تازيون خبرون

Daily Archives: March 21, 2015

ڪراچي آپريشن جاري رهندو: وزير اعظم جو اعلان

اسلام آباد (بيورو) وزيراعظم نوازشريف چيو آهي ته ڪراچي ۾ هر صورت ۾ امن امان ٻهال ڪنداسين ۽ اُن کي ڏوهن کان پاڪ شهر بڻائڻ منهنجو مشن آهي. اسلام آباد ۾ نيشنل ايوي ايشن پاليسي 2015 جي اعلان جي تقريب کي خطاب دوران وزيراعظم جو چوڻ هو ته حڪومت کي ملڪي مسئلن جو احساس آهي. محدود وسيلن جي باوجود ملڪ کي عظيم تر بڻائڻ جو عزم رکون ٿا. حڪومت عوام جي مسئلن ۽ ان جون ضرورتون پوريون ڪرڻ جي ذميواري نڀائينداسين ۽ اُن لاءِ پاڪستان کي ترقي يافته ۽ محفوظ ملڪ بڻائڻ لاءِ جدوجهد ڪري رهيا آهيون. حڪومتي قدمن سبب ملڪ جي معاشي صورتحال بهتر ٿي رهي آهي جنهن سبب مثبت اثر ٿي رهيا آهن. عالمي ادارا به پاڪستان جي معيشت ۾ بهتري جو اعتراف ڪري رهيا آهن. وزيراعظم چيو ته ڪراچي ۾ امن سان نه رڳو سنڌ پر سڄي پاڪستان کي فائدو ٿيندو، شهر ۾ امن بحال ٿيندو ته اقتصادي  سرگريون به ٿينديون. امن جي قيام لاءِ ڏوهارين خلاف آپريشن سمورين سياسي پارٽي سان مشوري ۽ رضامندي سان شروع ڪيو جنهن سبب ٽارگيٽ ڪلنگ، اغوا، ڀنگ ۽ ڀتي جي وارداتن ۾ گهٽتائي آئي آهي.

 

