تازيون خبرون

Daily Archives: April 1, 2015

ثانيا مرزا جون ڪاميابيون برقرار، ميامي اوپن ٽينس ٽورنامينٽ جي وومينز ڊبلز جي ڪوارٽر فائينل ۾ داخل

ميامي (اسپورٽس نيوز) ڀارتي ٽينس اسٽار ثانيا مرزا ڪاميابين جو سلسلو برقرار رکندي ميامي اوپن وومينز ڊبلز مقابلن جي ڪوارٽر فائينل رائونڊ ۾ ڄاءِ ٺاهي ورتي. ثانيا مرزا ۽ سندس سوئس پارٽنر مارٽينا هنگس ٻئي رائونڊ م گيبريلا ڊبروسڪي ۽ ايلسجا روسڪا کي شڪست ڏني. ميامي فلوريڊا ۾ جاري وومينز ڊبلز مقابلن جي ٻئي رائونڊ م ڀارت جي ثانيا مرزا ۽ سندس سوئس پارٽنر مارٽينا هنگس ڪئناڊا جي گيبريلا ڊبروڪسي ۽ پوليس جي ايلجا روسوڪا کي اسٽريت سيٽس م شسڪت ڏئي ايونٽ جي ڪوارٽر فائينل لاءِ ڪواليفاءِ ڪيو.

 

پاڪ بنگلاديش ڪرڪيٽ سيريز جي 19 اپريل کان 12 مئي تائين منعقد ٿيڻ جو امڪان

ڍاڪا(اسپورٽس نيوز) پاڪستان ۽ بنگلاديش وچ ۾ سيريز 19 اپرلي کان 12 مئي تائين کيڏي وڃڻ  جو امڪان آهي، بنگلاديشي ڪرڪيٽ بورڊ جي ذريعن جو چوڻ آهي ته شروعات ون ڊي ميچن کان ٿيندي جيڪي شير بنگلااسٽِيڊيم ۾ کيڏيون ويندوين، ان کانپوءِ ٽيسٽ سيريز ٿيندي، پهرين ٽيسٽ ڪنهن ٻئي شهر ۾ منعقد ٿيڻ کانپوءِ ٻئين پنجن ڏينهن واري ميچ ۽ هڪ ٽي ٽوئنٽي به شير بنگلا ۾ ٿيندي، پاڪستان ڪرڪيٽ بورڊ جي  سيڪيورٽي جنرل مينيجر ڪرنل (ر) اعظم سيڪيورٽي معاملن جو جائزو وٺڻ لاءِ لاهور کان ڍاڪا روانو يندو هو مختلف جاين جو دورو ڪرڻ کانپوءِ 2 يا 3 ڏينهن ۾ وطن واپس اچي رپورٽ پي سي بي اختيارين کي پيش ڪندو، ان جي روشني ۾ گرين شرٽس جي سريز کي حتمي شڪل ڏني ويندي.

 

28 هزار کان مٿي اسڪولن جي خاص بجيٽ هڪ سال کان بند

 

