تازيون خبرون

Daily Archives: March 23, 2015

سياسي جماعتون ۽ قوم بهادر فوج سان گڏ آهي : نواز شريف

اسلام آباد (بيورو) وزيراعظم محمد نواز شريف چيو آهي ته قائد اعظم جو پاڪستان سخت بحران ۽ مسئلن جي ور چڙهيل آهي، بهادر فوج پنهنجي حب الوطني جذبي ۽ پيشواراڻي مهارت سان وڏن آڏو خطرن کي منهن ڏيڻ ۾ ڪامياب ٿيندي، سموريون سياسي جماعتون ۽ قوم بهادر فوج سان گڏ آهي، وطن کي ڪا طاقت نقصان نٿي پهچائي سگهي، الله جي فضل سان تاريخ جي مشڪل دور مان لنگهي هڪ مضبوط ملڪ طور اڀرنداسين، پاڪستان ڊي جي موقعي تي پيغام ۾ هن چيو ته 75 سال اڳ ننڍي کنڊ جي مسلمانن پنهنجي لاءِ هڪ الڳ وطن حاصل ڪرڻ جو عزم ڪيو ۽ ان جي محبوب اڳواڻن اعلان ڪيو ته مسلمان هر لحاظ کان الڳ قوم آهن، قائد اعظم جي رهنمائي ۾ مسلمانن هڪ اهڙي رياست حاصل ڪرڻ جي جدوجهد ڪئي جنهن ۾ برابري ۽ اخوت جو نظام رائج هجي، مسلمان قائداعظم جي اڳواڻي ۾ الڳ ملڪ ٺاهڻ ۾ ڪامياب ٿيا، قائداعظم مسلمان کي الڳ ڏياري ايندڙ نسلن جي مستقبل کي محفوظ ڪيو، مان اهو عزم ورجايا ٿو ته پاڪستان ۾ رهندڙ مختلف طبقن وچ ۾ مڪمل هم اهنگي ۽ ڀائپي جو ماحول قائم ڪرڻ لاءِ هر ممڪن ڪوشش ڪئي ويندي. هن چيو ته 75 سالن کانپوءِ قائد جو پاڪستان سخت بحرانن جي ور چڙهيل آهي، پاڪستان جا پرامن ماڻهو دهشتگردي کي منهن ڏئي رهيا آهن، پاڪستان لاءِ بيروني خطرا موجود آهن جن جو بهادري سان مقابلو ڪرڻو پوندو.

 

هر قيمت تي ملڪ ۾ امن بحال ڪيو ويندو: راحيل شريف

راولپنڊي(اي پي پي/م.ڊ) چيف آف آرمي اسٽاف جنرل راحيل شريف ان عزم جو ورجاءُ ڪيو آهي ته ملڪ جي خوشحالي ۽ امن لاءِ شهرن ۽ ٻهراڙين مان هر قيمت تي دهشتگردي جي مڪمل انت تائين فوجي آپريشن جاري رهندو. پاڪ فوج جي سڌ سماءَ واري کاتي آءِ ايس پي آر جي ڊائريڪٽر جنرل ۽ پاڪ فوج جي ترجمان جنرل عاصم سليم باجوه سوشل ميڊيا تي پنهنجي ٽوئيٽ پيغام ۾ چيو ته چيف آف آرمي اسٽاف جنرل راحيل شريف پشاور جو دورو ڪيو جتي کيس خيبرپختونخوا ۽ فاٽا ۾ سيڪيورٽي جي صورتحال، آپريشن ضرب عضب ۽ خيبر ايجنسي ۾ جاري آپريشن بابت تفصيلي بريفنگ ڏني وئي. جنرل راحيل شريف هٿياربند فوجين جي ان عزم جو ورجاءُ ڪيو ته موجوده فوجي آپريشن دهشتگردن کي منطقي انجام تائين پهچائڻ تائين جاري رهندو. هن چيو ته دهشتگرد جتي به لڪندا کين ڳولي نشانو بڻايو ويندو. جنرل راحيل شريف سي ايم ايچ پشاور جو دورو ڪيو ۽ زخمي سپاهين جي خيريت معلوم ڪئي. هن چيو ته انهن زخمين جو حوصلو ۽ عزم سڄي قوم ۽ فوجين لاءِ اثاثو آهي.

