تازيون خبرون

Daily Archives: March 11, 2015

وزيراعظم سينيٽ چيئرمين لاءِ رضا رباني جي حمايت ڪري ڇڏي

اسلام آباد (بيورو) وزيراعظم نواز شريف سينيٽ چيئرمين لاءِ اپوزيشن جي گڏيل اميدوار رضا رباني جي حمايت ڪري ڇڏي، سندس چوڻ آهي ته حڪومت چيئرمين ۽ ڊپٽي چيئرمين جي عهدن لاءِ پنهنجا اميدوار نه ٿي آڻڻ چاهي، کين اپوزيشن طرفان نامزد ڪيل اميدوار تي ڪو به اعتراض ناهي. وزيراعظم نواز شريف، پي ايم هائوس اسلام آباد ۾ سياسي جماعتن جي اڳواڻن جي مان ۾ مانجهاندو ڏنو. ان موقعي تي خطاب ڪندي وزيراعظم نواز شريف مخالف ڌر طرفان سينيٽ جي چيئرمين طور نامزد ڪيل اميدوار رضا رباني جي حمايت جو اعلان ڪندي چيو ته ن ليگ سينيٽ چيئرمين توڙي ڊپٽي چيئرمين لاءِ پنهنجا اميدوار نه بيهاريندي. وزيراعظم جو چوڻ هو ته اپوزيشن طرفان رضا رباني کي سينيٽ چيئرمين نامزد ڪيو ويو آهي جنهن تي کين ڪو به اعتراض ناهي، پر هــُو چاهين ٿا ته سمورين جماعتن جي اتفاق راءِ سان چيئرمين نامزد ڪيو وڃي. نواز شريف چيو ته سينيٽ چونڊن ۾ پئسي جي راند ختم ٿيڻ گهـُرجي،پئسا ڏئي سينيٽر چونڊجڻ افسوسناڪ آهن ۽ هاڻي وقت اچي ويو آهي ته ماضي جي اڻوڻندڙ روايت کي ختم ڪيو وڃي. وزيراعظم ان موقعي تي پ پ جي شريڪ چيئرمين آصف علي زرداريءَ کي ڏوراپو ڏنو ته کين گذريل ڏينهن مانيءَ تي نه گهرايو ويو، ساڻن به صلاح مشورو ڪيو وڃي ها. وزيراعظم پاران ڏنل مانجهاندي واري دعوت ۾ اپوزيشن ليڊر خورشيد شاهه، اڳوڻي وزيراعظم راجا پرويز اشرف، جــَي يــُو آءِ سربراهه مولانا فضل الرحمان، ايم ڪيو ايم طرفان فاروق ستار، رئوف صديقي ۽ خالد مقبول صديقي شرڪت ڪئي. پختون خواهه ملي عوامي پارٽي جي سربراهه محمود خان اچڪزئي، اي اين پي سربراهه اسفند يار ولي، حاصل بزنجو، غلام احمد بلور، خواجا سعد رفيق، اسحاق ڊار، مولانا عبدالغفور حيدري ۽ مظفر علي شاهه سميت ٻيا اڳواڻ به شريڪ ٿيا. ياد رهي ته گذريل ڏينهن پ پ جي شريڪ چيئرمين آصف علي زرداري جي صدارت هيٺ اتحادي جماعتن جي اجلاس دوران سينيٽ چيئرمين جي عهدي لاءِ رضا رباني کي نامزد ڪيو ويو هو

 