خبرون آهن ته سنڌ جي 28 هزار کان مٿي اسڪولن جي خاص بجيٽ هڪ سال کان بند آهي، جنهن جي نتيجي ۾ اسڪولن لاءِ گهربل سامان خريد ڪرڻ ۾ مشڪلاتون آهن، ان حد تائين جو آفيسر جي شڪايت آهي ته اهي چاڪ، ڊسٽر،پينون ۽ امتحاني ڪاپيون به خريد ڪري نٿا سگهن، آفيسرن کي يعني اي ڊي اوز کي بجيٽ استعمال ڪرڻ جا اختيار ڪونهن ۽ خطرو اهو پيدا ٿيو آهي ته شايد رقم ليپس ٿي وڃي. آفيسرن ۽ تعليم کاتي جي عملدارن ۾ ڇڪ ڇڪان لڳي پئي آهي، آفيسرن چون ٿا ته رقم ڏيو، جڏهن ته سيڪريٽري تعليم جو موقف آهي ته بجيٽ نه ملندي، اسڪول جي سامان جي خريداري لاءِ سينٽرل ڪميٽي جوڙي ويندي. 28 هزار 337 سرڪاري اسڪولن کي فرنيچر، اسٽيشنري خريد ڪرڻ، رنگ روغن ڪرڻ واري اسڪول اسپيسيفڪ بجيٽ گذريل سال کان بند آهي،جنهن تحت 6 ارب 24 ڪروڙ روپيه ملندا هئا پر هينئر حالت اها آهي جو اسڪول مالي بحران جي ور چڙهيل آهن ۽ جيڪا دعويٰ آفيسر ڪن پيا تنهن موجب انهن وٽ اسڪولن جو سامان وغيره خريد ڪرڻ لاءِ مالي سگهه ڪونهي، هي معاملو پيچيده ٿيڻ ڪري صوبائي وزير تعليم تائين پهچي چڪو آهي، جنهن وٽ سمورن ڊائريڪٽرن،ڊسٽرڪٽ آفيسرن هي مسئلو اٿاريو پر نتيجو ڪو به نڪتو، ڇاڪاڻ جو بجيٽ استعمال ڪرڻ جا اختيار ضلعي آفيسرن کي نه مليا ۽ سيڪريٽري تعليم هڪ ئي ڪميٽي جوڙي ان وسيلي بجيٽ استعمال ڪرڻ واري موقف تي قائم رهيو، سنڌ جي سرڪاري اسڪولن کي پگهارن کانسواءِ ٻيا جيڪي به خرچ ٿين ٿا تن لاءِ ورلڊ بئنڪ پاران ڏنل 18 ارب روپين جي قرض مان هر سال 6 ارب 24 ڪروڙ روپيه اسڪول اسپيسيفڪ جي مد ۾ ڏنا وڃن ٿا، گذريل سال دوران به اها رقم بجيٽ ۾ رکي وئي هئي پر ڊسٽرڪٽ ايجوڪيشن آفيسرن کان ڊي ڊي او پاور کسيا ويا جنهن ڪري بجيٽ استعمال نه ٿي سگهي ۽ رقم واپس ٿي وئي.هن سال به اها ئي حالت آهي جو رقم ته موجود آهي پر سال جي آخري مهيني تائين به مسئلو جيئن جو تيئن برقرار آهي، نتيجي ۾ پرائمري، مڊل، ايليمينٽري ۽ هاءِ اسڪول بجيٽ کان محروم آهن.هينئر جڏهن اسڪولن کي سيڪيورٽي خطرا آهن ۽ انهن جي سيڪيورٽي لاءِ ڀتيون مٿي ڪرڻ سميت ٻيا اپاءَ پڻ وٺڻ جون هدايتون جاري ٿي چڪيون آهن پر سنڌ ۾ بقول آفيسرن جي انهن هدايتن کي عملي جامو پهرائڻ مشڪل ٿي پيو آهي ڇاڪاڻ جو جڏهن فنڊ ئي دستياب نه هوندا ته پوءِ ديوارن جي مرمت وغيره ڪيئن ٿي سگهندي؟ رقم ڪيئن استعمال ٿئي اهو هڪ الڳ معاملو آهي پر جيڪا شيءِ لازمي آهي اها هي آهي ته رقم جو استعمال عمل ۾ آندو وڃي ڇاڪاڻ جو جڏهن ورلڊ بئنڪ کان قرض جي صورت ۾ اربين روپيه ورتا وڃن ٿا ۽ انهن آڏو اهو ئي جواز پيش ڪيو وڃي ٿو ته اسڪولن جي بهتري لاءِ رقم خرچ ٿيندي پر اها رقم خرچ نه پئي ٿئي ۽ پهريان به آيل پئسا ليپس ٿي ويا اهي اربين روپيه ڪيڏانهن ويا انهن جو به حساب ڪتاب ٿيڻ گهرجي ۽ جيڪي ان سنگين غلطيءَ جا ذميوار آهن انهن کان پڇاڻو ڪيو وڃي ڇاڪاڻ جو گذريل بجيٽ جيڪڏهن مخصوص مقصد لاءِ استعمال ڪئي وڃي ها ته شايد تعليم ۽ تعليمي ادارن جي صورتحال ۾ ڪجهه بهتري اچي ها ۽ هينئر ٻيو دفعو بجيٽ خرچ ٿيڻ جي نتيجي ۾ گهڻيون ئي مثبت شيون ڏسڻ لاءِ ملن ها پر افسوس جو هن وقت تائين رقم رڳو ان ڪري ڪتب نه اچي سگهي آهي جو اختيارن جي ويڙهه آهي، حالانڪ هن معاملي تي اختيارن جي ويڙهه کي سائيڊ تي رکي ڪم ڪرڻ گهربو هو.تعليم کاتي جي وزير، سيڪريٽري ۽ آفيسرن جو جڏهن مقصد ئي هڪ آهي ته تعليمي ادارن ۽ شاگردن توڙي شاگردياڻين جو ڀلو ٿئي ته پوءِ اختلاف راءِ جو سوال ئي پيدا نٿو ٿئي.ان ۾ ڪو شڪ ڪونهي ته اسان وٽ هر شعبي ۾ فنڊن جي شفافيت تي سدائين آڱريون کڄنديون رهيون آهن، تعليم کاتو به ان بدنامي کان بچي ناهي سگهيو، جيڪڏهن مقصد رقم خرچ ڪرڻي آهي ته پوءِ ڪو وچولو رستو ڪڍيو وڃي، ضروري ناهي ته آفيسرن کي ان حوالي سان کلي ڇوٽ ملي ۽ اهو به ضروري ناهي ته رڳو سيڪريٽري تعليم جي مرضيءَ تي ڪميٽي جڙي ۽ ان وسيلي مخصوص ٿيل بجيٽ خرچ ڪئي وڃي، هي مسئلو تعليم واري وزير جي لاءِ امتحان آهي، سينيئر سياستدان هجڻ ناتي اميد آهي ته هو ان جو ڪو تڪڙو حل ڪڍندو ۽ هڪ ڀيرو ٻيهر رقم ليپس نه ٿي ويندي، جيڪڏهن ائين ٿيو ته نه رڳو سنڌ حڪومت جي ساک متاثر ٿيندي پر مقصد به حاصل ٿي نه سگهندو.

