تازيون خبرون

Daily Archives: April 7, 2015

سعودي عرب جي سالميت کي خطرو ٿيو ته پاڪستان سخت رد عمل ظاهر ڪندو: خواجه آصف

اسلام آباد (بيورو) بچاءَ واري وزير خواجه آصف چيو آهي ته سعودي عرب جي  علائقائي سالميت کي خطرو ٿيو ته پاڪستان ساڻس گڏ هوندو، جڏهن ته پاڪستان هميشه دهشتگردن سان اڪيلو وڙهيو آهي ساڻن ڏکي وقت ۾ ڪو به ملڪ مدد لاءِ اڳتي نه وڌيو. پارليامنٽ جي گڏيل اجلاس ۾ پاليسي بيان ڏيندي خواجه آصف چيو ته  سعودي جي سالميت کي خطرو ٿيو ته پاڪستان سخت رد عمل ظاهر ڪندو. بچاءَ واري وزير چيو ته 31 مارچ تي پاڪستاني وفد سعودي عرب جو دورو ڪيو جنهن دوران سعودي عرب مدد جي درخواست ڪئي. خوجا آصف چيو ته سعودي عرب ۽ پاڪستان جا ڀائراڻا  لاڳاپا آهن،مسلمان ملڪن جي اتحاد لاءِ سعودي عرب جو موقف واضح آهي. هن چيو ته وزير اعظم مسلمان ملڪن ۾ اتحاد لاءِ مختلف اڳواڻن سان رابطا ڪيا، جڏهن ته 8 مارچ تي ايران جو پرڏيهي وزير پاڪستان اچڻو آهي جيڪا پڻ ان سلسلي جي ڪڙي آهي. بچاءَ واري وزير يچو ته ايران سان يمن معاملي جو پرامن حل ڪڍڻ لاءِ ڳالهيون ٿينديون. خواجا آصف چيو ته نواز شريف پرامن حل لاءِ ترقي جو دورو ڪيو، ۽ ٻنهي ملڪن جو يمن معاملي تي هڪ  جهڙو موقف آهي. بچاءَ واري وزير جو چوڻ هو ته يمن صورتحال تي پاڪستان ٽياڪڙي لاءِ تيار آهي. سندس چوڻ هو ته سعودي عرب ويڙهاڪ ۽ سامونڊي جهاز گهريا آهن جنهن بابت فيصلو نه ٿي سگهيو آهي. هن چيو ته سعودي عرب اميد ظاهر ڪئي آهي ته پاڪستان سندن فوجي مدد ڪندو. خواجا آصف چيو ته يمن حڪومت کي غير مستحڪم ڪرڻ جي هو مذمت ڪن ٿا. هن چيو ته سعودي جي درخواست تي پارليامينٽ جي فيصلي جو احترام ڪبو. سندس چوڻ هو ته عوام ۽ قومي مفاد کي سامهون رکي فيصلو ڪيو ويندو جڏهن ته نواز شريف ماضي ۾ به سمورا فيصلا ملڪي مفادن ۾ ئي ڪيا آهن. هن چيو ته پاڪستان ۽ ترقي کي يمن جي صورتحال تي ڳڻتي آهي ۽ هو چاهين ٿا ته معاملو پر امن نموني ئي حل ٿيڻ گهرجي. بچاءَ واري وزير چيو ته ادارن جو تقدس ۽ احترام  سندن اوليت آهي ،پارليامينٽ کي قومي مسئلن لاءِ استعمال ڪرڻ گهرجي. هن چيو ته پاڪستان جي واحد فوج آهي جيڪا سڌي ريت دهشتگردي خلاف جنگ وڙهي پئي. هن چيو ته پاڪستان جڏهن ڏکئي وقت ۾ اچي ويندو آهي ته ان جي ڪو به مدد ڪرڻ لاءِ تيار نه هوندو آهي. خواجا آصف جو چوڻ هو ته دهشتگردي جي خاتمي تائين سندن جنگ جاري رهندي. هن چيو ته مسلم ملڪ ڳالهين ذريعي يمن  معاملو حل ڪرڻ جا خواهشمند آهن. بچاءَ واري وزير جو چوڻ هو ته پاڪستان مڪمل طور سعودي عرب جي حمايت ڪري ٿو. خواجا آصف چيو ته يمن معاملي تي سڀني جي راءِ وٺڻ لاءِ اجلاس گهرايو ويو جڏهن ته فيصلي وقت وزير اعظم نواز شريف موجود هوندو. هن چيو ته پي ٽي آءِ جي اسيمبلين ۾ واپسي جمهوريت جي ڪاميابي آهي. سندس چوڻ هو ته هو سڀ يمن صورتحال کان آگاهه آهن جڏهن ته ڪو به فيصلو قومي مفاد کي نظر ۾ رکي ڪيو ويندو. هن چيو ته 503پاڪستانين کي ڏيهه واپس آندو ويو آهي ۽ وڌيڪ ٻين ماڻهن کي به آندو ويندو. وفاقي وزير جو چوڻ هو ته يمن سڪيورٽي صورتحال جا پاڪستان تي اثر پوندا. هن چيو ته هو شهرين جي حفاظت سان واپسي تي سعودي جا ٿورائتا آهن.

