تازيون خبرون

Daily Archives: April 8, 2015

يمن فوج موڪلڻ بدران پاڪستان ٽياڪڙي ڪري: مخالف ڌر جو مطالبو

اسلام آباد (بيورو) يمن ۾ گهرو ويڙهه بابت پارليامينٽ جي گڏيل اجلاس ۾ مخالف ڌر جماعتن، يمن فوج موڪلڻ بدران پاڪستان کي ٽياڪڙي جو ڪردار ڪرڻ جو مطالبو ڪيو آهي. اسپيڪر اياز صادق جي صدارت هيٺ پارليامينٽ جو گڏيل اجلاس ٿيو. اپوزيشن ليڊر خورشيد شاهه چيو ته يمن جي صورتحال تي حڪومتي رويو بهتر آهي، ترڪي ۽ پاڪستان کي گڏجي رستو ڪڍڻ گهـُرجي. خورشيد شاهه چيو ته پوائنٽ اسڪورنگ نه ڪرڻ گهرجي، معاملو حساس آهي ته سمورين جماعتن جي سربراهن کي بند ڪمري واري اجلاس ۾ اعتماد ۾ ورتو وڃي. نيشنل پيپلز جي سينيٽر مير حاصل بزنجو اجلاس ۾ خيالن جو اظهار ڪندي چيو ته يمن جي گهرو ويڙهه ۾ پاڪستان جو ڪهڙو ڪردار هئڻ گهرجي، جيڪو ڪجهه ٿي رهيو آهي ان کي وچ اوڀر جي تناظر ۾ ورتو وڃي. حاصل بزنجو جو چوڻ هو ته هـُو مسلمان جي حيثيت سان سعودي عرب ۽ مقدس جاين جو احترام  ڪن ٿا، عرب اسپرنگ کانپوءِ خطي جي سياست بدلجي رهي آهي اهو ئي سبب آهي جو اڄ آمريڪا ۽ اسرائيل علائقائي معاملن تي هڪ صف تي ناهن. جماعت اسلامي جي امير سراج الحق چيو ته استعماري قوتن عرب ليگ کي ٽڪڙا ٽڪڙا ڪيو، شام، عراق ۽ ليبيا ۾ قوميت جي بنياد تي باهه ڀڙڪائي وئي اڄ اهي ملڪ دنيا ۾ تماشو بڻجي ويا آهن هاڻي يمن ۾ هڪ ٻيو تڪرار اٿاريو ويو آهي. سراج الحق چيو ته هـُو يمن ۾ ٿيندڙ جنگ کي به گريٽ گيم جو حصو سمجهن ٿا. هن چيو ته يمن جي جنگ ۾ ڪاميابي به خسارو آهي، ان جو فائدو رڳو هٿيار وڪڻندڙن کي ٿيندو، ان ڪري پاڪستان کي هن وقت جنگ جو حصو بڻجڻ بدران حل ڪرڻ ڏانهن وڌڻ گهرجي. سراج الحق چيو ته پاڪستان جي سعودي عرب، ايران ۽ چين سان دوستي اها آهي ته اهو ٽياڪڙي جو ڪردار ادا ڪري. عوامي نيشنل پارٽي جي غلام احمد بلور چيو ته سعودي عرب هميشه پاڪستان جي مدد ڪئي آهي جنهن تي هـُو انهن جا ٿورائتا آهن. هن چيو ته ملڪ ۾ هن وقت ڪا فرقيواراڻو جهيڙو ناهي پر جيڪڏهن هن جنگ ۾ حصو ورتو ويو ته پوءِ ملڪ ۾ جنگ ٿيندي، ان ڪري پاڪستان کي مسئلي جي پـُرامن حل ڏانهن وڌڻ گهرجي. قاف ليگ جي مشاهد حسين سيد چيو ته ائٽمي ڌماڪن ۾ سعودي عرب پاڪستان جي سڀ کان وڌيڪ مدد ڪئي هئي. هن چيو ته يمن ۾ ٿيندڙ جنگ مان سعودي زمين کي ڪو به خطرو ناهي، پاڪستان کي جنگ بندي ۽ يمن ۾ امن قائم ڪرڻ جي ڪوشش ڪرڻ گهرجي. مشاهد حسين سيد تجويز ڏني ته پاڪستان يا ترڪي کي سعودي عرب ۽ ايران جي پرڏيهي وزيرن سان ملاقات ڪري تڪرار ختم ڪرائڻ ۾ ڪردار ادا ڪرڻ گهـُرجي. پ پ سينيٽر فرحت الله بابر چيو ته پاڪستان يمن جنگ جو حصو بڻجڻ بدران مسئلي جي پـُرامن حل لاءِ ڪردار ادا ڪرڻ گهرجي. فرحت الله بابر چيو ته حملو سعودي عرب تي نه پر يمن تي ٿيو آهي، يمن جي صورتحال تي اِن ڪيمرا اجلاس گهـُرايو وڃي. هن وڌيڪ چيو ته پي ٽي آءِ جي ايوان ۾ واپسي جمهوريت جي فتح آهي، گذريل ڏينهن ايوان ۾ باهه ڏيڻ جي ڪوشش ڪئي وئي. فرحت الله بابر چيو ته پي ٽي آءِ خلاف انتهائي خراب زبان استعمال ڪئي وئي، حڪومت کي ماضي مان سبق سکڻ گهرجي.

