تازيون خبرون

Daily Archives: March 24, 2015

اسلام آباد ۾ 7 سالن بعد يوم پاڪستان جي شاندا پريڊ، سيڪيورٽي انتهائي سخت

اسلام آباد (بيورو) وفاقي گادي واري شهر اسلام آباد ۾ سومر تي يوم پاڪستان جي موقعي تي ستن سالن کان پوءِ يوم پاڪستان جي شاندار فوجي پريڊ منعقد ڪئي وئي. جنهن ۾ پاڪستان جي هٿياربند فوجن جي جٿن شاندار فوجي پريڊ جڏهن ته پاڪ فضائيه جي جهازن شاندار فلاءِ پاسٽ جو مظاهرو ڪيو. خاص فوجي پريڊ ۾ صدر مملڪت ممنون حسين، وزيراعظم محمد نواز شريف، بچاءَ واري وزير خواجه محمد آصف، چيئرمين جوائنٽ چيفس آف اسٽاف ڪميٽي جنرل راشد محمود، چيف آف دي آرمي اسٽاف جنرل راحيل شريف، پاڪ فضائيه جي سربراهه ايئر چيف مارشل سهيل امان، پاڪ بحريه جي سربراهه ايڊمرل ذڪاءُ الله کان علاوه پرڏيهي مهمانن، سفارتڪارن، هاءِ ڪمشنرن، وفاقي ۽ صوبائي وزيرن ۽ پارليامينٽ ميمبرن کان علاوه عوام جي وڏي انگ شرڪت ڪئي. صدر ممنون حسين تقريب جو خاص مهمان هو جنهن جي آمد جو بگل وڄائي اعلان ڪيو ويو جيڪو بگي ۾ سوار ٿي پريزيڊنٽ باڊي گارڊن سان گڏ تقريب ۾ پهتو. سلامتي جي چبوتري تي وزيراعظم محمد نواز شريف، بچاءَ واري وزير خواجه محمد آصف، چيئرمين جوائنٽ چيفس آف اسٽاف ڪميٽي جنرل راشد محمود، آرمي چيف جنرل راحيل شريف، بحريه ۽ فضائيه جي سربراهن صدر جو استقبال ڪيو جنهن بعد قومي ترانو وڄايو ويو. صدر پريڊ ڪمانڊر برگيڊيئر خرم سرفراز سان گڏ پريڊ جو معائنو پڻ ڪيو جنهن بعد پاڪ فضائيه ۽ بحريه جي جهازن جو شاندار فلاءِ پاسٽ ٿيو جنهن ۾ جي ايف-17 ٿنڊر، ايف-16 ميراج، پي-3 سي اورين، ايف-7، پي جي -7، قراقرم ايگل سيپ 2000، ڪي اي -3 ايواڪس سميت مختلف جنگي جهازن حصو ورتو. فضائيه مارچ پاسٽ جي اڳواڻي پاڪ فضائيه جي سربراهه ايئر چيف مارشل سهيل امان ڪئي. پاڪ فضائيه ۽ بحريه جي جهازن سلامي واري چبوتري سامهون اڏامندي صدر مملڪت کي سلامي ڏني. پاڪ فوج جي اسپيشل سروسز گروپ جي جٿي پڻ مخصوص انداز ۾ پريڊ ڪندي صدر کي سلامي ڏني. جڏهن ته مختلف يونٽن جي جٿن پڻ پنهنجي انداز ۾ صدر کي سلامي پيش ڪئي. تقريب ۾ پاڪستان جا جديد ترين نصر ميزائيل سسٽم، بابر ڪروڊ ميزائيل سسٽم، شاهين ون، شاهين ٽو ميزائيل سسٽم، بنا پائليٽ جهاز، براق سميت دفاعي ۽ حربي سامان جو مظاهرو ڪيو ويو. قوم سومر ڏينهن روايتي جوش ۽ جذبي سان پاڪستان جو ڏهاڙو ملهايو، ڏينهن جي شروعات فجر کان پوءِ ملڪ جي سلامتي، استحڪام، ترقي ۽ خوشحالي لاءِ خاص دعائن سان ٿي. وفاقي راڄڌاني اسلام آباد ۾ 31 ۽ صوبائي گادي وارن شهرن ۾ 21-21 توپن جي سلامي ڏني وئي. جڏهن ته سمورين اهم سرڪاري عمارتن تي قومي جهنڊا ڦڙڪايا ويا. لاهور ۾ علامه اقبال جي مزار تي گارڊن جي تبديلي واري تقريب ٿي ۽ پاڪ فضائيه جي جوانن گارڊن جون ذميواريون سنڀاليون. يوم پاڪستان ڏهاڙي جي موقعي تي سڄي ملڪ ۾ عام موڪل جو اعلان ڪيو ويو هو. صدر مملڪت ممنون حسين ۽ وزيراعظم محمد نواز شريف يوم پاڪستان جي مناسبت سان خاص پيغام جاري ڪيا. وفاقي گادي واري شهر ۾ يوم پاڪستان جي مناسبت سان ستن سالن جي وقفي بعد هٿياربند فوجن جي روايتي شاندار پريڊ پڻ منعقد ڪئي وئي، ان موقعي تي شهرين جو جذبو ڏسڻ وٽان هو. عوام جي وڏي انگ شاهراهن تي گڏ ٿي اسڪرينن تي يوم پاڪستان جي خاص پريڊ ڏٺي ۽ پاڪ فضائيه جي جنگي جهازن جو شاندار فضائي مظاهرو پڻ ڏٺو.