تازيون خبرون

Daily Archives: April 10, 2015

ملڪ کي يوٽرن وٺندڙ سياسي قيادت جي ضروت ناهي: نواز شريف

اسلام آباد/هري پور(م.ڊ) وزيراعظم نواز شريف چيو آهي ته ملڪ کي يوٽرن وٺندڙ قيادت جي ضرورت ناهي، ٻڌايو وڃي ته خيبرپختونخواهه ۾ ڪهڙو نئون پاڪستان ٺهيو آهي هري پور ۾ پنهنجي اعزاز ۾ ڏنل مانجهاندي کي خطاب ڪندي وزيراعظم نواز شريف دٻيل لفظن ۾ پي ٽي آءِ کي تنقيد جو نشانو بڻايو هن جو چوڻ هو ته ملڪ کي يوٽرن وٺندڙ قيادت جي ضرورت ناهي ٻڌايو وڃي ته خيبرپختونخواهه ۾ ڪهڙو نئون پاڪستان ٺهيو آهي، وزيراعظم چيو ته ڪراچي ۾ امن بحال ٿي رهيو آهي، ڀتاخوري، ٽارگيٽ ڪلنگ، ڀنگ لاءِ اغوا جو خاتمو ڪيو ويو آهي وزيراعظم نواز شريف جو چوڻ هو ته حڪومت اهو ئي ڪري رهي آهي جنهن جي پاڪستان کي ضرورت آهي، لوڊشيڊنگ گهٽ ڪرڻ ۾ ڪامياب ٿيا آهيون، 2017 تائين ملڪ مان مڪمل طور تي بجلي جو بحران ختم ڪري ڇڏينداسين، وزيراعظم چيو ته اسان دهشتگردي خلاف  فيصلائتي جنگ جي شروعات ڪري ڇڏي آهي، آپريشن ضرب عضب ۾ ڪاميابين تي پاڪ فوج مبارڪباد جي مستحق آهي، وزيراعظم ميان نواز شريف سان ايراني پرڏيهي وزير جواد ظريف ملاقات ڪري يمن صورتحال، ٻـه طرفن لاڳاپن ۽ ٻين معاملن تي خيالن جي ڏي وٺ ڪئي. پرائيم منسٽر هائوس اسلام آباد ۾ ايراني پرڏيهي وزير جواد ظريف وزيراعظم ميان نواز شريف سان ملاقات ڪئي. ملاقات ۾ يمن جي صورتحال، پاڪ-ايران لاڳاپن ۽ ٻين معاملن تي تفصيلي خيالن جي ڏي وٺ ڪئي وئي.

 

وڏي وزير ٿر ۾ ڏڪار کي صدين جو تسلسل قرار ڏئي ڇڏيو

مٺي (نمائندو) وڏي وزير سيد قائم علي شاهه ٿر ۾ ڏڪار کي صدين جو تسلسل قرار ڏيندي اعتراف ڪيو آهي ته وسيلا گهٽ ۽ ضرورتون وڌيڪ هئڻ ڪري هو ڏڪاري حالتن تي ضابطو ناهن آڻي سگهيا. مٺي ۾ هيلٿ فيسٽيول جي موقعي تي تقريب کي خطاب ڪندي وڏي وزير سيد قائم علي شاهه چيو ته فيسٽيول سان ٿر جي ماڻهن ۾ صحت بابت سجاڳي پيدا ٿيندي. هن چيو ته ماضيءَ جي ڀيٽ ۾ ٿر جون حالتون هاڻي تبديل ٿي چڪيون آهن. سيد قائم علي شاهه چيو ته ٿرپارڪر ۾ ڏڪار صدين جو تسلسل آهي،ماضيءَ جي حڪومتن ڏڪار جي خاتمي لاءِ ڪجهه به ناهي ڪيو. هن چيو ته سندن حڪومت ٿر ۾ پيئڻ جو پاڻي، روزگار، ترقياتي اسڪيمون ۽ صحت جون سهولتون فراهم ڪيون آهن. وڏي وزير چيو ته ٿر جي ترقي ۽ بنيادي سهولتون سندن پهرين ترجيح آهي،جڏهن ته ٿرپارڪر کي مثالي ضلعو بڻايو ويندو. وڏي وزير سيد قائم علي شاهه جو چوڻ هو ته هيلٿ فيسٽيول ذريعي جاڳرتا پيدا ڪري ٻارن جي موت وارن واقعن کي گهٽائي سگهجي ٿو. تقريب کي صحت واري وزير ڄام مهتاب ڏهر، ڊاڪٽر مهيش ڪمار، خيرالنساءَ مغل ۽ ٻين پڻ خطاب ڪيو.

