تازيون خبرون

Daily Archives: March 18, 2015

يوحنا آباد واقعو: ماڻهن کي زنده ساڙيندڙن خلاف سخت ڪارروائي جو اعلان

اسلام آباد (بيورو) وفاقي حڪومت، لاهور ۾ ماڻهن کي زنده ساڙيندڙ جوابدارن خلاف سخت ڪارروائيءَ جو اعلان ڪري ڇڏيو، گهرو وزير چوڌري نثار جو چوڻ آهي ته يوحنا آباد سانحي کانپوءِ جيڪو ڪجهه ٿيو ان کي نظر انداز نه ٿو ڪري سگهجي ۽ ماڻهن کي زنده ساڙڻ به بدترين دهشتگردي آهي. قومي اسيمبلي ۾ خيالن جو اظهار ڪندي چوڌري نثار جو چوڻ هو ته يوحنا آباد سانحو بدترين دهشتگردي آهي پر ان کانپوءِ ردعمل طور انسانن کي زنده ساڙڻ ۽ ملڪيتن کي نقصان پهچائڻ به بدترين دهشتگردي آهي جنهن ۾ ملوث جوابدارن خلاف سخت ڪارروائي ڪئي ويندي. هن چيو ته لاهور ۾ ٿيل ردعمل ملڪ، قانون ۽ جمهوريت لاءِ نقصانڪار آهي، سڄي قوم گذريل 14 سالن کان جنگ جي حالتن ۾ آهي. سندس چوڻ هو ته هڪ طرف دهشتگرد اسان جي گهرن کي باهه لڳائين ۽ پوءِ پنهنجا ئي ماڻهو ان ايجنڊا کي اڳتي وڌائين ته ان جي اجازت نه ٿي ڏئي سگهجي. چوڌري نثار چيو ته دهشتگرد چاهين ٿا ته عوام کي خوفزده ڪيو وڃي پر کين انهن جو مقابلو ڪرڻو آهي، دهشتگردن جو گهيرو تنگ ڪيو ويو آهي جنهن سبب هــُو پنهنجي سولي هدفن کي نشانو بڻائن ٿا. ڦاهي جي سزا حاصل ڪندڙ جوابدار شفقت حسين بابت گهرو وزير چيو ته شفقت حسين جي ڦاهي تي سياست نه ڪئي وڃي. هن چيو ته دهشتگردي ٽوڙ عدالت ڏوهاري کي سزا ٻـُڌائي جڏهن ته ٻين عدالتن به جوابدار کي سمورا قانوني مرحلا مڪمل ٿيڻ بعد سزا برقرار رکي پر ان تي سياست ڪرڻ سمجهه کان ٻاهر آهي. چوڌري نثار چيو ته ڪيس جي ٻڌڻي دوران شفقت حسين جي عمر جو ايشو ڪٿي نه اٿاريو ويو، ڊاڪٽرن جوابدار جي عمر 25 سال ۽ جيل انتظاميه 23 سال لکي جڏهن ته جوابدار جنهن کي قتل ڪيو ان جي عمر 7 ورهيه هئي.

 