 

حالتن تي ڪنٽرول ڪرڻ لاءِ فوج گهرائڻ جي ضرورت ناهي:شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته معاملا رستن ۽ ڪنٽينرن تي نه پر ايوانن ۾ ويهي حل ڪبا  آهن. پاڪستان تحريڪ انصاف جي سنڌ اسيمبلي ميمبرن کي اسان سنڌ اسيمبلي ۾ ٻيهر اچڻ تي ڀليڪار چئون ٿا. چونڊ تڪ اين اي 246 جي ضمني چونڊن جو معاملو پيچيده ٿيندو پيو وڃي ۽ چونڊن لاءِ سڪيورٽي انتظامن لاءِ وزيراعليٰ سنڌ امن امان جي ادارن سان ڳالهائي حتمي فيصلو ڪندو. سياسي جماعتن جي ڪارڪنن کي صبر جو مظاهرو ڪرڻ گهرجي ۽ ايئن نه ڪيو ويو ته چونڊن کان پوءِ ڳالهين جا دروازا به کليل نه رهندا. اهڙن خيالن جو اظهار هن سومر تي سنڌ اسيمبلي  جي اجلاس کان اڳ ميڊيا سان ڳالهائيندي ڪيو. شرجيل انعام ميمڻ چيو ته اڄ تحريڪ انصاف جا 4 سنڌ اسيمبلي ميمبر اجلاس ۾ شريڪ ٿي رهيا آهن ۽ اسان کين ڀيلڪار چونداسين. هن چيو ته هي ايوان عوامي مفاد جو ايوان آهي ۽ سمورن مسئلا هن ايوان ۾ ويهي ڪري حل ڪري سگهجن ٿا. هن چيو ته مسئلا رستن ۽ ڪنٽينر تي ويهي ڪڏهن به حل نٿا ڪري سگهجن. هن چيو ته صبح جو ڀليل جيڪڏهن شام جو گهر واپس اچي وڃي ته ان کي ڀليل نٿو چئي سگهجي ۽ تحريڪ انصاف جا اسيمبلي ميمبر به ان ئي مثل آهن. هڪ سوال جي جواب ۾ هن چيو ته استعيفائن جي حوالي سان هن کي جيتري معلومات آهي ان جي مطابق انهن جي استعيفيٰ اليڪشن ڪميشن کي نه موڪلي وئي هئي ۽ ان حوالي سان اسپيڪر سنڌ اسيمبلي قانوني حيثت ٻڌائي سگهي ٿو. هڪ ٻي سوال جي جواب ۾ شرجيل انعام ميمڻ چيو ته چونڊ تڪ اين اي 246 جي ضمني چونڊن ۾ امن امان جي صورتحال بابت ڪجهه پيچيدگيون آهن ۽ ان سلسلي ۾ وزيراعليٰ سنڌ جيڪو صوبي جو چيف ايگزيڪيوٽو به آهي ۽ گهرو وزير جو قلمدان به ان وٽ ئي آهي هو ان سلسلي ۾ امن امان جي بحالي جي ادارن سان گڏجي فوج جي مقرري ڪرڻ يا نه ڪرڻ تي ڪو فيصلو ڪندو. هن چيو ته ماضي ۾ ڪيترن تڪن ۾ ننڍيون چونڊون فوج جي نگراني ۾ ڪرايون ويون آهن، پر اسان جي پوليس ۽ رينجرز به معاملن کي ڪنٽرول ڪرڻ جي مڪمل صلاحيت رکي ٿي. هن چيو ته تحريڪ انصاف ۽ ايم ڪيو ايم جي قيادت تي اهو لازم ۽ فرض آهي ته هو پنهنجن پنهنجن ڪارڪنن کي پرامن رهڻ جي تلقين ڪن ۽ هڪ ٻئي کي جاءِ ڏين. هن چيو ته ڪافي ڀيرا چيو آهي ته سياسي جماعتون چونڊن کي چونڊن جي حد تائين محدود رکن ۽ معاملي کي ان حد تائين نه وڌائين جو چونڊن کان پوءِ ڳالهين جا دروازا بند به ٿي وڃن. هن چيو ته آئون سمورن سياسي جماعتن جي ڪارڪنن کي به اپيل ڪندس ته هو هڪ ٻئي کي دشمن تصور نه ڪن ۽ سياسي ڪارڪنن کي صبر جو مظاهرو ڪرڻ گهرجي.

