تازيون خبرون

Daily Archives: April 4, 2015

خاص جهاز يمن ۾ ڦاٿل 176 پاڪستانين کي کڻي ڏيهه پهچي ويو، ايئرپورٽ تي جذباتي منظر

اسلام آباد/ڪراچي (اسٽاف رپورٽر/بيورو) پي آءِ اي جي خاص اڏام يمن ۾ ڦاٿل وڌيڪ 176 پاڪستانين کي حفاظت سان کڻي ڏيهه پهچي ويو، وطن واپس آيل 122 مسافرن جو تعلق پنجاب ۽ 50 ڄڻن جو تعلق سنڌ آهي،بچاءَ واري وزير خواجا آصف جو چوڻ آهي ته ايندڙ ٻن ڏينهن ۾ سمورن شهرين کي واپس آندو ويندو. پي آءِ اي جو خاص جهاز ايئر بس 310 وڌيڪ هڪ سئو 76 پاڪستانين کي جبوتي مان کڻي اسلام آباد ايئرپورٽ پهتو. پي آءِ اي جي اڏام پنجاب سان تعلق رکندڙ 122 مسافرن کي بينظير انٽرنيشنل ايئرپورٽ تي ڇڏيو. پي آءِ اي جي ساڳئي اڏام سنڌ سان تعلق رکندڙ 50 مسافرن کي کڻي ڪراچي جي جناح ايئرپورٽ پهتي. ٻنهي هوائي اڏن تي يمن مان واپس پهتل شهرين ڀرپور خوشيءَ جو اظهار ڪيو. هوڏانهن اسلام آباد ايئرپورٽ پهچڻ تي بچاءَ واري وزير خواجا آصف، هوا بازي واري صلاحڪار شجاعت عظيم ۽ پي آءِ اَي چيئرمين مسافرن جي آجيان ڪئي. ان موقعي تي ميڊيا سان ڳالهائيندي خواجا آصف چيو ته يمن مان اڪثر پاڪستاني نڪري چـُڪا آهن، جيڪڏهن ته صنعا ايئرپورٽ آپريشنل ٿيو ته اتان به شهرين کي ڪڍيو ويندو. بچاءَ واري وزير اميد ظاهر ڪئي ته ايندڙ ٻن ٽن ڏينهن اندر سمورن پاڪستانين کي ڏيهه واپس آندو ويندو. خواجا آصف جو چوڻ هو ته ڪجهه سئو پاڪستاني مڪلا، صنعا ۽ حديده ۾ هاڻي به موجود آهن جن کي جلد ڪڍڻ لاءِ قدم کنيا پيا وڃن. ياد رهي ته يمن ۾ ويڙهه سبب وزيراعظم جي خاص هدايت تي ڦاٿل پاڪستانين جي واپسي لاءِ خاص انتظام ڪيا ويا آهن ۽ ڪجهه ڏينهن اڳ به پي آءِ اي جي خاص اڏام ذريعي 504 شهرين کي ڏيهه واپس آندو ويو هو.

 

بالي ووڊ ڪنگ شاهه رخ خان هڪ ٻيون منفرد اعزاز پنهنجي نالي ڪري ڇڏيو

لنڊن(شوبز نيوز)لنڊن جي مادام تساوء جي ميوزيم ۾ بالي ووڊ جي ڪيترن ئي اسٽارز جا  مجسما رکيا ويا آهن، پر هاڻي بالي ووڊ ڪنگ شاهه رخ خان پنهنجي نئين ايندڙ فلم“ فين” جي شوٽنگ کان پوءِ هن کي ان ميوزيم ۾ پهريون ڀيرو عڪس بند ڪرڻ جو اعزاز حاصل ٿيو آهي، ٻئي طرف بالي ووڊ اسٽار شاهه رخ خان به مادام تساوء ميوزيم ۾ فلم جي عڪس بندي جي اجازت ملڻ تي تمام خوش آهي، سماجي رابطن جي ويب سائيٽ تي ان جو چوڻ هو ته فلم “ فين” جي شوٽنگ جي اجازت ڏيڻ تي مادام تساوء ميوزيم انتظاميه جو شڪر گذار آهيان ۽ هي پهرين فلم آهي، جنهن جي عڪس بندي هتي ٿي رهي آهي، جيڪي خوشگوار لمحا آهن.

