تازيون خبرون

Daily Archives: March 26, 2015

وزيراعظم ڪراچي آپريشن جي ٻئي مرحلي جي منظوري ڏئي ڇڏي

ڪراچي (اسٽاف رپورٽر) وزيراعظم نوازشريف ڪراچي آپريشن جي ٻئي مرحلي جي منظوري ڏئي ڇڏي آهي. ذريعن موجب وزيراعظم نوازشريف پي اي ايف بيس ڪراچيءَ ۾ امن امان بابت اعليءَ سطحي اجلاس جي صدارت ڪئي. اجلاس ۾ سنڌ جي گورنر ڊاڪٽر عشرت العباد خان شرڪت نه ڪئي. جڏهن ته سنڌ جو وزير سيد قائم علي شاهه شريڪ ٿيو. ذريعن موجب اجلاس ۾ صولت مرزا جي الزامن کانپوءِ سنڌ جي گورنر کي هٽائڻ بابت غور ويچار نه ڪيو ويو. اجلاس دوران وزيراعظم نوازشريف جو چوڻ هو ته مان ڪراچيءَ ۾ مڪمل طور تي امن ڏسڻ چاهيان ٿو. وزيراعظم هدايت ڪئي ته ڪراچيءَ ۾ آخري ڏوهاريءَ جي خاتمي تائين آپريشن جاري رکيو وڃي. هن چيو ته اسين ڪراچيءَ جون روشنيون ٻيهر بحال ڪرائينداسين. وزيراعظم رينجرز کي آپريشن بابت مڪمل طور تي پٺرائي ڪئي ويندي. اجلاس دوران سنڌ جي وڏي وزير سيد قائم علي شاهه وزيراعظم کي فوجي ڪورٽ بابت بريفنگ ڏني. ذريعن موجب وزيراعظم ڪراچيءَ ۾ آپريشن جي ٻئي مرحلي جي منظوري رينجرز کي ٽارگيٽ ڪلرن جي انڪشافن کانپوءِ هٿياربند وند ۾ ملوث ايم ڪيو ايم جي اسيمبلي ميمبرن جي گرفتارين جي منظوري ڏئي ڇڏي آهي. ڪراچي پوليس پاران وزيراعظم ميان محمد نوازشريف کي تازو ٽارگيٽيڊ آپريشن جي رپورٽ پيش ڪئي ويئي آهي رپورٽ ڪراچي آپريشن جي 565 ڏينهن جي ڪارڪردگي تي ٻڌل آهي جنهن ۾ آپريشن کان اڳ جي 565 ڏينهن سان پوليس جي تازي ڪارڪردگي جي ڀيٽ ڪئي ويئي آهي هي رپورٽ اربع تي ڪراچي پوليس پاران وزيراعظم محمد نوازشريف جي صدارت پي اي ايف بيس فيصل ۾ ٿيندڙ اپيڪس ڪميٽي جي اجلاس ۾ پيش ڪئي ويئي رپورٽ ۾ ڪراچي آپريشن جي 565 ڏينهن جي ڀيٽ آپريشن کان اڳ جي 565 ڏينهن سان ڪئي ويئي آهي رپورٽ ۾ ٻڌايو ويو ته ڪراچي آپريشن ۾ پوليس کي خاص ڪاميابيون مليون آهن 5 سيپٽمبر 2013 کان 23 مارچ 2015 تائين جي 565 ڏينهن بابت ڪراچي پوليس جي دعويٰ آهي ته مجموعي طور پوليس مقابلن ۾ مختلف ڏوهن ۾ ملوث 200 ڏوهاري مارجي ويا جڏهن ته آپريشن کان پوءِ 565 ڏينهن ۾ 895 ڏوهاري مارجي ويا آپريشن کان اڳ 1810 پوليس مقابلا ٿيا جڏهن ته آپريشن کان پوءِ 2687 مقابلا ٿيا ڪراچي آپريشن کان اڳ 1347 قتل جا ڏوهاري گرفتار ٿيا آپريشن کان اڳ 283 ڀتاخور بعد ۾ 487 گرفتار ٿيا اغوا جا 79 جوابدار گرفتار ٿيا جڏهن ته بعد ۾ 108 گرفتار ڪيا ويا آپريشن جي دوران 2014 ۾ ٽارگيٽ ڪلنگ سميت مختلف واقعن ۾ 142 اهلڪار شهيد ٿيا جڏهن ته 2015 ۾ هن وقت تائين هي انگ صرف 28 آهي ڪراچي پوليس جي دعويٰ آهي ته هن ڪراچي آپريشن جي 565 ڏينهن جي دوران 50 هزار 9 ماڻهو گرفتار ڪيا جڏهن ته پهرين ڏينهن ۾ 39 هزار 319 ماڻهن کي گرفتار ڪيو ويو ڪراچي پوليس وزيراعظم کي پيش ڪيل پنهنجي رپورٽ ۾ اها به دعويٰ ڪئي ته شهر ۾ ٽارگيٽ ڪلنگ مڪمل طور تي ختم ٿي چڪي آهي.

