تازيون خبرون

Daily Archives: March 28, 2015

جلد ملڪ مان دهشتگردن جو خاتمو ڪيو ويندو: وزيراعظم

اسلام آباد (بيورو) وزيراعظم نواز شريف لورالائي حملي ۽ قائد آباد ڌماڪي جي مذمت ڪندي چيو آهي ته اهڙن واقعن سان قوم جو عزم ڪمزور نه ٿو ڪري سگهجي، جلد ملڪ مان دهشتگردن جو خاتمو ڪيو ويندو. وزيراعظم نواز شريف بلوچستان جي شهر لورالائي ۽ ڪراچي جي علائقي قائد آباد حملي ۽ ڌماڪي ۾ قيمتي انساني جانين جي زيان تي ڏک ۽ افسوس جو اظهار ڪيو. وزيراعظم چيو آهي ته دهشتگردن جي بزدلاڻين ڪارروائين سان حڪومت، فورسز ۽ عوام جو عزم ڪمزور نه ٿو ڪري سگهجي، اهو ڏينهن پري ناهي جڏهن دهشتگردن جو ملڪ مان مڪمل خاتمو ڪيو ويندو. وزيراعظم چيو ته دهشتگردي جي هر صورت ۾ پاڙ پٽي ويندي، ڪراچي آپريشن آخري ڏوهاري تائين جاري رکيو ويندو، ڪنهن کي به آپريشن تي اثر انداز ٿيڻ نه ڏنو ويندو، ڪراچي ۾ هلندڙ آپريشن ۽ آپريشن ضرب عضب اميدن کان وڌيڪ نتيجا ڏنا اهن، ڪراچي آپريشن سڀني سياسي پارٽين جي مشاورت سان شروع ڪيو، دهشتگردي جو خاتمو ڪري ئي ساهه پٽينداسين، قوم هاني روشنين طرف وڌي رهي آهي، ملڪ مان اونداهي جو خاتمو ڪري ڇڏينداسين،

 

سنڌ حڪومت ايل اين جي گهرائڻ جي مخالفت ڪري ڇڏي

ڪراچي (اسٽاف رپورٽر) سنڌ سرڪار وفاقي حڪومت پاران قطر مان گهرايل ايل اين جي تي اعتراض واريا آهن، وڏي وزير چيو آهي ته ايل اين جي قدرتي گئس کان گهٽ معياري ۽ مهانگي آهي، ان کي پنجاب يا ٻين علائقن ۾ استعمال ڪيو وڃي ۽ سنڌ کي صوبي مان نڪرندڙ گئس ڏني وڃي. وزيراعليٰ هائوس ۾ پريس ڪانفرنس ڪندي وڏي وزير چيو ته وفاقي حڪومت ايل اين جي گهرائڻ تي کين اعتماد ۾ نه ورتو. هن چيو ته ايل اين جي مهانگي هئڻ سان گڏ ان جي ڪوالٽي به قدرتي گئس کان گهٽ آهي. وڏي وزير چيو ته گڏيل مفادن واري ڪائونسل جي اجلاس ۾ ايل اين جي جو معاملو اٿاريو هو پر ايجنڊا ۾ نه هئڻ سبب ان تي ڌيان نه ڏنو ويو. سيد قائم علي شاهه چيو ته سنڌ سان انصاف ڪندي صوبي مان نڪرندڙ گئس ڏني وڃي ۽ وفاق پاران گهرايل ايل اين جي ڀلي پنجاب يا ٻين علائقن ۾ استعمال ڪئي وڃي. سيد قائم علي شاهه چيو ته گڏيل مفادن واري ڪائونسل جو اجلاس هر ٽن مهينن بعد ٿيڻ گهرجي. سيد قائم علي شاهه جو چوڻ هو ته ايل اين جي گهرائڻ جي فيصلي تي 70 سيڪڙو گيس پيدا ڪندڙ سنڌ صوبي کي اعتماد ۾ ناهي ورتو ويو ان فيصلي تي سنڌ حڪومت سان ڪا مشاورت به نه ڪئي وئي ايل اين جي جي ورهاڱي ۽ ان جون قيمتون مقرر ڪرڻ جوبه ڪو فارمولو طئه ناهي ڪيو ويو سنڌ جي وڏي وزير جو چوڻ آهي ته ايئن لڳي ٿو ته وفاقي حڪومت مهانگي اگهه تي خريد ڪيل ايل اين جي سنڌ کي وڪرو ڪندي پر هو ائين ٿيڻ نه ڏيندا، ايل اين جي جي خريد ۽ وڪري جي مسئلي کي گڏيل مفادن واري ڪائونسل ۾ اٿاريو ويو پر ان جو ڪوبه جواب نه مليو ان موقعي تي صوبائي وزير مراد علي شاهه جو چوڻ هو ته ايل اين جي ۽ مقامي گيس کي مڪس ڪري وڪرو ڪرڻ جو منصوبو بڻايو ويو آهي جنهن سان اسان جو گيس اسان کي ئي مهانگو ملندو وفاقي حڪومت جي ان ناانصافي تي سپريم ڪورٽ سان رابطو ڪنداسين.