 

يمن جنگ پاڪستان لاءِ عقل جو سبق ؛عاجز جمالي

يمن ۽ سعودي عرب وچ ۾ هلندڙ فضائي جنگ نيٺ زميني جنگ جو رُخ اختيار ڪندي ۽ هن جنگ ۾ ايران جي مداخلت سان گڏ روس، چين، امريڪا ۽ برطانيا جي به اڻ سڌي مداخلت جاري آهي. اسان جو پيارو پاڪستان به هن جنگ ۾ ڪاهي پوڻ لاءِ ٽپا ڏيئي رهيو آهي. اسان جون مذهبي جماعتون خاص ڪري جهادي عنصر ته بغل وڄائي سعودي عرب جي باهه ۾ گهڙي پوڻ لاءِ تيار آهي، هي اهو عنصر آهي جيڪو مذهب جي نالي تي سڄي دنيا جي جنگ پنهنجي ڳچيءَ ۾ وجهي هتان جا مظلوم ماڻهو مارائي مذهب جي نالي تي هميشه مال ڪمائيندو آهي.

هنن همراهن اهو ڌنڌو جنرل ضياءَ جي زماني ۾ سکي ورتو هو. پاڪستان ۾ گهڻا تڻا جهادي مذهبي گروپ ان دور ۾ ئي پروان چڙهيا. تڏهن کان وٺي اڄ تائين اهي گروپ ارب پتي بڻجي ويا. انهن سرعام سعودي عرب ۽ ٻين اسلامي ملڪن کان پئسا ورتا ۽ اڄ تائين وٺي رهيا آهن.

ڪجهه جهادي گروپن ڀارت سان جنگ جي نالي تي ته ڪجهه افغانستان ۾ روس سان جنگ جي نالي ۾ پنهنجا پنهنجا دُڪان کوليا. سندن ڪاروبار هلي پيو. هاڻي اهي سڀ اسان جي مُلڪ ۾ مذهب جا ٺيڪيدار بڻجي ويا، حڪومتن ۽ اسٽبلشمينٽ جو حصو بڻجي ويا. اسيمبلين ۽ پارليامينٽ تائين پهچي ويا. عالمي سطح تي حيثيت حاصل ڪري ويا، اُهي ملڪي سطح جي فيصلن تي سڌيءَ ريت هاڻي اثر انداز ٿيندا آهن.

