تازيون خبرون

Daily Archives: March 18, 2015

جائز مطالبا مڃينداسين، مڪاني چونڊون ٿين ها ته ماڻهن کي بني گالا اچڻ جي ضرورت نه هئي: عمران خان

اسلام آباد (بيورو) عمران خان بني گالا ۾ پنهنجي رهائشگاهه ٻاهران گيس، پاڻي ۽ بجلي فراهم نه ڪرڻ خلا فاحتجاج ڪندڙ ڪرڪ ضلعي جي رهواسين کي مسئلا حل ڪرڻ جو يقين ڏياريو هن چيو ته جيڪڏهن اوهان جو ڪو جائز مسئلو صوبائي حڪومت حل نه ڪري ته ايترن ماڻهن کي هتي اچڻ جي ضرورت نه هئي عمران خان جي يقين ڏيارڻ بعد مظاهرين ڌرڻو ختم ڪري ڇڏيو، خيبرپختونخواهه جي شهر ڪرڪ ۾ گيس، پاڻي ۽ بجلي جي فراهمي ۽ تيل جي رائٽي نه ملڻ تي  ڪرڪ مان آيل مظاهرين گذريل رات کان عمران خان جي رهائشگاهه سامهون ڌرڻو هڻي ويٺل هئا مظاهرين جو چوڻ هو ته مسئلن جي حل لاءِ جيستائين عمران خان يقين نه ڏياريندو ڌرڻو ختم نه ٿيندو، جنهن کانپوءِ عمران خان منجهند جو هڪ وڳي مظاهرين سان ملڻ آيو ۽ خطاب ڪيو، مظاهرين کي خطاب دوران تحريڪ انصاف جي چيئرمين عمران خان جو چوڻ هو ته اسان ڌرڻو ان لاءِ هنيو هو ته عوام پنهنجن حقن لاءِ اٿي خوشي آهي ته اوهان پنهنجن مطالبن لاءِ هيستائين آيو هن چيو ته خيبرپختونخواهه جي عوام جا سمورا جائز مطالبا حل ڪنداسين ناجائز مطالبن لاءِ جيترا به ماڻهو وٺي اچو اهي ڪڏهن به پورا نه ٿيندا، عمران خان چيو ته گيس چوري ڪرڻ وارن کي به پڪڙڻو آهي هن چيو ته ڇنڇر تي ڪرڪ جي نمائندن سان ميٽنگ ڪنداسين عمران خان مظاهرين کي چيو ته اوهان پنهنجن مسئلن کان آگاهه ڪرڻ لاءِ 4 ماڻهو به موڪليو ها ته مان ان جي ڳالهه ٻڌا ها عمران خان چيو ته آئل ريفائنري جي حوالي سان به اوهان کي خوشخبري ڏينداسين ماڻهن کي روزگار ملندو.

 