صدر ممنون حسين چيو آهي ته ملڪ کي مسئلن جي ڌٻڻ مان ڪڍي عظمت ۽ بلندي طرف گامزن ڪيو ويندو، دهشتگردي خلاف جنگ لاءِ قومي لائحه عمل جوڙيو ويو آهي، قوم جو اتحاد واضح ڪري ٿو ته دهشتگردي جو خاتمو هاڻي پري نه آهي، آپريشن ضرب عضب ۾ جان هٿيلي تي رکندڙ سمورن سرفروشن کي هديه تبريڪ پيش ڪريان ٿو، پاڪستان پنهنجي سمورن پاڙيسرين سان برابري جي سطح تي پرامن دوستاڻن لاڳاپن جو خواهشمند آهي، ڀارت سان به دوستي جا خواهشمند ۽ ڳالهين جي ذريعي ڪشمير سميت سمورن مسئلن جو حل چاهيون ٿا. ڪالهه سومر ڏينهن پاڪستان ڏهاڙي جي مناسبت سان شڪر پڙيان پريڊ گرائونڊ ۾ ٽنهي هٿياربند فوجن جي پريڊ جي تقريب کي خطاب ڪندي صدر ممنون حسين چيو ته پاڪستان ڏهاڙي جي هن موقعي تي ملڪ جي محافظن جي 7 سالن کانپوءِ منعقد ٿيندڙ شاندار پريڊ ڏسي منهنجو ڳاٽ فخر سان اونچو ٿي ويو آهي ۽ منهنجو يقين پڪو ٿيو آهي ته جيڪا قوم ۽ ان جا محافظ ايثار ۽ قرباني جي جذبي سان سرشار آهن انهن کي دنيا جي ڪا طاقت شڪست نه ٿي ڏئي سگهي. صدر چيو ته 75 سال اڳ اسان جي بزرگن جدا ملڪ قائم ڪرڻ جو عهد ڪيو ۽ 7 سالن ۾ ان مشن ۾ ڪاميابي حاصل ڪئي. اهو تاريخ جو هڪ بي مثال واقعو آهي جنهن تي الله تعاليٰ جو شڪر واجب آهي ۽ بزرگن جي احسان مندي به آهي، اڄ جي پريڊ انهن قربانين جي ياد تازي ڪرڻ، اسلاف کي خراج عقيدت پيش ڪرڻ ۽ ان عزم جي اظهار لاءِ منعقد ڪئي وئي آهي ته پنهنجي بزرگن جي نقش قدم تي هلندي اسان ملڪ کي مسئلن جي ڌٻڻ مان ڪڍي عظمت ۽ بلندي طرف گامزن ڪنداسين ڇو ته اسان جي منزل هڪ اهڙو جمهوري، خوشحال، ترقي يافته ۽ جديد علم رکندڙ پاڪستان آهي جنهن ۾ هر پاڪستاني پنهنجي عقيدي موجب آزادي سان زندگي گذاري سگهي ۽ ملڪ هر قسم جي نسلي، لساني، علائقائي ۽ مذهبي نفرتن کان پاڪ هجي، تحريڪ پاڪستان جي شهيدن، غازين ۽ مجاهدن کي خراج عقيدت پيش ڪرڻ جو سڀ کان بهتر طريقو به اهو ئي آهي. هن چيو ته اسان هن قوم جا فرزند آهيون ته جن پنهنجو سفر شروع ڪيو ۽ رڳو 5 ڏهاڪن ۾ ائٽمي طاقت حاصل ڪئي. اسان جو تعلق ان قوم سان آهي جنهن هر قسم جي مصيبتن ۽ آفتن جو انتهائي ثابت قدمي سان مقابلو ڪيو آهي، انهن آزمائشن ۾ زلزلا ۽ ٻوڏ به شامل آهن ۽ دهشتگردي جو ناسور به، اڄ ان ناسور جي خلاف اسان جي هٿياربند فوج ۽ قانون لاڳو ڪندڙ ادارا مصروف آهن. آئون آپريشن ضرب عضب ۾ جان هٿيلي تي رکندڙ سمورن سرفروشن کي هديه تبريڪ پيش ڪريان ٿو جن تاريخ جي هن مشڪل جنگ ۾ قربانيون ڏنيون. هن چيو ته مون فيصلو ڪيو آهي ته پاڻ محاذ تي وڃي پنهنجي انهن فرزندن کي سيني سان لڳايان. آئون آرمي پبلڪ اسڪول پشاور جي معصوم شهيدن کي به سلام پيش ڪريان ٿو جن پنهنجي جانين جي قرباني ڏئي دشمن تي واضح ڪري ڇڏيو ته هن قوم کي شڪست نه ٿي ڏئي سگهجي. منهنجي لاءِ اها ڳالهه اطمينان جوڳي آهي ته دهشتگردن جي خلاف جنگ لاءِ قومي لائحه عمل جوڙي ڇڏيو آهي ۽ حڪومت، پاڪ فوج، رياست جا سمورا