تازيون خبرون

Daily Archives: March 30, 2015

ڪراچي آپريشن دهشتگردن ۽ ڏوهارين جو گهيرو تنگ ڪري ڇڏيو آهي: وڏو وزير

حيدرآباد (بيورو) سنڌ جي وڏي وزير سيد قائم علي شاهه  چيو آهي ته  پشاور سانحي ۽ 21 ترميم جي منظوري کانپوءِ آپريشن ۾ تيزي سان سنڌ اندر  امن امان جي صورتحال ۾  غير معمولي بهتري آئي آهي  جيتوڻيڪ ڪراچي ۾ دهشتگردي جي تازن ٻن اڻوڻندڙ واقعن باوجود پوليس ۽ رينجرز ، پاڪستان آرمي جي سهڪار سان ڀرپور ڪارروايون ڪندي ڏوهارين جو گهيرو تنگ ڪري ڇڏيو آهي  جنهن دوران سوين دهشتگردن، ٽارگيٽ ڪلرز ۽  ڀتا خورن کي گرفتار ڪري  جيل اماڻيو ويو آهي ۽ تمام جلد ڏوهاري عنصرن کي گرفتار ڪري کين قانون جي ڪٽهڙي ۾ آندو ويندو  . هن اهڙو اظهار اڄ  صوبائي وزير لائيواسٽاڪ ۽ فشريز ڄام خان شورو جي ڳوٺ ڪرن شورو ۾ رهائشگاهه تي شهيد ذوالفقار علي ڀٽو جي 4 اپريل تي ٿيندڙ ورسي جي حوالي سان پ پ پ حيدرآباد ڊويزن جي اجلاس کانپوءِ پريس ڪانفرنس کي خطاب ڪندي ڪيو _ وڏي وزير سيد قاعلي شاهه وڌيڪ چيو ته  ملڪ جي سمورين سياسي پارٽين جي گڏيل فيصلي سان 21 ترميم منظور ڪئي وئي جنهن کانپوءِ ملڪ ۾ دهشتگردي خلاف جاري  آپريشن  کي تيز ڪيو ويو جنهن جي نتيجي ۾ سنڌ اندر امن امان جي صورتحال ۾ غير معمولي بهتري آئي آهي ۽ ڏوهاري سرگرمين تي پڻ ضابطو آندو ويو آهي . هن چيو ته ڪراچي ۾ شروع ڪيل ٽارگيٽيڊ آپريشن  سان پڻ امن امان جي صورتحال بهتر ٿي آهي جنهن دوران ٽارگيٽ ڪلنگ  ۽ ڀتا خوري جي واقعن ۾  پڻ گهٽائي آئي آهي . هن ٻڌايو ته ڪيترائي ٽارگيٽ ڪلرز ۽ 500 کان وڌيڪ ڀتا خور گرفتار ڪيا ويا آهن  جيتوڻيڪ ڪراچي ۾ دهشتگردي جا ٻه اڻوڻندڙ واقعا پڻ پيش آيا آهن پر ان سان قانون لاڳو ڪندڙ ادارن ۽ عوام جا حوصلا گهٽيا ناهن ۽ ڏوهاري عنصرن خلاف آپريشن ۾ وڌيڪ تيزي ڪئي وئي آهي _ هن چيو ته پشاور سانحي ۽ مذهبي اڳواڻ خالد محمود سومرو  جي قتل جي جوابدارن کي پڻ  گرفتار ڪري عدالت ۾ پيش ڪيو ويو آهي ۽ اها  سنڌ حڪومت جي امن امان بابت سنجيده قدمن جي ڪاميابي آهي _ هن دعويٰ ڪئي ته هن وقت سنڌ جو امن امان گذريل 20 کان 25 سالن جي ڀيٽ ۾ بهتر آهي _ وڏي وزير  هڪ سوال جي جواب ۾ چيو ته سنڌ حڪومت قدرتي وسيلن سان مالا مال آهي  ۽ اهڙن وسيلن کي عوام جي فلاح بهبود لاءِ پڻ ڪتب آندو پيو وڃي _جيتوڻيڪ سنڌ مان نڪرندڙ گئس جو 40 سيڪڙو ٻين صوبن ڏانهن موڪليو وڃي ٿو ۽ 35 سيڪڙو مقامي ماڻهن جي فلاح بهبود لاءِ استعمال ڪيو پيو وڃي _ هن وڌيڪ چيو ته  گئس جو اسم آئين مطابق