يمن ۽ سعودي عرب وچ ۾ شروع ٿيل جنگ جو هڪ تاريخي پسمنظر به آهي ته امريڪا جا ڳجها مفاد به آهن. ساڳي ريت ايران جو ڪنهن حد تائين مفاد آهي، ڇو ته يمن ۾ جن باغين خلاف حملا ڪيا وڃن پيا، اُهي شيعا آهن. ايران سڄي دنيا ۾ شيعن جي حمايت ڪندو آهي. اهڙيءَ ريت شام ۽ لبنان به شيعا باغين جي حمايت ڪري ٿو، پر ڏٺو وڃي ته هي اصل ۾ يمن جي اندروني جنگ آهي. ان ۾ سعودي بيجا مداخلت ڪري سڄي اسلامي دنيا کي ان جنگ ۾ شامل ڪري ڇڏيو آهي.

ڇو ته سعودي عرب کي هميشه يمن جي شيعا باغين کان خوف رهيو آهي ۽ ايران کان ته سعودي کي هميشه خوف آهي. سعودي عرب ۾ هڪ خاندان جي بادشاهت آهي، شاهي خاندان ۾ اندريان اختلاف به موجود آهن، جيڪي دٻيل آهن. امريڪا، شاهي خاندان جي اندرين اختلافن کي ماضي ۾ پنهنجي مفاد لاءِ استعمال ڪندو رهيو آهي. اڳوڻي بادشاهه شاهه فيصل جو سندس ڀائٽي جي هٿان قتل امريڪي رٿابندي تحت ٿيو هو. ڇو ته شاهه فيصل جي قيادت ۾ ان وقت هڪ مضبوط اسلامي بلاڪ ٺهي رهيو هو. ان زماني ۾ اڃا يورپ هڪ ڪونه ٿيو هو. هڪ طرف سوويت يونين جو زور هو، جنهن کان امريڪا خوفزده هو ته ٻئي طرف اسلامي بلاڪ ٺهي رهيو هو، جنهن ۾ ذوالفقار علي ڀُٽو، شاهه فيصل، ڪرنل قذافي، ياسر عرفات، شاهه حسين، حافظ الاسد پيش پيش هُئا.

ٿورو تاريخ جو جائزو وٺو ته انهن سڀني کي هڪ هڪ ڪري امريڪا مارائي ڇڏيو ۽ اُن سان گڏ انهن سڀني مُلڪن جي زوال جو سفر شروع ٿيو. ۽ اُهي سڀ مُلڪ يا ته امريڪا جا غلام بڻجي ويا يا امريڪا انهن کي تباهه ڪرائي ڇڏيو. اڄ لبيا، شام، مصر، فلسطين جي جيڪا حالت آهي، اها سڀني جي سامهون آهي. حيرت جي ڳالهه اها ته انهن ملڪن لاءِ ڪڏهن به پاڪستان جي مذهب پرست جهادين جي مذهبي غيرت ڪونه جاڳي جو اهي فلسطين ۾ وڃي اسرائيل خلاف وڙهن يا امريڪا جي خلاف وڙهن، ساڳي حالت پاڪستان جي سرڪار ۽ اسٽبلشمينٽ جي آهي.

يمن جي جنگ ۾ ٽي چار ڳالهيون سمجهڻيون پونديون. هڪ ته جيڪي حوثي باغي آهن انهن جو يمن جي چاليهه سيڪڙو حصي تي وڏي عرصي تائين اقتدار رهيو آهي. انهن جي آبادي به لڳ ڀڳ 50 سيڪڙو آهي. اهي يمن جا قديمي قبائلي آهن. هي ڪي ٻاهران آيل ناهن، نه ڪي حملي آور آهن. حوثي قبيلو ائين ئي آهي، جيئن پاڪستان ۾ رهندڙ سنڌي يا بلوچ هجن، جن جي هزارين سالن جي تاريخ هجي.

يمن جا ٻه حصا هئا، جيڪي شايد 1992 ۾ گڏجي هڪ ٿيا. ان انضمام تي سعودي عرب ۽ امريڪا ان وقت به راضي ڪونه هُئا پر يمن جي سياسي قيادت هڪ ٿي گڏجي هلڻ تي اتفاق ڪيو. يمن جون سعودي عرب سان ملندڙ سرحدون هميشه سعودي لاءِ خطري جي گهنٽي وڄائينديون رهيون آهن.

