تازيون خبرون

Daily Archives: March 12, 2015

سڄي ملڪ ۾ موٽروي جو ڄار وڇايو ويندو، لوڊشيڊنگ 2017 تائين ختم ٿي ويندي: نواز شريف

ڪراچي (اسٽاف رپورٽر) وزيراعظم محمد نوازشريف چيو آهي ته پاڪستان آڏو 3 وڏا چئلينجز دهشتگردي، توانائي ۽ معاشي بحرانن کي منهن ڏيڻ حڪومت سمورا وسيلا ڪتب آڻي رهي آهي اهو ڏينهن ويجهو آهي جڏهن ملڪ مان دهشتگردي ختم ٿي ويندي ۽ حڪومتي قدمن سبب پاڪستان کي ترقي يافته ملڪن جي صف ۾ شامل ڪنداسين 2017 تائين ملڪ مان بجلي جو بحران ختم ٿي ويندو سڄي ملڪ ۾ موٽر وي جو ڄار وڇائي ڇڏينداسين ڪراچي لاهور موٽر وي کان علاوه خنجراب کان گوادر تائين ۽ پشاور کان ڪابل تائين موٽر وي تعمير ڪئي ويندي موٽر ويز کي وش ايشيائي ملڪن سان جوڙينداسين ان سان نه صرف ملڪ ۾ روزگار جا موقعا پيد اٿيندا پر غربت گهٽجي ويندي جلد تعليمي بجيٽ 2 سيڪڙو مان وڌائي 4 سيڪڙو ڪئي ويندي اهڙن خيالن جو اظهار هن اربع تي سپر هاءِ وي تي ڪراچي کان لاهور موٽر وي جي پهرين مرحلي تحت ڪراچي کان حيدرآباد موٽر وي جو پيڙهه جو پٿر رکڻ جي تقريب کي خطاب ڪندي ڪيو ان موقعي تي گورنر ڊاڪٽر عشرت العابد خان وزيراعليٰ سيد قائم علي شاهه نيشنل هاءِ وي اٿارٽي جو چيئرمين شاهد اشرف تارڙ فرنٽيئر ورڪس آرگنائيزيشن جو ڊائريڪٽر جنرل ميجر محمد افضل ۽ ٻيا به موجود هئا ان موقعي تي اين ايڇ اي ۽ ايف ڊبليو او ۾ ايم نائين منصوبي جي تعمير جي حوالي سان معاهدي تي صحيحون ڪيون ويون ايم نائين موٽر وي تي سڪس لائينز هوندي جيڪا ڪراچي کان حيدرآباد وچ ۾ 139 ڪلومير تائين اڏي ويندي هي رٿا 36 ارب جي لاڳت سان 30 مهينن ۾ مڪمل ڪئي ويندي تقريب کي خطاب ڪندي وزيراعظم چيو ته منهنجي لاءِ فخر جي ڳالهه آهي ته مان هن عظيم رٿا جو پيڙهه جو پٿر رکي رهيو آهيان منهنجي دلي خواهش هئي ته ڪراچي کان لاهرو تائين موٽر وي اڏجي هن رٿا جو پهريون مرحلو ڪراچي کان حيدرآباد تائين هوندو ٻيو مرحلو حيدرآباد کان سکر، ٽيون مرحلو سکر مان ملتان ۽ آخري مرحلو ملتان کان لاهور تائين هوندو هن چيو ته دنيا جي ترقي يافته ملڪن جي ترقي جو راز اهو آهي ته اتي انفرااسٽريڪچر هجون سهولتون موجود آهن ۽ جديد شاهرائون انهن ملڪن ۾ تعمير ڪيون ويون آهن هن چيو ته 1991 ۾ پاڪستان ۾ موٽر وي جي اڏاوت جي شروعات ڪئي ويئي پشاور کان اسلام آباد ۽ اسلام آباد کان لاهور تائين موٽر وي تعمير ڪئي ويئي 1997 ۾ ڇا ٿيو هي سڀ ڄاڻن ٿا اسان جي حڪومت ختم ٿيڻ کان پوءِ هي رٿا اڌ ۾ رهجي ويئي اڄ اسان سان هلندڙ ملڪ اسان کان اڳتي نڪري ويا آهن اڄ به اسان اتي ئي بيٺا آهيون جتي اسان 20 سال اڳ هئاسين ڪجهه منصوبن جي مڪمل