گڏيل مفادن واري ڪائونسل  جو  معاملو آهي جنهن بابت ڪائونسل ئي فيصلا ڪري سگهي ٿي تنهن باوجود به سنڌ گئس ۽ بجلي جي لوڊشيڊنگ بابت ڪائونسل جي هر اجلاس ۾ پنهنجو احتجاج رڪارڊ ڪرايو آهي ۽ مستقبل ۾ پڻ احتجاج رڪارڊ ڪرائيندي رهندي_ سندس مطابق ڇاڪاڻ ته  هن وقت سنڌ جي ٻهراڙي وارن علائقن ۾ 18 ڪلاڪن کان وڌيڪ لوڊشيڊنگ ڪئي پئي وڃي _ هن وڌيڪ چيو ته گئس جي کوٽ وارن علائقن ۾ آئين مطابق ايل اين جي استعمال ڪري سگهجي ٿي پر جتان قدرتي گئس  نڪري ٿي اتي مقامي ماڻهن کي گئس جي سهولت ڏيڻ سندن آئيني حق آهي _ان کان اڳ  پ پ پ حيدرآباد ڊويزن جي اجلاس کي خطاب ڪندي وڏي وزير سيد قائم علي شاهه جيڪو پ پ پ سنڌ جو صدر پڻ آهي  چيو ته شهيد ذوالفقار علي ڀٽو جي 4 اپريل تي ورسي انتهائي عقيدت ۽ احترام سان ملهائي ويندي ڇاڪاڻ ته 4 اپريل ۽ شهيد محترمه بينظير ڀٽو جي شهادت وارو ڏهاڙو 27 ڊسمبر پارٽي لاءِ وڏي اهميت رکن ٿا ۽ ان ڏهاڙن تي سڄي ملڪ جو عوام  ڳڙهي خدا بخش وڏي انگ ۾ شرڪت ڪري پنهنجي قائدين کي خراج عقيدت پيش ڪندو آهي _ هن چيو ته هن سال پراڻي روايت کي برقرار رکندي ۽ ملڪي حالتن کي نظر ۾ رکندي ورسي جي تقريب صبح جو 9 وڳي شروع ڪئي ويندي جنهن جي ابتدا قرآن خواني سان ڪئي ويندي ۽ مزار تي منجهند  جو اڍائي وڳي دعا گهري ويندي جنهن کانپوءِ لنگر شروع ڪيو ويندو جڏهن ته  شام جو 4 کان 6 وڳي تائين پارٽي جي اعليٰ قيادت  خطاب ڪندي جنهن بعد ساڍي 6 وڳي دعا گهري ويندي _ سنڌ جي وڏي وزير سيد قائم علي شاهه چيو ته شهيد ذوالفقار علي ڀٽو ۽ شهيد محترمه بينظير ڀٽو  جهڙي ريت عوام جي خدمت ڪئي آهي ان جو مثال ماضي ۾ ڪٿي به نٿو ملي ۽ سندن نقشي قدم تي هلندي اسان ملڪ کي درپيش بحرانن مان ڪڍي سگهون ٿا_ هن چيو ته هن وقت پارٽي جو شريڪ چيئرمين آصف علي زرداري جهڙي ريت دانشمندي سان پارٽي هلائي رهيو آهي ان جي ڪاميابي جو مثال هي آهي ته اڄ  ملڪ جا سياستدان پنهنجي مسئلن جي حل لاءِ ساڻس صلاح مصلحت ڪن ٿا _ قائم علي شاهه پ پ پ ڪارڪنن سان مخاطب ٿيندي چيو ته سپريم ڪورٽ جي فيصلي تحت اليڪشن ڪميشن 20 سيپٽمبر 2015 تي سنڌ ۾ مڪاني چونڊون ڪرائڻ جو اعلان ڪيو آهي  ۽ پ پ پ جي سمورن ڪارڪنن کي هن وقت کان ئي چونڊن جي سلسلي ۾ تياريون شروع ڪرڻ گهرجن _ان سان گڏوگڏ تڪبندين جو سلسلو پڻ هلندڙ آهي _ هن چيو ته هن وقت ٿيل تڪبندين  تحت شهري علائقن ۾ هڪ يو سي جي آبادي 40 هزار جڏهن ته ٻهراڙي ۾ يو سي جي آبادي 10 هزار آهي ۽ آبادي جي مناسبت سان هر يو سي ۾ 5 کان 10 وارڊ ٺاهيا ويندا _ هن وڌيڪ چيو ته پ  پ  پ حڪومت ئي قومي اسيمبلي ۾ قرارداد آڻي  مڪاني چونڊن ۾ عورتن کي 33 سيڪڙو نمائندگي جو حق ڏنو _ هن مڪاني چونڊن جي حوالي سان پ پ پ ڪارڪنن وچ ۾ اختلافن واري تاثر کي رد ڪندي چيو ته ڪارڪنن وچ ۾ ان حوالي سان ڪي به اختلاف منظر عام تي نه آيا آهن ۽ نه ئي ڪارڪن اهڙي  عمل جو حصو بڻجندا ڇاڪاڻ ته پ پ پ قيادت ايندڙ مڪاني چونڊن ۾ ڪارڪنن کي ترجيح ڏئي رهي آهي ۽ مڪاني چونڊن ۾ ڪارڪن ٻڌي ۽ اتحاد سان تاريخي ڪاميابي حاصل ڪري دنيا ۾ اهو ثابت ڪندا ته  عوام  پ پ پ سان هر وقت گڏ آهي _ ان کان اڳ اجلاس کي خطاب ڪندي  پ پ پ سنڌ جي جنرل سيڪريٽري تاج حيدر چيو ته ملڪ ۾ اڄ قائم جمهوريت ڀٽو خاندان جي قربانين جو نتيجو آهي ۽ ڀٽو خاندان جي نياڻي شهيد محترمه بينظير ڀٽو  ٻن بدترين آمريتن سان وڙهي انهن کي هميشه لاءِ دفن ڪري ڇڏيو _ هن چيو ته پ پ پ ڪارڪن آمريتن جي دور ۾ پابندين ۽ رڪاوٽن باوجود ذوالفقار علي ڀٽو جي ورسي ۾ شرڪت لاءِ ڳڙهي خدا بخش پهچندا هئا ۽ اڄ به سندن اهو جذبو برقرار آهي _ان موقعي تي پ پ پ حيدرآباد جي ضلعي صدر  زاهد علي ڀرڳڙي خطاب ڪندي چيو ته اڄ غير جمهوري عنصر آمريت جي چادر پائي پ پ پ خلاف سازشون ڪري رهيا آهن پر اسان کين ٻڌائڻ چاهيون ٿا ته اسان  آصف علي زرداري جي دانشمندي ۽ بي مثال قيادت ۾ سندن ناپاڪ ارادا خاڪ ۾ ملائي ڇڏينداسين _ اجلاس کي خطاب ڪندي صوبائي وزير ۽ پ پ پ حيدرآباد جي جنرل سيڪريٽري ڄام خان شورو چيو ته  شهيد ذوالفقار علي ڀٽو اسانجو سياسي مرشد آهي جنهن جي ورسي ۾ حيدرآباد جو عوام وڌ کان وڌ شرڪت ڪندو _اجلاس ۾ سينيٽر سسئي پليجو ، عبدالطيف انصاري ، اڳوڻي سينيٽر مولابخش چانڊيو ، ايم اين اي امير علي شاهه ڄاموٽ ، صوبائي وزير ڊاڪٽر سڪندر علي منڌرو ، پ پ پ اڳواڻن صادق ميمڻ ، ضياعباس رضوي ، پير امجد شاهه جيلاني ، عبدالجبار خان ، امين لاکو ،  ڊاڪٽر تحسين شيخ ، فياض شاهه ، عاجز ڌامراهه ، حنا دستگير ، پاشا قاضي ، سهراب خان مري ، صنم ٽالپر ، شگفته جماڻي ،  فرحين مغل ، احسان ابڙو ، امداد پتافي ، سردار ڪمال خان چانگ ، غلام شاهه جيلاني  ۽  حيدرآباد ڊويزن جي سمورن ضلعي ، تعلقي  ۽ يو سي سميت ذيلي تنظيمن جي عهديدارن ۽ ڪارڪنن وڏي انگ ۾ شرڪت ڪئي . ان کان اڳ وڏي وزير سيد قائم علي شاهه پريس ڪانفرنس جي موقعي تي حيدرآباد پريس ڪلب جي گورننگ باڊي جي ميمبر ۽ سينيئر صحافي علي حسن کي سنڌ حڪومت طرفان پريس ڪلب حيدرآباد لاءِ  20 لک رپين جي گرانٽ جو چيڪ پڻ ڏنو .