گوسڙو ملازمن جي جزا ۽ سزا جو وقت اچي ويو آهي: شرجيل ميمڻ

ڪراچي (اسٽاف رپورٽر) اطلاعات ۽ بلديات واري صوبائي وزير شرجيل انعام ميمڻ چيو آهي ته ”صاف سرسبز سنڌ پرامن سنڌ مهم“ ۾ هاڻ آفيسرن جي جزا ۽ سزا جو وقت اچي پهتو آهي. هاڻ جنهن به ضلعي مان شڪايتون اينديون ان علائقي جو آفيسر معطل ٿيندو. بلديات کاتي ۾ هزارن جي تعداد ۾ گوسڙو ملازم آهن ۽ انهن کي فارغ ڪري ئي ساهه کڻنداسين. ڪراچي ۾ وهره برادري پاران ان مهم کي اوون ڪرڻ ۽ نارٿ ناظم آباد جي هڪ رستي کي پنهنجي حوالي وٺڻ جي اسان جي درخواست کي قبول ڪرڻ تي سندن ٿورائتا آهيون. صفائي مهم سالن تائين جاري رهندي ۽ آئون پاڻ روزانو جي بنياد تي نه صرف ان ۾ حصو  وٺندو رهندس بلڪ ان جي مانيٽرنگ به ڪندو رهندس. وسيلن جي کوٽ آهي، جنهن تي وڏي وزير کي گذارش ڪئي آهي ۽ هن بلديات کاتي کي فنڊز فراهم ڪرڻ جي پڪ ڪرائي ڇڏي آهي. ڪابينا ۾ ردوبدل جو اختيار وڏي وزير وٽ آهي جڏهن ته منهنجي گهرو وزير ٿيڻ جي خبرن ۾ ڪابه صداقت نه آهي. اهڙن خيالن جو اظهار هن نارٿ ناظم آباد ۾ وهره ڪميونٽي جي تحت ”صاف سرسبز سنڌ، پرامن سنڌ“ مهم تحت هشاميه مسجد ۽ آسپاس ۾ ٻوٽو پوکي ۽ ٻهارو ڏئي مهم ۾ حصو وٺڻ کانپوءِ ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ايڊمنسٽريٽر ڪراچي ثاقب سومرو، وهره برادري جي عامر منصور ڀائي، ڪوآرڊينيٽر ڪراچي نظافت ڪميٽي علي اصغر ڀائي، ميٽرو پوليٽن ڪمشنر مسعود عالم، ڊائريڪٽر لوڪل گورنمينٽ روبينه آصف، ايڊمنسٽريٽر ڪمال احمد، ميونسپل ڪمشنر سينٽرل مصطفيٰ ڪمال کان علاوه وهره ڪميونٽي سان تعلق رکندڙ وڏي تعداد شرڪت ڪئي. ان موقعي تي وهره ڪميونٽي تحت صوبائي وزير جي آمد تي سندس شاندار استقبال ڪيو ويو ۽ کيس هشاميه مسجد ۽ آسپاس وارن علائقن جو دورو ڪرايو ويو. صوبائي وزير شرجيل انعام ميمڻ مسجد جي احاطي ۾ ٻوٽو لڳائي وڻڪاري مهم ۾ حصو ورتو ۽ مسجد ٻاهران ٻهارو ڏنو. ان موقعي تي صوبائي وزير کي وهره برادري جي روحاني پيشوا سيدنا صاحب پاران ان مهم ۾ ڀرپور حصو وٺڻ ۽ ان سلسلي ۾ ڪراچي جي مختلف علائقن ۾ رهندڙ وهره برادري پاران ورتل اپائن کان آگاهه ڪيو ۽ کين پيش ايندڙ مشڪلاتن ۽ مسئلن طرف ڌيان ڇڪرايو. صوبائي وزير شرجيل انعام ميمڻ موقعي تي ئي