 

“ جواني پهر نهي آني ” ۾ ڪم ڪرڻ تي شرمندو آهيان، حمزه علي عباسي

لاهور(شوبز نيوز) اداڪار حمزه علي عباسي سماجي ويب سائيٽ فيس بوڪ تي پنهنجي هڪ اسٽيٽس ۾ لکيو آهي، ته هن فلم “ جواني پهر نهي آني ” ۾ عورتن سان گڏ شرمناڪ منظر عڪس بند ڪرائڻ تي شرمنده آهي، اهو ئي سبب آهي ته هاڻي پاڻ کي تحريڪ انصاف جو ڪلچرل سيڪريٽري جو عهديدار جو اهل نٿو سمجهي، ان لاءِ هن ان عهدي کان استعفيٰ ڏئي ڇڏي.

 

اداڪار، هدايتڪار ۽ فلمساز اجي ديوگن 45 هين سالگره ملهائي

ممبئي (شوبز نيوز) بالي ووڊ ۾ پهرين صف جي اداڪارن ۾ شامل اداڪار، هدايتڪار ۽ فلمساز اجي ديوگن ڪالهه 45 هين سالگره ملهائي. 2 اپريل 1969ع تي ڀارتي گاديءَ واري هنڌ نئين دهليءَ ۾ پيدا ٿيندڙ اجي ديوگن پنهنجي فلمي ڪيريئر جي شروعات 1991ع کان فلم ”ڦول اور ڪانٽي“ سان ڪئي، جنهن کان پوءِ اجي ديوگن ”جگر، دل والي، ناجائز، دل جلي، زخم، ليجنڊ آف ڀڳت سنگھه، رين ڪوٽ، يُوا، لَجا، گنگا جل، اومڪارا، ڪمپني، گولمال سيريز، ونس اپان اي ٽائم ان ممبئي، راج نيتي، سنگھم سيريز، بول بچن ۽ سن آف سردار“ جھڙيون ڪامياب فلمن ۾ ڪم ڪندي ڪيترائي ايوارڊ پنهنجي نالي ڪيا آهن. فلمي دنيا ۾ تمام گھڻو نالو ڪمائيندڙ اجي ديوگن 1999ع ۾ بالي ووڊ جي پهرين صف ۾ ڳڻجندڙ اداڪارا ڪاجول سان شادي ڪئي هئي، جنهن مان کيس هن وقت ٻه ٻارڙا به آهن، اداڪار اجي ديوگن پنهنجي گھر وارن ۽ فلمي دنيا جي ڪجھه دوستن سان ملي 45 هين سالگره جو ڪيڪ ڪٽيو.

 

