تازيون خبرون

Daily Archives: March 20, 2015

ڪراچي ۾ ڏوهارين خلاف ڪارروائي سڀني جي مفاد ۾ آهي : وزيراعظم

اسلام آباد (بيورو) وزيراعظم نواز شريف سان هوائي فوج جي نئين سربراهه ايئرچيف مارشل سهيل امان ۽ فيصل آباد ڊويزن سان واسطو رکندڙ ن ليگ اڳواڻن ملاقات ڪئي آهي، وزيراعظم چيو آهي ته ڪراچي ۾ آپريشن سڀني جي مشاورت سان شروع ڪيو ويو آهي، جنهن بعد صورتحال ۾ بهتري اچي رهي آهي، ڪنهن وٽ به غير قانوني طور هٿيار رکڻ جو جواز ناهي. اسلام آباد ۾ وزيراعظم نواز شريف سان فيصل آباد ڊويزن سان واسطو رکندڙ مسلم ليگ ن جي اڳواڻن ملاقات ڪئي. ملاقات دوران صوبي جي ترقياتي منصوبن،  ملڪ جي سياسي صورتحال سميت مختلف معاملن تي ڳالهيون ڪيون ويون. ان موقعي تي ڳالهائيندي وزيراعظم نواز شريف چيو ته ملڪ هن وقت ڪيترن ئي چيلينجز کي منهن ڏئي رهيو آهي، حڪومت جي قدمن سبب ملڪ جي معاشي صورتحال بهتر ٿي رهي آهي. وزيراعظم چيو ته ڪراچي ۾ ڏوهارين خلاف آپريشن   قومي مفاد ۾ آهي، آپريشن کانپوءِ شهر جون حالتون بهتر ٿيون آهن ۽ قتل، ڀنگ لاءِ اغوا ۽ ٻين ڏوهن جي وارداتن ۾ گهٽتائي آئي آهي. هن چيو ته ڪنهن کي به غيرقانوني هٿيار رکڻ جو جواز ناهي، حڪومت کي ملڪ جي معاشي مرڪز ڪراچي  ۾ امن ۽ استحڪام قائم ڪرڻو آهي. وزيراعظم چيو ته سالن جي خرابي فوري طور ختم نٿي ڪري سگهجي، ان لاءِ وقت لڳي سگهي ٿو، ڪراچي ۾ ڏوهارين خلاف ڪارروائي سڀني جي مفاد ۾ آهي. ان کان اڳ وزيراعظم نواز شريف سان هوائي فوج جي نئين سربراهه ايئرچيف مارشل سهيل امان به ملاقات ڪئي. وزيراعظم نواز شريف، سهيل امان کي عهدو سنڀالڻ تي واڌايون چيو ته کيس اميد آهي ته سهيل امان پنهنجي تجربي ذريعي وڌيڪ بهتر ڪردار ادا ڪندو.

 

سنڌ حڪومت ڪڏهن به ڏوهارين جي سهولتڪار ناهي رهي، گورنر راڄ جوڪو امڪان ناهي: شرجيل ميمڻ