موجوده صورتحال ۾ ايم ڪيو ايم سان ڳالهيون نه ٿينديون: قائم علي شاهه

جيڪب آباد (ڊ.ر) سنڌ جي وڏي وزير سيد قائم علي شاهه جيڪب آباد ۾ صحافين سان ڳالهه ٻولهه ڪندي چيو آهي ته سينيٽ چونڊن کان اڳ ۾ ايم ڪيو ايم کي سنڌ  حڪومت ۾ شامل ڪرڻ لاءِ ڳالهيون ٿي رهيون هيون پر موجوده سياسي حالتن ۾ پارٽي جو اهو فيصلو آهي ته ايم ڪيو ايم سان  في الحال اتحاد نه ٿو ٿي سگهي جيسيتائين حالتون بهتر نه ٿيون ٿين ۽ جاچ واري مرحلو پورو نه ٿيو ٿئي ان وقت تائين متحده سان ڳالهيون نه ٿيون ٿي سگهن، وڏي وزير چيو ته سنڌ ۽ هن علائقي ۾ امن امان واري صورتحال ڪافي بهتر آهي شڪارپور سانحو هڪ  وڏو واقعو هو ان ۾ ملوث مک جوابدار مارجي ويو آهي باقي جوابدارن کي پوليس ۽ رينجرس گڏجي گرفتار ڪيو ۽ دهشتگردن جو نيٽ ورڪ ختم ڪيو هن چيو ته اسان سڄي سنڌ ۾ امن قائم ڪيو آهي، وڏي وزير وڌيڪ چيو ته ڪراچيءَ ۾ آپريشن شروع ڪرڻ کان پوءِ هاڻي ڪراچيءَ ۾ امن امان واري صورتحال اڳ جي ڀيٽ ۾ ڪافي بهتر آهي هن چيو ته ڪراچيءَ جو آپريشن ڪنهن هڪ فرد واحد يا ڪنهن هڪ جماعت جي خلاف نه آهي ڪراچيءَ جو آپريشن ڏوهارين خلاف آهي پوءِ ڏوهاري ڪهڙي به پارٽيءَ ۾ هجن ان خلاف ڪاروائي جا حامي آهيون، صولت مرزا جي ڏنل بيانن ۽ گورنر سنڌ جي تبادلي واري سوال جو وڏي وزير جواب نه ڏنو ۽ ميڊيا ڳالهه ٻولهه ختم ڪري هليو ويو. ان کان اڳ وڏي وزير جيڪب آباد جي نمائش گرائونڊ ۾ جيڪب آباد ۾ لڳايل 145 هين تاريخي سنڌ هارس اينڊ ڪيٽل جو افتتاح ڪيو، جتي ڀلوڙ نسل جي گهوڙن، ڏاندن، ڳئن، ٻڪرين، سميت مخلتف قسم جي جانورن جي نمائش ڪئي ۽ سرڪاري اسڪول جي ٻارڙن ٽيبلوز پيش ڪيا ۽ وڏي وزير سيد قائم علي شاهه کي گل دستا پيش ڪيا ان موقعي تي پ پ ايم اين اي مير اعجاز خان جکراڻي، صوبائي وزير ٽرانسپورٽ ممتاز خان جکراڻي،مير فاروق خان جکراڻي، غلام عباس خان جکراڻي،عبدالرزاق بهراڻي، پ پ بلوچستان جو صدر مير صادق عمراڻي، ضلعي جنرل سيڪريٽري پ پ پ مير لياقت خان لاشاري، پ پ ايم پي اي سردارمحمد مقيم کوسو، ايم پي اي ٺل سهراب سرڪي، سردار منظور خان پنهور، سردار ذوالفقار خان سرڪي، بهادر مغيري، ڪمشنر لاڙڪاڻو سعيد احمد مڱڻيجو، ڊي آءِ جي لاڙڪاڻو سائين رکيو ميراڻي، عابده بروهي ۽ پ پ جا ٻيا اڳواڻ توڙي ضلع جا اهم آفيسر موجود هئا. جڏهن ته ان کان اڳ پ پ ايم اين اي مير اعجاز خان جکراڻي  سنڌ جي وڏي وزير کي ٻڌايو ته جيڪب آباد شهر ۾ يو ايس ايڊ جي تعاون سان ڊرنيج ۽ مٺي پاڻي جي اسڪيمن تي ڪم هلي رهيو آهي ان ڪري روڊ رستن جي کوٽائي ڪئي وئي آهي  هن مطالبو ڪيو ته روڊن جي تعمير لاءِ پئڪيج ڏنو وڃي،هن وڏي وزير کان جيڪب آباد ۾ انجنيئرنگ ڪاليج قائم ڪرڻ جو پڻ مطالبو ڪيو.

 

صدر سان وزيراعظم جي ملاقات، صولت مرزا جي ڦاهي واري معاملي تي ڳالهيون

اسلام آباد (بيورو) ايوان صدر ۾ وزيراعظم نواز شريف   صدر ممنون حسين سان ملاقات ڪئي، ملاقات دوران ٻنهي اڳواڻن ملڪ جي مجموعي سياسي صورتحال تي خيالن جي ڏي وٺ ڪئي ذريعن مطابق ملاقات ۾ صولت مرزا جي ڦاهي ۾ 90 ڏينهن جي واڌ وارو معاملو به غور هيٺ آيو.

 

صدر ممنون طرفان پاڪ فضائيه جي ايئر چيف مارشل سهيل امان لاءِ نشان امتياز

اسلام آباد (بيورو) پاڪ فضائيه جي سربراهه ايئر چيف مارشل سهيل امان کي نشان امتياز عطا ڪرڻ جي تقريب ايوان صدر اسلام آباد ۾ ٿي ايئر چيف مارشل سهيل امان کي نشان امتياز ملڪ لاءِ وڏين خدمتن تي ڏنو ويو، ايئر چيف مارشل پاڪ فضائيه جي ڪمان سنڀالڻ کانپوءِ نيول هيڊڪوارٽر جو پهريون دورو به ڪيو ۽ پاڪ بحريه جي سربراهه ايڊمرل ذڪاءُ الله سان ملاقات ڪئي ان موقعي تي ايڊمرل ذڪاءُ الله سهيل امان کي پاڪ فضائيه جي ڪمانڊ سنڀالڻ تي مبارڪباد ڏني.

