تازيون خبرون

Daily Archives: April 9, 2015

سپريم ڪورٽ عام چونڊن ۾ مبينا ڌانڌلين جي جاچ لاءِ جوڊيشل ڪميشن جوڙي ڇڏي

اسلام آباد (بيورو) چيف جسٽس آف پاڪستان، جسٽس ناصرالملڪ عام چونڊن ۾ مبينا ڌانڌلين جي الزامن جي جاچ لاءِ پنهنجي سربراهي ۾ عدالتي ڪميشن قائم ڪري ڇڏي. چيف جسٽس ناصر الملڪ عام چونڊن ۾ مبينا ڌانڌلي جي الزامن جي جاچ لاءِ ٽه رڪني جوڊيشل ڪميشن جي جوڙجڪ جي منظوري ڏئي ڇڏي. جوڊيشل ڪميشن جي سربراهي چيف جسٽس ناصر المـُلڪ پاڻ ڪندو جڏهن ته جسٽس امير مسلم هاني ۽ جسٽس اعجاز افضل ڪميشن جا ميمبر هوندا. چيف جسٽس جي سربراهي ۾ جوڊيشل ڪميشن جو پهريون اجلاس اڄ ٻيپهري جو هڪ وڳي سپريم ڪورٽ ۾ ٿيندو جڏهن ته ڪميشن 45 ڏينهن ۾ چونڊن ۾ ڌانڌلين جي جاچ بابت پنهنجي رپورٽ وفاقي حڪومت کي پيش ڪندي. ياد رهي ته تحريڪ انصاف عام چونڊن ۾ مبينا ڌانڌلين خلاف اسلام آباد ۾ 124 ڏينهن تائين ڌرڻو هنيو هو جيڪو پشاور سانحي بعد ختم ڪيو ويو هو. ڪجهه ڏينهن اڳ تحريڪ انصاف ۽ حڪومت وچ ۾ جوڊيشل ڪميشن قائم ڪرڻ جي معاهدي تي صحيحيون ڪيون جنهن بعد صدر ڪميشن قائم ڪرڻ لاءِ آرڊيننس جاري ڪيو هو.

 