مان سمجهان ٿي ته ”ڍولي تارو ڍول باجي“ گيت ۾ سٺي پرفارمينس ڏني آهي: سني ليون

ممبئي (شوبز نيوز) سني ليون چيو آهي ته هو سمجهي ٿي ته ”ڍولي تارو ڍول باجي“ گيت ۾ هن سٺي پرفارمينس ڏني آهي پر پوءِ به ايتري سٺي ڊانس ناهي ڪئي جو کيس ايشوريا راءِ سان ڀيٽيو وڃي. سني ليون جي نئين فلم ”ايڪ پهيل ليلا“ ۾ ايشوريا تي فلمايل گيت جو ريميڪ ڪيو آهي ان تي سندس چوڻ هو ته ان گيت تي ڊانس سبب هو ڏاڍي پريشان هئي، بالي ووڊ ۾ اچڻ ساڻ ئي سٺي ڪارڪردگيءَ تي ڪجهه اعليٰ اداڪارن سان ڀيٽيو ويندو آهي، پر تنهن هوندي اهڙن بهترين اداڪارائن سان ڀيٽڻ صحيح ناهي، ڇو جو اهي وڏا نالا آهن. سني ليون موجب هن سلمان ۽ ايشوريا تي فلمايل گيت جي ويڊيو ڏٺي هئي، منهنجي پرفارمنس ڏسڻ کان پوءِ ماڻهن جو اهو چوڻ سٺو لڳندو ته ”سني واقعي سٺو ڪم ڪيو آهي“ پر ايش سان ڀيٽڻ ٺيڪ ناهي. هڪ ٻئي بيان ۾ سني ليون جو چوڻ آهي ته هوءَ ماضيءَ ۾ ڪافي غلطيون ڪري چڪي آهي، پر مستقبل بابت سنجيده آهي. سني ليون جي نئين فلم ”ايڪ پهيلي ليلا“ 10 اپريل تي ٿي رهي آهي. فلم جي اشتهاري مهم جي موقعي تي هن چيو ته هوءَ بالي ووڊ فلم انڊسٽريءَ کان اڃا به پوريءَ طرح واقف ناهي ٿي. سني ليون جو خيال هو بالي ووڊ ۾ پنهنجا قدم ڃمائڻ لاءِ کيس اڃا وڌيڪ محنت جي ضرورت آهي. سني ليون پنهنجي شروعاتي فلمن بابت ٻڌائيندي چيو ته مون اڳ ڪافي غلطيون ڪيون، پر اهو صرف ان ڪري ٿيو جو مان بالي ووڊ جو حصو نه هئس. هن وڌيڪ چيو ته مون ”جيڪ پاٽ“ ۾ ڪم ڪيو، پر اها فلاپ وئي ته مون کي ڊپ ٿيڻ لڳو،”راگني ايم ايم ايس-2“ جو هٽ ٿيڻ مون لاءِ حوصلا افزا ڳالهه هئي ٻئي طرف ممبئيءَ ۾ هڪ شهريءَ پاران اداڪارا سني ليون تي ڪيس به داخل ڪيو ويو هو.

 

بنگلاديش ۽ ڀارت جي تڪراري ڪوارٽر فائنل، آءِ سي سي جاچ لاءِ راضي

ڍاڪا(اسپورٽس نيوز) ورلڊ ڪپ ڪوارٽر فائنل ۾ ڀارت بنگلاديش کي 109 رنسن جي وڏي مارجن تان شڪست ڏني جنهن کانپوءِ بنگال ٽائيگرز ناقص امپائرنگ کي سبب قرار ڏيندي تمام گهڻي واويلا ڪئي جڏهن ته فيلڊ امپائرز عليم ڊار ۽ اين گولڊ جا پتلا به ساڙيا ويا، ان ئي تڪرار ۾ بنگلاديش سان تعلق رکندڙ آءِ سي سي جي صدر مصطفيٰ ڪمال به احتجاجن استعيفيٰ ڏئي ڇڏي هاڻ خبر پئي آهي ته انٽرنيشنل ڪرڪيٽ ڪائونسل معاملي جي جاچ لاءِ يقين ڏياريو آهي، بي سي بي جي صدر نظم الحسن جو چوڻ آهي ته اسان ڪوارٽر فائنل کانپوءِ ئي آءِ سي سي کي پنهنجن خدشن تي ٻڌل خط موڪلي ڇڏيو هو چيف ايگزيڪيوٽو ڊيو  رچرڊسن طرفان جيڪو شروعاتي جواب آيو ان ۾ هن چيو هو ته هو ان مقابلي جي بال، بال جي جاچ ڪندو جيڪو به  تجزئي جو نتيجو نڪوت ان سان بي سي بي کي به آگاهه ڪيو ويندو نظم الحسن واضح ڪيو ته بي سي بي جي شڪايت صرف امپائرنگ خلاف هئي ان جو ميچ جي مخالف سائيڊ سان ڪوبه تعلق نه هو، هن چيو ته مان نه ٿو سمجهان ته ان سان بنگلاديش ۽ ڀارت جا لاڳاپا متاثر ٿي سگهن ٿا.

