تازيون خبرون

Daily Archives: March 10, 2015

ملڪ جي سياسي قيادت متحد آهي: نواز شريف

ملتان(م.ڊ) وزيراعظم نواز شريف ملتان انٽرنيشنل ايئرپورٽ جو افتتاح ڪري ڇڏيو، وزيراعظم جو چوڻ آهي ته ملڪ جي سياسي قيادت متحد آهي، جنهن جو مثال قومي ايڪشن پلان مان ملي ٿو، ڪراچي_ حيدرآباد موٽروي جو بنياد ڪجهه ڏينهن ۾ رکيو ويندو… ملتان ۾ ايئرپورٽ جي نئين عمارت جي افتتاحي تقريب کي خطاب ڪندي وزيراعظم نواز شريف چيو ته پاڪستان لاءِ ملتان مرڪزي حيثيت رکي ٿو، ملتان ملڪ جي وڏن ايئرپورٽن جي لسٽ ۾ شامل ٿي ويو آهي، اڳوڻي وزيراعظم يوسف رضا گيلاني ملتان انٽرنيشنل ايئرپورٽ جي پيڙهه جو پٿر رکيو هو، جنهن کي موجوده حڪومت مڪمل ڪيو آهي. نواز شريف چيو ته ملڪ جي سياسي قيادت هن وقت متحد آهي، متحد ٿي ئي پاڪستان کي ترقي طرف وٺي وڃي سگهجي ٿو، ملڪ جي بنيادي ڍانچي جي ترقي ن ليگ حڪومت جي ترجيح آهي هن چيو ته ڏکڻ پنجاب تي ماضي ۾ اهو ڌيان نه ڏنو ويو جيڪو ڏيڻ گهرجي ها، ناانصافين جو ازالو ڪيو ويندو، ملتان جي ترقي لاءِ 29 ارب رپين جا منصوبا شروع ڪيا ويا آهن، هلندڙ سال ڏيڍ ارب رپين جي رقم جاري ڪئي وئي آهي وزيراعظم جو چوڻ آهي انٽرنيشنل ٽرمينل جي قائم ٿيڻ سان ساليانو 10 لک مسافر سفر ڪري سگهندا، روانگي واپار به وڌندو، ڪراچي_ حيدرآباد موٽروي منصوبي جو بنياد به ڪجهه ڏينهن ۾ رکيو ويندو، جڏهن ته ڪراچي_ لاهور موٽروي منصوبو 2017 کان اڳ مڪمل ٿي ويندو. وزيراعظم نواز شريف جو ملتان پهچڻ تي اڳوڻي وزيراعظم يوسف رضا گيلاني استقبال ڪيو، جڏهن ته وزيراعطم سان مملڪتي وزير عابد شير علي ۽ ٻيا اڳواڻ به گڏ هئا.

 