ٿيڻ تي تسلسل برقرار ناهي رهي سگهيو جنهن سبب اسان ڪيترائي سال پوئتي هليا ويا آهيون هن چيو ته پاڪستان جي آبادي اٽڪل 18 ڪروڙ آهي هتي نوجوانن جو وڏو انگ موجود آهي اسان جا نوجوان هنرمند آهن جيڪي ٻين ملڪن ۾ وڃي انهن جي ترقي ۾ اهم ڪردار ادا ڪري رهيا آهن اسان کي پنهنجي نوجوان نسل جي صلاحيتن کان فائدو وٺڻو پوندو ۽ نوجوانن کي روزگار جا موقعا فراهم ڪرڻا پوندا. ڪراچي کان حيدرآباد موٽر وي جي اڏاوت جو ڪم شروع ڪيو پيو وڃي هن رٿا سان اسان ملير ايڪسپريس وي به تعمير ڪنداسين هي 42 ڪلوميٽر ڊگهو روڊ هوندو هي شاهراهه پورٽ کان ايم نائين تائين جوڙي ويندي هن جي اڏاوت جو مقصد اهو آهي ته ڪارگو ٽرانسپورٽ شهر ۾ داخل ٿيڻ کان سواءِ سڌي طرح ان ڪوريڊور ذريعي ايم نائين سان ملي وڃي ۽ تيز رفتاري سان تجارتي سامان جي هڪ علائقي کان ٻئي علائقي تائين چرپر سولائي سان ٿي سگهي وزيراعظم چيو ته حيدرآباد کان سکر تائين موٽر جي جي اڏاوت لاءِ وسيلن جا انتظام ڪري رهيا آهيون سکر کان ملتان تائين موٽر وي پاڪ چين اقتصادي راهداري جي منصوبي تحت تعمير ٿيندي ملتان کان لاهور تائين مور وي جي اڏاوت ايف ڊبليو او ڪندي هن چيو ته هزاره موٽر وي جي اڏاوت جو ڪم به جاري آهي جڏهن ته خنجراب کان گوادر تائين موٽر جي اڏاوت به جلد شروع ڪئي ويندي. وزيراعظم چيو ته سنڌ جو وڏو وزير سنڌ ۾ موٽر وي جي اڏاوت دوران صنعتي زون به قائم ڪري وفاق ان حوالي سان هر ممڪن مدد ڪندو هن چيو ته تعليم جي بجيٽ کي 2 سيڪڙو مان وڌائي 4 سيڪڙو ڪيو ويندو هن چيو ته تعليم صحت ۽ سماجي بهبود جي رٿائن تي خاص توجهه ڏني پئي وڇي جنهن سان نه صرف روزگار وڌندي پر غربت به ختم ٿيندي هن چيو ته اسان ملڪي رٿائن کي پنهنجن وسيلن سان مڪمل ڪنداسين ۽ پاسڪتان کي ترقيافته ملڪن ۾ شامل ڪنداسين هن ايف ڊبليو او کي هدايت ڪئي ته هن منصوبي کي 24 مهينن ۾ مڪمل ڪيو وڃي سنڌ جي وڏي وزير چيو ته سنڌ ۾ ڪراچي حيدرآباد موٽر وي خاص ڪري سنڌ ۾ موٽر وي جي تعمير سان معاشي سرگرميون وڌنديون ۽ ان سان نه صرف حادثا گهٽجي ويندا پر صوبو به ترقي ڪندو هن موٽر وي رٿا جي شروعات تي وزيراعظم جو شڪريو ادا ڪيو ان موقعي تي ايف ڊبليو او جي ڊي جي ميجر جنرل محمد افضل چيو ته ايم نائين موٽر وي سڪس لائينز هوندي موٽر وي جي آسپاس سروس لين به تعمير ڪئي ويندي جڏهن ته مسافرن جي سروس ۽ حادثن کي منهن ڏيڻ لاءِ طبي امداد فراهم ڪرڻ لاءِ ٻه ٽراما سينٽر به قائم ڪيا ويندا هن چيو ته هي منصوبو مقامي بئنڪن جي تعاون ڪيو ويندو ۽ ٽول پلازه ۾ آمدني ٿيندڙ قرض ادا ڪيو ويندو هن چيو ته ايم نائين رٿا جديد سهولتن سان تيار ٿيندي.