 

شهيد سورهيه بادشاهه کي ڦاهي ڏيڻ وارو ڪيس ٻيهر کولڻ جو مطالبو

حيدرآباد (بيورو) سنڌ جي سياسي، مذهبي اڳواڻن، ليکڪن، حر جماعت جي معززين ۽ مسلم ليگ فنڪشنل جي اڳواڻن مطالبو ڪيو آهي ته شهيد سورهيه بادشاهه جي ڦاهي ڏيڻ وارو ڪيس ٻيهر کوليو وڃي، 20 مارچ تي ملڪ ۾ عام موڪل جو اعلان ڪري سرڪاري سطح تي پروگرام ڪرايا وڃن. اهڙو اظهار حيدرآباد ۾ مسلم ليگ فنڪشنل قاسم آباد طرفان سنڌ ميوزيم جي ممتاز مرزا هال ۾ پير سيد صبغت الله شاهه شهيد سورهيه بادشاهه جي 72 هين ورسي جي حوالي سان منعقد ڪيل تقريب ۾ خطاب ڪندي ۽ قراردادون پاس ڪندي ڪيو. ان موقعي تي مسلم ليگ فنڪشنل ليڊيز ونگ سنڌ جي صدر ۽ ايم پي اي نصرت  سحر عباسي اعلان ڪيو آهي ته سنڌ اسيمبلي مان پاس ٿيل حر ايڪٽ کي ختم ڪرائڻ لاءِ تمام جلد اسيمبلي ۾ قرارداد آندي ويندي ۽ تعليمي نصاب ۾ شهيد سورهيه بادشاهه بابت سبق شامل ڪرائڻ لاءِ ڪردار ادا ڪيو ويندو. هن چيو ته پير سيد صبغت الله شاهه شهيد سورهيه بادشاهه اسان سڀني جو آئيڊيل شخصيت جو مالڪ هئو. هن چيو ته شيهد سورهيه بادشاهه جي سوچ ۽ نظرئي تي هلي ڪري اسان وطن جي حفاظت ڪرڻ ڄاڻون ٿا. سورهيه بادشاهه ۾ بهادري ۽ شجاعت هئي جنهن ڪري انگريز به سامهون ڪنڌ کڻي نه ڳالهائيندو هو. ناليواري ليکڪ، محقق ۽ پير سيد صبغت الله شاهه شهيد سورهيه بادشاهه ۽ حر تحريڪ تي ڪتاب لکندڙ پرو فيسر الهورايو بهڻ چيو ته شهيد سورهيه بادشاهه کي جڏهن انگريزن گرفتار ڪري حيدرآباد سينٽرل جيل ۾ قيد رکي ڪيس هلايو ته شهيد سورهيه بادشاهه جي طرفان ڪير به شاهدي ڏيڻ لاءِ تيار نه هو ۽ انگريزن جن ماڻهن کي خريد ڪيو انهن شهيد سورهيه بادشاهه جي خلاف شاهديون ڏنيون ۽ انگريز 6 مهينا ڪئمپ قائم ڪري رکي هئي. هن چيو ته اسان کي تاريخ ۾ اڪيلو ڪيو ويو. ڇو ته انگريز جيڪا تاريخ لکرائي اڄ به انهن جي ريڪارڊ ۾ موجود آهي ۽ حرن کي ڌاڙيلن سان سڏيو ويندو هو ان حوالي سان 1940 ۾ سنڌ اسيمبلي ۾ به حرن جي خلاف ايڪٽ پاس ڪرايو جنهن ۾ ڪنهن به ميمبر مخالفت نه ڪئي جيڪا سراسر نا انصافي آهي. مسلم ليگ فنڪشنل ضلعي حيدرآباد جي صدر محمد افضل گجر چيو ته پاڳارا خاندان جي تاريخ 200 سال پراڻي جن پنهنجي دور ۾ اسلام سان گڏ وطن جي خدمت ڪئي ۽ وطن جي آزادي لاءِ جدوجهد جاري رکي. هن چيو ته اسان اڄ به ذهني غلام آهيون جنهن مان نڪرڻ لاءِ شهيد سورهيه بادشاهه جي ڏسيل راهه تي هلڻ جي ضرورت آهي. سينئير صحافي ۽ حر جماعت جي معزز شخصيت فقير منٺار مڱريو چيو ته شهيد سورهيه بادشاهه جهڙو عظيم هيرو ايشيا ۾ نه ملندو جنهن وطن يا ڪفن آزادي يا موت جو نعرو هڻي ملڪ آزاد ڪرايو. هن مطالبو ڪيو ته شهيد سورهيه بادشاهه جو ڪيس ٻيهر هلايو وڃي. جي يو آءِ حيدرآباد جي امير مولانا تاج ۾ محمد ناهيون چيو ته شهيد سورهيه بادشاهه انگريزن سان ٽڪر کاڌو پر سر نه جهڪايو. هن چيو ته اهڙا بهادر ماڻهون صدين ۾ پيدا ٿيندا آهن هن ڌرتي به اسان کي سورهيه بادشاهه جهڙا ماڻهون ڏنا جن وطن جي آزادي لاءِ جنگ وڙهي پنهنجي جان قربان ڪئي. ان موقعي تي جماعت اسلامي سنڌ جي اڳواڻ مولانا عبدالوحيد قريشي، ايم ايس ايف فنڪشنل سنڌ جي صدر وقار جٽ، عبدالوهاب منشي، محمد امين احمداڻي، استاد نظاماڻي، ناظر حسين نظاماڻي، سيد اسد شاهه راشدي، فقير غلام نبي پنهيار ۽ ٻين خطاب ڪيو

 

