تازيون خبرون

Daily Archives: March 19, 2015

پاڪ فوج جي نگراجي ۾ ايندڙ سال آدمشماري ڪرائڻ جو فيصلو

اسلام آباد (بيورو) وزيراعظم نوازشريف جي سربراهي ۾ گڏيل مفادن وارن ڪونسل ايندڙ سال ملڪ ۾ پاڪ فوج جي نگراني ۾ آدمشماري ۽ گهر شماري جو فيصلو ڪيو آهي. اسلام آباد ۾ وزيراعظم نوازشريف جي سربراهي ۾ گڏيل مفادن واري ڪونسل جي اجلاس ۾ سنڌ ۽ خيبرپختونخواهه جي وڏن وزيرن ۽ وفاقي ۽ صوبائي ناڻي وارن وزيرن سميت اعليٰ اختيارين شرڪت ڪئي. بلوچستان جو وڏو وزير ڊاڪٽر عبدالمالڪ بلوچ ملڪ کان ٻاهر نه هئڻ سبب اجلاس ۾ شريڪ نه ٿي سگهيو. اجلاس ۾ ڇهين آدمشماري، بجلي جي پيداوار بابت پاليسي، گيس جي ورهاست ۽ 18 هين ترميم جي روشني ۾ وفاقي ملازمن جي صوبن کي منتقلي جي معاملي تي غور ڪيو ويو. وزيراعظم هائوس جي ترجمان پاران جاري ڪيل بيان موجب گڏيل مادن واري ڪونسل ۾ پاڪستان حلال اٿارٽي جي قيادتم بابت بل جي مسودي جي منظوري ڏني وئي جنهن سان حلال شين جي ڪاروبار ۾ ملڪ کي فائدو ٿيندو. انهيءَ موقعي تي پاور پاليسي 2015، پيٽروليم پاليسي 2009 ۽ 2012، ماڊل پيٽروليم ڪنسيشن ايگريمنٽ ۾ ترميم ۽ پاڪستان آئل ٽرانسپورٽيشن اينڊ سيوريج رولز جي منظوري به ڏني وئي هئي، وزيراعظم بجلي ۽ پاڻي واري وزير خواجه آصف کي پاور پاليسي تي صوبن جا خدشا 10 ڏينهن ۾ ختم ڪرڻ جي هدايت ڪئي. گڏيل مفادن واري ڪونسل جي اجلاس دوران نيپرا جي سالياني رپورٽ سال 13-2012 ۽ صنعتن جي صورتحال بابت سالياني رپورٽ 2013 به پيش ڪئي وئي، وزيراعظم ريگوليٽري اٿارٽيز جي ڪارڪردگي تي بي اعتمادي جو اظهار ڪندي چيو ته اڃا تائين ڪنهن به اداري ۾ نجڪاري ناهي ڪئي وئي پر ريگوليٽري اٿارٽيز پنهنجو ڪم جاري آهي.

 

تيره وادي ۾ جيٽ جهازن جي بمباري، 34 ويڙهاڪ مارجي ويا

خيبر ايجنسي (مانيٽرنگ ڊيسڪ) خيبر ايجنسي جي تيره وادي ۾ سڪيورٽي فورسز جي جيٽ جهازن جي بمباري جي نتيجي ۾ 34ويڙهاڪ مارجي ويا آهن، آءِ ايس پي آر چيو آهي ته بمباري ۾ دهشتگردن جا ڪيترائي ٺڪاڻا پڻ تباهه ٿي ويا. آءِ ايس پي آر موجب، سڪيورٽي فورسز خيبر ايجنسي جي وادي تيره واري علائقي ۾ سڪيورٽي فورسز جيٽ جهازن ذريعي دهشتگردن جي ٺڪاڻڻ تي بمباري ڪري ڏني. آءِ ايس پي آر  جو چوڻ آهي ته، بمباري جي نتيجي ۾ دهشتگردن جا ڪيترائي ٺڪاڻا پڻ تباهه ٿي ويا. سڪيورٽي فورسز جو چوڻ آهي ته بمباري۾ لشڪر اسلام ۽ پابندي مڙهيل تنظيم تحريڪ طالبان جي ڇهه ٺڪاڻن تي حملا  ڪيا ويا، مارجي ويلن ۾ تحريڪ طالبان پاڪستان جا 2 اهم ڪمانڊر به شامل آهن .

