تازيون خبرون

Daily Archives: April 3, 2015

يمن صورتحال: حڪومت پاران 6 اپريل تي پارليامينٽ جو گڏيل اجلاس گهرائڻ جو فيصلو

اسلام آباد (بيورو) حڪومت يمن جي صورتحال تي 6 اپريل تي پارليامينٽ جو گڏيل اجلاس گهـُرائڻ جو فيصلو ڪري ورتو، وزيراعظم نواز شريف جو چوڻ آهي ته ڪنهن به فيصلي کان اڳ قومي مفاد مقدم آهي، سعودي عرب کي خطري جي صورت ۾ پاڪستان سخت ردعمل ظاهر ڪندو. پِي ايم هائوس اسلام آباد ۾ وزيراعظم نواز شريف جي صدارت هيٺ اعليٰ سطحي اجلاس ٿيو. اجلاس ۾ فيصلو ڪيو ويو ته يمن جي صورتحال تي 6 اپريل سومر ڏهاڙي پارليامينٽ جو گڏيل اجلاس گهـُرايو ويندو جنهن ۾ ميمبرن کي وچ اوڀر جي صورتحال بابت بريفنگ ڏني ويندي ۽ سعودي عرب جي مدد واري درخواست تي انهن کان راءِ ورتي ويندي. اجلاس کي خطاب ڪندي وزيراعظم نواز شريف چيو ته ڪنهن به فيصلي کان اڳ پاڪستان جو قومي مفاد مقدم آهي. هن چيو ته سعودي عرب جي علاقائي صورتحال جو هر حال ۾ بچاءُ ڪيو ويندو ۽ ان کي خطري جي صورت ۾ پاڪستان سخت ردعمل ظاهر ڪندو. نواز شريف چيو ته پاڪستان سعودي اختيارين سان مسلسل رابطي ۾ آهي ۽ سمورا فيصلا پاڪستاني عوام جي خواهشن موجب ڪيا ويندا. اجلاس ۾ بچاءَ واري وزير خواجا آصف، پرڏيهي صلاحڪار سرتاج عزيز ۽ خاص معاون طارق فاطمي شرڪت ڪئي جڏهن ته آرمي چيف جنرل راحيل شريف، ايئر چيف مارشل سهيل امان ۽ سامونڊي فوج جو وقتي سربراهه به شريڪ ٿيا. اجلاس کي بچاءَ واريَ وزير خواجا آصف ۽ پرڏيهي صلاحڪار سرتاج عزيز سعودي عرب جي دوري بابت تفصيلي بريفنگ ڏني. اجلاس ۾ يمن ۾ ڦاٿل پاڪستانين جي واپسي لاءِ کنيل قدمن جو به جائزو ورتو ويو.

 