ادارا ۽ قوم جا سمورا طبقا ان ڳالهه تي گڏ ٿي چڪا آهن، قوم جو اهو اتحاد واضح ڪري ٿو ته دهشتگردي جو خاتمو هاڻي پري نه آهي (انشاءَ الله). هن چيو ته اسان جي بهادر فوج عالمي امن جي لاءِ گڏيل قومن ۾ به هر اول دستي جو ڪردار ادا ڪري رهي آهي جيڪو پاڪستان تي عالمي دنيا جي اعتماد جو مظهر آهي. آئون اعلان ڪريان ٿو ته عالمي امن لاءِ اسان پنهنجو ڪردار سدائين ادا ڪندا رهنداسين. هن چيو ته قومي زندگي جي ان اهم ترين ڏينهن جي موقعي تي اسان دنيا تي اهو واضح ڪرڻ چاهيون ٿا ته پاڪستان پنهنجي سمورن پاڙيسرين سان برابري جي سطح تي پرامن دوستاڻا لاڳاپا چاهي ٿو. اسان ڀارت سان به دوستي جا خواهشمند آهيون ۽ ان سان ڳالهين ذريعي ڪشمير سميت سمورن مسئلن جو حل چاهيون ٿا. اسان واضح ڪريون ٿا ته ڪشمير مسئلو ڪشميري عوام جي امنگن موجب گڏيل قومن جي قراردادن جي روشني ۾ ئي حل ٿي سگهي ٿو ۽ اهو ئي حل علائقائي سلامتي ۽ خطي ۾ پائيدار امن جو واحد بنياد آهي. صدر چيو ته افغانستان سان اسان جا گهرا مذهبي، تاريخي ۽ ثقافتي لاڳاپا آهن جن کي محبت ۽ اخلاص جي بنياد تي وڌيڪ فروغ ڏنو پيو وڃي. آئون ان موقعي تي انهن سمورن دوست ملڪن جو ذڪر ڪندي به خوشي محسوس ڪريان ٿو ته جيڪي انتهائي خلوص سان مختلف منصوبن ۾ پاڪستان سان تعاون ۽ مدد فراهم ڪري رهيا آهن. پاڪستان مالي مسئلن جو شڪار آهي ان سبب بدعنواني به آهي ۽ پنهنجي فرضن ۾ ڪوتاهي به، اچو ته عهد ڪريون ته پنهنجي ملڪن کي مسئلن جي ڌٻڻ مان ڪڍڻ لاءِ اسان پنهنجي فرضن ۾ ڪڏهن ڪوتاهي نه ڪنداسين ۽ ترقياتي منصوبن جي مڪمل ٿيڻ ۾ ڪا رڪاوٽ اچڻ نه ڏينداسين. سندس چوڻ هو ته مون کي خوشي آهي ته وزيراعظم محمد نواز شريف ۽ سندس حڪومت جون ترجيحون صحيح آهن ۽ هو معيشت جي استحڪام ۽ ان جا فائدا عام ماڻهو تائين پهچائڻ جي لاءِ سخت محنت ڪري رهيا آهن. هن چيو ته قوم جي هر شخص جي ذميواري آهي ته هو انهن مثبت پاليسين کي ڪامياب بڻائڻ جي لاءِ سچي دل سان مدد ڪري. هن چيو ته خوشي جي هن موقعي تي آئون قوم تائين خوشي جي اها خبر به پهچائڻ چاهيان ٿو ته پاڪستان جون سامونڊي حدون 200 ناٽيڪل ميل کان وڌيڪ 350 ناٽيڪل ميل ٿي ويون آهن جنهن جي منظوري گڏيل قومن جي ڪميشن باضابطا طور تي ڏئي ڇڏي آهي اهڙي طرح پاڪستان پهريون ملڪ بڻجي ويو آهي جنهن جي سامونڊي حدن ۾ اضافو ٿيو جنهن سبب پاڪستان جي پهچ سمنڊ ۾ موجود قدرتي وسيلن تائين ٿي وئي آهي، آئون هن تاريخي ڪاميابي تي پوري قوم کي مبارڪباد ڏيان ٿو. هن چيو ته آئون سائنس ۽ ٽيڪنالاجي واري وزارت، پاڪستان بحريه، سامونڊي تحقيق بابت قومي اداري ۽ انهن سمورين وزارتن کي به مبارڪباد پيش ڪريان ٿو جن جي اڻٿڪ محنت سان ملڪ کي اها عظيم ڪاميابي ملي آهي. صدر شاندار پريڊ منعقد ڪرڻ تي پريڊ ڪمانڊر برگيڊيئر خرم سرفراز ۽ پريڊ ۾ شرڪت ڪندڙ سمورن جوانن کي به مبارڪباد پيش ڪئي. هن چيو ته مون کي يقين آهي ته منهنجي انهن نوجوانن جي چهرن تي موجود عزم ۽ همت جي روشني جي چمڪ سان دشمن جون اکيون چٿجي وينديون ۽ پاڪستان جو سائو هلالي جهنڊو سربلند رهندو. هن دعا ڪئي ته الله تعاليٰ اسان سڀني کي پنهنجي حفاظت ۾ رکي.