 

عمران خان ۽ عارف علوي جي آڊيو ٽيپ ڌرڻي جي اصل حقيقت واضح ڪري ڇڏي: پرويز رشيد

اسلام آباد (بيورو) تحريڪ انصاف جي چيئرمين عمران خان ۽ عارف علوي جي ڳالهه ٻولهه منظرعام تي اچڻ کانپوءِ ردعمل جو اظهار ڪندي سڌ سماءَ واري وفاقي وزير پرويز رشيد جو چوڻ هو ته ڌرڻو اصل ۾ جمهوري حڪومت خلاف سازش هو سڌ سماءَ واري وفاقي وزير سينيٽر پرويز رشيد جو چوڻ هو ته تحريڪ انصاف چور دروازي کان اقتدار حاصل ڪرڻ چاهي پئي ۽ عمران خان ۽ عارف علوي جي آڊيو ٽيپ ڌرڻي جي اصل حقيقت واضح ڪري ڇڏي آهي، هن جو چوڻ هو ته ڌرڻو جمهوري حڪومت خلاف سازش هو جڏهن ته ٽيپ جاويد هاشمي جا الزام به سچ ثابت ڪري ڇڏيا آهن.

 

يمن خلاف سعودي عرب جو ساٿ ڏيڻ کان اڳ پارليامينٽ جي راءِ ورتي وڃي: خورشيد شاهه

اسلام آباد (بيورو) پاڪستان پيپلز پارٽي جي مرڪزي اڳواڻ ۽ قومي اسيمبلي ۾ مخالف ڌر جي اڳواڻ سيد خورشيد احمد شاهه چيو آهي ته سعودي عرب جو يمن خلاف ساٿ ڏيڻ کان اڳ پارليامينٽ جو اجلاس سڏائي راءِ ورتي وڃي، سعودي عرب جي سرزمين کي ڪو خطرو ٿئي ته ان کي ڪو به مسلمان برداشت نه ٿو ڪري سگهي، اسان کي عالم اسلام جي اتحاد لاءِ پنهنجو ڪردار ادا ڪرڻو آهي، هن چيو ته هڪ مسلمان ۽ پاڪستاني جي حيثيت وچ ايشيا جي حوالي سان اسان جو فرض آهي ته اسان ايوان ۾ ڳالهايون، هن چيو ته وچ ايشيا جي جنگ ۾ جيڪڏهن پاڪستان شريڪ ٿيڻ چاهي ٿو ته سندس خيال آهي ته ان لاءِ ايوان کي اعتماد ۾ ورتو وڃي، ڇاڪاڻ ته هي ايوان سڄي پاڪستان جي نمائندگي ڪندڙ ايوان آهي، هن چيو ته سعودي عرب سان اسان جو اڻ ٽٽ رشتو آهي، پاڪستان کي ٻرندڙ باهه کي ختم ڪرڻ لاءِ ڪردار ادا ڪرڻ گهرجي، پاڪستان جي قيادت کي گهرجي ته سعودي عرب، يمن ۽ شام سميت سمورن اسلامي ملڪن ۾ وڃي عالم اسلام جي اندروني ڪرود کان بچائڻ لاءِ پنهنجو ڪردار ادا ڪري، هن چيو ته سمورا اسلامي ملڪ پنهنجي بقا ۽ حضرت محمد مصطفيٰ صله جي دين جي تحفظ لاءِ پهريان اندروني طور تي امن قائم ڪن، اڄ اسان پاڻ انتشار جو شڪار آهيون، اسان کي ان