پ پ قيادت ۾ ڪي به اخلات ناهن، اين اي 246 تي پ پ جو اڻڌريو ڪردار هوندو: وڏو وزير

لاڙڪاڻو(بيورو) سنڌ جي وڏي وزير سيد قائم علي شاهه چيو آهي ته بلاول ڀٽو زرداري ۽ آصف علي زرداري ۾ ڪو به اختلاف نه آهي مخالف غلط پروپيگنڊا ڪري رهيا آهن، بلاول ڀٽو زرداري چيئرمين ۽ آصف علي زرداري شريڪ چيئرمين آهي جن جي اڳواڻي ۾ پ پ پ وڌيڪ مضبوط ٿي رهي آهي. پ پ پ جا ڪارڪن ۽ اڳواڻ اهڙن ماڻهن کي سڃاڻي چڪا آهن جيڪي عوام کي روزانو ورغلائن پيا، ان قسم جا ماڻهو پنهنجن مقصدن ۾ ناڪام ٿيندا، اهڙن خيال جو اظهار هن ڪالهه پاڪستان انجنيئرنگ ڪائونسل طرفان چانڊڪا ميڊيڪل ڪاليج آڊيٽوريم هال لاڙڪاڻو ۾ منعقد ڪيل سيمينار کي خطاب ۽ صحافين  سان ڳالهائيندي ڪيو، هن وڌيڪ چيو ته ڪراچي جي اين اي 246 جي ضمني چونڊن ۾ پ پ پ ايم ڪيو ايم جي حمايت نه ٿي ڪري، صرف هڪ سيٽ تي ضمني چونڊ آهي ان لاءِ پنهنجو اميدوار نه پيا آڻيون جڏهن ته ملڪ ۾ بلدياتي چونڊيون ٿين يا عام چونڊون ٿين پ پ پ مڪمل طور تي تيار آهي، هن چيو ته 4 اپريل تي شهيد ذوالفقار علي ڀٽو جي 36 هين ورسي واري تقريب ڳڙهي خدابخش ڀٽو ۾ ملهائي ويندي، ورسي جي ڏينهن صبح جو 9 وڳي قرآن خواني سان پروگرام جو آغاز ڪيو ويندو جيڪو شام جو 6 وڳي پڄاڻي ٿي پهچندو، 2 وڳي عام جلسو شروع ٿيندو جنهن ۾ سموري ملڪ مان ايندڙ شاعر شهيد ذوالفقار علي ڀٽو جي ياد ۾ مقالا پڙهندا ۽ شاعري سان ڀيٽا ڏيندا، جڏهن ته مرڪزي اڳواڻ ساڍي 4 وڳي ڪارڪنن کي خطاب ڪندا جنهن لاءِ انتظام گذريل سالن کان وڌيڪ بهتر ڪيا ويا آهن، هن چيو ته 4 اپريل عوام جي لاءِ اهم ترين ڏينهن آهي عوام لکن جي تعداد ۾ شهيد ذوالفقار علي ڀٽو سان محبت جو اظهار ڪرڻ لاءِ مزار تي ايندو آهي جنهن سبب سڪيورٽي جا به سخت انتظام ڪيا پيا وڃن، هن چيو ته ملڪ ۾ نيون نيون ڊزائنون متعارف ڪرايون جن سان ملڪ ترقي ڪري هتان جي انجنيئرن ۾ وڏو ٽئنلٽ آهي انجنيئرن ملڪ اندر ۽ ملڪ کان ٻاهر نالو ڪمايو آهي جن جون خدمتون ساراهه جوڳيون آهن، هن چيو ته انجنيئرن مان جيڪي 11 ۽ 14 گريڊ ۾ ڪم ڪري رهيا آهن انهن جا گريڊ وڌائڻ لاءِ سنڌ اسيمبلي ۾ بل پيش ڪنداسين، گريڊ کان 20 گريڊ تائين جي ڪچن ملازمن جيڪي ايڊهاڪ ۽ ڪانٽريڪٽ تي ڪم ڪري رهيا آهن انهن جو بل سنڌ اسيمبلي ۾ پيش ڪري انهن کي پڪو ڪيو ويندو، هن چيو ته 17 گريڊ جون خالي پيل پوسٽون سپريم ڪورٽ جي حڪم تحت سنڌ پبلڪ سروس ڪميشن ذريعي ڀريون وينديون، انجنيئرن جون پگهارون ۽ الائونس وڌايا ويندا ۽ کين ٽيڪنيڪل الائونس ڏيڻ لاءِ ويچاريو ويندو، هن چيو ته اسان جو ملڪ زرعي  آهي زراعت کي ترقي وٺرائڻ لاءِ اهم ڪردار ادا ڪن. انجنيئرن کي رتوديرو يا نئون ديرو ۾ انجنيئر ڪالوني لاءِ پلاٽ ڏنو ويندو، سنڌ جي وڏي وزير سيد قائم علي شاهه آڏو چيئرمين پاڪستان انجنيئرنگ ڪائونسل سيد عبدالقادر شاهه انجنيئرن کي درپيش مسئلن جي متعلق آگاهي ڏني جنهن ۾ 11 کان 14 گريڊ کي اپ گريڊ ڪرڻ سميت ڪالوني وارا مطالبا پيش ڪيا ويا، آخر ۾ سنڌ جي وڏي وزير سيد قائم علي شاهه سنڌ خوش نصيب انجنيئرن ۾ لڪي ڊرا ذريعي عمري جي ٽڪيٽ، دبئي جي ٽڪيٽ، موبائلون، ليپ ٽاپ، جوسر مشينون وغيره تقسيم ڪيا، جنهن بعد وڏو وزير سيد قائم علي شاهه ڳڙهي خدابخش ڀٽو پهچي شهيد ذوالفقار علي ڀٽو، شهيد محترمه بينظير ڀٽو ۽ ٻين شهيدن جي مزارن تي حاضري ڀري گلن جون چادرون چاڙهي فاتحه خواني پڻ ڪئي.

 

سپريم ڪورٽ آئل ٽينڪرز ٽرمينل هڪ مهيني اندر شيرين جناح ڪالوني کان ذوالفقار منتقل ڪرڻ جو حڪم ڏئي ڇڏيو

ڪراچي (اسٽاف رپورٽر) سپريم ڪورٽ آئل ٽينڪرز ٽرمينل هڪ مهيني اندر شيرين جناح ڪالوني کان ذوالفقار منتقل ڪرڻ جو حڪم ڏئي ڇڏيو. جسٽس انور ظهير جمالي ۽ جسٽس مقبول باقر تي ٻڌل سپريم ڪورٽ جي 2 رڪني بئنچ ڪراچي رجسٽري ۾ آئل ٽينڪرز ٽرمينل شيرين جناح ڪالوني کان ذوالفقار آباد منتقل ڪرڻ بابت ڪيس جي ٻڌڻي ڪئي. ٻڌڻيءَ دوران سنڌ جَي ٽرانسپورٽ واري سيڪريٽري طاحه فاروق عدالت کي ٻڌايو ته شيرين جناح ڪالوني ۾ آئل ٽينڪرز بيهڻ ڪري  شهرين کي سخت تڪليفن جو منهن ڏسڻو پوي ٿو. طاحه فاروق چيو ته ذوالفقار آباد وارو نئون آئل ٽينڪرز ٽرمينل مڪمل طور تيار آهي، پر مالڪ ٽينڪرز اوڏانهن منتقل ڪرڻ لاءِ تيار ناهن. ٽرانسپورٽ واري سيڪريٽري عدالت کي اپيل ڪئي ته هو پنهنجو ڪم ڪري رهيا آهن پر ان حوالي سان آئل ٽينڪرز کي تيل فراهم ڪندڙ ڪمپنين کي به پابند بڻايو وڃي. عدالت، ٽرانسپورٽ واري سيڪريٽري جو موقف ٻڌڻ کانپوءِ آئل ڪمپنيز کي حڪم ڏنو ته 30 ڏينهن کانپوءِ ٽينڪرز کي تيل جي فراهمي بند ڪئي وڃي. عدالت، ايس ايس پي ٽريفڪ کي پڻ حڪم جاري ڪوو ته مهيني اندر آئل ٽينڪرز شيرين جناح ڪالوني کان ذوالفقار آباد منتقل ڪري رپورٽ پيش ڪئي وڃي.

