تازيون خبرون

Daily Archives: April 3, 2015

ليجنڊ ڪرڪيٽر سچن ٽنڊولڪر کي ڪوچ بڻائڻ واري خبر اپريل فول ثابت ٿي

نئين دلي: ڪرڪيٽ جي دنيا جي عظيم رانديگر سچن ٽنڊولڪر کي ڀارتي ٽيم جو ڪوچ بڻائڻ جي خبر جڏهن سامهون آئي ته ڀارتي ڪرڪيٽ شوقينن سک جو ساهه کنيو پر انهن جي اها خوشي ان وقت برقرار نه رهي سگهي جڏهن ان خبر جي حقيقت کلي ته ٽنڊولڪر ڪوچ ته نه بڻيو پر پهرين اپريل تي ڪرڪيٽ شوقين بيوقوف ضرور بڻيا، ورلڊ ڪپ جي سيمي فائنل ۾ ڪينگروز جي هٿان شڪست تي پوري ڀارت ۾ ڏک واري لهر ڇانهيل هئي ۽ ڀارتي جي پنهنجي جي جنهن بيٽنگ تي گهمنڊ هو اها ئي بيٽنگ آسٽريليا جي طوفاني اسپيل سامهون ڪجهه نه ڪري سگهي جنهن کانپوءِ ڀارتين پنهنجي ٽيم تي سخت تنقيد ڪئي اڃان سيمي فائنل ۾ شڪست کي ڪجهه ئي ڏينهن گذريا هئا ته اوچتو پهرين اپريل تي ليجنڊ بيٽسمين سچن ٽنڊولڪر کي ڀارتي ٽيم جو ڪوچ بڻائڻ جي خبر سامهون ئي جنهن کي ڀارتين  ٽيم جي شڪست کانپوءِ بيٽنگ جو نقص ختم ڪرڻ لاءِ اهم قرار ڏنو جڏهن ته ڀارتين جي اها خوشي  گهڻي دير تائين انهن وٽ نه رهي سگهي ڇو ته اهو فيصلو ڀارتي بورڊ نه ڪيو هو پر هڪ جعلي پريس رليز ذريعي ٽنڊولڪر کي ڪوچ بڻائڻ جي خبر هلائي وئي هئي جنهن جا پول پڌرا ٿيڻ تي نه صرف ڀارتي شوقينن کي سخت ڌچڪو لڳو پر ٽنڊولڪر به عوام سان گڏوگڏ بيوقوف بڻجي ويو.

 

فاسٽ بالر محمد عامر ڊوميسٽڪ ڪرڪيٽ ۾ بهترين بالنگ جو مظاهرو ڪندي 6 وڪيٽون وٺي پنهنجي ٽيم کي فائنل ۾ پهچائي ڇڏيو

لاهور  (اسپورٽس نيوز) فاسٽ بالر محمد عامر ڊوميسٽڪ ڪرڪيٽ ۾ بهترين بالنگ جو مظاهرو ڪندي 6 وڪيٽون وٺي پنهنجي ٽيم کي پي سي بي گريڊ ٽو جي فائنل ۾ پهچائي ڇڏيو. ايل سي سي گرائونڊ لاهور ۾ کڏيل پي سي بي گرڊ ٽو جي پهرين سيمي فائنل ۾ محمد عامر 14 اوورن ۾ 47 رنسون ڏئي 6 رانديگرن کي آئوٽ ڪيو. برسات سبب متاثر ان ميچ کي هڪ اننگ تائين محدود ڪيو ويو هو، جنهن ۾ عامر شاندار بالنگ جو مظاهرو ڪندي 6 وڪيٽون وٺي ٽيم کي فتح ڏياري. صحافين سان ڳالهائيندي محمد عامر چيو ته منهنجو سڄو ڌيان فٽنس ۽ ڪارڪردگيءَ تي آهي، تازي ڪارڪردگيءَ مان مطمئن آهيان، هن چيو ته هن وقت تائين مون کي جيترا به موقعا مليا آهن مون ڪارڪردگي ڏيکاري آهي ۽ باقي ڪم سليڪشن ڪميٽيءَ جو آهي، مان پنهنجي ڪارڪردگي ۽ اخلاق سان ٽيم ۾ جاءِ ٺاهيندس.