 

جوڊيشل ڪميشن پاران 16 اپريل تي ٻڌڻي کليل عدالت ۾ ڪرڻ جو فيصلو

 

اسلام آباد(بيورو) چونڊ ڌانڌلي جي جاچ لاءِ قائم جوڊيشل ڪميشن اليڪشن 2013ع ۾ حصو وٺندڙ سياسي پارٽين ۽ عام ماڻهن سان ڌانڌلي جا شاهد 15 اپريل تائين طلب ڪري ورتا آهن عدالت جو چوڻ آهي ته جوڊيشل ڪميشن جي ڪارروائي کليل عدالت ۾ ٿيندي چيف جسٽس ناصر الملڪ جي سربراهي ۾ 3 رڪني جوڊيشل ڪميشن جو اجلاس سپريم ڪورٽ ۾ ٿيو اجلاس ۾ ڪميشن جا ميمبر جسٽس امير هاني مسلم ۽ جسٽس اعجاز افضل شريڪ ٿيا ڪميشن جي پهرئين اجلاس ۾ ڪارروائي جو طريقيڪار واضه ڪندي چيف جسٽس جي سيڪريٽري حامد علي کي ڪميشن جو سيڪريٽري مقرر ڪيو ويو آهي، ڪميشن جي اجلاس ۾ فيصلو ڪيو ويو ته ايندڙ ٻڌڻي 16 اپريل تي سپريم ڪورٽ جي ڪورٽ نمبر ون ۾ کلي عدالت ۾ ٿيندي ڪميشن پهرئين مرحلي ۾ سمورين سياسي تنظمين کان تجويزون به  طلب ڪري ورتيون آهن عدال جو چوڻ آهي ته ڪوبه شخص، سياسي تنظيم يا ان جو ڪوبه وڪيل ڌانڌلي بابت الزام ۽ شاهد سيڪريٽري ڪميشن کي 15 اپريل تائين جمع ڪرائي سگهندو.

 

 

ايراني پرڏيهي وزير جي آرمي چيف سان ملاقات، ٻه طرفن لاڳاپن تي ڳالهيون

راولپنڊي (م.ڊ) پاڪ فوج جي ترجمان آءِ ايس پي آر مطابق آرمي چيف جنرل راحيل شريف سان ايراني پرڏيهي وزير جواد ظريف جي ايڇ ڪيو راولپنڊي ۾ ملاقات ڪئي جنهن ۾ خطي جي سيڪيورٽي صورتحال ۽ پاڪ ايران بارڊر مينيجمينٽ جي حوالي سان ڳالهه ٻولهه ڪئي وئي، آءِ ايس پي آر مطابق ٻنهي شخصيتن موجوده صورتحال ۾ مسلمان امت جي يڪجهتي ۽ اتفاق تي زور ڏنو ايراني پرڏيهي وزير جواد ظريف آپريشن ضرب عضب ۾ حاصل ٿيندڙ ڪاميابين ۽ دهشتگردي خلاسف جنگ ۾ پاڪستان جي قربانين کي ساراهيو ان کان اڳ جي ايڇ ڪيو پهتو ته ايراني پرڏيهي وزير کي گارڊ آف آنر پيش ڪيو ويو جواد ظريف  شهيدن جي يادگار تي گلن جي چادر چاڙهي ۽ فاتحه خواني ڪئي.