 

آرمي چيف فوجي عدالتن جي ذريعي 6 دهشتگردن جي موت جي سزا جي توثيق ڪري ڇڏي

راولپنڊي(بيورو) آرمي چيف جنرل راحيل شريف فوجي عدالتن مان موت جي سزا ٻڌايل 6 دهشتگردن جي موت واري سزا جي منظوري ڏئي ڇڏي پاڪ فوج جي ترجمان آءِ ايس پي آر مطابق فوجي عدالتن مان موت جي سزا ٻڌايل 6 دهشتگرد سنگين دهشتگردي جي وارداتن ۾ ملوث هئا جڏهن ته جوابدار معصوم انسانن کي ذبح ڪرڻ، خودڪش حملن ۽ انساني جان ۽ مال کي نقصان پهچائڻ ۾ ملوث هئا جڏهن ته آرمي چيف جنرل راحيل شريف سمورن دهشتگردن جي موت جي سزا جي منظوري ڏئي ڇڏي، پاڪ فوج جي ترجمان ميجر جنرل عاصم باجوه جو چوڻ آهي ته فوجي عدالتن مان موت جي سزا ٻڌايل 6 دهشتگردي فوجي عدالت جي فيصلي خلاف اپيلٽ ڪورٽ سان رابطو ڪرڻ جو حق رکن ٿا. –

 

غازي عبدالرشيد قتل ڪيس: پرويز مشرف جا ناقابل ضمانت گرفتاري وارنٽ جاري

اسلام آباد(بيورو) ايڊيشنل ڊسٽرڪٽ اينڊ سيشن جج اسلام آباد واجد علي خان عبدالرشيد غازي قتل ڪيس ۾ اڳوڻي صدر پرويز مشرف جا ضمانت نه ٿيڻ جوڳا گرفتاري وارنٽ جاري ڪندي کيس 27 اپريل تي عدالت آڏو پيش ڪرڻ جو حڪم ڏئي ڇڏيو آهي. خميس تي اسلام آباد جي سيشن عدالت عبدالرشيد غازي قتل ڪيس جي ٻڌڻي ڪئي. جوابدار پرويز مشرف طرفان ملڪ طاهر محمود وڪالت نامو ۽ بيماري سبب پنهنجي اصيل جي حاضري کان آجو قرار ڏيڻ جي درخواست جمع  ڪرائي جنهن تي ڪيس جي مدعي جي وڪيل مولوي عبدالحق اعتراض ڪندي موقف اختيار ڪيو ته ان کان اڳ جوابدار جو وڪيل اختر شاهه ڪيس جي پيروي ڪري رهيو آهي جڏهن ته ان ڪيس ۾ نئون وڪالت نامو جمع نه ٿو ڪرائي سگهجي جنهن تي اڳوڻي صدر جي وڪيل طاهر محمود ملڪ چيو ته ڄاڻايل ڪيس سي آر پي سي تحت ٻڌڻي هيٺ آهي ۽ قانون مطابق هڪ ڪيس ۾ 2 وڪيل پيروي ڪري سگهن ٿا جنهن تي عدالت اعتراض ختم ڪندي وڪالت نامو منظور ڪري ورتو. اڳوڻي صدر جي وڪيل پنهنجي اصيل جي حاضري بابت عدالي فيصلي خلاف نظر ثاني جي اپيل داخل ڪندي موقف اختيار ڪيو ته ميڊيڪل بورڊ اڳوڻي صدر پرويز مشرف جو پهرين اپريل تي چيڪ اپ به ڪيو آهي. هن ٻڌايو ته ضمانتي رقم(مچلڪا) عدالت ۾ حاضر آهن، عدالت اڳوڻي صدر کي حاضري کان آجو قرار ڏئي. ٻڌڻي دوران ڪيس جي مدعي جي وڪيل طارق اسد ايڊوڪيٽ موقف اختيار ڪيو ته عدالت جوابدار جا ضمانت نه ٿيڻ جوڳا گرفتاري وارنٽ جاري ڪري.عدالت فيصلو محفوظ ڪندي ڪجهه دير لاءِ ٻڌڻي ملتوي ڪئي. هڪ ڪلاڪ جي وقفي کان پوءِ جڏهن ٻيهر ٻڌڻي شروع ٿي ته عدالت اڳوڻي صدر جا ضمانتي مچلڪا خارج ڪندي سندس طرفان حاضري کان آجو قرار ڏيڻ جي درخواست رد ڪري ڇڏي ۽ جوابدار جا ضمانت نه ٿيڻ جوڳا گرفتاري وارنٽ جاري ڪندي ٻڌڻي 27 اپريل تائين ملتوي ڪري ڇڏي.