سيد قائم علي شاهه پاران ترقياتي بجيٽ جي استعمال نه ٿيڻ تي ڳڻتي ظاهر

ڪراچي (اسٽاف رپورٽر) وڏي وزير سيد قائم علي شاهه هلندڙ مالي سال 15-2014ع ۾ ترقياتي بجيٽ جي استعمال ۾ مختلف کاتن جي ناڪامي ۽ بهتر ڪارڪردگي نه هئڻ تي ڳڻتي جو اظهار ڪيو آهي. هن چيو ته اهو سڀ ڪجهه قبول ڪرڻ جوڳو ناهي، پ پ حڪومت سنڌ جي ترقي کي اوليت جي بنياد تي ترجيح ڏئي رهي آهي ۽ مان ان حوالي سان ڪنهن به قسم جي غفلت کي برداشت نه ڪندس. اهڙو اظهار هن سنڌ ۾ هلندڙ ترقياتي ڪمن جي جائزه اجلاس جي صدارت ڪندي ڪيو. اجلاس وڏي وزير جو پرنسپل سيڪريٽري عليم الدين بلو، ايڊيشنل چيف سيڪريٽري محمد وسيم، سيڪريٽري ترقيات ريحانه يمڻ، سيڪريٽري منصوبابندي ۽ ترقيات ڊاڪٽر شيرين ناريجو ۽ ٻين اعليٰ عملدارن شرڪت ڪئي. ايڊيشنل چيف سيڪريٽري محمد وسيم وڏي وزير کي بريفنگ ڏيندي ٻڌايو ته هلندڙ مالي سال 15-2014ع ۾ مجموعي ترقياتي بجيٽ 168 ملين رپيا هئي جنهن مان 143 بلين رپيا صوبائي اي ڊي پي ۽ 25 بلين ڊسٽرڪٽ اي ڊي پي جا هئا ۽ مجموعي طور تي 2937 اسڪيمون هيون جن مان 1658 جاري اسڪيمون ۽ 1279 نيون اسڪيمون جڏهن ته 90.1 بلين رپيا جاري اسڪيمن لاءِ ۽ 52.9 بلين رپيا نين اسڪيمن لاءِ مختص ڪيا ويا آهن. هن چيو ته مجموعي ترقياتي بجيٽ مان 15 سيڪڙو بجيٽ لوڪل گورنمينٽ لاءِ، 14 سيڪڙو انرجي لاءِ، 9 سيڪڙو صحت لاءِ، 8 سيڪڙو تعليم لاءِ، 7 سيڪڙو خصوصي ترغيبات لاءِ، 7 سيڪڙو روڊن جي تعمير، 6 سيڪڙو آبپاشي ۽ 34 سيڪڙو ٻين درمياني ۽ ننڍين اسڪمن لاءِ مختص ڪيا ويا آهن. ايڊيسنل چيف سيڪريٽري ترقياتي بجيٽ جي استعمال بابت پريزينٽيشن ڏيندي چيو ته اوقاف کاتي، زڪوات ۽ مذهبي معاملا صرف 20 سيڪڙو بجيٽ استعمال ڪئي مذڪوره کاتن جي ترقياتي اسڪيمن لاءِ 266.4 ملين رپيا مختص ڪيا ويا هئا جنهن مان 161.548 ملين رپيا 4 اپريل 2015ع تائين جاري ڪيا ويا آهن جنهن مان هنن صرف 32.756 ملين رپيا استعمال ڪيا آهن. هن چيو ته صحت کاتي لاءِ 13224.924 ملين رپين جي بجيٽ هئي جنهن مان 7200.616 ملين رپيا جاري ڪيا ويا آهن جنهن مان 2.775 بلين رپيا استعمال ٿي چڪا آهن ۽ انهن جي استعمال جي شرح 39 سيڪڙو آهي. محمد وسيم چيو ته صنعت کاتي لاءِ 125.558 ملين رپيا مختص ڪيا ويا هئا جنهن مان 38.5 ملين رپيا جاري ڪيا ويا آهن جڏهن ته انهن مان صرف 17.816 ملين رپيا استعمال ڪيا ويا اهڙي طرح انهن جي استعمال جي شرح 46 سيڪڙو آهي. محنت واري کاتي لاءِ 103.680 ملين رپيا مختص ڪيا ويا هئا جنهن مان ناڻي کاتي 9.390 رپيا جاري ڪري چڪو آهي ۽ ان مان صرف 1.5 ملين رپيا استعمال ڪيا ويا آهن اهڙي طرح جاري ڪيل فنڊن جي استعمال جي شرح 16 سيڪڙو بڻجي ٿي. لائيو اسٽاڪ اينڊ فشريز بابت ڳالهائيندي اي سي ايس چيو ته ان لاءِ 2070.67 ملين رپيا مختص ڪيا ويا هئا جنهن مان 599.249 ملين رپيا جاري ڪيا ويا ۽ ان مان صرف 111.689 ملين رپيا استعمال ڪيا ويا اهڙي طرح استعمال جي شرح 19 سيڪڙو بڻجي ٿي. وڏي وزير اي سي ايس محدم وسيم کي چيو ته هن ان ڏس ۾ لائيو اسٽاڪ کاتي جي ڳالهايو آهي جنهن تي هن چيو ته اسان اکين ڪيترائي خط موڪليا آهن. هن چيو ته مائنز اينڊ منرل کاتي لاءِ 279.420 ملين رپيا مختص ڪيا ويا هئا جنهن مان ناڻي کاتي 85.673 ملين رپيا جاري ڪيا جنهن مان هن صرف 3.450 ملين رپيا استعمال ڪيا آهن ۽ استعمال جي شرح 4 سيڪڙو بڻجي ٿي ان جي انگن اکرن تي وڏي وزير ناراضگي جو اظاهر ڪندي پنهنجي پرنسپل سيڪريٽري علم الدين بلو کي چيو ته هو انهن سمورن کاتن جيڪي پنهنجي ترقياتي بجيٽ جي استعمال ۾ ناڪام ويا آهن جي سيڪريٽرين جو خصوصي اجلاس طلب ڪري. هن چيو ته اها تمام مايوس ڪندڙ صورتحال آهي ۽ مان ان کي ڪيئن برداشت ڪري سگهان ٿو. اي سي ايس محمد وسيم چيو ته منصوبابندي ۽ ترقيات کاتي  به صرف 12 سيڪڙو فنڊ استعمال ڪيا آهن جنهن تي وڏي وزير چيو ته کاتي جي ڪارڪردگي مايوس ڪندڙ آهي. ٽرانسپورٽ کاتي بابت ٻڌائيندي اي سي ايس چيو ته کاتي لاءِ 3216.000 ملين رپيا مختص ڪيا ويا هئا جنهن مان 72.138 ملين رپيا جاري ڪيا ويا جڏهن ته کاتي 7.581 ملين رپيا استعمال ڪيا اهڙي طرح استعمال جي شرح 11 سيڪڙو بڻجي ٿي. انهن انگن اکرن تي وڏي وزير ناراضگي جو اظهار ڪندي چيو ته سنڌ ۾ ٽرانسپورٽ جا ڪيترائي مسئلا آهن ۽ کاتي جي ڪارڪردگي تسلي بخش ناهي. وڏي وزير ورڪس اينڊ سروسز کاتي جي ڪارڪردگي تي به ناراضگي جو اظهار ڪيو جڏهن کيس اي سي ايس ٻڌايو ته هن 9594.438 ملين رپين مان صرف 4915.413 رپيا استعمال ڪيا آهن اهڙي طرح استعمال جي شرح 51 سيڪڙو بڻجي ٿي ان کاتي لاءِ 9744.480 رپيا مختص ڪيا ويا هئا. سماجي بهبود کاتي به صرف 31 سيڪڙو ترقياتي فنڊ استعمال ڪيا جنهن لاءِ 313.2 ملين رپيا مختص ڪيا ويا هئا جنهن مان ناڻي کاتي 94 ملين رپيا جاري ڪيا جڏهن ته هن 29.277 ملين رپيا استعمال ڪيا. وڏي وزير ناڻي ۽ منصوبابندي ۽ ترقيات کاتن جو گڏيل اجلاس ايندڙ هفتي گهرائڻ جو فيصلو ڪيو جنهن ۾ اهي سمورا کاتا جن جي ترقياتي ڪمن جي حوالي سان ڪارڪردگي تسلي بخش نه آهي.