يمن ۾ باغين خلاف سعودي آپريشن جي مڪمل حمايت ڪريون ٿا: آصف زرداري

ڪراچي (اسٽاف رپورٽر) اڳوڻي صدر ۽ پيپلزپارٽي جي شريڪ چيئرمين آصف علي زرداري چيو آهي ته پيپلزپارٽي سعودي عرب سان ڪُلهو ڪُلهي ۾ ملائي بيٺل آهي ۽ يمن ۾ باغين خلاف سعودي عرب آپريشن جي مڪمل حمايت ڪري ٿي. ڪراچي ۾ يمن جي صورتحال جي حوالي سان پريس ڪانفرنس دوران رحمان ملڪن آصف علي زرداري جو بيان پڙهي ٻڌايو جنهن ۾ هن جو چوڻ هو ته باغين سبب يمن ۾ جمهوري حڪومت کي خطرا آهن انهيءَ لاءِ پيپلز پارٽي سعودي عرب سان گڏ آهي ۽ يمن ۾ باغين خلاف سعودي آپريشن جي مڪمل حمايت ڪري ٿي. پنهنجي پيغام ۾ اڳوڻي صدر آصف علي زرداري جو چوڻ هو ته ڪوبه مسلمان سعودي عرب ۾ مقصد جاين تي آنچ به اچڻ نه ڏيندو ۽ ڪنهن به ڏکئي وقت ۾ سمورا اسلامي ملڪ سعودي عرب سان گڏ آهن. انهيءَ موقعي تي رحمان ملڪ جو چوڻ هو ته پارليامينٽ ۽ پيپلزپارٽي يمن ۾ جمهوريت جي بقا لاءِ ٿيندڙ ڪارروائي سان گڏ آهي، سعودي عرب اسان جي تمام گهڻي مدد ڪئي آهي ۽ اڄ جيڪڏهن ڏکئي وقت ۾ آهي ته پاڪستان اُن سان گڏ آهي. هن چيو ته ايران ۽ سعودي عرب وچ ۾ ڇڪتاڻ کي گهٽائڻ لاءِ اسان کي پنهنجو ڪردار ادا ڪيو پر موجوده حڪومت ڪڏهن به سعودي عرب سميت ڪنهن به مڪ سان لاڳاپن جي باري ۾ پارليامينٽ کي آگاهه ناهي ڪيو انهيءَ لاءِ اسان کي وزيراعظم نوازشريف جي سعودي عرب سان لاڳاپن جي نوعيت معلوم ناهي، سعودي عرب جي صورتحال تي نوازشريف آصف زرداري جي اعتماد ۾ ناهي ورتو انهيءَ لاءِ پيپلزپارٽي وزيراعظم سان رابطو کانپوءِ پنهنجو واضح موقف جو اعلان ڪندي.

 

يمن جي معاملي تي پارليامينٽ کي اعتماد ۾ ورتو وڃي: خورشيد شاهه

سکر(بيورو) قومي اسيمبلي ۾ مخالف ڌر جي اڳواڻ ۽ پيپلز پارٽي جي سينيئر اڳواڻ سيد خورشيد شاهه چيو آهي ته وزيراعظم نواز شريف کي يمن جي معاملي تي ڪنهن به فيصلي کان اڳ پارليامينٽ کي اعتماد ۾ وٺڻ گهرجي، سکر  ۾ ميڊيا سان ڳالهائيندي خورشيد شاهه چيو ته سعودي عرب سان اسان جا ڀائيپي وارا لاڳاپا آهن جڏهن ته اسان جنگ حالت ۾ آهيون ۽ ملڪ ۾ سيڪيورٽي جي صورتحال نازڪ آهي، ان لاءِ يمن جي معاملي تي ڪنهن به فيصلي کان اڳ وزيراعظم نواز شريف کي پارليامينٽ کي اعتماد ۾ وٺڻ گهرجي، هن چيو ته ڪراچي ۾ دهشتگردن خلاف بنا فرق ڪارروائي جاري آهي نائن زيرو مان پڪڙيل جوابدار حراست ۾ آهن ۽ آپريشن ۾ ڪنهن مخصوص   سياسي تنظيم کي نشانو نه پيو بڻايو وڃي.

 

