. بحث کانپوءِ ايوان اسٽريٽ چلڊرين بابت ٺهراءُ اتفاق راءِ سان منظور ڪري ورتو. اجلاس دوران تحريڪ انصاف جي چئن ميمبرن جي موجودگي خلاف ايم ڪيو ايم ميمبرن احتجاج ڪيو. محمد حسين چيو ته قانون موجب تحريڪ انصاف جا ميمبر هاڻي اسيمبلي جا ميمبر ناهن رهيا، چاليهه ڏينهن غير حاضر رهندڙ آئين موجب ميمبر نه ٿا رکي سگهن. متحده ميمبر چيو ته تحريڪ انصاف جي چئن ميمبرن جون سيٽون خالي ٿي چڪيون آهن، استعيفائن جي منظوري بابت اسپيڪر جي رولنگ به رڪارڊ تي موجود آهي. صوبائي وزير مراد علي شاهه چيو ته ايم ڪيو ايم ميمبر آئين جو درست حوالو نه پڙهيو آهي. اسپيڪر آغا سراج دراني چيو ته هـُو پي ٽي آءِ ميمبرن جي اسيمبلي ميمبر هئڻ بابت رولنگ ڏئي چڪو آهي، رولنگ کانپوءِ وڌيڪ بحث نه ٿو ڪري سگهجي. سيد سردار احمد چيو ته 7 اپريل تي اسپيڪر رولنگ ڏني جيڪا لکت ۾ اڃا تائين ناهي ملي. اسپيڪر آغا سراج دراني جواب ڏنو ته رولنگ لکت جي صورت ۾ ايم ڪيو ايم ميمبرن کي فراهم ڪئي ويندي. اجلاس دوران صوبائي وزير شرجيل ميمڻ چيو ته اپوزيشن ميمبرن کي پنهنجي رويي تي معافي وٺڻ گهـُرجي، اسيمبلي قاعدن جي جوڙجڪ ۾ حصو وٺندڙ قاعدن جي ڀڃڪڙي رهيا آهن. هن چيو ته احتجاج سڀني جو حق آهي، پر قاعدن جون ڪاپيون ڦاڙي ايوان ۾ اڇلائڻ شرمناڪ عمل آهي. اسپيڪر آغا سراج دراني چيو ته اپوزيشن ليڊر جي رويي کي شرمناڪ قرار ڏئي ڇڏيو. هن چيو ته اپوزيشن ليڊر شهريار مهر کي ساڻس ڪو مسئلو آهي ۽ هن اڄ تائين ڪو اهم معاملو اسيمبلي ۾ نه اٿاريو آهي. آغا سراج دراني چيو ته جن ميمبرن اسيمبلي قاعدن جون ڪاپيون ڦاڙيون انهن خلاف قانون موجب ڪارروائي ٿيڻ گهـُرجي. اجلاس دوران گهرو کاتي جا اهم عهدا خالي هئڻ تي مهتاب اڪبر راشدي ڌيان ڇڪايو نوٽيس پيش ڪيو جنهن ۾ هن چيو ته گهرو کاتي ۾ ايڊيشنل سيڪريٽري ۽ ٻيا عهدا خالي پيل آهن. صوبائي وزير سڪندر مينڌري اعتراف ڪيو ته گهرو کاتو هڪ حساس کاتو آهي، آفيسرن جي غير موجودگي سبب مسئلا پيدا ٿي رهيا آهن. هن چيو ته اسپيشل سيڪريٽري جي پوسٽ خالي آهي، حساس کاتو هئڻ سبب جلد