 

جڊيشل ڪميشن جي قيام باوجود تحريڪ انصاف جو رويو تبديل ناهي ٿيو: پرويز رشيد

اسلام آباد (بيورو)  سـُڌ سماءَ واري وفاقي وزير پرويز رشيد چيو آهي ته جڊيشل ڪميشن جي قيام باوجود  تحريڪ انصاف جو رويو تبديل ناهي ٿيو، پارليامينٽ جي تذليل  عمران خان جي دماغي حالت ظاهر ڪري ٿي.  عمران خان پاران جمعي تي پارليامينٽ جي گڏيل اجلاس کي خطاب ڪرڻ واري اعلان تي رد عمل ظاهر ڪندي وفاقي وزير پرويز رشيد چيو ته جنهن ايوان کي جعلي سڏيو ويو، اتي خطاب ڪرڻ وارو اعلان سمجهه کان ٻاهر آهي. هن چيو ته غير جمهوري طريقي واري سياست تحريڪ انصاف جي عادت  بڻجي وئي آهي، عمران خان پاران پارليامينٽ جي مسلسل تذليل ظاهر ڪري ٿي ته سندس دماغي حالت ڪيئن هوندي. پرويز رشيد چيو ته جڊيشل ڪميشن جي معاهدي وقت طئي ٿيو هو ته ان حوالي سان ڪا به بيان بازي نه ڪئي ويندي پر عدالتي ڪميشن جي قيام باوجود عمران خان پنهنجو رويو تبديل ناهي ڪيو. وفاقي وزير وڌيڪ چيو ته عمران خان جڊيشل ڪميشن تي اثر انداز ٿيڻ چاهي ٿو، اڃا جڊيشل ڪميشن جي معاهدي تي ڪجهه ڏينهن ئي ناهي گذريا ۽ عمران خان بيانبازي شروع ڪري ڏني آهي. پرويز رشيد عمران خان کي مشورو ڏنو ته خيبرپختونخواهه ۾ ڪرپشن عروج تي آهي، ٻين تي تنقيد ڪرڻ بدران ڪي پي ڪي ۾ سڌارن تي تجويز ڏني وڃي ته سندس لاءِ بهتر هوندو.

 

دهشتگردن جي مڪمل خاتمي تائين امن قائم نه ٿيندو: آرمي چيف

راولپنڊي (بيورو) آرمي چيف جنرل راحيل شريف چيو آهي ته دهشتگردن جي مڪمل خاتمي تائين امن قائم نه ٿو ٿي سگهي، قوم هٿيار فوج جي قربانين کي قدر جي نگاهه سان ڏسي ٿي ۽ دهشتگردن خلاف جاري آپريشن کي منطقي انجام تائين پهچايو ويندو. آءِ ايس پي آر جي ڊي جي ميجر جنرل عاصم باجوه طرفان سماجي رابطن واري ويب سائيٽ ٽوئٽر تي جاري ڪيل بيان موجب آرمي چيف جنرل راحيل شريف خيبر ايجنسي ۾ اڳئين مورچن جو دورو ڪيو ۽ دهشتگرن خلاف جاري آپريشن ۾ ٿيل اڳڀرائي جو تفصيلي جائزو ورتو. آرمي چيف، فوجين جي قربانين تي شاندار ڀيٽا پيش ڪئي ۽ جوانن جي عزم جي واکاڻ ڪئي جڏهن ته هِن علائقي مان دهشتگردن جي خاتمي  لاءِ مقامي قبيلن جي حمايت جي تعريف ڪئي. دوري دوران آرمي چيف کي بريفنگ ۾ ٻڌايو ويو ته دهشتگردن خلاف ڪارروائيون پاڪ افغان سرحد سان لاڳاپيل علائقن تائين جاري آهي. بريفنگ موجب افغانستان ويندڙ دره مساتيل به پاڪ فوج جي مڪمل ڪنٽرول ۾ آهي ۽ ڪنهن دهشتگرد کي فرار ٿيڻ جي هر صورت ۾ اجازت نه ڏني ويندي. بريفنگ ۾ ٻڌايو ويو ته آپريشن خيبر ٽـُو دوران تيره ماٿري ۽ ٻين علائقن ۾ مختلف ڪارروائين دوران هن وقت تائين 263 دهشتگردن کي ماريو ويو جڏهن ته 35 سڪيورٽي اهلڪار شهيد ٿيا، ان کانسواءِ پاڪ فوج جي اسپيشل انجنيئرز يونٽ 392 بارودي سرنگهون به ناڪاره بڻائي ڇڏيون. ان موقعي تي آرمي چيف جو چوڻ هو ته دهشتگردن جي مڪمل خاتمي تائين امن قائم نه ٿو ٿي سگهي. جنرل راحيل شريف چيو ته قوم هٿياربند فوجن جي قربانين کي قدر جي نگاهه سان ڏسي ٿي ۽ دهشتگردن خلاف جاري آپريشن کي منطقي انجام تائين پهچايو ويندو.