حوثي باغين جو چوڻ آهي ته يمن جي سرڪار سعودي عرب جي ايجنٽ بڻيل آهي، سعودي ۽ امريڪا جي اشاري تي هلندڙ سرڪار کي برداشت نه ڪبو. بلڪل ائين جيئن بلوچستان ۾ عسڪريت پسند وڙهي رهيا هجن ۽ پاڪستان سرڪار دنيا جي مُلڪن کي چوي ته اسان جي مدد ڪريو. اهوئي ته سعودي عرب ڪيو. پر سعودي عرب جي اسلامي ملڪن اڳيان هڪ الڳ حيثيت آهي. هو دنيا جو هڪ منفرد اسلامي ملڪ آهي، جتي سڄي دنيا جا مسلمان حج ڪرڻ ويندا آهن، جتي ڪعبتہ الله کي ڪو به خطرو ناهي. ايران ۽ يمن ٻئي اسلامي ملڪ آهن، البته امريڪا ڪا به سازش ڪري سگهي ٿو. جهڙيءَ ريت داعش جهڙيون تنظيمون وجود ۾ آيون آهن، جيڪا مذهبي عبادت گاهن کي نشانو بڻائي ٿي. سعودي عرب کي به داعش کان خطرو ٿي سگهي ٿو پر في الحال اهڙي صورتحال به نظر ڪانه پئي اچي.

سعودي عرب هن وقت جيڪا بمباري ڪري رهيو آهي، اُن ۾ عام شهري ۽ معصوم ٻار به مري رهيا آهن. ان جو ردعمل خطرناڪ به هوندو، اُن ڪري هن جنگ کي ڊيگهه ڏيڻ بدران، جلد کان جلد خاتمي طرف وٺي وڃڻ ئي اسلامي مُلڪن لاءِ بهتر حل آهي. ڇو ته عالمي قوتون هن جنگ کي وڌائڻ چاهين ٿيون. هن جنگ جو ٻيو پهلو پاڪستان جي سعودي عرب سان دوستي يا يمن ۾ مداخلت جو سوال آهي. پاڪستان لاءِ هي سوال ئي عقل جو سوال آهي. پاڪستان جڏهن به دنيا جي ٻين مُلڪن ۾ مداخلت ڪئي، اُن جا خطرناڪ نتيجا نڪتا آهن. پاڪستاني فوج جي يمن ۾ مداخلت ڇو ٺيڪ ناهي؟ اُن جو جائزو ايندڙ مضمون ۾ وٺنداسين.

(هلندڙ)

 

ٻين جي جهيڙي ۾ ڪُڏي پوڻ قوم لاءِ ڪيترو هاڃيڪار آهي؟ ؛نسيم بخاري

يمن جي چَمنَ کي جيڪا باهه لڳي آهي، ان ڀڙڪو کائي جيتوڻيڪ ڀرپاسي وارن ملڪن کي ساڙي رک نه ڪيو آهي، پر ان باهه ۾ جنهن ذهنيت، نظريي ۽ فڪر جي آڌار تي ملڪ ٻارڻ طور تي پنهنجو ڪردار ادا ڪندي ڏٺا ويا آهن، تنهن مان واضح ٿي وڃي ٿو ته اسلامي دنيا واضح طور تي ٻن (2) ڪئمپن ۾ ورهائجي وئي آهي ۽ فرقيواراڻي بنياد تي شيعا سني ٽڪراءُ عالمي طور تي خطرناڪ صورتحال اختيار ڪري ورتي آهي. اسلامي دنيا کان هٽي ڪري جن ملڪن جا جنهن ڌر سان مفاد سلهاڙيل آهن، اها ڌر ان جي ساٿاري آهي. مسلم ملڪن ۾ تمام ٿورڙا اهڙا ملڪ هوندا، جيڪي جنون جي حد تائين پهتل جهيڙي کان پنهنجو پانڌ آجو ڪرائي سگهندا.

