تازيون خبرون

Daily Archives: April 8, 2015

شهلا رضا سنڌ اسيمبلي جي مخالف ڌر جي اڳواڻ کي پٽ چئي ڳالهايو

ڪراچي (اسٽآف رپورٽر) ڊپٽي اسپيڪر شهلا رضا شهريار مهر ۽ سليم راجپوت کي پٽ چئي ڳالهائيندي رهي جڏهن ته شهريار مهر به شهلا رضا کي ”امي جي“ جو خطاب ڏئي ڇڏيو آهي ڊپٽي اسپيڪر شهلا رضا جي صدارت هيٺ سنڌ اسيمبلي جو اجلاس ٿيو اجلاس دوران شهريار مهر ۽ سليم راجپوت ڪنهن موضوع تي ڳالهائڻ  لاءِ اٿي پيا جنهن تي ڊپٽي اسپيڪر شهلا رضا ٻنهي ڄڻن سان ڳالهائيندي چيو ته پٽ ويهي رهيو جنهن موضوع تي اوهان ڳالهائڻ چاهيو ٿا اهو معاملو عدالت ۾ آهي جنهن کانپوءِ هو پنهنجي سيٽ تي ويهي رهيا پر جواب ڏيڻ بغير نه رهي سگهيا ۽ شهلا رضا کي چيو ”امي جي“ اهو ته اوهان جو اختيار آهي، جنهن تي شهلا رضا چيو ته اميد آهي ته اوهان انهن لفظن جو آئنده خيال رکندو جنهن تي عيوان زوردار ٽهڪن سان گونجي اٿيو.

 

سراج دراني سياسي قيدي نه پر چور رهيو آهي: شهريار مهر

ڪراچي (اسٽاف رپورٽر) سنڌ اسيمبلي ۾ مخالف ڌر اڳواڻ شهر يار مهر چيو آهي ته سراج دراني سياسي قيدي نه پر چور رهيو آهي ۽ ان  وٽ بدمعاشي لاءِ اسيمبلي کانسواءِ ٻي ڪابه جگهه نه بچي آهي، امتياز شيخ چيو ته شهريار مهر جي ايوان ۾ آمد تي پابندي لڳائي وئي ته سخت مزاحمت ڪنداسين. سنڌ اسيمبلي آڏو ميڊيا سان ڳالهائيندي شهر يار مهر چيو ت ه آغا سراج دراني پ پ لاڙڪاڻي ڊويزن جو صدر آهي ۽ اهو اڻڌريو نٿو ٿي سگهي. هن چيو ته سنڌ ۾ جمهوريت جي آڙ ۾ آمريت هلي رهي آهي، پ پ قانون جي لتاڙ کانسواءِ سنڌ کي ڪجهه ناهي ڏنو آهي. هن چيو ته سراج دراني ڪرپشن ڪري جيل ويو، هو سياسي قيدي نه پر چور رهيو آهي ۽ ان وٽ بدمعاشي لاءِ اسيمبلي کانسواءِ ٻي ڪابه جگهه نه بچي آهي. هن چيو ته پ پ وارا ڄاڻي واڻي اهڙيون حرڪتون ڪري رهيا آهن ته ٻيو ڪو اچي حڪومت تي قبضو ڪري. شهر يار مهر چيو ته ايپڪس ڪميٽي کي آغا سراج دراني جي حرڪتن جو نوٽيس وٺڻ گهرجي. شهر يار مهر چيو ته هو سنڌ جي مسئلن تي ڳالهائن ٿا، ڀلي ڪيتريون به رٿون آنديون وڃن پر ڳالهائيندا رهندا. شهر يار مهر چيو ته اسان ته رڳو ايوان ۾ احتجاج ڪيو آهي، ماضي ۾ ڊپٽي اسپيڪر کي وارن مان جهلي گهليو ويو، پ پ ميمبرن ڪاپيون ساڙيون ۽ ڊيسڪ تي چڙهي ڊانسون ڪيون. فنڪشنل ليگ جي امتياز شيخ چيو ته پ پ کان نه حڪومت نه پئي هلي. هن چيو ته شهر يار مهر جي اسيمبلي اچڻ تي پابندي لڳائي وئي ته ان جي سخت مزاحمت ڪنداسين.