پ پ سرڪار ٽرانسپورٽ منصوبن تي عمل شروع ڪري ڇڏيو آهي: وڏو وزير

ڪراچي (اسٽآف رپورٽر) سنڌ حڪومت ڪراچي ۽ صوبي جي ٻين ڊويزنل هيڊ ڪوارترز جي وچ ۾ ٽرانسپورٽ نيٽ ورڪ وڌائيندي 500 نين بسن سان شهيد بينظير ڀٽو انٽر سٽي بس سروس ۽ ٽرمينل پروجيڪٽ تهت پهرئين مرحلي ۾ هڪ سئو نين بسن واري پلان جي شروعات ڪري ڇڏي آهي. وزيراعليٰ هائوس ۾ سومر تي پرڏيهي ٽرانسپورٽ ڪمپني ڊايو ايڪسپريس ۽ سنڌ حڪومت جي پبلڪ پرائيويٽ پارٽنرشپ پروجيڪٽ تحت صوبي جي هر ضلعي هيڊ ڪوارٽرز کي ٽرانسپورٽ نيٽ ورڪ ذريعي هڪ ٻئي سان لنڪ ڪرڻ واري يادداشت نامي تي صحيحون ڪيون ويون. وڏي وزير صوبائي وزير ٽرانسپورٽ ۽ ٻين اعليٰ عملدارن يادداشت نامي تي صحيح ڪرڻ واري عمل جو جائزو ورتو. ان موقعي تي سيڪريٽري ٽرانسپورٽ طاها فاروقي ۽ ڊايو پاڪستان جي چيف ايگزيڪيوٽو پنهنجن ادارن جي نمائندگي ڪندي يادداشت نامي تي صحيحون ڪيون. يادداشت نامي مطابق ڊايو ايڪسپريس ان ڳالهه تي راضپو ظاهر ڪيو آهي ته هو 23 مارچ کان شروع ٿيندڙ پهرئين فيز ۾ 2 ارب لاڳت سان ڪراچي حيدرآباد، ميرپورخاص سکر نوابشاهه ۽ لاڙڪاڻي ڊويزنل هيڊ ڪوارٽرز جي روٽس 50 نيون بسون آڻيدني. سنڌ حڪومت هن پهرئين فيز ۾ 2 ارب رپين مان 645 ملين رپيا ڏيندي جڏهن ته رهيل رقم ڊايو ايڪسپريس ادا ڪندي ان سان گڏوگڏ 50 نيون بسون بس ٽرمينلز پر ريٽنگ لائونچ ٽڪ شاپس الڳ واش رومس مسجدن سميت بس اڏن تي هر قسم جون سهولتون فراهم ڪندي ڊايو 10 سالن تائين اهي بسون هلائيندي. جڏهن ته مسافرن کي سرڪاري نوٽيفڪيشن مطابق ڪرايو ورتو ويندو. ڊايو ايڪسپريس جي انتظاميه هڪ سال ۾ هڪ سئو بسن جو بندوبست ڪري پهريون فيز مڪمل ڪندي پر اهي بسون ڪراچي ۽ ڊويزنل هيڊ ڪوارٽرز جي وچ ۾ 23 مارچ 2015 کان شروع ڪيون وينديون. سيد قائم علي شاهه چيو ته اندروني شهر ۽ بين شهر مواصلات اقتصادي ترقي ۾ اهم ڪردار ادا ڪري ٿي جنهن لاءِ پيپلزپ ارتي جي گورنمينٽ عوام جي فلاح لاٰءِ اندروني شهر ۽ بين الاشهر ٽرانسپورٽ جي منصوبن تي عمل شروع ڪري ڇڏيو آهي. هن چيو ته شهيد بينظير ڀٽو انٽرنيشنل بس سروس ۽ ٽرمينل نه صرف ٽرانسپورٽ جون سهولتون فراهم ڪندو پر مقامي ماڻهن لاءِ روزگار جا نوان منصوبا شروع ٿيندا. سنڌ حڪومت ماڻهن جي سهولتن لاءِ اندروني شهر ٻيا ٽرانسپورٽ منصوبا به شروع ڪيا آهن هن ڊايو انتظاميه کي به انهن منصوبن ۾ دلچسپي وٺڻ جي دعوت ڏني جنهن لاءِ کين سموريون سهولتون فراهم ڪيون وينديون. تقريب کي خطاب ڪندي صوبائي وزير ٽرانسپورٽ ممتاز جکراڻي چيو ته ڊويزنل کان شروع ڪيل هن منصوبي کي سمورن ضلعي هيڊ ڪوارٽرز تائين وڌايو ويندو جنهن سان صوبي جي عوام کي معياري سهولتون فراهم ٿينديون.

 

آصف زرداري جو الطاف حسين سان ٽيليفونڪ رابطو، سينيٽ چونڊ سميت مختلف معاملن تي ڳالهيون

لنڊن (مانيٽرنگ ڊيسڪ) پاڪستان جي اڳوڻي صدر آصف علي زرداري گذريل رات ايم ڪيو ايم جي اڳواڻ الطاف حسين سان فون تي ڳالهه ٻولهه ڪئي ۽ ان سان سينيٽ اليڪشن پاڪستان جي سياسي صورتحال ۽ گڏيل دلچسپي جي بين معاملن تي تفصيلي خيالن جي ڏي وٺ ڪئي ان موقعي تي ڳالهائيندي آصف علي زرداري چيو ته پاڪستان جون موجوده حالتون ان ڳالهه جي تقاضا ڪن ٿيون ته مفاهمت جي سياست ۽ اتحاد ۽ ٻڌي جي ماحول کي هٿي ڏني وڃي الطاف حسين ان ڳالهه سان اتفاق ڪندي چيو ته پاڪستان سڀني جو آهي ۽ هي سمورين سياسي جماعتن جو حق آهي ته انهن جي ميڊينٽ جو احترام ڪيو وڃي ۽ جيڪڏهن اهي ميرٽ تي پورا لهن ٿا ته کين انتظامي حڪومت ۽ اقتدار حڪومت ۾ انهن کي حصو ڏنوپ وڃي ته اهي پنهنجي عوام جي خدمت ڪن الطاف حسين وڌيڪ چيو ته تضاد عين جمهوري عمل جو حصو آهن جڏهن ته هي ضروري اهي ته جيئو ۽ جيئڻ ڏيو جي اصول تحت اڳيان جا معاملا طئي ڪيا وڃن ٻنهي اڳواڻن وچ ۾ ٻين اهم معاملن تي تفصيلي خيالن جي ڏي وٺ ٿي.