 

حڪومت ۽ پي ٽي آءِ وچ ۾ جوڊيشل ڪميشن جوڙڻ تي اتفاق

اسلام آباد (بيورو) حڪومت ۽ تحريڪ انصاف وچ ۾ جوڊيشل ڪميشن بڻائڻ جو سمجهوتو ٿي ويو آهي. اسحاق ڊار جو چوڻ هو ته پي ٽي آئي تمام گهڻي لچڪ ڏيکاري آهي، 4 اهم نڪتن تي اتفاق ٿي ويو آهي. پنجاب هائوس اسلام ۾ تحريڪ انصاف ۽ حڪومتي ڪميٽي جي ميمبرن گڏيل پريس ڪانفرنس ڪئي. اسحاق ڊار جو چوڻ هو ته پوئين 2 هفتن کان تحريڪ انصاف سان ڪجهه ملاقاتون ٿيون هيون پر ميڊيا کي خبر ٿيڻ نه ڏني ڇو ته چئي ڇڏيو هو ته جيستائين معاملو حل نه ٿئي ميڊيا تي نهاينداسين. تحريڪ انصاف جي ساٿين وڏي خلوص سان ڪوشش ڪئي۔ ملڪ چونڊ سڌارن، معاشي ترقي سميت ڪيترن ئي چئلينجن کي منهن ڏئي رهيو آهي. اسحاق ڊار چيو ته تحريڪ انصاف سان چار اهم معاملن تي اتفاق ٿي ويو آهي. جن نقطن تي اتفاق ڪيو ويو اُن جي ڪاپي ميڊيا کي ڏينداسين. تحريڪ انصاف جي اڳواڻ شاهه محمود قريشي چيو ته 2013 جي چونڊن جي 2 سالن کان بحث هيٺ آهن. مسلم ليگ (ن) جو موقف آهي ته چونڊون بهتر ٿيون آهن جڏهن ته اسان جو موقف آهي ته چونڊون بدترين ٿيون آهن ڇو ته ان کان اڳ ۾ جيتريون چونڊون ٿيون آهن اُنهن تي آڱريون کنيون ويون آهن. آئين اسان جي رهنمائي ڪري ٿو ته معاملي کي ڪهڙي ريت حل ڪيو وڃي. اتفاق ٿيو آهي ته معاملي جي حل لاءِ جوڊيشل ڪميشن جوڙي وڃي ۽ جمهوريت کي مضبوط ڪرڻ لاءِ چونڊ سڌارا ڪيا وڃن ڇو ته جمهوريت جي بنيادي چيز ووٽ جو حصح استعمال آهي. جهانگير ترين چيو ته جوڊيشل ڪميشن تحت تحقيق ڪئي ويندي ته چونڊون غير جانبدار ۽ قانون موجب هيون يا نه.

 