ڪراچي (اسٽاف رپورٽر) اطلاعات ۽ بلديات واري وزير شرجيل انعام ميمڻ چيو آهي ته اسان هن صوبي کي صاف سرسبز ۽ پرامن بڻائڻ جي ڪوششن ۾ مصروف آهيون ته جيئن هي شهر ۽ صوبو هڪ ڀيرو ٻيهر روشنين سان روشن ٿئي ۽ هتان جي معيشيت کي پروان چڙهڻ جو موقعو ملي سگهي. وزيراعليٰ سنڌ کان ڪراچي جي رستن جي مرمت ۽ هتي اسٽريٽ لائٽن سميت ٻين مسئلن جي حل لاءِ خاص گرانٽ جي اپيل ڪئي هئي، جنهن کي هن منظور ڪري ورتو آهي جڏهن ته شهر ۾ ترقياتي ڪمن جو ڄار تيزي سان پکيڙڻ لاءِ سنڌ حڪومت ۽ بلديات کاتو ڏينهن رات ڪوشان آهن. سنڌ حڪومت ڪنهن به دور ۾ ڏوهارين کي ڪنهن قسم جي  سهولت فراهم ناهي ڪئي. اسانجي اڳوڻي پنج سالا دور ۾ جڏهن ايم ڪيو ايم اسان جي اتحادي جماعت هئي ان وقت به اجمل پهاڙي، ڪامران ماڌوري سميت هزارين ڏوهارين کي پڪڙيو ويو هو. سنڌ ۾ گورنر راڄ جي خبرن ۾ ڪابه صداقت نه آهي. آئون نٿو سمجهان ته جڏهن سولين ۽ ملٽري قيادت هڪ پچ تي هجن ته هن ملڪ مان دهشتگردي جو خاتمو ٿئي ۽ اهڙي طرح جي اپائن جو سوال ئي پيدا نٿو ٿئي. ايم ڪيو ايم جي سياسي قيادت سان ڳالهين جو سلسلو اڳ به جاري هو ۽ هاڻ به رهندو ۽ ايم ڪيو ايم جي حڪومت ۾ شموليت جي حوالي سان فيصلو پارٽي جي اعليٰ قيادت کي ڪرڻو آهي. اهڙن خيالن جو اظهار هن ڪورنگي ۾ ڪاٽي پاران صاف سرسبز سنڌ، پرامن سنڌ مهم تحت وڻڪاري ۽ صفائي مهم ۾ حصو وٺڻ ۽ بعد ۾ ڪاٽي جي مرڪزي آفيس ۾ انهن جي عهديدارن سان ملاقات کانپوءِ ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ايڊمنسٽريٽر ڪراچي ثاقب سومرو، ايم ڊي واٽر بورڊ قطب الدين شيخ، ڪاٽي جي صدر راشد احمد صديقي، اڳوڻي صدر زبير ڇايا، گلزار فيروز، فرخ مظهر، ميٽروپوليٽن ڪمشنر ڪراچي مسعود عالم، ڊي سي ڪورنگي آصف ڄام صديقي، ڊائريڪٽر لوڪل گورنمينٽ روبينه آصف، ايڊمنسٽريٽر ڪورنگي محمد راشد، ايم سي مسرور ميمڻ سميت ٻين اعليٰ آفيسرن ۽ صنعتڪارن جي وڏي تعداد ساڻس گڏ موجود هئي. صوبائي وزير ڪاٽي ٻاهران مين گيٽ تي رستي تي گرين بيلٽ تي وڻڪاري مهم تحت ٻوٽو لڳائي رستي تي ٻوهارو ڏئي مهم ۾ حصو ورتو. ان موقعي تي ميڊيا سان ڳالهائيندي هن چيو ته هن مهم جو مقصد هن شهر ۽ صوبي کي گندگي کان پاڪ ڪري صاف ۽ سٿرو ۽ روشنين جو شهر بڻائڻ آهي. هن چيو ته ڪورنگي جي صنتعڪارن جو ڄام صادق علي پل جي حوالي سان ڪافي سالن کان ان جي مرمت جي حوالي سان جيڪو مطالبو هو ان کي پورو ڪندي ان تي ڪم جي شروعات ڪئي وئي آهي ۽ اهو ڪم ڏينهن رات جاري آهي ۽ انشاءَ الله ايندڙ ٽن مهينن اندر اندر ان پل جي ٻنهي ٽريڪس کي مڪمل ڪيو ويندو. هن چيو ته گذريل ڏينهن به اسان ڪراچي جي شهرين کي ٽريفڪ جي عذاب کان ڇوٽڪارو ڏيارڻ جي حوالي سان مادر جمهوريت محترمه نصرت ڀٽو انڊر پاس جو سنگ بنياد رکيو آهي ۽ اهو انڊر پاس به چار مهينن اندر اندر مڪمل ڪرايو ويندو. هن چيو ته ڪراچي جا سمورا اهي رستا جيڪي ٽٽي چڪا آهن يا جن رستن تي مرمت جي ضرورت آهي ان لاءِ وڏي وزير سيد قائم شاهه کان خصوصي درخواست ڪئي هئي، جنهن کي هن منظور ڪري ورتو آهي ۽ جلد ئي پوري شهر جا سمورا اهي رستا جيڪي ٽٽل آهن يا انهن تي استرڪاري جي ضرورت آهي ان تي ڪم جي شروعات ڪرايو ويندو ۽ پوري شهر ۾ خراب اسٽريٽ لائٽس کي نيئن سر لڳائڻ جو ڪم به ايندڙ هفتي