تازيون خبرون

Daily Archives: March 21, 2015

پ پ ڪراچي صدر عبدالقادر پٽيل عهدي تان معطل

ڪراچي (اسٽاف رپورٽر) پيپلز پارٽي ڪراچي جي صدر عبدالقادر پٽيل کي پنهنجي عهدي تان معطل ڪيو ويو آهي عبدالقادر پٽيل پارٽي طرفان سينيٽ جي ٽڪيٽ نه ملڻ تي ناراض هو ۽ هن هڪ اجلاس ۾ رحمان ملڪ ۽ پارٽي خلاف تقرير ڪئي هئي جنهن کانپوءِ ان کي پارٽي طرفان شوڪاز نوٽيس موڪليو ويو هو ۽ هاڻ ان کي پارٽي عهدي تان معطل ڪيو ويو آهي ذريعن جو چون آهي ته عبدالقادر پٽيل کي سنڌ جي وڏي وزير قائم علي شاهه جي هدايت تي معطل ڪيو ويو آهي.

 

ڪراچيءَ ۾ رينجرز موبائل ڀرسان خودڪش ڌماڪو، 2 اهلڪار شهيد، عورت سميت 3 واٽهڙو زخمي

ڪراچي (اسٽاف رپورٽر) ڪراچي جي علائقي نارٿ ناظم آباد ۾ رينجرز جي موبائل ڀرسان ڌماڪي ۾ 2 رينجرز اهلڪار شهيد ۽ 3 زخمي ٿي پيا آهن. ڪراچي جي علائقي ناظم آباد ۾ تقي سينٽر جي ڀرسان رينجرز جي موبائل معمول جي ڊيوٽي مقرر هئي ته اُن دوران موبائل جي ڀرسان زوردار ڌماڪو ٿيو جنهن جو آواز پري پري تائين ٻڌو ويو، ڌماڪي کانپوءِ علائقي ۾ خوف پکڙجي ويو، ڌماڪي ۾ 2 رينجرز اهڪار شهيد ۽ 3 واٽهڙو زخمي ٿي پيا. ڌماڪي ۾ مارجي ويل رينجرز اهلڪارن جي سڃاڻپ يارمحمد ۽ قاسم جي نالن سان ٿي آهي. ناظم آباد ۾ ڌماڪي کانپوءِ سيڪيورٽي ٽيمون واقعي واري هنڌ پهچي ويو جن زخمين ۽ فوتين کي عباسي شهيد اسپتال منتقل ڪيو. ڌماڪي ۾ رينجرز جي گاڏي مڪمل طور تي تباهه ٿي وئي، ڌماڪي کانپوءِ قانون لاڳو ڪندڙ ادارن واقعي واري هنڌ جو گهيراءُ ڪري ورتو ۽ بم ڊسپوزل اسڪواڊ کي به طلب ڪيو ويو. سنڌ جي اطلاعات ۽ بلديات واري صوبائي وزير شرجيل انعام ميمڻ جمعي جي ڏينهن آرام باغ جي علائقي ۾ صالح مسجد ۽ ان کان پوءِ شام جي وقت نارٿ ناظم آباد ۾ رينجرز جي موبائل تي بم ڌماڪي جي شديد لفظن ۾ مذمت ڪئي آهي ۽ ان کي بزدلاڻو ۽ شرمناڪ عمل قرار ڏنو آهي. هن هڪ ڀيرو ٻيهر ان عزم جو جو ارادو ڪيو ته اسان جي رينجرز ۽ پوليس جا حوصلا اڳ به بلند هئا ۽ هاڻ به بلند آهن ۽ ڪراچي سميت سموري سنڌ ۾ دهشتگردن ۽ دهشتگردي خلاف ٽارگيٽيڊ ايڪشن انهن جي خاتمي تائين جاري هندو. پنهنجي هڪ بيان ۾ شرجيل انعام ميمڻ چيو ته معصوم ۽ بي گناه نمازين تي حملا ڪندڙ دهشتگرد جيڪڏهن اهو سمجھن ٿا ته هو هن ملڪ جي غيرتمند عوام تي قابض ٿي ويندا ته اها سندن ڀل آهي. هن چيو ته اسان جا امن امان جي بحالي وارا ادارا خاص ڪري رينجرز ۽ پوليس دهشتگردن جي چيلھ چٻي ڪري ڇڏي آهي ۽ هاڻ هو ان قسم جون بزدلاڻيون ڪارروائيون ڪري رهيا آهن. هن شام جي وقت رينجرز جي موبائل تي حملي جي شديد لفظن ۾ مذمت ڪندي چيو ته رينجرز جي موبائل تي حملو شرمناڪ ۽ بزدلاڻو عمل آهي ان جي جيتري مذمت ڪئي وڃي گھٽ آهي. هن چيو ته اسان جي رينجرز ۽ پوليس جا حوصلا پهرين به بلند هئا ۽ هاڻ به بلند آهن. ڪراچي سميت پوري صوبي ۾ دهشتگردي ۽ دهشتگردن جي خلاف ٽارگيٽيڊ ايڪشن جاري رهندو. شرجيل انعام ميمڻ چيو ته رينجرز ۽ پوليس جون قربانيون ضايع نه وينديون.

