تازيون خبرون

Daily Archives: March 9, 2015

سينيٽ چيئرمين ۽ ڊپٽي چيئرمين جي اميدوارن جو اعلان 48 ڪلاڪن ۾ ٿي ويندو: پرويز رشيد

اسلام آباد (بيورو) سڌ سماءَ جي وفاقي وزير سنيٽر پرويز رشيد چيو آهي ته چيئرمين سينيٽ ۽ ڊپٽي چيئرمين جي اميدوارن جو اعلان ايندڙ 48 ڪلاڪن ۾ ٿي ويندو. حڪومت وٽ سڀ آپشنز کليل آهن سياسي جماعتن سان مشاورت کانپوءِ حتمي اميدوار جو فيصلو ڪيو ويندو. خانگي ٽي وي مطابق سڌ سماءَ واري وفاقي وزير چيو ته چيئرمين سينيٽ لاءِ پنهنجو پنهنجو اميدوار هوندو يا اتفاق راءِ سان بنا مقابلي چونڊ ٿيندي. حڪومت ايندڙ 48 ڪلاڪن ۾ حتمي فيصلو ڪندي. هن چيو ته سڀ آپشنز کليل آهن پر حڪومت جي خواهش آهي ته يڪراءِ سان چيئرمين ۽ ڊپٽي چيئرمين سينيٽ آندو وڃي. هن چيو ته چيئرمين ۽ ڊپٽي چيئرمين جي چونڊ لاءِ سياسي جماعتن سان رابطن جو پهريون رائونڊ جاري آهي. سياسي جماعتن سان رابطو ڪري هڪ ٻئي جو موقف ٻڌو پيو وڃي. جڏهن ته ان ڏس ۾ مشاورت سومر تي به جاري رهندي ۽ اڱاري ڏينهن حڪومت ان پوزيشن ۾ هوندي ته ٻڌائي سگهي ته پنهنجا پنهنجا اميدوار اچي رهيا آهن يا بنا مقابلي اتفاق راءِ سان چونڊ عمل ۾ آندي پئي وڃي. پرويز رشيد چيو آهي ته تحريڪ انصاف جو چيئرمين عمران خان  ڊيل تي يقين رکي ٿو ۽ هو جمهوري هيٺانهين جي شفاف طريقين کي سمجهڻ کان قاصر آهي، عمران خان جي بيان تي ردعمل عمران خان جي ان بيان مان خبر پئي ٿي ته ان ۾ سياسي شعور ۽ بالغ نظري جي گهڻي قدر کوٽ آهي، پنهنجي هڪ الڳ بيان ۾ پرويز رشيد چيو آهي ته ن ليگ سياسي پارٽين سان مشاورت کانپوءِ چيئرمين ۽ ڊپٽي چيرئين سينيٽ جي نالن کي حتمي شڪل ڏيندي، اڃان تائين انهن عهدن لاءِ ڪنهن اميدوار جو فيصلو ناهي ٿيو.

 