حيدر عباس رضوي، بابر غوري، قمر منصور ۽ رئوف صديقي جا نالا اي سي ايل ۾ شامل

ڪراچي (اسٽاف رپورٽر) ٽارگيٽ ڪلنگ ۾ ملوث جوابدار صولت مرزا  جي اعترافي بيان جي وڊيو نظر ۾ رکندي متحده قومي موومينٽ جي 4 اڳواڻن جا نالا ايگزٽ لسٽ ۾ وڌا وي آهن، ايم ڪيو ايم جي حيدر عباس رضوي، بابر غوري، قمر منصور ۽ رئوف صديقي جا نالا اي سي ايل ۾ شامل ڪيا ويا آهن، ذريعن جو چوڻ آهي ته صولت مرزا جيڪو اعترافي وڊيو بيان جاري ڪيو آهي اهو ڪل 16 منٽن جو آهي، اڃان تائين صرف 6 منٽ جي وڊيو نشر ڪئي وئي آهي ۽ باقي وڊيو م وڌيڪ انڪشافن جو امڪان آهي، صولت مرزا حڪومت کي اپيل ڪئي هئي ته ان جي سزا ان وقت تائين ملتوي ڪئي وڃي جيستائين هو وڌيڪ انڪشاف نه ٿو ڪري ڇڏي پاڪستان جي تاريخ ۾ هي پهريون واقعو آهي جڏهن ڪنهن موت جي سزا جي قيدي جي ڦاهي کان ڪجهه ڪلاڪ اڳ ان طرح جي وڊيو جاري ٿي هجي ۽ ان جي ردعمل ۾ سزا کي ملتوي ڪيو ويو هجي، ذريعن جو چوڻ آهي ته صولت مرزا جي بيان جي روشني ۾ ايم ڪيو ايم جي وڌيڪ اڳواڻن جا نالا اي سي ايل ۾ شامل ڪري سگهجن ٿا جن ۾ امڪاني طور تي واسع جليل، فيصل سبزواري، عبدالرشيد گوڊيل ۽ طاهر مشهدي شامل آهن.

 