جنگ ۾ شريڪ ٿيڻ نه گهرجي، هن چيو ته اسان کي ماضي کي آڏو رکي فيصلا ڪرڻ گهرجن، پنهنجي پرڏيهي پاليسي درست ڪرڻ گهرجي، سمورا فيصلا پارليامينٽ ۾ ٿيڻ گهرجن، حڪومت کي پارليامينٽ تي اعتماد ڪرڻ گهرجي، هن چيو ته حڪومت پارليامينٽ جو گڏيل اجلاس طلب ڪري يا ڪل جماعتي ڪانفرنس طلب ڪري سياسي قيادت کي اعتماد ۾ وٺي، هن چيو ته دعا آهي ته الله تعاليٰ عالم اسلام ۾ اتحاد قائم ڪري، خدا ڪري عرب ليگ کي ڳالهه سمجهه ۾ اچي وڃي، مسلمانن جي جنگ ڪنهن جي به حق ۾ نه آهي.

 

وزيراعظم سان ايم ڪيو ايم وفد جي ملاقات، ڪراچي آپريشن تي خدشا ظاهر

اسلام آباد (بيورو) وزيراعظم محمد نواز شريف چيو آهي ته ڪراچي جي عوام پهرين ئي مشڪلاتن ۾ ورتل آهي، سياسي پارٽين جي اخلاقي ذميداري آهي ته هو ڪراچي ۾ امن ۽ استحڪام جي بحالي لاءِ پرخلوص ڪوششن ڪن، ڏوهاري عنصرن جي خلاف آپريشن انهن جي مڪمل خاتمي تائين جاري رهندو، اهڙن خيالن جو  اظهار هن ڪالهه هتي وزيراعظم هائوس ۾ متحده قومي موومينٽ جي وفد سان ڳالهائيندي ڪيو. وزيراعظم چيو ته ڪراچي ۾ آپريشن سمورن پارٽين جي اتفاق راءِ سان شروع ڪيو ويو آهي ۽ هي شهر مان سمورن ڏوهاري عنصرن جي خاتمي تائين جاري رهندو، هن چيو ته آپريشن ڪنهن خاص پارٽي يا گروپ جي خلاف نه آهي ۽ قانون لاڳو ڪندڙ ادارن کي هدايت ڪئي وئي آهي ته هو دهشتگردن ۽ ڏوهاري عنصرن خلاف بنا ڪنهن متڀيد جي ڪارروائي ڪن ته جئين ماڻهن کي انهن مان نجات ملي سگهي، وزيراعظم چيو ته مسلم ليگ (ن) ڇڪتاڻ جي پاليسي تي يقين نٿي رکي، اسان جمهوريت جي بحالي ۽ قانون جي حڪمراني برقرار رکڻ لاءِ جدوجهد ڪئي آهي ۽ ماضي مان گهڻو ڪجهه سکيو آهي، هن چيو ته اسان تمام مشڪل حالتن کي منهن ڏنو آهي پر اصولن تي ڪڏهن به ٺاهه نه ڪيو، متحده جي وفد ۾ ڊاڪٽر فاروق ستار، عبدالرشيد گوڊيل ۽ خالد مصطفيٰ صديقي شامل هئا، ان موقعي تي اطلاعات ۽ نشريات جو وفاقي وزير پرويز رشيد، ريلوي جو وفاقي وزير خواجه سعد رفيق ۽ وزيراعظم جو پوليٽيڪل سيڪريٽري ڊاڪٽر آصف ڪرماڻي به موجود هئا.

