تازيون خبرون

Daily Archives: March 16, 2015

لاهور: گرجا گهر اندر 2 خودڪش ڌماڪا، 15 ماڻهو مارجي ويا، 3 ڏينهن سوڳ جو اعلان

لاهور (م.د) پنجاب جي گادي واري شهر لاهور ۾ يوحنا آباد واري علائقي ۾ آچر ڏينهن گرجا گهر ويجهو ٻن خودڪش بم ڌماڪن جي نتيجي ۾ 3 پوليس اهلڪارن، 2 عورتن ۽ هڪ 12 سالا نينگر سميت 15 ماڻهو مارجي ويا جڏهن ته 53 ڄڻا زخمي ٿي پيا. ان سلسلي ۾ ڊي آءِ جي آپريشنز ڊاڪٽر حيدر اشرف موجب ٻئي ڌماڪا خودڪش هئا جن جي نتيجي ۾ 15 ماڻهو مارجي ويا ۽ 53 زخمي ٿي پيا. جڏهن ته اٽڪل 7 ماڻهن جي حالت ڳڻتي جوڳي ٻڌائي وئي آهي. هوڏانهن جنرل اسپتال جي ايم ايس پروفيسر انجم حبيب گوهرا ٻڌايو ته اسپتال ۾ زخمين جي اسپتال جون بهترين سهولتون موجود آهن. ڌماڪي جي نتيجي ۾ ٿيل زخمين کي بهترين طبي امداد ڏني پئي وڃي. هن واقعي جي نتيجي ۾ 15 ماڻهو مارجڻ ۽ 53 ڄڻن جي زخمي ٿيڻ جي تصديق ڪئي آهي. هن چيو ته اسپتال ۾ آيل زخمين کي شديد نوعيت جا زخم آهن، جن مان 7 جي حالت  نازڪ آهي. هوڏانهن ڌماڪي کان هڪدم پوءِ ريسڪيو 1122 سميت ٻيون ريسڪيو ٽيمون ۽ قانون لاڳو ڪندڙ ادارن توڙي پوليس عملدارن موقعي تي پهچي امدادي ڪمن ۾ حصو ورتو. لاهور جي سمورين اسپتالن ۾ هنگامي حالتون لاڳو ڪيون ويون. مليل ڄاڻ موجب چرچ ۾ دعائيه تقريب جاري هئي ته واقعو پيش آيو. چرچ ۾ ان وقت 500 جي لڳ ڀڳ ماڻهو موجود هئا. پوليس جو چوڻ آهي ته حملي آورن گرجا گهر ۾ داخل ٿيڻ جي ڪوشش ڪئي پر اتي مقرر سيڪيورٽي گارڊ کين روڪيو ته خودڪش حملي آور پاڻ کي ڌماڪي سان اڏائي ڇڏيو. پوليس ٻن شڪي ماڻهن کي گرفتار ڪري ورتو آهي. جڏهن ته ان سلسلي ۾ وڌيڪ جاچ ڪئي پئي وڃي. هوڏانهن ايمرجنسي لاڳو ٿيڻ کان پوءِ اسپتالن جي سموري عملي کي ڊيوٽي تي گهرايو ويو ۽ زخمين جي لاءِ اسپتال جي بلڊ بئنڪ ۾ رت جو پڻ بندوبست ڪيو ويو آهي. هوڏانهن آءِ جي پوليس پنجاب جي ترجمان نبيلا غضنفر اي پي پي کي ٻڌايو ته خودڪش حملن ۾ 3 پوليس اهلڪار اصغر، ياور علي ۽ راشد شهيد ٿيا آهن. جڏهن ته غلام رسول سميت 4 پوليس اهلڪار زخمين ۾ شامل آهن. نبيلا غضنفر ٻڌايو ته سيڪيورٽي ليپس وارين خبرن ۾ ڪا به صداقت ناهي ۽ هر آچر تي ڄاڻايل چرچ ۾ دعا واري تقريب ٿيندي آهي جنهن ۾ سيڪيورٽي مقرر ڪئي ويندي جنهن ۾ هڪ اي ايس آءِ ۽ 7 ڪانسٽيبل شامل هوندا آهن ۽ ٻنهي گرجا گهرن تي 12 سيڪيورٽي اهلڪار مقرر هئا. هن چيو ته ڌماڪي واري هنڌ ون سيون سيڪيورٽي موجود هئي جنهن جو ثبوت ان ڳالهه مان به ملي ٿو ته ڌماڪي جي نتيجي ۾ 3 اهلڪار شهيد ۽ 4 زخمي ٿي پيا آهن. هن چيو ته شهيد پوليس اهلڪارن حملي آورن کي چرچ ۾ داخل ٿيڻ کان روڪيو. هن چيو ته صوبي ۾ گرجا گهرن ۽ عبادتگاهن جي سيڪيورٽي وڌائي وئي آهي ۽ پوليس کي پڻ هاءِ الرٽ ڪيو ويو آهي. پنجاب جي وڏي وزير محمد شهباز شريف يوحنا آباد ۾ چرچ ويجهو ڌماڪن جي سخت مذمت ڪندي پوليس اهڪارن سميت قيمتي انساني جانين جي نقصان تي افسوس جو اظهار ڪيو آهي، وڏي وزير مارجي ويلن جي وارثن سان همدردي ۽ تعزيت جو اظهار ڪيو آهي، مارجي ويل ۽ زخمين لاءِ مالي امداد جو اعلان به ڪيو آهي، مارجي ويلن جي وارثن کي 5-5 لک في فوت ۽ زخمين کي 75 -75 هزار مالي مدد ڏني ويندي، وڏي وزير واقعي جو نوٽيس وٺندي انسپيڪٽر جنرل کان رپورٽ طلب ڪري ورتي آهي ۽ واقعي جي جاچ جي هدايت ڪندي چيو آهي ته ذميوارن کي جلد کان جلد گرفتار ڪيو وڃي.