 

يمن معاملي تي ايران پنهنجي پاليسي تي غور ڪري: نواز شريف

اسلام آباد (بيورو) وزيراعظم نواز شريف چيو آهي ته يمن جــَي معاملي تي ايران کي پنهنجي پاليسي تي غور ڪرڻ گهــُرجي، هــِي مسئلو حساس آهي ان سلسلي ۾ احتياط کان ڪم وٺڻ تمام ضروري آهي. پارليامينٽ جي گڏيل اجلاس کي خطاب ڪنديَ وزيراعظم چيو ته حڪومت ڪنهن قسم جي مينڊيٽ لاءِ نه پر صلاح مشوري لاءِ پارليامينٽ جو گڏيل اجلاس گهـُرايو آهي. هن چيو ته ڪنهن ڳالهه نه پيو لڪايو وڃي، گذريل ڏينهن ان حوالي سان بچاءَ واري وزير خواجا آصف مڪمل وضاحت ڪري ڇڏي هئي. نواز شريف چيو ته هن وقت پارليامينٽ جي ڪارروائي کي سڄي دنيا ڏسي ۽ ٻــُڌي رهي آهي انڪري کين احتياط کان ڪم. وٺڻ گهـُرجي. وزيراعظم چيو ته هنن يمن جي صورتحال کي بهتر بڻائڻ لاءِ ترڪي سان ڳالهايو آهي پر هـُو ترڪ اختيارين جي جواب جو انتظار ڪري رهيا آهن. هن چيو ته ترڪي جي صدر رجب طيب اردگان سعودي عرب جي گهرو وزير سان ملاقات ڪئي آهي ان کانپوءِ هـُو اڄ ايران پهچي رهيو آهي جتي هـُو صدر حسن روحاني سان ملاقات ڪندو ڇو ته يمن جي معاملي تي ايران کي به پنهنجي پاليسي تي غور ڪرڻ گهرجي. وزيراعظم چيو ته سعودي عرب جي جغرافيائي خودمختياري تي حملو ٿيو ته هـُو گڏجي جنگ وڙهندا پر هن وقت تائين ان جو ڪو خدشو ناهي پر ان باوجود سعودي عرب جنهن قسم جو سهڪار گهـُريو آهي ان سلسلي ۾ پارليامينٽ حڪومت کي پنهنجو قيمتي مشورو ڏئي جنهن تي نيڪ نيتي سان عمل ڪيو ويندو.