 

شرجيل ميمڻ درجن کان وڌيڪ غير قانوني شادي هالن کي پنهنجي نگراني ۾ ڊهرائي پٽ ڪري ڇڏيو

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ جمعي واري ڏينهن شهر ۾ قبضن ۽ خاص ڪري راندين جي ميدانن، پارڪس ۽ عام ڀلائي واري پلاٽن تي قائم غير قانوني شادي هالن جي خلاف جاري مهم جي سلسلي ۾ درجن کان وڌيڪ غير قانوني شادي هال ۽ انهن کي پنهنجي نگراني ۾ مسمار ڪرائي ڇڏيو ، جڏهن ته ڊسٽرڪٽ سينٽرل جي ايڊمنسٽريٽر ڪمال احمد کي وارننگ ڏني ويئي آهي ته ڊسٽرڪٽ سينٽرل ۾ قائم تمام غير قانوني شادي هال ۽ لان جمعي جي رات تائين مسمار ڪري ان جي رپورٽ کيس پيش ڪري ٻي صورت ۾ کيس معطل ڪيو ويندو.شرجيل ميمڻ انهن سڀني ماڻهن سان معذرت ڪئي جن ماڻهن اهي غير قانوني شادي هالن جي بڪنگ ڪرائي هئي ۽ چيو آهي ته اسين هن شهر جي عوام ۽ ٻارن جي راند ۽ تفريح جي ميدانن کي ڪنهن به صورت ڪمرشل طور تي استعمال نه ٿيڻ ڏيندا سين . هن چيو ته اها ڪارروائي بنا فرق جي سموري صوبي ۾ان  وقت تائين جاري رکي ويندي جيستائين تمام راندين جا ميدان ، پارڪ ۽ ٻين عام ڀلائي واري پلاٽن کي قبضن کان پاڪ نه ٿو ڪرايو وڃي. تقصيل موجب سنڌ جي اطلاعات ۽ بلديات کاتي واري وزير شرجيل انعام ميمڻ جمعي جي شام اوچتو سينٽرل ضلعي ۾ ناظم آباد نمبر 2 ، آئشه منزل ۽ گلبرڪ ٿاڻي جي حدن ۾ غير قانوني شادي هالن ۽ لان تي ڇاپا هڻي انهن کي مسمار ڪرائي ڇڏيو. ان موقعي تي ايڊمنسٽريٽر ڪراچي ثاقب سومرو ، ميٽروپوليٽن ڪمشنر ڪراچي مسعود عالم ، ڊائريڪٽر لوڪل گورنمينٽ روبينه آصف ، ڊي سي سينٽرل ، ايڊمنسٽريٽر ۽ ميونسپل ڪمشنر سينٽرل ۽ ٻيا اعليٰ آفيسر به ساڻس گڏ هئا. صوبائي وزير ناظم آباد نمبر 2 ۾ گرين بيلٽ تي قائم غير قانوني شادي هال کي پنهنجي نگراني ۾ مسمار ڪرائي سمورو سامان ضبط ڪرڻ جا حڪم ڏنا. هن آئشه منزل ۾ مسجد خير العمل جي پٺيان ٻارن جي راند جي ميدان ۾ قائم شادي هال کي به پنهنجي نگراني ۾ مسمار ڪرايو. ان موقعي تي اتي موجود سوين ٻارن صوبائي وزير جي ان قدم تي ڀرپور نعري بازي ڪئي ۽ کيس اپيل ڪئي ته هو کين پنهنجي هٿن سان اهو گرائونڊ حوالي ڪري، جنهن تي صوبائي وزير ٻارن سان هٿ ملايو ۽ کين گرائونڊ سندن حوالي ڪرڻ جي نويد ڏني. جنهن تي اتي موجود رهاڪن جي وڏي تعداد شرجيل ميمڻ جي ان قدم تي کيس خراج تحسين پيش ڪيو. ان کان پوءِ صوبائي وزير گلبرڪ ٿاڻي سان لاڳاپيل راندين ۽ ثقافتي مرڪز جي بائونڊري وال ۾ موجود هڪ درجن کان وڌيڪ شادي هال کي به پنهنجي نگراني ۾ ڊهرايو ۽ علائقي جي ڊي ايس پي ۽ ٻين اعليٰ آفيسرن کي هدايتون ڏنيون ته هو مڪمل طور تي ان کي صاف ڪرائي هڪ ميدان