تازيون خبرون

Daily Archives: March 20, 2015

سنڌ جي گورنر صولت مرزا جا الزام رد ڪري ڇڏيا، استيفيٰ جون افواهون به رد، مستعفي نه پيو ٿيا: عشرت العباد

ڪراچي (اسٽاف رپورٽر) گورنر سنڌ جي ترجمان صولت مرزا جي الزامن کي رد ڪري ڇڏيو آهي. گورنر عشرت العباد جي ترجمان جو چوڻ آهي ته گورنر اڄ تائين ڪنهن به جوابدار کي تحفظ ناهي ڏنو، چاهي ان جو تعلق ڪهڙي به پارٽي سان هجي گورنر جي ترجمان جو چوڻ آهي ته گورنر کي ڏوهارين کي تحفظ ڏيڻ ۽ ڇڏرائڻ جا اختيار ئي ناهن هوندا، صولت مرزا جا الزام ڪوڙا  آهن. هن چيو ته گورنر اڄ تائين ڪنهن به جوابدار کي تحفظ ناهي ڏنو، نه ئي ڪڏهن ڪنهن ڏوهاري کي تحفظ ڏيڻ جي سفارش ڪئي آهي. ٻئي پاسي سنڌ جي گورنر پاران استعيفيٰ ڏيڻ جون افواهون ميڊيا تي گردش ڪري رهيون آهن، نجي ٽي وي موجب سنڌ جي گورنر ڊاڪٽر عشرت العباد استعيفيٰ ڏيڻ تي غور ڪري رهيو آهي، هو استعيفيٰ بابت لاڳيتو وفاقي حڪومت سان رابطي ۾ آهي. ٻئي پاسي سينيئر صحافي ادريس بختيار سان ڳالهائيندي سنڌ جي گورنر جو چوڻ هو ته هُن استعيفيٰ ڏيڻ جو ڪوبه فيصلو ناهي ڪيو. نجي ٽي وي سان ڳالهائيندي سنڌ جي گورنر ڊاڪٽر عشرت العباد چيو ته استعيفائن جي افواهن ۾ ڪا به صداقت ناهي، عهدو نه پيو ڇڏيا، استعيفيٰ جو سوال پئدا نه ٿو ٿئي.

 

ايم ڪيو ايم تي دهشتگردي جي ڇاپ لڳي وئي، الطاف حسين کي سوچڻو پوندو: پرويز مشرف

ڪراچي (مانيٽرنگ ڊيسڪ) اڳوڻي صدر ۽ آرمي چيف پرويز مشرف چيو آهي ته ايم ڪيو ايم تي دهشتگردي جي ڇاپ لڳي وئي، کين گهڻو سمجهايو، پر هاڻي الطاف حسين کي سوچڻو پوندو. هڪ خابرو ادري کي ڏنل هڪ انٽرويو ۾ اڳوڻي آمر پرويز مشرف چيو ته مارشل لا ڪنهن به مسئلي جو حل ناهي پر حڪومت جي تبديلي  ضروري آهي. هن چيو ته ڪنهن به سياسي جماعت وٽ هٿيار نه هجڻ گهرجن،  ايم ڪيو ايم تي دهشتگردي پکيڙڻ وارو  تاثر  سموري ملڪ ۾ سگهارو بڻجي چڪو آهي . هڪ سوال جي جواب ۾ اڳوڻي آمر پرويز مشر ف جو چوڻ هو ته  ملڪ  کي ڪير بهتر نموني هلائڻ لاءِ اڳتي اچي ته هو مدد ڪرڻ لاءِ تيار آهي، بينظير ڀٽو ۽ آصف زرداري سميت ڪيترن کي رعايت ڏيڻ سندس وڏي غلطي هئي. اوهان ايم ڪيو ايم جي سياست ۾ ڪو ڪردار ادا ڪرڻ چاهيو ٿا؟ واري سوال جي جواب ۾  پرويز مشرف  چيو ته هو هن فوج ۾ رهي ڪري  قيادت ۽ انتظامي معاملن جي سنڀالڻ ڪرڻ سکيو آهي، پر ايم ڪيو ايم واري معاملي تي کيس مسئلا نظر اچي رهيا آهن، مان ڪنهن هڪ علائقي جي نه پر سموري ملڪ جي ڳالهه ڪيان ٿو. هڪ  سوال جي جواب ۾ مشرف چيو ته مارشل لا ڪنهن به مسئلي جو حل ناهي، پر حڪومت جي تبديلي ضروري آهي، جيڪڏهن حڪومت تبديل نه ٿي ۽ دهشتگردي ٿيندي رهي ته ملڪ جي صورتحال شام ۽ عراق جهڙي ٿي ويندي. هن چيو ته آئين موجوده مسئلن جو حل نه ڏئي رهيو آهي، ان ڪري سپريم ڪورٽ کي ڪردار ادا ڪرڻ گهرجي، هر ڪو چئي رهيو آهي ته گذريل اليڪشن ۾ ڌانڌلي ٿي، اليڪشن ڪميشن به تسليم ڪيو آهي، ان ڪري سپريم ڪورٽ داخل درخواستن تي 2013 جي چونڊن کي ڪالعدم قرار ڏئي حڪومت کي ختم ڪري ۽ عبوري حڪومت قائم ڪري. پرويز مشرف چيو ته  پ پ ۽ مسلم ليگ ن چار چار ڀيرا حڪومتون ڪري چڪيون آهن جنهن ڪري ملڪ جو ٻيڙو غرق ٿي ويو، هاڻي نئين فورس جي ضرورت آهي. هڪ سوال جي جواب هن چيو ته پاڪستان  ۽ ڀارت ۾ پاڻي ۽ ڪشمير معاملي تي جنگ ٿي سگهي ٿي.