گوسڙو ملازمن جو زوال شروع، ڪم نه ته پگهار به نه: شرجيل ميمڻ

حيدرآباد (بيورو) اطلاعات ۽ مڪاني ادارن واري صوبائي وزير شرجيل انعام ميمڻ چيو آهي ته مدرسا قابل احترام آهن پر اتي موجود شرپسندن خلاف قدم کنيا ويندا، صوبي مان وال چاڪنگ ختم ڪئي ويندي، ڏوهارين کي ڪنهن به ريت بخش نه ڪيو ويندو، صوبي ۾ امن امان جي صورتحال بهتر ٿي آهي، سينيٽ چونڊن ۾ ڪا به هارس ٽريڊنگ ناهي ٿي، پيپلز پارٽي ۾ ڌڙا بندي واريون ڳالهيون ختم ٿي چڪيون آهن، گوسڙو ملازم جلد فارغ ڪيا ويندا، سنڌ ۾ ڪجهه عرصو اڳ شروع ڪيل صفائي مهم ۽ وڻڪاري واري مهم جا ثمر اچڻ شروع ٿي ويا آهن. ڪراچي مان 23 ڊسمبر کان شروع ڪيل اها مهم هاڻي سڄي سنڌ ۾ جاري آهي. شروعاتي طور اها مهم هڪ هفتي لاءِ شروع ڪئي وئي هئي پر پوءِ ان جا بهتر نتيجا ڏسندي ان کي هڪ سال تائين جاري رکڻ جو فيصلو ڪيو ويو آهي. اهڙن خيالن جو اظهار شرجيل انعام ميمڻ آچر ڏينهن اڳوڻي ضلعي ناظم آفيس ۾ هڪ اهم گڏجاڻي بعد ميڊيا سان ڳالهائيندي ڪيو. هن چيو ته ماحول کي بهتر بڻائڻ لاءِ هڪ لک 10 هزار ٻوٽا لڳايا ويندا جڏهن ته حيدرآباد ڊويزن جي سمورن لاڳاپيل ضلعن جي ڊي سيز ۽ ميونسپل آفيسرن کي اڄ گڏجاڻي ۾ گهرائي اهو ٻڌايو ويو آهي ته بهتر نموني ڪم ڪيو وڃي ۽ جنهن به ڪم ۾ ڪوتاهي ڏيکاري ته ان کي فارغ ڪيو ويندو. هن چيو ته ڪيترن ئي ميونسپل ڪارپوريشنن ۾ ڀرتي ڪيل سوئيپرن مان ڪيترائي ڪم نه ڪري رهيا آهن اهي سمجهي وڃن ته تمام جلد فارغ ٿيڻ وارا آهن. هن ٻڌايو ته اداري جي شفافيت کي بحال رکڻ لاءِ سنڌ بئنڪ ۾ اڪائونٽ کوليا ويا آهن جنهن تحت بايوميٽرڪ طريقي سان ڊيوٽي جي پابند ملازمن کي پگهارون ڏنيون وينديون ۽ جيڪو به ملازم اڪائونٽ نه کولرائيندو ته ان جي پگهار بند ڪئي ويندي ۽ اهو طريقو ڪراچي ۽ حيدرآباد جيئان سڄي سنڌ ۾ لاڳو ڪيو ويندو. هن ٻڌايو ته پهرين مارچ کان هڪ اهڙو سسٽم شروع ڪيو ويو آهي ته اداري ۾ هڪ رپيو به خرچ ٿيو ته اهو ويب سائيٽ تي رکيو ويندو ۽ خريداري واري عمل کي شفاف بڻائڻ لاءِ خريداري واريون پرچيون پڻ ويب سائيٽ تي رکيون وينديون ته جيئن سڄي دنيا جا ماڻهو سنڌ جي مڪاني اداري بابت شفافيت جي ڄاڻ حاصل ڪري سگهن. هن چيو ته عوامي ڀلائي لاءِ ڪم ڪيون پيا. گوسڙو ملازمن کي هر حال ۾ ڊيوٽي ڪرڻي پوندي نه ته اهي فارغ ڪيا ويندا. هاڻي يا گوسڙو ملازم رهندا يا هو پاڻ رهندو. هر چئلينج کي منهن ڏيڻ لاءِ تيار آهيون، مقصد اهو آهي ته جيڪا به سرڪاري رقم خرچ ٿئي اها شفاف نموني خرچ ٿي سگهي. هن چيو ته هر شخص جي خواهش هوندي آهي ته سمورا اختيار هن وٽ هجن پر هن سمورا اختيار ٽي ايم ايز کي ڏئي ڇڏيا آهن. ڪمشنر ڪراچيءَ سميت سمورن عملدارن کي هدايت ڪئي وئي آهي ته هر مهيني اڪائونٽ چيڪ ڪيا وڃن. هن بڌايو ته هن عمل بعد حيدرآباد ڊويزن ۾ ڪروڙين رپين جي بچت ٿي آهي. عوام جو سهڪار گهرجي ۽ اميد اهي ته ڪجهه عرصي ۾ سمورو سسٽم بهتر ٿي ويندو. هن چيو ته جڏهن ٽي ايم ايز کي خبر پوندي ته انهن جي چيڪ اينڊ بيلنس ٿي رهي آهي ته اهي بهتر نموني ڪم