تازيون خبرون

Daily Archives: March 14, 2015

قومي معاملن تي سمورين پارٽين کي اعتماد ۾ ورتو ويندو: نواز شريف

اسلام آباد/لاهور (م.ڊ) مسلم ليگ فنڪشنل جي وفد، وزيراعظم نواز شريف سان ملاقات ڪري ڪراچي آپريشن جي حمايت ڪئي آهي، وزيراعظم چيو آهي ته قومي اهميت وارن معاملن ۾  سڀني سياسي پارٽين کي اعتماد ۾ ورتو ويندو. لاهور ۾وزيراعظم نواز شريف سان پيرپاڳاري جي اڳواڻيءَ ۾ مسلم ليگ فنڪشنل جي وفد ملاقات ڪئي، جنهن دوران پنجاب جو وڏو وزير شهباز شريف ۽ وفاقي وزير صدر الدين راشدي به موجود هئا. ملاقات دوران وفاقي حڪومت پاران سنڌ ۾ امن امان لاءِ کنيل قدمن سميت ملڪ جي سياسي صورتحال تي ڳالهيون ڪيون ويون. ان موقعي تي مسلم ليگ فنڪشنل جي وفد ڪراچي آپريشن جي حمايت ڪندي چيو ته ڪراچي ۾ امن تائين ڏوهارين ۽ انهن جي ٺڪاڻن جي خاتمي تائين آپريشن جاري رهڻ گهرجي. وزيراعظم نواز شريف چيو ته حڪومت قومي اهميت وارن معاملن تي سڀني کي گڏ کڻ هلڻ چاهي ٿي. وزيراعظم نواز شريف سان ملاقات دوران چيني ڪمپني گيز هوبا نيلم جهلم منصوبي ۾ سيڙپڪاري تي دلچپسي ظاهر ڪري ڇڏي آهي، وزيراعظم چيو آهي ته پرڏيهي سيڙپڪارن جي حوصلا افزائي لاءِ بهتر پاليسيون جوڙيون آهن، توانائي بحران جي خاتمي لاءِ به قدم کنيا پيا وڃن. وزيراعظم هائوس اسلام آباد ۾وزيراعظم نواز شريف سان چيني ڪمپني گيزوبا جي وفد فنانشنل آفيسر لـِين  زوياڊن جي اڳواڻي ۾ ملاقات ڪئي. ملاقات دوران چيني ڪمپني جي وفد پاران شمسي توانائي، ايل اين جي ۽ شمسي توانائي مان بجلي پيدا ڪرڻ واري منصوبن تي دلچپسي ظاهر ڪئي وئي. ان موقعي تي ڳالهائيندي وزيراعظم نواز شريف چيو ته حڪومت توانائي بحران جي خاتمي لاءِ قدم کڻي رهي آهي، توانائي منصوبن کي مڪمل ڪرڻ جو وقت مقرر ڪيو ويو آهي. وزيراعظم چيو ته پاڪستان ۽ چين مثالي دوست آهن، ٻنهي ملڪن ۾ اقتصادي سهڪار سان لاڳاپا وڌيڪ مضبوط ٿيندا. وزيراعظم چيو ته حڪومت پرڏيهي سيڙپڪارن جي حوصلا افزائي لاءِ بهتر پاليسيون جوڙيون آهن، سيڙپڪاري ڪندڙن کي هر ممڪن سهڪار فراهم ڪيو ويندو.

 

خيبر ايجنسي ۾ فورسز جي ڪارروائي، 48 دهشتگرد مارجي ويا

خيبرايجنسي (مانيٽرنگ ڊيسڪ) خيبر ايجنسي ۾ سڪيورٽي فورسز جي ڪارروائي دوران وڌيڪ 48 دهشتگرد مارجي ويا. آءِ ايس پي آر موجب دهشتگردن خلاف خيبر ايجنسي ۽ اتر وزيرستان ۾ پاڪ فوج جا آپريشنز ڪاميابيءَ سان جاري آهن. خيبر ايجنسيءَ جي علائقي تيره ماٿري ۾ جيٽ جهازن دهشتگردن جي موجودگي جي اطلاع تي سندن ٺڪاڻن تي بمباري ڪئي،جنهن ۾ 48 ملڪ دشمن مارجي ويا. ڪارروائي دوران 20 کان وڌيڪ دهشتگرد زخمي پڻ ٿي پيا،جڏهن ته شرپسندن جا ڪيترائي ٺڪاڻا پڻ تباهه ڪيا ويا.