 

ڪراچي جا شهري ۽ تاجر ڪنهن به ڏوهاري تنظيم کي ڀتو يا چندو نه ڏين: ڊي جي رينجرز

ڪراچي(اسٽاف رپورٽر) ڊي جي رينجرز سنڌ ميجر جنرل بلال اڪبر چيو آهي ته شهري ۽ تاجر برادري ڪنهن به ڏوهاري تنظيم کي ڀتو يا چندو نه ڏين ۽ ڀتي جي پرچي ملڻ تي وفري رينجرز کي اطلاع ڪن، ڊي جي رينجرز طرفان جاري بيان ۾ چيو ويو آهي ته ڏوهاري ماڻهو ڀتي ۽ چند جي رقم سان ڪراچي ۾ امن خراب ڪن ٿا، ان سان هٿيار ۽ دهشتگردي جو ٻيو سامان خريد ڪن ٿا  ۽ مختلف علائقن ۾ پنهنجن ٺڪاڻا ٺاهن ٿا ان لاءِ شهري، تاجر ۽صنعتڪار ڪنهن به ڏوهاري تنظيم کي ڀتو، چندو، زڪوات ۽ عطيو نه ڏين ۽ انهن کي ڀتي جي پرچي ملي ته رينجرز جي هيلپ لائن 1011 تي فوري اطلاع ڏين ڊي جي رينجرز سنڌ جو چوڻ هو ته ان حوالي سان اطلاع ڏيڻ واري جو نالو صيغه راز ۾ رکيو ويندو.

 

تحريڪ انصاف پاران گورنر سنڌ ڊاڪٽر عشرت العباد کي هٽائڻ جو مطالبو

اسلام آباد (بيورو) تحريڪ انصاف جي صولت مرزا جي بيان کانپوءِ گورنر سنڌ ڊاڪٽر عشرت العباد کي عهدي تان فوري هٽائڻ جو مطالبو ڪيو آهي پي ٽي آءِ ترجمان شيرين مزاري مطالبو ڪيو آهي ته موت جي سزا ٻڌايل ايم ڪيو ايم جي ڪارڪن صولت مرزا جي بيان کانپوءِ گورنر سنڌ ڊاڪٽر عشرت العباد جو عهدي تي رهڻ جو ڪوبه جواز نه ٿو ٺهي ان کي فوري وطر  تي عهدي تان هٽائي جاچ ۾ شامل ڪيو وڃي شيرين مزاري طرفان جاري بيان ۾ مطالبو ڪيو ويو آهي ته صولت مرزا جي بيان جي جاچ جلد مڪمل ڪري عوام سامهون رکي وڃي ۽ گورنر جي عهدي کي غير جانبدار جاچ جي راهه رڪاوٽ نه بڻجڻ ڏنو وڃي.