 

وزيراعظم جي صدارت هيٺ اعليٰ سطحي اجلاس، وچ اوڀر جي صورتحال تي ويچاريو ويو

اسلام آباد (بيورو) وزيراعظم نواز شريف جي صدارت هيٺ اعليٰ سطحي اجلسا ٿيو اجلاس ۾ مجموعي ملڪي صورتحال ۽ وچ اوڀر جي صورتحال تي خيالن جي ڏي وٺ ڪئي وئي ذريعن مطابق وزيراعظم نواز شريف جي صدارت هيٺ اعليٰ سطحي اجلاس ٿيو اجلاس ۾ آرمي چيف جنرل راحيل شريف، ايڊمرل ذڪاءَ اشرف ۽ ايئر چيف مارشل سهيل امان شرڪت ڪئي ب چاءُ وارو وزير خواجه آصف، ناڻي وارو وزير اسحاق ڊار ۽ وزيراعظم جو پرڏيهي معاملن بابت صلاحڪار سرتاج عزيز به اجلاس ۾ شريڪ ٿيا، پارليامينٽ جي گڏيل اجلاس ۾ شرڪت کان اڳ اعليٰ سطح جي اجلاس جي صدارت ڪندي وزيراعظم نواز شريف ملڪي مجموعي صورتحال جو جائزو ورتو اجلاس ۾ وچ اوڀر جي صورتحال جو به جائزو ورتو ويو.

 

يمن معاملي تي حڪومت ڪو به رابطو نه ڪيو آهي: خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته يمن معاملي تي حڪومت ساڻن ڪو به رابطو نه ڪيو آهي، پارليامنٽ جو گڏيل اجلاس سندن مطالبي تي ٿي رهيو آهي. پارليامنٽ هائوس ٻاهران ميڊيا سان ڳالهائيندي خورشيد شاهه چيو ته پيپلز پارٽي جي پوري ڪوشش ڪئي ته پي ٽي آءِ جون استعيفائون منظور نه ڪيون وڃن. هن چيو ته جيڪڏهن تحريڪ انصاف وارن جون استعيفائون منظور ڪيون وڃن ها ته اڄ ملڪي منظر نامو تبديل هجي ها. مخالف ڌر جي  اڳواڻ چيو ته پارليامنٽ جي گڏيل اجلاس ۾ يمن معاملي تي سڀني جو موقف سامهون اچڻ گهرجي. خورشيد شاهه جو چوڻ هو ته هو پارليامنٽ جي گڏيل اجلاس ۾ يمن معاملي تي پنهنجو ڀرپور موقف پيش ڪندا.

 

سنڌ سرڪار وفاق جي نئين پاور پاليسي قبول ڪرڻ کان انڪار ڪري ڇڏيو

ڪراچي (اسٽاف رپورٽر) سنڌ سرڪار وفاق جي نئين پاور پاليسي قبول ڪرڻ کان انڪار ڪري ڇڏيو آهي ۽ ان ڏس ۾ وفاق کي آگاهي ڏني وئي آهي. سي ايم هائوس مان جاري ڪيل پڌرائي موجب وفاقي سرڪار جي پاور پاليسي کي قبول نه ٿو ڪري سگهجي. سنڌ سرڪار جو موقف آهي ته جيستائين سنڌ جي گئس ۽ پئٽرول  جو معاملو نه ٿو نبري تيستائين وفاق جي پاليسي قبول نه ڪيو ويندو. پڌرائي موجب سنڌ سرڪار جو موقف آهي ته گئس انفراسٽرڪچر ڊولپمنٽ سيس، وفاق پاران ماڙي گئس فيلڊ جي ٽيرف ۾ هڪ طرفي تبديلي ۽ ايل اين جي امپورٽ ڪرڻ واري فيصلي تي به سنڌ کي تحفظات آهن.