مقرري جي ضرورت آهي ۽ سيڪشن آفيسر جو عهدو به خالي آهي، آفيسرن جي مقرري حڪومت جي ذميواري آهي. ٺٽي ضلعي ۾ روينيو رڪارڊ بابت امير حيدر شاهه شيراني به ڌيان ڇڪايو نوٽيس پيش ڪيو. امير حيدر شاهه شيرازي چيو ته بينظير ڀٽو جي شهادت کانپوءِ باهه ڏئي ساڙيل رڪارڊ اڃا تائين ٻيهر نه جوڙيو ويو آهي، جڏهن ته مختيارڪار ٺٽو رڪارڊ ٺاهڻ لاءِ 10 هزار رپيا رشوت طلب ڪري رهيو آهي. صوبائي وزير سڪندر مينڌري چيو ته ميرپور ساڪري جي 93 ڳوٺن جو رڪارڊ سڙي ويو هو جن مان90 ڳوٺن جو رڪارڊ ٻيهر جوڙيو ويو آهي باقي ٽن جو رڪارڊ جوڙيو پيو وڃي. شاهه فيصل فلاءِ اوور جي اسٽريٽ لائيٽس بابت ايم ڪيو ايم ڌيان ڇڪايو نوٽيس پيش ڪيو. متحده ميمبر وقار شاهه چيو ته اسٽريٽ لائيٽس نه هئڻ سبب ڏوهي وارداتن ۾ واڌ ٿي آهي، اونڌهه سبب ڪجهه ڏينهن اڳ شرافي ڳوٺ ٿاڻي جي پوليس اهلڪارن کي شهيد ڪيو ويو. صوبائي وزير شرجيل ميمڻ چيو ته شهر ۾ اسٽريٽ لائيٽس لاءِ سولر سسٽم متعارف ڪرايو پيو وڃي. شرجيل ميمڻ چيو ته ڪراچي ۾ اسٽريٽ لائيٽس ۽ روڊن جي مرمت لاءِ وڏي وزير فنڊ رکيا آهن. شگر ملز مان نڪندڙ دونهي جي گدلاڻ بابت نندڪمار ڌيان ڇڪايو نوٽيس پيش ڪيو. نند ڪمار چيو ته بدين ۽ ان جي ڀرپاسي وارن علائقن ۾ قائم شگر ملز مالڪ دونهي کي فلٽر ڪرڻ لاءِ چمني نه لڳائي. ان موقعي تي صوبائي وزير ڊاڪٽر سڪندر مينڌري چيو ته شگر ملز خلاف ڪارروائي لاءِ ٽربيونل قائم ڪئي وئي آهي، گدلاڻ جي روڪٿام نه ڪندڙ مل مالڪن خلاف ڪارروائي ڪئي ويندي. نند ڪمار چيو ته الله بچائي چانڊيو معذوري باوجود تعليم کي هٿي وٺرائڻ لاءِ سرگرم آهي، تعليم وارو وزير، معذور عورت کي سرڪاري نوڪري ڏئي. صوبائي وزير نثار کهڙي چيو ته آسو ٻائي کي جائز مقام ڏنو، حڪومت الله بچائي چانڊيو جي به حوصلا افزائي ڪندي. نثار کهڙي چيو ته ٽيچنگ لاءِ ميرٽ تحت ملازمت ملندي، نان ٽيچنگ ملازمت ڏيڻ تي غور ڪيو ويندو. فنڪشنل ليگ ميمبر نصرت سحر عباسي خيرپور ۾ 80 سيڪڙو ٽيوب ويل بند هئڻ بابت التوا واري رٿ پيش ڪئي جنهن ۾ هن چيو ته ٽيوب ويل بند هئي.