 

بنگلاديش پريميئر ليگ جون ميچون فڪس هيون: آئن پونٽ

ڍاڪا(اسپورٽس نيوز) اڳوڻي ڪوچ آئن پونٽ بنگلاديش پريميئر ليگ 2013ع جا پول پڌرا ڪري ڇڏيا هن چيو آهي ته ڍاڪا گليڊيئيٽرز جي ميچ فڪس هئي ۽ آءِ سي سي اختيارين جي چوڻ تي خفيه آپريشن جو حصو بڻيو، انگلينڊ سان تعلق رکندڙ اڳوڻي ڪوچ آئن پونٽ بنگلاديش پريميئر ليگ جو نئون پنڊورا باڪس کولي ڇڏيو آهي، هن چيو ته 2013ع جي ايڊيشن ۾ ڍاڪا گليڊيئيٽرز ۽ چٽاگانگ ڪنگز جي ميچ فڪس ڪرڻ لاءِ پلان ٺاهيو ويو، گليڊيئيٽرز جي گڏيل مالڪ جشن چوڌري فڪسنگ پلان کڻي آيو جنهن جي مطابق مشرفي مرتضيٰ کان ڪپتاني کسي اشرفل کي ڏيڻ، غير معروف فاسٽ بالر سميت 4 رانديگرن کي نمائندگي ڏيڻ ان گيم جو حصو هو آئن پونٽ جو چوڻ هوته آءِ سي سي جي اينٽي ڪپرشن يونٽ اختيارين جي چوڻ تي خفيه جو حصو بڻيو جنهن کانپوءِ ڊيوڊ رچرڊسن سميت ٻين ساراهيو.

 

نيوزيلينڊ جي ڪپتان کي سر رچرڊ هيڊلي ميڊل سان نوازيو ويو

آڪلينڊ: ورلڊ ڪپ 2015ع جي رنر اپ نيوزيلينڊ ڪرڪيٽ ٽيم لاءِ سالياني ايوارڊ تقريب آڪلينڊ ۾ منعقد ٿي جتي ڪيوي بورڊ رانديگرن تي انعام جي برسات ڪري ڏني ڪيوي ڪپتان برينڊن مڪلم کي سر رچرڊ هيڊلي جو ايوارڊ ڏنو ويو ڪيوي بيٽسمين ڪين وليمسن ٽنهي فارميٽس ۾ سال جي بهترين رانديگر جو ايوارڊ کڻي ويو، ورلڊ ڪپ ۾ مچل اسٽارڪ کانپوءِ سڀ کان وڌيڪ وڪيٽون حاصل ڪندڙ ٽرينٽ بولٽ سال جو بهترين ڪيوي بالر کي بهترين بالر قرار ڏنو ويو عورت ڪرڪيٽ ۾ پنهنجي شاندار پرفارمنسز ڏيندڙ سوزي بيٽس وومين ڪرڪيٽر آف دي ايئر رهي، تقريب ۾ ليجنڊ ڪيوي رانديگر مارٽن ڪرو جي خدمتن کي خراج تحسين پيش ڪرڻ لاءِ خصوصي ايوارڊ سان نوازيو ويو.

 