کان شروع ڪرايو ويندو. هن چيو ته اسان هن شهر کي اوون ڪريون ٿا ۽ هن شهر ۽ صوبي کي مثالي صوبو بنائڻ جو عزم ڪيو آهي ۽ هتان جي عوام کي وسيلا سندن گهر جي چانئٺ تائين پهچائڻ جو واعدو ڪيو آهي، ان کي ضرور پورو ڪنداسين. هڪ سوال جي جواب ۾ شرجيل انعام ميمڻ چيو ته گذريل ڏينهن صولت مرزا جو اعترافي بيان سنسني خيز، حيران ڪندڙ ۽ المناڪ آهي. هن چيو ته ان بيان تي آئون سنڌ حڪومت پاران اها ڳالهه واضح ڪرڻ چاهيان ٿو ته صولت مرزا سميت ڪنهن به ڏوهاري کي سنڌ حڪومت پاران ڪڏهن سهولت ناهي ڏني وئي، بلڪ اسان جي اڳوڻي 5 سالا دور ۽ هلندڙ عرصي ۾ هڪ ٻه نه پر هزارين دهشتگردن، ٽارگيٽ ڪلرز ۽ ڀتاخورن کي گرفتار ڪري سلاخن پويان موڪليو ويو آهي. هن چيو ته جيلن ۾ انهن ڏوهارين کي جيل جي ننڍي اسٽاف پاران موبائيل فون، ليپ ٽاپ سميت ٻيون سهولتن جي اطلاع تي ڪافي ڀيرا پوليس ۽ رينجرز پاران ڇاپا هنيا ويا ۽ ان کانپوءِ پي پي پي جي دور حڪومت ۾ صولت مرزا ۽ ٻين خطرناڪ جوابدارن کي مڇ ۽ سکر جيلن ۾ منتقل ڪيو ويو. هن چيو ته پيپلز پارٽي جي دور حڪومت ۾ انهن ڏوهارين جي جيل کان ٻاهر جي نيٽ ورڪ کي ٽوڙڻ لاءِ جيل ۾ جيمرز لڳايا ويا. هن چيو ته مون سمورا مثال دليلن سان گڏ پيش ڪري ڇڏيا آهن ته اسان ڪنهن کي ڪابه سهولت فراهم ناهي ڪئي. سنڌ ۾ گورنر راڄ جي سوال تي هن چيو آئون نٿو سمجهان ته هتي گورنر راڄ لڳندو. هن چيو ته هن وقت وفاقي ۽ صوبائي حڪومت، سول ۽ ملٽري قيادت ۽ سموريون قوتون هڪ پچ تي آهن ته هن صوبي ۽ ملڪ مان دهشتگردي جو خاتمو ٿئي. هڪ ٻي سوال جي جواب ۾ شرجيل انعام ميمڻ چيو ته پي پي هن صوبي ۽ ملڪ مان ڏوهه ۽ ڏوهارين جي خاتمي لاءِ ڪوشان آهي ۽ اهو ئي سبب آهي ته صوبي ۾ جاري ٽارگيٽڊ آپريشن ۾ پوليس ۽ رينجرز کي وزيراعليٰ سنڌ پاران مڪمل فري هينڊ ڏنو ويو آهي. هڪ ٻي سوال جي جواب ۾ صوبائي وزير چيو ته ڪي اليڪٽرڪ سميت سنڌ ۾ واپڊا ۽ حيسڪو پاران زيادتين جو سلسلو وڌي رهيو آهي ۽ سنڌ جي ٻهراڙي وارن علائقن ۾ 16 ڪلاڪن تائين غيراعلانيل لوڊشيڊنگ ڪئي پئي وڃي. هن چيو ته ڪي اليڪٽرڪ، واپڊا ۽ حيسڪو کي خبردار ڪيان ٿو ته هو سنڌ صوبي سان ماٽيلي ماءُ وارو سلوڪ بند ڪن ٻي صورت ۾ شديد عوامي احتجاج ڪنداسين. صوبائي وزير ڪاٽي جي مرڪزي آفيس ۾ عهديدارن سان ملاقات ڪئي. ان موقعي تي ڪورنگي انڊسٽريل ايريا ۾ پيش ايندڙ مسئلن تي ڪاٽي جي صدر ۽ ٻين عهديدارن ڌيان ڏياريو ۽ علائقي ۾ صفائي سٿرائي ۽ پاڻي جي فراهمي سميت ٻين مسئلن جي نشاندهي ڪئي. صوبائي وزير ان موقعي تي موجود ايڊمنسٽريٽر ڪراچي، ايم ڊي واٽر بورڊ ۽ لاڳاپيل ڊسٽرڪٽ آفيسرن کي فوري طور تي سمورين شڪايتن جي ازالي جي هدايت ڪئي ۽ ان جي رپورٽ ٽن ڏينهن ۾ پيش ڪرڻ جا حڪم ڏنا. هن ڪاٽي جي صنعتڪارن جي مطالبي تي اتي سول واٽر هائيڊرينٽ ڪاٽي جي زير انتظام کولڻ جو به اعلان ڪيو ۽ ان سلسلي ۾ ايم ڊي واٽر بورڊ کي ايندڙ ٻن ڏينهن ۾ رپورٽ پيش ڪرڻ جي هدايت ڪئي. ان موقعي تي ڪاٽي جي عهديدارن پاران ضلعي ايسٽ پاران ملير ندي ۾ ڪچرو اڇلائڻ جي شڪايت تي هن ڪاوڙ جو اظهار ڪندي فوري طور تي ضلعي ايسٽ جي ميونسپل ڪمشنر منظور عباسي کي معطل ڪرڻ جا به حڪم جاري ڪيا. صوبائي وزير ڪاٽي جي صدر ۽ ٻين عهديدارن پاران گلدستا ۽ سووينئر پيش ڪيا ويا.