 

نائين زيرو تي رينجرز جو ڇاپو، نيٽو جا چوري ٿيل هٿيار هٿ، 6 گرفتار

ڪراچي (اسٽاف رپورٽر) رينجرز، ڪراچي ۾ ايم ڪيو ايم جي مرڪز نائن زيرو تي آپريشن ڪري صحافي ولي بابر جي قاتل سميت 6 ڏوهارين کي گرفتار ڪري وڏي انگ ۾ هٿيار هٿ ڪري ورتا،ڇاپي دوران عزيز آباد سميت مختلف علائقن ۾ فائرنگ دوران متحده ڪارڪن مارجي ويو ۽ خانگي ٽي وي چئنل جي ڪيمرامين سميت 3 ڄڻا زخمي ٿي پيا. اڄ صبح سوير 5 وڳي ڌاري رينجرز جي وڏي نفري عزيز آباد واري علائقي ۾ ايم ڪيو ايم جي مرڪز نائين زيرو جو گهيراءُ ڪري سرچ آپريشن ڪيو. رينجرز موجب آپريشن دوران وڏي انگ ۾ پرڏيهي ۽ نيٽو ڪنٽينرز مان چوري ٿيل هٿيار هٿ ڪري 6 خطرناڪ ڏوهارين کي گرفتار ڪيو ويو. رينجرز موجب گرفتار ڪيل ڏوهارين ۾ صحافي ولي بابر جو قاتل فيصل موٽا،عبيد ڪي ٽو، فرحان شبير عرف ملان، عامر ۽ نادر شامل آهن. ڪارروائي دوران رينجرز اهلڪارن ايم ڪيو ايم جي اهم اڳواڻن عامر خان،عبدالحسيب، ريحان ظفر ۽ ٻين کان پڇا ڳاڇا پڻ ڪئي. رينجرز آپريشن جو اطلاع ملڻ تي متحده جا ڪارڪن وڏي انگ ۾ نائين زيرو ٻاهران گڏ ٿي ويا،جن کي ڇڙوڇڙ ڪرڻ لاءِ رينجرز پاران هوائي فائرنگ ڪئي وئي. متحده جي مرڪز نائن زيرو تي آپريشن بعد عزيز آباد جي مڪا چوڪ سميت شهر جي مختلف علائقن ۾ فائرنگ دوران ايم ڪيو ايم ميڊيا سيل جو ذميوار سيد وقاص شاهه مارجي ويو، جڏهن ته خانگي ٽي وي چئنل جي ڪيمرامين سميت 3 ڄڻا زخمي پڻ ٿي پيا.

 