 

سعودي عرب کي خطرو ناهي، گڏيل اجلاس ۾ ميمبرن جو يمن فوج نه موڪلڻ جو مطالبو

اسلام آباد (بيورو) پارليامينٽ جي گڏيل اجلاس ۾ ميمبرن فوج يمن نه موڪلڻ جو مطالبو ڪندي چيو آهي ته سعودي عرب کي ڪو به خطرو ناهي، فوج موڪلڻ بدران يمن ۾ امن قائم ڪرائڻ لاءِ ٽياڪڙي ڪردار ادا ڪيو وڃي. قومي اسيمبلي جي اسپيڪر اياز صادق جي صدارت هيٺ اڄ ٽئين ڏينهن به پارليامينٽ جو گڏيل اجلاس ٿيو، جيڪو اڄ شام تائين ملتوي ڪيو ويو آهي. وزيراعظم ميان نواز شريف، مخالف ڌر جي اڳواڻ سيد خورشيد شاهه، خواجا آصف، طاهر مشهدي، سعيد غني، شيرين مزاري ۽ الياس بلور سميت اهم اڳواڻ اجلاس ۾ شرڪت ڪئي، جڏهن ته ايم اين اي جمشيد دستي به سائيڪل ي پارليامينٽ هائوس پهتو. اجلاس کي خطاب ڪندي پيپلز پارٽي جي سينيٽر سعيد غني چيو ته يمن جي صورتحال تي پرڏيهي وزارت جو ڪو به ڪردار نظر نه پيو اچي. سعيد غني چيو ته پرڏيهي وزارت ناڪام وزارت بڻجي چڪي آهي. پ پ سينيٽر چيو ته وزيراعظم يمن معاملي کي ڳنڀير معاملو قرار ڏئي رڳو اهو چئي رهيو آهي ته سندس رهنمائي ڪئي وڃي پر ميان نواز شريف اهو ٻـُڌائڻ لاءِ تيار ناهي ته سرڪار کي آخر ڪهڙي رهنمائي گهـُرجي. سعيد غني چيو ته هـُو سمجهي ٿو ته وزيراعظم جي رهنمائي گهـُرڻ واري بيان کانپوءِ اجلاس جو ڪو به فائدو ناهي. فنڪشنل ليگ جي سينيٽر سيد مظفر حسين شاهه اجلاس کي خطاب دوران اسپيڪر کي واڌايون ڏيندي چيو ته پي ٽي آءِ جون استعيفائون منظور نه ڪري ڀلو ڪم ڪيو ويو آهي. يمن صورتحال تي ڳالهائيندي مظفر حسين شاهه چيو ته يمن ۾ ڪا به جنگ ناهي، رڳو سياسي بحران آهي. فنڪشنل ليگ جي سينيٽر چيو ته سعودي عرب کي هن وقت ڪو به خطرو ناهي، جيڪڏهن خطرو ٿيو ته پاڪستان خاموش نه ويهندو. اجلاس کي خطاب ڪندي طاهر مشهدي چيو ته سعودي عرب کي ڪو به خطرو ناهي، پوءِ اهو ڇو فوج جي گهر ڪري رهيو آهي؟ هـُن چيو ته پاڪستان کي ڪنهن ٻئي ملڪ جِي جنگ ۾ شامل ٿيڻ جي ڪا به ضرورت ناهي، اسلام آباد کي رڳو يمن مان جنگ ختم ڪرائڻ لاءِ ٽياڪڙي ڪرڻ گهرجي. تحريڪ انصاف جِي ميمبر شيرين مزاري اجلاس کي خطاب ڪندي چيو ته بچاءَ واري وزير ايوان ۾ غير پارلياماني لفظ ڳالهايا. يمن جنگ تي ڳالهائيندي شيرين مزاري سعودي عرب جي سالميت کي ڪو به خطروناهي، پاڪستان جيڪڏهن يمن ۾ امن چاهي ٿو ته ڌر بڻجڻ کان پاسو ڪيو وڃي. هـُن چيو ته هيءَ ويڙهه سعودي جي سالميت نه پر يمن جي اندروني ويڙهه آهي، تنهنڪري پاڪ فوج کي پرائي جنگ لاءِ نه موڪلڻ گهرجي. شيرين مزاري چيو ته پاڪ فوج کي پنهنجي ملڪ جو دفاع ڪرڻ گهرجي، پاڪ جڳهن کي خطرو ٿيو ته پاڪستان جو بچو ٻچو قرباني لاءِ اٿي کڙو ٿيندو. ان موقعي تي خيالن جو اظهار ڪندي الياس بلور چيو ته هو مڃي ٿو ته سعودي پاڪستان جو دوست ملڪ آهي پر ان جو اهو مطلب هرگز ناهي ته حدون اورانگهي انجي مدد ڪئي وڃي. الياس بلور چيو ته فوج کي ڪنهن به صورت ۾ سعودي عرب نه موڪلڻ گهرجي. پيپلز پارٽي جي سينيٽر عبدالقيوم سومري چيو ته يمن معاملو ڳالهين ذريعي حل ڪيو وڃي، جنگين ۾ ڪجهه به ناهي رکيو. اجلاس دوران خيالن جو اظهار ڪندي عثمان خان پاڪستان کي ڪنهن به صورت ۾ فوج يمن نه اماڻڻ گهرجي. هـُن چيو ته اڳ ئي سڄي دنيا چوي پئي ته پاڪستان ڪرائي جي رياست آهي، تنهنڪري فوج موڪلڻ بدران گڏيل قومن ذريعي مسئلي کي حل ڪيو وڃي. عثمان خان چيو ته مقدس هنڌن کي خطرو ٿيو ته پاڪستان ضرور حفاظت ڪندو.