بنگلاديش جو دورو، ٽيسٽ، ون ڊي ۽ ٽي 20 ٽيمن جو اعلان، سعيد اجمل جي واپسي

لاهور(اسپورٽس نيوز) بنگلاديش جي دوري لاءِ ٽيست، ون ڊي ۽ ٽي 20 ٽيمن جو اعلان ڪيو ويو آهي، سعيد اجمل جي ٽنهي فارميٽ ۾ واپسي ٿي وئي جڏهن ته عمر اڪمل ڪٿي به جاءِ نه ٺاهي سگهيو چيف سليڪٽر جو چوڻ آهي ته ينگسٽر کي وڌيڪ موقعا ڏينداسين، فٽنيس ۽ ڊسيپلين تي ڪوبه ٺاهه نه ٿيندو رانديگر پنهنجي پرفارمنس ۽ روين ۾ بهتري آڻين، لاهور  ۾ ميڊيا سان ڳالهائيندي چيف سليڪٽر هارون رشيد جو چوڻ هو ته راند جي ٽنهي فارميٽس ۾ ٽيم جي رينڪنگ بهتر آهي، بنگلاديش دوري لاءِ ٽيم  جي چونڊ  سوچي سمجهي ڪئي وئي آهي نوجوان رانديگرن کي پروفيشنل اپروچ اختيار ڪرڻي پوندي نون ايندڙ رانديگرن کي وڌيڪ موقعو ڏينداسين، مستقبل کي سامهون رکندي ٽيمن جي چونڊ ڪئي، هن چيو ته اسٽار اسپنر سعيد اجمل ٽنهي اسڪواڊ جو حصو هوندو، جڏهن ته عمر اڪمل ڪنهن به فارميٽ جي ٽيم ۾ جاءِ ناهي ٺاهي سگهيو ٽيم جي چونڊ ڪارڪردگي کي ڏسندي ڪئي رانديگرن جي فٽنيس ۽ ڊسيپلين تي ڪوبه ٺاهه نه ڪنداسين سينيئر رانديگر پنهنجي پرفارمنس ۽ رويو بهتر بڻائن جڏهن ته بنگلاديش لاءِ ٽيسٽ، ون ڊي ۽ ٽي 20 قومي ڪرڪيٽ اسڪواڊ ۾ هي رانديگر شامل آهن ٽيسٽ جي 16 رڪني اسڪواد ۾ بابر اعظم، محمد حفيظ، سميع اسلم، مصباح الحق، اسد شفيق، اظهر علي، يونس خان، حارث سهيل، سعيد اجمل، ياسر شاهه، ذوالفقار بابر، سرفراز احمد، وهاب رياض، جنيد خان، سهيل خان ۽ راحت علي شامل آهن، جڏهن ته ون ڊي جي 15 رڪني اسڪواد ۾سميع اسلم، سرفراز احمد، محمد حفيظ، اسد شفيق، فواد عالم، اظهر علي، محمد رضوان، حارث سهيل، صهيب مقصود، سعيد اجمل، ياسر شاهه، وهاب رياض، راحت علي، احسان عادل ۽ سهيل خان ٽي 20 ۾ احمد شهزاد، سرفراز احمد، محمد حفيظ، مختار احمد، صهيب مقصود، حارث سهيل، محمد رضوان، سعيد اجمل، شاهد آفريدي، سهيل تنوير، سعد نسيم، وهاب رياض، سهيل خان، عمر گل ۽ جنيد خا.

 