 

عمران فاروق جي قاتلن کي سزا ڏيارڻ اسان جي بنيادي ذميواري آهي: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته بلوچستان حڪومت جي درخواست تي طبي بنيادن جي ڪري صولت مرزا ۽ عمر واري مسئلي تان شفقت حسين جي ڦاسي کي روڪيو ويو آهي، جڏهن ته برطانوي هاءِ ڪمشنر کي الطاف حسين جي انهن بيانن بابت آگاهي ڏني وئي آهي، جن ۾ هن فوج ۽ سڪيورٽي فورسز جي باري ۾ ڳالهايو آهي. قومي اسيمبلي جي اجلاس ۾ ڳالهائيندي گهرو وزير چوڌري نثار علي خان چيو ته عمران فاروق جي قاتلن کي سزا ڏيارڻ اسان جي بنيادي ذميواري آهي. هن ايوان کي ٻڌايو ته صولت مرزا جي ڦاسي کي بلوچستان حڪومت جي درخواست تي طبي بنيادن جي ڪري 72 ڪلاڪن لاءِ ملتوي ڪيو ويو آهي، جڏهن ته شفقت حسين جي ڦاسي کي روڪڻ جو سبب ان جي عمر جي حوالي سان سامهون ايندڙ مسئلا هئا. هن چيو ته برطانوي هاءِ ڪمشنر سان ملاقات دوران هن الطاف حسين جي فوج ۽ سڪيورٽي ادارن خلاف ڏنل بيانن بابت کيس آگاهه ڪيو آهي.