آصف زرداري جو الطاف حسين سان رابطو، جمهوريت جي بقا خاطر لاڳاپا قائم رکڻ تي اتفاق

لنڊن (مانيٽرنگ ڊيسڪ) پاڪستان پيپلز پارٽي جي ڪو چيئرمين ۽ اڳوڻي صدر آصف علي زرداري ۽ ايم ڪيو ايم اڳواڻ الطاف حسين وچ ۾ فون تي ڳالهه ٻولهه ٿي، الطاف حسين آصف زرداري کي پنهنجي رهائشگاهه سميت ايم ڪيو ايم جي مرڪزي آفيس نائين زيرو تي ۽ پنهنجي ڀيڻ جي گهر تي رينجرز جا ڇاپا، ڀڃ ڊاهه ، ايم ڪيو ايم جي رابطا ڪميٽي جي ميمبرن جو گرفتاريون ۽ رينجرز اهلڪارن جي فائرنگ ۾ ڪارڪن وقاص شاهه جي شهادت کان آگاهه ڪيو، الطاف حسين چيو ته ايم ڪيو ايم قيام امن لاءِ ڪوشان آهي، اڄ ان جي مرڪز تي جهڙي طرح ڇاپو هنيو ويو آهي، جهڙي طرح عهديدارن ۽ ڪارڪنن کي گرفتار ڪيو ويو، ان جي جيتري به مذمت ڪجي اها گهٽ آهي، آصف زرداري نائين زيرو تي رينجرز جي آفيس تي ڇاپي جي مذمت ڪندي چيو ته سياسي جماعتن جي آفيسن جي تقدس جو خيالن رکڻ گهرجي، آصف علي زرداري الطاف حسين کي يقين ڏياريو ته پ پ ۽ ايم ڪيو ايم هر قسم جي حالتن ۾ جمهوريت جي بقا لاءِ لاڳاپن کي قائم رکنديون.

 

رينجرز ڪمبل ۾ ويڙهي پاڻ سان گڏ هٿيار کڻي آئي هئي، ڪارروائي بعد اهي ئي هٿيار ميڊيا کي ڏيکاريا ويا: الطاف حسين

ڪراچي (اسٽاف رپورٽر) ايم ڪيو ايم سربراهه الطاف حسين نائين زيرو تي ڇاپي جو وزيراعظم ۽ انساني حقن جي تنظيمن کان نوٽيس وٺڻ جو مطالبو ڪندي الزام هنيو آهي ته رينجرز ڪمبل ۾ ويڙهي پاڻ سان گڏ هٿيار کڻي آئي هئي، ڪارروائي بعد اهي ئي هٿيار ميڊيا کي ڏيکاريا ويا، متحده ڪارڪن رينجرز جي فائرنگ ۾ شهيد ٿيو آهي، هو ثابت ڪري ڏيکاريندو.  ايم ڪيو ايم جي مرڪز نائين زيرو تي لنڊن مان ٽيليفونڪ خطاب ڪندي الطاف حسين چيو ته رينجرز اڄ سندس گهر ۽ نائين زيرو تي  ڇاپو هڻي ظلم ڪيو آهي، انساني حقن جون تنظيمون سندس تقرير ٻڌڻ بعد نوٽيس وٺن.هن چيو ته رينجرز سڄي دنيا ۾ پيرا  ملٽري فورس جي نالي سان سڃاتو ويندو آهي پر اڄ قانون جي رکوالن سندس بيواهه ڀيڻ جي گهر تي ڇاپو هنيو، جيڪا اڪثر بيمار رهندي آهي ۽ ان جي ڪا به اولاد  ناهي.  الطاف حسين الزام هنيو ته ايم ڪيو ايم جو ڪارڪن وقاص رينجرز اهلڪارن جي فائرنگ ۾ شهيد ٿيو پر رينجرز جي هڪ وڏي آفيسر چيو ته وقاص جو موت پسٽل جي گولي سان ٿيو آهي، وقاص کي رينجرز اهلڪارن ناهي ماريو. الطاف حسين چيو ته وقاص رينجرز اهلڪارن جي فائرنگ سان ئي شهيد ٿيو آهي، هـُو رينجرز جو ڪوڙ ثابت ڪري ڏيکاريندو، جڏهن ڪو رينجرز جو وڏو ڳالهائيندو ته هـُو به جواب ڏيڻ لاءِ تيار آهي. ايم ڪيو ايم سربراهه چيو ته  بدقسمتي آهي ته پاڪستان ۾ ڪجهه ماڻهو قانون کان مٿانهون ٿي ويا آهن، ڇا الطاف حسين پاڪستاني شهري يا مسلمان ناهي جو صرف ان جي گهر تي ئي ڇاپا پيا هنيا وڃن. الطاف حسين چيو ته نائن زيرو تان 60 کان وڌيڪ ماڻهن کي گرفتار ڪيو ويو ۽ بغير گرفتاري وارنٽ جي ڇاپو هنيو ويو، وزيراعظم معاملي جو نوٽيس وٺي. الطاف حسين الزام هنيو ته رينجرز ڪمبل ۾ ويڙهي پاڻ سان گڏ هٿيار کڻي آئي هئي، ڪارروائي بعد اهي ئي هٿيار ميڊيا کي ڏيکاريا ويا.