 

 

 

 

 

جنهن به پارٽي ۾ ڏوهاري هوندا، ڪارروائي ضرور ٿيندي: وڏو وزير

لاڙڪاڻو(بيورو) وزيرا عليٰ سنڌ سيد قائم علي شاهه 4 اپريل 2015 تي شهيد ذوالفقار علي ڀٽو جي 36هين ورسي جي انتظامن جو جائزو وٺڻ لاءِ ڳڙهي خدابخش ڀٽو پهتو جتي هن شهيد ذوالفقار علي ڀٽو، شهيد محترمه بينظير ڀٽو، شهيد مير مرتضيٰ ڀٽو،شهيد شاهنواز ڀٽو، مرحومه بيگم نصرت ڀٽو ۽ مرحومه امير بيگم جي مزارن تي حاضري ڀري فاتح پڙهي ۽ گلن جون چادرون چاڙهيون. ان موقعي تي هن ميڊيا سان ڳالهائيندي چيو ته پ پ پ جي باني شهيد ذوالفقار علي ڀٽو جو ملڪي ۽ عالمي سطح تي وڏو مقام آهي جنهن غريب عوام جي ڀرپور خدمت ڪئي ۽ پاڪستان کي مضبوط سياسي ۽ اسلامي قلعو بڻايو، اسلامي سربراهي ڪانفرنس  ڪوٺائي. 4 اپريل 2015 تي ملڪ جي ڪنڊ ڪڙڇ مان لکن جي تعداد ۾ عوامي سمنڊ ڳڙهي خدابخش ڀٽو پهچي شهيد کي خراج تحسين پيش ڪندو، شهيد ذوالفقار علي ڀٽو عوام کي شعور ڏنو ۽ جيئي ڀٽو جو نعرو ڏنو جيڪو ملڪ جي ڪنڊ ڪڙڇ ۾ گونجي رهيو آهي، ان جون ڪوششون ۽ ڪاوشون تمام وڏيون هيون جنهن جي ڪري هو عوام جي دلين تي راڄ ڪري رهيو آهي. هي جلسو رات جو ٿيندو، 11 وڳي کانپوءِ مشاعرو شروع ٿيندو، 12 وڳي کان اڍائي وڳي تائين جلسو منعقد ٿيندو ۽ ان بعد دعائي تقريب منعقد ٿيندي. هن چيو ته انشا الله چيئرمين پ پ پ بلاول ڀٽو زرداري ۽ شريڪ چيئرمين پ پ پ آصف علي زرداري پڻ هن ورسي ۾ شرڪت ڪندا. هن ايم ڪيو ايم جي باري ۾ ڳالهائيندي چيو ته اها هڪ وڏي سياسي پارٽي آهي جنهن کي ڪراچي ۽ حيدر آباد ۾ عوام مينڊيٽ ڏنو آهي ليڪن جنهن به پارٽي ۾ ڏوهاري هوندا ته انهن جي خلاف رينجرس ۽ پوليس قانوني ڪارروائي ڪري انهن کي ڪيفر ڪردار تائين پهچائيندي، جمهوريت جي بقا خاطر امن امان جو هجڻ لازمي آهي جنهن لاءِ رينجرس ۽ پوليس جا جوان رات ڏينهن دهشتگردي جي  پاڙ پٽڻ لاءِ ڪوشان آهن. هي آپريشن وفاقي حڪومت جي تعاون سان سڀني صوبن ۾ جاري آهي ۽ بهترين رزلٽ ملي رهيو آهي. ان سلسلي ۾ اپيڪس ڪاميٽي جون گڏجاڻيون ٿينديون رهنديون آهن جن ۾ امن امان کي قائم رکڻ لاءِ ويچار ڪيو ويندو آهي. هن آپريشن جي منظوري سڀني پارٽين اتفاق راءِ ۽ ڪابينا جي منظوري سان ڏني وئي آهي جنهن لاءِ ڪنهن به پارٽي کي ڪو اعتراض نه هجڻ کپي. ان کان علاوه دهشتگردي جي پاڙ پٽڻ لاءِ آئين ۾ 21 هين ترميم ڪئي وئي ڪا به پارٽي فورسز تي تنقيد نه ڪري ڇو ته هي آپريشن ڏوهارين خلاف، دهشتگردن خلاف بغير مت ڀيد جي جاري آهي. هن چيو ته ايم ڪيو ايم کي ڏوهارين کان لاتعلقي جو اعلان ڪرڻ گهرجي ڇو ته اها سياسي پارٽي آهي. هن چيو ته رينجرس ۽ پوليس ڏوهن جي خاتمي لاءِ حڪومت پاران مليل اختيارهينئر نه پر ڏيڍ سال کان استعمال ڪري رهيا آهن جيڪي ماڻهو چون ٿا ته سنڌ حڪومت خاموش آهي اهي سنڌ جو امن امان ڏسي پوءِ ٻڌائين ته سنڌ حڪومت ڇا پئي ڪري، حڪومت جي ڪوششن سان ئي امن امان ٿيو آهي ۽ هن وقت ڪو به ماڻهو اغوا ٿيل نه آهي ان لاءِ عوام کي به فوج ۽ قانوني لاڳو ڪندڙ ادارن جي مڪمل حمايت ڪرڻ گهرجي. فوج ۽ قانون لاڳو ڪندڙ ادارن کي تڪراري نه بڻايو وڃي، پارليامينٽ ۽ چار ئي صوبائي حڪومتون فوج سان گڏ آهن. ان موقعي تي وزير اعليٰ پنجاب صوبي ۾ ٻن چرچن تي دهشتگرد حملي جي سخت لفظن ۾ مذمت ڪئي ۽ پنجاب حڪومت کي تعاون جو