 

عوام پنهنجي صفن ۾ لڪيل دهشتگردن جي نشاندهي ڪري: آرمي چيف

راولپنڊي(م.ڊ) آرمي چيف جنرل راحيل شريف چيو آهي ته اسان پاڪستان مان دهشتگردي جو مڪمل خاتمي جو عزم ڪري ورتو آهي ان لاءِ دهشتگردن خلاف جنگ ۾ عوام پنهنجي صفن ۾ لڪيل دشمنن جي نشاندهي ڪري پاڪ فوج جي ترجمان مطابق آرمي چيف جنرل راحيل شريف نيشنل ڪائونٽر ٽيررزم سينٽر پبي جو دورو ڪيو جتي هن سينٽر وٽ پاس آئوٽ ٿيندڙ پهرين ڪائونٽر ٽيررزم بيج جي مهارت جو جائزو ورتو تربيت حاصل ڪندڙ بيج ۾ 500 سيڪيورٽي اهلڪار شامل آهن جن ۾ صوبن مان پوليس ۽ ايليٽ فورس جا 200، رينجرز، ايف سي، ايس پي ڊي ۽ اي اين ايف جا 200 اهلڪار شامل آهن جڏهن ته 100 اهلڪارن جو تعلق پاڪ فضائيه ۽ بحريه سان آهي ان  موقعي تي جنرل راحيل شريف پاس آئوٽ ٿيندڙ جوانن کي خطاب ڪندي چيو ته پاڪ فوج قانون لاڳو ڪندر ادارن جي اهلڪارن جي تربيت لاءِ ڀرپور ڪوشش ڪري رهي آهي ۽ دهشتگردن جي ٺڪاڻن تائين جو پيڇو ڪرڻ لاءِ سيڪيورٽي اهلڪارن جي تربيت ڪئي پئي وڃي هن جو چوڻ هو ته اسان جو انٽيليجنس نظام ايترو مضبوط هجي جو ڪنهن به اڻوڻندڙ واقعي جو اطلاع ملي سگهي دهشتگردي خلاف آپريشن بنا خوف جاري رهڻ گهرجي جڏهن ته دهشتگردن خلاف جنگ ۾ عوام پنهنجي صفن ۾ لڪيل دشمنن جي نشاندي ڪن.

 