ايڊمنسٽريٽر ميونسپل ڪمشنر سينٽرل، واٽر بورڊ جي عملدارن ۽ ڊي سي سينٽرل کي هدايتون جاري ڪيون ۽ فوري طور تي پيش ايندڙ مسئلن جي ازالي جا حڪم ڏنا. ان موقعي تي هن وهره برادري جي اڳواڻن کي گذارش ڪئي ته هو ان مهم کي اوون ڪرڻ سان گڏوگڏ نارٿ ناظم آباد ۾ وهره ڪميونٽي جي رهائشي علائقي جي هڪ رستي ۽ رائونڊ ابائوٽ کي سنڀالڻ تي اڳواڻن کين يقين ڏياريو ته هو اڳتي هڪ کان ٻن ڏينهن ۾ ان سلسلي ۾ رستي جي نشاندهي ڪري ان کي پاڻ سنڀاليندا. ميڊيا سان ڳالهائيندي شرجيل انعام ميمڻ چيو ته اسان جي صاف سرسبز ۽ پرامن سنڌ مهم تحت ڪراچي سميت صوبي ۾ سرڪاري سطح سان گڏوگڌ ڪميونٽي سطح تي به پذيرائي ملي رهي آهي ۽ اڄ ان سلسلي ۾ وهره برادري جي دعوت تي هتي آيو آهيان ۽ مونکي گهڻي خوشي ٿي آهي ته وهره برادري جي روحاني پيشوا ۽ سمورن اڳواڻن ان مهم کي نه صرف اوون ڪيو آهي بلڪ هن مختلف علائقن ۾ رستن ۽ چوراهن کي سنڀالڻ جي به پڪ ڪرائي آهي. هن چيو ته حڪومت وٽ وسيلن جي کوٽ آهي ۽ ان سلسلي ۾ ڪميونٽي جو تعاون ان مهم ۾ ڪارآمد ثابت ٿيو آهي. شرجيل ميمڻ چيو ته وسيلن ۽ فنڊز جي کوٽ جو بلديات کاتي کي منهن ڏيڻو پئجي رهيو آهي ۽ ان سلسلي ۾ اسان وڏي وزير کي درخواست ڪئي هئي، جنهن کي هن منظور ڪيو آهي ۽ جلد ئي اسان کي فنڊز ملي ويندا، جنهن سان خراب مشينري کي درست ۽ ٻي مشينري جي خريداري ڪئي ويندي. هن چيو ته اسان مهم کي هڪ هفتو هلائڻ جو اعلان ڪيو هو، پر زميني حقيقتن کي ڏسندي ان کي سال تائين وڌايو ويو آهي. جنهن جو هڪ سبب ڪراچي ۾ روزانو 12 هزار ميٽرڪ ٽن ڪچري مان صرف 4 هزار ميٽرڪ ٽن ڪچرو کڻڻ ۽ باقي جو رهجي وڃڻ آهي ۽ هن وقت به شهر ڪراچي ۾ لکين ٽن ڪچرو موجود آهي، جنهن کي کڻڻ لاءِ اسان ڏينهن رات ڪوششون ڪري رهيا آهيون. هن چيو ته هاڻ ان مهم ۾ اهو موڙ اچي پهتو آهي ته آفيسرن جي جزا ۽ سزا ڪئي وڃي. هن چيو ته هاڻ به ڪراچي ۾ ڊسٽرڪٽ سينٽرل ۽ ايسٽ ۾ صفائي سٿرائي جي حوالي سان شڪايتون موجود آهن ان لاءِ انهن علائقن جي آفيسرن کي آخري وارننگ ڏيان ٿو ته هو فوري طور تي انهن شڪايتن جو ازالو ڪري وٺن، ٻي صورت ۾ کين عهدن کان معطل ڪيو ويندو ۽ هڪ سال تائين انهن کي ڪٿي جڳهه نه ملندي. هڪ سوال جي جواب ۾ هن چيو ته صوبائي ڪابينا ۾ ردوبدل جو