ڪندا. هاڻي عوامي پيسو ڪو به عملدار غلط نموني ڪڍائي نه سگهندو. هن چيو ته ان مهم ۽ اداري کي بهتر بڻائڻ لاءِ سرڪار جيڪو پيسو ڏئي ٿي اهو 100 سيڪڙو صحيح نموني خرچ ڪيو ويندو ۽ پوءِ جي ضرورت پئي ته سنڌ حڪومت کان اضافي مدد ورتي ويندي. اداري ۾ سزا ۽ جزا وارو عمل شروع ڪيو ويندو. قادر پٽيل جي رحمان ملڪ بابت بيان تي هن چيو ته جمهوريت ۾ هر ماڻهو کي حق حاصل آهي، سندس خواهش آهي ته سمورا معاملا پارٽي پليٽ فارم تي حل ڪيا وڃن. هڪ سوال جي جواب ۾ هن چيو ته سنڌ ۾ سينيٽ چونڊن دوران ڪا به هارس ٽريڊنگ نه ٿي آهي، ماضيءَ م به فنڪشنل کي 10 ميمبرن عيوض اتحاد عيوض هڪ سينيٽ جي سيٽ ڏني وئي هئي. هن چيو ته (ن) ليگ جي ڪجهه ميمبرن پ پ پ ۽ ڪجهه ميمبرن فنڪشنل اميدوار کي ووٽ ڏنا. بيلٽ باڪس مان پرچون ملڻ پروپيگنڊه آهي. هن چيو ته پارٽي ۾ ڌڙا بنديءَ واريون ڳالهيون هاڻي ختم ٿي چڪيون آهن ڇو ته سينيٽ چونڊن م پ پ پ جو 100 سيڪڙو ووٽ پارٽي اميدوارن کي مليو آهي. هڪ ٻئي سوال تي هن چيو ته اين ايف سي ايوارڊ پ پ پ جو ڪارنامو هو پر تنهن هوندي به اڃا تائين سنڌ کي جائز حق نه ملي رهيو آهي. صوبي ۾ امن امان بحال رکڻ لاءِ پگهارون وڌايون ويون آهن ۽ شهيدن لاءِ وظيفي ۾ پڻ اضافو ڪيو ويو آهي. وفاقي حڪومت کان مطالبو ڪيو هو ته صوبي ۾ امن امان جي سلسلي ۾ ٻيو ته ٺهيو پر صرف هٿيارن جي مد ۾ مدد ڪئي وڃي پر وفاقي حڪومت طرفان ڪيل واعدا وفا نه ٿيا پر تنهن هوندي به سنڌ ۾ امن امان جي صورتحال بهتر ٿي آهي. اتر سنڌ سميت ڪراچي، حيدرآباد ۾ به ڏوهن ۾ گهٽتائي آئي آهي. وڏو وزير صوبي ۾ امن امان لاءِ ذاتي طور دلچسپي وٺي رهيو آهي. رينجرز ۽ پوليس کي فري هينڊ ڏنو ويو آهي. ٽارگيٽ آپريشن وڌ کان وڌ لياري ۾ ٿئي پيو جتي پ پ پ جو وڏو ووٽ بئنڪ آهي. تنهن هوندي به سنڌ حڪومت ڏوهارين خلاف ايڪشن جي سلسلي ۾ ڀرپور مدد ڪري رهي آهي جيڪو بهترين حڪمراني جو چٽو ثبوت آهي. هن چيو ته امن امان 25 کان 30 سالن جو معاملو اهي ۽ ايتري عرصي جو گند ڪچرو، هٿيارن جا ذخيرا ختم ڪرڻ لاءِ وقت کپي. نيت صاف آهي سمورا شهري برابر آهن. صرف فرق ڏوهاري ۽ پرامن شهرين ۾ ڪرڻو آهي، ڏوهارين کي ڪنهن به ريت بخش نه ڪيو ويندو. هن چيو ته نيشنل ايڪشن پلان تحت غيرقانوني طور سنڌ ۾ رهندڙ پناهگيرن جون گرفتاريون عمل ۾ آنديون ويون آهن. لائوڊ اسپيڪر جي غيرقانوني استعمال ۽ وال چاڪنگ خلاف ڪم ٿي رهيو آهي ۽ هدايتون ڏنيون ويون آهن ته هر قسم جي وال چاڪنگ ڊاهي وڃي جڏهن ته چڙ ڏياريندڙ تقريرن تي ڪيترائي ماڻهو گرفتار ڪيا ويا آهن. مدرسا قابل احترام آهن. پر اسان کي فيصلو ڪرڻو آهي ته جيڪي مدرسا ڄاڻي واڻي دهشتگردي ڏانهن راغب ڪرڻ وارو ڪم ڪري رهيا آهن ۽ اتي فورسز تي حملا ڪرڻ جي ترغيب ڏني پئي وڃي انهن خلاف ايڪشن کنيو ويندو پر اهو ايڪشن مدرسن خلاف نه پر اتي موجود شرپسندن خلاف هوندو. هن چيو ته سنڌ ۾ موجود ايپيڪس ڪاميٽي جنهن جا ميمبر ڪور ڪمانڊر ڪراچي، وڏو وزير، گورنر ۽ ڊي جي رينجرز آهن انهن تي مڪمل نموني ڪم ڪيو پيو وڃي.