 

پاڪستان ۽ قطر جو توانائي، دفاع ۽ واپار سميت ٻين شعبن ۾ تعاون وڌائڻ تي اتفاق

اسلام آباد (بيورو) پاڪستان ۽ قطر توانائي، دفاع ۽ واپار سميت ٻين شعبن ۾ تعاون وڌائڻ تي اتفاق ڪيو آهي، صدر ممنون حسين چيو آهي ته ٻنهي ملڪن وچ ۾ واپار اڃا وڌائڻو پوندو، مضبوط پاڪستان اسان جي خواهش آهي، مقصد لاءِ تعاون جاري رهندو، افغانستان ۾ چونڊن کانپوءِ پاڪ افغان لاڳاپا بهتر ٿيا آهن، صدر سان امير قطر شيخ تميم بن جماد الثاني ايوان صدر اسلام آباد ۾ ملاقات ڪئي، ان موقعي تي ڳالهائيندي صدر چيو ته پاڪستان قطر سان لاڳاپن کي خاص اهميت ڏئي ٿو، هن چيو ته ٻنهي ملڪن وچ ۾ واپار جو حجم صلاحيت کان گهڻو گهٽ آهي جنهن کي وڌائڻ جي ضرورت آهي، ان موقعي تي امير قطر چيو ته سندس پاڪستان جو دورو ٻنهي ملڪن وچ ۾ لاڳاپا اڃا وڌيڪ بهتر بڻائڻ جي علامت آهي، مستحڪم پاڪستان اسان جي خواهش آهي ان مقصد لاءِ تعاون جاري رهندو، هن چيو ته پاڪستاني ماهرن ۽ ڪارڪن لاءِ قطر جا دروازا کليل آهن، صدر ممنون حسين افغانستان جون حالتون بهتر ڪرڻ ۾ صدر قطر جي ڪردار جي واکاڻ ڪئي ۽ چيو ته افغانستان ۾ چونڊن کانپوءِ پاڪ افغان لاڳاپا بهتر ٿيا آهن. پاڪستان جي صدر چيو ته پاڪ چين اقتصادي راهداري سان نه فقط پاڪستان ترقي ڪندو پر ان جو فائدو سڄي خطي کي ٿيندو، صدر چيو ته قطر جي سيڙپڪارن لاءِ پاڪستان ۾ توانائي ۽ انفرا اسٽرچڪر جي شعبي ۾ سيڙپڪاري جا موقعا موجود آهن، امير قطر چيو ته سندس ملڪ جا سيڙپڪار انهن موقعا مان فائدو حاصل ڪندا، صدر فيفا ڪپ ورلڊ ڪپ 2022 جي ميزباني ملڻ تي قطر جي امير کي واڌايون ڏنيون، ملاقات کانپوءِ پاڪستان ۽ قطر وچ ۾ وفدن جي سطح جون ڳالهيون ٿيون، پاڪستان پاران شاهد خاقان عباسي، سرتاج عزيز ۽ ٻيا شامل ٿيا، ان موقعي تي ٻنهي ملڪن توانائي،دفاع ۽ واپار سميت ٻين شعبن ۾ تعاون وڌائڻ تي اتفاق ڪيو، ملاقات ۾ امير قطر صدر ممنون حسين کي قطر جي دوري جي دعوت ڏني جيڪا پاڪستان جي صدر قبول ڪري ورتي، ان کان اڳ امير قطر ايوان صدر پهتو ته صدر ممنون حسين ان جو شاندار استقبال ڪيو. وزير اعظم هائوس ۾ قطر جي امير شيخ تميم بن حمادالثاني وزير اعظم نواز شريف سان ملاقات ڪئي، ملاقات دوران وزيراعظم چيو ته پاڪستان ۽ قطر جا ويجها ۽ ڀائراڻا لاڳاپا آهن، هن قطر کي دنيا جو هڪ پرڪشش ملڪ بڻائڻ جي لاءِ قطر جي امير جي ڪوششن کي ساراهيو. هن چيو ته قطر جي ترقي