 

پ پ ۾ ذوالفقار علي ڀٽو جي دوري کان ڪجهه ڪنا آنا آهن جيڪي اڄ به موجود آهن: آصف زرداري

ڪراچي (اسٽاف رپورٽر) اڳوڻي صدر ۽ پيپلز پارٽي جي شريڪ چيئرمين آصف علي زرداري چيو آهي ته هن وقت دنيا جي جيڪا صورتحال آهي اها انتهائي ڳڻي جوڳي آهي، هر طرف جنگ جون تياريون ٿي رهيون آهن، خطي ۾ هڪ طوفان برپا ٿيڻ وارو آهي. هن وقت ضرورت ان ڳالهه جي آهي ته موجوده حڪومت اسلامي ڪانفرنس تنظيم جو اجلاس گهرائي، اسان چاهيون ٿا ته موجوده حڪومت پنهنجو مدو پورو ڪري ان لاءِ حڪومت سان ڀرپور ساٿ ڏنو ويندو، ان سان جمهوريت وڌيڪ مضبوط ٿيندي، اسان هميشه سياسي مقصدن جي لاءِ مفاهمتي پاليسي اختيار ڪئي آهي پر اصولن تي ڪڏهن به سوديبازي ناهي ڪئي، عمران خان جي واپس پارليامينٽ ۾ اچڻ واري فيصلي جي آجيان ڪيون ٿا. اهڙو اظهار هن ڪالهه بلاول هائوس ۾ صحافين سان ڳالهائيندي ڪيو. ان موقعي تي بختاور ڀٽو زرداري، صوبائي وزير شجيل انعام ميمڻ، شيري رحمان، فدا حسين ڍڪڻ ٻيا پڻ ساڻس گڏ هئا. آصف علي زرداري چيو ته خطي ۾ طوفان اچڻ وارو آهي، حڪومت کي گهرجي ته آل پارٽيز ڪانفرنس سڏائي ان ۾ سڀني پارٽين جي سربراهن کي گهرايو وڃي ۽ انهن سان ڳالهيون ڪري مسئلي جو حل ڪڍيو وڃي، هميشه مسئلا ڳالهين ذريعي ئي حل ٿيندا آهن. جنگين سان هميشه تباهي ٿي آهي، سڀ ملڪ ۽ سرحدون انسانن لاءِ آهن، جيڪڏهن انسان ئي نه رهيو ته پوءِ ڇا ٿيندو. پي پي پي پنهنجي سينٽرل ايگزيڪٽو ڪميٽي ۾ اهو فيصلو ڪيو آهي ته ان سلسلي ۾ هر اسلامي ملڪ ڏانهن هڪ وفد موڪليو ويندو ته جيئن ڳالهين جي ذريعي معاملن جو ڪو حل ڪڍيو وڃي. هڪ سوال جي جواب ۾ هن چيو ته ايم ڪيو ايم کي گڏ کڻي هلڻ ۾ ڪو حرج ناهي. ايم ڪيو ايم سياسي پارٽي آهي باقي ڪجهه ڪنا آنا ايم ڪيو ايم سميت سڀني پارٽين ۾ آهن جن کي ڪڍڻ جي ضرورت آهي، انهن ڪنن آنن جي ڪري پارٽين کي ختم نٿو ڪري سگهجي يا انهن سان اتحاد ختم ڪرڻ مناسب ناهي. هڪ ٻئي سوال جي جواب ۾ هن چيو ته بلاول ڀٽو زرداري لنڊ ۾ آهي، ان کي اسان سکيا ڏئي رهيا آهيون، بلاول کي باقاعدي تربيت مڪمل ٿيڻ بعد ميدان ۾ آَندو ويندو. آصف علي زرداري چيو ته گهڻن ڏينهن کان صحافي دوستن کي اها شڪايت هئي ته مان صحافين سان ملان نٿو ته ان ڪري اڄ توهان دوستن کي گهرايو آهي ته ڪجهه توهان جا مسئلا ۽ شڪايتون ٻڌان. هن چيو ته مون کي خبر آهي ته توهان سان ڪيل واعدا ڪجهه پورا ناهن ٿيا ۽ توهان کي ڪجهه تڪليفون آهن، اهي به ضرور حل ڪنداسين، توهان جا جيڪي به مطالبا آهن اهي لکت ۾ ڏيو ته انهن کي حل ڪرڻ جي پوري ڪوشش ڪنداسين، منهنجي ڪوشش آهي ته جيئن ٻين ڪميونٽين کي زمينون ڏنيون آهن، ائين صحافين کي پڻ زمينون ملڻ گهرجن ۽ انهن جو باقاعدي سوسائيٽيون هجڻ گهرجن ته جيئن اهي پنهنجي زندگي بهتر نموني سان گذاري سگهن ۽ انهن جا ٻار بهتر تعليم حاصل ڪري سگهن. هن چيو ته کيس صحافين سان پيار آهي پر انهن سان وڌيڪ پيار آهي جيڪي جيل جي وقت کان دوست آهن.