 

صولت مرزا جي بيان کانپوءِ موت جي سزا ملتوي ٿيڻ سان معاملو شڪي ٿي رهيو آهي: خورشيد شاهه

لاهور (م.ڊ) مخالف ڌر جي اڳواڻ خورشيد شاهه جو چوڻ آهي ته صولت مرزا جي ڊيٿ سيل مان جاري بيان کانپوءِ موت جي سزا ملتوي ٿيڻ سان معاملو شڪي ٿي رهيو آهي، لاهور ۾ ميڊيا سان ڳالهائيندي خورشيد شاهه جو چوڻ هو ته ڪراچي ۾ آپريشن ايم ڪيو ايم جي چوڻ تي ٿيو ۽ رينجرز نائن زيرو تي آپريشن ڪري فرار جوابدارن کي گرفتار ڪيو، رينجرز جو آپريشن بلڪل ٺيڪ هو ان کي ساراهڻ گهرجي ۽ ايم ڪيو ايم کي به ڏوهاري ماڻهن سان لاتعلقي جو اظهار ڪرڻ گهرجي، هن جو چوڻ هو ته ڪراچي ۾ ڏوهاري ماڻه نخلاف آپريشن ۾ لياري مان 60 سيڪڙو دهشتگردن جو خاتمو ٿي چڪو آهي، جڏهن ته آپريشن دوران طالبان ۽ سياسي پارٽين سان تعلق رکندڙ ڏوهاري ماڻهو به مارجي ويا جيڪي ماڻهو به قانون کي هٿ ۾ کڻن ٿا انهن خلاف ڪارروائي ٿيڻ گهرجي، پيپلز پارٽي ڏوهاري ماڻهن خلاف آپريشن جي ڪڏهن به مخالفت نه ڪئي عزير بلوچ جو بيان آهي ان جي باري ۾ مون کي ڪابه خبر ناهي،  خورشيد شاهه جو چوڻ هو ته ڪراچي ۾ آپريشن بنا فرق ٿي رهيو آهي ۽ جيڪي ڏوهاري ماڻهو گرفتار ٿيا آهن انهن خلاف قانوني ڪارروائي ٿيڻ گهرجي جيڪڏهن ڏوهاري ماڻهن کي ڇڏيو ويو ته حالتون ٺيڪ ٿيڻ بجاءِ وڌيڪ ڇڪتاڻ ٿيندي، سنڌ ۾ امن امان جي صورتحال ۾ ڪافي بهتري آئي آهي، اندرون سنڌ ۾ ڌاڙي ۽ ڀنگ لاءِ اغوا جي وارداتن جو مڪمل خاتمو ڪيو ويو آهي، سنڌ هن وقت ملڪ جي سڀ کان پرامن صوبو آهي هن جو چوڻ هو ته صولت مرزا کي پنهنجي ڪيتي جي  سزا  ملڻ گهرجي، ڊيٿ سيل مان جاري وڊيو بيان کانپوءِ صولت مرزا جي ڦاهي ملتوي ٿيڻ سان معاملو شڪي ٿي رهيو آهي، صولت مرزا جي بيان سان ايم ڪيو ايم کي فائدو ٿيو، جوڊيشل ڪميشن جي حوالي سان پڇيل سوال تي خورشيد شاهه جو چوڻ هو ته حڪومت ۽ تحريڪ انصاف وچ ۾ جوڊيشل ڪميشن جوڙڻ لاءِ معاهدو خوشي جوڳي ڳالهه آهي ۽ اسان ان ۾ وڏو ڪردار ڪيو آهي، هن جو چوڻ هو ته تحرڪي انصاف جي استعيفيٰ منظور نه ڪرڻ حڪومت جو سٺو قدم آهي ۽ جوڊيشل ڪميشن جوڙڻ کانپوءِ هاڻ عمران خان کي پارليامينٽ ۾ واپس اچڻ گهرجي.