 

خيرپور لڳ لڱ ڪانڊاريندڙ روڊ حادثو، 16 مسافر اجل جو شڪار ، 20 زخمي

ڪراچي/خيرپور (نمائندن وٽان/اي پي پي) خيرپور ويجهو قومي شاهراهه تي مسافر ڪوچ ۽ ٽرڪ جي ٽڪر جي نتيجي ۾ 15 مسافر فوت ۽ 20 زخمي ٿي پيا. تفصيل موجب اربع تي صبح جو خيرپور جي پسگردائي واري علائقي سيٺارجا ۾ اسلام آباد کان ڪراچي ويندڙ مسافر ڪوچ سامهون کان ايندڙ ٽرڪ سان ٽڪرائجي وئي جنهن جي نتيجي ۾ 16 مسافر ٿڏي تي فوت ٿي ويا جڏهن ته 20 زخمي ٿي پيا. ريسڪيو اختيارين موجب فوتين جا لاش ۽ زخمين کي ٺري مير واهه، گمبٽ ۽ خيرپور جي اسپتالن ۾ منتقل ڪيو ويو آهي. ٺري مير واهه، گمبٽ ۽ خيرپور سول اسپتال ۾ ايمرجنسي لاڳو ڪئي وئي پوليس جي شروعاتي رپورٽ موجب حادثو تيز رفتاري ۽ ڪوچ ڊرائيور جي غفلت سبب پيش آيو. حادثي بعد سکر جي ڪمشنر عباس بلوچ ۽ ڊپٽي ڪمشنر خيرپور منور علي مٺاڻي ٺري مير واهه اسپتال پهچي زخمين جي عيادت ڪئي ۽ کين علاج جون بهترين سهولتون مهيا ڪرڻ جي هدايت ڪئي. لاشن جي سڃاڻپ شوڪت قريشي،محمد حسن، سلطانه، حضرت علي خان، حيات، محمد طيب، عبدالعزيز، ذوالفقار، حماد الله، رياض احمد، محمود ارشد، فيصل مهر،جواد علي، حماد الله، عرفان، اسد، زوهيب ڪوثر، گلزار بيگم جڏهن ته زخمين جا نالا حمزه مصطفيٰ، سحرش، ساجد،جميله، انيله، راشد، اسد ٻڌايا ويا آهن. ٻئي پاسي سنڌ جي وڏي وزير سيد قائم علي شاهه اربع ڏينهن خيرپورميرس ضلعي ۾ ٻن مسافر بسن وچ ۾ ٽڪر جي نتيجي ۾ ٿيل جاني نقصان تي پنهنجي سخت ڏک ۽ غم جو اظهار ڪندي واقعي جو سخت نوٽيس ورتو آهي ۽ ڪمشنر ۽ ڊي آءِ جي سکر کي واقعي جي جاچ ڪرڻ ۽ جلد کان جلد رپورٽ ڏيڻ جي هدايت ڪئي آهي. سنڌ جي وڏي وزير صحت کاتي جي آفيسرن کي زخمين کي بهتر طبي سهولتون فراهم ڪرڻ جي هدايت ڪئي ۽ ضلعي انتظاميه کي زخمين جي علاج جي ڏس ۾ نگراني جي به هدايت ڪئي. سنڌ جي وڏي وزير ڪمشنر ۽ ڊي آءِ جي سکر کي هدايت ڪئي ته هو جاچ ڪري واقعي جي سببن جو تعين ڪن ۽ انهن سببن کي فوري طور تي حل ڪرڻ جي به ڪوشش ڪن. هن قيمتي انساني جانين جي حادثي جي نظر ٿيڻ تي پنهنجي افسوس جو اظهار ڪندي متاثر ڪٽنبن سان پنهنجي دلي همدردي ۽ تعزيت جو اظهار ڪيو.

 

اميد ته جوڊيشل ڪميشن سان ڌرڻو سياست ختم ٿي ويندي: آصف زرداري

ڪراچي (اسٽآف رپورٽر) اڳوڻي صدر آصف علي زرداري طرفان جاري ڪيل بيان ۾ چيو ويو آهي ته جوڊيشل ڪميشن قائم ٿيڻ سان پي ٽي آءِ جي ميمبرن کي رستن بجاءِ پارليامينٽ ۾ ڪردار ادا ڪرڻ جو موقعو ملندو، اميد آهي ته جوڊيشل ڪميشن قائم ٿيڻ سان ڌرڻي واري سياست ختم ٿي ويندي، آصف علي زرداري جو چوڻ هو ته چونڊ سڌارن جي پارلياماني ڪميٽي کي گهرجي ته هو عوام ۽ ٻين ٻين حصيدارن کان به تجويزون وٺي اسان چاهيون ٿا ته چونڊ سڌارن جون تجويزون گڏيل هجن اڳوڻي صدر چيو ته چونڊن ۾ بدعنوانين جي خاتمي لاءِ سمورين سياسي تنظيمن جي اتفاق راءِ جي ضرورت آهي چونڊ بدعنوانين جي خاتمي لاءِ آين ۾ ترميم سميت سمورا قدم کڻڻ گهرجن.