 

سنڌ اسيمبلي ۾ اپوزيشن جو احتجاج، ايوان مان واڪ آئوٽ، شيم شيم جا نعرا

ڪراچي (اسٽاف رپورٽر) سنڌ اسيمبلي ۾ مخالف ڌر ۽ ايم ڪيو ايم ڌار ڌار احتجاج ڪندي ايوان مان واڪ آئوٽ ڪيو، جڏهن ته ايوان شهيد ذوالفقار علي ڀٽو کي ڀيٽا پيش ڪرڻ وارو ٺهراءُ منظور ڪري ورتو. سنڌ اسيمبليءَ جو اجلاس اسپيڪر آغا سراج دراني جي صدارت هيٺ ٿيو. اجلاس ۾ تحريڪ انصاف جي چئن ميمبرن به شرڪت ڪئي جن 19 سيپٽمبر 2014ع تي استعيفائون ڏئي ڇڏيون هيون. پيپلز پارٽي ۽ فنڪشنل ليگ طرفان تحريڪ انصاف جي ميمبرن جي آجيان ڪئي.  اسپيڪر آغا سراج دراني پي ٽي آءِ ميمبرن جي واپسي جي آجيان ڪندي چيو ته آصف علي زرداري جي ڪوششن سان مسئلو حل ٿيو. اجلاس دوران فنڪشنل ليگ ميمبر نصرت سحر عباسي ۽ اسٽيوٽا جي چيئرمين شاهد ٿهيم ۾ ڏند چڪ ٿي. شاهد ٿهيم نصرت سحر عباسي جي سوالن جا جواب ڏيڻ کان لنوائي ويو جنهن تي فنڪشنل ليگ ميمبر احتجاج ڪيو. سوالن جوابن جي وقفي بعد اعتراض وارو نقطو شروع ڪرڻ واري معاملي تي بحث ٿيو. ايم ڪيو ايم ميمبر محمد حسين اعتراض واري نقطي تي مسئلا اٿارڻ جي حق ۾ دليل ڏنا. سينيئر وزير نثار کهڙي اعتراض واري نقطي تي مسئلا اٿارڻ بدران رٿ پيش ڪرڻ جي حق ۾ دليل ڏنا. سيد سردار احمد، نثار کهڙو، محمد حسين ۽ ڊپٽي اسپيڪر شهلا رضا اعتراض واري نقطي ۽ ڌيان ڇڪايو نوٽيس تي بحث ۾ اَٽڪـَي پيا. سينيئر صوبائي وزير نثار کهڙي جي بيان تي مخالف ڌر احتجاج ڪيو جنهن بعد گوڙ پيدا ٿي ويو. ڊپٽي اسپيڪر اپوزيشن ميمبرن جا مائيڪ بند ڪرائي ڇڏيا، جڏهن ته مخالف ڌر جي ميمبرن ان باوجود احتجاج جاري رکيو. نثار کهڙي جي بيان ۽ ڳالهائڻ جي اجازت نه ملڻ تي فنڪشنل ليگ ميمبرن ايوان مان واڪ آئوٽ ڪيو جڏهن ته نون ليگ ميمبرن به ساٿ ڏنو. صوبائي وزير شرجيل ميمڻ چيو ته اپوزيشن ميمبرن کي پنهنجي رويي تي معافي وٺڻ گهرجي، اسيمبلي قاعدن جي جوڙجڪ ۾ حصو وٺندڙ قاعدن جي ڀڃڪڙي رهيا آهن. شرجيل ميمڻ چيو ته احتجاج ڪرڻ سڀني جو حق آهي پر قاعدن جون ڪاپيون ڦاڙي ايوان ۾ اڇلائڻ شرم جوڳو عمل آهي. اسپيڪر آغا سراج دراني به اپوزيشن ليڊر جي رويي کي شرمناڪ قرار ڏيندي چيو ته شهريار مهر کي هـُن سان ڪو مسئلو آهي. اسپيڪر چيو ته جن ميمبرن اسيمبلي قاعدن جون ڪاپيون ڦاڙيون انهن خلاف قانون موجب ڪارروائي ٿيڻ گهرجي. اجلاس دوران نائين زيرو تان گرفتار ڪارڪنن سان ملاقات جي اجازت نه ملڻ تي ايم ڪيو ايم ميمبرن به احتجاج ڪيو ۽ ڪجهه دير لاءِ ايوان مان واڪ آئوٽ ڪيو. ان کان اڳ قائدآباد فلاءِ اوور هيٺان حددخلين خلاف ايم ڪيو ايم جي وقار شاهه ڌيان ڇڪايو نوٽيس پيش ڪيو. وقار شاهه چيو ته حددخلين خلاف آپريشن اوچتو ڇو روڪيو ويو؟ جنهن تي صوبائي وزير شرجيل ميمڻ چيو ته قائدآباد ۾ حددخلين خلاف آپريشن ٿي رهيو آهي. صوبائي وزير شرجيل ميمڻ چيو ته ڪراچي ۾ 60 سيڪڙو حددخلين جو خاتمو آندو ويو آهي باقي 40 سيڪڙو اپريل جي آخر تائين ختم ڪيون وينديون. پيپلز پارٽي جي باني ۽ اڳوڻي وزيراعظم شهيد ذوالفقار علي ڀٽو کي ڀيٽا پيش ڪرڻ لاءِ پ پ ميمبر خير النساءُ مغل ايوان ۾ ٺهراءُ پيش ڪيو جيڪو اتفاق راءِ سان منظور ڪيو ويو. اجلاس ۾ مختلف معاملن تي بحث جاري هو ته اسپيڪر ايوان جي وڌيڪ ڪارروائي سڀاڻي تائين ملتوي ڪري ڇڏي.