پاڪستانين جي واپسي لاءِ 2 ٻيڙا يمن موڪلي رهيا آهيون: پرڏيهي وزارت

اسلام آباد (بيورو) پرڏيهي وزارت چيو آهي ته 2 ننڍا ٻيڙا يمن روانا ٿيندا، ٻئي جهاز چار سئو ماڻهن کي واپس آڻيندا، سعودي سالميت کي خطرو پاڪستان لاءِ ڳڻتي جو سبب هوندو، حالتن جو جازو وٺڻ لاءِ حڪومتي وفد به سعودي عرب ويندو، اسلام آباد ۾ پريس ڪانفرنس ڪندي پرڏيهي سيڪريٽري اعزاز احمد چوڌري ٻڌايو ته ايندڙ ٻن ڏينهن ۾ 2 ننڍا ٻيرا يمن روانا ڪنداسين، ٻئي ٻيڙا چار سئو ماڻهن کي آڻي سگهن ٿا، عدن ۾ خراب صورتحال سبب پاڪستانين کي ويڙهه رڪجڻ کانپوءِ  ڪڍنداسين حالتن جو جائزو وٺڻ لاءِ حڪومتي وفد به سعودي عرب ويندو، پرڏيهي سيڪريٽري جو چوڻ هو ته جيڪڏهن سعودي عرب جي داخلي سيڪيورٽي کي خطرو ٿيو ته پاڪستان لاءِ ڳڻتي جو سبب هوندو سمورا فيصلا قوم کي اعتماد ۾ وٺي ڪيا ويندا.

 

گلگت بلتستان جي آئيني حيثيت بحال ڪئي وڃي:الطاف حسين

لنڊن(م.ڊ) متحده قومي موومينٽ جي قائد الطاف حسين مطالبو ڪيو آهي ته گلگت بلتستان جي آئيني حيثيت بحال ڪئي وڃي، الطاف حسين پنهنجي جاري ڪيل بيان ۾ چيو آهي ته گلگت بلستان جي ائيني حيثيت بحال ڪري آزاد ڪشمير جي طرز تي اسيٽيٽ سبجيڪٽ رول جي سهولت ڏني وڃي، هن چيو ته عوامي جي حقن لاءِ جدوجهد ڪري رهيا آهيون،ايم ڪيو ايم ملڪ جي واحد لبرل، جمهوري ۽ ترقي پسند پارٽي آهي جيڪا ملڪ مان فرسوده جاگيرداري نطام جو خاتمو چاهي ٿي.

 

خليج جنگ سان رڳو اسرائيل ۽ آمريڪا کي فائدو ٿيندو: سراج الحق

لاهور (بيورو) جماعت اسلامي پاڪستان جي امير سراج الحق چيو آهي ته يمن جي معاملي ۾ ترڪي ۽ پاڪستان کي ثالثي ڪرڻ گهرجي. منصور لاهور ۾ ميڊيا سان ڳالهائيندي سراج الحق جو چوڻ هو ته خليج جي جنگ سان آمريڪا کي هٿيارن جي نئين منڍي ملندي. پاڪستان ۽ ترڪي انهيءَ حيثيت ۾ آهن ته انهيءَ مسئلي ۾ ثالثي ڪرائين ۽ سعودي عرب ۽ ايران ۾ ڇڪتاڻ گهٽائين ڇو ته انهيءَ جنگ ۾ اسرائيل کي فائدو ٿيندو. جماعت اسلامي جي امير ملڪي نطام جي بهتري لاءِ 3 اپريل تي عوامي رابطا مهم به شروع ڪرڻ جو اعلان ڪيو ۽ چيو ته ڪرپٽ اشرافيه سمورن ادارن کي يرغمال بڻايو آهي. سراج الحق جو چوڻ هو ته بلدياتي چونڊن ۾ جماعت اسلامي ڀرپور حصو وٺندي.

 

اوگرا تيل اگهن ۾ اضافي جي تجويز ڏئي ڇڏي

اسلام آباد (بيورو) حڪومت پهرين اپريل کان ملڪ ۾ پيٽروليم مصنوعات جي قيمتن ۾ 5.79 روپيا في ليٽر تائين اضافي جو اصولي فيصلو ڪيو آهي جڏهن ته گاسليٽ جي قيمت ۾ 89 پئسا في ليٽر گهٽتائي جو امڪان آهي اوگرا ايندڙ مهيني لاءِ پيٽروليم مصنوعات جي قيمتن بابت سمري کي حتمي شڪل ڏئي ڇڏي آهي سمري ۾ پيٽرول جي قيمت 3.79 روپيا اضافي سان 70.29 روپين مان وڌائي 74.08 روپيا في ليٽر، هاءِ اسپيڊ ڊيزل جي قيمت 5.79 روپيا اضافي سان 80.61 روپيا مان وڌائي 86.40 روپيا في ليٽر، لائٽ ڊيزل آئل جي قيمت 96 پئسا اضافي سان 57.94 روپين مان وڌائي 58.90 روپيا في ليٽر ۽ ايڇ او بي سي جي قيمت 1.62 روپيا اضافي سان 80.18 روپين مان وڌائي 81.80 روپي في ليٽر ڪرڻ جي تجويز ڏني وئي آهي اوگرا جي سمري ۾ گاسليٽ جي قيمت 89 پئسا في ليٽر گهٽتائي سان 61.44 روپين مان گهٽائي 60.55 روپيا گهٽ ڪرڻ جي جتويز ڏني وئي آهي، سمري کي سومر جي ڏينهن پيٽروليم واري وزارت کي موڪلي ويندي جڏهن ته قيمتن بابت حتمي فيصلو وزيراعظم ڪندو.