اختيار وڏي وزير وٽ آهي. هڪ ٻي سوال جي تي هن چيو ته ڪراچي سميت پوري سنڌ ۾ دهشتگردي جي خاتمي لاءِ اسان جي پوليس، رينجرز ۽ امن امان جي بحالي وارا ادارا ڏينهن رات ڪوشان آهن ۽ وڏي پيماني تي ڪاميابيون ملي رهيون آهن ۽ ان آپريشن کان پوءِ ڏوهن جي شرح ۾ خاطر خواهه گهٽتائي واقع ٿي آهي. هن چيو ته هن وقت پوري صوبي ۾ ڀنگ لاءِ اغوا جو ڪوبه مغوي نه آهي ۽ جيڪي به اغوا ٿين ٿا انهن کي پوليس ۽ رينجرز بازياب ڪرائي ورتو آهي. هڪ سوال جي جواب ۾ هن چيو ته اسان جي پوليس، رينجرز ۽ امن امان جي بحالي جي ٻين ادارن جي ڪاوشن سان ڪيترن جوابدارن کي گرفتار ڪيو ويو آهي. هن چيو ته وفاقي ۽ صوبائي حڪومت ۽ امن امان جي بحالي جا ادارا جنهن جذبي سان هن ملڪ ۽ صوبي کي دهشتگردي کان پاڪ ڪرڻ لاءِ پنهنجا فرض انجام ڏيئي رهيا آهن، اسان جي عدليه به ان جذبي تحت انهن جوابدارن کي ڪيفر ڪردار تائين پهچائڻ ۾ پنهنجو ڪردار ادا ڪري ته معاشري ۾ بهتري اچي سگهي. گوسڙو ملازمن جي حوالي سان سوال جي جواب ۾ هن چيو ته ڪيترا نه بلڪ هزارن جي تعداد ۾ گوسڙو ملازم بلديات کاتي ۾ موجود آهن ۽ ان لاءِ اسان سنڌ حڪومت جي سنڌ بئنڪ ۾ انهن جا اڪائونٽ کولرائڻ جو اعلان ڪيو ته جيئن اهڙا ملازم جيڪي يا ته هن ملڪ ۾ ئي نه آهن يا وري هو هن دنيا ۾ ئي نه آهن يا وري هو هڪ کان وڌيڪ سرڪاري کاتن ۾ هڪ ئي وقت نوڪري ڪري رهيا آهن انهن جو خاتمو ڪري سگهجي، پر افسوس ته سنڌ حڪومت جي انتظامي معاملي تي سنڌ هاءِ ڪورٽ جي حڪم امتناعي ڏنو آهي. جنهن تي سنڌ حڪومت جا قانوني ماهر جلد ان جو جواب به ڏيندا ۽ اسان معزز عدليه کي به گذارش ڪريون ٿا ته هو به ان تي غور ڪري. ڪراچي ۾ اقليتن جي مذهبي عبادتگاهن جي تحفظ جي سوال تي شرجيل انعام ميمڻ چيو ته لاهور ۾ ڌماڪن کان پوءِ وڏي وزير آءِ جي سنڌ ۽ ڊي جي رينجرز کي ڪراچي سميت پوري صوبي ۾ مسيحي ۽ هندو برادري جي عبادتگاهن جي مڪمل سڪيورٽي جا حڪم ڏنا آهن. اسان دنيا کي ٻڌائڻ چاهيون ٿا ته پاڪستان ۾ رهندڙ سمورن اقليتن کي هتان جو هر پاڪستاني ۽ مسلمان پنهنجي جان کان وڌيڪ حفاظت لاءِ تيار آهي ۽ اسان پنهنجن اقليتي ڀائرن کي ان ڳالهه جي مڪمل پڪ ڪرايون ٿا ته هتان جو هڪ هڪ پاڪستاني ۽ مسلمان انهن جي حفاظت لاءِ انهن سان گڏ آهي.