گڏيل قومن سامونڊي حدن ۾ اضافي جي پاڪستاني دعويٰ تسليم ڪري ورتي

ڪراچي (اسٽاف رپورٽر) 19 مارچ 2015ع تي گڏيل قومن جي سامونڊي حدن بابت ڪميشن پنهنجو جائزو مڪمل ڪري ورتو ۽ سامونڊي حدن ۾ اضافي بابت پاڪستان جي دعويٰ تسليم ڪري ورتي آهي، جنهن تحت پاڪستان جون سامونڊي حدون 200 ناٽيڪل ميل مان وڌي 350 ناٽيڪل ميل ٿي ويون آهن، اهڙي طرح پاڪستان يج موجوده 40 هزار چورس ڪلوميٽر خاص اقتصادي زون کان علاوه 50 هزار چورسل ڪلوميٽر جو اضافي ڪانٽينينٽل شيلف پاڪستان جي انتظام هيٺ اچي ويو آهي، پاڪستان کي مليل ان اضافي ڪانٽينينٽل شيلف جو تهه سمنڊ ۽ ان جي هيٺان موجود وسيلن تي مڪمل اختيار حاصل هوندا. پاڪستان جي تاريخ ۾ اها هڪ تعريف جو ڳي ڪاميابي آهي جو اسان پنهنجي سامونڊي علائقي ۾ موجود بي پناهه قدرتي وسيلا حاصل ڪرڻ سميت وسيع معاشي فائدا حاصل ڪري سگهنداسين. بين الاقوامي سامونڊي قانونن جو آرٽيڪل 76 ساحلي ملڪن کي ڪانٽينينٽل شيلف 200 ناٽيڪل ميل مان وڌائڻ جي اجازت ڏئي ٿو پر ساحلي ملڪن کي گڏيل قومن جي سامونڊي حدن بابت ڪميسن آڏو فني انگن اکرن ۽ مواد ذريعي پنهنجو ڪيس ثابت ڪرڻو پوندو آهي، اها ڪميشن هائيڊرو گرافي، جيوفزڪس،جيالاجي ۽ ٻين لاڳاپيل شعبن جي 21 ماهرن تي ٻڌل هوندي آهي، پاڪ بحريه جو هائيڊرو گرافر ڪموڊور محمد ارشد ان ڪميشن جو ميمبر آهي، پاڪستان جي سامونڊي حدن ۾ اضافي جو منصوبو 2005ع ۾ پاڪ بحريه ۽ نيشنل انسٽيٽيوٽ آف هائيڊرو گرافي سائنس ۽ ٽيڪنالاجي واري وزارت جي سرپرستي هيٺ گڏيل طور تي شروع ڪيو، چئن سالن جي اڻ ٿڪ محنت ۽ ٺوس انگن اکرن سهيڙڻ ۽ انهن جي ڇنڊ ڇاڻ کان پوءِ 30 اپريل 2009ع تي اهو ڪيس گڏيل قومن جي ڪميشن وٽ باقاعده طور تي پيش ڪيو ويو، پاڪستان جو وارو اچڻ تي ڄاڻايل ڪميشن جي هڪ 7 رڪني ذيلي ڪميشن پاڪستان جي درخواست جو غور سان جائزو ورتو ۽ هڪ سال تائين لڳاتار تجزئي ۽ تحقيق ڪرڻ کان پوءِ گڏيل قومن جي ان ڪميشن پاڪستان جي ڪانٽينيٽل شيلف جي حد 200 مان وڌائي 350 ناٽيڪل ميل ڪرڻ جون سفارشون منظور ڪري ورتيون، ان مرحلي دوران پاڪ بحريه جي جج ايڊووڪيٽ جنرل ڪموڊور ظفر منصور ٽيپو، پروجيڪٽ ڊائريڪٽر ۽ نيشنل انسٽيٽيوٽ آف اوشنو گرافي جي ڊائريڪٽر جنرل ڊاڪٽر آصف انعام، پاڪستان نيوي هائيڊرو گرافي شعبي جي ڪمانڊر سلمان احمد خان ۽ نيشنل انسٽيٽيوٽ آف اوشنو گرافي جي خالد محمود ۽ محسن تبريز تي ٻڌل پاڪستان جي ٽيڪنيڪل وفد ان اهم ذميواري کي نڀايو ۽ گڏيل قومن جي ڪميشن سان ڪيتريون ئي ملاقاتون ڪيون، آخري مرحلي ۾ پاڪستان جي وفد گڏيل قومن ۾ پاڪستان جي مستقل نمائندي ڊاڪٽر مليحه لوڌي جي سربراهي ۾ 10 مارچ 2015ع تي پنهنجو موقف پيش ڪيو،هڪ موثر ۽ دليلن تي ٻڌل بحث کان پوءِ گڏيل قومن جي سامونڊي حدن بابت ڪميشن پاڪستان جي مطالبي کي تسليم ڪرڻ جو اعلان ڪيو، اها هڪ وڏي قومي ڪاميابي آهي، جنهن جو لاڀ قوم کي مستقبل ۾ حاصل ٿيندو، هاڻي اسان کي قومي مفاد خاطر ميري ٽائيم زونز جي معاشي ذريعن کي استعمال ڪرڻ لاءِ سمورا وسيلا ڪتب آڻڻا پوندا. وزيراعظم جي قومي سلامتي جي معاملن بابت صلاحڪار سرتاج عزيز چيو آهي ته اها ڳالهه انتهائي اطمينان جوڳي آهي ته ڪانٽينينٽل شيلف جي حدن بابت گڏيل قومن جي ڪميشن پاڪستان جي ڪانٽينينٽل شيلف جي اندروني حدن ۾ توسيع بابت پاڪستان جي دعويٰ کي اتفاق راءِ سان منظور ڪيو آهي، پنهنجي هڪ بيان ۾ هن چيو ته ان نتيجي ۾ پاڪستان کي اٽڪل 50 هزار چورسل ڪلوميٽر اضافي ايراضي حاصل ٿيندي، هن چيو ته ان ڪاميابي سان سامونڊي قانون بابت گڏيل قومن جي ڪنوينشن تحت ان علائقي ۾ سمنڊ جي سطح جي نتيجي ۾ پاڪستان کي فائدو حاصل ڪرڻ جو حق حاصل هوندو، جنهن سان پاڪستان جي عوام جي سماجي ۽ اقتصادي ترقي لاءِ اسان جي ڪوشش کي هٿي ملندي، هن چيو ته گڏيل قومن طرفان پاڪستان جي دعويٰ جي منظوري ڏيڻ قومي ۽ عالمي سطح تي پاڪستان جي لاڳاپيل کاتن جي مربوط سفارتي ۽ فني ڪوششن جو نتيجو آهي، سرتاج عزيز چيو ته پاڪستان 2009ع ۾ سي ايل ايل ايس ۾ پنهنجي دعويٰ داخل ڪرائيندي، ان معاملي تي مفاهمت ۽ سهڪار لاءِ برادر ملڪ اومان جا ٿورا مڃيا.