 

ڪرڪيٽ جي دنيا تي حڪمراني جو تاج پنجون ڀيرو آسٽريليا جي سر تي سجي ويو

ميلبورن(اي پي پي) ڪرڪيٽ جي دنيا تي حڪمراني جو تاج پنجون ڀيرو آسٽريليا جي سر تي سجي ويو. آسٽريليا 11 هين آءِ سي سي ورلڊ ڪپ جي فيصلائتي دنگل ۾ نيوزي لينڊ کي 7 وڪيٽن تان شڪست ڏئي ٽرافي پنهنجي نالي ڪئي. پهريون ڀيرو ورلڊ ڪپ جي فائنل ۾ پهتل ڪيوي ٽيم آسٽريليا جي سگهاري بالنگ آڏو واري جي ڀت ثابت ٿي ۽ سڄي ٽيم 45 اوورن ۾ 183 رنسن تي ڍير ٿي وئي. تفصيل موجب آچر تي ميلبورن ڪرڪيٽ گرائونڊ ۾ کيڏيل ميگا ايونٽ جي فائنل ۾ نيوزي لينڊ جي ڪپتان برينڊن ميڪ ڪوليم ٽاس کٽي اڳ ۾ بيٽنگ جو فيصلو ڪيو جيڪو درست ثابت نه ٿيو. ڪيوي اننگز جي شروعات انتهائي مايوس ڪندڙ هئي، پهرين ئي اوور ۾ ميڪ ڪولم ڪا به رنس ٺاهڻ کان سواءِ مچل اسٽارڪ جي بال تي ڪلين بولڊ ٿي ويو. ڪيويز کي ٻيو نقصان 33 جي مجموعي اسڪور تي کڻڻو پيو جڏهن ٽونامينٽ جو ٽاپ اسڪورر مارٽن گپٽل رڳو 15 رنسون ٺاهي گلين ميڪسويل جي بال تي ڪلين بولڊ ٿي ويو. بليڪ ڪيپس کي ٽيون نقصان به جلد کڻڻو پيو جڏهن ڪين وليمسن 12 رنسون ٺاهي مچل جانسن جو نشانو بڻجي ويو. ان موقعي تي روز ٽيلر ۽ گرانٽ ايليٽ ذميواري سان بيٽنگ ڪئي ۽ 111 رنسن جي ڀائيواري قائم ڪري ٽيم جو اسڪور 150 تائين پهچائي ڇڏيو. ٽورنامينٽ ۾ وڏي اسڪور کان محروم رهندڙ آسٽريليائي ڪپتان مائيڪل ڪلارڪ جي بيٽ آخري ميچ ۾ ٻوٽو ٻاري وئي، هن 74 رنسن جي دلڪش اننگز کيڏي جنهن ۾ هڪ ڇڪو ۽ 10 چوڪا شامل هئا. اسٽيون سمٿ هڪ ڀيرو شاندار بيٽنگ جو مظاهرو ڪيو ۽ 56 رنسن جي ناقابل شڪست اننگز کيڏي. ڊيوڊ وارنر 45 ۽ ايرن فنچ ڪا به رنس ٺاهڻ کان سواءِ آئوٽ ٿي ويا.جيمز فوڪنز کي مين آف دي ميچ جو ايوارڊ ڏنو ويو.

 

مولانا فضل الرحمان۽ پير پاڳاري جي ملاقات، سعودي فوج موڪلڻ کان اڳ اي پي سي گهرائڻ جو مطالبو