پنجاب، سنڌ ۽ اسلام آباد ۾ بلدياتي چونڊن جو شيڊول جاري

اسلام آباد (بيورو) اليڪشن ڪميشن پنجاب، سنڌ ۽  اسلام آباد ۾ بلدياتي چونڊن جو شيڊول جاري ڪري ڇڏيو بلدياتي چونڊن لاءِ پنجاب، سنڌ ۽ اسلام آباد ۾ 20 سيپمٽبر تي پولنگ ٿيندي جنهن لاءِ 8 کان 10 جون تائين نامزدگي ڪاغذ جمع ڪرائي سگهبا جڏهن ته 23 آگسٽ تي دستبرداري  24 آگسٽ تي اميدوارن جي حتمي فهرست جاري ڪئي ويندي، اليڪشن ڪميشن مطابق بلدياتي چونڊن لاءِ اميدوارن جا ڪاغذن جي جاچ 15 کان 20 جون وچ ۾ ٿيندي ۽ اميدوارن خلاف داخل ٿيندڙ اپيلون 24 تي داخل ٿي سگهنديون جڏهن ته 21 آگسٽ تائين اپيلون حل ڪيون وينديون. سپريم ڪورٽ، سنڌ ۽ پنجاب ۾ مڪاني چونڊون 20 سيپٽمبر 2015 ۽ اسلام آباد ۾ 25 جولاءِ تي چونڊون ڪرائڻ بابت اليڪشن ڪميشن جو شيڊول منظور ڪري ورتو آهي، سپريم ڪورٽ، سنڌ ۽ پنجاب ۾ مڪاني چونڊون 20 سيپٽمبر 2015 ۽ اسلام آباد ۾ 25 جولاءِ تي چونڊون ڪرائڻ بابت اليڪشن ڪميشن جو شيڊول منظور ڪري ورتو آهي، عدالت، ڇانوڻي بورڊ ۾ چونڊون 25 اپريل ۽ ڪي پي ڪي ۾ 30 مئي تي مڪاني چونڊون ڪرائڻ وارو حڪم برقرار رکندي چيو آهي ته جيڪڏهن هن ڀيري ڪن لاٽار ڪئي وئي ته ڀڃڪڙي ڪندڙ سخت نتيجن لاءِ تيار رهن. جسٽس جواد ايس خواجه جي سربراهي ۾ سپريم ڪورٽ جي ٽي رڪني بينچ مڪاني چونڊن واري ڪيس جي ٻڌڻي ڪئي. ٻڌڻيءَ دوران اليڪشن ڪميشن جي وقتي سيڪريٽري عدالت جي حڪم تي سنڌ پنجاب، خيبرپختونخواهه، اسلام آباد ۽ ڇانوڻي بورڊ ۾ مڪاني چونڊون ڪرائڻ لاءِ لکت ۾ شيڊول پيش ڪيو. اليڪشن ڪميشن جي شيڊول موجب، سنڌ ۽ پنجاب ۾ مڪاني چونڊون 20 سيپٽمبر 2015 تي ڪرايون وينديون، جڏهن ته اسلام آباد ۾ چونڊون ڪرائڻ جي تاريخ 25 جولاءِ مقرر ڪئي وئي آهي. شيڊول موجب عدالتي حڪمن تحت ڇانوڻي بورڊ ۾ مڪاني چونڊ هلندڙ سال 25 اپريل ۽ خيبرپختونخواهه ۾ 30 مئي تي 2015 تي ڪرايون وينديون. عدالت، اليڪشن ڪميشن پاران پيش ڪيل شيڊول منظور ڪندي حڪم ڏنو ته شيڊول ۾ ڏنل تاريخن تي هر صورت ۾ عمل ڪيو وڃي، ڪنهن به قسم جي ڪن لاٽار برداشت نه ڪئي ويندي. جسٽس جواد ايس خواجه ريمارڪس ڏنا ته جيڪڏهن هن ڀيري عدالتي حڪمن تي عمل نه ٿيو ته حڪومتون سخت نتيجا ڀوڳڻ لاءِ تيار رهن، مڪاني چونڊون آئيني گهرج آهي، حڪمن تي هر صورت ۾ عمل ٿيڻ گهرجي.  ٻڌڻيءَ جي موقعي تي ايڊووڪيٽ جنرل پنجاب عدالت کي آگاهي ڏني ته جولاءِ ۽ آگسٽ ۾ پنجاب اندر ٻوڏ جو خدشو آهي، تنهن ڪري مڪاني چونڊن وارو عمل سخت متاثر ٿي سگهي ٿو. جسٽس جواد ايس خواجه ڪاوڙ جو اظهار ڪندي چيو ته توهان اهڙا بهانا بڻائي چونڊون ملتوي نٿا ڪرائي سگهو، جيڪڏهن شيڊول بابت ڪو اعتراض آهي ته لکت ۾ عدالت ۾ جمع ڪرايو وڃي. سپريم ڪورٽ، اليڪشن ڪميشن کي شيڊول تي سختيءَ سان عملدرآمد جو حڪم ڏيندي ٻڌڻي اڻڄاڻايل مدي تائين ملتوي ڪري ڇڏي.