 

پاڪستان ۽ نائيجريا کي زراعت جي شعبي ۾ هڪٻئي جي تجربن مان فائدو وٺڻ گهرجي: صدر ممنون حسين

اسلام آباد (بيورو) پاڪستان جي صدر ممنون هسين چيو آهي ته پاڪستان ۽ نائيجريا کي زراعت جي شعبي ۾ هڪٻئي جي تجربن مان فائدو وٺڻ گهرجي ٻنهي ملڪن کي تجارت کي هٿي ڏيڻ لاءِ انقلابي طريقا اختيار ڪرڻ گهرجي اها ڳالهه صدر ممنون حسين نائيجريا لاءِ پاڪستان جي نامزد سفير ليفٽيننٽ جنرل رٽائرڊ آغا محمد عمر فاروق سان ڳالهه ٻولهه ڪندي ڪئي جنهن پاڪستان جي صدر سان ايوان صدر اسلام آباد ۾ ملاقات ڪئي ۽ پنهنجي نئين ذميواري بابت معاملن تي خيالن جي ڏي  وٺ ڪئي صدر کيس نيون ذميواريون سنڀالڻ تي واڌايون ڏنيون ان موقعي تي صدر ٻطرفو لاڳاپا وڌائڻ جي ضرورت تي زور ڏيندي چيو ته پارليماني ۽ عوامي سطح تي وفدن جي ڏي وٺ سان پاڪستان ۽ نائيجريا وچ ۾ نه صرف گڏيل پر مختلف شعبن ۾ لاڳاپا وڌندا صدر پاڪستان ۽ نائيجريا وچ ۾ ڀاڻ، کنڊ، سمينٽ ۽ پام آئيل جي شعبن ۾ گڏيل منصوبا شروع ڪرڻ جي ضرورت تي زور ڏنو صدر چيو ته ٻنهي ملڪن کي زراعت جي شعبي ۾ ماهرن ۽ سائنسدانن جي وفدن جي مٽا سٽا ڪرڻ گهرجي هن چيو ته پام آئل جي شعبي ۾ پاڪستاني سائنسدانن کي تربيت فراهم ڪري. ٻئي طرف پاڪستان جي صدر ممنون حسين چيو آهي ته وفاقي محتسب جو ادارو انسانيت جي خدمت ۽ عام ماڻهو کي رليف فراهم ڪرڻ لاءِ پنهنجون ڪوششون وڌائي اها ڳالهه صدر ممنون حسين وفاقي محتسب سلمان فاروقي سان ڳالهائيندي ڪئي جنهن ان سان ايوان صدر اسلام آباد ۾ ملاقات ڪئي وفاقي محتسب اداري جي سالياني رپورٽ صدر کي پيش ڪئي ان موقعي تي ڳالهائيندي صدر ممنون حسين چيو ته وفاقي محتسب جو ادارو سرڪاري ملازمن جي شڪايتن جي ازالي لاءِ موثر ڪردار ادا ڪري رهيو آهي صدر ضلعي سطح تي عوام کي تڪرارن جي حل جي متبادل طريقن جي سهولت فراهم ڪرڻ جي تعريف ڪئي ۽ چيو ته ان سان مستقبل ۾ گهڻو فائدو ٿيندو. صدر هدايت ڪئي ته ان مقصد لاءِ لاڳاپيل وزارتن ۽ ادارن سان مشاورت ڪري حڪمت عملي جوڙي وڃي صدر بجلي ۽ گئس صارفين واڌو بلن بابت مسئلن جي حل لاءِ حڪمت عملي جوڙڻ جي معاملي جي به حوصله افزائي ڪئي. هوڏانهن پاڪستان جي صدر ممنون حسين ملائيشيا جي هٿياربند فوج جي ڪمانڊر انچيف جنرل ٽان سريداتو کي نشانو امتياز ملٽري عطا ڪيو آهي جنرل ٽان سري داتو کي نشان امتياز ملٽري ڏيڻ جي تقريب ايوان صدر اسلام آباد ۾ ٿي جنهن ۾ صدر ممنون حسين مليشين فوج جي سربراهه کي نشان امتياز ملٽري سان نوازيو مليشيا جي هٿياربند فوجي سربراهه کي هي اعزاز ٻنهي ملڪن جي فوجن وچ ۾ ٻطرفو تعاون وڌيڪ وڌائڻ ۽ مضبوط ڪرڻ جي سلسلي ۾ سندس خدمتن تي ڏنو ويو ان موقعي تي صدر ملائيشيا جي هٿياربند فوج جي سربراهه کي واڌايون به ڏنيون.