 

نائن زيرو تي آپريشن ڏوهاري عنصرن خلاف هو، ايم ڪيو ايم ڪارڪن وقاص رينجرز جي فائرنگ ۾ ناهي مئو: ڊي جي رينجرز

ڪراچي (اسٽاف رپورٽر) ڊي جي رينجرز ميجر جنرل بلال اڪبر ڪراچي جو امن خراب ڪندڙن کي فوري طور گرفتار ڪرڻ جو حڪم ڏيندي چيو آهي ته نائن زير و تي آپريشن ڏوهاري عناصرن خلاف آهي ۽ ايم ڪيو ايم ڪارڪن وقاص رينجرز  جي فائرنگ ۾  ناهي مئو. ڊي جي رينجرز پنهنجي بيان ۾ چيو آهي ته آپريشن ڪنهن مخصوص گروپ خلاف نه  پر ڏوهارين خلاف آهي. هن رينجرز عملدارن کي حڪم ڏيندي چيو ته ڪراچي جو امن تباهه ڪندڙن کي گرفتار ڪيو وڃي ۽  شهرين کي ڪوبه  ڌمڪي ڏئي ته 1101 تي اطلاع ڏنو وڃي. ڊي جي رينجرز چيو ته نائن زيرو تي آپريشن ڏوهاري عناصرن خلاف آهي. هن چيو ته ايم ڪيو ايم جي ڪارڪن وقاص جو موت رينجرز جي فائرنگ سبب ناهي ٿيو. ڊي جي رينجرز چيو وقاص جو موت 9 ايم ايم پسٽل سبب ٿيو آهي ۽ رينجرز پسٽل استعمال نه ڪندي آهي

 

ايم ڪيو ايم ڪارڪن صولت مرزا جا ڊيٿ وارنٽ جاري 19 مارچ تي ڦاهي ڏيڻ جو حڪم

ڪراچي (اسٽاف رپورٽر) ڪراچي جي دهشتگردي ٽوڙ عدالت قتل ڪيس ۾ موت جي سزا کاڌل ايم ڪيو ايم ڪارڪن صولت مرزا جا بليڪ وارنٽ جاري ڪندي 19 مارچ تي کيس ڦاهي ڏيڻ جو حڪم جاري ڪري ڪري ڇڏيو آهي. ڪراچي سينٽرل جيل جي سپرينٽينڊنڊنٽ دهشتگردي ٽوڙ عدالت ۾ درخواست داخل ڪرائي ڪي اي ايس سي جي اڳوڻي ايم ڊي شاهد حامد، سندس گارڊ ۽ ڊرائيور جي قتل ڪيس ۾ موت جي سزا ٻڌايل متحده ڪارڪن صولت مرزا جا بليڪ وارنٽ جاري ڪرڻ جي استدعا ڪئي هئي ڪراچي سينٽرل جيل جي سپرينٽينڊنڊنٽ درخواست ۾  موقف اختيار ڪيو هو ته شاهد حامد جي قتل ڪيس ۾ صولت مرزا کي 1998  ۾ موت جي سزا ٻڌائي وئي ۽ سپريم ڪورٽ توڙي ملڪ جي صدر سندس اپيلون رد ڪري ڇڏيون آهن. جيل اختيارين پاران عدالت ۾ داخل ڪرايل درخواست ۾ استدعا ڪئي وئي آهي ته صولت مرزا کي ڦاهي ڏيڻ لاءِ فوري طور  سندس بليڪ وارنٽ جاري ڪيا وڃن. جيل سپرنٽينڊنٽ جي درخواست تي دهشتگردي ٽوڙ عدالت جي جج صولت مرزا جا بليڪ وارنٽ جاري ڪندي کيس 19 مارچ تي ڦاهي ڏيڻ جو حڪم جاري ڪيو. بليڪ وارنٽ جاري ٿيڻ بعد بلوچستان جي مچ جيل مان صولت مرزا کي ڪراچي سينٽرل جيل منتقل ڪيو ويندو ڪجهه مهينا اڳ به صولت مرز ا سميت 7 دهشتگردن جا بليڪ وارنٽ جاري ڪيا ويا هئا، جن مان 6 ڄڻن کي ڦاهي تي لٽڪايو ويو هو  پر صولت مرزا جي ڦاهي تي عمل روڪيو ويو هو. وفاقي گهرو وزير چوڌري نثار جي منظوري کانپوءِ وفاقي گهرو وزارت پاران حڪمنامو جاري ڪري صولت مرزا جي سزا تي عمل روڪيو ويو هو.