 

صولت مرزا جي بيان خلاف ايم ڪيو ايم جو قومي اسيمبلي ۾ احتجاج، متحده ۾ ڪا به هٿياربند ونگ ناهي: فاروق ستار

اسلام آباد (بيورو)  قومي اسيمبلي جي اجلاس ۾ صولت مرزا جي وڊيو رڪارڊنگ تي ايم ڪيو ايم ميمبرز  پاران  احتجاج ڪيو ويو، فاروق ستار چيو آهي ته ايم ڪيو ايم خلاف ڪارروائي روڪي وڃي، جيڪڏهن 92 وارو رويو اختيار ڪيو ويو ته پوءِ هـِي نظام به نه هلي سگهندو، اسان لاءِ جيل کوليندڙ ٻڌي ڇڏين ته سڀاڻي انهن جو به وارو ايندو، ڦاهي جي قيدي صولتمرزا کي وڊيو بيان جي سهولت ڏني وئي، مشرف حملي ڪيس جي ڊاڪٽر عثمان ۽ ٻين ڦاهي جي قيدين کي به اهڙي سهولت  ڏني وڃي ها. اسپيڪر سردار اياز صادق جي صدارت هيٺ قومي اسيمبلي جو اجلاس شروع ٿيو ته ايم ڪيو ايم ميمبرز نائين زيرو تي ڇاپي ۽ صولت مرزا جي وڊيو رڪارڊنگ بيان تي سخت احتجاج ڪيو. ايم ڪيو ايم ميمبرز پوائنٽ آف آرڊر تي ڳالهائڻ جي ڪوشش ڪئي، جنهن تي اسپيڪر سردار اياز صادق کين روڪيندي چيو ته توهان پنهنجي رٿ واپس وٺي چڪا آيو، رٿ پيش ڪرڻ کانسواءِ توهان کي ڳالهائڻ جي اجازت نٿي ڏئي سگهجي. پارلياماني معاملن واري وزير شيخ آفتاب جي درخواست تي ايوان ۾ معمول جي ڪارروائي معطل ڪري ايم ڪيو ايم اڳواڻ فاروق ستار کي ڳالهائڻ جي اجازت ڏني وڃي. ايم ڪيو ايم اڳواڻ فاروق ستار چيو ته نائين زيرو تي ڇاپي جو ڪهڙو جواز هو، کين ٻڌايو وڃي، روزانو نائين زيرو تي 3 هزار ماڻهو ايندا آهن، ايم ڪيو ايم وٽ اهڙي مشين ناهي جو ڳولها ڪري ته ڪهڙا ماڻهو ڏوهاري آهن. هن چيو ته ملڪ جي چوٿين وڏي پارٽي هئڻ باوجود اهڙو سلوڪ ڇو ٿي رهيو آهي، حڪومت ايم ڪيو ايم خلاف ڪارروائي روڪي، ٻيهر صورت ۾ اسان سمجهنداسين ته ڪارروائي وفاق جي مرضيءَ سان ٿئي پئي. فاروق ستار چيو ته ايم ڪيو ايم ۾ ڪا به هٿياربند ونگ ناهي، جيڪڏهن ڪو ڏوهاري نائين زيرو تان گرفتار ٿئي پيو ته ان کي غلط رنگ نه ڏنو وڃي. ايم ڪيو ايم اڳواڻ وڌيڪ چيو ته نائين زيرو تان مليل هٿيارن بابت چيو پيو وڃي ته اهي نيٽو جا آهن،  جڏهن آمريڪا ان جي تردي ڪئي آهي ته پوءِ پرائي شادي ۾ عبدالله ديوانو ڇو آهي.؟ فاروق ستار چيو ته ڦاهي جي سزا ٻڌايل قيدي کي وڊيو رڪارڊنگ جي سهولت ڏيڻ ملڪي تاريخ ۾ انوکو مثال آهي، جيڪڏهن پاڪستان جي تاريخ ۾ اڳ ائين ٿيو هجي ته هو سياست ڇڏڻ لاءِ تيار آهي. فاروق ستار جو چوڻ هو ته جيڪڏهن صولت مرزا کي وڊيو رڪارڊنگ جي  وڊيو ڏني وڃي ته پوءِ پرويز مشرف حملي جي ڊاڪٽر عثمان ۽ ڦاهي جي ٻين قيدين کي اهڙي سهولت ڇو نه پئي ڏني وڃي. هن چيو ته 12 مئي سانحو ايم ڪيو ايم خلاف سازش هو، سانحي کانپوءِ آمريڪي سفير سان جيڪا  18 منٽ ڳالهه ٻولهه ڪئي وئي، اها پيش ڪرڻ لاءِ تيار آهيان. فاروق ستار چيو ته جيڪڏهن ايم ڪيو ايم ۾ ڪو ڏوهاري آهي ته گند صاف ڪرڻ لاءِ مدد ڪئي وڃي، رڳو ايم ڪيو ايم خلاف جيل کوليندڙ ٻڌي ڇڏين سڀاڻي انهن جو به وارو هوندو.