 

سعودي عرب سان دوستي نڀائڻي آهي ته ان کي جنگ کان بچائڻو پوندو: سراج الحق

اسلام آباد (بيورو) جماعت اسلامي جي امير سراج الحق چيو آهي ته سعودي عرب سان دوستي نڀائڻ لاءِ اسان کي ان کي جنگ کان بچائڻو پوندو ۽ جنگ ۾ 100 سيڪڙو فائدو اسرائيل کي ٿيندو قومي اسيمبلي جي گڏيل اجلاس ۾ خيالن جو اظهار ڪندي سراج الحق چيو ته اسان امن چاهيون ٿا ۽ امن جي صورت ۾ قرآن جو پيغام اسان وٽ آهي جنگين سان قبرستان آباد، ٻار يتيم ۽ عورتون بيواهه ٿينديون آحن هن چيو ته هٿيارن جي ڪارخانن کي هلائڻ لاءِ جنگ جي ضرورت هوندي آهي ۽ جنگ  سبب آمريڪا کي هڪ نئين منڊي ملي ويندي، سراج الحق چيو ته مسلمان ملڪن سان حڪومت جي نه پر عوام جي دوستي آهي ۽ سعودي عرب جو تحفظ اسان سڀني تي فرض آهي پاڪستان کي ان مسئلي جو حصو بڻجڻ بجاءِ ان جي حل طرف وڃڻ گهرجي، سعودي عرب سان دوستي نڀائڻ لاءِ اسان کي سعودي عرب کي جنگ کان بچائڻو پوندو ڇو ته جنگ جي صورت ۾ فائدو صرف اسرائيل کي ٿيندو اسان کي نه، سراج الحق چيو ته عراق جهڙي مضبوط ملڪ کي سازش ذريعي ٽوڙيو ويو.

 

وزيراعظم کي خواجا آصف جي زبان روڪڻ گهرجي ها، زبان اسان جي به کلي سگهي ٿي:شاهه محمود قريشي

اسلام آباد (بيورو) تحريڪ انصاف جي اڳواڻ شاهه محمود قريشي چيو آهي ته وزيراعظم نواز شريف کي خواجا آصف جي زبان روڪڻ گهـُرجي هئا پر افسوس ايئن نه ٿيو، پي ٽي آءِ وڏي بردباري جو مظاهرو ڪيو نه ته زبان هـُو به رکن ٿا. اسلام آباد ۾ پارليامينٽ هائوس ٻاهران ميڊيا سان ڳالهائيندي شاهه محمود قريشي چيو ته مسلم ليگ ن جا ميمبر سمجهن ٿا ته تحريڪ انصاف جي اسيمبلي ۾ اچڻ سان جمهوريت مضبوط ٿيندي جڏهن ته اسحاق ڊار به ڳالهين ذريعي معاملا حل ڪرڻ چاهي پيو پر گذريل ڏينهن بچاءَ واري وزير خواجا آصف قومي ڌيان سياسي پوائنٽ اسڪورنگ تي ڇڪايو جيڪو سٺو عمل نه هو. هن چيو ته وزيراعظم نواز شريف کي خواجا آصف جي زبان روڪڻ گهرجي ها ۽ کيس تڪرار گهٽائڻ ۾ پنهنجو ڪردار ادا ڪرڻ گهرجي ها پر افسوس ايئن نه ٿيو. شاهه محمود قريشي چيو ته ڌانڌلي جي حوالي سان خواجا آصف جو تڪ به بحث هيٺ رهيو آهي ان ڪري کيس وڌيڪ پريشاني هئي. هن چيو ته بچاءَ واري وزير جو بيان کوکلو هو ان ڪري سڄي هائوس ان کي ڪا اهميت نه ڏني،هـُو خواجا آصف جا جوتا نه ٿا لهرائڻ چاهين رڳو ان جو رويو درست ڪرائڻ چاهين ٿا. شاهه محمود قريشي چيو ته پارليامينٽ ۽ عام جلسي ۾ لهجو الڳ هوندو آهي، کين به حڪومت جي ڪيترين ئي شين ۾ اجنبيت نظر اچي ٿي.

 