 

ڪترينه ڪيف ”فتور” ۾ پاڪستاني جو ڪردار نڀائيندي

ممبئي(شوبز نيوز) بالي ووڊ اداڪاره ڪترينه ڪيف فلم ۾ هڪ ڀيرو ٻيهر پاڪستاني هئڻ جو ڪردار نڀائيندي. ڀارت جي سڌ سماءَ وارن ذريعن مطابق ڪترينه ايندڙ فلم ”فتور” ۾ هڪ ڀيرو ٻيهر پاڪستاني بڻجندي. فلم ۾ سندس هيرو اديتيه راءِ ڪپور هوندو. فلم جي ڪهاڻي نامياري اديب چارلس ڊڪنز جي ناول” گريٽ ايڪسپيٽيشنز” مان ورتل آهي. فلم ۾ ٽن ڪردارن جي ناتن تي ڪهاڻي اڳتي وڏي ٿي جيڪا هڪ ڪشميري نوجوان نور( اديتيه)، فردوس (ڪترينه) ۽ بيگم (ريکا) تي ٻڌل آهي. فلم جي شوٽنگ تيزي سان جاري آهي. ڪشمير ۾ شوٽنگ مڪمل ڪئي وئي آهي ۽ هاڻي نئين دهلي ۾ شوٽنگ جاري آهي. فلم ”فتور” فيبروري 2016ع ۾ رليز ڪئي ويندي. ان ۾ لارادته ۽ اجي ديوگن مهمان اداڪار طور نظر ايندا.

 

ليجنڊ اداڪار محمدعلي جي نائين ورسي خميس 19 مارچ تي ملهائي وئي

لاهور(شوبز نيوز) پاڪستان فلم انڊسٽري جي ليجنڊ اداڪار محمدعلي جي نائين ورسي خميس 19 مارچ تي ملهائي وئي. جاري ٿيل پريس پڌرائيءَ مطابق محمدعلي جي بيوه مشهوراداڪاره زيبا پنهنجي گهر تي قرآن خاني جو اهتمام ڪيو. محمدعلي پنهنجي ڪيريئر جي شروعات ريڊيو پاڪستان حيدرآباد کان ڪئي جنهن بعد هن اداڪار طور فلم انڊسٽريءَ ۾ پير پاتو. سندس پهرين فلم ”چراغ جلتا رها“ هئي جيڪا 1962ع ۾ رليز ٿي. محمدعلي کي شاندار فلمي خدمتن عيوضن ”تمغه امتياز“ ۽ ”پرائيڊ آف پرفارمنس“ سان نوازيو ويو هو. محمدعلي جي مشهور فلمن ۾ ڪنيز، آئينه، آگ ڪا دريا، جاگ اٿا انسا، ڀروسا، ملن، شمع، جب جب ڦول کلي، زنجير، بوبي ۽ محبت هو تو ايسي شامل آهن.

 

اداڪاره نڪول ڪڊمين برانڊ ايمبيسڊر مقرر

ابوظهبي (شوبز نيوز) قطر جي هوائي ڪمپني اتحاد ايئر ويز اداڪاره نڪول ڪڊمين کي پنهنجو برانڊ ايمبيسڊر مقرر ڪري ڇڏيو.ذريعن موجب اتحاد ايئر ويز نڪول ڪڊمين کي پنهنجو گلوبل برانڊ ايمبيسڊر مقرر ڪيو آهي. اهڙي طرح هو اتحادي ايئر ويز جي اشتهاري مهم جو پڻ حصو بڻجندي. آسڪر ايوارڊ ماڻيل نڪول ڪڊمين اتحاد ايئر ويز جي اشتهارن ۾ ڪم ڪرڻ کانسواءِ هوائي ڪمپني جي ترجمان پڻ هوندي

 