 

تحريڪ انصاف پارليامينٽ ۾ پنهنجو سياسي ڪردار ادا ڪري، هر سوال جو جواب اتي ڏينداسين: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته تحريڪ انصاف پارليامينٽ ۾ واپس اچي ۽ پنهنجو سياسي ڪردار ادا ڪري سرڪاري ميڊيا مطابق هڪ انٽرويو ۾ وفاقي وزير چيو ته 2013ع جي عام چونڊن ۾ ماڻهن پاڪستان تحريڪ انصاف کي مينڊيٽ ڏنو هو ته جيئن هو پارليامينٽ ۾ انهن لاءِ ڪم ڪري سگهي ۽ عام ماڻهن لاءِ فلاحي منصوبا کڻي اچي پر پي ٽي آءِ ان جي برعڪس فيصلو ڪيو ۽ عوام جي مينڊيٽ خلاف ويندي پارليامينٽ جو بائيڪاٽ ڪري ڇڏيو هن چيو ته حڪومت تحريڪ انصاف جي هر سوال جو جواب ڏيندي شرط اهو آهي ته مناسب فارم تي سوال ڪيو وڃن جيڪو پارليامينٽ آهي، هن جو چوڻ آهي ته پاڪستان ٽڪراءُ واري سياست نه ٿو چاهي مسلم ليگ ن پهرئين ڏينهن کان ئي تحريڪ انصاف جي منفي تاثر کي ختم ڪرڻ جون ڪوششون ڪري رهي آهي.

 

جڊيشل ڪميشن 2013 جي چونڊن کي ڪالعدم قرار نٿو ڏيئي سگهي: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته جڊيشل ڪميشن 2013 چونڊن کي ڪالعدم قرار نٿو ڏيئي سگهي ڌانڌلي ٿابت ٿيڻ تي وزيراعظم اسيمبليون ٽوڙڻ جو پابند هوندو جڊيشل ڪميشن جو مدو 120 ڏينهن هوندو اميد آهي ته تحريڪ انصاف اسيمبلي ۾ واپس اچي ويندي قانون تي عملدرآمد لاءِ ڪنهن ڌمڪي کان ڊڄڻ نه گهرجي اربع تي هتي پارليمينٽ هائوس ۾ ميڊيا سان ڳالهه ٻولهه سيد خورشيڊ شاهه چيو ته گذريل ڏينهن وزيراعظم سان ٿيل ملاقات ۾ جڊيشل ڪميشن تي ڳالهه ٻولهه ٿي آهي ڪميشن 120 0ينهن لاءِ جوڙيو ويندو جيڪڏهن ڪميشن جي رپورٽ مين (ن) ليگ ڌانڌلي جي ذميوار قرار ڏني وڃي ٿي ته سڪن سان گڏ آلا به سڙي ويندا هن چيو ته صاف ۽ ايماندار ميمبرن کي به گهرن ڏانهن وڃڻو پوندو جڊيشل ڪميشن 2013 چونڊون ۾ ڌانڌلي ٿي آهي يا نه هو چونڊن کي ڪالعدم قرار نٿو ڏيئي سگهي جڏهن ته هي رپورٽ ڏي ٿو ته ڌانڏلي ٿي آهي ته وزيراعظم کي اخلاقي دٻاءُ هوندو ته اسيمبليون ٽوڙي ڇڏي هن توقع جو اظهار ڪيو ته تحريڪ انصاف پاڻ اسيمبلي ۾ واپس اچي ويندي هن چيو ته ڪراچي آپريشن بنا فرق جاري آهي پسند ۽ ناپسند جي بنياد تي نه پيو ٿيو ايم ڪيو ايم کي ڀت سان نٿا لڳائڻ چاهيون ايم ڪيو ايم ۾ ڪائي عسڪري ونگ آهي ته کيس ان کان لاتعلق ٿيڻ گهرجي ڪراچي آپريشن ايم ڪيو ايم جي مطالبي تي شروع ڪيو ويو ايم ڪيو ايم ته فوجي آپريشن جي خواهشمند هئي خورشيد شاهه چيو ته لائوڊ اسپيڪر جي استعمال تي پابندي صرف هڪ جماعت جي خلاف نه هئڻ گهرجي پر سموري سياسي جمهوري جماعت تي هڪڙي پابندي هجي ۽ قانون تي عملدرآمد لاءِ ڪنهن ڌمڪي کان خفا نه ٿيڻ گهرجي.

 