الطاف حسين ڪيس: حڪومت ثبوت برطانوي هاءِ ڪمشنر حوالي ڪري ڇڏيا

اسلام آباد (بيورو) وفاقي گهرو وزارت، ايم ڪيو ايم سربراهه الطاف حسين خلاف ثبوت پاڪستان ۾ مقرر برطانوي هاءِ ڪمشنر حوالي ڪري ڇڏيا  آهن، رينجرز پاران نائين زيرو تان پڪڙيل هٿيارن جا تفصيل ۽ الطاف حسين خلاف ڪراچي جي سول لائين ٿاڻي تي داخل ڪيس جي ڪاپي به هاءِ ڪمشنر کي ڏني وئي، ذريعن جو چوڻ آهي ته گهرو وزارت، عمران فاورق قتل ڪيس ۾ به برطانوي حڪومت کي جاچ ۾ سهڪار جي خاطري ڪرائي آهي. پنجاب هائوس اسلام آباد تي وفاقي گهرو وزير چوڌري نثار سان پاڪستان ۾ مقرر برطانوي هاءِ ڪمشنر فلپ بارٽن ملاقات ڪئي، جنهن دوران وفاقي گهرو وزارت جا اعليٰ عملدار به شريڪ هئا. ذريعن جو چوڻ آهي ته ملاقات جي موقعي تي وفاقي گهرو وزارت پاران ايم ڪيو ايم سربراهه الطاف حسين خلاف ثبوت برطانوي هاءِ ڪمشنر حوالي ڪيا ويا. ذريعن موجب، الطاف حسين پاران هڪ خانگي ٽي وي چينل سان ڳالهائيندي رينجرز کي مبينا طور ڏنل ڌمڪين واري انٽرويو جو انگريزي ۾ ترجمو ڪري برطانوي هاءِ ڪمشنر حوالي ڪيو ويو. ذريعن دعويٰ ڪئي ته رينجرز پاران ڪراچي جي سول لائين ٿاڻي تي ايم ڪيو ايم سربراهه الطاف حسين خلاف دهشتگردي ايڪٽ تحت داخل ڪرايل ڪيس جي ڪاپي به برطانوي هاءِ ڪمشنر کي ڏني وئي. ذريعن اهو به ٻڌايو ته رينجرز پاران ايم ڪيو ايم جي مرڪز نائين زيرو تان پڪڙيل هٿيارن جا تفصيل ۽ ٻيا ثبوت به برطانوي هاءِ ڪمشنر حوالي ڪيا ويا.  ذريعن موجب، ملاقات دوران ايم ڪيو ايم اڳواڻ عمران فاروق قتل ڪيس ۾ به سهڪار تي ڳالهيون ڪيون ويون، وفاقي گهرو وزارت برطانوي هاءِ ڪمشنر کي خاطري ڪرائي ته ان سلسلي ۾ برطانوي حڪومت سان سهڪار ڪيو ويندو. ذريعن اهو به ٻڌايو ته عمران فاروق قتل ڪيس ۾ گهربل 2 جوابدار برطانوي حوالگي بابت به ڳالهيون ويون، جڏهن ته ان حوالي سان وفاقي گهرو وزير چوڌري نثار ۽ برطانوي هاءِ ڪمشنر ۾ هڪ ٻي ملاقات پڻ ٿيندي. گهرو وزارت پاران باضابطه طور ملاقات جي پريس رليز جاري ناهي ڪئي وئي پر ذريعن دعويٰ ڪئي آهي ته الطاف حسين خلاف ثبوت برطانوي هاءِ ڪمشنر حوالي ڪيا ويا آهن. واضح رهي ته رينجرز پاران ڪرنل طاهر جي فرياد تي ايم ڪيو ايم سربراهه الطاف حسين خلاف ڪراچي جي سول لائين ٿاڻي تي دهشتگردي ايڪٽ تحت ڪالهه ڪيس داخل ڪرايو ويو هو.

 

ايئر مارشل سهيل امان پاڪ فضائيه جو نئون سربراهه مقرر

اسلام آباد (بيورو) ايئر مارشل سهيل امان کي پاڪ فوج جو نئون سربراهه مقرر ڪيو ويو آهي، وزيراعظم نواز شريف طرفان موڪليل سمري جي صدر ممنون حسين  منظوري ڏئي ڇڏي آهي نئين چيف ايئر اسٽاف لاءِ ايئر مارشل سهيل امان جي مقرري موجوده سربراهه طاهر رفيق بٽ جي رٽائرڊ ٿيڻ سبب ڪئي پئي وڃي، جيڪو پنهنجي عهدي جو مدو پورو ڪرڻ کانپوءِ رٽائرڊ ٿي ويندو پاڪ فضائيه جي سربراهه طاهر رفيق بٽ اڄ وزيراعظم نواز شريف الوداعي ملاقات به ڪئي هئي.

 

 

 

ٻڌايو وڃي ته سول، غير سول ۽ فوجي ادارا ڪهڙي قانون تحت فون ٽيپ ڪري رهيا آهن: سپريم ڪورٽ