 

حڪومت ۽ تحريڪ انصاف جوڊيشل ڪميشن قائم ڪرڻ واري معاهدي تي صحيحون ڪري ڇڏيون

اسلام آباد (بيورو) تحريڪ انصاف ۽ حڪومتي ڪميٽي نمائندن عام چونڊن ۾ مبينا ڌانڌلي جي جاچ لاءِ جوڊيشل ڪميشن قائم ڪرڻ واري معاهدي تي صحيحون ڪري ڇڏيون، اسلام آباد ۾ پريس ڪانفرنس دوران ناڻي واري وفاقي وزير اسحاق ڊار، بلوچستان جي وڏي وزير عبدالمالڪ بلوچ، تحريڪ انصاف جي وائس چيئرمين شاهه محمود قريشي ۽ جنرل سيڪريٽري جهانگير ترين معاهدي تي صحيحون ڪيون جڏهن ته ان موقعي تي ميڊيا سان ڳالهائيندي اسحاق ڊار جو چوڻ هو ته ڪميشن قائم ڪرڻ جي حوالي سان ٻنهي تنظيمن لچڪ جو مظاهرو ڪيو ۽ ٻنهي طرفان ميمبر ڪم ڪندا رهيا جنهن تي انهن جا شڪر گذار آهيون اسان جي ڪوشش هئي ته ان معاهدي ۾ پپيلز پارٽي طرفان خورشيد شاهه ۽ رحمان ملڪ جون به صحيحون ورتيون وڃن ها جڏهن ته انهن جي ذاتي مصروفيتن سبب ايئن ممڪن نه ٿي سگهيو، اسحاق ڊار چيو ته جوڊيشل ڪميشن قائم ڪرڻ لاءِ سياسي جرڳي به تمام گهڻيون ڪوششون ڪيون ۽ سمورن ماڻهن جي ڪوششن سبب ئي اڄ اهو نتيجو سامهون آيو جنهن تي انهن سڀني ماڻهن جا شڪرگذار آهيون ملڪ ۾ جوڊيشل ڪميشن قائم ڪرڻ بابت افواهون موجود هيون جن کي هاڻ ختم ٿيڻ گهرجي  ڇو ته هاڻ ڪميشن قائم ڪرڻ ۽ آرڊيننس جو مسودو تيار ڪيو ويو آهي ۽ اسان ڪوشش ڪنداسين ته جيتري جلدي ٿي سگهي ان تي عملدرآمد يقيني بڻائي وڃي ڇو ته سڀاڻي رات 12 بجه کان اڳ آرڊيننس جاري ٿي سگهي ٿو، ان موقعي تي شاهه محمود قريشي جو چوڻ هو ته اڄ جو ڏينهن پاڪستان جي سياسي ۽ جمهوري تاريخ  ۾ اهم ڏينهن جي طور تي ياد رکيو ويندو اڄ سياسي قيادت ملڪ کي شفاف چونڊن جو ڍانچو ڏيڻ جو پڪو پهه ڪيو آهي اسان کي مستقبل لاءِ اهڙو سازگار ماحول پيدا ڪرڻو آهي ۽ ان انداز ۾ چونڊن منعقد ڪرائڻيون آهن جنهن تي قوم کي اعتماد هجي هن چيو ته اسان جي ڊگهي جدوجهد جي نتيجي ۾ عام چونڊن ۾ جيڪو ڪجهه ٿيو ان جي جاچ ٿيندي ۽ ان جي بنياد تي اسان کي چونڊن کي شفاف بڻائڻ جي منصوبابندي ڪرڻي آهي جنهن لاءِ سازگار ماحول پيدا ڪيو ويندو،  شاهه محمود قريشي چيو ته انهن ڳالهين جي نتيجي ۾ چونڊ سڌارا ٿيندا جنهن لاءِ ڪميٽي ڪم ڪري رهي آهي انهن جون به سفارشون سامهون اينديون جنهن سان ان ۾ وڌيڪ نکار پيدا ٿيندو ان سان اسان جو چونڊ نظام مضبوط ٿيندو  ۽ ماڻهن جو ان تي اعتماد وڌندو، هن جو چوڻ هو ته سياسي پارٽين جنهن انداز ۾ ان عمل کي مڪمل ڪيو اهو هڪ تاريخي دستاويز آهي جنهن سان پاڪستان ۾ جمهوريت مضبوط ٿيندي، جوڊيشل ڪميشن لاءِ وزيراعظم خط لکيو جنهن تي ان جي جذبي جي قدر ڪريون ٿا جڏهن ته اچ جي معاهدي جو روح مختلف آهي جيڪو هڪ قانون تحت آهي.