 

پاڪستان مقامي طور تي تيار ڪيل ڊرون جهاز جو ڪامياب تجربو ڪري ورتو، آرمي چيف جون قوم کي مبارڪون

راولپنڊي (م.ڊ) پاڪ فوج جي ترجمان آءِ ايس پي آر مطابق پاڪستان مقامي طور تي تيار ڪيل ڊرون جهاز براق ۽ ”برق ليزر گائيڊڊ ميزائيل“ جو ڪامياب تجربو ڪري ورتو آهي، ڊرون جهاز سان ساڪن ۽ حرڪت ڪندڙ هدفن کي ڪاميابي سان نشانو بڻايو ويو جڏهن ته ليزر گائيڊڊ ميزائيل به فائر ڪيو ويو، آرمي چيف جنرل راحيل شريف تجربي جو معائنو ڪيو ۽ اينجنرن ۽ سائنسدانن کي مبارڪباد ڏني، ان موقعي تي آرمي چيف چيو ته اڄ پاڪستان دفاعي شعبي ۾ اهم بنياد پار ڪري ورتو آهي جنهن تي پوري قوم مبارڪباد جي مستحق آهي  براق ۽ براق ليزر گائيڊڊ ميزائيل هر موسم ۾ ڪارائتا ثابت ٿيندا، هن ان عزم جو اظهار ڪيو ته ڊرون جهاز جي مدد سان دهشتگردي خلاف جنگ ۾ مدد ملندي ۽ پاڪ فوج جي آپريشنل تيارين ۾ اضافو ٿيندو.

 