 

ڪمند ساڙڻ باوجود حڪومت خاموش

 

ميرپورخاص جي هلندڙ 4 شگرملن مان 3 شگرملون جن ۾ ميرپورخاص شگرمل، العباس شگرمل ميرواهه گورچاڻي، ڊگهڙي شگرمل، ڊگهڙي بند ٿي ويون آهن. جڏهن ته نجما شگرمل 2011ع وڏين برساتن کانپوءِ بند پيل آهي. هن وقت ضلعي ۾ صرف هڪ شگرمل ٿرپارڪر شگرمل ڪوٽ غلام محمد هلي رهي آهي. جيڪا به اڄ بند ٿيڻ جو امڪان آهي. جڏهن ته اگهن جو معاملو حل نه ٿيڻ جو 10 کان 15 هزار ايڪڙن تي بيٺل ڪٽائي کان آبادگارن کي ڪروڙين رپين جا چٽا امڪان آهن. ڪمند جي اگهن جو معاملو به اڃا تائين عدالتن ۾ هلندڙ آهي. جڏهن ته شگرملون ڪمند في مڻ جي رقم هڪ سئو 55 رپيا ڏيئي رهيون آهن. هاءِ ڪورٽ جي فيصلي اچڻ باوجود رهيل رقم شگرملون نه پيون ڏين. جڏهن ته ٻين فصلن جا ريٽ به نه ٿيڻ ڪري آبادگار ڪنگال بڻجي ويا آهن. شگرملون دير سان هلڻ ۽ جلدي بند ڪرڻ تي سنڌ حڪومت ڪو به نوٽيس نه ورتو آهي ۽ آبادگار پريشان آهن. هوڏانهن چئمبر آف ايگريڪلچر جي مرڪزي ايڊيشنل سيڪريٽري زاهد ڀرڳڙي ميڊيا سان ڳالهائيندي چيو ته سنڌ جي آبادگارن جي نصيب ۾ عدالتن ۾ ڌڪا کائڻ آهي. هن چيو ته شگرملون بند ٿيڻ ڪري منهنجو پنهنجو 26 ايڪڙن تي بيٺل ڪمند جو فصل مون کيڙائي ڇڏيو آهي ۽ ان زمين ۾ ٻيو فصل پوکي رهيو آهيان. هن چيو ته 10 کان 15 سيڪڙو ڪمند بيٺل آهي ۽ شگرملز مالڪن ملون بند ڪري آبادگارن کي نقصان ڏنو آهي. هن چيو ته پ پ کي اسان ووٽ ڏنو ۽ هنن اسان کي ڪنگال بڻائي ڇڏيو آهي. هن چيو ته پنجاب ۾ ڪمند جو ريٽ اڄ 2 سئو 30 رپيا هلي رهيو آهي ۽ اسان هڪ سئو 55 رپين ۾ ڪمند ڏيون پيا. پر اهو به ڪير کڻڻ لاءِ تيار ناهي. جنهن ڪري زمينون خالي ڪرڻ لاءِ ڪمند جو فصل  کيڙائي رهيا آهيون. هن چيو ته شگرملن اربين رپيا ڪمايا آهن پر آبادگارن کي اگهه نه ڏنو پر ڪمند به نه ٿا کڻن. اهڙي صورتحال رهي ته ملڪ ۾ کنڊ ٻاهران گهرائڻي پوندي. سنڌ جو آبادگار ڪمند جو فصل پوکڻ کان توبهه ڪري چڪو آهي. هن مطالبو ڪيو ته جيستائين ڪمند اچي پيو ايستائين شگرملون هلايون وڃن.