 

جنگ جو جلد کان جلد خاتمو چاهيون ٿا، پاڪستان جي يمن جنگ ۾ شامل هجڻ وارين خبرن جي تردي

اسلام آباد (بيورو) پرڏيهي وزارت جي ترجمان تسنيم اسلم جو چوڻ آهي ته پاڪستان يمن ۾ جنگ جو جلد کان جلد خاتمو چاهي ٿو ۽ ان سلسلي ۾ سعودي عرب، ترڪي ۽ ايران سميت مختلف اسلامي ملڪن سان مسلسل رابطي ۾ آهي، هن چيو ته يمن ۾ ڦاٿل گهڻن ئي پاڪستانين کي وطن واپس آندو ويو آهي ۽ ڪجهه ماڻهو هن وقت به يمن ۾ موجود آهن جيڪي وطن واپس نه ٿا اچڻ چاهين پرڏيهي وزارت جي ترجمان جو چوڻ هو ته پاڪستان پنهنجون  اهم دفاعي ضرورتون پوريون ڪرڻ لاءِ آمريڪي فوجي اوزار خريد ڪري رهيو آهي جيڪي دهشتگردي خلاف جنگ ۾ به ڪارآمد ثابت ٿيندا جڏهن ته آمريڪي حڪومت پاڪستان کي فوجي آوزار جي وڪري جي باري ۾ ڪانگريس کي به آگاهه ڪري ڇڏيو آهي  ۽ اميد آهي ته انهن اوزارن جي حتمي منظور جلد ڏندي ويندي هن جو چوڻ هو ته آمريڪي حڪومت طرفان پاڪستان کي هٿيارن جي فراهمي اصل ۾ دهشتگردي خلاف اسان جي ضرورتن ۽ اهميت کي تسليم ڪرڻو آهي. چين جي صدر جي پاڪستاني دوري جي حوالي سان پرڏيهي وزارت جي ترجمان جو چوڻ هو ته صدر زي جنگ پنگ هلندڙ مهيني پاڪستان جو دورو ڪندو جڏهن ته ان جي دوري جي تاريخ اڃان طئه ڪرڻي آهي پاڪستان  ۽ چين هڪ ٻئي جي اسٽريٽجڪ پارٽنر ۽ پراڻا دوست آهن ۽ چين جي صدر جي دوري سبب ٻنهي ملڪن جا لاڳاپا وڌيڪ مستحڪم هوندا ڀارت سان لاڳاپن جي حوالي سان پرڏيهي وزارت جي ترجمان جو چوڻ هو ته اسا ننئين دلي سان والاريل ڪشمير سميت سمورن معاملن جي حل لاءِ مثبت ۽ با معنيٰ ڳالهيون چاهيون ٿا.

 