 

عوام جمهوريت لاءِ پنهنجو پاڻ کي وقف ڪري ڇڏي: آصف علي زرداري

ڪراچي (اسٽافف رپورٽر) پاڪستان جي اڳوڻي صدر آصف علي زرداري پاڪستان جي 75 هين پاڪستان ڊي جي موقعي تي پنهنجي پيغام ۾عوام کي چيو آهي ته هو جمهوريت لاءِ پنهنجو پاڻ کي وقف ڪري، هن چيو ته رياست جي طاقت عوام جي امنگ سان ٿيندي آهي، پر بندوق جي نالي سان نه، هن پاڪستان ڊي جي موقعي تي سمورن پاڪستانين کي واڌايون ڏيندي چيو ته اسان کي انهن اصولن لاءِ پاڻ کي وقف ڪرڻ گهرجي، جن لاءِ پاڪستان ٺاهيو ويو هو، پاڪستان جمهوريت، قانون جي حڪمراني، آئين جي عملداري ۽ شهرين جي برابري جي اصول تي ٺاهيو ويو هو، پاڪستان جو عوام ڪڏهن به انتهاپسندن جو ايجنڊا قبول نه ڪندو، هن چيو ته بلڪل واضح ٿيڻ گهرجي ته پاڪستان ۾ طاقت جو سرچشمو عوام جي گڏيل خواهشن ۽ امنگ ۾ سمايل آهي، نه بندوق جي نالي ۾ يا ڪنهن خود پسند جي حڪم تي عوام کي زندگيون گهارڻ تي مجبور سگهندو، هن ڏينهن اسان کي 23 مارچ 1940 تي تاريخي قرارداد پاڪستان ۾ ڪيل واعدي کي ياد رکڻو پوندو، جنهن ۾ چيو ويو هو ته غير مسلم اقلتين جي مذهبي، سياسي حقن جي حفاظت ڪئي ويندي ۽ انهن سان مشورو ڪيو ويندو. الله سائين اسان کي قائد اعظم جي اصولن تي هلڻ جي ڪوششن ۾ ڪامياب نصيب ڪري.

 

2015 پاڪستان ۾ نين چونڊن جو سال آهي: عمران خان ، چونڊون صاف ۽ شفاف نموني ٿينديون: عمران

اسلام آباد (مانيٽرنگ ڊيسڪ) پاڪستان تحريڪ انصاف جي چيئرمين عمران خان هڪ ڀيرو چيو آهي ته 2015 پاڪستان ۾ نين چونڊن جو سال آهي جيڪي صاف ۽ شفاف ٿينديون، ڌانڌلي جا ثبوت اسان وٽ موجود آهن، جوڊيشل ڪميشن ۾ پيش ڪنداسين، پوءِ ڪميشن جو فيصلو قبول ڪنداسين، ڪميشن قائم ٿيڻ تائين اسيمبلين ۾ نه وينداسين، حتمي فيصلو ڪور ڪميٽي جي اجلاس ۾ ڪيو ويندو، جيستائين ڪراچي ۾ سياسي جماعتن جي عسڪري ونگز خلاف ايڪشن نه ٿيندو امن قائم نٿو ٿي سگهي، هڪ انٽرويو ۾ هن جوڊيشل ڪميشن قائم ٿيڻ تي حڪومت سان ٿيل معاهدي تي عوام کي واڌايون ڏيندي چيو ته هي ملڪ جي تاريخ ۾ پهريون ڀيرو ٿيو آهي هو جنهن اليڪشن کٽي ان به اعتراف ڪيو ته چونڊن ۾ ڌانڌلي ٿي، هن چيو ته جيڪڏهن پي ٽي آءِ 126 ڏينهن جو ڌرڻو نه هڻي ها ته ڪميشن نه ٺهي سگهي ٿا، هي ڪامياب رستن تي نڪرڻ جي ملي، هن چيو ته اسان وٽ جيڪي ثبوت آهن اهي جوڊيشل ڪميشن ۾ ويندا ۽ جيڪو فيصلو ايندو اسان قبول ڪنداسين، هن جوڊيشل ڪميشن قائم ٿيڻ تي اتفاق کي هڪ وڏو ڪارنامو ڪوٺيندي چيو ته ڪميشن وٽ سڀ اختيار هوندا، جيڪو هر لحاظ کان جاچ ڪندو ۽ ڪنهن به لاڳاپيل شخص کي گهرائي ان کان ثبوت گهري سگهي ٿو، جنهن ۾ ريرنگ آفيسر، پوليس اهلڪار ۽ ايجنسين جا ماڻهو شامل آهن.