 

عمران خان جي ڪراچي آمد جي موقعي تي ڪارڪن ڪا به بدتميزي يا نعريبازي نه ڪن: الطاف حسين جي هدايت

لنڊن (مانيٽرنگ ڊيسڪ) ايم ڪيو ايم سربراهه الطاف حسين ڪارڪنن کي عمران خان جي ڪراچي آمد جي موقعي تي پرامن رهڻ جي هدايت ڪندي چيو آهي ته جمهوريت ۾ برداشت جي سگهه هئڻ گهرجي. لنڊن مان جاري ڪيل بيان ۾ الطاف حسين ڪارڪنن کي هدايت ڪئي ته عمران خان جي ڪراچي آمد جي موقعي تي ڪا به بدتميزي يا نعريبازي نه ڪئي وڃي. ايم ڪيو ايم سربراهه عمران خان کي مخاطب ٿيندي چيو ته جناح گرائونڊ اوهان جو پنهنجو آهي، شوق سان جلسو ڪريو. هن چيو ته جمهوريت ۾ برداشت جي سگهه هئڻ گهرجي، ان سان جمهوريت مضبوط ٿيندي. الطاف حسين جو وڌيڪ چوڻ آهي ته  23 اپريل تي تڪ جو عوام ساڻس محبت جو اظهار ڪندو، بيلٽ باڪسز مان نڪرندڙ پرچيون ايئن هونديون ڄڻ مٿس گل نڇار ڪيا ويا هجن.

 

صحافين جي وفد جي سڌ سماءَ جي وزير سان ملاقات، مسئلن بابت آگاهي، هر ممڪن سهولتون فراهم ڪيون وينديون: شرجيل ميمڻ

ڪراچي(اسٽاف رپورٽر)   سنڌ جي اطلاعات ۽ بلديات کاتي واري وزير شرجيل انعام ميمڻ چيو آهي ته سموري صوبي جي صحافين جي ڀلائي ۽ سندن مسئلن کي حل ڪرڻ لاءِ پيپلز پارٽي جي سنڌ حڪومت ۽ پارٽي جي اعليٰ قيادت سدائين ڪردار ادا ڪيوآهي. پاڪستان فيڊرل يونين آف جرنلسٽس ۽ ٻين صحافي تنظيمن سان اسان جا سدائين دوستاڻا تعلق رهيا  آهن ۽ اڳتي به اسان جي اها ڪوشش هوندي ته صحافين جي حوالي سان سمورا انتظام ڪيا ويندا، جنهن سان انهن کي ڪنهن به قسم جي مشڪل کي منهن نه ڏسڻو پوي. سنڌ حڪومت ۽ اطلاعات کاتي سنڌ طرفان سموري سنڌ جي صحافين کي هر ممڪن سهولتن جي فراهمي کي اسان پنهنجو فرض سمجهون ٿا. اهڙن خيالن جو اظهار هن اربع ڏينهن پنهنجي آفيس ۾ پاڪستان فيڊرل يونين آف جرنلسٽس جي سيڪريٽري جنرل امين يوسف جي اڳواڻي ۾ آيل 5 رڪني وفد سان ملاقات دوران ڪيو. ان موقعي تي سنڌ اطلاعات کاتي جو سيڪريٽري ڊاڪٽر ذوالفقارعلي شالواڻي، ڊائريڪٽر پريس انفارميشن سنڌ محمد يوسف ڪابورو، صحافين جي وفد ۾ پي ايف يو جي جي ايف اي سي جي ميمبر مشتاق سرڪي، اڳوڻو صدر ڪي يو جي ساجد وزير، ارشد صديقي ۽ حريم سومرو موجود هئا. ملاقات ۾ پي ايف يو جي جي سيڪريٽري جنرل امين يوسف ايندڙ مهيني ڪراچي ۾ رٿيل پي ايف يو جي تحت ايشيا جي سڀ کان پهرين ميڊيا ڪانفرنس جو ڪراچي ۾ ڪرائڻ جي حوالي سان صوبائي وزير کي آگاهه ڪيو ۽ ان ڪانفرنس جي معاملن تي خيالن جي ڏي وٺ ڪئي. صوبائي وزير وفد کي يقين ڏياريو ته سنڌ اطلاعات کاتو ان حوالي سان مڪمل طور تي انهن سان گڏ آهي ۽ ان ڪانفرنس سميت صحافين جي حوالي سان جيڪي انتظام ڪيا ويندا انهن ۾ اسان  پنهنجو ڀرپور ڪردار ادا ڪندا سين. هن چيو ته پاڪستان پيپلز پارٽي جو منشور آزاد صحافت آهي ۽ اسان جي باني چيئرمين شهيد ذوالفقار علي ڀٽو، شهيد چيئرپرسن محترمه بينظير ڀٽو صاحبه کانپوءِ اسانجي چيئرمين بلاول ڀٽو زرداري ۽ شريڪ چيئرمين ۽ اڳوڻو صدر پاڪستان آصف علي زرداري طرفان ان سلسلي ۾ واضح موقف آهي ته هن ملڪ ۾ ميڊيا جي آزادي کي ڪوبه روڪي نه ٿو سگهي. هن چيو ته ماضي ۾ به پيپلز پارٽي ۽ ان جي وفاقي ۽ صوبائي حڪومتن صحافت جي آزادي لاءِ ڪيل جدوجهد ۾ پهرين دستي جو ڪردار ادا ڪيو ۽ هاڻي به اسان صحافين جي فلاح ۽ بهبود ۾ پوئتي نه رهندا سين. ان موقعي تي امين يوسف ۽ وفد جي ٻين ميمبرن صوبائي وزير شرجيل انعام ميمڻ طرفان صحافين لاءِ ڪيل ڪاوشن کي ساراهيو۽ اهو چيو ته هن ملڪ ۾ جمهوريت جي بقاءَ ۽ سلامتي لاءِ جهڙيءَ طرح ماضي ۾صحافين سياسي جماعتن خاص طور تي پاڪستان پيپلز پارٽي سان گڏ ڪلهو ڪلهي ۾ ملائي پنهنجو ڪردار ادا ڪيوآهي ۽ هاڻي به ڪندا.