اسلام آباد (بيورو) سـُپريم ڪورٽ، اڳوڻي چيف جسٽس سجاد علي شاهه جا فون ٽيپ ڪرڻ بابت پراڻي درخواست تي رپورٽ طلب ڪري ورتي آهي، جسٽس ثاقب نثار ريمارڪس ۾ چيو آهي ته ٻڌايو وڃي ته سول، غير سول ۽ فوجي ادارا ڪهڙي قانون تحت فون ٽيپ ڪري رهيا آهن، بينظير ڀٽو جي حڪومت جي خاتمي پٺيان به فون ٽيپنگ اسڪينڊل جون ڳالهيون هليون هيون. جسٽس ثاقب نثار جي سربراهي ۾ سپريم ڪورٽ جـِي ٽـَي رڪني بينچ، اڳوڻي چيف جسٽس سجاد علي شاهه جا فون ٽيپ ڪرڻ بابت پاڻمرادي نوٽيس ڪيس جي ٻڌڻي ڪئي. ٻڌڻيءَ دوران عدالت ڊپٽي اٽارني جنرل کي هدايت ڪئي ته فون ٽيپنگ جي حوالي سان ايندڙ ٻڌڻي تي رپورٽ پيش ڪئي وڃي. جسٽس ثاقب نثار پڇاڻو ڪيو ته ڪهڙا کاتا فون ٽيپ ڪري رهيا آهن، سول، غير سول ۽ فوجي ادارا جيڪڏهن فون ٽيپ ڪن پيا ته اهي ڪهڙي قانون تحت فون ٽيپ ڪن پيا. جسٽس ثاقب نثار ريمارڪس ۾ اهو به چيو ته بينظير ڀٽو جي حڪومت جي خاتمي پٺيان به فون ٽيپ اسڪينڊل جون ڳالهيون سامهون آيون هيون. عدالت، ڊپٽي اٽارني جنرل کي هدايت ڪئي ته آءِ بي ۽ آءِ ايس آءِ سان رابطو ڪري ايندڙ ٻڌڻي تي رپورٽ پيش ڪئي وڃي، جنهن بعد ٻڌڻي ٽن هفتن تائين ملتوي ڪئي وئي. واضح رهي ته اڳوڻي چيف جسٽس سجاد علي شاهه جا فون ٽيپ ڪرڻ بابت 1996 ۾ درخواست داخل ڪئي وئي هئي.

 