 

نواز ليگ بلوچستان جي سڀ کان وڏي پارٽي آهي: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته،سينيٽ جي ڊپٽي چيئرمين جو عهدو بلوچستان کي ڏيڻ جو فيصلو ٿيو هو، نواز ليگ بلوچستان جي سڀ کان وڏي پارٽي آهي. اسلام آباد ۾ ميڊيا سان ڳالهائيندي وفاقي وزير پرويز رشيد چيو ته، اسان کي رياست جا معاملا ٺيڪ ڪرڻا آهن، آپريشن ضرب عضب تي سموري قوم گڏ ٿي هئي، هاڻي به سمورا  معاملا قوم کي گڏجي کڻي هلي ڪرڻ کي ترجيح ڏني پئي وڃي. هن چيو ته، حڪومتي سطح تي فيصلو ٿيو هو ته، سينيٽ جي ڊپٽي چيئرمين جو عهدو بلوچستان کي ڏيڻو آهي، حقيقت اها به آهي ته، بلوچستان جي سڀ کان وڏي پارٽي نواز ليگ آهي.

 

وزير اعظم جي فيصلي جي ساراهه، نواز شريف رضا رباني جي حمايت ڪري نئين تاريخ لکي: خورشيد شاهه

اسلام آباد(بيورو) ثابت ٿي ويو ته مفاهمتي پاليسي سبب سمورا معاملا ڳالهين وسيلي حل ٿي سگهن ٿا، حڪومت وڏي دل جو مظاهرو ڪيو آهي، پارلياماني اڳواڻن پاران وزيراعظم جي فيصلي جي زبردست ساراهه، سيد خورشيد شاهه چيو آهي ته وزيراعظم رضا رباني جي حمايت ڪري نئين تاريخ لکي آهي، اسفند يار ولي جو چوڻ آهي ته هاڻي ڊپٽي چيئرمين جو نالو وزيراعظم تجويز ڪري، مولانا فضل الرحمان چيو آهي ته وزيراعظم وڏي دل جو مظاهرو ڪري جمهوريت کي هٿي ڏني آهي. سمورا معاملا افهام تفهيم سان حل ٿيڻ گهرجن.

 

پوري قوم جي حمايت سان ملڪ ۾ امن آڻينداسين: آرمي چيف

راولپنڊي (م.ڊ) پاڪ فوج جي ترجمان آءِ ايس پي آر مطابق آرمي چيف جنرل راحيل شريف پي ايم اي ڪاڪول جو دورو ڪيو ۽ ڪيڊٽس جي تربيت جو عمل به ڏٺو، آرمي چيف آپريشن دوران آفيسرن جي قائداڻي صلاحيتن کي ساراهيو ان موقعي تي پنهنجي خطاب ۾ جنرل راحيل شريف جو چوڻ هو ته نوجوان آفيسر پنهنجي اندر عزم، حوصلي ۽ اهليت جون خوبيون پيدا ڪن، پاڪ فوج جي سربراهه ان عزم جو اظهار ڪيو ته جنگ جي محاذ تي قيادت ڪرڻ جي روايت جي نتيجي ۾ دهشتگردي ختم ڪنداسين ۽ قوم جي تعاون سان ملڪ ۾ امن آڻينداسين.