 

اليڪشن ڪمشنر سنڌ جي ننڍي چونڊ دوران فوج يا رينجرز مقرر ڪرڻ بابت چيف اليڪشن ڪمشنر کي درخواست

اسلام آباد (بيورو) اليڪشن ڪمشنر سنڌ اين اي 246 ڪراچي تي ننڍي چونڊ دوران رينجرز يا فوج مقرر ڪرڻ بابت چيف اليڪشن ڪمشنر کي درخواست ڪري ڇڏي، اليڪشن ڪمشنر خط ۾ لکيو آهي ته  23 اپريل تي پولنگ واري ڏينهن حالتون خراب ٿي سگهن ٿيون، تنهنڪري سيڪيورٽي جا انتظام رينجرز يا فوج حوالي ڪيا وڃن. ڊسٽرڪٽ رٽرننگ آفيسر جي درخواست  بعد اليڪشن ڪمشنر سنڌ اين اي 246 ڪراچي جي تڪ تي ننڍي چونڊ دوران سيڪيورٽي جا انتظام رينجرز حوالي ڪرڻ لاءِ چيف اليڪشن ڪمشنر ڏانهن خط لکي ڇڏيو آهي. اليڪشن ڪمشنر سنڌ خط ۾ لکيو اهي ته اين اي 246 تي 23 اپريل تي رٿيل چونڊ دوران صورتحال خراب ٿي سگهي ٿي، تنهنڪري سڪيورٽي جا انتظام رينجرز يا فوج حوالي ڪيا وڃن . واضح رهي ته اين اي 246 تي ننڍي چونڊ کان اڳ پي ٽي آءَ ۽ ايم ڪيو ايم وچ ۾ ڇڪتاڻ تيز ٿيڻ سبب ڊسٽرڪٽ رٽرننگ آفيسر اليڪشن ڪمشنر سنڌ کي سڪيورٽي رينجرز يا فوج حوالي ڪرڻ جي درخواست ڪئي هئي.