 

مودي پاران يمن مان ڀارتي شهرين کي حفاظت سان ڪڍڻ تي نواز شريف جو شڪريو ادا

نئين دلي (م.ڊ) ڀارتي وزيراعظم نريندر مودي يمن مان ڀارتي شهرين جي حفاظت سان پاڪستان واپسي تي پنهنجي هم  نواز شريف ۽ ان جي حڪومت جو شڪريو ادا ڪيو آهي ڀارتي وزيراعظم نريندر مودي سماجي رابطن واري ويب سائيٽ ٽوئيٽر تي پنهنجي پيغام ۾پاڪستان طرفان يمن ۾ ڦاٿل 11 ڀارتي شهرين جي حفاظت سان منتقلي کي هڪ انساني قدم قرار ڏيندي وزيراعظ۾ نواز شريف جو شڪريو ادا ڪيو جڏهن ته هن جو چوڻ هو ته انساني خدمت جي ڪابه سرحد ناهي هوندي ۽ اسان کي خوشي آهي ته ٻين ملڪن جي شهرين جي يمن مان حفاظت سان نڪرڻ ۾ پاڙيسري ملڪن جي مدد شامل آهي.

تحريڪ انصاف ۽ جماعت اسلامي پاران ڪراچي ۾ بلدياتي چونڊون گڏجي وڙهڻ تي اتفاق

اسلام آباد (بيورو) جماعت اسلامي جي امير سراج الحق جو چوڻ آهي ته تحريڪ انصاف سان گڏجي ڪراچي ۾ بلدياتي چونڊون گڏجي وڙهڻ تي اتفاق ٿي ويوآهي، اسلام آباد بار کي خطاب کانپوءِ ميڊيا سان ڳالهائيندي سراج الحق جو چوڻ هو ته ڪراچي جي تڪ اين اي 246 ۾ جماعت اسلامي پنهنجو اميدوار نامزد ڪري ڇڏيو آهي اسان ان تڪ تي اليڪشن وڙهنداسين هن جو چوڻ هو ته تحريڪ انصاف طرفان ڪراچي ۾ بلدياتي ۽ ضمني اليڪشن گڏجي وڙهڻ لاءِ گڏيل حڪمت عملي ٺاهڻ جي آڇ ٿي جنهن تي ٻنهي تنظيمن ۾ اتفاق ٿي ويو آهي جڏهن ته جماعت اسلامي هڪ جمهوري پارٽي آهي ۽ گڏيل حڪمت عملي جوڙڻ لاءِ پارٽي سان مشاورت کانپوءِ فيصلو ڪنداسين.