نيپرا بجلي جي اگهن ۾ 4 رپيا 42 پئسا في يونٽ تي لاٿ جي منظوري ڏئي ڇڏي

اسلام آباد (بيورو) نيپرا، بجلي جي اگهن ۾ 4 رپيا 42 پئسا في يونٽ تي لاٿ جي منظوري ڏئي ڇڏي، قيمتن ۾ گهٽتائي ڪــَي اليڪٽرڪ جي واهپيدارن تي لاڳو نه ٿيندي. نيپرا ترجمان موجب بجلي سستي ڪرڻ جي منظوري سينٽرل پاور پرچيزنگ ايجنسي جي درخواست تي ٻڌڻي دوران ڪئي وئي. درخواست ۾ چيو ويو هو ته فيبروريءَ ۾ بجلي جي پيداوار تي فيول لاڳت 4 رپيا 62 پئسا في يونٽ رهي،تنهنڪري واهپيدارن کي فيول ايڊجسٽمينٽ جي مد ۾ بجلي جي قيمت ۾ رليف  ڏنو وڃي. نيپرا درخواست منظور ڪندي بجلي جي في يونٽ اگهه ۾ 4 رپيا 42 پئسا گهٽتائي جي منظوري ڏئي ڇڏي. نيپرا موجب واهپيدارن کي ايندڙ مهيني بجلي جي بلن ۾ 25 ارب رپين جو رليف ملندو پر قيمتن ۾ گهٽتائي ڪــَي اليڪٽرڪ ۽ 50 يونٽ بجلي استعمال ڪندڙ واهپيدارن تي لاڳو نه ٿيندي.

 

ڪراچي ۾ خوف ۽ دهشتگرد وارو ماحول ختم ڪرڻ لاءِ آيو آهيان: عمران خان

ڪراچي (اسٽاف رپورٽر) ڪراچي ايئرپورٽ تي پريس ڪانفرنس ڪندي عمران خان جو چوڻ هو ته الطاف حسين ڇڪتاڻ ختم ڪرڻ لاءِ جيڪو بيان ڏنو ان کي ڀليڪار چئون ٿا الطاف حسين کي پيغام ڏيان ٿو ته بندوق جي سياست نه ٿيڻ گهرجي ڇو ته اسان جي ۽ متحده جي وچ ۾ بنيادي اختلاف بندوق جي سياست آهي ماڻهو بندوق جي سياست کان تنگ ٿي چڪا آهن، بندوق جي سياست ڪراچي کي نقصان پهچايو، وقت اچي ويو آهي ته ايم ڪيو ايم پنهنجو پاڻ کي هٿياربندن ماڻهن کان الڳ ڪري وٺي، خوف جي هوا ۾ جمهوريت ڪامياب نٿي ٿي سگهي، جن اسان جي ڪارڪنن کي ماريو اسان جو مطالبو آهي ته متحده قومي موومينٽ انهن جي خلاف ڪارروائي ڪري، تحريڪ انصاف جي چيئرمين جو چوڻ هو ته عمران اسماعيل جي ڪيمپ تي ٻه ڀيرا حملا ٿيا ان لاءِ ڪراچي اچڻ ضروري هو، عورتن جو ڌرڻي ۾ اهم ڪردار هو ان لاءِ ريحام خان به ڪراچي آئي، هن چيو ته اسان سڀ پاڪستاني آهيون الطاف حسين قوم کي نه ورهائي. عمران خان چيو آهي ته هو ڪراچي مان خوف ۽ حراس جو ماحول ختم ڪرڻ آيو آهي، هن جي ڪنهن سان ڪابه ذاتي ويڙهه ناهي، ڪراچي ۾ امن ٿيندو ته ملڪ امن جو گهوارو بڻجي ويندو، ڪراچي ۾ ڪارساز کان سوڪ سينٽر تائين ڪڍيل ريلي کي خطاب دوران عمران خان جو چوڻ هو ته ان جي خواهش آهي ته پورو ملڪ امن جو گهوارو بڻجي وڃي ۽ ان لاءِ ڪراچي مان خوف ۽ حراس وارو ماحول ختم ڪرڻو پوندو، هن چيو ته الطاف حسين ان جي پارٽي ۽ ان جي چونڊ سرگرمين جي حوالي سان جيڪو بينا ڏنو آهي اهو انتهائي خوشي جوڳو آهي ۽ هو ان جي ڀليڪار ڪري ٿو، هڪ سوال جي جواب ۾ عمران خان چيو ته ريحام خان پنهنجي مرضي سان ان جي سياسي ۾ شريڪ ٿي آهي ڇو ته هوءَ هاڻ هن ملڪ کي امن جو گهوارو ڏسڻ چاهي ٿي اليڪشن لاءِ مثبت ماحول قائم ٿي رهيو آهي جيڪو پاڪستان جي مستقبل لاءِ سٺو آهي.عمران خان ڪارڪنن کي خطاب ڪندي چيو ته اسان کي ڪراچي کي پرامن ۽ روشنين جو شهر بڻائڻو آهي ڪراچي ۾ پارٽي ڪارڪنن جو خوف ختم ڪري ڇڏيو الطاف حسين جي حوالي سان عمران خان جو چوڻ هو ته الطاف حسين هڪ طرف دعوت ڏئي ٿو ٻئي طرف اسان جي ڪارڪنن تي حملو ڪيو وڃي ٿو الطاف حسين ٻٽي پاليسي رکي ٿو ايم ڪيو ايم طرفان اعلان ڪيو ويو هو ته اسان جو استقبال ڪيو ويندو اهو ڪهڙو استقبال آهي جو ڪارڪنن جا مٿا ڦاڙي ڇڏيو ڏک ٿيو ته اسان جي ڪارڪنن تي ايم ڪيو ايم جي ڪارڪنن حملو ڪيو اسان هڪ پرامن پارٽي آهيون پي ٽي آءِ جا ڪارڪن ڪنهن ٽڪراءُ ۾ شريڪ نه ٿيندا، اين اي 246 جي ماڻهن کي چوان ٿو ته ڊڄڻو ناهي خان صاحب 19 اپريل تي ڪراچي ۾ جلسو ڪرڻ جو به اشارو ڏنو.