الطاف حسين پاڻ نائن زيرو ۾ ڏوهارين جي موجودگي جو اعتراف ڪري چڪو آهي:خورشيد شاهه

سکر (بيورو) قومي اسيمبلي ۾ مخالف ڌر جي اڳواڻ خورشيد شاهه چيو آهي ته متحده سربراهه الطاف حسين پاڻ نائن زيرو ۾ ڏوهارين جي موجودگي جو اعتراف ڪري چڪو آهي، جيڪڏهن گهرن جي تلاشي ليڊيز اهلڪارن کان ڪرائي وڃي ها ته هو آپريشن تي ڪوبه اعتراض نه ڪن ها. خورشيد شاهه چيو ته نائن زيرو تي رينجرز جي آپريشن کانپوءِ الطاف حسين پاڻ ڏوهارين جي موجودگيءَ جو اعتراف ڪيو هو. هن چيو ته جيڪڏهن گهرن جي تلاش ليڊيز اهلڪارن کان ڪرائي وڃي ها ته هو ان آپريشنتي ڪوبه اعتراض نه ڪن ها. اپوزيشن اڳواڻ جو چوڻ هو ته اسلام ۾ نفرت پکيڙڻ ۽ دهشتگردي جي ڪابه جاءِ ناهي، جنرل ضياءَ جي مجاهدن اسلام جو اصل چهرو بگاڙي ڇڏيو آهي. هن چيو ته پيپلز پارٽي دهشتگرديءَ جي خلاف آهي تنهنڪري سندن قيادت کي دهشتگردن نشانو بڻايو. مخالف ڌر جي اڳواڻ واضح ڪيو ته هو صحيح مذهبي تعليم ڏيندڙ مدرسن جا خلاف ناهن پر هو مذهبي انتهاپسندي خلاف آهن. مخالف ڌر جي اڳواڻ خورشيد شاهه چيو ته جمهوريت جي ڪري ئي سينيٽ جو چيئرمين پ پ ڪارڪن رضا رباني ۽ هو قومي اسيمبلي ۾ مخالف ڌر جو اڳواڻ بڻيو آهي.سيد خورشيد احمد شاھ چيو آهي ته دهشتگردي جو اصل ڪارڻ بک بدحالي آهي جنهن ڪري لشڪرن جا لشڪر دهشتگرد بڻجي رهيا آهن ،هارس ٽريڊنگ جا الزام هڻندڙ عمران خان ٻڌائي ته هن کي 7 مان 16 ووٽ ڪيئن مليا 90 تي رينجرس آپريشن جي جلد ڪميشن رپورٽ اچي ويندي پبلڪ اسڪول سکر جي آڊيٽوريم هال ۾ “پهل پاڪستان پاران رواداري فيسٽيول 2015ع” جي تقريب کي خطاب ڪندي ۽ ميڊيا سان ڳالهائيندي سيد خورشيد احمد شاھ چيو ته اسلام ۾ مذهبي انتهاپسندي نه آهي دين  اسلام ۾ رواداري امن ڀائيچاري ۽ محبت جو درس ڏنل آهي هن چيو ته حڪمران ملڪ ۽ رياست جي مضبوطي لاءِ قدم ۽ توجھ نه ڏيندا آهن ته بيروز گاري،دهشتگردي ۽ مذهبي نفرتون جنم وٺنديون آهن دهشتگردي جو اصل ڪارڻ بک بدحالي آهي جنهن ڪري لشڪرن جالشڪر دهشتگرد بڻجي ويا يا ان رستي ڏانهن وڃي رهيا آهن هن جو چوڻ هو ته اسلام جي تعليم ڏيندڙ مدرسا خراب نه آهن پر اها سوچ آهي ته مدرسن ۾ دهشتگردي ۽ طالبانائزيشن جي تعليم ۽ سکيا ڏني وڃي ٿي ان ڳالھ کي  هو نه ٿو مڃي. جيڪڏهن ڪٿي دهشتگردي يا جهاد جو درس ڏنو وڃي ٿو ته انهن کي مدرسن کان ڌار ڪيو وڃي سنڌ جي ثقافت امن ڀائيچاري  واري آهي پر موجوده صورتحال ۾   شاھ لطيف جي رسالي ۽ صوفي ازم جي ڪتابن کي پڙهڻ بدران لائبريرين جي زينت بڻايو ويو آهي. هن چيو ته، بهتر تعليم ۽ حقوق العباد تي مڪمل طور ڌيان ڏيڻ سان ملڪ مان دهشتگرديءَ جو خاتمو آڻي سگهجي ٿو، جيسيتائين حڪمران رياست کي پورو وقت ڏيڻ سان گڏوگڏ تعليم، صحت، آبادي، ماحوليات ۽ ٻهراڙي ترقيءَ جي شعبن تي ڌيان نه ڏيندا تيسيتائين ملڪ ترقي نه ماڻي سگهندو ۽ دهشتگردي ختم نه ٿي سگهندي. هن چيو ته آباديءَ تي ڪنٽرول کانسواءِ ترقي نه ٿي ٿي سگهي، جيستائين آبادي ۽ وسيلن ۾ برابري نه ٿيندي تيسيتائين ترقي ناممڪن آهي، حڪمرانن کي گهرجي ته آبادي، ماحوليات ۽ ٻهراڙي ترقي وارن کاتن تي ڌيان ڏين ۽ رياست کي پورو وقت ڏين. تقريب  ۾ پهل پاڪستان جي ڊائريڪٽر سيمسن سلامت، جامي چانڊيو، ڊي آءِ جي سکر سائين رکيو ميراڻي، ابرار پاشا ۽ پوري پاڪستان کان آيل انساني حقن لاءِ جاکوڙيندڙ تنظيمن جي اڳواڻن ۽ ڪارڪنن شرڪت ڪئي.