بينظير ڀٽو ايم ڪيو ايم جي بائيڪاٽ جي تجويز نه مڃي هئي: شرجيل ميمڻ

ڪراچي(اسٽاف رپورٽر) صوبائي وزير شرجيل انعام ميمڻ ”مادر جمهوريت نصرت ڀٽو انڊر پاس” منصوبي جي پيڙهه جو پٿر رکي ڇڏيو، سڌ سماءَ واري صوبائي وزير شرجيل ميمڻ چيو آهي ته پيپلز پارٽي ڪيسن ۾ مداخلت نه ٿي ڪري، دهشتگردي خلاف وفاقي، صوبائي حڪومتون ۽ فوج هڪ پيج تي آهن، ڪراچي ۾ لڪي اسٽار ويجهو مادر جمهوريت انڊر پاس جي تعمير جو افتتاح ڪندي شرجيل ميمڻ چيو ته انڊر پاس 51 ڪروڙ روپين جي لاڳت سان ٺاهيو ويو آهي جنهن جي تعمير 4 مهينن ۾ مڪمل ڪئي ويندي هن چيو ته شارع فيصل کي سگنل فري ڪرڻ لاءِ به قدم کنيا پيا وڃن جڏهن ته مادر جمهوري انڊر پاس جي تعمير صدر، زينب مارڪيٽ ۽ آس پاس ۾ ٽريفڪ جام جو مسئلو حل ٿي ويندو، شرجيل ميمڻ وڌيڪ چيو ته شهيد بينظير ڀٽو ايم ڪيو ايم سان اتحاد ڪرڻ جي ڪابه ڳالهه نه ڪئي، پيپلز پارٽي ايم ڪيو ايم تحريڪ انصاف سميت هر پارٽي ڳالهه ڪرڻ چاهي ٿي. شرجيل انعام ميمڻ، سنڌ پوليس ۽ رينجرز جِي تعريف ڪندي چيو آهي ته ٻئي قانون لاڳو ڪندڙ ادارا بهترين ڪم ڪري رهيا آهن، ڪراچي جو امن خراب ڪرڻ جي ڪوشش ڪندڙن کي اجازت نه ڏني ويندي. ڪراچي ۾ ميڊيا سان ڳالهائيندي شرجيل ميمڻ چيو ته ڪراچي ۾ آپريشن ڪنهن هڪ جماعت نه پر دهشتگردن جي خلاف ٿي رهيو آهي. هـُن چيو ته سنڌ پوليس ۽ رينجرز چڱو ڪم ڪري رهيون آهن. شرجيل ميمڻ چيو ته امن قائم ڪرائڻ حڪومت جي ذميواري آهي، اهو ئي سبب آهي جو لياري ۾ روز آپريشن ٿيڻ باوجود هو اعتراض نٿا ڪن. هن چيو ته سنڌ سرڪار کي رينجرز تي ڀروسو آهي، ڪراچي جو امن خراب ڪرڻ جِي ڪوشش ڪندڙن خلاف سخت ڪارروائي ڪئي ويندي. صوبائي وزير چيو ته گذريل پ پ دور ۾وڏا دهشتگرد گرفتار ڪيا ويا، جن ۾ اجمل پهاڙي ۽ ڪامران ماڌوري به شامل آهن. سندس نارٿ ناظم آباد ۾ اسڪول تي حملي جي مذمت ڪندي شرجيل ميمڻ چيو ته وڏي وزير جاچ جو حڪم ڏئي ڇڏيو آهي. سندس چوڻ هو ته پ پ هميشه مفاهمت جي سياست تي يقين رکي ٿي، ايم ڪيو ايم سان ڳالهيون مفاهمت جو حصو آهي. ڪراچي ۾ ٽريفڪ جي مسئلي تي ڳالهائيندي شرجيل ميمڻ چيو ته ڪراچي ۾ ٽريفڪ وڏو مسئلو آهي. جنهن کي حل ڪرڻ جي ڪوشش ڪيون پيا. هن چيو ته پ پ ڪراچي کي روشنين جو شهر ڏسڻ چاهي ٿي، ملير لنڪ روڊ کي ڊبل روڊ ٺاهيو ويندو. صوبائي وزير چيو ته 51 ڪروڙ رپين جي لاڳت سان مهراڻ انڊر پاس تيار ڪيو پيو وڃي، جيڪو چئن مهينن ۾ مڪمل ڪيو ويندو.

 

نيپرا بجلي اگهن ۾ في يونٽ تي 2 رپيا 8 پئسا گهٽتائي جي منظوري ڏئي ڇڏي

اسلام آباد (بيورو) نيپرا بجلي اگهن ۾ في يونٽ تي 2 رپيا 8 پئسا گهٽتائي جي منظوري ڏئي ڇڏي آهي، نوان اگهه ڪراچي اليڪٽرڪ کانسواءِ بجلي جي ورڇ ڪندڙ سمورين ڪمپنين تي لاڳو هوندا. نيپرا ترجمان موجب، سينٽرل پاور پرچيزنگ ڪمپني جي درخواست تي ٻڌڻي ڪندي بجلي اگهن ۾ 2 رپيا 8 پئسا في يونٽ تي گهٽتتائي جي منظوري ڏني وئي آهي.   نيپرا ترجمان جو چوڻ آهي ته فرنس آئل جي قيمتن ۾ گهٽتائي سبب بجلي اگهن ۾ لاٿ ڪئي وئي ۽  اهڙي گهٽتائي فيول ايڊجسٽمينٽ تحت ڪئي وئي آهي. نيپرا واضح ڪيو ته بجلي جا نوان اگهه ڪراچي اليڪٽرڪ جي صارفين تي لاڳو نه هوندا.