 

سنڌ ۽ پنجاب مان ڪامياب ٿيل سينيٽرز خرچن جا تفصيل جمع ڪرائي ڇڏيا، ڪاميابي جو نوٽيفڪيشن جاري

اسلام آباد (بيورو) سنڌ ۽ پنجاب مان ڪامياب ٿيل سينيٽرز خرچن جا تفصيل جمع ڪرائي ڇڏيا آهن، اليڪشن ڪميشن چيو آهي ته تفصيل جمع نه ڪرائيندڙ اميدوارن جي ڪاميابي جو نوٽيفڪيشن جاري نه ڪيو ويندو. اليڪشن ڪميشن پاران سينيٽ چونڊن ۾ ڪامياب ٿيل اميدوارن کي خرچن جا تفصيل جمع ڪرائڻ لاءِ ڏنل ڊيڊلائين اڄ رات 12 هين وڳي ختم ٿي رهي آهي، اميدوارن لاءِ خرچن  جي حد 15 لک رپيا مقرر ڪئي وئي آهي. اليڪشن ڪميشن موجب، سنڌ مان ڪامياب ٿيل سينيٽرز پاران خرچن جا تفصيل جمع  ڪرايا ويا آهن، جن ۾ پ پ جو فاروق ايڇ نائيڪ، رحمان ملڪ، سسئي پليجو، لطيف انصاري، انجنيئر گيانچند، سليم مانڊوي والا ۽ اسلام الدين شيخ شامل آهن. ايم ڪيو ايم جي ڪامياب سينيٽرز ميان عتيق، محمد علي سيف، نگهت مرزا ۽ خوشبخت شجاعت پڻ اليڪشن ڪميشن ۾ تفصيل جمع ڪرائي ڇڏيا آهن. اليڪشن ڪميشن موجب، بلوچستان مان ٿيل سينيٽرز به خرچن جا تفصيل جمع ڪرايا آهن، ڊيڊلائين ختم ٿيڻ تائين تفصيل جمع نه ڪرائيندڙن جي ڪاميابي جو نوٽيفڪيشن جاري نه ڪيو ويندو. واضح رهي ته اليڪشن ڪميشن فاروق ايڇ نائيڪ، سسئي پليجو، بئريسٽر سيف ۽ نگهت مرزا جي ڪاميابي جو نوٽيفڪيشن اڳ ئي جاري ڪري چڪي آهي. اليڪشن ڪميشن بلوچستان ۽ سنڌ مان نون چونڊيل سينيٽرن جي ڪاميابي جا نوٽيفڪيشنز جاري ڪري ڇڏيا آهن اليڪشن ڪميسن بلوچستان مان جنرل سيتن تي حاصل بزنجو، محمد عثمان، نعمت الله زهري، عبدالغفوري حيدري، يوسف باديني، سردار اعظم خان ۽ ڊاڪٽر  جهانزيب جمالديني، ٽيڪنوڪريٽ ۽ عالمن جي مخصوص سيٽن تي مير ڪبير احمد ۽ انجنيئر آغا شهباز شريف جڏهن ته عورتن جي سيٽن تي گل بشريٰ ۽ ڪلثوم پروين جي ڪاميابي جا نوٽيفڪيشنز جاري ڪيا ويا آهن، بلوچستان مان اقليتي سيٽ تي ڊاڪٽر اشوڪ ڪمار جي ڪاميابي جو نوٽيفڪيشن به جاري ڪيو ويو آهي، سنڌ مان پيپلز پارٽي جي اسلام الدين شيخ، سليم مانڊوي والا، گيان چند، عبداللطيف انصاري، عبدالرحمان ملڪ، ايم ڪيو ايم جي ميان عتيق احمد شيخ ۽ خوشبخت شجاعت جي ڪاميابي جو نوٽفڪيشن به جاري ڪيا ويا آهن.