بڻائن. ان موقعي تي موجود ميڊيا سان ڳالهائيندي شرجيل انعام ميمڻ چيو ته اسان ٽي مهينا پهرين اهڙن شادي هالن ، لان ۽ راندين جي ميدانن ۾ غير قانوني شادي هال قائم  ڪندڙن کي خبردار ڪيو هو ته هو ازخود ان غير قانوني ڪم کي بند ڪن، پر افسوس انهن نه صرف اسان جي هدايتن کي نه ٻڌو پر حڪومتي رٽ کي به چئلينج ڪيو. شرجيل انعام ميمڻ چيو ته هاڻي هن شهر ۽ صوبي ۾ راندين جي ميدانن ، پارڪن  ۽ عام ڀلائي واري زمينن تي ڪنهن به قسم جو قبضو برداشت نه ڪندا سين. اهڙا سمورا شادي هال ۽ لان جيڪي ان زمينن تي قائم آهن انهن نه فقط ڊاهي ان جو سامان ضبط پر انهن جي مالڪن خلاف ڪيس به داخل ڪيا ويندا. هن چيو ته جنهن جنهن ضلعي ۾ اهڙا شادي هال يا سرڪاري زمينن تي قبضي جي خاطمي ۾ اتان جا آفيسر ناڪام نظر آيا ته کين معطل ڪيو ويندو. هڪ سوال جي جواب ۾ هن چيو ته اهڙي قسم جي شادي هالن ، پارڪن ۽ راندين جي ميدانن تي قبضا ڪراچي جي عوام خاص ڪري ٻارن سان زيادتي جي برابر آهن. هن چيو ته اڄ آئّشه منزل جي ويجهو هڪ راندين جي ميدان ۾ سالن کان قابض شادي هال جي خاتمي کانپوءِ اتان جي ٻارن ۽ علائقي جي رهاڪن پاران جنهن انداز ۾ کيس ساراهيو ويو اهو ان ڳالهه جو ثبوت آهي ته هاڻي هن شهر جو عوام ان قبضا مافيا خلاف اسان جي ان مهم ۾ اسان سان گڏ آهي. هن چيو ته اسان اها ڪارروائي سپريم ڪورٽ آف پاڪستان جي واضح هدايتن جي روشني ۾ شروع ڪئي آهي پر افسوس جو هيٺين سطح جي عدالتن پاران پنهنجي ئي اعليٰ عدالتن جي فيصلن جي برخلاف اسٽي آرڊر به ڏنا پيا وڃن. پر ان سلسلي ۾ اسان جا قانوني ماهر ان سموري هيٺين عدالتن سان رابطا ڪري کين معزز عدالتن جي فيصلي کان آگاهه ڪرڻ شروع ڪري ڏنو آهي. هڪ سوال جي جواب ۾ هن چيو ته بلاول هائوس ٻاهران رنڊڪون پيپلز پارٽي يا سنڌ حڪومت نه پر پوليس ۽ ٻين امن امان جي بحاليءَ واري ادارن پاران بلاول  هائوس ۾ ٿريٽ کان پوءِ لڳايا ويا آهن ۽ اتي چيڪ پوسٽون به انهن ئي قائم ڪيون آهن. هڪ سوال جي جوا ب ۾ هن چيو ته اسان ڪي ايم سي جي تحت ڪراچي ۾ اهڙي پاليسي جلد جوڙي رهيا آهيون ته جيڪي به ماڻهو هتي تقريبن لاءِ هال بڪ ڪرائن انهن کي ان ڳالهه جو علم هجي ته اهو هال قانوني آهي پر عوام کي گهرجي ته هو هال جي بڪنگ کان پهرين ڄاڻايل هال جي انتظاميه کان ان ڳالهه جي تصديق ڪن ته شادي هال غير قانوني ناهي ته جيئن هو پريشانين کان بچي سگهن. هڪ سوال جي جواب ۾ هن چيو ته انهن شادي هالن جي انتظاميا کي ماضي ۾ ناظمن پنهنجي اختيارن کان وڌيڪ غير قانوني طور تي اجازت نامه ڏنا هئا ۽ انهن هن شهر جي عوام ۽ ٻارن سان تمام وڏي ناانصافي ڪئي آهي.