 

بجلي چوري روڪڻ لاءِ ٽرانسفارمر به لاهي سگهجن ٿا:خواجا آصف

اسلام آباد (بيورو) پاڻي ۽ بجلي واري وفاقي وزير خواجا آصف چيو آهي ته جن علائقن مان بجلي جون رهتون ادا نه ٿينديون اتي بجلي فراهم نه ڪئي ويندي ۽ بجلي چوري روڪڻ لاءِ ٽرانسفارمر به لاهي سگهجن ٿا. آئيسڪو جي هيڊڪوارٽر اسلام آباد ۾ تقريب کي خطاب ڪندي خواجا آصف جو چوڻ هو ته ٽرانسميشن لائينز جي خرابين کي ختم ڪرڻ لاءِ پاور ٽرانسميشن نظام کي جديد ڪيو پيو وڃي. هن چيو ته پهريون ڀيرو صنعتي علائقن ۾ بجلي جي لوڊشيڊنگ به ختم ڪئي پئي وڃي پر بجلي چوري ڪندڙ علائقن مان ادائگي نه ٿيڻ جي صورت ۾ جيڪڏهن ٽرانسفارمر به لاهڻ پيا ته لاهيا ويندا. هن چيو ته ملڪ جي ڪيترن علائقن ۾ 6 کان 8 ڪلاڪن جي اعلانيل لوڊشيڊنگ ٿي رهي آهي پر جن علائقن ۾ بجلي جون رهتون ادا ناهن ٿيون اتي لوڊشيڊنگ جو وقت 15 کان 18 ڪلاڪ ڪيو ويو آهي

 

ڪراچي آپريشن ايم ڪيو ايم سميت سمورين جماعتن جي حمايت سان پيو ٿئي: وڏو وزير

ڪراچي (اسٽاف رپورٽر) وڏي وزير سيد قائم علي شاهه، سنڌ ۾ ڀنگ عيوض اغوا جو هڪ به ڪيس نه هئڻ جي دعويٰ ڪندي چيو آهي ته ڪراچي ۾ آپريشن متحده سميت سمورين جماعتن جي حمايت سان ڪيو پيو وڃي، جڏهن ته قانون لاڳو ڪندڙ ادارن کي ڪارروائي جا مڪمل اختيار آهن. ڪراچي ۾ ميڊيا سان ڳالهائيندي قائم علي شاهه چيو ته سنڌ جي راڄڌاني واري شهر ۾ امن قائم ڪرائڻ لاءِ آپريشن سمورين جماعتن سان صلاح مشوري بعد شروع ڪيو ويو. وڏي وزير چيو ته آپريشن کانپوءِ ڪراچي ۾ امن امان جي صورتحال گهڻي حد تائين بهتر ٿي آهي. نائين زيرو تي ڇاپي بابت پڇيل سوال جي جواب ۾ سيد قائم علي شاهه چيو ته رينجرز ايم ڪيو ايم جي مرڪز تي ڇاپو 21هين آئيني ترميم تحت هنيو. سندس چوڻ هو ته ڪراچي آپريشن ۾ حصو وٺندڙ قانون لاڳو ڪندڙ ادارن کي وزيراعظم ميان نواز شريف مڪمل اختيار ڏنا آهن. وڏي وزير چيو ته نائين زيرو تي ڇاپي وارو ڪيس هاڻي عدالت ۾ آهي،انڪري هو ڪو به تبصرو نٿو ڪرڻ چاهي. هن چيو ته ايم ڪيو ايم جي ڪارڪن وقاص شاهه جي قتل جي جاچ لاءِ ٽيم جوڙي وئي آهي. وڏي وزير سيد قائم علي شاهه ان موقعي تي دعويٰ ڪئي ته ڪراچي کان ڪشمور تائين صوبي ۾ ڪٿي به ڀنگ لاءِ اغوا جو ڪيس موجود ناهي. ان کان اڳ سعيد آباد پوليس ٽريننگ سينٽر ۾ 87هين پاسنگ آئوٽ پريڊ تقريب کي خطاب ڪندي وڏي وزير سيد قائم علي شاهه،سنڌ ۾ امن امان جي خراب صورتحال جو اعتراف ڪندي چيو ته صوبي ۾ امن قائم ڪرائڻ لاءِ پوليس ۽ رينجرز کي هدايتون جاري ڪيون ويون آهن. سندس چوڻ هو ته سنڌ جي عوام کي پ پ سرڪار مان وڏيون اميدون آهن، جن تي پورو لهڻ لاءِ هو ڏينهن رات جاکوڙي رهيا آهن. قائم علي شاهه چيو ته سنڌ کي پرامن بڻائڻ لاءِ پوليس جي جوانن جي فوج کان تربيت ڪرائڻ وقت جي اهم ضرورت آهي. هـُن چيو ته تمام جلد سنڌ پوليس جون پگهارون به پنجاب پوليس جي برابر ڪيون وينديون، جنهن لاءِ پوليس جي بجيٽ 15 ارب مان وڌائي 60 ارب رپيا ڪئي وئي آهي. سنڌ جي وڏي وزير چيو ته ايندڙ ڪجهه وقت ۾ سنڌ پوليس کي جديد ترين ۽ هر قسم جون سهولتون ميسر هونديون. شڪارپور سانحي بابت ڳالهائيندي سيد قائم علي شاهه چيو ته شڪارپور سانحي جي جاچ لاءِ جوڙيل ڪميٽي سٺي ڪارڪردگي ڏيکاري رهي آهي.