 

ڪراچي ۾ مسجد ٻاهران ڌماڪو، 3 ڄڻا مارجي ويا، 20 زخمي

ڪراچي (اسٽاف رپورٽر) آرام باغ جي علائقي پاڪستان چوڪ ۾ بوهري فرقي جي صالح مسجد ۾ گيٽ ويجهو بيٺل موٽرسائيڪل ۾ لڳل بارودي مواد ڌماڪي سان 3 ڄڻا مارجي ويا ۽ عورت سميت 20 ڄڻا زخمي ٿي پيا جن کي اسپتال منتقل ڪيو ويو ريسڪيو ذريعن مطابق زخمين کي بوهري ۽ سول اسپتال منتقل ڪيو ويو جتي 4 زخمين جي حالت ڳڻتي جوڳي آهي، اکين ڏٺن شاهدن مطابق مسجد ۾ نماز جي ادائيگي کانپوءِ نمازي ٻاهر اچي رهيا هئا ته ان دوران هڪ لڳي 50 منٽن تي ڌماڪو ٿي پيو جنهن سبب ڪيترائي نمازي زخمي ٿي پيا جڏهن ته دونهون ڦهلجي ويو گيٽ ويجهو بيٺل موٽرسائيڪلون ڪري پيون مقامي پوليس چيو ته مسجد جي گيٽ تي بيٺل موٽرسائيڪل ۾ بارودي مادو لڳايو ويو هو جنهن سبب ڌماڪو ڪيو ويو جڏهن ته ڊي آءِ جي خالد شيخ چيو ته ڌماڪو ڪرڻ لاءِ ٽائم ڊيوائيس جو استعمال ڪيو ويو، بم ڊسپوزل اسڪواڊ پنهنجي شروعاتي رپورٽ ۾ چيو آهي ته ڌماڪي ۾ 3 کان ساڍا 3  ڪلو بارودي مادو استعمال ڪيو ويو ۽ ان ۾ نٽ بولٽ ۽ ڇرا به استعمال ڪيا ويا آهن.

 

مانسهره ويجهو جيپ کڏ ۾ ڪري پئي، هڪ ئي ڪٽنب جا 8 ڄڻا فوت

مانسهره (مانيٽرنگ ڊيسڪ) مانسهره ويجهو جيپ کڏ ۾ ڪرڻ جي نتيجي ۾ هڪ ئي ڪٽنب جا 8 ڄڻا فوت ٿي ويا ۽ 3 زخمي ٿي پيا، جن کي اسپتال منتقل ڪيو ويو آهي. بلاڪوٽ کان سنگ جوڙ ويندڙ مسافر جيپ مانسهره ويجهو ڊرائيور جي ڪنٽرول مان نڪرڻ سبب کاهي ۾ ڪري پئي. حادثي جي نتيجي ۾ هڪ ئي ڪٽنب جي ٻن عورتن سميت 8 ڀاتي فوت ٿي ويا، جڏهن ته 3 ڄڻا زخمي ٿي پيا آهن. اطلاع ملڻ تي پوليس حادثي واري هنڌ پهچي فوتين جا لاش ۽ زخمين کي مقامي اسپتال کڻائي وئي، جتي زخمين کي طبي امداد فراهم ڪئي پئي وئي.