 

الطاف حسين جو آصف زرداري کي فون، رضا رباني جي ڪاميابي تي واڌايون

ڪراچي (اسٽاف رپورٽر) ايم ڪيو ايم سربراهه الطاف حسين، پ پ جي شريڪ چيئرمين آصف علي زرداري سان رابطو ڪري سينيٽ چيئرمين لاءِ اپوزيشن جي گڏيل اميدوار رضا رباني جي يقيني ڪاميابي تي واڌايون پيش ڪيون. الطاف حسين آصف علي زرداري سان ٽيليفون تي رابطو ڪيو. متحده سربراهه الطاف حسين، وزيراعظم نواز شريف پاران سينيٽ چيئرمين لاءِ اپوزيشن جي گڏيل اميدوار رضا رباني جي حمايت جي اعلان کي سٺو سنئوڻ قرار ڏيندي ان جي يقيني ڪاميابي تي واڌايون پيش ڪيون. هن چيو ته وقت جي ضرورت آهي ته سياسي ۽ مذهبي جماعتون سياسي اختلافن کي وساري ملڪ جي ترقي، خوشحالي ۽ عوام جي ڀلائي لاءِ ڀرپور ڪردار ادا ڪن. ان موقعي تي آصف علي زرداري چيو ته سمورين جماعتن جي سهڪار ۽ دعائن سان الله تعاليٰ کين ڪامياب ڪيو جڏهن ته هيءَ ايم ڪيو ايم سميت سمورين اپوزيشن جماعتن ۽ عوام جي ڪاميابي آهي. الطاف حسين ۽ آصف علي زرداري وچ ۾ ڳالهه ٻولهه دوران صوبي جي ترقي ۽ عوام جي ڀلائي لاءِ گڏجي ڪم ڪرڻ تي پڻ اتفاق ڪيو ويو.

 

ايندڙ ٽن سالن ۾ 7 هزار ميگاواٽ بجلي سسٽم ۾ شامل ٿي ويندي:اسحاق ڊار

اسلام آباد (بيورو) ناڻي واري وفاقي وزير اسحاق ڊار چيو آهي ته ايندڙ ٽن سالن ۾ 7 هزار ميگاواٽ بجلي سسٽم ۾ شامل ٿي ويندي، ملڪي ناڻي جا ذخيرا 16 ارب ڊالرز تان پهچي چــُڪا آهن. اسلام آباد ۾ منعقد پاڪ آمريڪا بزنس فورم کي خطاب ڪندي اسحاق ڊار چيو ته توانائي جو بحران ملڪي معيشت خراب هئڻ سبب ٿيو. هن چيو ته جون 2013ع ۾ پاڪستان جي ڏيوالپڻي جو خدشو هو پر موجوده حڪومت جي پاليسين سبب ملڪي معيشت مستحڪم ٿي رهي آهي. اسحاق ڊار چيو ته سڄي ملڪ ۾ بجلي جي ننڍن ۽ وڏن منصوبن تي ڪم ڪيو پيو وڃي، ايندڙ ٽن سالن ۾ 7 هزار ميگاواٽ بجلي سسٽم ۾ شامل ٿي ويندي. سندس چوڻ ته آمريڪي سيڙپڪار پاڪستان ۾ زراعت، توانائي، تعليم سميت مختلف شعبن ۾ سيڙپڪاري ڪن.

 