 

قومي اپريل فول؛نذير ناجي

پهرين اپريل تي ڪوڙ ۽ ٺڳيءَ جي آزادي هوندي آهي.انهن ماڻهن کي ڇڏيو جيڪي سال جا365 ڏينهن ڪوڙ ۽ ٺڳيءَ ۾ رڌل رهن ٿا ۽ جيڪي سادا طبيت ماڻهو سال ۾ هڪ ڏينهن جيڪڏهن ننڍڙي ڪا ٺڳي ۽ ڪوڙ ڳالهائي پنهنجي دل وندرائين ٿا ته اتي پنهنجي تهذيب،سان گڏوگڏ عقيدت جا سوال به ڪر کڻي بيهي رهن ٿا ۽ نصيحتون ڪيون وينديون آهن ته پهرين اپريل ته انگريزن جي رسم آهي، ان جو اسان جي تهذيب سان ڪو به واسطو ناهي.اها رسماسان جي عقيدن جي به خلاف آهي .اهڙن ماڻهن کان پڇڻ گهرجي ته توهان جيڪي سال جا 365 ڏينهن ڪوڙ ۽ ٺڳيءَ ۾ گذاريو ٿا اهي ڪهڙي تهذيب،ريتن ۽ رسمن مطابق آهن ۽ اهي ڪهڙا عقيدا آهن جيڪي جائز به آهن؟توهان ڪنهن به بازار ۾ وڃي ڪنهن به شيءَ جي قيمت معلوم ڪريو رڳو ڏهن دڪانن تي وڃو هر دڪان واري جي قيمت مختلف هوندي.ان کان وڏو اپريل فول ٻيو ڪهڙو ٿي سگهي ٿو؟ جيڪڏهن توهان ڪنهن به ٻاهرين ملڪ جي ڪنهن ڪمپنيءَ عجي ڪا شيءَ وٺو ته پوري بازار ته ڇا پر پوري شهر ۾ قيمت ساڳي هوندي.مقامي ڪمپنين جا جوس ،پاڻي، ڪولڊ رنڪس،وٺو ته هر ڪمپنيءَ جون قيمتون مختلف هونديون.پر ڪنهن وڏي ٻاهرين ملڪ جي ڪمپنيءَ جي جيڪڏهن پاڻيءَ جي بوتل به وٺندو ته سڄي ملڪ۾ قيمت هڪ ئي هوندي.اپريل فول، سال ۾ رڳو هڪ ڀيرو نوجوان ڇوڪرا ۽ ڇوڪريون ملهائين ٿا؟ يا پورو سال ڪوڙ ڳالهائيندڙ ڪاروباري ماڻهو؟ سڀني کان وڌيڪ اپريل فول ملهائڻ وارو ڪم اسان جا حڪمران ۽ سياستدان ڪندا آهن.جڏهن ڪووزير ٻن ٽن مهينن ۾ توهان جا مسئلا حل ڪرڻ جا وعدا ڪندو آهي ته اهو توهان کي پهرين اپريل نه هوندي به اپريل فول بڻائي رهيو هوندو آهي.تيل ۽ ڊيزل جو وڪرو به حڪومت وٽ آهي اها هر مهيني جي پهرين تاريخ تي اپريل فول جيان ملهائيندي آهي.