 

ماڊل ايان علي جي ضمانت واري درخواست منظور، ڪسٽم اختيارين کي نوٽيس جاري

لاهور(شوبز نيوز)مني لانڊرنگ ڪيس ۾ گرفتار ماڊل ايان علي جي ضمانت واري درخواست ٻڌڻي لاءِ منظور ڪئي وئي آهي جڏهن ته لاهور هاءِ ڪورٽ درخواست بابت ڪيس اختيارين کي نوٽيس جاري ڪري ڇڏيو مني لانڊرنگ ڪيس ۾ گرفتار ماڊل ايان علي هاءِ ڪورٽ ۾ ٻڌڻي واري درخواست داخل ڪري ڇڏي عدالت ڪسٽم اختيارين کي نُٽيس جاري ڪندي درخواست بابت جواب طلب ڪري ورتو ماڊل ايان علي طرفان هاءِ ڪورٽ ۾ درخواست داخل ڪئي وئي ضمانت واري درخواست جي ٻڌڻي جسٽس طارق عباسي ڪئي عدالت ڪسٽم اختيارين کي نوٽيس جاري ڪندي 2 هفتن ۾ جواب طلب ڪري ورتو، ايان علي جي وڪيل جو ان موقعي تي چون هو ته ايان علي جي ڪهاڻي کي غلط رنگ ڏنو ويو ايان علي مني لانڊرنگ جي ڪوشش نه ڪئي ان کي آزاد ڪيو وڃي، درخواست ۾ اهو به چيو ويو آهي ته مان بيگناهه آهيان مون کي آزاد ڪيو وڃي.

 

بالي ووڊ جي نئين ايڪشن فلم بمبئي ويلوٽ جو ٽريلر جاري

ممبئي(شوبز نيوز)ڀارتي ليکڪ Gyan Prakash  جي ڪتاب Mumbai Fables سان سلهاڙيل ايڪشن ۽ رومانوي فلم جي ڪهاڻي هڪ باڪسر جو ڪردار رنبير ڪپور ،جڏهن ته انوشڪا شرما گلوڪاره ٿي آهي، فلم ۾ فلمساز ڪرن جوهر خاص ڪردار ۾ جلوه گر ٿيندي، Anurag Kashyap  جي هدايتڪاري ۾ ٺهندڙ بمبئي ويلوٽ 15 مئي تي سينما گهرن جي زينت بڻجدي.

 

ايان علي جي گرفتاري کان پوءِ مشهور اداڪارائون ۽ ماڊلز پريشان

لاهور(شوبز نيوز)ايان علي جي گرفتاري تي اداڪارائن ۽ ماڊلز پريشان ڏسڻ ۾ اچن ٿيون، جڏهن اهم بااثر شخصيتون به معاملن کي لڪائڻ جي لاءِ سرگرم ٿي ويون آهن، ذريعن مان معلوم ٿيو آهي، ته اداڪارائون ۽ ماڊلز  پنهنجا اثاثا ۽ بئنڪ اڪائونٽس ۾ رکيل رقم ويجهن عزيزن جي حوالي ڪرڻ شروع ڪري ڏنو آهي ۽ ڪجهه بااثر شخصيتن کان مدد گهري آهي،  مشهور اداڪارائن ۽ ماڊلز کان علاوه  ننڍيون ماڊلز ۽ اداڪارائن جا ٻاهرين ملڪن جي دورن جي حوالي سان به تفصيلات گڏ ڪري رهيا آهن، ذريعن مطابق وڌيڪ ٻڌايو ته ان صورتحال ۾ ڪيتريون ئي ننڍيون ماڊلز ، ڊانسر ۽ اداڪارائون ڪجهه سالن لاءِ انڊر گرائونڊ ٿي ويو آهن، ان حوالي سان فلم ٽي وي ۽ فيشن انڊسٽري جي اهم گروهن جو چوڻ آهي، ته حڪومت کي ان معاملي جي تحقيق وڏي پيماني تي ڪرڻ گهرجي، اداڪارائون ۽ ماڊلز جي فني پروجيڪٽس سان گڏ ان پروفيشن ۾ اچڻ کان پهرين جي اثاثن جي به ڇنڊ ڇاڻ ٿيڻ گهرجي.