 

عمران فاروق قتل ڪيس جو مک جوابدار ڪراچيءَ مان گرفتار، چوڌري نثار جي تصديق

اسلام آباد/ڪراچي (بيورو/اسٽاف رپورٽر) ايم ڪيو ايم جي اڳوڻي اڳواڻ ڊاڪٽر عمران فاروق قتل ڪيس ۾ اهم اڳڀرائي ٿي آهي، مک جوابدار کي گذريل ڏينهن رينجرز عزيز آباد جي علائقي نائين زيرو جي ڀرسان هڪ گهر مان گرفتار ڪيو هو. وفاقي گهرو وزير چوڌري نثار علي خان ميڊيا سان ڳالهائيندي انهيءَ اهم خبر جو انڪشاف ڪيو آهي ته ڊاڪٽر عمران فاروق قتل ڪيس جي اهم جوابدار کي ڪراچي مان گرفتار ڪيو ويو آهي. سندس چوڻ هو ته جوابدار جو في الحال نالو نٿا ٻڌائي سگهون پر اڄ کيس عدالت ۾ پيش ڪيو ويندو. چوڌري نثار علي خان جو چوڻ هو ته عمران فاروق قتل ڪيس برطانيه نه پر پاڪستان لاءِ به هڪ امتحان هو. عمران فاروق قتل ڪيس ۾ اڳڀرائي پاڪستان  انٽيليجنس ادارن جي مدد سان ٿي. انهيءَ اهم ڪيس تي اسڪاٽ لينڊ يارٽ سان معلومات شيئر ڪئي. هن ٻڌايو ته گرفتار شخص ڊاڪٽر عمران فاروق قتل ۾ ملوث ٻن ماڻهن کي برطانيه موڪلڻ ۾ ملوث هو. گهرو وزير چيو ته حڪومت جو مقصد ڪنهن جي جان وٺڻ نه پر جوابدارن کي ڪٽهري ۾ آڻڻ آهي. انهيءَ معاملي تي سڀاڻي يا ٻئين ڏينهن جوائنٽ انويسٽيگيشن ٽيم بڻائي ويندي، وفاقي ادارن کي به جي آئي ٽي جو حصو بڻايو ويندو. ٻئي پاسي ذريعن موجب عمران فاروق قتل ڪيس ۾ ٽارگيٽ ڪلرز کي برطانيه موڪليندڙ شخص کي گرفتار ڪيو ويو آهي. معظم علي خان نه رڳو برطانيه ۾ ويزي جي درخواست جمع ڪرائي هئي پر محسن علي ۽ ڪاشف کي ويزا فراهم ڪرڻ ۾ مدد ڪئي. معظم علي خان نالي شخص کي گذريل ڏينهن عزيز آباد ۾ 90 جي ڀرسان گهر نمبر 8/90 مان گرفتار ڪيو ويو. معظم علي جي ڀاءُ کي پڻ گرفتار ڪيو ويو آهي. ذريعن موجب معظم علي خان 2010ع ۾ اصفتخار هسين سان به رابطو ڪيو هو. واضح رهي ته عزيز آباد مان گرفتار شخص مظم علي خان جو نالو برطانوي نشرياتي اداري جي ڊاڪيومينٽري ۾ به ورتو ويو هو. ذريعن موجب پاڪستان اختيارين جوابدار جي گرفتاري بابت اسڪاٽ لينڊ يارڊ کي آگاهه ڪري ڇڏيو آهي.

 

پرويز مشرف جا غير آئيني قدم نهايت افسوسناڪ هئا: رضا رباني

اسلام آباد (بيورو) سينيٽ جي چيئرمين رضا رباني چيو آهي ته پرويز مشرف جا غير آئيني قدم نهايت افسوسناڪ هئا، آئين ۽ قانون جي بالادستي لاءِ هر ممڪن ڪوشش ڪنداسين، گڏيل عرب امارات جي وزير جي قرارداد تي نڪته چيني پارلياماني طريقڪار خلاف آهي. صحافين سان ڳالهائيندي سينيٽ چيئرمين وڌيڪ چيو ته فوجي آمرن خاص ڪري پرويز مشرف  جا غير آئيني قدم نهايت افسوسناڪ هئا، هن آئين معطل ڪري پارليامينٽ جي تقدس کي پامال ڪيو. رضا رباني چيو ته سينيٽ اجلاس جي ڪاروائي گهٽ ۾ گهٽ اڍائي کان 3  ڪلاڪن تائين هلائي ويندي. سينيٽ ۾ قائد ايوان راجا ظفرالحق کي درخواست ڪئي آهي ته هو اجلاس ۾ وزيرن جي حاضري يقيني بنائي، رضا رباني چيو ته سينيٽ وٽ مالياتي اختيار هئڻ گهرجن، ان مسئلي کي بزنس ايڊوائزري ڪاميٽي ۾ کڻي وينداسين. هن چيو ته آئين ۽ قانونن جي بالادستي لاءِ هر ممڪن ڪوشش ڪنداسين، يمن جي صورتحال بابت پارليامينٽ جي متفقه قرارداد پارليامينٽ جي امنگن مطابق آهي.