پوري دنيا ۾ تيل جون قيمتون گهٽ ٿي رهيون آهن ۽ اسان جي حڪومت وڌائي رهي آهي ۽ جڏهن اهي وڌن ٿيون ته پوءِ وڌنديون ئي رهن ٿيون.جڏهن چونڊن جو مرهلو ايندو آهي ته اسانجون سياسي پارٽيون ۽ سمورا اميدوار عوام کي اپريل فول بڻائڻ شروع ڪندا آهن ۽ هڪ جي مٿان ٻيو ڪوڙ گهڙي توهان کان واهه واهه وٺندا آهن.جيڪا پارٽي سڀ کان وڌيڪ اپريلفول بڻائيندي آهي سڀني کان وڌيڪ ووٽ ان کي ئي ملندا آهن.ان ئي اعتبار تي اسان جي عوام اپريل فول ياگاسپ،ٺڳين جي گهڻي قدردان آهي.هر جلسي ۾(ن) ليگ جي اڳواڻن هڪ ئي ڪوڙ کي مختلف طريقن سان ورجايو.هڪ جلسي ۾ چيو ويوته اسان لوڊشيڊنگ 6مهينن ۾ ختم ڪنداسين ٻئي جلسي ۾ اهو ئي وقت وڌي ٽي سال ٿي ويو.مختلف وقتن جو هڪ ئي واعدو ساڳئي ئي وقت ٽي وي تي به ڏيکاريو ۽ ٻڌايو ويندو هو.سڄي ملڪ جا ماڻهو ان کي هڪ وقت گڏ ڏسندا ۽ ٻڌندا هئا۽ اعتبار ڪندا هئا.جيڪڏهن مان ايئن چوان ته غلط نه ٿيندو ته اسان جي سياسي ۽ سرڪاري زندگيءَ ۾ اپريل فول مشهور مشغلو آهي.انهن شعبن ۾جيتري سنجيدگي سان اپريل فول ملهايو ويندو آهي، انگريز اهڙي طرح نه ملهائيندا آهن.انهن ڪوڙ ڳالهائڻ لاءِ سال۾رڳو هڪ ڏينهن چونڊيو آهي ۽ ان ڏينهن دل کولي ڪوڙ ڳالهائيندا آهن. باقي سڄو سال ڪوڙ کان ڪنهن حد تائين پاسو ڪندا آهن. اسان سڄو سال ڪوڙ ڳالهائيندا آهيون، پر جڏهن پهرين اپريل تي ڪوڙ ڳالهائيندا آهيون ته ان تي تمام گهڻي سنجيدگيءَ سان وڏا اعتراض  ۽ سوال اٿندا آهن ته اها ته انگريزن جي روايت آهي مطلب سڄو سال ڪوڙ ڳالهائڻ ٺيڪ آهي پر ڪوڙ لاءِ ڪو هڪ ڏينهن چونڊ ڪرڻ، ڌارين جي روايت آهي.اسان جي زندگين مان سچ کي ايڏي ته بي رحمي سان ٿڏي ڦٽو ڪيو ويو آهي جو سچ ڳالهائيندڙ کي ڪجهه ئي وقت۾ معاشري کان ئي ٻاهر ڪڍيو ويندوآهي.