آخري دهشتگرد جي خاتمي تائين ڪراچي آپريشن جاري رهندو: وزير اعظم

ڪراچي (اسٽآف رپورٽر)وزير اعظم محمد نواز شريف چيو آهي ته آخري دهشتگرد جي خاتمي تائين دهشتگردي جي خلاف آپريشن جاري رهندو، ڪراچي آپريشن ڪنهن سياسي جماعت نه پر ڏوهارين جي خلاف آهي. ڪراچي شهر مان سمورن ڏوهن جي خاتمي وارو ڏينهن اچڻو آهي، هڪڙو ڪم شروع ڪيو آهي ته ان کي ختم ڪري سک جو ساهه کڻنداسين، ملڪي معيشت جي بحالي هڪ چيلنج هو ۽ توانائي جي مسئلي کي حل ڪرڻ کانسواءِ معيشت جي بحالي ممڪن ناهي توانائي جي بحران کي ختم ۽ بجلي کي سستو ڪرڻ جي لاءِ ڪوشسون ڪري رهيا آهيون. اهڙن خيالن جو اظهار هن ڪراچي اسٽاڪ ايڪسچينج ۾ نمايان ڪارڪردگي جو مظاهرو ڪندڙ 25 ڪمپنين ۾ ايوارڊ ورهائڻ واري تقريب کي خاص مهمان جي حيثيت ۾ خطاب ڪندي ڪيو. وزير اعظم چيو ته ڪراچي آپريشن ڪنهن جماعت جي خلاف ناهي پر ڏوهارين جي خلاف آهي ۽ جيڪو به ڏوهاري هجي ان کي نه بچڻ گهرجي ڀلي اهو ڪهڙي به ڪنڊ ۾ هجي. وزير اعظم چيو ته ڪراچي آپريشن 2013 ۾ گورنر هائوس ڪراچي ۾ اجلاس کانپوءِ صلاح مشوري سان شروع ڪيو ويو هو، جنهن ۾ سنڌ جو گورنر ڊاڪٽر عشرت العباد ۽ سنڌ جو وڏو وزير سيد قائم علي شاهه به موجود هئا. ڪراچي آپريشن جي نتيجي ۾ شهر ۾ ڀنگ لاءِ اغوا، ڀتا خوري، ٽارگٽ ڪلنگ ۽ ٻين ڏوهن کي روڪڻ ۽ گهٽ ڪرڻ ۾ ڪاميابي ملي آهي. هن چيو ته روزگار، ترقي ۽ سيڙپڪاري جي لاءِ ڪراچي ۾ امن ضروري آهي، جڏهن ڪراچي ترقي ڪندو ته پورو ملڪ ترقي ڪندو. امن امان جي قيام جي لاءِ سموريون ڪوششون ڪري رهيا آهيون ۽ ان ۾ اسان کي ڪاميابي به ملي رهي آهي پر ان ۾ اڃا وڌيڪ بهتري جي گنجائش موجود آهي. هن چيو ته ڏوهن جي مڪمل خاتمي تائين آپريشن جاري رهندو ۽ پنهنجي ان واعدي کي پورو ڪنداسين. هن چيو ته سنڌ حڪومت اسان سان ڪلهو ڪلهي ۾ ملائي ڪم ڪري رهي آهي. وزير اعظم چيو ته فرقيواريت ۾ ملوث ماڻهو جتي به هجن انهن کي بچي نڪري وڃڻ جو رستو نه ڏنو ويندو. هن چيو ته دهشتگردي جي خلاف جنگ ۾ اسان هزارين جانين جي قرباني ڏني آهي ۽ ملڪ جو اربين ڊالرن جو نقصان ٿيو آهي، جن ماڻهن اسان تي اها جنگ مسلط ڪئي آهي انهن کي شڪست ملندي، اسان ملڪ مان دهشتگردي جو خاتمو چاهيون ٿا، ان مسئلي کي پهريان ئي ٺيڪ ڪرڻ گهربو هو. هن چيو ته دهشتگردي جي خاتمي لاءِ اسان ڳالهيون به ڪيون ۽ ان کانپوءِ آپريشن شروع ڪيو ۽ جيستائين آخري دهشتگرد کي ختم نٿو ڪيو وڃي، آپريشن جاري رهندو آپريشن جي نتيجي ۾ دهشتگردن جو نيٽ ورڪ ختم ڪيو ويو آهي. دهشتگردي جي خاتمي لاءِ سمورين سياسي جماعتن سان ملي متفقه طور تي 20 نڪاتي قومي لائحه عمل جوڙيو ويو ۽ اڄ سڄي ملڪ ۾ ان تي عمل ڪيو پيو وڃي. هن چيو ته اسان ڪيترن ئي چيلنجز کي منهن ڏئي رهيا آهيون ۽ ملڪ کي ڏکيائين مان ڪڍڻ ۽ ملڪي معاملن کي ٺيڪ ڪرڻ جي لاءِ ڏينهن رات ڪم ڪرڻو پوندو. هن چيو ته اسان کي نه رڳو توانائي جي مسئلي تي ضابطو ڪرڻو آهي پر ايندڙ 25 سالن جي لاءِ به منصوبه بندي ڪرڻي آهي اسان نه رڳو بجلي جي کوٽ کي ختم ڪرڻو آهي پر بجلي کي سستو به ڪرڻو آهي ته جيئن مناسب قيمتن تي گهريلو صارفين ۽ ڪاروباري ماڻهن کي بجلي ملي سگهي. هن چيو ته توانائي جي بحران جي خاتمي لاءِ ڪوئلي، ايل اين جي، سولر ۽ ونڊ جهڙن منصوبن تي ڪم ڪري رهيا آهيون پر رڳو مختصر مدي وارن منصوبن تي ڪم ناهي ڪرڻو. ڊگهي مدت وارن منصوبن تي به ڪم ڪرڻو آهي ۽ اسان کي هائيڊرو پروجيڪٽس تي به ڌيان ڏيڻو آهي، جنهن ۾ ڀاشا، ڊاسو ۽ بونجي ڊيم وارا منصوبا شامل آهن، انهن منصوبن سان 15 کان 17 هزار ميگا واٽ بجلي به پيدا ٿيندي جيڪا بنجر زمينن کي به سيراب ڪندي. هن چيو ته ڀاشا ڊيم جي پاڻي جو ذخيرو تربيلا ۽ منگلا کان وڌيڪ هوندو. هن چيو ته ملڪي معيشت جي بحالي ۾ خزاني واري وفاقي وزير اسحاق ڊار جو اهم ڪردار آهي. هن چيو ته اسان کي پنهنجي روانگي واپار کي وڌائڻو آهي ڇو ته روانگي واپار سان پرڏيهي ناڻي جا ذخيرا وڌيڪ وڌندا. هن چيو ته پي آءِ اي کي ٺيڪ ڪرڻو آهي، سيڙپڪاري کي وڌائڻو آهي ۽ موٽر ويز ٺاهڻا آهن، جن ۾ ڪراچي کان حيدرآباد تائين واري موٽر وي جو سنگ بنياد رکيو ويو آهي، جنهن کي لاهور تائين پهچائڻو آهي. هن چيو ته گوادر جي تعمير ڪرڻي آهي ۽ ايل اين جي جا ڪارخانه لڳائڻا آهن. هن چيو ته اسان سڀني جي سامهون پنهنجي ايجنڊا رکي آهي ۽ هاڻي ان تي عمل ڪرڻ ۽ تڪميل تي پهچائڻ لاءِ سڀ گڏجي ڪم ڪنداسين. مسلم ليگ (ن) جي حڪومت پارٽي منشور جي مطابق عوام جي خوشحالي ۽ ترقي تي عمل ڪري رهي آهي. هن چيو ته اسان ماضي جي داستانن ۾ نٿا وڃڻ چاهيون اسان دنيا جي سامهون پاڪستان جو سٺو اميج پيش ڪرڻ چاهيون ٿا، اسان ملڪ جي اهم معاملن تي سڀني سان گڏجي ويهندا آهيون ۽ 2013 کان پوءِ سڀني سان افهام ۽ تفهيم شروع ڪئي آهي ۽ اسان ان ئي جذبي کي جاري رکڻ چاهيون ٿا. ملڪ کي ان ريت ئي اڳتي وڌائي سگهجي ٿو. وزير اعظم چيو ته اسان پنهنجي پاڙيسري ملڪن ڀارت ۽ افغانستان سان پنهنجي معاملن کي بهتر بنائي رهيا آهيون پاڪستان ۽ افغانستان جي وچ ۾ تعاون جاري آهي جيڪو خطي جي مسئلن کي حل ڪرڻ لاءِ مفيد ثابت ٿيندو. ان موقعي تي سنڌ جو گورنر ڊاڪٽر عشرت العباد، سنڌ جو وڏي وزير سيد قائم علي شاهه، خزاني وارو وفاقي وزير اسحاق ڊار، اسٽيٽ بينڪ جو گورنر، ڪراچي اسٽاڪ ايڪسچينج جي چيئرمين منير ڪمال ۽ ٻيا موجود هئا.