اين اي 246 جي ننڍي چونڊ: سنڌ جي وڏي وزير سان ڊي جي رينجرز جي ملاقات

ڪراچي (اسٽاف رپورٽر) سنڌ جي وڏي وزير سيد قائم علي شاهه سان ڊي جي رينجرز سنڌ ميجر جنرل بلال اڪبر ملاقات ڪئي آهي. ملاقات ۾ ڊي جي رينرجز وڏي وزير کي ڪراچي ۾ جاري آپريشن جي صورتحال کان آگاهه ڪيو، وڏي وزير ڊي جي رينجرز کي اين اي 246 ۾ نظم ۽ ضبط برقرار رکڻ جي به هدايت ڪئي. ان موقعي تي سنڌ جي وڏي وزير سيد قائم علي شاهه چيو ته سنڌ سرڪار جي پهرين ترجيح امن امان بحال ڪرائڻ آهي، ڪوشش آهي ته ڪراچي شهر جو رونقون اڳ جيان بحالي ٿي وڃن.  رينجرز جي ڪارڪردگي جي به ساراهه.

 

ڪراچي شهر ۾ اسٽريٽ لائيٽس ۽ شاهراهن جي مرمت لاءِ سنڌ حڪومت بجيٽ جاري ڪري ڇڏي آهي: شرجيل ميمڻ

ڪراچي (اسٽاف رپورٽر) سنڌ جي سڌ سماءَ جي صوبائي وزير شرجيل انعام ميمڻ چيو آهي ته ڪراچي شهر ۾ اسٽريٽ لائيٽس، شاهراهن جي مرمت لاءِ سنڌ حڪومت بجيٽ جاري ڪري ڇڏي آهي ۽ ان حوالي سان ڪم به شروع ٿي چڪو آهي. سومر تي سنڌ اسيمبلي ۾ ايم يڪو ايم جي ميمبر وقار حسين شاهه جي توجهه ڏياريو نوٽيس تي ڳالهه ٻولهه ڪري رهيو هو. وقار حسين شاهه چيو ته ملير ندي تي شاهه فيصل برج تي اسٽريٽ لائيٽس ڪم نه پيون ڪن جنهن جي ڪري ڪيترائي حادثا ٿي چڪا آهن شرجيل انعام ميمڻ چيو ته ڪراچي شهر ۾ جيڪي اسٽريٽ لائيٽس لڳايون ويون هيون انهن کي هلائڻ جو ڪو به مڪينزم جوڙيو نه ويو شهر ۾ ٻه وڏا مسئلا آهن هڪ مسئلو اسٽريٽ لائيٽس جو آهي ٻيو مسئلو روڊن تي کڏا پوڻ جو آهي اسان سنڌ جي وڏي وزير کان ٻئي مسئلا حل ڪرڻ لاءِ بجيٽ گهري هئي وڏي وزير بجيٽ جي منظوري ڏئي ڇڏي آهي ٻئي ڪم شروع ٿي چڪا آهن اسان ڪراچي کي ٻيهر روشنين جو شهر بڻائينداسين ۽ ٿيندڙ ڪم ماڻهن کي نظر ايندو. هن چيو ته هڪ پرڏيهي اين جي اوز ڪراچي جي سمورين اسٽريٽ لائيٽس سولر سسٽم تي منتقل ڪرڻ گهري ٿي ان سان معاملا طئه ڪيا پيا وڃن ته ان کي ڪهڙي طرح رقم واپس ڪئي ويندي.