 

ايوان اندر پي ٽي آءِ خلاف جملي بازي افسوسناڪ آهي، اسيمبلي کي جعلي چوڻ عمران خان جو ٻٽو معيار آهي:خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته وزيراعظم نواز شريف جي موجودگي ۾ ايوان اندر پي ٽي آءِ خلاف جملي بازي افسوسناڪ آهي جڏهن ته پارليامينٽ ۾ اچي اسيمبلي کي جعلي چوڻ عمران خان جو ٻٽو معيار آهي. اسلام آباد ۾ ميڊيا سان ڳالهائيندي خورشيد شاهه چيو ته حڪومت کي پارليامينٽ احسن انداز ۾ هلائڻي آهي. هن چيو ته گذريل ڏينهن پارليامينٽ جي گڏيل اجلاس ۾ وزيراعظم جي موجودگي ۾ تحريڪ انصاف خلاف ڳالهايو ويو پر پارليامينٽ ۾ اچي اسيمبلي کي جعلي چوڻ عمران خان جو به ٻٽو معيار آهي. خورشيد شاهه چيو ته عمران خان کي هاڻي اهڙيون ڳالهيون نه ڪرڻ کپن، هـُو چاهين ٿا ته نظام هلندو رهي نه ته جمهوريت  هٿن مان نڪري ويندي. اپوزيشن ليڊر چيو ته سندن اتحاد ۾ تحريڪ انصاف جون مخالف جماعتون آهن ان لاءِ پي ٽي آءِ کي اپوزيشن اتحاد ۾ شامل ڪرڻ ممڪن ناهي.

 

جيڪڏهن مزدورن کي مقرر ٿيل اجرت ادا نه پئي ٿئي ته پوءِ قانون ئي تبديل ڪيو ويندو: سپريم ڪورٽ

اسلام آباد (بيورو) سپريم ڪورٽ وفاق ۽ چئني صوبن کان گهٽ ۾ گهٽ اجرت جي قانون تي عملدرآمد بابت رپورٽ طلب ڪندي چيو ته جيڪڏهن مزدورن کي مقرر ٿيل اجرت ادا نه پئي ٿئي ته پوءِ قانون ئي تبديل ڪيو ويندو اڱاري تي جسٽس عظمت سعيد جي سربراهي ۾ ٻه رڪني بئنچ گهٽ ۾ گهٽ اجرت جي قانون تي عملدرآمد بابت ڪيس جي ٻڌڻي ڪئي جسٽس عظمت سعيد چيو ته مقرر اجرت جي ادائيگي حڪومتن جي ذميواري آهي معائنو ڪندڙ ليبر انسپيڪٽر ڀتو وٺي واپس وڃن ٿا هن چيو ته جيڪڏهن مزدورن کي مقرر اجرت ادا نه پئي ٿئي ته پوءِ قانون تبديل ڪئي وڃي سپريم ڪورٽ گهٽ ۾ گهٽ اجرت جي قانون تي عملدرآمد بابت اجرت جي حوالي سان شڪايتن جو رڪارڊ طلب ڪندي ٻڌني ٽن هفتن لاءِ ملتوي ڪري ڇڏي.

 