 

ادارن ۾ انتظامي معاملا حڪومت جي ذميواري آهن، رنڊڪ نه وڌي وڃي: شرجيل ميمڻ

ڪراچي (اسٽاف رپورٽر) اطلاعات ۽ بلديات واري صوبائي وزير شرجيل انعام ميمڻ سنڌ هاءِ ڪورٽ پاران بلديات کاتي مان گهوسٽ ملازمن جي خاتمي لاءِ کين سنڌ بئنڪ ۾ اڪائونٽ کولرائڻ جي پابندي خلاف جاري ڪيل اسٽي آرڊر تي افسوس جو اظهار ڪندي ان کي حڪومتي ڪمن ۾ مداخلت قرار ڏنو آهي. هن چيو آهي ته ادارن ۾ انتظامي معاملا حڪومت جي ذميواري آهن ۽ ادارن ۾ گھوسٽ ملازمن جي خاتمي لاءِ ورتل اُپائن تي عدالت سڳوري جواسٽي آرڊر افسوس جوڳو آهي. جمعي جي شام پنهنجي هڪ جاري ڪيل بيان ۾ شرجيل انعام ميمڻ چيو آهي ته بلديات کاتي مان گھوسٽ ملازمن جي نيڪالي لاءِ انهن تي سنڌ بئنڪ ۾ اڪائونٽ کولڻ جي شرط سنڌ حڪومت رکي هئي ته جيئن انهن گهوسٽ ملازمن جو خاتمو آڻي سگھجي جيڪي نه رڳو ڪمن ۾ رڪاوٽ بڻيل آهن پر حڪومت جا ڪروڙين روپيا پڻ هڙپ ڪري رهيا آهن، پر افسوس آهي جو سنڌ هائي ڪورٽ پاران حڪومتي اُپائن تي اسٽي آرڊر جاري ڪيو پيو وڃي. هن چيو ته ادارن ۾ انتظامي معاملا حڪومت جي ذميواري آهن ان ۾ رنڊڪ نه وڌي وڃي. شرجيل انعام ميمڻ چيو ته انتظامي معاملا حڪومت جو اختيار آهي ان تي  اسٽي آرڊر اچڻ حڪومتي معاملن ۾ رنڊڪ وجھڻ آهي . هن چيو ته سمورن ملازمن کي نوڪري تي حاضر رکڻ حڪومت جي ذميواري آهي ۽ ان بابت حڪومت اُپاءَ وٺي رهي آهي ۽ اهڙي موقعي تي عدالت سڳوري پاران اسٽي آرڊر نه فقط حڪومتي معاملن ۾ رنڊڪ  آهي پر گھوسٽ ملازمن کي به موقعو ملي رهيو آهي. شرجيل انعام ميمڻ چيو ته مان بلديات ۽ ان سان لاڳاپيل کاتن ۾ سالن کان پکيڙيل گند صاف ڪري رهيو آهيان ۽ سمورن معاملن کي بهتر کان بهتر ڪرڻ جي ڪوشش ڪرڻ ۾ مصروف آهيان. هن چيو ته ائين محسوس ٿي رهيو آهي ته عدالتون حڪومتي انتظامي ڪمن تي اسٽي آرڊر جاري ڪري انهن ڪمن ۾ دخل اندازي ڪري رهيون آهن.