جوڊيشل ڪميشن جڙي وئي آهي، 6 هفتن اندر اڇا ڪارا پڌرا ٿي ويندا: عمران خان

حيدرآباد(بيورو) پاڪستان تحريڪ انصاف جي سربراهه عمران خان چيو آهي ته چيف جسٽس آف پاڪستان جسٽس ناصر الملڪ جي سربراهيءَ ۾ جڊيشل ڪميشن جوڙي وئي آهي ۽ 6 هفتن اندر اڇا ڪارا سڀ پڌرا ٿي پوندا. سنڌ ۾ گهڻو وقت نه ڏئي سگهيس ڇو ته جڊيشل ڪميشن قائم ڪرائڻ واري ڪم ۾ مشغول رهيس، هاڻي سنڌ جي ماڻهن لاءِ وقت ئي وقت آهي، اقتدار ۾ عوامي شرڪت تمام گهڻي ضروري آهي. هن اهڙو اظهار اربع ڏينهن حيدرآباد ۾ دانشور ذوالفقار هاليپوٽو جي رهائشگاهه  تي ميڊيا سان ڳالهائيندي ڪيو. عمران خان چيو ته اقتدار ۾ عوام جي شرڪت ناهي ۽ اقتدار ۾ رڳو ورهاست ٿيل آهي، جيڪڏهن پي ٽي آءِ ميدان ۾ نه اچي ها ته اهو سلسلو ڊگهي عرصي تائين جاري رهي ها. هن چيو ته جڊيشل ڪميشن جي حوالي سان مصروفيتن سبب سنڌ جي عوام کان گهڻو عرصو پري رهيس پر هاڻي سنڌ جي ماڻهن کي وقت ڏيندس. هن چيو ته تحريڪ انصاف جو مطالبو هو ته ملڪ ۾ شفاف چونڊون ٿين ۽ هن وقت به اسان جو ساڳيو ئي مطالبو آهي ته پوءِ ان تي مخالفت ڇو پئي ڪئي وڃي، سڀني جو مطالبو هو ته تحريڪ انصاف اسيمبليءَ ۾ واپس اچي ۽ جڏهن اسان واپس اسيمبليءَ ۾ پهتاسين ته سموريون پارٽيون اسان جي خلاف بيهي رهيون. هن چيو ته اهي سمورا ماڻهو تبديلي نٿا چاهين، پاڪستان جا مسئلا تڏهن حل ٿيندا جڏهن عوام سگهارو ٿيندو ۽ اقتدار مٿان کان هيٺئين سطح تائين منتقل ٿيندو، سڄي دنيا ۾ بهترين نظام اهو آهي جيڪو عوامي نظام آهي، ڪنهن به اولهه جي ملڪ ۾ قانون جي ڀڃڪڙي نٿي ٿئي، ڇو ته اتي حقيقي جمهوريت آهي، پاڪستان ۾ جيڪڏهن قانون جي آزادي نه هوندي، يونيورسٽين ۾ چٽاڀيٽي وارو ماحول نه هوندو ته ملڪ ۾ بهتري نه ايندي. اوهان ڏٺو هوندو ته اسان جي ڪوششن سان نمل يونيورسٽيءَ مان ميرٽ تي ڊگريون ڏنيون پيون وڃن. هن چيو ته خيبر پختونخواه ۾ پوليس غير سياسي طور تي ڪم ڪري رهي آهي، ان لاءِ اتي پوليس ڪامياب آهي، جڏهن ته سنڌ ۽ پنجاب ۾ سياسي طور تي ڀرتيون ٿيل آهن، تنهن ڪري پوليس عوامي محافظ بدران عوام تي تشدد ڪري ٿي. سول سروس سياسي مداخلت سبب ڪامياب نٿي ٿي سگهي، يونيورسٽيون ۽ اسپتالون تڏهن ئي ڪامياب ٿينديون جڏهن انهن جي نگراني ٿيندي. هن چيو ته سسٽم کي بهتر بنائڻ لاءِ تحريڪ انصاف ليڊي ريڊنگ اسپتال کان سسٽم جي بهتري شروع ڪئي آهي، سنڌ ۾ به صحيح تبديلي تڏهن ئي ايندي جڏهن بلدياتي نظام وسيلي مٿان کان هيٺئين سطح تائين عوامي قيادت اڳتي ايندي. اين ايف سي ايوارڊ تحت سنڌ کي 180 ارب رپيا ملن ٿا پر صوبي ۾ ڪابه ترقي نظر نٿي اچي، اهو پئسو ڪيڏانهن پيو وڃي، ان لاءِ ضروري آهي ته اهو پئسو هيٺئين سطح تائين پهچڻ گهرجي ۽ پوليس جي طاقت کي پڻ عوامي طاقت بڻايو وڃي، تعليم جي بهتريءَ لاءِ سڀني کي ڪردار ادا ڪرڻو پوندو جيسيتائين اختيار وفاق کان صوبن ۽ پوءِ صوبن کان مڪاني سطح تائين نه ملندا ملڪ ۾ تبديلي نٿي اچي سگهي. ادارن مان سياسي مداخلت کي ختم ڪرڻو پوندو. هن چيو ته ميرٽ ضروري آهي ۽ پاڪستان 1992ع ۾ به ميرٽ سبب ڪرڪيٽ جو عالمي چيمپئن بڻيو هو. پاڪستان ۾ خانداني سياست هلي رهي آهي، جڏهن ته