عامر خان 21هزار ڇوڪرين کي “رد” ڪري ڇڏيو

مبمئي(شُوبز نيوز) بالي ووڊ جي ناليواري اداڪار عامرخان هنن ڏينهن ۾ پنهنجي ايندڙ فلم “دنگل” جي تياريءَ ۾ مصروف آهي جنهن ۾ هو هڪ پهلوان جو ڪردار نڀائي رهيو آهي. هن فلم جي خاص ڳالهه اها به آهي ته  عامرخان پهريون ڀيرو چئن ڌيئن جو پيءُ جو ڪردار نڀائيندو ۽ انهن چئن ڇوڪرين جو ڳولا جو ڪم اڃان تائين هلي رهيو آهي. فلم “دنگل” جي لاءِ هن وقت تائين 21هزار ڇوڪرين جا آڊيشن ورتا ويا آهن.پهرين اهي ڳالهيون هلي رهيون ته هن فلم لاءِ ناليواري اداڪارا ڪنگنا راناوت جي باري ۾ غور ڪيو پيو وڃي پر ڪنگنا ان ڳالهه کي رد ڪري ڇڏيو آهي. خبرن مطابق هن فلم لاءِ هڪ به ڇوڪري فلم انڊسٽري مان نه هوندي. ڇوته هن فلم لاءِ عام ڇوڪرين جي ڳولا آهي جيڪي پردي تي پهرين ڪڏهن به نظر نه آيون هجن. فلم جي سٿ ملڪ جي مختلف شهرن ۾ وڃي هزارين ڇوڪرين جا آڊيشن ورتا آهن جيڪو رياست هريانا، اترپرديش، راجستان، مدهيا پرديش سان گڏ ڪيترن ئي ٻين شهرن ۾ به ڪيو ويو. فلم جي ڪاسٽ جي باري ۾ عامرخان سان گڏوگڏ فلمجي ڊاريڪٽر ۽ پروڊيوسر سڀ سنجيده آهن. اهي سڀ فلم سان لاڳاپيل هر شيءَ تي خاص ڌيان ڏين پيا. جڏهن ته فلم جي مڪمل ڪاسٽ اڃان تائين طئي نه ٿي آهي. هن فلم لاءِ عامرخان پنهنجو وزن وڌائي90 ڪلو تائين ڪيوآهي. هونئن به عامرخان فلم انڊسٽري ۾ “مسٽر پرفيڪشنسٽ” جي نالي سان مشهور آهي ۽ جيستائين کيس پرفيڪٽ ڪاسٽ نه ملندي، فلم جي شوٽنگ شروع نه ٿيندي.

 

بالي ووڊ اداڪار ۽ پروڊيوسر جيتندر73 سالن جو ٿي ويو

ممبئي(شوبز نيوز) بالي ووڊ اداڪار ۽ پروڊيوسر جيتندر اڄ پنهنجي73هون جنم ڏينهن ملهائيندو. جيتندر کي فني خدمتن لاءِ لائيف ٽائيم اچيومنٽ ايوارڊ سوڌو گهڻا ئي ٻيا ايوارڊ پڻ مليا آهن.امرتسر ۾اک کوليندڙ جيتندر بالي ووڊ ۾ پنهنجو قدم“ گيت گايا پتهرون ني” سان رکيو. هن 60کان 90 واري ڏهاڪي تائين بالي ووڊ کي ڪيتريون ئي ڪامياب فلمون ڏنيون.بهترين ڊانس ۽ اداڪاريءَ جي ڪري هو بالي ووڊ جو جمپنگ جيڪ سڏيو ويندو آهي.سري ديوي، جيا پرادا، هيما مالني،ريکا سوڌو هر ناليواري هيروئين سان جوڙي ٺاهي.اولاد، همت والا،ڌرم وير، جاني دشمن، ۽ تحفاجيتندر جون مشهور فلمون هيون.

 

راني مکرجي جي وڌندڙ وزن تي سندس مڙس پريشان

ممبئي(شُوبز نيوز) بالي ووڊ اداڪاره راني مکرجي پنهنجين ادائن ۽ لچڪدار چيلهه سبب ڳچ عرصي تائين فلم انڊسٽري ۾ راڄ ڪندي رهي پر شادي کانپوءِ وزن وڌن شروع ٿي ويو جنهن ان جي مڙس کي پريشاني ۾ مبتلا ڪري ڇڏيو ڀارتي ميڊيا مطابق بالي ووڊ اداڪاره راني مکرجي جو شادي کانپوءِ وزن تيزي سان وڌڻ شروع ٿي ويو جنهن سبب هوءَ پاڻ به پريشان آهي پر ان جي پريسان ۾ ان وقت وڌيڪ اضافو ٿي ويو جڏهن ان جي مڙس نه صرف ان کي ٽوڪڻ شروع ڪري ڇڏيو پر وزن گهٽ ڪرڻ جو چئلينج به ڏئي ڇڏيو راني به مڙس جي چئلينج کي قبول ڪندي پنهنجو وزن گهٽ ڪرڻ جو پڪو پهه ڪري ورتو ۽ ان لاءِ هن يورپ جي هڪ خصوصي جم جي چونڊ ڪئي جتي هوءَ ڪلاس وٺي رهي آهي.