انتهائي شاندار ۽ ڀائر ملڪ جي طور تي اسان جي لاءِ فخر جوڳي آهي. هن چيو ته مون کي قطر جي امير جو پاڪستان جي دوري جو اهڙي طرح انتظار هو جهڙي طرح هڪ ڀاءُ کي ٻئي ڀاءُ جو هوندو آهي. هن چيو ته پاڪستان سمورن شعبن ۾ قطر کي سيڙپڪاري جي دعوت ڏي ٿو. ٻنهي ملڪن جو ٻطرفو واپاري ماپو ساليانو 30 ڪروڙ ڊالر کان به گهٽ آهي جيڪو اسان جي حقيقي صلاحيت کان تمام گهٽ آهي. وزيراعظم چيو ته قطر هڪ لک کان وڌيڪ پاڪستانين جو گهر آهي جن جي ناڻي جي مٽاسٽا پاڪستان جي سماجي ۽ اقتصادي ترقي ۾ قابل قدر حيثيت رکي ٿي. هن چيو ته پاڪستان قطر پاران افرادي قوت جي وڌيڪ اضافي جي آجيان ڪندو. قطر جي وفد فيفا 2022ع ورلڊ ڪپ جي ميزباني جي لاءِ مختلف ترقياتي منصوبا شروع ٿيڻ کي نظر ۾ رکندي پاڪستاني ڪارڪنن جو انگ وڌائڻ جي خواهش جو اظهار ڪيو، ڌرين واپار جي فروغ، دفاع ۽ افرادي قوت جي شعبن ۾ تعاون وڌائڻ جي لاءِ قدمن تي پڻ اتفاق ڪيو. وزيراعظم چيو ته قطر جي امير جي دوري سان ٻنهي ملڪن جي ٻطرفن لاڳاپن کي وڌيڪ فروغ ملندو. قطر جي امير چيو ته قطر پاڪستان سان پنهنجي لاڳاپن کي تمام گهڻي اهميت ڏي ٿو. پاڪستان نه رڳو قطر پر پوري خطي جي لاءِ تمام اهم ملڪ آهي. هن يقين ظاهر ڪيو ته سندس دوري سان ٻطرفي تعاون کي وڌيڪ فروغ ڏيڻ جا نوان رستا کلندا. قطر جي امير چيو ته قطر توانائي جي شعبي سميت پاڪستان ۾ سيڙپڪاري جي دستياب موقعن جو مثبت انداز ۾ جائزو وٺندو، ڌرين ٻطرفن لاڳاپن کي فروغ ڏيڻ ۽ ٻنهي اڳواڻن جي وچ ۾ ٿيندڙ فيصلن تي عملدرآمد جي لاءِ مختلف سطحن تي وفدن جا دورا وڌائڻ تي پڻ اتفاق ڪيو. قطر جي امير سان ڳالهين جي دور ۾ ڪابينا جي وزيرن، قطر ايئرويز جي چيئرمين ۽ اعليٰ سرڪاري آفيسرن سميت اعليٰ سطحي وفد حصو ورتو. وفدن جي سطح تي ڳالهين دوران توانائي، سيڙپڪاري، واپار، دفاع، افرادي قوت، گڏيل دلچسپي جي علائقائي ۽ عالمي معاملن سميت مختلف شعبن ۾ ٻطرفي تعاون کي فروغ ڏيڻ جي معاملن تي خيالن جي ڏي وٺ ڪئي وئي. ان موقعي تي ٻطرفي تعاون کي فروغ ڏيڻ جي لاءِ معاهدن ۽ مفاهمت جي ياداشتن تي پڻ صحيحون ڪيون ويون. بعد ۾ وزيراعظم قطر جي امير جي اعزاز ۾ آجياڻو ڏنو جنهن ۾ وزير، هٿياربند فوج جي سربراهن، سنڌ جي وڏي وزير سيد قائم علي شاهه، سينيٽ ۾ مخالف ڌر اڳواڻ اعتزاز احسن، سينيٽ ۾ قائد ايوان راجا ظفرالحق، قطر جي امير جي وفد جي ميمبرن ۽ اعليٰ آفيسرن شرڪت ڪئي