 

يمن جي آڙ ۾ اجلاس گهرائي بغير نڪاح جي ميمبرن کي پارليامينٽ ۾ ويهاريو ويو: الطاف حسين

لنڊن (مانيٽرنگ ڊيسڪ) ايم ڪيو ايم جي قائد الطاف حسين هڪ انٽرويو دوران چيو ته پارليامينٽ جي اجلاس ۾ ويٺل ميمبرن جي حيثيت ڪٽ پتلي کان وڌيڪ ناهي، سعودي عرب جو هر قيمت تي بچاءُ ڪرڻ وارا ٻڌائن ته ان جنگ ۾ سعودي عرب جو ڪهڙو نقصان ٿيو آهي هينئر تائين سڀ کان وڌيڪ موت يمن ۾ ٿي آهي،ڇا ڪنهن ملڪ جون فوجون ضرب عضب ۾ اسان جو ساٿ ڏيڻ لاءِ آيا آهيون تحريڪ انصاف جي اجلاس ۾ شموليت کي ڇتي تنقيد جو نشانو بڻائيندي الطاف حسين چيو ته اڄ جو اجلاس انتهائي غلط آهي جيڪڏهن 40 تائين تائين ڪوبه ميمبر غير حاضر رهيو ته ان جي ميمبرشپ ختم ٿي ويندي آهي، يمن جي آڙ ۾ اجلاس گهرائي ڪجهه ميمبرن کي بعير نڪاح جي پارليامينٽ ۾ ويهاري ڇڏيو، هن چيو اڄ جي اجلاس ۾ ناجائز ميمبرن جي موجودگي ۾ اسپيڪر اجلاز ڪيئن جاري رکيو الطاف حسين جو وڌيڪ چوڻ هو ته ڪعبته الله يا مديني جي سلامتي جي ڳالهه ٿي ته هو پاڻ سعودي عرب پهچي ويندا.

 

حڪومت پارليامينٽ جو اجلاس گهرائي ورتو، ٻڌايو ڪجهه به نه، فوج موڪلڻي آهي ته پارليامينٽ کي اعتماد ۾ وٺو: اعتزاز احسن