مثال طور: جڏهن ڪو کير وارو توهان کي اهو ٻڌائي ته  هن کير ۾ هيترو پاڻي ملايوآهي ته ان جو ڇا حال ٿيندو؟ڪجهه ئي ڏينهن ۾ ان کان کير وٺڻ بند ڪيوويندو.چپلون وڪڻندڙ جيڪڏهن توهان کي اهو ٻڌائي ته هن چپل جي تري ۾ چمڙو نه پر گتو لڳايوآهي ته ٻن ڏينهن ۾ هو بيڪار ٿي گهر ويهي رهندو.اپريل فول جي ڊرامي ٺاهڻ لاءِ وڏي ذهانت جي ضرورت  هوندي آهي پر ملاوٽ ۽ ڪاروباري دوکي جي لاءِ بيحس ۽ پٿر دل هجڻ ڪافي آهي.ان جو تازو مثال ڳئون ۽ مينهن جو گوشت کائيندڙن کي گڏهه جو گوشت کارائڻ آهي.اڄ ڪلهه گهڻو ڪري اخبارن ۾اهڙيون خبرون پڙهڻ لاءِ ملن ٿيون.پهرين اپريل  تي ته رڳو ٻين کي بيوقوف ٺاهي کل ڀوڳ وارو ڪم ڪيو ويندو آهي.پر گڏهه جو گوشت کارائڻ وارا ته گڏهه کي گڏهه بڻائيندا آهن.جيڪو ماڻهو گڏهه جوگوشت مينهن جو گوشت سمجهي وٺي ٿو، اهو گڏهه ناهي ته ٻيو ڇا آهي؟ ۽ جنهن کي گڏهه جو گوشت کائڻ کانپوءِ به خبر نٿي پوي ته هن ڪنهن جو گوشت کاڌو.ان کي مان ڇا چوان؟ گڏهه جو به پيءُ!. ۽ جيڪو هي اسان چونڊن وارن ڏينهن ۾ ووٽ وجهڻ ويندا آهيون، ڇا اها حقيقت ناهي ته گهڻا ووٽ گڏهه کي ئي ملندا آهن؟اهي ئي وڏي انگ ۾ ڪامياب به ٿيندا آهن.اهي ئي حڪومت ٺاهيندا آهن ۽ جيترو وقت حڪومت ۾ هوندا آهن اسان کي گڏهه بڻائيندا رهندا آهن.سچ ٻڌايو ڇا ووٽ ڏيڻ مهل اسان اها پڪ ڪندا آهيون ته اهو اميدوار حڪومت ۾ ايندي ئي اسان جا مسئلا حل ڪندو؟ پر جيئن ئي مختلف پارٽين جا اميدوار ڪامياب ٿي  هڪ پارٽي ۾ پهچندا آهن ته پوءِ پنهنجي اقتدار جو پورو وقت اسان کي اپريل فول بڻائيندا رهندا آهن.گهڻو وقت نه ٿيو آهي جو هڪ احتجاجي تحريڪ شروع ٿي. عوام وڏي جوش ۽ جذبي سان مظاهرا شروع ڪيا،پارليامينٽ ۾ جيڪي ماڻهو اقتدار ۾ يااقتدار جي مخالفت ۾ ورهايا ويٺا هئا، ڏسندي ئي ڏسندي انهن پنهنجا سمورا ليبل لاٿا. عوام لاءِ اهو سڃاڻڻ ڏکيو ٿي پيو ته ڪير اقتدار جي حمايت ۾ ۽ ڪير مخالفت ۾ ڳالهائي رهيو آهي.سڀ هڪ ئي ڳالهه چئي رهيا هئا ته پارليامينٽ تي ڪک به نه سهنداسين نه ئي ڪنهن کي اڱر کڻڻ ڏينداسين.مطلب ته اقتدار جي حمايت ۽ اقتدار جي مخالفت ۾ ڳالهايندڙ سڀ ڊرامي باز هئا اهو سڀ ناٽڪ هو؟حقيقت ۾ سڀ هڪ آهن.