يقين ڏياريو. ان بعد وزير اعليٰ سنڌ ڳڙهي خدابخش ڀٽو ۾ شهيد ذوالفقار علي ڀٽو جي 36 هين ورسي جي سلسلي ۾ مزار ڪاميٽي جي گڏجاڻي جي پڻ صدارت ڪئي. جنهن ۾ ڪمشنر لاڙڪاڻو ڊويزن ڊاڪٽر سعيد احمد مڱڻيجو گڏجاڻي کي آگاهي ڏيندي ٻڌايو ته واسطيدار کاتن کي ورسي دوران پنهنجيون پنهنجيون ذميواريون سونپيون ويون آهن جن ۾ سڪيورٽي کي يقيني بڻائڻ، مزار تي ۽ مزار طرف ايندڙ روٽن تي لائيٽنگ ۽ صفائي جي بندوبست کي يقيني بڻائڻ، مزار تي پيئڻ جي صاف پاڻي ۽ واش رومز لاءِ پاڻي جي فراهمي کي يقيني بڻائڻ، بجلي جي فراهمي کي يقيني بڻائڻ، لوڊ شيڊنگ جي صورت ۾ اسٽينڊ باءِ جنريٽرن جي موجودگي کي يقيني بڻائڻ، مزار طرف ايندڙ روڊن جي مرمت کي يقيني بڻائڻ، مزار تي ميڊيڪل ڪيمپيون قائم ڪرڻ، ڊاڪٽرن، ميڊيڪل اسٽاف ۽ دوائن جي موجود گي يقيني بڻائڻ، ٽريفڪ جي نظام کي بهتر بڻائڻ، مختلف روٽن تي سائن بورڊ لڳائڻ، وي آءِ پي پارڪنگ ۽ ان کان علاوه ٻيون ٽي پارڪنگ بنگلديرو ۽ رتوديرو روڊ تي قائم ڪرڻ، واڪ ٿرو گيٽ لڳائڻ، فائر برگيڊين کي ريڊي پوزيشن ۾ رکڻ شامل آهن. هن وڌيڪ چيو ته ادارن کي جيڪي ذميواريون سونپيون ويون آهن انهن ۾ ڪا به ڪوتاهي برداشت نه ڪئي ويندي. ان موقعي تي ڊي آءِ جي لاڙڪاڻو سائين رکيو ميراڻي سڪيورٽي متعلق ٻڌايو ته سڪيورٽي کي يقيني بڻائڻ لاءِ مزار طرف ايندڙ روڊن، مزار جي اندر ۽ ٻاهر سڪيورٽي کي يقيني بڻايو ويندو ۽ ٽريفڪ جي نظام کي پڻ بهتر بڻايو ويندو. ان موقعي تي وزير اعليٰ سنڌ ڳالهائيندي چيو ته هي ورسيون ملهايون وينديون آهن ته جيئن پنهنجي اڳواڻن کي هميشه ياد رکي سگهجي ۽ انهن کي مڪمل خراج تحسين پيش ڪري سگهجي. پ پ پ جي اڳواڻن ۽ ڪارڪنن کي هدايتون جاري ڪيون ته هو پنهنجي رضاڪار نوجوانن کي هدايتون ڏين ته جيئن مزار طرف ايندڙ ويندڙ رستن تي ايندڙ عوام کي ڀليڪار ڪن. پارٽي ضلعي صدر ايندڙ عوام کي ورسي جون رسمون ختم ٿيڻ کانپوءِ پنهنجي گهرن تائين پهچڻ ۾ تعاون ڪن، ٽريفڪ جا انتظام بهتر بڻايا وڃن ته جيئن ٽريفڪ ۾ ڪا رڪاوٽ نه اچي ۽ روڊ بلاڪ نه ٿي وڃن ان لاءِ مضبوط ٽريفڪ پلان جوڙيو وڃي، سڪيورٽي کي يقيني بڻايو وڃي. پارٽي رضاڪارن کي مزار ۽ ان جي آس پاس مقرر ڪيو وڃي جن کي ورديون پڻ ڏنيون وينديون ۽ اهي پنهنجيون ذميواريون بهتر نموني سان نڀائن. قوم ۽ قومي قيادت 3 فنڪشن ڳڙهي خدابخش ڀٽو ۾ ملهائيندي آهي جيڪي ذميواريون اوهان نڀائيندا آهيو اهي وقت اندر پوريون ڪيون وڃن، هن وڌيڪ واش رومن جوڙڻ لاءِ واسطيدار اختيارن کي هدايت ڪئي ته پلان جوڙي ڏنو وڃي ته جئين شهيد ڀٽو جي ورسي کان پوءِ ضرورت مطابق وڌيڪ واش روم جوڙي سگهجن. ان موقعي تي ايم اين اي محمد اياز سومرو، پ پ پ اڳواڻ عبدالفتاح ڀٽو، مزار ڪاميٽي جو چيئرمين غلام الله ماهوٽو، خير محمد شيخ، اعجاز لغاري، ڊي سي لاڙڪاڻو جاويد علي جاگيراڻي، ايس ايس پي لاڙڪاڻو ڪامران نواز ۽ واسطيدار کاتن جا ڊويزنل ۽ ڊسٽرڪٽ هيڊس موجود هئا. ان بعد وزير اعليٰ سنڌ سيد قائم علي شاهه لاڙڪاڻي ۾ عبدالحامد ڀرڳڙي سان سندس والد عبدالغفور ڀرڳڙي جي وفات ۽ پ پ پ اڳواڻ خير محمد شيخ سان سندس ڀاڄائيءَ جي وفات تي پڻ تعزيت ڪئي ۽ ڌڻي در دعا گهري ته رب العزت مرحومين کي جوار رحمت ۾ جڳهه عطا فرمائي ۽ سندن پونيئرن کي هن صدمي سهڻ جي توفيق عطا فرمائي.