 

وزير اعظم سان وفاقي وزير غلام مرتضيٰ جتوئي ۽ صلاحڪار امير مقام جون الڳ الڳ ملاقاتون

اسلام آباد (بيورو) وزيراعظم محمد نوازشريف چيو آهي ته حڪومت عوام کي بهتر سهولتون ڏيڻ جي حوالي سان ترقي ۽ خوشحالي جي پنهنجي ايجنڊا تي توجهه ڏيئي رهي آهي اقليتون امن ۽ هم آهنگي جي ماحول ۾ زندگي گذارين هو اڱاري تي هتي وزيراعظم هائوس ۾ وفاقي وزير صنعت غلام مرتضيٰ جتوئي ۽ وزيراعظم جي صلاحڪار انجنيئر امير مقام سان ڳالهه ٻولهه ڪري رهيو هو جنهن هن الڳ الڳ ملاقات ڪئي وزيراعظم چيو ته ملڪ جي مختلف علائقن وچ ۾ رابطي ۾ سهولت لاءِ روڊ ٺاهيا پيا  وڃن جنهن سان مانهن کي هڪٻئي ويجهو اچڻ جو موقعو ملندو ان کان سواءِ ڪاروبار کي هٿي ملندي ۽ بهتر روزگار جا موقعا پيدا ٿيندا لاهور جي سانهي ۽ ان کان پوءِ مظاهرن ۽ تشدد جي واقعن تي افسوس جو اظهار ڪندي هن چيو ته سمورن صوبائي حڪومتن کي امن امان جي صورتحال برقرار رکڻ لا3 جوڳا قدم کڻڻ جي هدايت ڪئي آهي هن چيو ته اقليتون ملڪ جو اهم طبقو آهن جن ملڪي ترقي ۾ ڀرپور ڪردار ادا ڪيو آهي تنهنڪري کين گهرجي ته امن ۽ هم آهنگي واري ماحول ۾ زندگي گذارين وزيراعظم چيو ته قومي گرڊ ۾ وڌيڪ بجلي شآمل ڪرڻ ۽ ماڻهن کي وڌ ۾ وڌ سهولت فراهم ڪرڻ جي حڪمت عملي تحت توانائي جي کوٽ تي ڪنٽرول ڪرڻ لاءِ قدم کنيا پيا وڃن ملاقاتن ۾ خبيرپختونخواهه ۽ سنڌ ۾ پارٽين بابت معاملن تي به غور ڪيو ويو غلام مرتضيٰ جتوئي وزيراعظم کي پنهنجي وزارت جي ڪم ۽ ملڪ ۾ صنعتي ترقي لاءِ کنيل قدمن کان آگاهه ڪيو ان موقعي تي مسلم ليگ (ن) سنڌ جو سينيئر نائب صدر سيد شاهه محمد شاهه به موجود هو وزيراعظم انجنيئر امير مقام سان ملاقات ۾ بٽل اوگي ۽ شانگلا کي موٽر وي سان ملهائڻ جي به اصولي منظوري ڏيئي ڇڏي.

 

پ پ پاران ايم ڪيو ايم جو ڀرپور ساٿ ڏيڻ جو اعلان، اڳواڻن کي بيان بازي کان روڪيو ويو

ڪراچي (اسٽاف رپورٽر) پيپلز پارٽي ميمبرن ڪلثوم چانڊيو ۽ نادر مگسي ايم ڪيو ايم جي سنڌ حڪومت ۾ شموليت جي فيصلي جي حمايت ڪري ڇڏي جڏهن ته ٻيا پ  پ ميمبر خاموش رهيا  آصف زرداري چيو آهي ته متحده کي چيو هو ته سينيٽ اليڪشن کانپوءِ گڏجي هلنداسين جيڪو واعدو ڪيو ان کي پورو ڪنداسين پيپلز پارٽي جي شريڪ چيئرمين آصف علي زرداري بلاول هائوس ۾ سنڌ اسميبلي جي ميمبرن جي اعزاز ۾ مانجهاندو ڏنو، جنهن دوران آصف زرداري سمورن پارٽي اڳواڻن کي ايم ڪيو ايم خلاف بيان بازي کان روڪي ڇڏيو آهي ان موقعي تي ايم ڪيو ايم جي حڪومت ۾ شموليت تي راءِ به طلب ڪئي وئي جنهن تي پ پ ميمبرن نادر مگسي ۽ ڪلثوم چانڊيو متحده قومي موومينٽ جي سنڌ حڪومت ۾ شموليت جي فيصلي جي حمايت ڪري ڇڏي مانجهاندي کي خطاب ۾ آصف زرداري جو چوڻ هو ته کي چيو هو ته سينيٽ اليڪشن کانپوءِ گڏجي هلنداسين جيڪو واعدو ڪيو اهو پورو ڪنداسين پ پ ميمبرن جي راءِ سامهون اچي وئي هن چيو ته پ پ اسيمبلي ميمبر بلدياتي اليڪشن جي تياري ڪن وزير ۽ ڪارڪن عوامي رابطه مهم تيز ڪن ڪراچي کان ڪشمور تائين هر سيٽ تي ڀرپور حصو ورتو ويندو پيپلز پارٽي جي حڪومت عدالتن جي فيصلي جو احترام ڪيو آهي ڪارڪردگي جي بنياد تي اليڪشن کٽينداسين.