هڪ ٻئي جي خلاف تقريرون ڪري عوام کي ڏٽا ڏنا ويا.جيئن ئي وقت آيو ملاوٽ ڪرڻ وارن کير وارن ۽ گڏهه جو گوشت وڪرو ڪندڙن جيان سڀ هڪ ٿي ويا ۽ عوام لاءِ ڪا ٻي راهه ئي نه ڇڏي وئي.سڀني ملي ڪري عوام کي اپريل فول بڻايو. انهن ڏينهن ۾ هر ڏينهن اسان لاءِ اپريل فول هو ۽ ڪوڙ وارو اپريل فول به نه بلڪي قومي اپريل فول.اڄ پهرين اپريل آهي ۽ اسان کي اپريل فول بڻائڻ لاءِحڪومت ايترو وڏو  وار ڪيو آ جو شايد ئي ڪنهن ٻئي ملڪ جي حڪومت  پنهنجي عوام کي ايترو بيوقوف بڻايو هجي، جيئن اسان اڄ بڻجنداسين.اسان کي قطر جي هيٺين سطح جي اها گئس ڏيڻ جو سلسلو شروع ڪيو ويندو، جيڪا معيار جي حساب سان تمام گهڻي پوئتي پيل هوندي پر ان کي اسان دنيا جي ٻين ملڪن جي مقابلي ۾سڀ کان وڌيڪ قيمت ڏئي خريد ڪيو آهي. مون کي ان جي گهڻي  ڄاڻ ناهي پر ٻڌڻ ۾ آيو آهي ته ٻيا ملڪ جيڪا گئس وٺن ٿا ان کي اتي ئي ريفائين ڪرائي ورتو ويندو آهي.جڏهن ته اسان اها گئس ساڳي حالت ۾  وٺنداسين ۽ هتي ان کي ريفائين ڪرائڻ جو خرچ ڀرينداسين.ان جو جيڪو به معيار هجي ان اعتبار سان چيو ته اهو پيو وڃي ته اسان 8ڊالر في يونٽ  وٺي رهيا آهيون پر جڏهن مرحلي مان گذاري ويندي ته ان جي قيمت 12 يا 13 ڊالر في يونٽ وڃي بچندي. ڇا اهو قومي اپريل فول ناهي؟ دنيا ۾ ڪوئلي جي ڪجهه وڏن ذخيرن مان هڪ اسان جو ملڪ به آهي.اسان انمان بجلي ٺاهڻ شروع ڪيون ته  ڪيترين ئي صدين تائين پنهنجي پيرن تي بيهي سگهون ٿا.اها ٽيڪنالاجي اسان وٽ موجود آهي ته زمين ۾ لڪيل ڪوئلي کي زمين جي اندر ئي ڪيميائي ٽريٽمينٽ ڏئي گئس ۾ مٽائي سگهون ٿا مطلب ته ڪوئل سڙڻ سان  جيڪا زهريلي آلودگي ڦهلجي ٿي اسان ان کان محفوظ رهنداسين.ان عمل ذريعي زمين مان ڪوئلو نه پر گئس ڪڍي ويندي.ان سان ڊيزل به بڻائي سگهجي ٿو ۽ بجلي به، پر اسان جون حڪومتون  ان تي پئسو خرچ ڪرڻ لاءِ تيار ئي ناهن.اهو اپريل فول ناهي ته ٻيو ڇا آهي؟جڏهن ڪو ڪنهن نوجوان کي نصيحت ڪندو آهي ته اپريل فول ، انگريزن جي رسم آهي، اسان کي انهن جي نقل نه ڪرڻ گهرجي.جواب ۾ اعتراض ڪرڻ وارن کي اهو ئي چئي سگهجي ٿو ته توهان ته سال  جا 365 ڏينهن اپريل فول ملهائيندا آهيو، اسان جو هڪ اپريل فول به توهان کي ڏکيو ٿو لڳي.