 

وزير اعظم سينيٽ چونڊن تي مقابلي بدران گڏ ويهي: خورشيد شاهه

اسلام آباد (بيورو) قومي اسيمبلي ۾ مخالف ڌُر جي اڳواڻ سيد خورشيد شاهه چيو آهي ته نواز شريف سينيٽ چونڊن تي مقابلو ڪرڻ بدران گڏ ويهي، حڪومت اپوزيشن کان هاري وڃي ته نيڪ شگون نه هوندو، هڪ سيٽ حاصل ڪرڻ لاءِ غلط آرڊيننس جاري ڪيو، اهو نواز شريف جي تڪبر جو امتحان آهي. پارليامينٽ هائوس ۾ صحافين سان ڳالهائيندي هن وڌيڪ چيو ته جڏهن حڪومت اهو سوچي ته اها سينيٽ چونڊون کٽي سگهي ٿي ته ان جو مطلب واضح آهي ته حڪومت جي ڪاميابي مشڪل آهي، حڪومت کي اعتماد نه آهي ته اها پڪ سان چونڊون کٽي ويندي. هن چيو ته اهو وزيراعظم نواز شريف جي تڪبر جو امتحان آهي، اهڙي صورتحال ۾ حڪومت کي اتفاق راءِ ڏانهن وڃڻ گهرجي ، حڪومت وٽ پيپلزپارٽي جي مفاهمتي پاليسي ذريعي اڳتي وڌڻ جو سٺو موقعو آهي. هڪ سوال جي جواب ۾ خورشيد شاهه چيو ته اڄ اهڙيون حالتون آهن جو پيپلزپارٽي ۽ اتحادي پارٽيون سينيٽ جي چيئرمين ۽ ڊپٽي چيئرمين شپ کٽي رهيون آهن، نواز شريف کي اپوزيشن پارٽين سان گڏ ويهي چيئرمين ۽ ڊپٽي چيئرمين لاءِ اميدوار فائنل ڪرڻ گهرجي، جيڪڏهن وزيراعظم نواز شريف مقابلو ڪيو ۽ آپوزيشن جا اميدوار سينيٽ چونڊون کٽي وڃن ٿا ته ميان صاحب لاءِ اڳتي ايندڙ ڏينهن لاءِ اهو نيڪ شگون نه هوندو.

 

توانائي بحران تي ايندڙ ٽن سالن اندر ضابطو آڻي پاڻي ذخيرو ڪرڻ لاءِ ڊيم ٺاهيا ويندا:خواجه آصف

اسلام آباد (بيورو) وفاقي وزير خواجا آصف، هڪ ڀيرو وري پاڻي ۽ بجلي جي بحران جو ذميوار ماضيءَ جي حڪومتن کي قرار ڏيندي چيو آهي ته توانائي بحران تي ايندڙ ٽن سالن اندر ضابطو آڻي پاڻي ذخيرو ڪرڻ لاءِ ڊيم ٺاهيا ويندا، ڀارت کي سنڌ طاس معاهدي تي عملدرآمد ڪرڻ گهرجي. لاهور ۾ تقريب کي خطاب ڪندي خواجا آصف چيو ته ملڪ ۾ پاڻي ۽ بجلي جي کوٽ ماضيءَ جي حڪومتن جي بدانتظامي جو نتيجو آهي. هـُن چيو ته عالمي صورتحال کي نظر ۾ رکندي پاڻي جي مسئلي تي ڌيان ڏيڻو پوندو، ڇاڪاڻ ته اهو اهم ترين ۽ قومي مسئلو آهي. وفاقي وزير چيو ته پاڪستان ۾ ذخيرا نه هجڻ ڪري تمام گهڻو پاڻي ذيان ٿئي ٿو، جنهن ڪري پاڻي کوٽ وارو مسئلو به ڏينهون ڏينهن ڳنڀير ٿيندو پيو وڃي. خواجا آصف چيو ته ملڪ ۾ هر سال ٻوڏ اچڻ جو سبب به پاڻي جا ذخيرا نه هجڻ آهي ۽ هاڻ پاڻي ذخيرن لاءِ ڊيمن جي تعمير زندگي ۽ موت جهڙو مسئلو بڻجي چڪو آهي.