 

ڪراچي: نائين زيرو تان گرفتار وڌيڪ 32 ڪارڪن رينجرز ۽ 26 جوابدار پوليس حوالي

ڪراچي (اسٽاف رپورٽر) ڪراچيءَ جي دهشتگردي ٽوڙ عدالت،نائن زيرو تان ڇاپي دوران گرفتار ڪيل ايم ڪيو ايم جي وڌيڪ 32 ڪارڪنن کي 90 ڏينهن جي رمانڊ تي رينجرز ۽ فيصل موٽا سميت ٽن جوابدارن کي 25 مارچ  تائين جسماني ريمانڊ تي پوليس حوالي ڪري ڇڏيو. رينجرز پاران ايم ڪيو ايم جي مرڪز نائين زيرو تان گرفتار ڪيل وڌيڪ 58 ڪارڪنن کي دهشتگردي ٽوڙ عدالت ۾ پيش ڪيو ويو. رينجرز،گرفتار جوابدارن کي اکين تي پٽيون ٻــَڌي ۽ هٿڪڙيون هڻي عدالت ۾ پيش ڪيو. عدالت ۾ پيش ڪيلن ۾ صحافي ولي خان بابر قتل ڪيس جو جوابدار فيصل عرف موٽا،فرحان شبير، نادر شاهه، صدام حسين ۽ ٻيا شامل هئا، جڏهن ته جوابدارن تي دهشتگردي،غير قانوني هٿيار ۽ ڌماڪيدار مادو رکڻ جا ڪيس داخل آهن. جاچ آفيسر عدالت کي ٻڌايو ته فيصل موٽا سميت 3 جوابدار سزا يافته ڏوهاري آهن جن جي قبضي مان هٿيار به برآمد ٿيا آهن. عدالت ريمارڪس ڏنا ته جوابدارن جي قبضي مان برآمد ٿيل هٿيار ڇو نه پيش ڪيا ويا ۽ ريمانڊ ڪهڙي ريت ڏنو وڃي؟ ان موقعي تي جاچ آفيسر موقف اختيار ڪيو ته فيصل عرب موٽا صحافي ولي خان بابر جي قتل ڪيس ۾ موت جي سزا جو جوابدار آهي جنهن کان وڌيڪ جاچ ڪرڻي آهي. دهشتگردي ٽوڙ عدالت، 32 جوابدارن کي تحفظ پاڪستان آرڊيننس تحت 90 ڏينهن لاءِ رينجرز ۽ فيصل موٽا توڙي عبدي ڪي ٽو سميت 26 جوابدارن کي 25 مارچ تائين جسماني ريمانڊ تي پاپوش پوليس حوالي ڪري ڇڏيو

 

آزادي بس جي اڳين منزل لاهور آهي، عمران احتجاج جو اعلان ڪري ڇڏيو، ڪارڪنن کي تياري جي هدايت

اسلام آباد (بيورو) پاڪستان تحريڪ انصاف جي چيئرمين عمران خان ڪارڪنن کي احتجاج جي تياري جي هدايت ڪندي چيو آهي ته آزادي بس جي اڳين منزل لاهور آهي، تحريڪ انصاف جي ڪارڪن جي جذبي کي ڪوبه پئسي سان خريد ڪري نٿو سگهي، سينيٽ چونڊن ۾ هارس ٽريڊنگ ڪندڙ پارٽين کي شرمندگي سهڻي پئي، پورو پاڪستان خاص ڪري نوجوانن جي اميدن جو محور تحريڪ انصاف بڻجي چڪي آهي. هو بني گالا ۾ تحريڪ انصاف جي نئين چونڊيل سينيٽرز ۽ خيبر پختونخوا ۾ تحريڪ انصاف ۽ اتحادي پارٽين جي ايم پي ايز کي ڏنل مانجهاندي کي خطاب ڪري رهيو هو. مانجهاندي ۾ خيبر پختونخوا وڏي وزير پرويز خٽڪ، جماعت اسلامي جي امير سينيٽر سراج الحق، خيبر پختونخوا سان تعلق رکندڙ صوبائي وزيرن سميت اتحادي پارٽين جي ايم پي ايز شرڪت ڪئي. ان موقعي تي عمران خان نهايت خوشگوار موڊ ۾ خطاب ڪندي خيبر پختونخوا ۾ هارس ٽريڊنگ کي ناڪام بڻائڻ تي صوبائي اسيمبلي ميمبرن کي واڌايون ڏيندي چيو ته اسيمبلي ميمبرن جهڙي جرئت جو مثال ڪٿي نٿو ملي، تحريڪ انصاف جي ايم پي ايز سينيٽ چونڊن ۾ هارس ٽريڊنگ رد ڪري ڇڏي، هارس ٽريڊنگ ڪندڙ پارٽين کي شرمندگي سَهڻي پئي، ميمبرن کي سلام پيش ڪريان ٿو، ثابت ٿي ويو ته تحريڪ انصاف جي ڪارڪنن جي جذبي کي پئسي سان نٿو خريد ڪري سگهجي. عمران خان چيو ته ڪارڪن رستن تي اچڻ جي تياري ڪري وٺن، آزادي بس رواني ٿيڻ واري آهي، ڪارڪن پنهنجون تياريون مڪمل رکن. آزادي بس هاڻ لاهور پهچندي، پوري پاڪستان جون اميدون خيبر پختونخوا حڪومت سان جڙيل آهن، خاص ڪري نوجوان تحريڪ انصاف ڏانهن نهاري رهيا آهن.