سنڌي شاگردن کي ڪوٽا تحت داخلا ڏيڻ جو حڪم

سپريم ڪورٽ آف پاڪستان سنڌ جي ڪوٽا تحت ملڪ جي ٻين يونيورسٽين ۾ سنڌي شاگردن کي داخلائون ڏيڻ جو حڪم ڏنو آهي، سپريم ڪورٽ ڪراچي رجسٽري ۾ چيف جسٽس ناصر الملڪ جي سربراهي ۾ ڪيس جي ٻڌڻي ڪئي وئي، درخواست گذار احتشام فاروقي عدالت ۾ موقف اختيار ڪيو ته سنڌ جي ڪوٽا تي تعليم کاتي پاران من پسند ماڻهن کي ملڪ جي ٻين يونيورسٽي ۾ داخلا ڏني پئي وڃي ۽ ميرٽ کي نظرانداز ڪيو پيو وڃي، معزز عدالت سنڌ جي ڪوٽا تي ملڪ جي ٻين يونيورسٽين ۾ سنڌي شاگردن کي داخلا ڏيڻ جو حڪم ڏنو ۽ هدايت ڪئي ته سنڌ جي ڪوٽا تحت ميرٽ موجب ۽ انٽري ٽيسٽ وٺي داخلائون ڏنيون وڃن. سنڌ جي ڪوٽا تي ڌاڙو اڄ جي ڪا ڳالهه ڪونهي هي معاملو ڪافي وقت کان نان اسٽاپ صورت ۾ هلندو پيو اچي ڇو جو اسان وٽ اهڙيون مافيائون ۽ مفادپرست عنصر موجود آهن، جن کي ميرٽ، اصول ۽ ضابطي يا وري ڪنهن جي حق تلفي جي پرواهه ڪونهي، انهن کي جيڪڏهن ڪا پرواهه آهي ته پنهنجي مفاد جي آهي ۽ باقي ٻين جو ڀل ٻيڙو غرق ٿئي، سولي سنڌي ۾ سنڌين جو ڀل مستقبل تباهه ٿئي، هي ڳالهه ڏاڍي ڊگهي آهي ۽ تلخ حقيقت به ته سنڌ جي ڪوٽا تي رڳو تعليمي حوالي سان ڌاڙو نه پيو لڳي پر جنهن جنهن سرڪاري شعبي ۽ جنهن اداري، کاتي يا آرگنائيزيشن ۾ سنڌ جي ڪوٽا هوندي ۽ سياسي مداخلت ممڪن هوندي آهي، اتي سبڌ جي ڪوٽا تي عمل نه پيو ٿئي، سياسي دور ۾ ته پنهنجا نوازي عروج تي هوندي آهي، سنڌ جي ڊوميسائيل تي ڌاريا نوڪريون وٺي وڃن ٿا، داخلائون وٺن ٿا، پرڏيهه وڃن ٿا، مطلب ته هر موڙ تي سنڌ جي حقن جي حق تلفي ٿئي ٿي. سنڌ جي تعليمي ڪوٽا تي ڌاڙو ڄڻ ته ماڻهن جي ساڄي هٿ جو کيل هجي، بااثر ماڻهو پنهنجو سياسي اثر رسوخ ڏيکاري يا وري پئسي جي چمڪ جو فائدو وٺندي من پسند ماڻهن کي سنڌ جي ڪوٽا تي ملڪ جي مختلف تعليمي ادارن ۾ داخلائون ڏياري رهيا آهن، ان ستم ظريفي جو نتيجو اهو ٿو نڪري ته سنڌ جو ذهين نوجوان پوئتي رهجي وڃي ٿو ۽ ان کي ملڪ جي ڪنهن ٻئي تعليمي ادارن ۾ داخلا نٿي ملي ڇو جو ”ڪوٽا“ پوري ٿي وڃي ٿي، حد آهي ته جن جي ڪوٽا آهي انهن کي پتو ئي ناهي ۽ ٻين شهرن جي تعليمي ادارن جا در سنڌ جي نوجوانن لاءِ بند ٿي وڃن ٿا، اهڙي صورتحال ۾ سنڌ جو هونهار شاگرد مايوسي جو شڪار ٿي وڃي ٿو ۽ دل شڪسته ٿئي ٿو، نتيجي ۾ هوشياري جي جاءِ مايوسي والاري ٿي ۽ خواب چڪنا چور ٿي وڃن ٿا. اها سٺي ڳالهه آهي ته سنڌ جي ڪوٽا تي ملڪ جي ٻين تعليمي ادارن ۾ سنڌ جي مقرر نوجوانن کي داخلائون نه ملڻ تي معاملو عدالت ۾ پهتو آهي ۽ اهو ئي حقن جي حاصلات لاءِ موزون پليٽ فارم آهي، هنيئر جڏهن معزز عدالت معاملي تي حڪم جاري ڪيا آهن، انهن مان اميد جاڳي پئي آهي ته سنڌ جي نوجوانن کي ان جو حق ملندو ۽ اهو بهترين تعليمي ادارن ۾ پڙهي ملڪ جي ترقي لاءِ پنهنجو ڪردار ادا ڪندو. ،