 

بلاول ڀٽو زرداري جلد پاڪستان اچي سياست جي ڊڪ ڊوڙ سنڀاليندو: شرجيل ميمڻ

ڪراچي (اسٽآف رپورٽر) سڌ سماءَ جي صوبائي وزير شرجيل انعام ميمڻ چيو آهي ته بلاول ڀٽو پيپلز پارٽيجو چيئرمين آهي ۽ هو پنهنجي مرضي سان پاڪستان اچي پارٽي ۽ ملڪي سياست جي واڳ سنڀاليندو، سڄي صوبي ۾ جاري صاف سرسبز سنڌ پرامن سنڌ مهم ڪاميابي سان جاري آهي ۽ جيستائين صوبي کي سرسبز ۽ گندگي کان صاف نه ڪيو ويندو تيستائين اسان سک سان نه ويهنداسين، ڪسٽم هائوس انتظاميه جا ٿورائتا آهيون جو هن پنهنجي بلڊنگ جي ڀرپاسي جي رستن کي پنهنجي ڪنٽرول ۾ آڻي ورتو آهي جيڪڏهن اهري طرح وفاق صوبائي خودمختيار ادارا ۽ خانگي ڪمپنيون ڪراچي سميت سڄي سنڌ ۾ پنهنجو ڪردار ادا ڪن ته اسان سنڌ کي سڄي ملڪ ۾ سڀ کان وڌيڪ خوبصورت ۽ سرسبز بنائڻ ۾ ڪامياب ٿي وينداسين. پيپلز پارٽي ڪراچي ڊويزن جي صدر قادر پٽيل جي تقرير تڪراري هئڻ تي کيس پارتي جي اعليٰ قيادت شوڪاز ڏنو آهي ۽ اهو ئي ان جو فيصلو ڪندو پهرين اپريل کانپوءِ گوسڙو ملازم گهر ويهي سرڪاري پگهار نه کڻي سگهندو، ڪمشنرز ۽ ڊپٽي ڪمشنرز کي مالي اختيار ڪرپشن کي روڪڻ لاءِ ڏنا آهن ۽ مڪاني چونڊن کي اهي اختيار ٻيهر چونڊيل نمائندن کي ملي ويندا. اهڙن خيالن جو اظهار هن سومر ڏينهن ڪسٽم هائوس ۾ ڪليڪٽر ڪسٽم سان ملاقات ۽ ان کانپوءِ سرسبز پرامن سنڌ مهم جي سلسلي ۾ صفائي سٿرائي جي ڪمن جي نگراني جي موقعي تي ميڊيا سان ڳالهائيندي ڪيو. ان کان اڳ صوبائي وزير ڪسٽم هائوس ڪراچي ۾ ڪليڪٽر ڪسٽم ۽ ٻين اعليٰ عملدارن سان ملاقات ڪئي، ان موقيع تي ڪمشنر ڪراچي شعيد احمد صديقي، ايڊمنسٽريٽر ڪراچي ثاقب سومرو، ميٽروپوليٽن ڪمشنر ڪراچي مسعود احمد، ايڊمنسٽريٽري سائوٿ افضل زيدي، محمد رئيسي، ڊي سي سائوٿ سليم راجپوت ۽ ٻيا اغليٰ آفيسر به ساڻس گڏ هئا.. ڪليٽر ڪسٽم صوبائي وزير کي ڪجهه ڊُنرز جي مدد سان ڪسٽم هائوس ڪراچي جي ڀرپاسي 4 گز جي مک روڊ ۽ ڀرپاسي جي علائقي ۾ مڪمل طور تي صفائي سٿرائي ۽ هتان جون ڪنٽرول سنڀاليندي هن علائقي کي خوبصورت بنائڻ جي خواهشجو اظهار ڪيو ۽ ان جي رستي ۾ آڏو ايندڙ مسئلن کان آگاهه ڪيو. ان موقعي تي شرجيل انعام ميمڻ ڪسٽم انتظاميه جو شڪريه ادا ڪيو ۽ چيو ته سيوريج ۽ ٻين غيرقانوني قبضن جي حوالي سان انهن سمورن مسئلن جو خاتمو ڪيو ويندو ۽ کين هر قسم جون سهولتون فراهم ڪيون وينديون. ان موقعي تي ڪسٽم انتظاميه پاران صوبائي وزير جي ڪسٽم آفيس پهچڻ تي سندس شڪريو ادا ڪيو ويو ۽ کيس خصوصي شيلڊ ڏنيو ئي. ان کانپوءِ صوبائي وزير ڪسٽم هائوس جي ڀرپاسي پاڻ ٻهاري ڏني ۽ اتي موجود ميڊيا سان ڳالهائيندي چيو ته سرسبز سنڌ ۽ پرامن سنڌ جيڪا 23 فيبروري تي شروع ڪئي وئي هئي اها هاڻي هڪ سال تائين وڌائي وئي آهي جيستائين اسان هن صوبي کي گندگي کان پاڪ ڪري سرسبز ۽ شاداب نه ڪنداسين تيستائين سک سان نه ويهنداسين. هن مهم کانپوءِ مختلف وفاقي ۽ صوبائي کاتن ۽ خانگي ڪمپنين پاران جيڪو مثبت رويو سامهون آيو آهي ان اسان جا حوصلا وڌايا آهن. هڪ سوال تي هن چيو ته 31 مارچ تي اسان جي سنڌ بئنڪ ۾ سمورن سنڌ جي بلدياتي ملازمن جا اڪائونٽ کولرائڻ جي آخري تاريخ آهي ان کانپوءِ پهرين اپريل کان انهن ملازمن کي پگهارون ملي سگهنديون جنهن جا اڪائونٽ موجود هوندا. هن چيو ته 31 مارچ کانپوءِ هاڻي ڪنهن به گوسڙو ملازم کي پگهار نه ڏني ويندي. ان کان پوءِ صوبائي وزير ڊسٽرڪٽ سائوٿ جي مختلف علائقن جو دورو ڪري جاري ڪمن جو جائزو ورتو.