اولهه ۾ ميرٽ تي ليڊرشپ آندي وڃي ٿي، هتي بادشاهت آهي، جمهوريت ناهي پر هتي ته بادشاهت به بهتر نموني نه پئي هلي. هن چيو ته 4 کان 5 مسلمان ملڪن کان سواءِ ڪنهن به ملڪ ۾ بهتر جمهوريت ناهي. 1970ع کانسواءِ ڪي به چونڊون صاف شفاف ناهن ٿيون ۽ سمورين چونڊن تي اعتراض اُٿاريا ويا. هن چيو ته 126 ڏينهن جي ڌرڻي جي اها ڪاميابي آهي ته جڊيشل ڪميشن قائم ٿي وئي آهي. 2015ع چونڊن جو سال آهي، جيڪڏهن هن سال چونڊون نه به ٿيون ته جڊيشل ڪميشن قائم ٿيڻ بعد ايندڙ چونڊون صاف شفاف ضرور ٿينديون. سنڌ ۾ سڀ کان وڌيڪ شعور آهي پر تنهن هوندي به سنڌ ۾ غربت جي انتها آهي، سنڌ کي ٻين صوبن جي ڀيٽ ۾ تبديليءَ جي وڌيڪ ضرورت آهي، باشعور ماڻهو، اديب ۽ دانشور گڏجي اسان جو ساٿ ڏين، سنڌ ۾ هاري طبقي جي حالت ڏسي تمام گهڻو ڏُک ٿي رهيو آهي. ڪي پي ڪي کي به بجلي ۽ گيس جو پورو حصو نه پيو ملي، جيڪو پاور ۾ اچي ٿو ته اهو پاڻ کي بادشاهه سمجهي ٿو، سمورو سسٽم خراب ٿي چڪو آهي جنهن کي تبديل ڪرڻ جي ضرورت آهي، هتي سڀ تبديليءَ جي خلاف آهن، اسان ڌرڻو هنيو ته سڀ اسان جي خلاف ٿي ويا، هتي اقتدار جي وارابندي هلي رهي آهي. گذريل چونڊن ۾ سمورين سياسي پارٽين چيو ته ڌانڌلي ٿي آهي ته پوءِ ٻُڌايو وڃي ته هيءَ اسيمبلي قانوني ڪيئن ٿي سگهي ٿي؟ قانون چئي ٿو ته اسيمبلي رڳو صاف شفاف چونڊن وسيلي قائم ٿي سگهي ٿي. ان موقعي تي تحريڪ انصاف جي مرڪزي جنرل سيڪريٽري جهانگير ترين چيو ته تحريڪ انصاف جو پيغام جيڪو 18 سالن کان عمران خان پکيڙي رهيو آهي اهو ملڪ ۾ تبديليءَ جو پيغام آهي، اسلام آباد وارو 126 ڏينهن جو تاريخي ڌرڻو عوام جو آواز هو، جنهن ۾ تبديليءَ جو نعرو ملڪ جي ڪنڊ ڪڙڇ تائين پهتو، سنڌ ۾ تبديليءَ جي شديد ضرورت آهي. 40 سالن بعد پهريون ڀيرو ڪراچيءَ ۾ ايم ڪيو ايم جي گهر ۾ ان جي اميدوار آڏو چئلينج سمجهي چونڊ وڙهي رهيا آهيون. ڳوٺاڻي سنڌ ۾ عوام کي پنهنجا حق ناهن مليا، سنڌ جي ماڻهن کي تحريڪ انصاف پنهنجا حق ڏياريندي، سنڌ جي ثقافت سياسي آهي، سنڌ جو عوام سمجهدار آهي ۽ تحريڪ انصاف جو منشور پڻ هيٺاهين سطح تائين عوام کي اختيار ڏيڻ آهي، زراعت ملڪ ۾ ڪرنگهي واري هڏي جي حيثيت رکي ٿي، جنهن جي هن وقت حالت افسوسناڪ آهي، سنڌ حڪومت طرفان ڪمند جو اگهه 182 رپيا مقرر ڪرڻ باوجود ڪجهه شگرملن کانسواءِ باقي شگرملن آبادگارن کي 155 رپيا اگهه ڏنو، جنهن تي اسان احتجاج ڪندي آواز اُٿاريون ٿا. هن مطالبو ڪيو ته هاڻي ڪڻڪ جي مند آهي ۽ آبادگارن کي ڪڻڪ جو صحيح اگهه ڏنو وڃي، ملڪ مان ڪڻڪ جون ٻوريون وڪرو ڪرڻ وارو رجحان ختم ڪنداسين. ان موقعي تي خاوند بخش جهيجو، نادر اڪمل لغاري، هاشم لغاري، رجب ميمڻ، ارباب احسان ۽ ٻيا پڻ موجود هئا. ان کان اڳ عمران خان ڀٽ شاهه پهچي ڀٽ شاهه جي گادي نشين سيد وقار حسين شاهه سان سندس والد نثار حسين شاهه جي لاڏاڻي تي تعزيت ڪئي، بعد ۾ لطيف سرڪار جي مزار تي حاضري ڀري گلن جي چادر چاڙهي ۽ دعا گهري ۽ ميڊيا سان پڻ ڳالهه ٻولهه ڪئي. اربع ڏينهن منجهند جو پاڪستان تحريڪ انصاف جو چيئرمين عمران خان جڏهن حيدرآباد ايئرپورٽ پهتو ته تحريڪ انصاف جي ڪارڪنن ۾ بدنظمي پڻ ٿي پئي.