 

جمهوري قوتون گڏ ٿي پاڪستان کي مسئلن کان ڪڍي سگهن ٿيون: رضا رباني

ڪراچي (اسٽاف رپورٽر) سينيٽ جي چيئرمين رضا رباني جو چوڻ آهي ته وفاق طرفان 18 هين ترميم تي عملدرآمد نه پيو ڪيو وڃي جڏهن ته جڪيڏهن 22 هين ترميم اچي ٿي ته ان کي ايوان سامهون رکيو ويندو، سينيٽ چيئرمين رضا رباني قائد اعظم جي مزار تي حاضري ڏني ۽ گلن جي چادر چاڙهي ان موقعي تي سينيٽ چيئرمين رضا رباني عوام جي خواهشن تي پورو لهڻ جو عهد به ڪيو، هن چيو ته پاڪستان هن وقت نهايت ئي مشڪل صورتحال ۾ گهيريل آهي، اندروني ۽ ٻاهرين مسئلن مان نڪرڻ لاءِ ضروري آهي ته سموريون جمهوري قوتون پاڻ ۾ اتحاد کي يقيني بڻائين هن چيو ته فاٽا جي حوالي سان صدارتي آرڊر جاري ٿي چڪو آهي، هاڻ اليڪشن ڪميشن صدارتي آرڊر مطابق اليڪشن ڪرائي سينيٽ چيئرمين چيو وفاق طرفان 18 ترميم تي عملدرآمد نه پيو ڪيو وڃي جڏهن ته 22 هين ترميم ايندي آهي ته ان کي ايوان سامهون رکيو ويندو آهي.