 

ڪراچي ۾ ٽارگيٽ ڪلنگ ٻيهر شروع، 4 قتل، مقابلي ۾ 5 دهشتگرد مارجي ويا

ڪراچي (اسٽاف رپورٽر) ڪورنگي جي بنگالي پاڙي ۾ نامعلوم هٿياربندن فائرنگ ڪري 3 ڄڻن کي قتل ڪري ڇڏيو. ڪورنگي اڍائي نمبر جي علائقي بنگالي پاڙي ۾ ڪشتي واري بلڊنگ جي ڀرسان 2 موٽرسائيڪلن تي سوار 4 هٿياربند فارنگ ڪري فرار ٿي ويا. فائرنگ ۾ 3 ڄڻا سخت زخمي ٿي پيا جن کي فوري طور تي اسپتال منتقل ڪيو پئي ويو ته اُهي رستي ۾ ئي زخمن جا سور نه سگهندي فوت ٿي ويا. واقعي کانپوءِ پوليس موقعي تي پهچي گولين جي خول سميت ٻيون شاهديون گڏ ڪري جانچ شروع ڪري ڇڏي. ٻئي پاسي ڪورنگي ساڍا 3 نمبر ۾ فائرنگ ۾ هڪ ڄڻو مارجي ويو آهي. مقتول جي لاش کي اسپتال منتقل ڪيو ويو آهي. ڪراچي جي ڪائونٽر ٽيررزم ڊپارٽمينٽ، اورنگي ٽائون ۾ ڪارروائي دوران ٻن ڪمانڊرن سميت القاعده جي 5 دهشتگردن کي مارڻ جِي دعويٰ ڪئي آهي. سي ٽي ڊي جَي انچارج راجا عمر خطاب ميڊيا کي ٻڌايو ته ڪائونٽر ٽيررزم ڊپارٽمينٽ دهشتگردن جِي موجودگي واري اطلاع تي اورنگي ٽائون جَي علائقي خيرآباد ۾ ڇاپو هنيو ته گهر اندر لڪل دهشتگردن فائرنگ شروع ڪري ڏني. راجا عمر خطاب چيو ته ڪائونٽر ٽيررزم ڊپارٽمينٽ جَي اهلڪارن جي جوابي فائرنگ ۾ 5 دهشتگرد مارجي ويا. سي ٽي ڊي جَي انچارج چيو ته مارجي ويل دهشتگردن مان ٽن ڄڻن جِي عثمان، ابراهيم ۽ نورالحسن عرف هاشم طور سڃاڻپ ٿي وئي آهي. راجا عمر خطاب اهو به ٻڌايو ته مارجي ويل دهشتگردن جو تعلق القاعده سان آهي، جن ۾ 2 ڪمانڊر به شامل آهن. سي ٽي ڊي جَي انچارج جو وڌيڪ چوڻ هو ته دهشتگردن خيرآباد واري علائقي بارود جي فيڪٽري پڻ قائم ڪئي هئي، جتان وڏي انگ هٿيار پڻ هٿ ڪيا ويا آهن. اي آءِ جي سنڌ غلام قادر ٿيٻو چيو آهي ته ڪراچي ۾ ڏوهن جو ريشو گهٽجي ويو آهي جڏهن ته اغوا ۽ ڀنگ جون وارداتون ختم ڪري ڇڏيون آهن. هن چيو ته جيڪو ڪم وزيرستان ۾ فوج ڪيو اهيو ڪراچي ۾ پوليس ۽ رينجرس ڪيو. هاڻي تازو آپريشن شهر جي حالات ۾ ڪافي فرق پيو آهي. ڪراچي ۾ هڪ سيمينار کي خطاب ڪندي هن چيو ته ڪراچي ۾ اغوا ۽ تائيوان جي وارداتن ختم ٿي ويون آهن ڪراچي ۾ هلندڙ آپريشن سان شهر جا حالتن ۾ ڪافي فرق پيو آهي اسان سڀئي ملي ڪري ڪراچي جو امن قائم ڪرائينداسين ، اسان جي تربيت عام ڏوهن کي روڪڻ جي آهي. دهشتگردي جو  وڏو واقعيو ڪراچي ايئرپورٽ ۾ ٿيو. ملڪيتن جا ڪيس کي مشاعدو ڪرڻ مشڪل ڪم آهي.