اسپيڪر پاران شهريار مهر تي پابندي لاڳو، اپوزيشن جو احتجاج

ڪراچي (اسٽاف رپورٽر) سنڌ اسيمبلي جي اجلاس ۾ اسپيڪر ۽ مخالف ڌر جي اڳواڻ وچ ۾ آئين جون ڪاپيون ڦاڙڻ واريَ معاملي تان سخت جملن جي ڏي وٺ ٿي، جڏهن ته ايوان شهريار مهر خلاف مذمتي ٺهراءُ منظور ڪري ورتو، ٺهراءَ تي تقرير دوران اپوزيشن ميمبرن سخت احتجاج ڪيو. سنڌ اسيمبلي جو اجلاس اسپيڪر آغا سراج دراني جي صدارت هيٺ شروع ٿيو. اجلاس ۾ اسپيڪر آغا سراج ۽ اپوزيشن ليڊر شهريار مهر وچ ۾ آئين جون ڪاپيون ڦاڙڻ واريَ معاملي تان سخت جملن جي ڏي  وٺ ٿي. ان موقعي تي اپوزيشن جي احتجاج واري معاملي تي ايوان ۾ گوڙ پيدا ٿي ويو جڏهن ته فنڪشنل ليگ ۽ پيپلز پارٽي ميمبرن ۾ جملي بازي پڻ ٿي. آغا سراج دراني چيو ته گذريل ڏينهن ايوان ۾ آئين جون ڪاپيون ڦاڙيون ويون، جيڪو شرمناڪ عمل آهي، کيس سڄي دنيا مان فون آيا ته تاريخي ايوان ۾ شرمناڪ واقعو ٿيو آهي. اسپيڪر چيو ته اسيمبلي جا قاعده هـُن نه پر ايوان ٺاهيا آهن، آئين جون ڪاپيون ڦاڙڻ گناهه آهي اپوزيشن معافي وٺي. ان موقعي تي اپوزيشن ليڊر شهريار مهر معافي وٺڻ کان انڪار ڪندي چيو ته معافي اهي وٺن جيڪي آئين تي عمل نه ٿا ڪن. اپوزيشن ليڊر الزام ته ايوان کي قاعدن ۽ ضابطن موجب نه ٿو هلايو وڃي، جنهن تي اسپيڪر چيو ته هــُو رولز تي عمل نه ٿا ڪن سندن خلاف بي اعتمادي وار رٿ آندي وڃي. پيپلز پارٽي جي ميمبر ڊاڪٽر سڪندر شوري اپوزيشن ليڊر شهريار مهر خلاف مذمتي ٺهراءُ پيش ڪيو جيڪو ايوان منظور ڪري ورتو. ڊاڪٽر سڪندر شوري چيو ته اسيمبلي جو رولرز آف پروسيجر ڦاڙڻ جمهوريت تي عدم اعتماد آهي، اپوزيشن ليڊر پنهنجي حرڪت تي معافي وٺي. هن چيو ته اسپيڪر پنهنجا اختيار استعمال ڪندي شهريار مهر تي پابندي لڳائي جنهن دوران اپوزيشن ميمبرن سخت احتجاج پڻ ڪيو. اجلاس دوران صوبائي وزير مراد علي شاهه ۽ اپوزيشن ليڊر شهريار مهر وچ ۾ پڻ سخت جملن جي ڏي وٺ ٿي جنهن بعد ايوان ۾ گوڙ پيدا ٿي ويو. شهريار مهر جي احتجاج تي ڊپٽي اسپيڪر شهلا رضا اپوزيشن ليڊر کي پٽ چئي ڇڏيو، جنهن تي شهريار مهر جواب ڏنو ته جــِي، امي جي ٺيڪ آهي. ڊپٽي اسپيڪر اجلاس ٻئي ڏينهن به دلچسپ جملن جو استعمال ڪيو، سندس چوڻ هو ته جيڪڏهن ميمبر اهڙي ريت بحث ۾ منجهي پون ته هنن ۽ ميڊيا جي هڪ ڪلاڪ واري پروگرام ۾ ڪهڙو فرق رهجي ويندو؟ شهر رضا چيو ته ميڊيا کي گذريل ڏينهن نظر نه آيو ته هتي قانون سازي ٿي رهي آهي، ميڊيا رڳو گوڙ ڏيکاريو، ميڊيا وارا سٺن ماڻهن کي ڪوريج لاءِ موڪلين. ايوان ۾ اقليتن جي عبادتگاهن لاءِ فنڊ رکڻ وارو ٺهراءُ ايم ڪيو ايم جي ديوان چند چاولا پيش ڪيو جيڪو منظور ڪيو ويو. صوبائي وزير ڊاڪٽر سڪندر مينڌري چيو ته اقليتن جي عبادتگاهن لاءِ فنڊ رکيا ويا آهن، اقليتن جي عبادتگاهن جي ايراضي تي قبضو ڪندڙن خلاف ڪارروائي ڪئي ويندي. اقليتي عباتگاهن جي حفاظت لاءِ پوليس ۾ اقليتي ماڻهن جي ڀرتي جو انگ وڌائڻ لاءِ نندڪمار قرارداد پيش ڪئي جيڪا پڻ ايوان منظور ڪري ورتي. نندڪمار جو چوڻ آهي ته وڏي وزير جي هدايت موجب 2 هزار بدران پنج هزار اقليتي ماڻهو پوليس ۾ ڀرتي ڪيا وڃن. ڊگهين عمارتن جي هر فلور تي هنگامي رستا ٺاهڻ وارو ٺهراءُ پ پ جي نصرت سلطانا پيش ڪيو. نصرت سلطانا چيو ته نين عمارتن جي نقشا منظور ڪرڻ دوران هنگامي رستن جي پابندي ڪرائي وڃي، ايوان اها قرارداد به منظور ڪري ورتي. سوالن جوابن جي وقفي دوران اسيمبلي ۾ لاڳاپيل آفيسرن جي غير موجودگي تي هير سوهو احتجاج ڪيو. هير سوهو چيو ته تعليم کاتي جو سيڪريٽري گيلري ۾ موجود ناهن جنهن تي تعليم واري وزير نثار کهڙي چيو ته تعليم کاتي جا لاڳاپيل آفيسر ايوان ۾ موجود آهن. نثار کهڙي چيو ته پير مظهر الحق جي دور ۾ ڀرتي ڪيل 13 هزار استاد تعليم کاتي جو حصو ناهن، اهي آساميون خالي سمجهيون وڃن، 18 ضلعن ۾ اين ٽي ايس ٽيچرز کي پگهارون جاري ڪرڻ جو حڪم ڏنو ويو آهي. اپوزيشن ميمبر نصرت سحر عباسي مطالبو ڪيو ته جن آفيسرن غير ضروري ڀرتيون ڪيون حڪومت انهن خلاف ڪارروائي ڪري. هڪ سوال جي جواب ۾ نثار کهڙي جو چوڻ هو ته سنڌ ۾ نيون ڀرتيون اين ٽي ايس ذريعي ٿينديون، هن وقت تائين اين ٽي ايس ذريعي جيترا به استاد ڀرتي ٿيا انهن کي پگهارون جاري ڪيون ويون. تعليم واري وزير نثار کهڙي چيو ته صوبي ۾ ليڪچررس جي کوٽ جلد پوري ڪئي ويندي ۽ ميرٽ تي ليڪچرر ڀرتي ڪيا ويندا.