 

بهانا ۽ افسانا؛حسن نثار

”اسان جي خلاف سازش ٿي وئي“

”اسان کي پاڻ ۾ ويڙهايو ويو“

انهن ٻن جملن اسان کي تباهه ڪري ڇڏيو  ۽ مون اڄ تائين ڪنهن کي اهو چوندي ناهي ٻڌو ته انهن ٻن جملن مان اثر انداز ٿيڻ واري سوچ تمام بيمار،ڪاري،دز چڙهيل، اڻبرابري، ۽ بزدلاڻا آهي. پرائمريءَ جو ٻار به پنهنجي ڪمي ، ڪوتاهي،ڪمزوري، نااهلي، غيرذميداراڻي،ناڪامي،۽ نالائقيءَ تي  اهڙي بيڪار ۽ بي شرميءَ واري طريقي سان پردو ناهي وجهندو، جهڙي طرح اسان صدين کان ڪندا پيا اچون. ان رويي اسان مان پاڻ کان پڇاڻو ۽ پاڻ تي نظر وجهڻ ڦري ڇڏيو آهي. ۽ جڏهن اهو سڀ ڦرجي وڃي ته باقي اهو ئي بچندو آهي جيڪو اسان جي پراڻي ڦاٽل ۽ چتيون لڳل جهوليءَ ۾هن وقت موجود آهي. کلي دل سان پنهنجي هار، هيٺاهين،بدناميءَ کي قبولي انهن جي ڪارڻن، کي ايمانداريءَ سان ڳولي انهن جو ازالو ڪرڻ، هار واري داغ کي ڌوئڻ ڏانهن هڪ بهتر قدم هوندو آهي پر جتي سوچ ئي اها هجي ته……..”آهي ته اسان بهترين، جيتوڻيڪ اسان کي فائول ذريعي فيل قرار ڏنو ويو ۽ اسان سازش جو شڪار ٿياسين ۽ پوءِ اهڙي بهاني بازي ئي ته اسان کي ورهائي اسان تي اهي سڀ  مڙهيا ويا. اها انهن ماڻهن جي سوچ ۽ فڪر آهي، جن کي عزت سان هارائڻ به نٿو اچي ڇو ته وڙهي هارائڻ ۾ به وڏي عزت ۽ مان آهي. جنهن ڏانهن عديم هاشمي به اشارو ڪري ٿوته:گرو تو ساتهه گري شان شهسواري بهي،زوال آئي تو پوري ڪمال مين آئي. شهاب الدين غوري پرٿوي راج چوهان جي مقابلي ۾ ترائن جي جنگ ۾ وڏي هار کاڌي ۽ اهڙي طرح زخمن  ۾ چور پنهنجي ئي رت ۾ ٻڏل شهاب الدين غوري کي بيهوشيءَ واري حالت ۾ ان جو  ئي ڪو جان نثار هارايل ميدان مان حفاظت سان ٻاهر ڪڍي آيو.هارايل شهاب الدين غوري جو ردِ عمل تاريخ ۾ وڏي احترام سان محفوظ آهي.هن نه ئي ڪو جواز اڳيان رکيو، نه ئي وري ڪو معافي وارو بهانو گهڙيو نه ئي وري ڪنهن سازش جو سهارو ورتو.ويڙهاڪ مڙس ماڻهو جيان پنهنجي هار قبولي ۽ ان هار جو زخم تازو رکڻ لاءِ اهو لباس نه مٽائڻ جو به فيصلو ڪيو، جيڪو هارائڻ وقت سندس بدن تي هو.هن ٻئي جنگ تائين اهو ئي رت ۾ ٻڏل لباس پنهنجي بدن تي پهريل رکيو.نرم مخمل واري هنڌ بدران پٿريلي زمين تي ستو، هر عيش ۽ آرام کي پاڻ تي حرام سمجهي، تلوار بازي لاءِ پاڻ کي وقف ڪري ڇڏيو ۽ پوءِ زخمي شينهن جيان واپس انهيءَ ميدان ۾ پهتو……اهي ئي ترائن،اهو ئي سورمو پرٿوي راج چوهان جيڪو پنهنجي زندگيءَ ۾  ئي ڪنهن ديو جي ڪردار جي روپ جيان گيتن ۽ ڪهاڻين جو عنوان بڻجي چڪو هو پر هن ڀيري فتح جي ديوي وار کولي شهاب الدين غوري جي مضبوط پيرن ۾ جهڪيل هئي ۽ پرٿوي راج چوهان هميشه هميشه لاءِ ڪا وسريل ڪهاڻي ۽ داستان بڻجي چڪو هو.