 

گورنر ۽ وڏي وزير جي اڳواڻي ۾ سنڌ ڪابينا جي قائداعظم جي مزار تي حاضري، گل چاڙهي فاتحه پڙهي

ڪراچي (اسٽاف رپورٽر) سنڌ جي گورنر ڊاڪٽر عشرت العباد خان ۽ وڏي وزير سيد قائم علي شاهه يوم پاڪستان جي موقعي تي ڪالهه قوم جي ابي قائداعظم محمد علي جناح جي مزار تي حاضري ڀري کيس زبردست خراج عقيدت پيش ڪيو. ٻنهي اڳواڻن قائداعظم جي مزار تي گل چاڙهي فاتحه پڙهي. ان موقعي تي گورنر مهمانن واري ڪتابڙي ۾ پنهنجا تاثر درج ڪندي قائداعظم کي زبردست خراج پيش ڪيو. صوبائي وزير نثار احمد کهڙو، منظور حسين وساڻ، وڏي وزير جي خاص صلاحڪار شرميلا فاروقي ۽ ايڊيشنل آءِ جي پوليس ڪراچي غلام قادر ٿيٻو ۽ ٻيون معزز شخصيتون گورنر ۽ وڏي وزير سان گڏ هيون.

 

قطر جو امير شيخ تميم بن حماد الثاني 2 ڏينهن جي دوري تي اسلام آباد پهچي ويو، وزير اعظم پاران شاندار آجيان

اسلام آباد (بيورو) قطر جي امير شيخ تميم بن حمادالثاني 2 ڏينهن جي سرڪاري دوري تي پاڪستان پهچي ويا وزيراعظم نواز شريف نور خان ايئربيس تي قطر جي امير شيخ تميم بن حماد جو استقبال ڪيو، ان موقعي تي وفاقي وزير اسحاق ڊار، خواجه آصف، پرويز رشيد، خرم دستگير، شاهد خاقان عباسي ۽ پرڏيهي صلاحڪار سرتاج عزيز به موجود هئا، ان کي 21 توپن جي سلامي ۽ گارڊ آف آنر به پيش ڪيو ويو، قطر جي حڪمران جي طور تي شيخ تميم بن حماد الثاني جو اهو پاڪستان جو پهريون دورو آهي قطر جي امير جي وفد ۾ وزير، قطر ايئرويز جو چيئرمين ۽ ٻيون سينيئر اختياريون به شامل آهن، ان موقعي تي قطر جي امير ۽ پاڪستاني قيادت گڏيل، علائقائي ۽ عالمي معاملن کان علاوه افغان حڪومت ۽ طالبان وچ ۾ مفاهمتي عمل تي به ڳالهيون ڪندا.

 

نثار کهڙي پاران 11 آگسٽ 1947ع تي پاڪستان جي قانونساز اسيمبليءَ ۾ ڪيل تقرير کي نصاب ۾ شامل ڪرڻ جو اعلان

ڪراچي (اسٽاف رپورٽر) سنڌ جي تعليم واري سينيئر وزير نثار احمد کهڙي قائد اعظم محمد علي جناح جي 11 آگسٽ 1947ع تي پاڪستان جي قانونساز اسيمبليءَ ۾ ڪيل تقرير کي نصاب ۾ شامل ڪرڻ جو اعلان ڪري ڇڏيو آهي. اهڙو اعلان هن سومر ڏينهن ڪيو آهي .نثار احمد کهڙو چيو آهي ته قائد اعظم محمد علي جناح جي قانونساز اسيمبليءَ ۾ ڪيل تقرير کي پاڪستان جي اڳواڻي صدر آصف علي زرداريءَ جي هدايتن تي نصاب ۾ شامل ڪري رهيا آهيون. هن چيو ته قائد اعظم محمد  علي جناح جي ان تقرير کي اٺين ڪلاس کان ڏهين ڪلاس جي نصاب ۾ شامل ڪيو ويندو ۽ اهڙو ترميمي  نصاب ايندڙ سال شاگردن ۾ مفت ورهايو ويندو جنهن نصاب ۾ قائد اعظم محمد علي جناح جي 11 آگسٽ 1947ع تي قانونساز اسيمبليءَ ۾ ڪيل تقرير پڻ شامل هوندي. هن چيو ته تعليم هاڻي صوبائي سبجيڪٽ آهي ۽ سنڌ کي پنهنجو نصاب تيار ڪرڻ جو حق حاصل آهي تنهنڪري سنڌ پاران قائد اعظم محمد علي جناح جهڙي شخصيت جي تقرير کي پڻ نصاب ۾ شامل ڪيو پيو وڃي ته جيئن شاگردن کي تاريخ جي پڻ آگاهي ملي سگهي. هن چيو ته پاڪستان ڪنهن به مذهبي تفريق تي يقين نه ٿو رکي ۽ قائد اعظم محمد علي جناح موجب پاڪستان ۾ هر ڪنهن شخص کي پنهنجي مذهبي عقيدي موجب زندگي گذارڻ لاءِ آزادي حاصل آهي. هن چيو ته نصاب ۾ اها تاريخ شامل ٿيڻ سان شاگرد اهو پيغام پڙهي بهتر نموني سان مستقبل ۾ ان مائينڊ سيٽ جو تعليم جي مدد سان مقابلو ڪري سگهن ٿا.

 

سڪيورٽي ذريعن ملا فضل الله جي مارجڻ واري خبرن جي ترديد ڪري ڇڏي

راولپنڊي (بيورو) سڪيورٽي ذريعن، بندش پيل تنظيم تحريڪ طالبان جي سربراهه ملا فضل الله جي مارجڻ واري خبرن جي ترديد ڪري ڇڏي آهي، سڪيورٽي ذريعن جو چوڻ آهي ته پاڪستان جي اهم ڳجهي اداري وٽ ملا فضل الله جي مارجڻ بابت ڪي به جوڳا اطلاع نه آهن. سڪيورٽي ذريعن جو چوڻ آهي ته ملا فضل الله جي مارجڻ بابت آيل خبرن ۾ ڪا به صداقت ناهي. سڪيورٽي ذريعن موجب، پاڪستان جي هڪ اهم انٽيليجنس اداري وٽ ملا فضل الله جي مارجڻ بابت ڪي به جوڳا اطلاع ناهن. واضح رهي ته بند پيل تنظيم تحريڪ طالبان جي سربراهه مـُلا فضل الله جي خيبر ايجنسي جي وادي تيره واري علائقي ۾ مارجڻ بابت خبرون سامهون آيو هيون.

 

خيبر ايجنسي ۾ جيٽ جهازن جي بمباري، 15 دهشتگرد مارجي ويا

خيبر ايجنسي (مانيٽرنگ ڊيسڪ) خيبر ايجنسي ۾ سڪيورٽي فورسز جي جيٽ جهازن ذريعي بمباري جي نتيجي ۾ 15 دهشتگرد مارجي ويا ۽ دهشتگردن جا ڪيترائي ٿاڪ تباهه ٿي ويا. خيبر ايجنسي جي وادي تيره جي علائقي ڪوڪي خيل ۾ سڪيورٽي فورسز جي جيٽ جهازن دهشتگردن جي ٺڪاڻن کي نشانو بڻايو. ذريعن جو چوڻ آهي ته فورسز جي بمباري جي نتيجي ۾ 15 دهشتگرد مارجي ويا، جن ۾ پابندي مڙهيل تنظيمن جا اهم ڪمانڊر به شامل آهن. سڪيورٽي ذريعن موجب، بمباري جي نتيجي ۾ دهشتگردن جي ڪيترائي ٿاڪ پڻ تباهه ٿي ويا، جڏهن ته ڪيترائي دهشتگرد زخمي پڻ ٿي ويا.