 

ڀارتي نه پاڪستاني فلمن ۾ ڪم ڪري خوشي ٿيندي: ناديه حسن

ڪراچي(اسپورٽس نيوز) هڪ ڊگهي وقت کانپوءِ پاڪستان ۾ فلمن جي شروعات ٿي آهي،خوشي جي ڳالهه اها ته اهي ماڻهو جيڪي رڳو ٽي وي تي پروگرام ڪندا هئا انهن پاڪستان ۾ فلم انڊسٽري جي بحاليءَ ۾وڏو اهم ڪردار ادا ڪيو آهي ۽ انهن جي ئي ڪوششن سان اڄ اسان جي ملڪ ۾ سٺيون ۽ معياري فلمون ٺهي رهيون آهن، اهو ان ڳالهه جو ثبوت آهي ته جلد ئي پاڪستان ۾ بهترين ۽ معياري فلمون ٺهنديون، اسان جي فنڪارن کي ڀارتي فلمن ۾ ڪرڻ بدران پاڪستاني فلمن ۾ ڪم ڪري ان کي پروموٽ ڪرڻ گهرجي. اها ڳالهه پاڪستان جي مقبول ماڊل ۽  ٽي وي اداڪارا ناديه حسن پنهنجي ٽي وي تي ڏنل هڪ انٽرويو ۾ ڪئي.هن چيو ته مون کي ڀارتي نه پر پاڪستاني فلمن ۾ ڪم ڪري سٺو لڳندو ۽ خوشي ٿيندي، ڇو ته هن وقت جڏهن ته پاڪستان ۾ فلم انڊسٽري پنهنجا پير ڄمائي رهي آهي اسان کي ان جي ڀرپور سپورٽ ڪرڻ گهرجي. هن چيوته مون کي جيڪڏهن ڪو سٺو ڪردار يا پروجيڪٽ مليو ته مان فلم ۾ ضرور ڪم ڪندس.

 

اسان جي فيلڊنگ ڪنهن دوا سان نه پر محنت سان ٺيڪ ٿيندي: محمد حفيظ

لاهور(اسپورٽس نيوز) قومي ڪرڪيٽ ٽيم جي آل رائونڊر محمد حفيظ چيو آهي ته هينئر ٽيم جو مسئلو نمبرز نه پر آءِ سي سي رينڪنگ آهي جنهن کي بهتر ڪرڻ جي ضرورت آهي جڏهن ته رانديگرن جي فيلڊنگ ڪنهن دوا سان نه پر محنت ڪرڻ سان ٺيڪ ٿيندي، لاهور ۾ ميڊيا سان ڳالهائيندي محمد حفيظ چيو ته بالنگ ايڪشن کي آءِ سي سي جي قانونن مطابق بڻائڻ جي ڀرپور ڪوشش ڪري رهيو آهيان ۽ ايندڙ ڪجهه ڏينهن ۾ ٿيندڙ ٽيسٽ عوام جي دعائن سان ڪليئر ڪري وٺندس جڏهن ته بالنگ ۾ ڪا نئين شئي سکر ڻ جي ڪوشش ناهي ڪئي، بالنگ جيئن اڳ هئي هاڻ به اهائي آهي ۽ ڪڏهن دوسرا، تيسرا يا ڇوٿا جي پريڪٽس ناهي ڪئي، هن چيو ته گذريل ڪجهه عرصي ۾ قومي ٽيم جي رانديگرن پنهنجي راند کي بهتر ڪيو ۽ بنگلاديش دوري ۾ ٽيم اتحاد سان گڏ بهتر نتيجا ڏيندي فيلڊنگ ۽ بالنگ ۾ بهتري لاءِ نوجوان رانديگرن سان گڏ محنت ڪري رهيو آهيان جڏهن ته مارڪيٽ ۾ ڪابه اهڙي دوا ناهي جيڪا پليئرز کي کارايون ۽ انهن جي فيلڊنگ ٺيڪ ٿي وڃي.

 

صهيب مقصود فٽنيس مسئلن جي ڪري بنگلاديش خلاف سيريز مان ٻاهر

لاهور(اسپورٽس نيوز) صهيب مقصود هٿ ۾ فريڪچر سبب بنگلاديش خلاف سيريز مان ٻاهر ٿي ويو آهي پاڪستان ڪرڪيٽ بورڊ جي جاري ڪيل بيان مطابق بنگلاديش جي دوري لاءِ جاري پريڪٽس ڪيمپ دوران قومي ٽيم جي مڊل بيٽسمين صهيب مقصود جي کاٻي هٿ ۾ فريڪچر جي نشاندهي ٿي جنهن کانپوءِ هو بنگلاديش خلاف سيريز مان ٻاهر ٿي ويو آهي ان جي جاءِ تي سعد نسيم کي قومي اسڪواڊ ۾ شامل ڪيو ويو آهي.