 

نواز شريف جي قيادت ۾ ملڪ 3 سالن جو سفر ڏيڍ سال ۾ طئه ڪيو: اسحاق ڊار

ڪراچي (اسٽآف رپورٽر) ناڻي واري وفاقي وزير اسحاق ڊار چيو آهي ته وزيراعظم محمد نواز شريف جي اڳواڻيءَ ۾ ملڪ ترقي ڪري رهيو آهي. وزيراعظم توانائيءَ واري بحران کي ختم ڪرڻ لاءِ ذاتي طور خاص دلچسپي وٺي رهيو آهي، معاشي اهڃاڻ گهٽ مُدي ۾ تيزيءَ طرف گامزن آهن ۽ ايندڙ 3 سالن ۾ ملڪ ۾ وڌيڪ ترقي ٿيندي. ڪراچي اسٽاڪ ايڪسچينج ۾ نمايان ڪارڪردگيءَ جو مظاهرو ڪندڙ 25 ڪمپنين کي ايوارڊ ڏيڻ واري تقريب کي خطاب ڪندي محمد اسحاق ڊار چيو ته موجوده حڪومت جي پاليسين جي ڪري 2017ع ۾ توانائي بحران جو خاتمو اچي ويندو، معيشت جي بهتريءَ لاءِ حڪومت سهولت فراهم ڪندڙ طور بزنس ڪميونٽي کي بهتر ماحول فراهم ڪرڻ چاهي ٿي. تقريب ۾ وزيراعظم خاص مهمان طور شرڪت ڪئي ۽ ڪراچي اسٽاڪ ايڪسچينج ۾ بهتر ڪارڪردگي ڏيکاريندڙ 25 ڪمپنين کي ايوارڊز سان نوازيو. تقريب ۾ گورنر سنڌ ڊاڪٽر عشرت العباد خان، وڏو وزير قائم علي شاهه، گورنر اسٽيٽ بئنڪ اشرف محمود، چيئرمين ڪراچي اسٽاڪ ايڪسچينج منير ڪمال، چيئرمين انويسٽمينٽ بورڊ مفتاح اسماعيل، چيئرمين سيڪيورٽي اينڊ ايڪسچينج ڪميشن ظفر حجازي، اسٽاڪ ايڪسچينج جا ميمبر ۽ ٻيون اعليٰ شخصيتون موجود هيون. وفاقي وزير اسحاق ڊار ملڪي معيشت جي بهتريءَ ۾ ڪراچي اسٽاڪ ايڪسچينج جي ڪارڪردگيءَ کي واکاڻيندي ان عزم جو اظهار ڪيو ته وزيراعظم محمد نواز شريف جي اڳواڻيءَ ۾ پاڪستان جو شمار دنيا جي اُڀرندڙ معيشتن ۾ ٿيندو. هن چيو ته ملڪ جي استحڪام ۾ درپيش رڪاوٽن کي ختم ڪيو ويندو، ماڻهو معيشت جي حوالي سان اڳڪٿيون ڪري رهيا هئا پر حڪومت جي بهتر پاليسين جي ڪري ملڪي معيشت بهتريءَ طرف گامزن آهي. هن چيو ته حڪومت ڪاميابيءَ سان سڪوڪ بانڊ جاري ڪيا، مٽاسٽا واري ناڻي جا ذخيرا 16 ارب ڊالرن کان وڌي ويا ۽ يورو بانڊ جي لاءِ توقع کان وڌيڪ آڇون مليون. اسحاق ڊار چيو ته حڪومت سنڀالڻ شرط اسان پنهنجي منشور تي عمل شروع ڪيو ۽ امن لاءِ ڳالهين جو رستو ورتو، دهشتگرديءَ خلاف حڪومت جو مؤقف انتهائي واضح آهي، دهشتگردي جو ڪنهن به رنگ، نسل ۽ مذهب سان تعلق ناهي. اسحاق ڊار چيو ته ڪراچيءَ ۾ امن جي بحاليءَ خاطر ٿيندڙ آپريشن ڏوهارين خلاف آهي ۽ ڪراچيءَ ۾ آپريشن ڪنهن سياسي پارٽيءَ جي خلاف ناهي ٿي رهيو. ان کان اڳ آجياڻو وارو خطاب ڪندي چيئرمين اسٽاڪ ايڪسچينج منير ڪمال چيو ته ڪراچي اسٽاڪ ايڪسچينج 2013ع ۽ 2014ع ۾ دنيا جي بهترين 10 اسٽاڪ ايڪسچينجز ۾ شامل رهي آهي. هن چيو ته ڪراچي اسٽاڪ ايڪسچينج جي ڪارڪردگيءَ جي حوالي سان تمام اهڃاڻ تيزيءَ سان بهتريءَ ڏانهن گامزن آهن. ڪي ايس اِي جو مارڪيٽ ڪيپيٽلائيزيشن ڪجهه سال پهرين 40 ارب ڊالرن تائين اچي ويو هو، 2014ع ۾ اهو 70 ارب کان وڌي ويو آهي. هن ٻُڌايو ته ڊسڪائونٽ ريٽ گهٽ ٿي 8 سيڪڙو رهجي ويو آهي جيڪو 2 سال پهرين ڊبل ڊجٽ ۾ هو، جڏهن ته گذريل 6 مهينن کان ناڻي واڌ ۾ گهٽتائي اچي رهي آهي. منير ڪمال ٻُڌايو ته اسٽاڪ ايڪسچينج مارڪيٽن جا نتيجا بهتر ٿي رهيا آهن ۽ ملڪ ۾ اسٽاڪ مارڪيٽن جي بهتريءَ لاءِ سموريون ڪوششون مثبت رُخ ۾ اڳتي وڌي رهيون آهن. تقريب کي سيڪيورٽي ايڪسچينج ڪميشن آف پاڪستان جي چيئرمين ظفر حجازي خطاب ڪندي چيو ته اڄ وزيراعظم محمد نواز شريف جي اڳواڻيءَ ۾ ۽ سندس بهترين پاليسيءَ جي ڪري ناڻي واڌ ۾ نمايان گهٽتائي ٿي آهي ۽ عوام کي سڪون مليو آهي. توانائي بحران جي خاتمي لاءِ حڪومت جو عزم سڀني جي آڏو آهي، پاڪستان جي معيشت جلد تيزيءَ سان ترقيءَ جي سفر تي گامزن ٿيندي.

 