 

سنڌ ۽ بلوچستان ۾ طوفاني برسات، سائين بورڊ ڪرڻ سبب پنج ڄڻا فوت

ڪراچي (نمائندن وٽان) سنڌ ۽ بلوچستان جي مختلف علائقن ۾ طوفاني هوائن سان گڏ برسات جو سلسلو جاري آهي، ڳڙهي ياسين ۾ باءِ پاس وٽ سائين بورڊ ڪِرڻ سبب ٻن ٻارڙن سميت پنج ڄڻا فوت ٿي ويا جڏهن ته گهرن جون ڇتيون ۽ پول ڪِرڻ سبب بجلي ۽ مواصلاتي نظام پڻ درهم برهم ٿي ويو آهي. جيڪب آباد، شڪارپور، قمبر شهدادڪوٽ، سجاول جوڻيجو، ڳڙهي ياسين، لکي غلام شاهه شاهه، رتي ديري، روهڙي، پني عاقل سميت لاڙڪاڻي ۽ سکر ڊويزنز جي مختلف علائقن ۾ طوفاني ۽ ڳڙي سان مينهن پيو. ڳڙهي ياسين ۾ طوفاني برسات سبب سائن بورڊ ۽ ڀت ڪِرڻ جي نتيجي ۾ ڳوٺ خدابخش ديناري جا رهواسي سيد برادري جا 5 ڄڻا دٻجي فوت ٿي ويا. فوتين  ۾ 16 ورهين جو باقر شاهه، 17 ورهين جو ذيشان شاهه، 18 ورهين جو احسان شاهه، ٽن ورهين ارسلان ۽ 7 ورهين مديحا شامل آهن. علائقي واسين واقعي واري هنڌ پهچي فوتين جا لاش ملبي هيٺان ڪڍي ورتا. اطلاع تي پوليس پهچي فوتين جا لاش تحويل ۾ وٺي اسپتال پهچايا، جتان پوسٽ مارٽم بعد وارثن حوالي ڪيا ويا. ٻئي طرف بلوچستان جي جعفرآباد، سبي، ڊيرا الهيار ۽ ٻين شهرن پڻ تيز برسات پوڻ سبب جو سلسلو جاري آهي. اوستا محمد ۽ ڀرپاسي وارن علائقن ۾ طوفاني برسات سبب 15 گهرن ۽ 10 دڪانن جون ڇتيون ڪِري پيون، جڏهن ته بجلي جا پول ڪِرڻ سبب مختلف روڊ بلاڪ ٿي ويا.

 

شرجيل ميمڻ ميونسپل ڪمشنر مصطفيٰ ڪمال کي معطل ڪري ڇڏيو، سيڪريٽري بلديات کي جاچ جو حڪم