 

نائن زيرو تي ڇاپو، رينجرز پڪڙيل ڏوهارين جي فهرست جاري ڪري ڇڏي

ڪراچي (اسٽاف رپورٽر) ايم ڪيو ايم جي مرڪز نائن زيرو تي ڇاپا مار ڪارروائي دوران پڪرتل جوابدارن سميت شڪي ماڻهن جي فهرست جاري ڪئي وئي جن ۾ هڪ ٽارگيت ڪلر ۽ ولر بابر قتل ڪيس ۾ ملوث جوابدار به شامل آهي، سنڌ رينجرز جي ترجمان ڪرنل طاهر مطابق گرفتار ماڻهن ۾ فيصل موٽا، شبير عرف ملا، عامر ، نادر، عبيد ڪي ٽو شامل آهن جڏهن ته ٻين ماڻهن جي سڃاڻپ ڪئي پئي وڃي، ترجمان ٻڌايو ته فيصل موٽ نجي ٽي وي چينل جي صحافي ولي بابر قتل ڪيس ۾ ملوث آهي ۽ ان کي موت جي سزا ٿي چڪي آهي جڏهن ته نادرا هڪ ٽارگيٽ ڪلر آهي جنهن کي 13 سال سزا ٻڌائي وئي آهي ترجمان ٻڌايو ته خورشيد بيگم ميموريل هال ۾ به آپريشن ڪيو ويو.

 

شهري پنهنجو ڪاروبار معمول مطابق جاري رکن: ڪراچي پوليس چيف

ڪراچي (اسٽاف رپورٽر) ايڊيشنل آءِ جي ڪراچي غلام قادر ٿيٻو شهرين کي معمول واري زندگي بهال رکڻ جي اپيل ڪندي عوام کي تحفظ جو يقين ڏياريو آهي، ايڊيشنل  آءِ جي ڪراچي غلام قادر ٿيٻو جو چوڻ آهي ته شهري پنهنجو ڪاروبار معمول مطابق جاري رکن پوليس عوام جي جان ۽ مال کي تحفظ فراهم ڪندي، ڪوبه غير قانوني قدم برداشت نه ڪيو ويندو ايڊيشنل آءِ جي ڪراچي غلام قادر ٿيٻو عوام کي اپيل ڪئي ته ڪنهن به قسم جي ڌمڪي جي صورت ۾ پوليس سان رابطو ڪريو.

 