اسان اڄ تائين پنهنجي اندر ۾ جهاتي پائڻ لاءِ تيار ناهيون. جيڪو زوال جي ذميواري کڻڻ لاءِ تيار ناهي، اهو ان جا ڪارڻ ڌوڙ ڳوليندو ۽ جيڪو پنهنجي بيماري جي سڃاڻپ کان ئي بي خبر هجي ان جو علاج ڪير ڪري؟ جيڪو پنهنجي ڪمزورين  جي سڃاڻپ کان پاسو ڪري،پر عذاب مٿان عذابن لاءِ تيار رهي. ڪڏهن سوچيو اٿو ته اها سازش ڇا هوندي آهي؟ بنيادي طور تي سازش حڪمتِ عملي ئي هوندي آهي.جيڪڏهن مان توهان کي پسند ڪيان ٿو ته مان توهان جي رٿا بنديءَ کي ”اسٽريٽجي“ چوندس ۽ توهان جي ڪامياب  رٿابنديءَ کي ڪامياب ” اسٽريٽجي“ قرار ڏيندس پر جيڪڏهن مان توهان کي پسند نٿو ڪريان ته مان توهان جي ”اسٽريٽجي“ کي سازش جو نالو ڏئي پوري پڪائي سان پاڻ کي ذميوارين کان آجو قرار ڏيندس. محبت ۽ جنگ ۾ سڀ ڪجهه جائز هوندو آهي.اسٽريٽجي چئون يا سازش، ٻنهي لاءِ تمام گهڻي ذهانت جي ضرورت هوندي آهي ۽ جيستائين ان الزام جو تعلق آهي ته اسان کي مختلف طريقن سان پاڻ ۾ ويڙهايو ويو آهي ۽ اڄ به ويڙهايو پيو وڃي ته معاف ڪجو….. ڇا اسان چريا آهيون؟بي عقل آهيون؟ اسان جو ذهني توازن ٺيڪ ناهي؟ ٻار يا نابالغ آهيون؟معذور آهيون؟ اسان جي واتن مان گگ پئي ڳڙي جو صدين کان پاڻ ۾ وڙهندا پيا اچون ۽ وڙهندا پيا رهون جڏهن ته اهو ڄاڻون به ٿا ته اسان کي پاڻ ۾ ويڙهايو پيو وڃي ته پوءِ ڏوهه ڪنهن جو ٿيو؟ گهٽ ۾ گهٽ لارنس آف عريبيا جو ڪو ڏوهه ناهي. هڪ ٻيو سوال به غور ڪرڻ جهڙو آهي ته پاڻ ۾ وڙهڻ ،رتو ڇاڻ ته اسانجو“ڪلچر” رهيو آهي. اسانجو ڪهڙو اهڙو تاريخي مرڪز آهي جيڪو جنگ جو ميدان نه رهيو آهي ۽ هر ڀيري نه رهيو آهي پر اهڙي خراب طرح پاڻ ۾ ئي”جهيڙا،جهٽا،ڦر لٽ“ کانپوءِ به  اسان پنهنجي جڳهه تي باوقار رهيا هئاسين.ڪٿي عثمانين،ڪٿي، صفوعين، ڪٿي مغلن جي حڪومت رهي ۽ اها به اهڙي جو آسمان رشڪ ڪري، پوءِ قصو ڇا آهي؟ ڪٿي ايئن ته ناهي ته عالم اسلام لاءِ پنهنجي پنهنجي شريف حڪمران طبقي مان جان ڇڏائڻ ضروري ٿي پيو ۽ جيستائين اهي يا انهن  جيان ٻين مان جان آجي نه ٿئي تيستائين پنهنجي جان عذاب ۾ رهندي.اسان جي دين ۾ ته بادشاهن، اميرن،آمرن جي اجازت ناهي پر گهڻو ڪري اهو ئي مڙهيو ويندو آهي يا وڌ ۾ وڌ اهو ته ڪٿي ڪٿي ٻن مونهن واري جمهوريتن جي روپ ۾ خاندانن جو شاهي تسلسل، جڏهن ته اهي اولهه ۾ رهندڙ ماڻهو جن کي  بادشاهن کانسواءِ ٻي ڪنهن شيءَ جي خبر نه هئي، حقيقي جمهوريت کي حاصل ڪري ويا ۽ اڄ جيڪڏهن ڪٿي بادشاهه يا ملڪا آهي ته اهو به هڪ ڏيکاءُ ئي آهي.آخر ۾ هڪ پراڻو جملو ياد اچي پيو ته:

“NENETY_NINE PERCENT OF DEATHS COME FROM THOSE WHO HAVE THE HABIT OF MAKING EXCUSES”

روزاني جنگ جي ٿورن سان