سعودي عرب جي يمن تي ڪاهه کانپوءِ ان جي ڪڍ لڳل ٻين عرب سڳورن کان به اڳ پاڪستان پنهنجي عرب بادشاهه کي پيش قدميءَ جي پڪ ڏياري ۽ ان جي جان مال جي سلامتيءَ لاءِ پنهنجي سر گهورڻ وارو پيغام پهچائي، ان وٽ سرخرو ٿيڻ جي حوالي سان اڳ کان اڳرو ثابت ٿيو آهي ۽ هاڻ به انهيءَ جستجوءَ ۾ آهي ته اهڙي گوءِ ۾ هو ٻين کان ڊوڙ ۾ اڳتي هجي.

وزيراعظم ميان نواز شريف ان حوالي سان بنا ڪنهن سوچ سمجهه جي ايڏي ته اٻهرائپ سان جذباتي ۽ جوشيلا بيان ڏنا آهن جو تاثر اهو پئي مليو ته ڄڻ اسرائيل سعودي تي ڪاهه ڪري رهيو آهي. تڪڙ ۾ طوفاني بيانن جي اچڻ کانپوءِ وري جو اهي انڪشاف به ٿيا آهن ته سعودي فوج سان ساٿ ۾ پاڪستاني فوجي جٿا به يمن تي يلغار لاءِ لٿل آهن ته ڳالهه پڌري پَٽ ٿي وئي آهي ته آمريڪا ۽ سعوديءَ سرڪار جو ساٿ ڏيڻ جي حوالي سان پاڪستان پٺتي نه آهي ۽ انهن جي خوشنودي حاصل ڪرڻ لاءِ وهلور وڃي رهيو آهي.

عراق جڏهن ڪويت تي قبضو ڪيو ته ان وقت پاڪستان تڪڙ ۾ پريشر قبول نه ڪيو هو، پر هاڻ لڳي ٿو ته وقت جو وزيراعظم، مشرف دؤر ۾ پڪڙجڻ کانپوءِ سعودي شهزادن جا ذاتي احسان لاهڻ لاءِ ملڪ کي فرقيواراڻي فتني واري جنگ ۾ جڪڙيل يمن ڏانهن ڌڪي، هڪ طرح سان پنهنجي ملڪ ۾ فرقيواراڻي ڦهلاءَ کي هٿي وٺرائي آهي. اسان جو الميو اهو آهي جو ملڪي سطح وارا معاملا ڪنهن ڏاهپ سان حل ڪرڻ بجاءِ، ڏاڍي جي آيل نياپي جي حساب سان حل ڪندا آهيون.

اسان پينو فقير آهيون، جيڪو جيترو وڌيڪ ڏيندو، ان کي اوترو وڌيڪ دعائون ڏيندا آهيون ۽ سندس ساراهه جا ڍُڪ ڀريندا آهيون، اهو نه ڏسندا آهيون ته اسان کي اها پنڻ واري عادت ڪٿان کان ڪٿي ٿي پهچائي. سال ڏيڍ اڳ سعودي عرب پاران پاڪستاني فوجن کي شام ۾ لاهڻ واري ارادي سان مليل امداد وارو ڀانڊو ڦاٽو ته دنيا دنگ رهجي وئي. بعد ۾ ان معاملي تي ڏيهي ۽ پرڏيهي سطح تي ايتري واويلا مچي وئي جو اهڙي گناهه کان اسان بچي وياسين، پر اسان جي تاريخ ٻڌائي ٿي ته ضياءَالحق جي دؤر ۾ اسان جي فوجن هٿان فلسطيني به شهيد ٿيا آهن. تاريخ اهو به ٻڌائي ٿي ته آمريڪا ڊالرن جي نشي ۾ اسان جي حاڪمن ڪيئن جهاد جي جذبي سان افغانستان ۾ مجاهد موڪلي، آمريڪا جو روس سان جهيڙو وڙهيو آهي. وري جڏهن وقت پلٽو کاڌو آهي ته پنهنجن ئي پاليل تاتيل مجاهدن کي مروڙڻ لاءِ آمريڪا جي بڇ تي اسان افغانستان ۽ پاڪستان ۾ وڙهيا آهيون.