 

صولت مرزا ڏوهاري آهي، گهڻي اهميت نه ڏني وڃي: افتخار چوڌري

اسلام آباد (بيورو) اڳوڻي چيف جسٽس جسٽس ريٽائرڊ افتخار محمد چوڌري چيو آهي ته صولت مرزا هڪ ڏوهاري آهي، اُن کي ايتري اهميت نه ڏيڻ گهرجي، اهي ڳالهيون هن چڪوال ۾ ميڊيا سان ڳالهائيندي ڪيون. صولت مرزا جي مسئلي جو حل قانون موجب ئي آهي.

 

مڪاني چونڊن ۾ ڀرپور نموني حصو ورتو ويندو:پرويز مشرف

ڪراچي (اسٽاف رپورٽر) آل پاڪستان مسلم ليگ مڪاني چونڊن ۾ ڀرپور نموني حصو وٺڻ جو اعلان ڪري ڇڏيو، پرويز مشرف جو چوڻ آهي ته مڊٽرم چونڊون ٿي سگهن ٿيون ۽ نگران سيٽ اپ به اچي سگهي ٿو. ڪراچي ۾ پرويز مشرف جي سربراهي ۾ آل پاڪستان مسلم ليگ جي مرڪزي ڪميٽي جو اجلاس ٿيو جنهن ۾ موجوده سياسي صورتحال تي خيالن جي ڏي وٺ ڪئي وئي. اجلاس دوران پرويز مشرف چيو ته ملڪ تباهي ۽ بدحالي ڏانهن وڌي رهيو آهي، اهڙي حالت ۾ مڊٽرم چونڊون به ٿي سگهن ٿيون ۽ نگران حڪومت به قائم ٿي سگهي ٿي. هن چيو ته هــُو اڄ جيڪو ڪجهه به آهن پاڪستان جي ڪري آهن، ايمانداري سان ذريعا استعمال ڪيا جنهن سان ملڪ ترقي ڪئي، سياسي طور تي ڪنهن سان برابري ڪرڻ ان جي توهين آهي. اڳوڻي صدر جو چوڻ هو ته کين ملڪ اندر تبديلي، نظام ۾ تبديلي سان گڏ آڻڻي آهي، هــُو اهڙو جمهوري نظام چاهين ٿا جيڪو خوشحالي آڻي. پرويز مشرف، مڪاني چونڊن ۾ ڀرپور نموني حصو وٺڻ جو اعلان ڪندي چيو ته تنظيم سازي کانسواءِ ڪا به جماعت اڻپوري آهي. بعد ۾ آل پاڪستان مسلم ليگ جي ورڪرز ڪنويشن کي خطاب دوران اڳوڻي صدر جو چوڻ هو ته 2013ع ۾ ڏيهه واپسي بعد سندس ارادو هو ته تبديلي لاءِ ڪم ڪندڙن کي متحد ڪري عوام کي ٽيون سياسي آپريشن فراهم ڪيو وڃي پر ايئن نه ٿي سگهيو ۽ مٿس سياسي بنيادن تي ڪيس داخل ڪرايا ويا.