 

وزيراعظم سان آرمي چيف جي ملاقات، ڪراچي آپريشن ۽ تازا ترين صورتحال تي غور

اسلام آباد (بيورو) آرمي چيف جنرل راحيل شريف وزيراعظم نواز شريف سان ملاقات ڪئي آهي جنهن ۾ دهشتگردن خلاف آپريشن ضرب عضب ۽ ڪراچي ۾ امن لاءِ کنيل قدمن تي خيالن جي ڏي وٺ ڪئي وزيراعظم هائوس ۾ آرمي چيف جنرل راحيل شريف وزيراعظم نواز شريف سان ملاقات ڪئي، ان موقعي  تي ناڻي وارو وفاقي وزير اسحاق ڊار به موجود هو، ملاقات  دوران ملڪ ۾ امن امان جي صورتحال، آپريشن ضرب عضب ۾ ٿيندڙ اڳڀرائي ۽ ڏکڻ وزيرستان جي آءِ ڊي پيز جي اباڻن علائقن ۾ واپسي سميت ٻين معاملن تي تفصيلي خيالن جي ڏي وٺ ڪئي، وزيراعظم ۽ آرمي چيف وچ ۾ ملاقات ۾ ڪراچي ۾ امن قائم ڪرڻ لاءِ ڏوهاري ماڻهن خلاف آپريشن ۽ ان جي اثرن تي به تفصيلي غور ڪيو ويو.

 

وفاقي حڪومت پاران سنڌ ۾ گورنر راڄ تي مشاورت، ممتاز ڀٽو اسلام آباد طلب

ڪراچي (اسٽاف رپورٽر) وفاقي حڪومت پاران سنڌ ۾ گورنر راڄ لاڳو ڪرڻ تي مشاورت جو سلسلو شروع ٿي ويو آهي. وفاقي حڪومت پاران سنڌ ۾ 3 مهينن لاءِ گورنر راڄ لاڳو ڪرڻ لاءِ مشاورت ڪئي پئي وڃي. ذريعن موجب وفاقي حڪومت پاران سنڌ ۾ گورنر راڄ لاڳو ڪرڻ لاءِ سردار ممتاز علي ڀٽو کي اسلام آباد طلب ڪيو ويو آهي، ممتاز ڀٽو سان سنڌ ۾ گورنر راڄ لاڳو ڪرڻ بابت صلاح مشورا ڪيا ويندا. ذريعن ۾ موجب سنڌ ۾ نئين گورنر 3 ريٽائرڊ فوجين جا نالا به غور هيٺ آهن.

 

سراج الحق جي ڪراچي ايئرپورٽ تي سنڌ جي وڏي وزير سان ملاقات، امن امان جي صورتحال تي ڳالهيون

ڪراچي (اسٽاف رپورٽر) جماعت اسلامي پاڪستان جي امير سينيٽر سراج الحق جي ڪراچي ايئرپورٽ تي سنڌ جي وزيراعلي قائم علي شاه سان ملاقات ٻنهي اڳواڻن جي سنڌ حڪومت جي صورتحال تي ڳالهه ٻول خصوصا ڪراچي ۾ امن وامان ۽ دهشت گردي کان ڇوٽڪارو حاصل ڪرڻ لاءِ رينجرز جي ڪارواين تي ڳالهين جي ڏي وٽ . ان موقعي تي جماعت اسلامي جي امير سراج الحق چيوته ڪراچي پاڪستان جي اقتصادي شه رگ آهي جيستائين ڪراچي جا حالات ٺيڪ نه ٿيندا ملڪ جي معيشت ٺيڪ نه ٿيندي ملڪ جي ترقي لاءِ ڪراچي جو امن ضروري آهي. ان چيو ته ڪراچي سميت ملڪ ملڪ مان دهشت گردي جي خاتمي لاءِ سڀئي جماعتون متفق آهن. سراج الحق ان ڳالهه تي زور ڏنو ته ڪراچي آپريشن تي ڪنهن ماڻهو يا جماعت کي اعتراض جو موقعو نه ملڻ گهرجي.  سنڌ جي وزيرقائم علي شاه سراج الحق کي وزيراعلي  اچڻ جي دعوت ڏني.