سنڌ ۽ پنجاب جي مختلف جيلن ۾ موت جي سزا ٻڌايل 12 قيدين کي ڦاهي ڏني وئي

راولپنڊي (م.د) راولپنڊي سميت ملڪ جي 7 مختلف جيلن ۾ گذريل ڏينهن صبح جو سوير موت جي سزا جي 11 ڏوهارين کي ڦاهي ڏني وئي. پي ٽي وي جي رپورٽ موجب اڱاري جي صبح ڪراچي سينٽرل جيل ۾ قتل جي ٻن ڏوهارين فيصل ۽ افضال کي ڦاهي ڏني وئي. ٻنهي ڏوهارين 1998ع ۾ ڪورنگي ۾ ڌاڙي دوران مزاحمت تي عبدالجبار نالي شخص کي قتل ڪري ڇڏيو هو. فيصل ۽ افغال کي دهشتگردي جي روڪٿام واري عدالت 1999ع ۾ موت جي سزا ٻڌائي هئي. ٻنهي ڏوهارين جي رحم جون اپيلون سنڌ هاءِ ڪورٽ ۽ سپريم ڪورٽ رد ڪري ڇڏيون هيون جنهن کان پوءِ پاڪستان جي صدر پڻ رحم جون اپيلون رد ڪري ڇڏيون هيون. ڦاهي کان اڳ ٻنهي ڏوهارين جي سندن ڪٽنب ڀاتين سان ملاقات پڻ ڪرائي وئي. جهنگ ڊسٽرڪٽ جيل ۾ موت جي سزا جي ٻن ڏوهارين کي ڦاهي ڏني وئي، محمد رياض، مبشر ۽ محمد شريف قتل ۽ ڌاڙي جي وارداتن ۾ ملوث هئا. راولپنڊي ۾ موت جي سزا جي ٻن ڏوهارين کي ڦاهي ڏني وئي، نديم زمان ۽ محمد جاويد جا لاش ڦاهي کان پوءِ وارثن هوالي ڪيا ويا. گجرانوالا سينٽرل جيل ۾ قتل جي هڪ ڏوهاري محمد اقبال کي ڦاهي ڏني وئي جنهن 19 سال اڳ پنهنجي زال جي هڪ مائٽ کي قتل ڪيو هو. فيصل آباد سينٽرل جيل ۾ پڻ موت جي سزا مليل قيدي محمد نواز کي ڦاهي ڏني وئي. محمد نواز 1992ع ۾ پاڻي جي تڪرار تي ٻن ڄڻن کي قتل ڪري ڇڏيو هو. ميانوالي سينٽرل جيل ۾ موت جي سزا مليل ٻن قيدين کي ڦاهي ڏني وئي. سرگوڌا سان تعلق رکندڙ ربنواز ۽ ظفر اقبال جي رحم جون اپيلون پڻ رد ٿي چڪيون هيون. ربنواز 2000ع ۾ پنهنجي مائٽ فاطما ۽ ظفر اقبال 2003ع ۾ پنهنجي والد کي قتل ڪيو هو. ڦاهي کان پوءِ سمورا لاش وارثن حوالي ڪيا ويا آهن. اي پي پي/ ص – ب/ ج – پ 13:00

 

مانسهرا ۾ پوليو ٽيم تي فائرنگ، ليڊي هيلٿ ورڪر ۽ پوليس ڪانسٽيبل مارجي ويا

مانسهره (م.ڊ) شيخ آباد ڊنان ۾ ٻارن کي پوليو جا ڦڙا پياريندڙ ٽيم تي اڻڄاتل ماڻهن فائرنگ ڪري ڏني جنهن جي نتيجي ۾ ليڊي هيلٿ ورڪر ستاره گل ۽ ٽيم جي حفاظت تي مقرر ڪانسٽيبل مشتاق مارجي ويا، پوليس جو چوڻ  آهي ته فائرنگ سبب ٻئين ليڊي هيلٿ ورڪر ڪنيز نرگس زخمي ٿي پيا واقعي کانپوءِ پوليس علائقي کي گهيري ۾ آڻي جوابدارن جي ڳولا شروع ڪري ڇڏي.

 

21 مارچ تي سڄي سنڌ ۾ شٽربند هڙتال هر صورت ۾ ٿيندي: نياز ڪالاڻي

هنڱورجا (نمائندو)  جيئي سنڌ قومي محاذ جي مرڪزي وائس چيئرمين ڊاڪٽر نياز ڪالاڻي چيو آهي ته 21 مارچ تي جسقم جي شهيد چيئرمين بشير خان قريشي، شهيد مقصود قريشي، سلمان وڌو ۽ سنڌ جي قومي تحريڪ جي ڪارڪنن جي قاتلن کي گرفتار نه ڪرڻ جي خلاف سڄي سنڌ ۾ شٽربند هڙتال هر صورت ۾ ٿيندي. پرامن هڙتال کي جيڪڏهن پرتشدد ڪيو ويو ته ان جي ذميوار سنڌ حڪومت مٿان هوندي. هنڱورجا ڀرسان جسقم اڳواڻ اياز سهتو جي والد جي وفات تي تعزيت ڪرڻ بعد ميڊيا سان ڳالهائيندي هن چيو ته سنڌ ۾ مذهبي انتهاپسندي جو ٻج هڪ سازش تحت ڇٽيو پيو وڃي. سنڌي قوم پرامن ۽ صوفياڻي مزاج رکندڙ قوم آهي. ڌاريا سنڌ ۾ اچي فساد ڪرائي رهيا آهن. انهن جي نيڪالي لاءِ جسقم ڀرپور نموني سان احتجاج ڪندي رهي آهي. هن چيو ته پ پ مان سنڌ جي ماڻهن کي چڱائي جي اميد نه رکڻ گهرجي ڇو ته سنڌ جا حڪمران سنڌ جون زمينون ڌارين حوالي ڪري سنڌين کي اقليت ۾ تبديل ڪرڻ جي سازش ۾ پ پ جو وڏو ڪردار شامل آهي. هن سان گڏ جسقم مرڪزي اڳواڻ محبوب ابڙو، اڪبر راڄپر، منان ميمڻ، انصاف لاشاري، طالب لاشاري ۽ ٻيا گڏ هيا