 

الطاف حسين پاران خانگي ٽي وي چينل جي خلاف ايف آءِ آر داخل ڪرڻ جو اعلان، وزير اعظم کان معافي وٺڻ جو مطالبو

لنڊن (مانيٽرنگ ڊيسڪ) ايم ڪيو ايم جي سربراهه الطاف حسين خانگي ٽي وي چينلز جي خلاف ايف آءِ آر داخل ڪرڻ جو اعلان ڪري ڇڏيو ان جو چوڻ هو ته صولت مرزا جي بيان جي حوالي سان اسان جا وڪيل ڪنهن نتيجي تي نه پهچي سگهيا چوڌري نثار اسٽيبلشمينٽ جي خلاف هڪ جملو به نٿو ڳالهائي نوازشريف لنڊن ۾ اسان جي گهر اچي ۽ مافي وٺي.

 

صولت مرزا جي سزا 30 ڏينهن لاءِ روڪڻ جي صدر کي سفارش

اسلام آباد (بيورو) وزيراعظم،ڦاهيءَ جي منتظر ايم ڪيو ايم جي اڳوڻي ڪارڪن صولت مرزا جي سزا 30 ڏينهن لاءِ روڪڻ جِي صدر کي سفارش ڪري ڇڏي. وزيراعظم نواز شريف، صولت مرزا جي ڦاهيءَ واري سزا تي عملدرآمد 30 ڏينهن تائين ملتوي ڪرڻ لاءِ صدر ممنون حسين سفارش اماڻي آهي. ياد رهي ته صولت مرزا کي 19 مارچ تي ڦاهي اچڻي هئي پر گهرو وزارت طرفان جوابدار جي سزا 90 ڏينهن لاءِ ملتوي ڪئي وئي جنهن بعد مچ جيل اختيارين کي درخواست تي دهشتگردي ٽوڙ عدالت کيس پهرين اپريل تي ڦاهيءَ تي ٽنگڻ جو حڪم ڏنو هو.

 