 

تربت ۾ ايف سي جي ڪارروائي، 20 مزدورن کي قتل ڪندڙ 13 دهشتگرد مارجي ويا

تربت (مانيٽرنگ ڊيسڪ) تربت ۾ ايف سي ۽ قانون لاڳو ڪندڙ ٻين ادارن جي گڏيل ڪارروائي   دوران پابندي مڙهيل تنظيم بِي اَيل ايف جــَي ڪمانڊر سميت تيرنهن دهشتگرد مارجي ويا. ايف سي ترجمان موجب ايف سي اهلڪار ۽ قانون لاڳو ڪندڙ ٻين ادارن 20 پورهيتن جي قتل ۾ ملوث جوابدارن جي موجودگي واري اطلاع تي تربت جي ڳوٺ گيبن ۾ گڏيل آپريشن ڪيو. ان موقعي تي جوابدارن سڪيورٽي فورسز جي اهلڪارن جي فائرنگ ڪري ڏني جنهن جي جوابي ڪارروائي ۾ 13 دهشتگرد مارجي ويا. ايف سي ترجمان ٻڌايو ته مارجي ويلن ۾ پابندي مڙهيل تنظيم بِي ايل ايف جو ڪمانڊر حيات به شامل آهن جڏهن ته ڪمانڊر ظريف کي گرفتار ڪي ويو آهي. جوابدارن جي قبضي مان هٿيار ۽ راڪيٽ لانچر به برآمد ٿيا آهن جڏهن ته دهشتگردن خلاف آپريشن ۾ اسپيشل آپريشن ونگ ۽ مڪران اسڪائوٽس به حصو ورتو. ياد رهي ته 3 ڏينهن اڳ تربت جي علائقي گگ دان ۾ دهشتگردن فائرنگ ڪري سنڌ ۽ پنجاب سان تعلق رکندڙ 20 پورهيتن کي قتل ڪري ڇڏيو هو جڏهن ته گوليون لڳڻ سبب 3 ڄڻا زخمي ٿي پيا هئا.

 

آباد جو اڳوڻو چيئرمين بابر چغتائي گرفتار، رابطا ڪميٽي جي مذمت، انتقامي ڪارروائي قرار

ڪراچي (اسٽاف رپورٽر) آباد جي اڳوڻي چيئرمين بابت چغتائي کي قانون لاڳو ڪندڙ ادارن گرفتار ڪري ورتو آهي. ذريعن موجب بابت چغتائي تي ٽارگيٽ ڪلنگ ۽ لينڊ مافيا جي مدد جو الزام آهي. بابر چغتائي کي جانچ لاءِ نامعلوم هنڌ تي منتقل ڪيو ويو آهي، جڏهن ته بابر چغتائي جي گهر ڀاتين جو چوڻ هو ته بابر چغتائي کي ٻه ڏينهن اڳ گهر تي ڇاپو هڻي گرفتار ڪيو ويو هو. ٻئي پاسي ايم ڪيو ايم رابطا ڪميٽي جو چوڻ هو ته بابر چغتائي جي گرفتاري کلي انتقامي ڪارروائي آهي، کيس ايم ڪيو ايم کي چندو ڏيڻ تي گرفتار ڪيو ويو آهي. رابطا ڪميٽي وڌيڪ چيو آهي ته بابر چغتائي ڪراچي جي تعمير ۽ ترقي ۾ اهم ڪردار ادا ڪيو آهي، ڇا ڪنهن بزنس مين جو سياسي پارٽي يا اُن جي فلالحي اداري کي چندو ڏيڻ ڏوهه آهي؟