 

رينجرز پاران الطاف حسين خلاف سول لائن ٿاڻي تي دهشتگردي ايڪٽ تحت ڪيس داخل

ڪراچي (اسٽاف رپورٽر) ايم ڪيو ايم سربراهه الطاف حسين خلاف رينجرز جي ترجمان جي مدعيت ۾ رينجرز کي ڌمڪيون ڏيڻ ۽ رينجرز جي اعليٰ عملدارن تي چٿرون ۽ ٽوڪون ڪرڻ خلاف سول لائن ٿاڻي تي دهشتگردي ايڪٽ تحت ڪيس داخل ڪيو ويو آهي.  الطاف حسين خلاف رينجرز جي ترجمان ڪرنل طاهر جي مدعيت ۾ دهشتگردي ايڪٽ 7  ۽ 605 بِي ايڪٽ تحت ڪراچي جي سول لائن ٿاڻي تي ڪيس داخل ڪيو ويو آهي. رينجرز جي ڪرنل طاهر، الطاف حسين پاران ڪجهه ڏينهن اڳ نجي ٽي وي چئنل کي ڏنل انٽرويو کي بنياد بنائي ڪيس داخل ڪرايو ويو آهي، جنهن ۾ الطاف حسين چيو هو ته، نائن زيرو تي ڇاپو هڻندڙ رينجرز اهلڪار هئا، جيڪي انشاءَ الله هاڻي هئا ٿي ويندا. ڪيس ۾ الطاف حسين جي جملن ” جن رينجرز والون نَي ڇاپا مارا وه ٿَي اور ٿَي هوجائَينگَي“ ۽ ڪجهه چِٿرن ۽ ٽَوڪُن تي ٻڌل جملن کي بنياد بڻايو ويو آهي.

 

گڏيل قومن پاڪ- افغان تعميري ڳالهين کي افغان امن عمل لاءِ اُميد جو نئون ڪرڻو قرار ڏئي ڇڏيو

گڏيل قومون(م.د) گڏيل قومن پاڪ- افغان تعميري ڳالهين واري عمل کي افغان امن عمل لاءِ اُميد جو نئون ڪرڻو قرار ڏنو آهي. سلامتي ڪائونسل افغانستان ۾ گڏيل قومن جي امدادي مِشن جي مُدي ۾ وڌيڪ هڪ سال جي واڌ جي متفقه منظوري پڻ ڏئي ڇڏي آهي. گڏيل قومن ۾ پاڪستان جي مستقل نمائنده ڊاڪٽر مليحه لوڌي سلامتي ڪائونسل کي ٻُڌايو پاڪ- افغان لاڳاپن ۾ اسٽريٽجڪ تبديلي پوري خطي لاءِ اُميد وارو منظرنامو جوڙيو آهي، هن نئين صورتحال کي افغان عوام ۽ سموري خطي لاءِ اُميد جو نئون ڪرڻو قرار ڏنو. افغانستان لاءِ گڏيل قومن جي مِشن جي سربراهه ۽ سيڪريٽري جنرل بان ڪي مون جي خاص ايلچي نڪولس هي سوم 15 رڪني سلامتي ڪائونسل کي افغانستان جي صورتحال بابت بريفنگ دوران ٻُڌايو ته افغان امن عمل لاءِ نيون اُميدون سامهون آيون آهن جن جي پس منظر ۾ ٻين ڪارڻن کان علاوه پاڪستان ۽ افغان حڪومتن وچ ۾ آهستي آهستي تعميري ڳالهين جو پڻ اهم ڪردار آهي. هن چيو ته ان سلسلي ۾ افغانستان ۾ اتحادي حڪومت جو قيام پڻ هڪ اهم پهلو آهي اها مثبت اڳڀرائي نئين افغان صدر اشرف غني ۽ چيف ايگزيڪيوٽو عبدالله عبدالله جي ڪوششن جي عڪاسي ڪري ٿي. ڊاڪٽر مليحه لوڌي ان موقعي تي چيو وزيراعظم محمد نواز شريف ۽ افغان صدر اشرف غني وچ ۾ گذريل سال نومبر ۾ ٿيل ملاقات سان گذريل 13 سالن دوران پيدا ٿيل چئلينجز تي 3 ڏينهن ۾ ضابطو آڻڻ ۾ مدد ملي جنهن جي نتيجي ۾ گڏيل لاڳاپن ۾ اسٽريٽجڪ تبديلي سامهون آئي اهي. ٻنهي اڳواڻن سلامتي ۽ معيشت جي حوالي سان گڏيل مفادن تي ٻَڌل شراڪت جي ويزن تي پڻ اتفاق ڪيو.