شرجيل ميمڻ پاران ڪي ايم سي جو دورو، 103 گوسڙو سٽي وارڊن فارغ ڪرڻ جو حڪم

ڪراچي (اسٽآف رپورٽر) سنڌ جي اطلاعات ۽ بلديات واري وزير شرجيل انعام ميمڻ ڪراچي جي علائقي شاهه فيصل ڪالوني نمبر 2 ۾ گرين بيلٽ تي قائم غيرقانوني شادي هالن کي پنهنجي نگراني ۾ مسمار ڪرايو، جڏهن ته هاڪي اسٽيڊيم لاءِ نيپا چورنگي وٽ  پارڪ ۾ قائم غيرقانوني شادي هال کي سيل ڪري ڇڏيو. شرجيل ميمڻ ڪي ايم سي جي سٽي وارڊن هيڊ آفيس جو به اوچتو دورو ڪري اتي ملازمن جي حاضري رجسٽر کي پنهنجي تحويل ۾ ورتو ۽ گذريل ڪيترن ئي مهينن کان غيرحاضر 103 سٽي وارڊن کي فوري طور تي شوڪاز نوٽيس ڏئي انهن کي نوڪرين مان فارغ ڪرڻ جا به حڪم ڏنا. هن ڊسٽرڪٽ اولهه ۾ بهادر آباد  مين چورنگي تي صفائي ۽ وڻڪاري مهم ۾ به حصو ورتو ۽ اتي موجود عوام جا مسئلا ٻڌا ۽ انهن جي حل لاءِ فوري حڪم به جاري ڪيا. ان موقعي تي ايڊمنسٽريٽر ڪراچي ثاقب سومرو، ميٽرو پوليٽن ڪمشنر مسعود عالم، ڊائريڪٽر لوڪل گورنمينٽ روبينه آصف، ڊي سي ايسٽ، ڊي سي ڪورنگي، ايڊمنسٽريٽر ايسٽ، ايڊمنسٽريٽر ڪورنگي سميت ٻيا اعليٰ آفيسر به ساڻس گڏ هئا. صوبائي وزير اربع جي صبح بهادر آباد جي علائقي شرف آباد ۾ مين چورنگي تي وڻڪاري ڪري ”صاف سرسبز ، پرامن سنڌ“ مهم ۾ حصو ورتو. ميڊيا سان ڳالهائيندي هن چيو ته هي مهم جيڪا گذريل مهيني شروع ڪئي وئي هئي هاڻ به جاري آهي ۽ اها ان وقت تائين جاري رهندي جيستائين هن شهر ۽ صوبي کي گندگي کان پاڪ ڪري روشنين جو شهر ۽ صوبو نٿو بڻايو وڃي. هن چيو ته هاڻ تائين واٽر بورڊ ۾ 400 کان وڌيڪ جڏهن ته ڪي ايم سي ۾ 300 جي لڳ ڀڳ گوسڙو ملازمن جي سڃاڻپ ڪئي وئي آهي. جڏهن ته انهن سمورن ملازمن جي بائيو ميٽرڪ تصديق کانپوءِ اسان کي اميد آهي ته هزارن جي تعداد ۾ گوسڙو ملازم سامهون اچي ويندا. هن چيو ته اسان هن شهر ۽ صوبي کي صاف سٿرو بڻائڻ جو عزم ڪيو آهي ۽ ان ۾ اسان ڪنهن حد تائين ڪامياب به ٿيا آهيون، پر آئون تسليم ڪريان ٿو ته اسان هاڻ تائين گهربل نتيجا حاصل نه ڪيا آهن ۽ ان لاءِ هاڻ اهڙن آفيسرن کي جيڪي هن مهم ۾ پنهنجو ڪردار ادا ناهن ڪري رهيا انهن کي سندن عهدن تان هٽائڻ جو وقت اچي ويو آهي. هن چيو ته شهر ۾ لڳل بل بورڊز ۽ سائن بورڊز خلاف به مهم جاري آهي، پر ان ۾ اسان کي ڏکائيون ڪجهه عوام طرفان ته ڪجهه ڪنٽونمينٽ ۽ ٻين ادارن پاران اچي رهيون آهن ۽ ان سلسلي ۾ به ڪارروايون ڪيون پيون وڃن. هڪ سوال جي جواب ۾ هن چيو ته شهر مان بيريئرز هٽائڻ جو ڪم امن امان جي بحالي جي ادارن جو آهي ۽ بلاول هائوس ۽ اڳوڻي صدر مشرف جي رهائشگاهه ٻاهران لڳل بئريئرز اسان يا اسان جي پارٽي نه پر خود امن امان جي بحالي وارن ادارن پاران چيڪ پوسٽ ٺاهڻ جي غرض سان لڳايا ويا آهن ۽ ان حوالي سان سنڌ جي گهرو وزارت پاران رينجرز کي هڪ خط به لکيو ويو آهي ته ٻنهي اڳوڻن صدرن کي ٿريٽ آهي، ان لاءِ ان هنڌ تان بئريئرز نه هٽايا وڃن. هڪ سوال جي جواب ۾ هن چيو ته اسان ڪافي ڀيرا فلاحي ادارن کي به گذارش ڪئي