 

صولت مرزا جا سنگين الزام ۽ ڇرڪائيندڙ انڪشاف، ڦاهي 72 ڪلاڪن لاءِ ملتوي

ڪراچي(اسٽاف رپورٽر) صولت مرزا جي سنگين الزامن ۽ ڇرڪائيندڙ انڪشافن کانپوءِ گهرو وزارت جي درخواست تي سندس ڦاهي تي عمل 72 ڪلاڪن لاءِ ملتوي ڪيو ويو آهي. مچ جيل ۾ ڦاهي کان ڪجهه ڪلاڪ اڳ صولت /مرزا جي ڇرڪائيندڙ انڪشافن تي ٻڌل وڊيو بيان جاري ٿيڻ کانپوءِ گهرو وزارت سندس ڦاهي روڪرائڻ لاءِ صدر کي سمري موڪلي. صدر پاران فوري طور تي سمري تي صحيح ڪرڻ کانپوءِ صولت مرزا جي ڦاهي تي عمل 72 ڪلاڪن لاءِ ملتوي ڪيو ويو. صولت مرزا جي ڦاهي تي عمل ملتوي ڪرڻ جو حڪم نامو رات ئي مچ جيل انتظاميه کي ملي ويو. جيل انتظاميه جو چوڻ آهي ته 3 ڏينهن جي مهلت ختم ٿيڻ بعد آچر ۽ يوم پاڪستان جي موڪل آهي، ان ڪري صولت کي 24 مارچ تائين ڦاهي نٿي ڏئي سگهجي….

 

صولت مرزا جو بيان ايم ڪيو ايم خلاف سازشي منصوبي جو حصو آهي: الطاف حسين

لنڊن (م.ڊ) ايم ڪيو ايم جي سربراهه الطاف حسين صولت مرزا پاران ڏنل بيان جي سختي سان ترديد ڪندي چيو آهي ته اهڙا بيان ايم ڪيو ايم خلاف سازشي منصوبي جو حصو آهي.  صولت مرزا جي بيان تي ردعمل جو اظهار ڪندي الطاف حسين چيو ته صولت مرزا جيڪو ڪجهه چيو اُهو سڀ ڪوڙ آهي، مان ساڻس ڪڏهن به ناهيان مليو جڏهن ته اُهو پهريون موقعي آهي جڏهن ڪنهن سزا ماڻيندڙ قيدي جي ويڊيو جاري ڪئي وئي آهي. هن چيو ته اُهو سڀ هڪ منصوبي تحت ٿي رهيو آهي اهڙو بيان ايم ڪيو ايم خلاف سازشي منصوبي جو حصو آهي ۽ اُن کي سڄي دنيا ۾ بدنام ڪرڻ جي سازش آهي. ايم ڪيو ايم جي سربراهه جو چوڻ هو ته مان ڪڏهن به ڪنهن قسم جي ٽرائيل کان نٿو گهٻرايا جڏهن ته پاڪستان اچڻ جو فيصلو قانوني ۽ آئيني ماهر ڪندا.

 