 

ملڪ ۾ قرارداد پاڪستان جي روح مطابق جمهوري معاشرو قائم ڪرڻ جي ضرورت آهي: الطاف حسين

لنڊن(م.ڊ) متحده قومي موومينٽ جي قائد الطاف حسين چيو آهي ته ايم ڪيو ايم پاڪستان ۾ پرامن ۽ آزاد خيال معاشري جي خواهشمند آهي ج تي سڀ هڪ ٻئي جو احترام ڪن، يوم پاڪستان جي موقعي تي پنهنجي پيغام ۾ الطاف حسين چيو ته اڄ پاڪستان کي مختلف اندروني ۽ ٻاهرين خطرن کي منهن ڏيڻو پئجي رهيو آهي ان ۾ ضروري آهي ته پاڪستان ۾ قرارداد پاڪستان جي اصل روح مطابق هڪ جمهوري ۽ متوازن معاشرو قائم ڪيو وڃي ۽ ملڪ ۾ رهندڙ سمورن ماڻهن کي بنا فرق انهن جا حق فراهم ڪيا وڃن، هن چيو ته ايم ڪيو ايم پاڪستان ۾ پرامن ۽ آزاد خيال معاشري جي خواهشمند آهي جتي هر مذهب، زبان، عقيدي، مسلڪ کي مڃيندڙن کي پنهنجي مرضي جي زندگي گذارڻ جي آزادي هجي ۽ سڀ هڪ ٻئي جو احترام ڪن، الطاف حسين چيو ته موجوده حالتن ۾ نوجوان نسل کي گهرجي ته هو قرارداد پاڪستان جي اصل روح جو مطالعو ڪري پاڪستان ۾ پرامن معاشري جي تعمير ۾ پنهنجو ڪردار ادا ڪن ته جئين ملڪ کي دنيا ۾ روشڻ خيال ۽ ترقي يافته ملڪن جي صفن ۾ بيهاري سگهجي.

 

پاڪ فوج مستل پاس جو ڪنٽرول سنڀالي ورتو آهي: ڊي جي آءِ ايس پي آر

راولپنڊي (م.ڊ) ڊي جي آءِ ايس پي آر ميجر جنرل عاصم سليم باجوه چيو آهي ته آپريشن خيبر ون ۾ پاڪ فوج کي گذريل رات ڪارروائين ۾ وڌيڪ ڪاميابيون حاصل ٿيون آهن جيٽ جهازن جي بمباري سبب دهشتگردن کي ڳرو نقصان ٿيو آهي، سيڪيورٽي فورسز خيبرايجنسي کي افغانستان سان ملائيندڙ مستول پاس جو ڪنٽرول سنڀالي ورتو دهشتگرد مستول پاس جي رستي پاڪستان ۽ افغانستان وچ ۾ اچ وڃ ڪندا هئا جنهن کي بند ڪيو ويو آهي، خيبرايجنسي جي علائقي سوک مان دهشتگردن کي ڀڄايو ويو آهي.

 

پاڪ ڀارت معاملا ڳالهين وسيلي کي حل ٿي سگهن ٿا: نريندر مودي

ممبئي(م.ڊ) ڀارتي وزيراعظم نريندر مودي يوم پاڪستان جي موقعي تي وزيراعظم نواز شريف کي واڌايون ڏيندي چيو آهي ته ٻِه طرفيون ڳالهيون ئي مسئلن جو حل آهن، پاڪ ڀارت ڳالهيون دهشتگردي کان پاڪ ماحول ۾ ٿيڻ گهرجن .. ڀارت جي وزيراعظم نريندر مودي پاڪستان جي 75 هين ڏهاڙي جي موقعي تي پنهنجي هم منصب وزيراعظم نواز شريف ۽ پاڪستاني عوام کي مبارڪ باد پيش ڪئي. نريندر مودي پنهنجي پيغام ۾ چيو آهي ته سڀني مسئلن جو حل ڳالهين ۾ آهي، ڀارت به ڳالهين ذريعي مسئلا حل ڪرڻ چاهي ٿو. ڀارتي وزيراعظم چيو ته پاڪستان ۽ ڀارت پاڙيسري ملڪ آهن، ٻنهي ملڪن جي وچ ۾ ڳالهيون دهشتگردي کان پاڪ ماحول ۾ ٿيڻ گهرجن…….