آهي ته هو وال چاڪنگ کان پاسو ڪن ۽ اهڙي طرح ڪمپنين ۽ عام اشتهار وارن کي به گذارش ڪئي پر شايد هنن قانون کي آسان سمجهيو آهي، ان لاءِ هاڻ ان تي سختي ضروري ٿي وئي آهي ۽ اڳتي وال چاڪنگ ۽ اسٽريٽ لائٽس ۽ رستن وچ ۾ پولز تي پوسٽر ۽ وال چاڪنگ ڪندڙن خلاف ڏنڊ لڳايا ويندا. صوبائي وزير اوچتو نيپا چورنگي تي سر سيد يونيورسٽي سان گڏ واقع پلي گرائونڊ جنهن کي هاڪي اسٽيڊيم جي غرض سان هاڪي ڪلب آف پاڪستان کي ڏنو ويو هو، ان ۾ قائم غيرقانوني شادي هال کي سيل ڪيو ۽ موجود لاڳاپيل ڊي سي کي هدايتون ڪيون ته ان خلاف ڪيس داخل ڪرايو وڃي. صوبائي وزير اوچتو ڪي ايم سي جي سٽي وارڊن هيڊ آفيس جو رخ ڪيو ۽ اتي موجود سٽي وارڊن جي حاضري رجسٽرڊ کي پنهنجي تحويل ۾ ورتو ۽ موجود انچارج کان سٽي وارڊن جي حوالي کان تفصيل معلوم ڪيا. صوبائي وزير کي ٻڌايو ويو ته تقريبن 1400 کان 1500 سٽي وارڊن آهن، جن کي شهر جي مختلف ضلعن ۾ ٽريفڪ جي نظام کي ڪنٽرول ڪرڻ جي غرض سان مختلف شفٽن ۾ مقرر ڪيو ويو آهي. ان موقعي تي صوبائي وزير معلومات ورتي ته معلوم ٿيو ته 103 اهڙا سٽي وارڊن آهن جيڪي گذريل ڪافي مهينن کان پنهنجن ڊيوٽين تي حاضر ئي ناهن، جنهن تي هن سخت ڪاوڙ جو اظهار ڪندي انهن سمورن 103 سٽي وارڊن کي فوري طور شوڪاز نوٽيس جاري ڪرڻ ۽ انهن کي نوڪرين مان فارغ ڪرڻ جا حڪم ڏنا ۽ سٽي وارڊن ڪراچي جي انچارج کي هدايتون ڏنيون ته هو خميس جي صبح شهر جي سمورن سٽي وارڊن کي هيڊ آفيس گهرايو وڃي، هو پاڻ انهن جي سڃاڻپ پريڊ ڪندو ۽ هن هدايتون ڏنيون ته سمورا سٽي وارڊن پنهنجي اصل سڃاڻپ ڪارڊ، ڊيوٽي ڪارڊ ۽ وردي سان موجود رهن. شرجيل انعام ميمڻ سمورن لاڳاپيل آفيسرن سان گڏ شاهه فيصل ڪالوني نمبر 2 تي پهتو ۽ اتي گرين بيلٽ تي موجود هڪ درجن کان وڌيڪ غيرقانوني شادي هالن کي پنهنجي موجودگي ۾ مسمار ڪرائڻ جو سلسلو شروع ڪيو. ان موقعي تي عوام جو وڏو تعداد اتي موجود هو ۽ هنن صوبائي وزير جي ان قدم کي ساراهيو ۽ سندس حق ۾ نعرا هنيا. ان موقعي تي موجود ميڊيا سان ڳالهائيندي شرجيل انعام ميمڻ چيو ته سپريم ڪورٽ آف پاڪستان واضح حڪم ڏنا آهن ته سموري گرين بيلٽ تي قائم قبضن جو خاتمو ڪيو وڃي ۽ ان سلسلي ۾ اسان ڪافي ڀيرا انهن قبضو ڪندڙن کي هدايت ڪئي ته هو پاڻ قبضا هٽائين، پر ان جي باوجود ايئن ڪيو ويو ۽ اڄ مجبور ٿي اسان انهن خلاف آپريشن جي شروعات ڪئي آهي ۽ هاڻ ڪراچي جي سموري گرين بيلٽ تي قائم هر قسم جي قبضن جو خاتمو ڪري ئي ساهه کڻنداسين. هڪ سوال جي جواب ۾ هن چيو ته ان سلسلي ۾ هر قسم جي مفاهمت کي بالائي طاق رکيو ويندو ۽ قانون ۽ آئين تحت ڪارروائي عمل ۾ آندي ويندي. هن چيو ته سياسي مفاهمتي پاليسي جو هرگز اهو مقصد ناهي ته اسان قانون ۽ آئين کان بالاتر ٿي ڪم ڪريون. هن سمورن ضلعي جي ايڊمنسٽريٽرز کي هدايتون ڪيون ته هو پنهنجن پنهنجن ضلعن ۾ موجود سمورن غيرقانوني شادي هالن ۽ سرڪاري زمينن تي قائم قبضن کي هڪ هفتي اندر اندر مسمار ڪري ان جي رپورٽ کين موڪلين.