 

صدر ۽ وزيراعظم پاران لاهور بم ڌماڪن جي مذمت، واقعي جي رپورٽ طلب

اسلام آباد (بيورو) صدر ممنون حسين آچر ڏينهن لاهور جي علائقي يوحنا آباد ۾ ٿيندڙ ٻن بم ڌماڪن جي سخت مذمت ڪئي ۽ معصوم جانين جي زيان تي گهري ڏک ۽ افسوس جو اظهار ڪيو آهي. پنهنجي تعزيتي پيغام ۾ صدر چيو ته حڪومت ملڪ مان دهشتگردي ۽ انتهاپسندي جي مڪمل خاتمي لاءِ پرعزم آهي ۽ اهڙي قسم جي بزدلاڻين ڪاررواين سان ان لعنت جي خاتمي جي لاءِ قوم جي پڪي عزم کي ختم نه ٿو ڪري سگهجي. صدر چيو ته حڪومت ۽ قوم دهشتگردي جي لعنت جي خاتمي لاءِ پرعزم آهي. هن چيو ته دهشتگردن جو ڪو مذهب نه آهي ۽ يوحنا آباد جي واقعي ۾ ملوث عنصرن جي خلاف ڀرپور ڪارروائي ڪئي ويندي. صدر حادثي ۾ مارجي ويلن جي خاندانن سان تعزيت جو اظهار ڪيو ۽ لاڳاپيل عملدارن کي هدايت ڪئي ته زخمين کي علاج جون بهترين سهولتون فراهم ڪيون وڃن. وزيراعظم محمد نواز شريف آچر ڏينهن لاهور ۾ ٿيندڙ بم ڌماڪن جي سخت مذمت ڪئي آهي جنهن سبب قيمتي انساني جانيون ضايع ٿيڻ سان گڏوگڏ ڪيترائي ماڻهو زخمي ٿيا. پنهنجي هڪ پيغام ۾ وزيراعظم ڌماڪن ۾ مارجي ويلن جي خاندانن سان تعزيت جو اظهار ڪيو. هن سانحي جي جاچ رپورٽ به طلب ڪري ورتي ۽ لاڳاپيل عملدارن کي هدايت ڪئي ته زخمين کي علاج جون بهترين سهولتون فراهم ڪيون وڃن. وزيراعظم چيو ته حڪومت ملڪ مان دهشتگردي ۽ انتهاپسندي جي لعنت جي خاتمي لاءِ پرعزم آهي. هن صوبائي حڪومتن کي سيڪيورٽي قدمن کي وڌيڪ سخت ڪرڻ ۽ ماڻهن جي جان ۽ مال جي تحفظ کي يقيني بڻائڻ جي لاءِ سمورن قدمن کي يقيني بڻائڻ جي هدايت به ڪئي.

 

سينٽر پرويز رشيد ۽ مشاهد الله خان وفاقي وير جو حلف کڻي ورتو

اسلام آباد (بيورو) صدر ممنون حسين آچر ڏينهن هتي ايوان صدر ۾ منعقد هڪ تقريب ۾ سينيٽر پرويز رشيد ۽ سينيٽر مشاهد الله خان کان وفاقي وزيرن جي عهدن جو حلف ورتو. تقريب ۾ وفاقي وزيرن، قومي اسيمبلي ميمبرن ۽ اعليٰ عملدارن شرڪت ڪئي. ڪالهه آچر ڏينهن هتي جاري پريس رليز موجب صدر سان حلف وٺندڙ وفاقي وزيرن سينيٽر پرويز رشيد ۽ مشاهد الله خان ملاقات ڪئي. صدر ٻنهي سينيٽرن کي وفاقي وزيرن جو عهدو سنڀالڻ تي مبارڪباد ڏني ۽ اميد ظاهر ڪئي ته هو عوامي ڀلائي لاءِ پنهنجون ڪوششون جاري رکندا.