 

دبنگ خان ڪترينا ڪيف سان گڏ ڪم ڪرڻ کان انڪاي ڪري ڇڏيو

ممبئي(شوبز نيوز)سلمان خان ۽ ڪترينا ڪيف جي وچ ۾ ويڇن جي ڀلا ڪنهن کي  خبر ناهي، پر سلمان خان ڪيٽ سان گڏ ڪم ڪرڻ کان سختي سان انڪار ڪري ڇڏيو، دبنگ خان چيو ته جيڪڏهن فلم سلطان ۾ ڪترينا کي ڪاسٽ ڪيوويو، ته پوءِ هو فلم ۾ ڪم نه ڪندو، دبنگ خان جي فرمائش تي هاڻي ڪترينا جي جاءِ تي فلم سلطان ۾ دپيڪا پڊوڪون کي ڪاسٽ ڪيو ويندو.

 

متاثر ڪندڙ ڪردار ادا ڪندي رهه، فرحان اختر جي انوشڪا کي صلاح

ممبئي(شوبز نيوز) فرحان اختر پنهنجي ٽوئيٽ ۾ لکيو آهي، ته انوشڪا شرما جي، اين ايڇ 10 ۾ تمام دلچسپ شيون سکڻ لاءِ مليون ۽ ان فلم ۾ تنهنجي شاندار پرفارمنس تي توهان کي مبارڪ ڏيان ٿو، ٻئي طرف فرحان اختر نيويارڪ ۾ گڏيل قومن جي ڪانفرنس ۾ شرڪت ڪئي ۽ اهم مسئلن تي ڳالهه ٻولهه ڪئي، ان ڪانفرنس ۾ هالي ووڊ جي اهم شخصيت ميرل اسٽريپ، ڪرس  مارٽن، ايني هيٿ وي ۽ ڊڪوٽا فيننگ ۽ ڀارت مان اداڪار فرحان اختر شرڪت ڪئي، فرحان اختر ڀارت ۾ مشهوري واري مهم “مرد” جنهن جو مقصد عورتن کي بااختيار بڻائڻ ۽ انهن سان ٿيندڙ ذيادتن جي خلاف آواز اٿارڻ آهي، ان حوالي سان به ڳالهه ڪئي ۽ ڀارت ۾ عورتن جي صورتحال جي حوالي سان به آگاهه ڪيو، فرحان اختر جو ان حوالي سان چوڻ هو ته ڪانفرنس ۾ شرڪت جو تجربو تمام سٺو رهيو.

 

هالي ووڊ اداڪار پاميلا اينڊريسن عدالت وسيلي پنهنجي مڙس کان طلاق گهري ورتي

لاس اينجلس(شوبز نيوز) هالي ووڊ اداڪار پاميلا اينڊريسن عدالت وسيلي پنهنجي مڙس کان طلاق گهري ورتي آهي. 47 ورهين جي پاميلا اينڊريسن عدالت ۾ مؤقف اختيار ڪيو آهي ته رڪ سولومان جنهن جوا هارائڻ کانپوءِ ڪاوڙ ۾ اچي نه رڳو کيس هيسايو پر سندس مُنهن تي ويهاڻو رکي کيس قتل ڪرڻ جي ڪوشش ڪئي جنهن کان هن وڏي مشڪل سان جان بچائي. اداڪاره چيو ته جوا هارائڻ بعد سندس مڙس ان هار جو ذميوار پاميلا کي قرار ڏنو ۽ ماڻهن جي سامهون بدتميزي پڻ ڪئي. هوڏانهن پاميلا جي مڙس کيس هڪ فراڊ قرار ڏيندي چيو ته هوءَ ايتري ته مڇي ۽ جهينگا کائيندي آهي جو سندس گهر ۾ انهن جي بوءِ رهجي ويندي آهي ۽ هوءَ ٻارن کي پسند نٿي ڪري، تنهنڪري هوءَ ماءُ بڻجڻ لاءِ به تيار ناهي.