 

پاڪستان جي پهرين ترجيح يمن معاملي تي ٽياڪڙي ڪرڻ آهي: خواجه آصف

اسلام آباد (بيورو) بچاءَ واري وزير خواجه آصف چيو آهي ته پاڪستان جي پهرين ترجيح يمن معاملي تي ٽياڪڙي ڪرڻ آهي، پارليامينٽ جيڪو به فيصلو ڪيو حڪومت ان تي ئي عمل ڪندي. پارليامينٽ هائوس ٻاهران ميڊيا سان ڳالهائيندي خواجه آصف چيو ته فوج جي به اهائي ترجيح آهي ته يمن معاملي تي ٽياڪڙي ڪئي وڃي. هن چيو ته سعودي عرب جيڪا به مدد گهر معاملو پارليامنٽ ۾ رکيو. بچاءَ واري وزير چيو ته يمن معاملي تي ترڪي سميت ٻين ملڪن سان رابطا جاري آهن. هن چيو ته سعودي  عرب جي علائقائي سالميت جو معاملو پراڻو آهي. خواجه آصف جو چوڻ هو ته هن عمران خان ۽ سندس پارٽي خلاف ايوان ۾ ڪو به غير پارلياماني لفظ نه ڳالهايو آهي.

 

يمن ۾ چڪريون ۽ عرب اتحادي فوجن جي بمباري، 100 کان وڌيڪ باغي مارجي ويا ، ڪيترائي زخمي

صنعا (اين اين آءِ) يمن جي مختلف شهرن ۾ چڪرين ۽ عرب اتحادي فوج جي بمباري ۾ هڪ سئو کان وڌيڪ باغي مارجي ويا ۽ ڪيترائي زخمي ٿي پيا آهن. پرڏيهي ميڊيا مطابق يمن جي شهر عدن ۾ صدر منصور هادي جي حامين ۽ باغين وچ ۾ چڪرين دوران 46 باغي مارجي ويا شهر ۾ ٻنهي طرفن کان هڪ ٻئي خلاف ڳرا هٿيار استعمال ڪياپ يا وڃن. عدن جي اتر علائقي ۾ چڪري دوران 19 باغي ۽ 15 صدر منصور هادي جا حامي مارجي ويا عالمي امدادي تنظيم ريڊ ڪريسينٽ  هنگامي بنياد تي امدادي سامان عدن پهچائڻ جي اپيل ڪئي آهي. ٻئي پاسي صوبي ابيان ۾ اڳوڻي صدر علي عبدالله صالح جي حامين جي قبضي هيٺ ملٽري بيس جو ڪنٽرول صدر هادي جي حامين حاصل ڪري ورتو آهي. ٻطرفو فائرنگ جي ڏي وٺ ۾ 7 باغي مارجي ويا هوڏانهن سعودي اتحادي فوج الااتاد ايئر بيس ۽ ملٽري ڪمئپ تي بمباري ڪئي جنهن ۾ 10 باغي مارجي ويا ۽ ڪيترائي ٻيا فرار ٿي ويا. اتحادي فوج صوبي شبوا ۾ به باغين جي ٺڪاڻن کي نشانو بڻايو جنهن ۾ پنج باغي به مارجي ويا.