 

سياسي پارٽين ۾ تڪرارن سبب عوام جا مسئلا حل ناهن ٿيندا: سراج الحق

اسلام آباد (بيورو) سياسي جرڳي جڊيشل ڪميشن جي قيام لاءِ نيون تجويزون تيار ڪري ورتيون آهن، اڳواڻن چيو آهي ته جڊيشل ڪميشن قائم نه ٿيڻ سبب جمهوريت ۽ سياست جي گاڏي ساڳي هنڌ بيٺل آهن، سياسي جرڳو مسئلن جي حل لاءِ ڪوششون ڪري رهيو آهي. اسلام آباد ۾ رحمان ملڪ جي رهائشگاهه تي سياسي جرڳي جو اجلاس ٿيو، جنهن ۾  جماعت اسلامي جي امير سراج الحق،حاصل بزنجي ۽ جي جي جمال شرڪت ڪئي. اجلاس کانپوءِ ميڊيا سان ڳالهائيندي سراج الحق چيو ته سياسي پارٽين ۾ تڪرارن سبب عوام جا مسئلا حل ناهن ٿيندا، عوام جي خواهش هوندي آهي ته سڀ پارٽيون گڏجي مسئلا حل ڪن. هن چيو ته عام چونڊن ۾ ڌانڌلي واري معاملي تي پـِي ٽـِي آءِ جي جڊيشل ڪميشن جي قيام وارو معاملو انتهائي اهم آهي، ن ليگ واعدي باوجود عدالتي ڪميشن قائم ناهي ڪئي. سراج الحق چيو ته سياسي جرڳو ٻنهي پارٽين ۾ معامل حل ڪرڻ جي ڪوشش ڪري رهيو آهي، جڊيشل ڪميشن قائم نه ٿيڻ ڪري جمهوريت ۽ سياسي پارٽي جي گاڏي اتي بيٺل آهي. هن چيو ته پي ٽي آءِ جڊيشل ڪميشن ۾ آءِ ايس آءِ ۽ ايم اي جي نمائندن کي شامل ڪرڻ جو مطالبو ڪري رهي آهي پر اهي ادارا به پاڪستان جا آهن، ادارن جو ڪم ڄاڻ فراهم ڪري ڏيڻ آهي، وڌيڪ فيصلو عدالت ئي ڪندي. ان موقعي تي ڳالهائيندي رحمان ملڪ چيو ته سياسي جرڳي نيون سفارشون تيار ڪري ورتيون آهن، جيڪي حڪومت، پي ٽي آءِ ۽ ٻين سياسي پارٽين ڏانهن به موڪليون وينديون. رحمان ملڪ چيو ته اسحاق ڊار سان جڊيشل ڪميشن جي قيام بابت ڳالهايو آهي  ۽ کيس چيوآهي ته عدالتي ڪميشن جو طريقيڪار فائنل ڪيو وڃي.