ڪراچي(اسٽاف رپورٽر) اطلاعات ۽ بلديات واري وزير شرجيل انعام ميمڻ خميس ڏينهن سالن کان غيرقانوني طور نارٿ ناظم آباد ۾ مين روڊ تي گرين بيلٽ تي قائم غيرملڪي فاسٽ فوڊ ۽ مٺائي جي دڪان کي سيل ڪري ضلعي سينٽرل جي سيڪشن آفيسر شمعون صدف کي معطل ڪري ان خلاف ڪيس اينٽي ڪرپشن کاتي ۾ موڪلڻ جون هدايتون ڏنيون آهن، جڏهن ته صوبائي وزير ڊسٽرڪٽ ايسٽ ۾ موجود هڪ غيرقانوني شادي هال کي به پنهنجي نگراني ۾ مسمار ڪرايو، جڏهن ته ان ضلعي ۾ ”صاف سرسبز، پرامن سنڌ“ مهم تحت گهٽين ۾ صفائي جي ڊسٽرڪٽ ايسٽ پاران شروع ڪيل ٽن ڏينهن واري مهم جو ٻهارو ڏئي افتتاح ڪيو. صوبائي وزير ان عزم جو هڪ ڀيرو ٻيهر ارادو ڪيو آهي ته صوبي ۾ سرڪاري زمينن، راندين جي ميدانن، پارڪن ۽ ٻين رفاحي ۽ فلاحي پلاٽن تي موجود سمورن قبضن جي خاتمي تائين مهم جاري رکي ويندي ۽ بلديات کاتي ۾ موجود گوسڙو ۽ ڪرپٽ ملازمن جو خاتمو ڪري ئي ساهه کنيو ويندو. تفصيل مطابق صوبائي وزير اطلاعات ۽ بلديات سنڌ شرجيل انعام ميمڻ سموري صوبي ۾ جاري صاف سرسبز، پرامن سنڌ مهم تحت صفائي سٿرائي ۽ قبضن جي خاتمي جي حوالي سان خميس تي ڊسٽرڪٽ سينٽرل ۾ نارٿ ناظم آباد ۾ گذريل ڪيترن سالن کان گرين بيلٽ تي قائم غيرقانوني پيزاهٽ، برگر ڪنگ ۽ دلپسند مٺائي جي دڪانن کي پنهنجي نگراني ۾ سيل ڪرايو. اهي ٽئي دڪانون اڳوڻي ٽائن ناظم پنهنجن اختيارن کان هٽي غيرقانوني طور ليز تي ڏنيون هيون ۽ 2013 ۾ ان جو معياد مڪمل ٿيڻ کان پوءِ ان کي هڪ ڀيرو ٻيهر توسيع ڏني وئي هئي، جنهن کان پوءِ ڪي ايم سي جڏهن ان خلاف ايڪشن ورتو ته هنن عدالتن کان حڪم امتناعي حاصل ڪري ورتا هئا، جڏهن ته سپريم ڪورٽ جي گرين بيلٽ تي سمورن قبضن جي خاتمي جي فيصلي کان پوءِ ڪي ايم سي هڪ ڀيرو ٻيهر ان ڪيس خلاف عدالت سان رجوع ڪيو هو. خميس تي صوبائي وزير شرجيل انعام ميمڻ اوچتو نارٿ ناظم آباد ۾ گرين بيلٽ تي قائم غيرقانوني هوٽلن تي پهچي ويو، جڏهن ته ان موقعي تي انهن هوٽلن ۾ مختلف خاندان منجهند جو کاڌو کائڻ ۾ مصروف هئا، جنهن تي صوبائي وزير انهن سمورن هوٽل مالڪن کي موجود سمورن فيميلز جي سروسز جي فراهمي کان پوءِ پنهنجا هوٽل خالي ڪرڻ جا حڪم ڏنا ۽ ڪي ايم سي جي آفيسرن کي فوري طور تي انهن کي سيل ڪرڻ جون هدايتون ڏنيون. ان موقعي تي ميڊيا سان ڳالهائيندي شرجيل انعام ميمڻ چيو ته ڄاڻايل گرين بيلٽ ۾ ماضي ۾ ٽائون ناظم ممتاز حميد وزيراعليٰ سنڌ، وزيراعظم ايستائين ته صدر پاڪستان کان به وڌيڪ اختيارن جو استعمال ڪندي ان غيرملڪي ريسٽورنٽ کي سرڪاري زمين 5 سال لاءِ ليز تي ڏني ۽ 2013 ۾ ان جي ليز جي ختم ٿيڻ کان پوءِ ان وقت جي ايڊمنسٽريٽر سينٽرل لطيف لوڌي ۽ موجود سيڪشن آفيسر ڪراچي شمعون صدف وري پنهنجن اختيارن کان هٽي ڪري ان ليز جي توسيع ڪئي آهي. هن چيو ته ان سلسلي ۾ موجوده سيڪشن آفيسر شمعون صدف کي فوري طور تي ان جي عهدي کان معطل ڪيو ويو آهي ۽ لطيف لوڌي ۽ ان جي خلاف ڪيس کي اينٽي ڪرپشن کاتي ۾ موڪلڻ لاءِ سيڪريٽري بلديات کي هدايتون جاري ڪيون ويون آهن. هن چيو ته اڳوڻي ٽائون ناظم سميت ان حوالي سان جيڪي به ان ۾ ملوث هوندا انهن خلاف به ڪيس داخل ڪرايا ويندا. شرجيل ميمڻ چيو ته ماسٽر پلان تحت جيڪا زمين جنهن مقصد لاءِ مختص آهي ان کان علاوه ان جي استعمال جي ڪنهن کي اجازت نه ڏني ويندي. هن چيو ته ان ڪارروائي کان اڳ هن ضلعي ايسٽ ۾ قائم هڪ غيرقانوني شادي هال کي به پنهنجي نگراني ۾ مسمار ڪرايو آهي ۽ اهو سلسلو ان وقت تائين جاري رهندو، جيستائين هن صوبي مان سمورا غيرقانوني شادي هالز ۽ ٻين قبضن جو خاتمو نٿو ڪيو وڃي. هن چيو ته روزانو جي بنياد تي ڪيل ڪاررواين ۾ پاڻ شريڪ آهيان ۽ روزانو آئون سمورن قبضن ڪندڙن کي خبردار ڪريان ٿو ته هو پاڻ قبضن جو خاتمو ڪن ته جيئن هو نقصان کان بچي سگهن. هن چيو ته سمورا سياسي ۽ غيرسياسي ماڻهن کي به خبردار ڪريان ٿو ته هو سرڪاري زمينن تي قائم پنهنجن غيرقانوني آفيسن کي پاڻ ختم ڪن ٻي صورت ۾ انهن کي به مسمار ڪرڻ جو شروع ڪيو ويو آهي. هڪ سوال جي جواب ۾ هن چيو ته بلديات کاتو هڪ وڏو کاتو آهي ۽ ان ۾ گوسڙو ملازمن جي ڪري سخت مشڪلاتون آڏو اچي رهيون آهن. هن چيو ته چاهي واٽر بورڊ هجي يا وري ڪي ايم سي يا وري ڊي ايم سيز سمورن ۾ گوسڙون ملازمن آهن ۽ انهن جي خاتمي تائين ايڪشن جاري رکيو ويندو. صوبائي وزير چيو ته هاڻ تائين سنڌ بئنڪ ۾ 10 هزار کان وڌيڪ ملازمن پنهنجا کاتا کولرايا آهن ۽ جلد ئي سمورن ملازمن جا کاتا سنڌ بئنڪ ۾ کولرايا ويندا، جنهن کان پوءِ کين پگهار ان اڪائونٽس مان ادا ڪئي ويندي. هڪ ٻي سوال جي جواب ۾ هن چيو ته مونکي ڊسٽرڪٽ ايسٽ ۾ اچي خوشي ٿي آهي ته هتي صفائي سٿرائي ۽ قبضن خلاف نئين ايندڙ ايڊمنسٽريٽر ايسٽ سيد صلاح الدين ۽ ان جو عملو ڀرپور ڪم ڪري رهيو آهي. ان ضلعي جي ڊپٽي ڪمشنر ۽ ان جي ٽيم به ان جو ڀرپور ساٿ ڏئي رهي آهي. هن چيو ته جيڪي ملازم سٺو ڪم ڪندا ۽ باقاعدگي سان پنهنجون ڊيوٽيون سرانجام ڏيندا انهن کي ترقي به ڏني ويندي ۽ انعام به ڏنا ويندا. پر جيڪي ملازم ٻاهرين ملڪن يا گهرن ۾ ويهي پگهارون کڻي رهيا آهن انهن جو هاڻ هن کاتي ۾ ڪوبه وجود باقي نه رهندو. هن چيو ته مون بلديات کاتي مان ڪرپشن جي خاتمي جو عزم ڪيو آهي ۽ آئون الله کان سواءِ ڪنهن کان نٿو ڊڄان ۽ نه ئي آئون ڪنهن جو ڪو دٻاءُ قبول ڪندس ۽ نه ئي مون تي ڪو دٻاءُ وجهي سگهي ٿو. هن واضح ڪيو ته هو سمورن شادي هالن جيڪي ٽائون، ڊسٽرڪٽ يا خود ڪي ايم سي ماضي ۾ اجازت ناما جاري ڪيا آهن اهي سمورا منسوخ ٿي ويا آهن ۽ هاڻ ڪنهن کي به سرڪاري زمينن، راندين جي ميدانن، پارڪن يا رفاحي ۽ فلاحي زمينن تي ڪنهن قسم جي ڪمرشل سرگرمين جي اجازت نه ڏني ويندي. ان کان اڳ صوبائي وزير ايڊمنسٽريٽر ڪراچي ثاقب سومرو، ميٽرو پوليٽن ڪمشنر ڪراچي مسعود عالم، ايڊمنسٽريٽر ايسٽ سيد صلاح الدين، ايڊمنسٽريٽر سينٽرل محمد ڪمال، مصطفيٰ ڪمال ۽ ٻيا اعليٰ آفيسر به موجود هئا. صوبائي وزير گلشن اقبال بلاڪ 13 ڊي ۾ گهٽين ۾ صفائي مهم جي حوالي سان ڊسٽرڪٽ ايسٽ پاران شروع ڪيل 3 ڏينهن واري مهم جو به افتتاح ڪيو. ان موقعي تي هو پاڻ اتي موجود گرائونڊ ۾ ٻهارو ڏئي اتي موجود صفائي جي عملي وٽ ويو ۽ انهن کي پيش ايندڙ مسئلن کان آگاهي حاصل ڪئي. ان موقعي تي موجود صفائي جي عملي صوبائي وزير جي ڪاوشن کي ساراهيو ۽ کين يقين ڏياريو ته هو ان مهم کي ڀرپور نموني ۾ ڪامياب بڻائيندا ۽ هن شهر کي صاف سٿرو ۽ روشنين جو شهر بنائڻ ۾ پنهنجون ڀرپور خدمتون ڏيندا. ان موقعي تي شرجيل انعام ميمڻ اعلان ڪيو ته ڊسٽرڪٽ ايسٽ ۾ صفائي مهم جي ڪاميابي کان پوءِ کين پگهار سان گڏ انعام طور بونس به ڏنو ويندو ۽ جيڪي ملازم سٺو ڪم ڪندا انهن کي ترقيون به ڏنيون وينديون.