 

جج صاحب حڪومت جي ڪمن ۾ اسٽي آرڊر ڏيڻ کان پاسو ڪن: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ عدالتن ۽ جج صاحبن   کي استدعا ڪئي آهي ته هو حڪومت جي ڪمن ۾ اسٽي آرڊر ڏيڻ کان پاسو ڪن. سپريم ڪورٽ جي فلاحي ۽ رفاحي پلاٽن، راندين جي ميدانن، گرين بيلٽس ۽ پارڪن تي ڪنهن به قسم جي حددخليون نه هجن ۽ انهن زمينن جي قانوني حيثيت کي ڪوبه تبديل نٿو ڪري سگهي واري واضح فيصلن کان پوءِ ماتحت عدالتن پاران ان جي برخلاف اسٽي آرڊر افسوس جوڳا آهن. ماضي ۾ تعليمي ادارن، اسپتالن ۽ ٻين رفاحي  ڪمن جي نالن تي سرڪار کان زمينون وٺندڙن هاڻ ان کي ڪاروبار جو ذريعو بڻائي ڇڏيو آهي، جنهن کي ڪنهن به صورت نه ٿيڻ ڏنو ويندو. پوري صوبي ۾ سرڪاري زمينن ۽ ملڪيتن جو ناجائز ۽ غيرقانوني استعمال روڪڻ جي مهم کي ان وقت تائين روڪيو ويندو، جيستائين هڪ هڪ انچ زمين حقيقي طور تي جنهن استعمال لاءِ ورتي وئي آهي ان تي ان جو استعمال شروع نه ٿو ڪيو وڃي. اهڙن خيالن جو اظهار هن اڱاري ڏينهن ضلعي ايسٽ ۾ گلشن چورنگي تي قائم ”پي اي ايس ايس پي“ نالي غيرقانوني شادي هال کي مسمار ۽ بعد ۾ سر سيد يونيورسٽي جي تحت عليڳڙهه يونيورسٽي سان گڏ قائم ٻن غيرقانوني شادي هالن کي سيل ڪرڻ کان پوءِ ميڊيا سان ڳالهائيندي ڪيو. ان موقعي تي سنڌ اسيمبلي جي ميمبر امداد پتافي ۽ ڊاڪٽر سڪندر شورو، ايڊمنسٽريٽر ڪراچي ثاقب سومرو، ميٽروپوليٽن ڪمشنر ڪراچي مسعود عالم، ايڊمنسٽريٽر ايسٽ سيد صلاح الدين، ڊي سي ايسٽ ۽ ٻيا اعليٰ آفيسر به موجود هئا. ان موقعي تي هن گلشن چورنگي تي ئي قائم النساءَ هال جي انتظاميه کي به هدايت ڪئي ته اتي عورتن جي نالي تي ورتل زمين تي جيڪڏهن هاڻ ڪابه شادي جي تقريب يا ٻئي ڪنهن به ڪمرشل پروگرام جو بندوبست ڪيو ويو ته ان هال کي به سيل ڪيو ويندو. ميڊيا سان ڳالهائيندي شرجيل انعام ميمڻ چيو ته اسان قبضن خلاف مهم جو صوبي ۾ جيڪو آغاز ڪيو آهي ان کي پنهنجي منطقي انجام تائين پهچائي ساهه پٽينداسين. هن چيو ته مونکي افسوس آهي ته گذريل ڏينهن اسان ڊسٽرڪٽ سينٽرل ۾ رستي جي وچ ۾ موجود گرين بيلٽ تي قائم ٻن غيرملڪي ريسٽورينٽ پيزا هٽ ۽ برگر ڪنگ ۽ هڪ مٺائي جي دڪان دلپسند سوئيٽ کي سيل ڪيو هو، جنهن تي هاءِ ڪورٽ پاران ان ضلعي جي ايڊمنسٽريٽر خلاف توهين عدالت جو نوٽيس ڏنو ويو ۽ ناظر جي مدد سان ان سيل کي به کوليو ويو. هن چيو ته آئون ميڊيا جي ذريعي سان معزز عدليه ۽ جج صاحبن کي گذارش ڪريان ٿو ته هو سپريم ڪورٽ جي واضح حڪمن کان پوءِ حڪومتي