 

شاهه رخ خان ۽ ڪاجول ديوگن هڪ دفعو ٻيهر فلم ۾ گڏ نظرايندا

ممبئي(شوبز نيوز) بالي ووڊ جي فلم بلاڪ بسٽر جوڙي شاهه رخ خان ۽ ڪاجول هڪ دفعو ٻيهر گڏ نظر ايندا، هدايتڪار روهت سيٺي بالي ووڊ جي ايور گرين جوڙي ٻيهر شوقينن جي سامهون آڻي رهيو آهي، روهت بالي ووڊ ۾ گذريل ڪيترن ئي مهينن کان سرگرم خبرن جي تصديق ڪندي، چيو ته انهن جي نئين فلم “دل والي” ۾ شاهه رخ خان ۽ ڪاجول خاص ڪردار ادا ڪندا، بالي ووڊ جي مشهور جوڙي ان کان پهرين مائي نيم از خان ۾ به نظر آئي هئي، رومانوي فلم ۾ ورون ڌون ۽ هيروپنتي جي هيروئن ڪريتي سينن به نظر ايندي،“دل والي” جي شوٽنگ جو آغاز 20 مارچ تي ٿيندو.

 

آسٽريليا خلاف ميچ کٽڻ لاءِ جارحاڻي ڪرڪيٽ کيڏڻي پوندي: سرفراز احمد

ايڊليڊ(اسپورٽس نيوز): پاڪستان ڪرڪيٽ ٽيم جي وڪيٽ ڪيپر بيٽسمين سرفراز احمد چيو آهي ته آسٽريليا خلاف ڪوارٽر فائنل ميچ کٽن لاءِ اسان کي مثبت ۽ جارحاڻي راند کيڏڻي پوندي، ايڊليڊ ۾ ميڊيا سان ڳالهائيندي سرفراز احمد چيو ته آسٽريليا ۽ پاڪستان وچ ۾ ميچ هميشه سخت ثابت ٿي آهي جڏهن ته هوم گرائونڊ تي کيڏڻ ۽ ورلڊ ڪپ ٽائيٽل لاءِ فيوريٽ سمجهي وڃڻ سبب ميچ ۾ وڌيڪ دٻاءُ آسٽريليا تي هوندو جنهن جو فائدو کڻندي اسان کي مثبت ۽ جارحاڻي ڪرڪيٽ کيڏڻي پوندي هن چيو ته آسٽريليا جو بالنگ اٽيڪ وڌيڪ مضبوط آهي جڏهن ته جيڪڏهن انهن وٽ ليفٽ هينڊ کان بالنگ ڪرائيندڙ پيس اٽيڪ موجود آهي ته اسان وٽ به وهاب رياض ۽ راحت علي جهڙا ليفٽ آرم فاسٽ بالرز آهن جن جي مدد سان سٺي پريڪٽس ٿي رهي آهي جڏهن ته مچل اسٽارڪ کي کيڏڻ جو جيستائين تعلق آهي ته مان ان کي گڏيل عرب امارات ۾ هڪ ميچ ۾ کيڏي چڪو آهيان.

 

ون ڊي جي تازي رينڪنگ جاري، سعيد اجمل پهرئين تي برقرار

دبئي(اسپورٽس نيوز)ورلڊ ڪپ جي ڪوارٽر فائنل مرحلي تائين پهچڻ تي ون ڊي جي تازي رينڪنگ جاري ڪئي وئي بيٽنگ جي ٽاپ پوزيشنز ۾ ته فرق نه پيو ڪپتان مصباح الحق به 13 هين نمبر تي برقرار آهي جڏهن ته ورلڊ ڪپ ۾ پاڪستان کي پنهنجي شاندار بيٽنگ سان 2 يادگار ڪاميابيون ڏيارڻ پر ڪوارٽر فائنل ۾ رسائي ڏياريندڙ سرفراز احمد کي صرف 2 درجه ترقي ملي جنهن سبب هو 24 هين نمبر جو بيٽسمين بڻجي ويو بالنگ ۾ سعيد  اجمل جي ٽاپ پوزيشن تي جادوگري برقرار آهي، محمد عرفان به 2 درجا مٿي اچي ويو.