 

خيبرايجنسي ۾ پاڪ فضائيه جي بمباري، 30 دهشتگرد مارجي ويا

خيبرايجنسي (م.ڊ) پاڪ فضائيه جي جيٽ جهازن جي وادي تيراهه ۾ دهشتگردن جي ٺڪاڻن تي  بمباري جي نتيجي ۾ 30 دهشتگرد مارجي ويا جڏهن ته هٿيارن جا 2 ذخيرا به تباهه ٿي ويا، پاڪ فوج جي ترجمان آءِ ايس پي آر مطابق پاڪ فضائيه جي جيٽ جهازن دهشتگردن جي موجودگي جي اطلاع تي خيبرايجنسي جي علائقي وادي تيراهه ۾ بمباري جي نتيجي ۾ 30 ڄڻا مارجي ويا جڏهن ته هوائي ڪارروائي ۾ دهشتگردن جا هٿيارن ۽ بارود جا 2 ذخيرا به تباهه ٿيا، سيڪيورٽي ذريعن مطابق مارجي ويل دهشتگردن ۾ پابندي مڙهيل لشڪر اسلام جو ترجمان صلاح الدين ايوبي به شامل آهي.

 

نائن زيرو مان گرفتار ايم ڪيو ايم جي ڪارڪنن جي رمانڊ ۾ وڌيڪ 14 ڏينهن جي واڌ

ڪراچي (اسٽآف رپورٽر) نائن زيرو مان گرفتار متحده قومي موومينٽ جي 5 ڪارڪنن جي رمانڊ ۾ وڌيڪ 14 ڏينهن جي واڌ ڪئي وئي آهي متحده قومي موومينٽ جي مرڪز نائن زيرو مان گرفتار ايم ڪيو ايم جي 5 ڪارڪنن محمد عابد، محمود ،شڪيل، عامر ۽  جاويد کي سخت سيڪيورٽي ۾ دهشتگردي ٽوڙ عدالت ۾ پيش ڪيو ويو رينجرز اختيارين طرفان عدالت کي ٻڌايو ويو ته گرفتار جوابدارن تي قتل، پوليس مقابلي، راڪيٽ لانچر حملي ۽ ڀنگ لاءِ اغوا جا ڪيس داخل آهن ان ڪري انهن جي رمانڊ ۾ واڌ ڪئي وڃي جنهن تي عدالت جوبدارن جي رمانڊ ۾ 14 ڏينهن جي واڌ ڪري ڇڏي ان موقع يتي ايم ڪيو ايم جي گرفتار ڪارڪنن جي گهروارن جي وڏي تعداد عدالت ٻاهران موجود هئي جڏهن ته ڪنهن به شخص کي عدالت ۾ داخل ٿيڻ جي اجازت نه ڏني وئي.