 

پ پ پنجاب ۽ ڪي پي ڪي ۾ مڪاني چونڊن لاءِ ڪميٽي قائم ڪري ڇڏي

ڪراچي(م.ڊ)پيپلز پارٽي پنجاب ۽ ڪي پي ڪي ۾ مڪاني چونڊن لاءِ ڪميٽي قائم ڪري ڇڏي، آصف زرداري اڳواڻن ۽ ڪارڪنن کي مڪاني چونڊن جي تياري ڪرڻ جي هدايت ڪندي چيو آهي ته پيپلز پارٽي جماعتي بنيادن تي مڪاني ادارن جو چونڊون چاهي ٿي. پيپلز پارٽي جي قيادت پنجاب ۽ خيبرپختون خواهه ۾ مڪاني چونڊن لاءِ ڪميٽي جوڙي ڇڏي آهي. پنجاب جي مڪاني چونڊن بابت ڪميٽي ۾ راجا پرويز اشرف، نيئر حسين بخاري، راجا رياض احمد، نديم افضل چن، احمد محمود، مخدوم ارتضي حسين، خواجه رضوان عالم، حيدر زمان قريشي ۽ ٻين کي شامل ڪيو ويو. خيبر پختون خواهه ۾ مڪاني چونڊن لاءِ ڪميٽي ۾ فيصل ڪريم ڪنڊي، عاصمه ارباب عالمگير ۽ ٻين کي شامل ڪيو ويو. ڪميٽي ٻنهي صوبن مان مڪاني چونڊن لاءِ اميدوارن جي چونڊ ڪندي، مڪاني قانون تي نظر رکندي ۽ مڪاني چونڊن بابت حڪمت عملي تيار ڪندي… آصف علي زرداري اڳواڻن ۽ ڪارڪنن کي مڪاني چونڊن جي تياري ڪرڻ جي هدايت ڪندي چيو ته پارٽي اڳواڻ مڪاني چونڊن لاءِ گرائونڊ ورڪ ڪن، پيپلز پارٽي جماعتي بنيادن تي بلدياتي چونڊون چاهي ٿي.

 

ڪراچي ۾ رياست جي رٽ بحال ڪئي پئي وڃي: خواجه آصف

اسلام آباد(بيورو) بچاءِ واري وزير خواجه آصف چيو آهي ته پاڪ فوج ۽ رينجرس ملڪي بقا جي جنگ وڙهي رهي آهي، ڪراچي ۾ رياست جي رٽ بحال ڪئي پئي وڃي. ايم ڪيو ايم جي سربراهه الطاف حسين جي بيان تي ردعمل ظاهر ڪندي خواجه آصف چيو ته ڪراچي ملڪ جي اقتصادي سرگرمين جو مرڪز آهي، ملڪي امن لاءِ ڪراچي ۾ امن ضروري آهي، ڪراچي کانسواءِ ملڪ ۾ امن قائم ڪرڻ مشڪل آهي. بچاءِ واري وزير چيو ته ڪراچي ۾ هر قيمت ۾ امن قائم ڪيو ويندو، ڪراچي کي امن دشمن کان بچايو ويندو، ڪراچي ۾ رياست جي رٽ بحال ڪئي پئي وڃي. هن وڌيڪ چيو ته ڪجهه ڏينهن پهرين ايم ڪيو ايم مارشل لا کي دعوت ڏئي رهي آهي، هاڻي ڪراچي ۾ قانون جي عملداري بحال ڪئي پئي وڃي ته ايم ڪيو ايم شڪايت ڪري رهي آهي….

 