 

عمران خان جي اچڻ تي ڪوبه اڻوڻندڙ واقعو پيش نه آيو: فاروق ستار

ڪراچي(اسٽاف رپورٽر) ايم ڪيو ايم جي اڳواڻ ڊاڪٽر فاروق ستار چيو آهي ته عمران خان جي جناح گرائونڊ اچڻ تي ڪوبه اڻوڻندڙ واقعو پيش نه آيو ايم ڪيو ايم جي اڳواڻن طرفان عمران خان کي ڀليڪار چيو ويو هو، ايم ڪيو ايم جا اڳواڻ پاڻ عمران خان جي گاڏي تائين استقبال ڪرڻ ويا هئا، خبر ناهي عمران خان شهيدن جي يادگار تائين ڇو نه آيو ۽ واپس هليو ويو، فاروق ستار چيو ته ايم ڪيو ايم جي قائد الطاف حسين جي هدايت تي مهمانن جي استقبال جون تياريون ڪالهه کان شروع ٿيون، نائن زيرو تي مهمانن لاءِ مانجهاندي سان گڏوگڏ مهمانن لاءِ تحفن جو به بندوبست ڪيو ويو هو عمران خان شهيدن جي يادگار تي پنهنجي چونڊ مهم جي شروعات ڪئي جنهن تي اسان ان تمام گهڻا شڪر گذار آهيون هن چيو عمران خان جي واپسي کانپوءِ تمام ننڍي پئماني تي ويڙهه جو واقعو پيش آيو هو پر پي ٽي آءِ جي ڪجهه اڳواڻن اهڙا بيان جاري ڪيا جنهن سان اهو تاثر ملي ٿو ته ايم ڪيو ايم جي قائد الطاف حسين يا ان جي اڳواڻن جي نيت ۾ ڪجهه ٻيو هو.

 

اعتزاز احسن پاران چونڊ ڌانڌلي جا ثبوت جوڊيشل ڪميشن ۾ کڻي وڃڻ جو اعلان

لاهور (م.ڊ) پيپلز پارٽي جي سينيٽر اعتزاز احسن چيو آهي ته پهرئين مرحلي ۾ 124 لاهور 7 ۾ ڌانڌلي جا ثبوت جوڊيشل ڪميشن ۾ پيش ڪيا ويندا، ٻئين مرحلي ۾ پيپلز پارٽي تنظيم طور به سمورن تڪن ۾ ڌانڌلي جا ثبوت ڪميشن ۾ کڻي ويندي اعتزاز احسن جو چوڻ آهي ته ان جي تڪ ۾ 12 پولنگ بيگ مان ووٽن بجاءِ ردي نڪتي شيخ روهيل اصغر جي وڪيل به ردي نڪرڻ جي تصديق ڪئي آهي، اعتزاز احسن و چوڻ آهي ته ڌانڌلي جي حوالي سان وائٽ پيپر جوڊيشل ڪميشن کي پيش ڪندس.