اسان جي ساک کي نقصان پهتو، وزيراعظم ان جو ازالو ڪري: فاروق ستار

اسلام آباد (بيورو) متحده قومي موومينٽ جي وفد وزيراعظم نواز شريف سان ملاقات ڪئي ۽ ان کي پنهنجن خدشن کان آگاهه ڪيو ملاقات کانپوءِ ميڊيا جي نمائندن سان ڳالهائيندي ايم ڪيو ايم اڳواڻ فاروق ستار جو چوڻ هو ته قانون لاڳو ڪندر ادارن جي ڪارروائي ۾ ڪابه رڪاوٽ ناهي وڌي قانون لاڳو ڪندڙ ادارن سان هميشه تعاون رهيو آهي متحده ڪالهه به آپريشن ۾ تعاون ڪري رهي هئي ۽ اڄ به ڪري رهي آهي فاروق ستار جو چوڻ هو ته ڪراچي آپريشن ۾ متحده جي 200 ميمبرن کي ٽارگيٽ ڪلنگ ۾ ماريو ويو جڏهن ته گذريل ستن سالن ۾ 12 سئو ڪارڪنن کي ماريو ويو عدالت کان مٿانهن قتلن تي احتجاج اسان جو حق آهي، ايم ڪيو ايم اڳواڻ چيو ته نائن زيرو کي ڏوهاري ماڻهن جو مسڪن ثابت ڪرڻ جي ڪوشش جي مذمت ڪريان ٿو ان تاثر کي رد ڪريان ٿو ته نائن زيرو تي ڪنهن ڏوهاري کي رکيو آهي اسان جي ميڊيا ٽرائل جو مخالفن کي موقعو ڏنو ويو نائن زيرو جي آس پاس ۾ ڪي ڏوهاري هئا ته انهن کي گرفتار ڪرڻ گهرجي ها، الطاف ڀاءُ جي پوري زندگي جي محنت داءُ تي لڳل آهي اسان جي ساک کي نقصان پهتو آهي وزيراعظم ان جو ازالو ڪري.

 

يمن جي جنگ ۾ ڀائيواري ڪرڻ درست نه آهي: عمران خان

لاهور(بيورو) لاهور ۾ هڪ تقريب کانپوءِ ميڊيا سان ڳالهائيندي تحريڪ انصاف جي چيئرمين عمران خان جو چوڻ هو ته مون پاڻ سان لاڳاپيل ڪنهن قسم جي آڊيو ٽيپ في الحال ناهي ٻڌي جڏهن ته قانوني طور تي ٽيليفون تي ڳالهه ٻولهه رڪارڊ ڪرڻ ڏوهه آهي جيڪڏهن چاهيان ته نواز شريف جي گانن جي ٽيپ سامهون آڻيان، ايئن  ڪرڻ ڪا وڏي ڳالهه ناهي هن چيو ته مون پنهنجي ڳالهه ٻولهه ۾ ڪنهن کي نه چيو هوندو ٽارگيٽ ڪلنگ ڪريو ۽ ڀتو وصول ڪريو جوڊيشل ڪميشن تي پڇيل سوال جو جواب ڏيندي هن جو چوڻ هوته جوڊيشل ڪميشن تي حڪومت سان گذريل 3 مهينن کان ڳالهه ٻولهه هلي رهي هئي ۽ ان باري ۾ سمورا تفصيل ميڊيا جي سامهون آندا هئا پر ڪالهه پيغام مليو آهي ته حڪومت ايم او يو تبديل ڪرڻ چاهي ٿي مان وزيراعظم نواز شريف ۽ اسحاق ڊار کي واضح ڪرڻ ڇڏڻ چاهيان ٿو ته جيڪڏهن حڪومت هاڻ پنهنجي موقف کان پوئتي هٽي ته اسان ٻيهر رستن تي نڪرنداسين ۽ حڪومت سان ٻيهر ڪابه ڳالهه نه ٿيندي هن چيو ته مسلم ليگ ن کي ڊپ آهي ته جوڊيشل ڪميشن ۾ ان جي ڌانڌلي سامهون اچي ويندي مسلم ليگ ن جيڪڏهن هاڻ جوڊيشل ڪميشڻ جي معاهدي  تان پوئتي هٽي ته واضح ٿي ويندو ته حڪومت ڊنل آهي يمن جي جنگ ۾ شرڪي ٿيڻ جي حڪومتي فيصلي تي ڳالهائيندي عمران خان چيو ته ٻاهرين جي جنگ م شريڪ ٿياسين ته ملڪ ۾ وڌيڪ حالتون خراب ٿي وينديون، جيڪڏهن ڪنهن جي جنگ ۾ ڌر بڻجي وياسين ته اهو پاڪستاني قوم سان وڏو ڏوهه هوندو.