تازي صورتحال اها آهي ته يمن ۾ هزارين پاڪستانين جون زندگيون خطري ۾ آهن. اتي پاڪستاني سفارتخانو بند ٿي چڪو آهي ۽ يمن مان پاڪستانين جي پهرين کيپ ملڪ پهچي وئي آهي. يمن ۾ پاڪستانين خلاف رتوڇاڻ جو باقاعده اتي وڙهندڙ باغي جٿن اعلان ڪري ڇڏيو آهي، اتي شيعا آبادي پاڪستانين کي پنهنجو دشمن تصور ڪري ٿي ۽ ان تاثر کي تيليءَ مان ٿنڀ وزيراعظم نواز شريف جي غير ضروري بيانن بڻايو آهي. نه وسارڻ گهرجي ته اڄ جيڪڏهن اسان ٻين جي جنگ ۾ ڪڏي وڙهنداسين ته متاثر ڌر ۽ ان جا خيرخواهه توڙي همدرد به موٽ ۾ اسان کي گلن جا هار نه پارائيندا. يمن ۾ جيڪا جنگ ڇڙيل آهي، اها عالمي طور تي ايران ۽ سعودي عرب جي جنگ ٿي ليکي وڃي. ان ڪري انهن ٻنهي ملڪن جا حامي ۽ مخالف به پنهنجو پاڻ کي واضح طور تي ٻن مختلف ڪئمپن ۾ پاڻ کي محصور تصور ڪن ٿا! اهڙي صورتحال ۾ پاڪستان کي کپندو هو ته اهو اڻ ڌريو رهي ها. اسان وٽ اڳ ئي فرقيواراڻا فساد شدتن سان خطرناڪ ۽ المناڪ نتيجا ڏيندا آيا آهن، ان جي باوجود اسان جو هڪ مخصوص فرقي جي آڌار تي سعودي عرب جو ساٿ ڏيڻ حقيقت ۾ ٻي ڌر کي پنهنجي ملڪ ۾ وڌيڪ تباهين جا طوفان پيدا ڪري ڏيڻ جا جواز پيدا ڪرڻ برابر آهي. اسان يمن ۾ سعوديءَ جي جهيڙي جو حصو ٿي ايران کي اها ڇوٽ ڏئي ڇڏي آهي ته هو به دل کولي هتي پنهنجي مفادن جي تحفظن جي لاءِ اڳيان اچي ۽ جيڪڏهن ائين ٿئي ٿو ته توهان پاڻ تصور ڪريو ته صورتحال ڪهڙو رخ اختيار ڪندي.حقيقت اها آهي ته ايران اسان جو پاڙيسري ملڪ آهي، ان اڳ ۾ اسان سان ڪو ڦڏو نه ڪيو آهي. پاڪستان کي ايران پاران ڪوبه رنج نه پهتو آهي، ايران اسان کي نه تنگ ڪيو آهي، نه تڪليف ڏني آهي ۽ نه ئي ايذايو آهي، نه پريشان ڪيو آهي، پر هاڻي اها پڪ ٿي وئي آهي ته ايران نڙيءَ تي آيل پاڪستاني لت جو جواب ڏيڻ کانسواءِ نه رهندو.پاڪستاني ۽ ايراني بلوچ علائقا لڳو لڳ آهن، جيڪڏهن ايران پاڪستاني بلوچستان ۾ ڀرپور نموني سان ڪا مداخلت ڪري ٿو ته توهان پاڻ سوچيو ته معاملا ڪٿي وڃي دنگ ڪندا؟

بلوچستان ۾ هزاره ڪميونٽي هزارن جي تعداد ۾ شهيد ٿي چڪي آهي. ڪراچيءَ ۾ شيعن جو قتل به سوين زندگين جي ڏيئن اجهائڻ جو ڏس ڏئي ٿو، ان تعصب شڪارپور کي به بارود جي فيڪٽرين وارو تعارف ڏنو آهي. پنجاب ۽ خيبرپختونخواهه ۾ به شيعا سدائين نشاني تي رهيا آهن. اهڙي صورتحال ۾ اهو ممڪن ئي ناهي ته ايران ماٺ ۾ رهي.

ان ڪري ضرورت ان ڳالهه جي آهي ته حڪمران ياري دوستي ملهائڻ لاءِ ملڪن کي ٻائيتال ۾ نه وجهن، اهڙي جنگ ۽ جهيڙن جو حصو نه بڻجن، جنهن مان جان ڇڏائڻ مشڪل ئي نه پر ناممڪن به لڳندو هجي. اسان اڄ ڏينهن تائين ٻين جي ونگار وهي پنهنجو حشر وڃائڻ واري روايت کي ڪڏهن دفن ڪنداسين؟