 

يمن ۾ ڦاٿل پاڪستانين کي ڏيهه آڻڻ لاءِ پاڪ بحريه جو جهاز مڪلا بندر گاهه پهچي ويو

ڪراچي (مانيٽرنگ ڊيسڪ) يمن ۾ ڦاٿل پاڪستانين کي ڏيهه آڻڻ لاءِ پاڪ بحريه جو جهاز مڪلا بندر گاهه پهچي ويو، پاڪ بحريه جي ترجمان جو چوڻ آهي ته صورتحال جو جائزو وٺڻ کانپوءِ پاڪستانين کي جبوتي يا ڪراچي منتقل ڪرڻ جو فيصلو ڪيو ويندو… يمن جي جنگ سٽيل علائقن عدن، مڪلا ۽ صنعا ۾ 4 سئو پاڪ ستاني اڃان وطن واپسي جا منتظر آهن، جن جي ڏيهه واپسي لاءِ حڪومت طرفان ڪوششون ڪيون پيون وڃن. پاڪ بحريه جو جهاز پاڪستانين کي کڻڻ لاءِ مڪلا بندرگاهه پهچي ويو آهي جڏهن ته ڦاٿل پاڪستانين جهاز پهچڻ تي سک جو ساهه کنيو آهي. پاڪ بحريه جي ترجمان جو چوڻ آهي ته صورتحال جو جائزو وٺڻ کانپوءِ ئي فيصلو ڪيو ويندو ته پاڪستانين کي جبوتي منتقل ڪجي يا ڪراچي آندو وڃي. پرڏيهي وزارت جو چوڻ آهي ته پنهنجي شهرين جي پرامن واپسي لاءِ هر ممڪن قدم کنيا ويندا.. ٻئي پاسي، دفاع وارو وفاقي وزير خواجه آصف اڄ وزيراعطم نواز شريف کي سعودي دوري بابت آگاهي ڏيندو.. سعودي اختيارين دعويٰ ڪئي آهي ته پاڪستاني حڪومت پنهنجي فوج سعودي عرب موڪلڻ جي حامي ڀري ورتي آهي، جلد پاڪ فوج جو پهريون دستو پهچي ويندو.

 

الطاف حسين کي مياناولي مان چونڊ وڙهڻ جي دعوت، گڏيل اجلاس ۾ شرڪت جو فيصلو صلاح مشوري کانپوءِ ڪيو ويندو: عمران خان

اسلام آباد (بيورو) تحريڪ انصاف جَي سربراهه عمران خان، چارٽر آف ڊيموڪريسي کي ڳٺ جوڙ جو معاهدو قرار ڏيندي چيو آهي ته پارليامينٽ جي گڏيل اجلاس ۾ شرڪت ڪرڻ جو فيصلو صلاح مشوري کانپوءِ ڪيو ويندو. اسلام آباد ۾ ميڊيا سان ڳالهائيندي عمران خان چيو ته سياستدان جنهن کي چارٽر آف ڊيموڪريسي چئي رهيا آهن، اهو حقيقت ۾ ڳٺ جوڙ جو هڪ معاهدو آهي. ڪپتان چيو ته تحريڪ انصاف پاڪستان کي متحد ڪري شفاف چونڊن لاءِ احتجاج ڪيو پر ان باوجود 2013 ع واري اليڪشن ۾ رڪارڊ ڌانڌليون ڪيون ويون. هـُن چيو ته سمورين جماعتن تسليم ڪيو ته اليڪشن ۾ ڌانڌليون ٿيون آهن پر ان باوجود پي ٽي آءِ کانسواءِ ڪنهن به پارٽي آواز نه اٿاريو. عمران خان چيو ته هو ثابت ڪري ڏيکاريندا ته ن ليگ 2013ع وارين عام چونڊن ۾ 70 لک جعلي ووٽ ڪاسٽ ڪرائي رڪارڊ ڌانڌليون ڪيون. ڪپتان ڪراچي ۾ ننڍي چونڊ رينجرز جي نگراني ۾ ڪرائڻ جو مطالبو ڪندي چيو ته سنڌ جَي راڄڌاني واري شهر ۾ پر امن طريقي سان چونڊون ٿيڻ ڏنيون وڃن. عمران خان چيو ته الطاف حسين کي فيصلو ڪرڻ گهرجي ته انکي جمهوريت واري سياست ڪرڻي يا خوف واري. تحريڪ انصاف جي چيئرمين چيو ته جمهوريت ۾ سمورين پارٽين کي هر جڳهه تان چونڊ وڙهڻ جو حق آهي. عمران خان، الطاف حسين کي ميانوالي مان چونڊ وڙهڻ جي دعوت ڏيندي چيو ته متحده ميانوالي مان چونڊ وڙهي ته پي ٽي آءِ ڀرپور سهڪار ڪندي. يمن جي صورتحال بابت ڳالهائيندي پي ٽي آءِ سربراهه چيو ته يمن ۾ مسلمانن کي ويڙهائڻ دشمنن جي سازش آهي، جنهن ۾ پاڪستان کي ڌر بڻجڻ بدران امن لاءِ ڪوششون وٺڻ گهرجن. عمران خان چيو ته يمن جي صورتحال تي قوم کي حڪومت جي فيصلي جو انتظار آهي. ڪپتان چيو ته پارليامينٽ جي گڏيل اجلاس ۾ شرڪت ڪرڻ جو فيصلو هو صلاح مشوري کانپوءِ ڪندو.