 

پاڪستان بيلسٽڪ ميزائل شاهين 3 جو ڪامياب تجربو ڪري ورتو

اسلام آباد (مانيٽرنگ ڊيسڪ) پاڪستان، ڊگهي فاصلي تي زمين کان زمين تائين مار ڪندڙ بيلسٽڪ ميزائل شاهين ٿِري جو ڪامياب تجربو ڪري ورتو. آءِ ايس پي آر موجب بيلسٽڪ ميزائل شاهين 3 جو تجربو عربي سمنڊ ۾ ڪيو ويو. زمين کان زمين تائين مار ڪندڙ شاهين ٿِري هر قسم جا ائٽمي هٿيار کڻي وڃڻ جي صلاحيت رکي ٿو ۽ 2 هزار 750 ڪلوميٽرن تائين پنهنجي حدف کي نشانو بڻائي سگهي ٿو. آءِ ايس پي آر موجب تجربي وقت هٿياربند فوجن جا سربراهه، اسٽريٽرجڪ پلان ڊويزن جا عملدار ۽ ميزائل جي تياري سان لاڳاپيل سائنسدان ۽ ماهر به موجود هئا. صدر ممنون حسين، وزيراعظم نواز شريف ۽ آرمي چيف جنرل راحيل شريف شاهين ٿري جي ڪامياب تجربي تي سائنسدانن کي واڌايون ڏنيون ۽ ان عزم جو اظهار ڪيو آهي ته ملڪي دفاع لاءِ ڪنهن شيءِ تي سوديبازي نه ڪئي ويندي.