 

هندو ها ۽ ڳئون جو گوشت به کائيندو آهيان: رشي ڪپور

نئي دهلي(شوبز نيوز)بالي ووڊ جي مشهور اداڪار رشي ڪپور رياست مهاراشٽر ۾ ڳئون کي ذبح ڪرڻ ۽ ان جي گوشت جي استعمال ۽ پابندي تي تنقيد ٿي رهي آهي، ڳئون کي ذبح ۽ ان جو گوشت کائڻ تي لڳايل پابندي جي خلافاحتجاج ظاهر ڪندي، رشي ڪپور پنهنجي ٽوئٽر اڪائونٽ تي لکيو هو، ته مان ڪاوڙ ۾ آهيان، ته ڪير کائي ڇا ٿو، ان سان هن  جي مذهب کي ڇو ڳنڊيو ويو آهي، مان هندو آهيان ۽ ڳئون جو گوشت کانوان ٿو، ته ڇا ان ڪرڻ سان ٻين جي مقابلي ۾ گهٽ مذهبي ٿي ويندس؟  ان لکيو ته، جيڪڏهن ڪنهن کي ڳئون جو گوشت يا سوئر کائڻو ناهي، ته هو نه کائي پر ان جي لاءِ ٻين تي پنهنجو حڪم نه هلائي، رشي ڪپور جي مطابق ملڪ ۾ کائڻ پيئڻ تي ڪنهن تي به ڪنهن طرح جي پابندي نه هئڻ گهرجي، رشي ڪپور هڪ ٻئي ٽوئٽ ۾ لکيو هو ته ان کي سوئر جو گوشت به پسندآهي، رشي ڪپور جي ان ٽوئٽر کان پوءِ سماجي رابطن جي ويب سائٽز تي ڪجهه ماڻهن ان جي خلاف پنهنجي ڪاوڙ ظاهر ڪئي، ته ڪجهه ماڻهن ته ان تي غارين جا انبار لڳائي ڇڏيا، ڀارت جي ڪيترين ئي رياستن ۾ ڳئون کي ذبح ڪرڻ تي پابندي لڳائي آهي، پر ڪجهه ۾ ان جي اجازت به آهي، جنهن ۾ رياست مهاراشٽر به شامل آهي.

 

وهاب رياض جي محنت ضايع، پاڪستان کي ڪوارٽر فائنل ۾ شڪست، آسٽريليا سيمي فائنل ۾ پهچي ويو

ايڊليڊ(اسپورٽس نيوز) پاڪستاني رانديگرن بيٽنگ کانپوءِ فيلڊنگ جي شعبي ۾ به خراب ڪارڪردگي ڏيکاري پاڪستاني ٽيم کي سيمي فائنل تائين رسائي کان محروم ڪري ڇڏيو پاڪستاني فيلڊر نه صرف رنس روڪڻ ۾ ناڪام رهيا پر ڪيترائي ڪيچ ڇڏي بالرن جي محنت تي پاڻي هاري ڇڏيو، آسٽريلي طرفان ڊيوڊ وارنر ۽ ايرون فنچ اننگز جي شروعات ڪئي، وارنر پراعتماد شاٽس کيڏندي پاڪستاني بالرن تي پنهنجوڌاڪو ڄ۾ايو جڏهن ته سهيل خان جي ٻئين ئي اوور ۾ ايرون فنچ ايل بي ڊبليو آئوٽ ٿي ويو ان کانپوءِ اسٽيون سمٿ آيو جنهن ڊيوڊ وارنر جو ڀرپور ساٿ ڏيندي ٽيم جي اسڪور ۾ اضافو ڪيو، جڏهن ته آسٽريلوي ٽيم جو اسڪور اڃان 49 رنسن تي ئي پهتو هو ته ڊيوڊ وارنر هڪ اونچي شاٽ کيڏڻ جي ڪوشش ۾ وهاب رياض جي بال تي راحت علي هٿان ڪيچ آئوٽ ٿي ويو، ڊيوڊ وارنر 3 چوڪن جي مدد سان 24 رنسن جي اننگز کيڏي، ان کانپوءِ آسٽريلوي ڪپتان مائيڪل ڪلارڪ آيو ۽ ڪجهه ئي دير ۾ پويلين واپس هليو ويو مائيڪل ڪلارڪ صرف 8 رنس ٺاهي سگهيو، ميچ جي صورتحال ان وقت دلچسپ ٿي وئي جڏهن وهاب رياض جي بال تي راحت علي شين واٽسن جو ڪيچ ڊراپ ڪيو جنهن سبب پاڪستان هڪ اهم وڪيٽ کان محروم رهجي ويو  اسٽيون سمٿ ۽ شيون واٽسن گڏجي پاڪستان خلاف وڏي پارٽنرشپ قائم ڪئي ۽ پنهنجي ٽيم کي هدف جي ويجهو پهچايو جڏهن ته آسٽريلوي ٽيم جو اسڪور اڃان 148 رنسن تي ئي پهتو هو ته اسٽيون سمٿ آئوٽ ٿي ويو هن کي 65 رنسن جي انفرادي اسڪور تي احسان عادل ايل بي ڊبليو ڪيو ان کانپوءِ ايندڙ رانديگر گلين ميڪسويل کي به پاڪستاني فيلڊرن کيڏن جو ڀرپور موقعو فراهم ڪيو وهاب رياض جي ئي بال تي سهيل خان ان جو آسان ڪيچ ڊراپ ڪري ميچ تي پاڪستاني ٽيم جي گرفت ڪمزور ڪري ڇڏي گلين ميڪسويل موقعي جو ڀرپور فائدو وٺندي پاڪستاني بالرن جي سڍي خاطر توازهه ڪئي ۽ پنهنجي ٽيم جي ڪاميابي ۾ اهم ڪردار ادا ڪيو، ايئن آسٽرليا جي ٽيم پاڪستان کي 6 وڪيٽن تان شڪست ڏئي ورلڊ ڪپ ۾ ان جو سفر ختم ڪري ڇڏيو آسٽريلوي ٽيم مقرر هدف 33.5 اوورن ۾ 4 وڪيٽن جي نقصان تي پورو ڪيو شين واٽسن 64 جڏهن ته گلين ميڪسويل 44 رنسن جي جاندار اننگز کيڏي پاڪستان طرفان وهاب رياض 2 جڏهن ته سهيل خان ۽ احسان عادل هڪ، هڪ رانديگر کي آئوٽ ڪيو. جڏهن ته ميچ ۾ بهترين ڪارڪردگي تي جوش هيزل ووڊ کي مين آف دي ميچ جي ايوارڊ سان نوازيو ويو.