 

سنڌ ڪابينا ۾ ردو بدل جو سلسلو شروع ، روبينا قائمخاني فارغ

ڪراچي (اسٽاف رپورٽر) سنڌ حڪومت ڪابينا ۾ ردو بدل جو سلسلو شروع ڪري ڇڏيو، صوبائي وزير روبينا قائمخاني کي سنڌ ڪابينا مان فارغ ڪري گهر ڀيڙو ڪيو ويو آهي.. سنڌ جي سروس اينڊ جنرل ايڊمنيسٽريشن ڊپارٽمينٽ پنهنجي جاري ڪيل نوٽيفيڪشن موجب روبينا قائمخاني کي سنڌ ڪابينا مان فارغ ڪيو ويو. روبينا قائمخاني کي عورتن جي ترقي ۽ خصوصي تعليم جا قلمدان الاٽ ٿيل هئا، جيڪي واپس ورتا ويا آهن. معلوم ٿيو آهي ته روبينا قائمخاني کي غيرقانوني ڀرتين ۽ پنهنجي من پسند نوازيل پاليسي ۽ اقربا پروري جي الزام هيٺ فارغ ڪيو ويو آهي.. روبينا قائم خاني عورتن جي مخصوص سيٽ تي ايم پي اي طور ڪامياب ٿيل آهي.

 

صولت مرزا جي نظرثاني اپيل رد، موت جي سزا وارو فيصلو برقرار : سپريم ڪورٽ

اسلام آباد (بيورو) سـُپريم ڪورٽ، ايم ڪيو ايم ڪارڪن ۽ ڦاهي جي منتظر قيدي صولت مرزا جي نظرثاني اپيل رد ڪندي موت جي سزا وارو فيصلو برقرار رکي ڇڏيو. جسٽس ناصر المـُلڪ پنهنجي چيمبر ۾ صولت مرزا جي موت واري سزا روڪڻ واري درخواست تي رجسٽرار آفيس جي اعتراضن تي ٻــُڌڻي ڪئي. رجسٽرار آفيس طرفان صولت مرزا جي اپيل تي اعتراض لڳايو ويو ته سپريم ڪورٽ جوابدار جي موت جي سزا جي نظرثاني اپيل خارج ڪري چڪي آهي ان ڪري عدالتي فيصلي تي ٻيهر نظرثاني نه ٿي ڪري سگهجي. چيف جسٽس ٻڌڻي بعد رجسٽرار آفيس طرفان اٿاريل اعتراضن تي ٻــُڌڻي مڪمل ڪندي فيصلو ڪيو، جيڪو ڪجهه دير بعد ٻـُڌايو. عدالت، نظرثاني واري اپيل رد ڪندي صولت مرزا کي ڦاهي ڏيڻ وارو دهشتگردي ٽوڙ عدالت جو فيصلو برقرار رکي ڇڏيو ياد رهي ته صولت مرزا کي ڪــَي اِي ايس سي جي اڳوڻي ايم ڊي شاهد حامد کي قتل ڪرڻ جي ڏوهه ۾ 19 مارچ تي ڦاهيءَ تي لٽڪايو ويندو.