رينجرز کي هٿ آيل سمورا هٿيار لائسنس وارا آهن:فيصل سبزواري

ڪراچي (اسٽاف رپورٽر) متحده قومي موومينٽ، نائين زيرو تي رينجرز جَي ڇاپي کي افسوسناڪ قرار ڏيندي وزيراعظم کي معاملي جو نوٽيس وٺڻ جي اپيل ڪري ڇڏي،فيصل سبزواري جو چوڻ آهي ته رينجرز کي هٿ آيل سمورا هٿيار لائسنس وارا آهن. نائن زيرو تي رينجرز جَي ڇاپي کانپوءِ ايم ڪيو ايم جَي مرڪزي، صوبائي، توڙي مقامي اڳواڻن سخت رد عمل ظاهر ڪيو آهي. پارٽيءَ جي مرڪز تي ميڊيا سان ڳالهائيندي متحده اڳواڻ فيصل سبزواري چيو ته ايم ڪيو ايم دهشتگردن خلاف پاڪ فوج سان گڏ آهي. هن چيو ته دهشتگردن طرفان ايم ڪيو ايم جي چونڊ جلسن ۽ ٻين تقريبن تي حملا ڪيا ويا،جنهن بعد مرڪز جي چوڌاري رنڊڪون بيهاريون ويون. فيصل سبزواري چيو ته ايم ڪيو ايم جي مرڪز مان جيڪي هٿيار هٿ ڪرڻ جي دعويٰ ڪئي وئي آهي ته اهي سمورا لائسنس وارا آهن، جن جي منظوري وفاقي ۽ صوبائي حڪومتن ڏني. ايم ڪيو ايم اڳواڻ چيو ته پشاور سانحي بعد هٿيار رکڻ لاءِ چيو ويو ۽ هاڻ چيو وڃي ٿو ته هٿيار غير قانوني آهن. فيصل سبزواري چيو ته رينجرز گرفتاري دوران سندن ايم پي اي هير سوهو جي مڙس کي به گرفتار ڪيو آهي.

 

مليحه لوڌي جي بان ڪي مون سان ملاقات، گڏيل قومن ۾ ذميواريون سنڀالي ورتيون

گڏيل قومون(اي پي پي) گڏيل قومن ۾ پاڪستان جي نئين سفير مليحه لوڌي اداري جي سيڪريٽري جنرل بان ڪي مون کي اپيل ڪئي آهي ته هو ڏکڻ ايشيا ۾ امن ۽ استحڪام لاءِ پنهنجو ڪردار ادا ڪري. اهڙو اظهار هن گذريل ڏينهن سيڪريٽري جنرل بان ڪي مون کي سفارشون پيش ڪندي ڪيو. هڪ مختصر تقريب کانپوءِ ٿيل ملاقات ۾ پاڪستان جي سفير سيڪريٽري جنرل کي ٻُڌايو ته خطي ۾ امن لاءِ تيزيءَ لاءِ قدم کڻڻ جي ضرورت آهي، پاڪستان اولهه وارين سرحدن تي عسڪريت پسندن کي مُنهن ڏيڻ لاءِ پوري قوت سان مصروف آهي پر ٻئي پاسي ان کي ڀارت سان سرحد ۽ والاريل ڪشمير واري لائين آف ڪنٽرول تي ڀارتي چِڙ ڏياريندڙ ڪاررواين کي مُنهن ڏيڻو پئجي رهيو آهي. اهڙي صورتحال ۾ پاڪستان ۽ ڀارت ۾ مقرر فوجي مبصرن جي ڪردار ۾ استحڪام ۽ وسعت جي ضرورت آهي ته جيئن گڏيل سرحد ۽ لائين آف ڪنٽرول تي ڀارت طرفان سيز فائر جي ڀڃڪڙين کي روڪي سگهجي. سيڪريٽري جنرل بان ڪي مون چيو ته هو پاڪ- ڀارت ڳالهين جي ٻيهر شروعات جو خواهشمند آهي ۽ عسڪريت پسنديءَ خلاف قانون لاڳو ڪندڙ پاڪستاني فورسز جي ڪردار جو اعتراف ڪري ٿو. گڏيل قومن سڄي دنيا ۾ امن قائم ڪرڻ لاءِ عالمي اداري جي سرگرمين ۾ پاڪستاني معاونت کي قدر سان ڏسي ٿو. مليحه لوڌي سيڪريٽري جنرل کي اپيل ڪئي ته هو دهشتگرديءَ خلاف پاڪستاني ڪردار بابت بدگمانين جو خاتمو، ڏکڻ ايشيا ۾ امن، استحڪام ۽ ڪشمير سميت گڏيل تڪرارن جي نبيري لاءِ پاڪ- ڀارت ڳالهين جي ٻيهر شروعات لاءِ پنهنجو ڪردار ادا ڪن.