ائيرچيف مارشل سهيل امان باضابطه هوائي فوج جي سربراهه جي ڪمان سنڀالي ورتي

اسلام آباد (بيورو)  ايئر چيف مارشل سهيل امان باضابطه هوائي فوج جي نئين سربراهه جي ڪمان سنڀالي ورتي آهي، رٽائرڊ ٿيل ايئر چيف مارشل طاهر رفيق بٽ ڪمان سندس حوالي ڪئي. ايئر هيڊڪوارٽر اسلام آباد ۾ هوائي فوج جي  سربراهه جي ڪمان جي تبديلي واري تقريب ٿي، جنهن دوران رٽائرڊ ٿيل هوائي فوج جي سربراهه طاهر رفيق بٽ کي گارڊ آف آنر ڏنو ويو. طاهر رفيق بٽ نئين ايئرچيف مارشل کي بيچ لڳائڻ بعد هوائي فوج جي سربراهه جي ڪمان سهيل امان حوالي ڪئي. ان موقعي تي تقريب کي خطاب ڪندي طاهر رفيق بٽ چيو ته 3 سال سندس لاءِ چيلينجز وارا هئا پر ساٿين جي رهنمائي کانسواءِ خدمتون انجام ڏيڻ ممڪن نه هو،حدف حاص ڪرڻ لاءِ حڪومتي سهڪار جو به هو ٿورائتو آهي. طاهر رفيق بٽ چيو ته ملڪ جو سڀ کان وڏو مسئلو سڪيورٽي آهي، جنهن کي بهتر ڪرڻ لاءِ قدم کنيا ويا آهن، ملڪ جو دفاع هوائي فوج جي اولين ترجيح آهي. طاهر رفيق بٽ جو چوڻ هو ته دهشتگردي خلاف جنگ ۾ هوائي فوج جو ڪردار انتهائي اهم آهي، آپريشن ضرب عضب ۾ به هوائي فوج پاڻ مڃرايو آهي. هن چيو ته پاڪ فوج منتظم ادارو آهي، ٻاهرين للڪارن کي منهن ڏيڻ جي ڀرپور صلاحيت رکون ٿا. طاهر رفيق بٽ اهو به چيو ته هوائي فوج کي جديد ٽيڪنالوجي سان ليس ڪيو پيو وڃي.

 

ايم ڪيو ايم اڳواڻن جا نالا اي سي ايل ۾ شامل ڪرڻ جو فيصلو، گهرو وزارت ترديد ڪري ڇڏي

اسلام آباد (بيورو) ذريعن جي دعويٰ آهي ته صولت مرزا جي الزامن کانپوءِ وفاقي گهرو وزارت، ايم ڪيو ايم  رابطا ڪميٽي جي  حيدرعباس رضوي، بابر غوري، عامر خان، خالد مقبول صديقي، وسيم اختر ۽ ٻين اڳواڻن جا نالا اي سي ايل ۾ شامل  ڪرڻ جو فيصلو ڪيو ويو آهي، گهرو وزارت ايف آءِ اي کي هدايت ڪئي آهي ته سنڌ جي گورنر کي ملڪ کان ٻاهر وڃڻ جي اجازت نه ڏني وڃي. گهرو وزارت ايم ڪيو ايم جي رابطا ڪميٽي جي حيدرعباس رضوي، خالد مقبول صديقي، وسيم اختر، عامر خان، فيصل سبزواري ۽ واسع جليل جا نالا اي سي ايل ۾ شامل ڪيا ويندا، ذريعن جو اهو به چوڻ آهي ته گهرو وزارت ايف آءِ اي کي هدايت ڪئي آهي ته سنڌ جي گورنر عشرت العباد کي ملڪ کان ٻاهر وڃڻ جي اجازت نه ڏني وڃي، نجي ٽي وي موجب وفاقي گهرو وزير چوڌري نثار ان افواهن کي رد ڪندي چيو آهي ته ايم ڪيو ايم جي رابطا ڪميٽي جي ميمبرن جا نالا اي سي ايل ۾ شآمل ڪرڻ جو ڪو به فيصلو ناهي ڪيو ويو، . ڦاهي جي منتظر صولت مرزا گذريل رات وڊيو پيغام ۾ چيو هو ته هن الطاف حسين جي چوڻ تي ڪي اي ايس سي جي اڳوڻي ايم ڊي شاهد حامد کي قتل ڪيو  ۽ اهو منصوبو بابر غوري جي گهر تي جوڙيو ويو هو. صولت مرزا چيو هو ته ايم ڪيو ايم جي سينئر اڳواڻ عظيم طارق کي به الطاف حسين جي چوڻ تي قتل ڪيو ويو. صولت مرزا سنڌ جي گورنر ۽ ٻين اڳواڻن تي  به الزام مڙهيا هئا.