 

پنجاب جي مختلف جيلن ۾ 9 قيدين کي ڦاهي ڏني وئي، صولت مرزا اڄ صولي تي چڙهندو، انتطام مڪمل

لاهور (مانيٽرنگ ڊيسڪ) پنجاب جي مختلف جيلز ۾ موت جي سزا مليل 9 قيدين کي ڦاهي تي ٽنگيو ويو، 6 قيدين جي موت واري سزا تي عملدرآمد روڪيو ويو، بلوچستان جي مچ جيل ۾ قيد صولت مرزا کي سڀاڻي ڦاهي ڏني ويندي. راولپنڊي جي اڊيالا جيل ۾ موت جي سزا مليل ٻن قيدين محمد شبير ۽ شوڪت علي کي ڦاهي ڏني وئي، جڏهن ته ساڳي جيل ۾ قيد طالب حسين ۽ رب نواز جي سزا تي عمل اڄ رات تائين روڪيو ويو. فيصل آباد جي سينٽرل جيل ۾ قتل ڪيس جي ٻن جوابدارن سعيد ۽ شفاقت حسين کي به اڄ ڦاهي تي ٽنگيو ويو، ٻنهي جوابدار 1998ع دوران ٻن ڀائرن کي قتل ڪيو هو. فيصل آباد سينٽرل جيل ۾ ٻن قيدين عرفان عرف شاني ۽ محمد احسان جي ڦاهي واري سزا تي عملدرآمد روڪيو ويو. جهنگ جي ڊسٽرڪٽ جيل ۾ غلام محمد ۽ ذاڪر حسين کي ڦاهي ڏني وئي، غلام محمد پنهنجي گهرواري کي قتل ڪيو هو، جڏهن ته ذاڪر حسين دشمني تان هڪ شخص کي قتل ڪيو هو. لاهور جي ڪوٽ لکپت جيل ۾ قيدي طاهر بشير کي ڦاهي ڏني وئي، طاهر بشير 2000ع دوران هڪ ڄڻي کي قتل ڪيو هو ۽ ميانوالي سينٽرل جيل ۾ قيدي احمد نواز کي ڦاهي تي ٽنگيو ويو، جنهن به 1998ع دوران هڪ شخص کي قتل ڪيو هو. اٽڪ جي ڊسٽرڪٽ جيل ۾ قيدي اسد خان کي ڦاهي ڏني وئي، جنهن 12 سال اڳ هڪ ئي ڪٽنب جي ٽن ڀاتين سميت 5 ڄڻن کي قتل ڪيو هو. گجرات جي ڊسٽرڪٽ جيل ۾ به ٻن قيدين اظهر محمود ۽ محمد زمان جي ڦاهي تي به عمل روڪيو ويو. بلوچستان جي مچ جيل ۾ قيد ايم ڪيو ايم ڪارڪن صولت مرزا کي  19 مارچ تي سولي تي ٽنگڻ جون تياريون مڪمل ڪيون ويون آهن، جڏهن ته ڪراچي سينٽرل جيل ۾ قيد شفقت حسين کي 19 مارچ تي ڦاهي ڏني ويندي.

 

ڀريا سٽي ويجهو تيز رفتار ٽرالر ۽ موٽر سائيڪل ۾ ٽڪر، پيءُ ۽ ڌيءُ فوت

ڀريا سٽي(رپورٽر) ڀريا سٽي ويجهو تيز رفتار ٽرالر ۽ موٽر سائيڪل ۾ ٽڪر ٿي پيو جنهن جي نتيجي ۾ پيءُ ۽ ڌيءُ ٿڏي تي فوت ٿي ويا.. قومي شاھراھ تي جوھي کان ڪنڊيارو ويندڙ موٽر سائيڪل سان تيز رفتار ٽرالر جو ٽڪر ٿي پيو، جنهن سبب 45 ورهين جو غلام شبير ڀٽو ۽ سندس 7 ورھين جي ڌي فضا فوت ٿي ويا، جڏهن ته سندس زال شاھده ڀٽو سخت زخمي ٿي پئي. اطلاع تي پوليس واقعي واري هنڌ پهچي فوتين جا لاش ۽ زخمي عورت کي اسپتال آندو جتان ٻنهي فوتين جا لاش پوسٽ مارٽم  بعد وارثن حوالي ڪيو ويو. ٻئي پاسي، پوليس ٽرالر ۽ ڊرائيور کي پنهنجي تحويل ۾ وٺي ڇڏيو آهي…..