 

يوحنا آباد سانحو، مارجي ويلن جون آخري رسمون ادا ڪيون ويون، سيڪيورٽي سخت

لاهور (بيورو) لاهور جي يوحنا آباد ۾ گرجا گهرن تي ٿيل آپگهاتي بم حملي ۾ مارجي ويل ماڻهن جون آخري رسمون ادا ڪيون ويون جڏهن ته سانحي خلاف ٽئين ڏينهن به عام زندگي مڪمل طور معطل رهي. 15 مارچ تي يوحنا آباد جي گرجا گهرن تي ٿيل آپگهاتي بم حملن ۾ 17 مارجي ويا ۽ 70 ڄڻا زخمي ٿي پيا هئا. مارجي ويلن جون آخري رسمون ادا ڪيون ويون، جنهن ۾ پورٽ اينڊ شپنگ جي وفاقي وزير ڪامران مائيڪل، صوبائي گهرو وزير ڪرنل رٽائرڊ شجاع خانزده ۽ ڪشمر لاهور سميت ٻين سياسي توڙي سرڪاري شخصيتن به شرڪت ڪئي. آخري رسمن دوران ڪنهن به اڻوڻندڙ صورتحال کي منهن ڏيڻ لاءِ يوحنا آباد سميت سڄي شهر جي سڪيورٽي لاءِ انتهائي سخت قدم کنيا ويا هئا. يوحنا آباد ۽ ان جي ڀرپاسي وارن علائقن ۾ پنج هزار پوليس اهلڪارن کانسواءِ رينجرز جي وڏي نفري به مقرر ڪئي وئي هئي. يوحنا آباد کان گــُذرندڙ فيروز پور روڊ کي چونگي امر سوڌو کان ڪاهنا تائين ڪنڊيدار تارن جي مدد سان بند ڪيو ويو هو.

 

ناڻي کاتي ننڍن آبادگارن لاءِ ڪريڊٽ گارنٽي اسڪيم جي منظوري ڏئي ڇڏي

اسلام آباد(بيورو) ناڻي واري وفاقي وزير سينيٽر محمد اسحاق ڊار ننڍن آبادگارن لاءِ ڪريڊٽ گارنٽي اسڪيم جي منظوري ڏئي ڇڏي آهي، اها اسڪيم اهڙن آبادگارن لاءِ هوندي جيڪي قرضن عيوض ضمانت پيش ڪرڻ جي صلاحيت نٿا رکن، ان حوالي سان هڪ اجلاس اڱاري ڏينهن وفاقي وزير جي صدارت ۾ ٿيو جنهن ۾ ٻُڌايو ويو ته اسڪيم مان نهري علائقن ۾ 5 ايڪڙ ۽ باراني علائقن ۾  10 ايڪڙن تائين جي ايراضي رکندڙ ننڍا آبادگار فائدو حاصل ڪري سگهندا. موجوده حڪومت هلندڙ مالي سال جي بجيٽ ۾ ان اسڪيم جو اعلان ڪيو هو، جنهن تحت گهٽ ۾ گهٽ قرض هڪ لک رپيا جڏهن ته وڌ کان وڌ مدو هڪ کان ڏيڍ سال آهي. لون ڊفالٽ رسڪ جو اڌ حڪومت ادا ڪندي ۽ ان اسڪيم لاءِ 5 ارب رپيا پهرين ئي رکيا ويا آهن.