 

ڪيويز خلاف بهترين راند جو مظاهرو ڪري ٽيم جي ڪاميابي ۾ اهم ڪردار ادا ڪندس: ڪرس گيل

ويلنگٽن (اسپورٽس نيوز) ويسٽ انڊيز ڪرڪيٽ ٽيم جي آل رائونڊر بيٽسمين ڪرس گيل چيو آهي ته هو ڪيويز خلاف ڪوارٽر فائنل ۾ شاندار بيٽنگ جو مظاهرو ڪندي پنهنجي ٽيم جي ڪاميابي ۾ اهم ڪردار ادا ڪندو، هن چيو ته هو مڪمل طور تي فٽ ۽ ڀرپور فارم ۾ آهي ۽ ڪيويز خلاف ڪوارٽر فائنل ۾ ميچ کيڏڻ لاءِ تيار آهي، هن چيو ته ڪيويز مضبوط ٽيم آهي ۽ ڪوارٽر فائنل کٽڻ لاءِ ڀرپور ڪوشش ڪندي، پنهنجي هڪ بيان ۾ هن چيو ته ناڪ آئوٽ ميچ ۾ ڪا به ٽيم فيورٽ نه آهي، جيڪا ٽيم سٺي ڪارڪردگي جو مظاهرو ڪندي ڪاميابي ان جي ٿيندي، ڪرس گيل چيو ته ويسٽ انڊيز ۽ نيوزيلينڊ وچ ۾ ميچون هميشه مقابلي واريون ٿيون آهن، پر هوم گرائونڊ تي هجڻ ۽ ورلڊ ڪپ ٽائيٽل لاءِ فيورٽ هجڻ سبب دٻاءُ ڪيويز تي هوندو، جنهن جو فائدو وٺندي اسان کي جارحاڻي راند کيڏڻي پوندي، واضح رهي ته ميگا ايونٽ جي چوٿين ۽ آخري ڪوارٽر فائنل ميچ نيوزيلينڊ ۽ ويسٽ انڊيز جي ڪرڪيٽ ٽيمن وچ ۾ (اڄ) ڇنڇر تي ويسٽ پيڪ اسٽيڊيم ويلنگٽن ۾ کيڏي ويندي.