معاملن ۾ اسٽي آرڊر ڏيڻ کان پاسو ڪن. هن چيو ته جيڪڏهن اهو سلسلو بند نه ٿيو ته ڪابه حڪومت انهن غيرقانوني سرگرمين کي روڪڻ ۾ ڪنهن صورت ڪامياب نه ٿي سگهندي. هن چيو ته اسان زمينن جي غلط الاٽمينٽ ۽ انهن تي تجارتي غيرقانوني سرگرمين سرگرمين ۽ پنهنجن اختيارن کي اورانگهڻ سبب ڪيترن ئي سرڪاري آفيسرن کي معطل ڪيو آهي ۽ اسان چاهيون ٿا ته هن شهر ۽ صوبي مان سمورن غيرقانوني ڪمن جو خاتمو ڪيو وڃي. هن چيو ته جيڪڏهن رفاحي ۽ فلاحي زمينن، پارڪن ۽ راندين جي ميدانن ۾ شادي هالن جي اجازت ڏيڻ هجي ها ته پاڻ ڪي ايم سي اهو ڪم ڇو نه ڪري ۽ اڄ ڪي ايم سي هن صوبي ۾ سڀ کان وڌيڪ آمدني جو ذريعو ڇو نه بڻجي وڃي. هڪ سوال جي جواب ۾ هن چيو ته آئون عوام کي به گذارش ڪريان ٿو ته هو شادي هالن جي بڪنگ کان اڳ ان ڳالهه کي يقيني بڻائين ته جيڪي شادي هال هو بڪ ڪرائي رهيا آهن اهي غيرقانوني ته ناهن ۽ ان سلسلي ۾ جلد ئي اسان پوري شهر جي سمورن قانوني شادي هالن جي لسٽ کي ڪي ايم سي جي ويب سائيٽ تي به عوام لاءِ رکي رهيا آهيون. هن چيو ته جن جن شادي هالن کي ٽوڙيو ويو ۽ انهن جي مالڪن پاران جيڪڏهن بڪنگ ڪرائيندڙن کي ادائيگي نه پئي ڪئي وڃي ته هو لاڳاپيل ضلعي جي ڊي سي ۽ ٿاڻي ۾ انهن خلاف ڪيس داخل ڪرائي سگهن ٿا. هڪ ٻي سوال جي جواب ۾ شرجيل انعام ميمڻ چيو ته عليڳڙهه يونيورسٽي ۾ جيڪي به شادي هال قائم ڪيا ويا آهن انهن مان هڪ پاران هال هلائيندڙ عليڳڙهه يونيورسٽي کي ماهوار 1 لک 30 هزار رپيا عطيو ڏيڻ جي دعويٰ ڪري ٿو ته ٻئي طرف ان جي معاهدي ۾ واضح آهي ته اهو مسواڙ جي مد ۾ وصول ڪيو پيو وڃي. جڏهن ته اها زمين يونيورسٽي لاءِ حاصل ڪئي وئي، جنهن تي اسان ان جو سمورو ريڪارڊ ضبط ڪري ورتو آهي ۽ هالز کي سيل ڪري ڇڏيو آهي ۽ ان سلسلي ۾ سمورن قانوني تقاضا ئون پوريون ڪندي ان خلاف ڪارروائي ڪئي ويندي. ان موقعي تي هن چيو ته هن مهم کي عوام پاران ڀرپور پذيرائي ملي آهي ۽ عوامي حلقن ۾ به ان کي ساراهيو ويو آهي. هن چيو ته اها ڳالهه هڪ ڀيرو ٻيهر واضح ڪرڻ چاهيان ٿو ته اها ڪارروائي ڪنهن خلاف نه بلڪ قبضا ۽ لينڊ مافيا خلاف آهي ۽ اها ڪارروائي آخري دم تائين جاري رکي ويندي ۽ ان سلسلي ۾ نه هو پاڻ ڪنهن جي دٻاءُ ۾ ايندو ۽ نه ئي آفيسرن کي دٻاءُ قبول ڪرڻو ڏنو ويندو. هن چيو ته سمورن خانگي زمينن تي قائم شادي هال مالڪن کي به خبردار ڪريان ٿو ته هو پنهنجا شادي هال قانوني طور تي رجسٽرڊ ڪرائين ۽ اين او سي حاصل ڪن ٻي صورت ۾ سندن شادي هال به ٽوڙيا ويندا.