پ پ بلوچستان مٿان 170 ارب روپين جو قرض هڪ منٽ اندر معاف ڪيو: خورشيد شاهه

جيڪب آباد (بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته بلوچستان جي سمورن وسيلن تي بلوچستان جي عوام جو حق آهي بلوچستان مان احساس محرومي ختم ڪرڻ لاءِ پ.پ.پ پنهنجي گذريل دور حڪومت ۾ بلوچستان مٿان وفاق جو 170ارب رپيا قرض وڏي وزير جي درخواست تي هڪ منٽ اندر معاف ڪيو ۽ اين ايف سي ايوارڊ تحت بلوچستان کي وفاق کان ملندڙ ساليانو حصو 47 ارب رپين کان وڌائي 110 ارب رپيا ڪيوسين اهڙن خيالن جو اظهار جو هن بلوچستان جي روحاني حستي درگاهه شهنشاهه بادشاهه جي گادي نشين سردار عبدالله شاهه جي ڳوٺ ۾ سندس ننڍي ڀاءُ خادم حسين شاهه ۽ پٽ سيد عمران شاهه جي پنهنجي ڪيترين ئي حامين سميت پ.پ.پ ۾ شموليت اختيار ڪرڻ واري تقريب کي خطاب ۽ صحافين کي سان ڳالهه ٻولهه ڪندي ڪيو. خورشيد شاهه جو وڌيڪ چوڻ هو ته بلوچستان جي عوام پ پ پ جي سچ جي ننڍڙي گنڍ کي ڇڏي ڪوڙ جي جبل کي ڀاڪر وڌا تنهن سبب هاڻي هو پ پ پ جي حڪومت کي ياد ڪري رهيا آهن هن چيو ته اسان ۾ به ڪجهه خاميون آهن جنهن سبب اسين هن دفعي بلوچستان کان هڪ به سيٽ حاصل نه ڪري سگهيا سين ڇاڪاڻ ته بلوچستان کي ايتري رقم ڏيڻ باوجود اها صحيح نموني عوام تائين نه پهتي بلوچستان جا ڪيترائي علائقا اڄ به صحت ۽ تعليم جهڙي اهم بنيادي مسئلن کان محروم آهن بلوچستان جا معصوم ٻارڙا ۽ عورتون علاج جون سهولتون نه ملڻ سبب تڙپي تڙپي فوت ٿي ويا ۽ هو تعليم کان به محروم آهن هن چيو ته بلوچن سان آمرن پاران ٿيل ناانصافين سبب بي ايل اي جهڙيون ويڙهاڪ تنظيمون عمل ۾ آيون ۽ بلوچ پنهنجا حق حاصل ڪرڻ خاطر جبلن تي چڙهي ويا آهن اڄ جا حڪمران بولان واري علائقي ۾ امن قائم نه ٿيا ڪري سگهن پر شهيد ذوالفقار علي ڀٽو پنهنجي ذهانت سان ڀارت وٽ قيد 90 هزار فوجي ۽ 5 هزار مربا ميل زمين آزاد ڪرائي آمريت جي سياست سبب بلوچستان ۾ نو گو ايرا قائم ٿيا جيڪي جمهوريت ۾ نه هئا اڄ اسان کي بلوچستان جي ڳوٺن ۾ وڃڻ لاءِ پروٽوڪول جي ضرورت پوي ٿي ڪنهن کي احساس آهي ته عام ماڻهون پهنجي ڳوٺن تائين ڪئين پهچي ٿو. هن چيو ته سينيٽ جي چونڊن ۾ نواز شريف ۽ عمران خان ائين هڪ ٻئي کي ڀاڪر وڌا ته جئين وڇڙيل ڀائر مليا هجن، ڪجهه مهينا اڳ جڏهن حڪومت ختم ٿيڻ واري هئي ان مهل اسين حڪومت جو ساٿ ڏئي ڪنٽينٽر مٿان بيهي ٻين جي اشارن تي ڳالهائيندڙن کي شڪت ڏئي خاموش ڪري ڇڏيو سين، هڪ سوال جي جواب ۾ هن چيو ته الطاف حسين بادشاهه آهي ڪڏهن هو فوج جي حمايت ۾ بيان ڏيندو آهي ته وري ڪڏهن مخالف ڪندو آهي سندس جي سياسي مستقبل بابت ڪجهه نه ٿو چئي سگهجي ڀٽو جي پالسين سبب 1970 ۾ وڏا وڏا بت ڪري پيا ۽ پاڻ کي وڏا وڏا سردار سڏائيندڙ 1977 ۾عوام وٽ ووٽ گهرڻ لاءِ زمين تي ويهي منٿون ڪندا رهيا ۽ ڀٽو مٿان تنقيد ڪندڙن جا وات بند ٿي ويا. ان کان اڳ ڪشمور ضلعي سان تعلق رکندڙ ف ليگ اڳواڻ ۽ پي ايس 18 جو اميدوار ڊاڪٽر اقرار علي جکراڻي، نظير حسين، نور الدين جکراڻي، فنڪشنل ليگ لاڙڪاڻي ڊويزن جو ڊويزنل جنرل سيڪريٽري عالمگير خان ڪوش ۽ ٻين پنهنجي حامين سميت پ پ پ ۾ شموليت اختيار ڪئي جڏهن ته ان موقعي تي سردار عبدالله شاهه،سيد عنايت حسين شاهه،پ پ بلوچستان جو صوبائي صدر مير صادق عمراڻي، اڳوڻو صوبائي وزير محمد امين عمراڻي، سليم کوسو، ظهور کوسو، فرحان شاهه، محمد اسلم گولو ۽ ٻيا موجود هئا.