اسلام آباد: پاڪستان پيپلز پارٽي جي اڳواڻ اعتزاز احسن چيو آهي ته يمن جي معاملي تي پارليامينٽ جو گڏيل اجلاس ته گهرايو ويو آهي پر ڪم جي هڪ ڳالهه به نه ٻڌائي وئي، بچاءُ واري وزير اهو ته ٻڌائي ڇڏيو ته سعودي عرب ڪهڙا مطالبا ڪيا آهن پر حڪومت اهو به ٻڌائي ته واعدا ڪهڙا ڪيا ويا ۽ ارادا ڪهڙا آهن؟ جيڪڏهن حڪومت فوج موڪلڻ جو فيصلو  ڪري ورتو آهي ته پارليامينٽ کي اعتماد ۾ ورتو وڃي، قومي اسميبلي جي اجلاس کي خطاب ڪندي اعتزاز احسن چيو ته حڪومت فوج موڪلي رهي آهي يا نه موڪلي رهي آهي ان بابت پارليامينٽ کي ٻڌايو وڃي ۽ اهو به ٻڌايو وڃي ته سعودي عرب جي مطالبي تي حڪومت ڪهڙو ردعمل ڏنو هو؟ گڏيل ايوان هڪ سپريم ادارو آهي  پر اڃان تائين ان کي هڪ به ضروري ڳالهه نه ٻڌائي وئي، بچاءُ واري وزير فراميو ته سعودي عرب جو بچاءُ اهم آهي پر اهو نه ٻڌايو ته يمن جي حالتن کان سعودي عرب جي خودمختياري ڪيئن متاثر ٿي رهي آهي ۽ ان جي علائقائي سلامتي کي ڪهڙا خطرا آهن، ايوان کي ٻڌايو ته سعودي عرب جي جاگرافيائي سرحد کي ڪهڙي صورت خطرو آهي ڇو ته يمن ۽ سعودي عرب جي وڏن شهرن جي وچ ۾ 2000 ڪلوميٽر جي صحرائي پٽي آهي اعتزاز احسن چيو ته حرمين شريفين، سعودي رياست ۽ سعودي حڪومت 3 الڳ شيون آهن، سعودي عرب جا خير خواهه ۽ اتي امن چاهيون ٿا پر يمن ۾ جاري جنگ شيعا سني جنگ ناهي پر بادشاهت ۽ جمهوريت ۾ گهرو ويڙهه يمن جو مقدر بڻي آهي ۽ 1960ع کان اهو معاملو جاري آهي، اتر ۽ ڏکڻ يمن 1990 ۾ هڪ ٿيا پوءِ به ڇڪتاڻ رهي ۽ اهو ئي سبب آهي جو يمن جي سرزمين القاعده جو هيڊڪوارٽر بڻي رهي آهي،  هن چيو ته يمن جي معاملي تي حڪومت کي مينڊيٽ ڏيڻ لاءِ پارليامينٽ ۾ آيا آهيون پر حڪومت گول مول ڳالهيون ڪري مينڊيٽ حاصل ڪرڻ چاهي ٿي پارليامينٽ جو گڏيل اجلاس گهرايو ته ويو آهي پر ٻڌايو ڪجهه به ناهي ويو حڪومت کان مطالهو آهي ته هو سعودي عرب تي پنهنجون ترجيحون ٻڌائن هن چيو ته جيڪڏهن پاڪستاني فوجي دستن کي سعودي عرب ۾ موڪليو ويو ته انهن جي ڪمانڊ ڪري ڪندو؟ انهن جا خرچ ڪري برداشت ڪندو؟  پيپلز پارٽي جي اڳواڻ جو چوڻ هو ته پاڪستاني حڪومت جهڙي طرح يمن جي معاملي تي رد عمل ڏئي رهي آهي ايران، لبينان ۽ مصر جي سلامتي کي خطرو ٿئي تڏهن به ردعمل هجڻ گهرجي، هن چيو ته ذوالفقار علي ڀٽو به شامل جي جنگ ۾ پاڪستاني پائليٽ موڪليا جن اسرائيلي جهازن کي ڪيرايو اعتزاز احسن قومي اسيمبلي ۾ موجود تحريڪ انصاف جي ميمبرن کي تنقيد جو نشانو بڻائڻ تي به حڪومتي ميمبرن تي تنقيد ڪئي ۽ چيو ته ڪفر ٽوٽا خدا خدا ڪرڪي پر اڄ ٻيهر ڪفر ٿي رهيو آحي ڪجهه دوستن جو اين اي 246 جو معاملو ٿي سگهي ٿو پر بچاءُ وارو وزير حڪومت ۾ آهي ان لاءِ ان جو لهجو نرم، شيرين ۽ ٿڌو هجڻ گهرجي ڇا بچاءُ وارو وزير چاهي ٿو ته 34 ضمني چونڊون ٿي وڃن؟ هن وڌيڪ چيو ته اقليتن پاڪستان جي وڌيڪ خدمت ڪئي آهي اقليت جي اصطلاح ختم ٿيڻ گهرجي.

 

سنڌ ۾ وڏي وزير جو ڪو به وجود نظر نه ٿو اچي:شهريار مهر

ڪراچي (اسٽاف رپورٽر) سنڌ اسيمبلي ۾ مخالف ڌر جي اڳواڻ شهريار مهر چيو آهي ته صوبي ۾ وڏي وزير جو ڪو به وجود نظر نه ٿو اچي، هــُو اپوزيشن ليڊر آهي پر کيس نه ٿو ٻڌايو وڃي ته ڪيترا وزير ۽ صلاحڪار ڪم ڪري رهيا آهن. سنڌ اسيمبلي ٻاهران ميڊيا سان ڳالهائيندي شهريار مهر چيو ته رات جي وقت ۾ نوٽيفيڪشن جاري ڪري وزير ۽ صلاحڪار مقرر ٿين ٿا ته ڪي هٽايا وڃن ٿا. هن چيو ته سنڌ حڪومت ڪيترن ئي مسئلن کي پاڻ پيدا ڪيو آهي، صوبي اندر زراعت کي تباهه ڪيو ويو آهي. سندس چوڻ هو ته ڀاڻ جي قيمتن توڙي ڪمند جي آبادگارن کي اگهه نه ملڻ واري معاملي تي غير سنجيدگي جو مظاهرو ڪيو ويو، هاڻي ڪڻڪ جي معاملي ۾ حڪومت ڪرپشن کي هٿي ڏئي رهي آهي. شهريار مهر چيو ته آبادگارن کي مڊل مين ذريعي تباهه ڪيو پيو وڃي. هن چيو ته هڪ طرف قدرتي آفتون ته ٻئي طرف حڪومت کاتن کي تباهه ڪري رهي آهي.