اهڙيون فلمون پسند ناهن جيڪي سلمان خان ۽ شاهه رخ خان ڪندا آهن:عامر خان

ممبئي (شوبز نيوز) بالي ووڊ جي مسٽر پرفيڪٽ عامر خان چيو آهي ته کيس اهڙيون فلمون پسند ناهن جيڪي سلمان خان ۽ شاهه رخ خان ڪندا آهن، تازي انٽرويوءَ دوران سندس چوڻ هو ته هن پنهنجي ڪيريئر ۾ ڪيترن ئي سٺن ڊائريڪٽرن، رائيٽرن سان گڏ ڪم ڪيو آهي ۽ کيس ان ڳالهه جي تمام گھڻي خوشي آهي، هن چيو ته سينسر بورڊ جو ان شيءِ تي ڌيان رکڻ گھرجي ته ماڻهن کي ڇا پسند ۽ ڇا ناپسد آهي، ڪنهن به شيءِ کي سينسر نه ڪرڻ گھرجي، پر ان کي بهتر بڻائڻ گھرجي. هڪ سوال جي جواب ۾ هن چيو ته هر ڪو ان ڳالهه لاءِ آزاد آهي ته هو کلي پنهنجي راءِ جو اظهار ڪري ۽ جيڪڏهن بي جي پي جي ڪنهن اڳواڻ منهنجي فلم تي تنقيد ڪئي آهي ته اهو سندس حق آهي، هڪ ٻئي سوال جي جواب ۾ هن جو چوڻ هو ته جنهن قسم جون فلمون سلمان ۽ شاهه رخ ڪندا آهن، اهي ڪافي ماڻهن کي گھڻيون پسند اينديون آهن ۽ هو ڪافي ڪامياب به رهيون آهن، پر مون کي اهي فلمون بلڪل پسند ناهن، ان ڪري اهڙين فلمن ۾ ڪم نه ٿو ڪرڻ چاهيان، هن مسڪرائيندي چيو ته جڏهن سلمان خان کي ڊانس تي پنهنجي باڊي لوڏيندي ڏسندو آهيان ته مان سوچيندو آهيان ته ڇا مان ايئن ڪري سگھان ٿو ته منهنجي اندران آواز ايندو آهي ته نه اهو مون کا نه ٿيندو.

 

ڪينگروز کي هارائڻ لاءِ رانديگرن کي ٽنهي شعبن ۾ 100 سيڪڙو ڪارڪردگي ڏيکارڻي پوندي : مصباح الحق

ايڊيليڊ(اسپورٽس نيوز) پاڪستاني ٽيم جي ڪپتان ۽ سينيئر بيٽسمين مصباح الحق چيو آهي ته ٽيم با صلاحيت ۽ تجربيڪار رانديگرن تي ٻڌل آهي، ڪوارٽر فائنل ۾ ڪينگروز کي هارائڻ لاءِ رانديگرن کي راند جي ٽنهي شعبن ۾ 100 سيڪڙو ڪارڪردگي ڏيکارڻي پوندي. هن چيو ته ورلڊ ڪپ ۾ بهترين فارم ۽ شاندار ڪارڪردگي باوجود ون ڊي ڪرڪيٽ تان ريٽائرمنٽ جو فيصلو حتمي آهي جيڪو تبديل نه ٿيندو پر جيستائين فٽ آهيان ٽيسٽ ٽيم جي قيادت جاري رکندس.هن چيو ته ريٽائرمنٽ جو فيصلو سوچي سمجهي ڪيو اٿم، پاڪستان ڪرڪيٽ بورڊ کي گهرجي ته اهو ڪنهن نوجوان رانديگر کي ٽيم جي قيادت سونپي.

 

آفريديءَ کي ڪينگروز خلاف گڏيل ون ڊي ميچن ۾ 50 وڪيٽون گهربل لاءِ هڪ وڪيٽ گهربل

ايڊيليڊ(اسپورٽس نيوز) پاڪستان ٽيم جي بوم بوم آل رائونڊر شاهد خان آفريديءَ کي ڪينگروزخلاف گڏيل ميچن ۾ وڪيٽن جي ففٽي مڪمل ڪرڻ لاءِ وڌيڪ هڪ وڪيٽ گهربل آهي.