 

سنڌ سرڪار 45 ڊاڪٽرز کي صحت کاتي ڏانهن اماڻڻ جو حڪم ڏئي ڇڏيو

ڪراچي (اسٽاف رپورٽر) سپريم ڪورٽ جي حڪم تي سنڌ سرڪار پبلڪ هيلٿ ۽ ٻين رٿائن ۾ او ايس ڊي طور مقرر 45 ڊاڪٽرز کي صحت کاتي ڏانهن اماڻڻ جو حڪم ڏئي ڇڏيو  آهي، جنهن جو نوٽيفڪيشن به جاري ڪيو ويو آهي. سنڌ صحت کاتي پبلڪ هيلٿ ۽ ٻين پراجيڪٽس ۾ او ايس ڊي طور مقرر 45 ڊاڪٽرنکي هٽائي اصل پوسٽن تي  موڪلڻ جو حڪم ڏنو آهي. سنڌ سرڪار جي ذريعن جو چوڻ آهي ته سپريم ڪورٽ جي حڪم کانپوءِ او ايس ڊي طور مقرر ڊاڪٽرن کي هٽايو ويو آهي.

 

راڌا ڪشن سانحو: سپريم ڪورٽ پوليس جا جاچ ررپورٽ رد ڪري ڇڏي، تفصيلي رپورٽ پيش ڪرڻ جو حڪم

اسلام آباد (بيورو) سپريم ڪورٽ، ڪوٽ راڌا ڪشن سانحي ۾ پوليس جي جاچ رپورٽ تي بي اعتمادي ظاهر ڪندي ٻيهر تفصيلي رپورٽ پيش ڪرڻ جو حڪم ڏئي ڇڏيو، عدالت ريمارڪس ۾ چيو آهي ته پنجاب پوليس رڳو ڪتن کان ڏوهه قبول ڪرائڻ ۾ مشهور آهي، ڇا گرفتار 90 جوابدارن مان ڪنهن ڏوهه قبول ڪيو آهي؟. جسٽس دوست محمد کوسا ۽ جسٽس عمر عطا بنديال تي ٻڌل سپريم ڪورٽجي 2 رڪني بينچ پنجاب جي شهر ڪوٽ راڌا ڪشن ۾ عيسائي جوڙي کي جيئرو ساڙڻ بابت پاڻمرادي نوٽيس جي ٻڌڻي ڪئي. ٻڌڻيءَ دوران پنجاب پوليس واقعي جي رپورٽ عدالت ۾ پيش ڪئي، جنهن تي سپريم ڪورٽ بي اعتمادي ظاهر ڪئي. جسٽس دوست محمد کوسا ريمارڪس ڏنا ته رڳو ڪاغذي ڪارروائي ڪري رپورٽ پيش ڪئي ويندي آهي پر ان ۾ ڪا به شيءِ واضح ناهي ڪئي ويندي. عدالت ريمارڪس ڏنا ته ڪيس ۾ 90 جوابدار گرفتار آهن، ڇا ڪنهن مان ڪنهن ڏوهه جو اعتراف ڪيو آهي، مشهور آهي ته پنجاب پوليس رڳو ڪتن کان ڏوهه قبول ڪرائيندي آهي.  جسٽس عمر عطا بنديال ريمارڪس ڏنا ته پوليس مٿان اربين رپيا خرچ ٿي رهيا آهن پر پوليس کي واقعي جو اڳواٽ اطلاع ڏنو ويو پر ڪا به ڪارروائي نه ڪئي وئي، اهڙي ڪيسن سان عدالتن جي به بدنامي ٿي رهي آهي.

 

سلمان تاثير قتل ڪيس ۾ ممتاز قادري جي موت جي سزا برقرار

اسلام آباد (بيورو) اسلام آباد هاءِ ڪورٽ، سلمان تاثير قتل ڪيس ۾ جوابدار ممتاز قادري کي دهشتگردي ايڪٽ تحت ٻڌايل ڦاهي جو فيصلو ڪالعدم قرار ڏئي ڇڏي پر قلم 302 تحت موت جي سزا برقرار آهي. جسٽس نور الحق قريشي ۽ جسٽس شوڪت صديقي تي ٻڌل اسلام آباد هاءِ ڪورٽ جي ڊويزنل بينچ ممتاز قادري طرفان دهشتگردي ٽوڙ عدالت جي فيصلي خلاف اپيل جي ٻڌڻي تي محفوظ ڪيل فيصلو ٻــُڌايو. فيصلي تحت ممتاز قادري خلاف دهشتگردي ايڪٽ تحت موت جي سزا جو حڪم ڪالعدم قرار ڏنو ويو پر قلم 302 تحت موت جي سزا برقرار رکي وئي. ياد رهي ته دهشتگردي ٽوڙ عدالت پهرين آڪٽوبر 2011ع تي ممتاز قادري کي 2 ڀيرا موت جي سزا ٻــُڌائي هئي.