ڪراچي (اسٽاف رپورٽر) جمعيت علماءِ اسلام (ف) جي سربراهه مولانا فضل الرحمان چيو آهي ته سعودي عرب ۾ پاڪستاني فوج موڪلڻ کان اڳ حڪومت فوري طور آل پارٽيز ڪانفرنس طلب ڪري ته جيئن سياستدان گڏجي ويئي ملڪي مفاد جي حوالي سان ڪوئي حل ڳولي سگهن پر حرمين شريفين تي سڌي طرح حملي جون ڳالهيون ڪندڙن کي پنهنجي حد ۾ رهڻ گهرجي ڪوئي اهڙو عمل نه ڪن جنهن سان مسلم قوم جا جذبا مجروح ٿين مسلم ليگ فنڪشنل جي سربراهه ۽ حرن جي روحاني پيشوا پير صبغت الله راشدي پيرپاڳارو چيو ته مولانا فصل الرحمان سان ملاقات ملڪي ۽ عالمي حالتن جي سلسلي ۾ نتيجا خيز ۽ تسلي بخش رهي انهن جو تجزيو منهنجي لاءِ علائقاي ۽ عالمي حالتن لاءِ نهايت اهميت وارو آهي اهڙن خيالن جو اظهار هن آچر تي پير پاڳاري جي رهائشگاهه راجا هائوس ۾ گڏيل پريس ڪانفرنس ۾ ڪيو ان موقعي تي پير صدرالدين شاهه راسدي ڪامران ٽيسوري جي يو آءِ (ف) جو اڳواڻ قاري محمد عثمان ۽ ٻيا پڻ موجود هئا مولانا فضل الرحمان پير صاحب جي دعوت تي سندس رهائشگاهه راجا هائوس مانجهاندي ۾ پهتو ۽ ملاات ڪئي هي ملاقات اٽڪل اڍائي ڪلاڪن تائين ٿي ملاقاتن کان پوءِ پريس ڪانفرنس کي خطاب ڪندي مولانا فضل الرحمان چيو تها سان جو پاڻ ۾ محبت جو رشتو آهي منهنجو ۽ ان جو والد پاڻ ۾ دوست هئا ۽ محبت واري هن رشتي کي اڃا به جاري رکيو آهي اسان وڏڙن جي هن روايت کي جاري رکڻ چاهيون ٿا هن چيو ته منهنجي گذريل ڏينهن آصف علي زرداري ۽ اڄ پير صاحب پاڳاري سان ملاقات جيتوڻيڪ ڪنهن خاص ايجنڊا جو حصو نه آهي پر موجوده حالتن ۾ نهايت اهم آهي مان خود هي ڪوشش ڪئي آهي تها ن سان ملاقات ڪري صورتحال تي ڳالگهه ٻولهه ڪئي وڃي ته جيئن صورتحال کي سمجهڻ ۾ سولائي ٿي سگهي هن وقت ملڪ خراب حالتن مان لنگهي رهيو آهي پاڪستان ۽ سعودي عرب جا لاڳاپا عقيدت ۽ احترام ڀائپي ۽ تاريخي آهن جن کي اسان ڪڏهن به فراموش نٿا ڪري سگهون سعودي عرب اسان جي هر آزمائش تي اسان جو ساٿ ڏنو ۽ اسان به پورا لهون ٿا هن چيو ته عربن جي گڏيل معاهدي جي نتيجي ۾ جيڪو به فيصلو ٿيو ان کي خود ڪرڻ ڏنو وڃي ڪجهه ماڻهو بي احتياط ٿي ڳالهين ٿا ۽ حرمين شريفن کي نشانو بنائڻ جون ڳالهيون ڪن ٿا مان انهن ماڻهن کي چوان ٿو ته اهي احتياط ڪن ۽ حد ۾ رهن اهڙي طرح مسلم قوم جا جذبا مجروح ٿيندا اسان کي ڪوئي اهڙو عمل نه ڪرڻ گهرجي جنهن سان اسلامي دنيا کي تڪليف اچي مولانا فضل الرحمان چيو ته اسان کي امن ۽ سلامتي ۽ ڀائپي جو مظاهرو ڪرڻو پوندو ۽ اهڙي طرح اڳتي وڌڻ جي ضرورت آهي. هن چيو ته ايتري قدر سعودي عرب پاڪستاني فوج موڪلڻ جو معاملو آهي ته هي ايترو آسان نه آهي حڪومت کي به جلدبازي بدران مشاورت سان ڪم ڪرڻُ پوندو اسان کي سعودي عرب سان پنهنجن عقيدت ۽ احترام ۽ پاڙي جي لاڳاپن کي به نظر ۾ رکڻو پوندو پاڪستان اسلامي دنيا جو سڀ کان اهم ۽ 20 ڪروڙ مسلمانن جو ملڪ آهي پاڪستان کي انهن مشڪل حالتن ۾ مسئلي کي حل ڪرڻ لاءِ ڪردار ادا ڪرڻو پوندو ۽ پاڪستان کي ڪوئي به فيصلو ڪرڻ وقت احتاط سان ڪم وٺڻو پوندو افغانستان جي مسئلي تي اسان ڪافي سالن کان هن وقت تائين ڦاٿل آهيون ۽ ٻاهر نه نڪري سگهيا آهيون. ايندڙ هفتي وزيراعظم سان ملاقات ٿيندي ته ان اشو تي ٻيهر ڳالهه ٻولهه ٿيندي ان موقعي تي پير صاحب پاڳارو چيوت ه مولانا فضل الرحمان منهنجي گهر آيو هي ان جي وڏي مهرباني آهي 2 کان اڍائِ ڪلاڪ ملاقات ٿيندي رهي هن ملاقات ۾ پاڪستان جي اندروني ۽ عالمي حالتن تي ڳالهه ٻولهه ٿي مولانا فضل الرحمان حالتن تي جيڪو تجويزو ڪيو آهي مان ان سان متفق آهيان ته ان جو تجزيو موجودن حالتن جي عين مطابق آهي.