 

صولت مرزا جي ڦاهي تي عمل ٽن مهينن تائين ملتوي ڪيو ويو، صدر صحيح ڪري ڇڏي

اسلام آباد (بيورو)  ايم ڪيو ايم جي قيادت تي سنگين الزام هڻندڙ ڦاهي جي سزا جي قيدي صولت مرزا جي ڦاهي تي عمل ٽن مهينن تائين ملتوي ڪيو ويو آهي، جڏهن ته ڪيو ويو آهي. وفاقي گهرو وزارت جي ذريعن موجب، صولت مرزا جي وڊيو بيان کانپوءِ کائنس نئين سر جاچ جو فيصلو ڪيو ويو آهي، ان لاءِ جلد ڪميٽي پڻ قائم ڪئي ويندي.  ذريعن موجب، صولت مرزا کان جاچ ڪرڻ لاءِ سندس ڦاهي تي عمل وڌيڪ 90 ڏينهن تائين روڪيو ويو آهي، جاچ ڪميٽي صولت مرزا کان مئجسٽريٽ جي آڏو بيان رڪارڊ ڪندي. ذريعن جو چوڻ آهي ته صولت مرزا کان سندس وڊيو بيان جي روشني ۾ جاچ ڪئي ويندي، جنهن بعد جاچ جو دائرو وڌايو ويندو.

 

لنڊن ۾ برطانوي گهرو وزارت جو اجلاس، عمران فاروق قتل ڪيس جا اهم ڪاغذ برطانوي حڪومت حوالي

لنڊن (مانيٽرنگ ڊيسڪ) لنڊن ۾ برطانوي گهرو وزارت جو اجلاس ٿيو، جنهن ۾ ايم ڪيو ايم جي  اڳوڻي سيڪريٽري جنرل عمران فاروق قتل ڪيس جا اهم ڪاغذ برطانوي حڪومت حوالي ڪيا ويا. اهي اهم ڪاغذات اسلام آباد ۾ مقرر برطانوي هائي ڪمشنر سر فلپ مارٽن پيش ڪيا. برطانوي گهرو وزير اجلاس کي ٻڌايو ته اهم ڪاغذن جو جائزو ورتو پيو وڃي. گهرو وزير ٿريسامي اجلاس کي وڌيڪ ٻڌايو ته ايم ڪيو ايم جي اڳواڻ الطاف حسين اپريل تائين مني لانڊرنگ ڪيس ۾ضمانت تي آهي. گهرو وزير ٿريسامي اجلاس ۾ واضح ڪيو ته برطانيا ڪنهن کي به تاءُ پکيڙڻ جي اجازت ڏئي نٿو سگهي.