 

ذڪي الرحمان لکوي ڪيس سان پاڪ ڀارت ڳالهيون متاثر نه ٿينديون: سرتاج عزيز

اسلام آباد (بيورو) پرڏيهي صلاحڪار چيو آهي ته ذڪي الرحمان لکوي جي معاملي سان پاڪ ڀارت ڳالهين جو عمل متاثر نه ٿيندو، ڀارت کي به ياد ڏياروي آهي ته سمجهوتا ايڪسپريس معاملي تي ڪهڙي اڳڀرائي ڪئي وئي آهي اسلام آباد ۾ سيمينار کي خطاب ۽ ميڊيا سان ڳالهائيندي پرڏيهي صلاحڪار سرتاج عزيز چيو ته ذڪي الرحمان لکوي جي معاملي تي قانوني عمل هلي رهوي آهي دنيا کي خبر آهي ته پاڪستان جو عدالتي نظام غير جانبدار آهي ذڪي الرحمان جي آزادي جي  فيصلي خلاف اپيل ڪري چڪا آهيون، پرڏيهي صلاحڪار چيو ته پاڪستان پاڻي جي مسئلي تي پنهنجي حقن جو تحفظ ڪري رهيو آهي سنڌ طاس معاهدي تحت ڀارت پاڪستان جي دريائن جو پاڻي ذخيرو نه ٿو ڪري سگهي سيمينار کي خطاب ڪندي هن چيو ته پاڪستان ترڪمانستان سان گڏ پنهنجي خصوصي لاڳاپن کي اهميت ڏئي ٿو، افغان مسئلي سبب گيس لائن منصوبي ۾ دير ٿي رهي آهي ٻنهي ملڪن وچ ۾ عوامي رابطه وڌيڪ مضبوط بڻائڻ لاءِ ويزا کي آسان ڪرڻ سميت ٻيا قدم کڻڻا پوندا، افغانستان ۾ امن ٿيڻ کانپوءِ تاپس تيس منصوبو جلد شروع ٿيندو، منصوبي سان خطي ۾ توانائي راهداري جي شروعات ٿيندي. سرتاج عزيز چيو ته افغانستان ۾ امن قائم ڪرڻ خطي جي ضرورت آهي جڏهن ته افغان طالبان سان ڳالهين لاءِ ڪوبه ٽائم لائن نه ٿا ڏئي سگهون.

 

لاهور ۾ عيسائي ڀائرن جي چرچ تي ڌماڪا بزدلاڻي ڪارروائي آهي: شرجيل ميمڻ

ڪراچي(اسٽاف رپورٽر) بلديات ۽ اطلاعات واري وزير ۽ پاڪستان پيپلز پارٽي جي مرڪزي ڊپٽي سيڪريٽري اطلاعات شرجيل انعام ميمڻ لاهور ۾ عيسائي برادري جي چرچ تي ٿيندڙ ڌماڪن جي سخت لفظن ۾ مذمت ڪندي ان کي دهشتگردن جي بزدلاڻي ڪارروائي قرار ڏنو آهي. هن مسيحي برادري کي يقين ڏياريو آهي ته پاڪستان ۾ رهندڙ هڪ هڪ مسلمان پنهنجي مسيحي ڀائرن جي ڏک ۾ برابر جو شريڪ آهي ۽ سنڌ حڪومت مسيحي برادري سان گڏوگڏ اقليتن جي عبادتگاهن ۽ انهن جي جان ۽ مال جي مڪمل حاظت ڪندي. هن چيو ته طالبان ڊڄڻا، بزدل ۽ ڪانئر آهن ۽ آپريشن ضرب عضب طالبان جي چيلهه ٽوڙي وڌي آهي. ان لاءِ هو بزدلاڻيون ڪارروايون ڪري رهيا آهن. آچر تي جاري پنهنجي بيان ۾ شرجيل انعام ميمڻ چيو ته لاهور ۾ عيسائي ڀائرن جي چرچ تي ڌماڪا بزدلاڻي ڪارروائي آهي. هن چيو ته هر پاڪستاني ۽ هر مسلمان عيسائي ڀائرن جي ڏک ۾ برابر جو شريڪ آهي. شرجيل انعام ميمڻ چيو ته طالبان ڊڄڻا، بزدل ۽ ڪانئر آهن هو نه ته مسلمان آهن نه ئي پاڪستاني ۽ نه ئي انسان آهن. هن چيو ته آپريشن ضرب عضب طالبان جي چيلهه ٽوڙي وڌي آهي. ان لاءِ هو بزدلاڻيون ڪارروايون ڪري رهيا آهيون. شرجيل ميمڻ مسيحي برادري کي پرامن رهڻ جي تلقين ڪندي چيو آهي ته پوري پاڪستاني قوم انهن سان گڏ آهي. پاڪستاني پنهنجن جانين جا نذرانا ڏئي به اقليتن جي حفاظت ڪندا. شرجيل ميمڻ چيو ته سنڌ حڪومت پوري صوبي ۾ اقليتن کي مڪمل تحفظ فراهم ڪندي صوبي ۾ مسلمانن جيان اقليتن ۽ انهن جي عبادتگاهن جي حفاظت اسان جو فرض آهي ۽ ان کي اسان پورو ڪنداسين.