بلديات کاتي ۾ نين گاڏين جي خريداري تي پابندي لاڳو، پراڻين جا تفصيل طلب

ڪراچي (اسٽاف رپورٽر) اطلاعات ۽ بلديات واري صوبائي وزير شرجيل انعام ميمڻ بلديات کاتي ۽ ان جي انتظام هيٺ هلندڙ سمورن کاتن ۾ نئي گاڏين جي خريداري تي  فوريطو تي پابندي مڙهي ڇڏي آهي جڏهن ته سڀني آفيسرن ۽ سندن گهر وارن جي استعمال هيٺ گاڏين جا مڪمل تفصيل ايندڙ 10 ڏينهن اندر سيڪريٽري بلديات وٽ جمع ڪرائڻ جي هدايت ڪئي آهي ۽ چيو آهي ته ان ڪم ۾ ناڪامي تي انهن آفيسرن خلاف ايف آءِ آر درج ڪرائي ويندي اڱارين ڏينهن بلديات ۽ اطلاعات واري وزير شرجيل انعام ميمڻ بلديات کاتي ۽ ان جي انتظام هيٺ هلندڙ سمورن کاتن ۾ نئي گاڏين جي خريداري تي فوري پابندي مڙهي ڇڏي آهي. شرجيل انعام ميمڻ بلديات کاتي جي سيڪريٽري ۽ کاتي جي انتظام هيٺ هلندڙ سمورن کاتن جي اعليٰ آفيسرن کي هدايتون جاري ڪيون آهن ته افيسرن ۽ سندن فيملي جي استعمال هيٺ سرڪاري گاڏين جا مڪمل تفصيل 10 ڏينهن اندر سيڪريٽري بلديات وٽ جمع ڪرائين. اهي آفيسرجيڪي هڪ کان وڌيڪ ڳاڏيون استعمال ڪن پيا اهي به 10 ڏينهن اندر ڳاڏيون  بلديات سيڪريٽري وٽ جمع ڪرائين شرجيل انعام ميمڻ ان ڳالهه جو به سخت نوٽس ورتو آهي ته بلديات کاتي جا آفيسر جيڪي هاڻ بلديات کاتي ۾ موجود ناهين اهي به بلديات کاتي جي ڳاڏيون استعمال ڪري رهيا آهن انهن کي به خبردار ڪيو آهي ته اهي گاڏيون کاتي ۾ واپس جمع ڪرائين ائين نه ڪرڻ تي سندن خلاف سخت ڪارروائي ڪندي انهن خلاف ايف آءِ آر درج ڪرائي ويندي. شرجيل انعام ميمڻ بلديات ۽ ان جي انتظام هيٺ هلندڙ کاتن جي سمورن سيڪريٽريز کي واضع طور تي هدايت جاري ڪندي چيو آهي ته ان سلسلي ۾ فوري طور تي پنهجي پنهنجي کاتن ۾ نوٽيفيڪيشن جاري ڪن جڏهن ته سيڪريٽري بلديات کي پڻ ان سلسلي ۾ نوٽيفڪيشن جاري ڪرڻ جي هدايت ڪئي وئي آهي ۽ کيس چيو ويو آهي ته هو ايندڙ 10 ڏينهن ۾ بلديات کاتي ۽ ان جي انتظام هيٺ گاڏين جو رڪارڊ جوڙي کيس کي فراهم ڪيو وڃي.

 

ق ليگ قيادت وزير اعظم جي مانجهاندي جي دعوت ۾ شرڪت نه ڪئي

اسلام آباد (بيورو) مسلم ليگ قاف، وزيراعظم نواز شريف جي مانجهاندي واري دعوت ۾ شرڪت نه ڪرڻ جو فيصلو ڪري ڇڏي،چوڌري شجاعت جو چوڻ آهي ته ڪانفرنس يا اجلاس هجي ها ته هــُو ضرور شرڪت ڪن ها، پر ماني کائڻ نه ويندا. اسلام آباد ۾ ميڊيا سان ڳالهائيندي چيو ته سينيٽ چيئرمين جي چونڊ لاءِ اڃا به مفاهمت ٿي سگهي ٿي. هن چيو ته حڪومت سينيٽ چيئرمين لاءِ رضا رباني جي نالي کي تسليم ڪري. واضح رهي ته سينيٽ چيئرمين ۽ ڊپٽي چيئرمين جي چونڊ لاءِ حمايت حاصل ڪرڻ لاءِ وزيراعظم نواز شريف اڄ سمورين پارٽين جي پارلياماني اڳواڻن کي مانجهاندي تي گهــُرائي ورتو آهي.