 

سنڌ اسيمبلي جي اسپيڪر پي ٽي آءِ ميمبرن جي استعيفائن جي منظوري بابت وضاحت پيش ڪري ڇڏي

ڪراچي (اسٽآف رپورٽر) اسپيڪر سنڌ اسيمبلي آغا سراج دراني ڪالهه اڱاري ڏينهن آخرڪار سنڌ اسيمبلي ۾ پاڪستان تحريڪ انصاف جي 4 ميمبرن جي استعيفائن بابت پنهنجي اعلان جي وضاحت پيش ڪري ڇڏي ۽ چيو ته منهنجي اعلان جي باوجود اهي استعيفائون اليڪشن ڪميشن کي نه موڪليون ويون هنيون. اسپيڪر اها وضاحت ايم ڪيو  ايم جي پارلياماني ليڊر سيد سردار احمد جي اعتراض واري نقطي تي ڏني. سيد سردار احمد آئين ۽ اسيمبلي جي قاعدن جو حوالو ڏيندي چيو ته پي ٽي آءِ جي 4 ميمبرن جون استعيفائون منظور ٿي چڪيون آهن ۽ اسپيڪر ان جو اعلان به ڪري چڪو آهي، جنهن تي اسپيڪر آغا سراج دراني اعتراف ڪندي چيو ته مان پي ٽي آءِ جي ميمبرن جي استعيفائن جي منظور ٿيڻ جو اعلان ڪيو هو ۽ چيو ته منهنجي اعلان جي باوجود سيڪريٽري سنڌ اسيمبلي اهو نوٽ لکيو هو ته ميمبر ذاتي ٻڌڻي جو موقعو چاهين ٿا، مان انهن ميمبرن کي گهرايو ۽ انهن درخواست ڪئي ته انهن جون استعيفائون منظور نه ڪيون وڃن.

 

چڪوال ۾ روڊ حادثو، 5 ڄڻا مارجي ويا

لاهور (بيورو) پنجاب جي شهر چڪوال ۾ روڊ حادثي جي نتيجي ۾ پنج ڄڻا فوت ٿي ويا جڏهن ته جهنگ ۾ آئل ٽنڪر کي باهه لڳڻ سبب  هڪ ڄڻو حياتي وڃائي ويٺو. چڪوال جي علائقي ڪلر ڪهار ۾ موٽر وي تي حادثو پيش آيو جنهن سبب ٻن عورتن سميت 5 ڄڻا ٿڏي تي ئي فوت ٿي ويا. پوليس موجب،موٽر وي تي ٽرالر جو وين سان ٽڪر ٿي پيو جڏهن ته فوتين ۾ ٻه عورتون پڻ شامل آهن. پوليس موجب حادثي جي نتيجي ۾ ڪيترائي ماڻهو زخمي ٿي پيا آهن جن کي اسپتال منتقل ڪيو ويو آهي. هوڏانهن جهنگ ۾ڊائنا موڙ وٽ آئل ٽينڪر کي باهه لڳڻ جي نتيجي ۾ هڪ ڄڻو سڙي فوت ٿي ويو ۽ هڪ ڄڻو زخمي ٿي پيو.