 

وزير اعظم سان پنجاب جي وڏي وزير جي ملاقات، سينيٽ چيئرمين ۽ ڊپٽي چيئرمين جي چونڊ بابت ڳالهيون

لاهور(م.ڊ) وزيراعظم نواز شريف ۽ پنجاب جي وڏي وزير شهباز شريف سمورين پارٽين جي اتفاق سان سينيٽ جي چيئرمين، ڊپٽي چيئرمين جي چونڊ تي اتفاق ڪيو آهي، ذريعن مطابق وزيراعظم نواز شريف  ۽ پنجاب جي وڏي وزير وچ ۾ جاتي امراءُ ۾ ملاقات ٿي، وزيراعظم شهباز شريف کي پنجاب ۾ سينيٽ چونڊڻ ۾ ڪلين سوئيپ تي مبارڪباد ڏني ٻنهي اڳواڻن وچ ۾ ملاقات ۾ سينيٽ جي چيئرمين ۽ ڊپٽي چيئرمين جي چونڊ بابت خيالن جي ڏي وٺ ڪئي وئي وڏي وزير شهباز شريف سينيٽ جي ٻنهي عهدن تي حمايت حاصل ڪرڻ لاءِ ايم ڪيو ايم سان رابطن جي حوالي سان وزيراعظم کي آگاهه ڪيو.

 

سينيٽ چيئرمين ۽ ڊپٽي چيئرمين جي چونڊ، سياسي سرگرمين ۾ اضافو اچي ويو

اسلام آباد (بيورو) سينيٽ جي چيئرمين ۽ ڊپٽي چيئرمين جي چونڊ لاءِ سرگرمين ۾ تيزي اچي وئي آهي هڪ طرف سياسي پارٽين سان رابطن لاءِ متحده ڪميٽي جوڙي ڇڏي آهي ته ٻئي طرف پيپلز پارٽي مختلف سياسي پارٽين کي سڀاڻي دعوت ڏئي ڇڏي آهي، ڪير بڻجندو سينيٽ جو چيئرمين ان لاءِ حڪومتي ۽ اپوزيشن پارٽين جون ڪوششون جاري آهن، پيپلز پارٽي سڀاڻي مختلف پارٽين کي اجلاس ۾ دعوت ڏني آهي انهن ۾ ايم ڪيو ايم، اي اين پي، جي يو آءِ ف، ق ليگ ۽ بي اين پي عوامي شامل آهن، انهن پارٽين جي سيٽن تي نظر وجهون ته متحده جون 8، اي اين پي جون 7، جي يو آءِ ف جون5، ق ليگ جون 4 ۽ بي اين پي عوام جون 2 سيٽون ملي 26 سيٽون بڻجن ٿيون جڏهن ته پيپلز پارٽي کي پاڻ وٽ سينيٽ جون 27 سيٽون موجود آهن، پر ڇا هي سموريون پارٽيون پيپلز پارٽي جي ڪنهن فارمولي تي اتفاق ڪري وٺنديون، ان لاءِ انتظار ڪرڻو پوندو ٻئي طرف متحده جي رابطه ڪميٽي به سينيٽ جي چيئرمين ۽ ڊپٽي چيئرمين جي چونڊ لاءِ مختلف پارٽين سان رابطن لاءِ ڪميٽي ٺاهي آهي جنهن جي الطاف حسين منظوري ڏئي ڇڏي آهي ان ڪميٽي ۾ خالد مقبول صديقي، رئوف صديقي، فاروق ستار، ڪنور نويد جميل ۽ بابر غوري سان گڏ فروغ نسيم شامل آهن.

 

پ پ سرڪار عورتن کي اقتصادي ۽ سماجي طور تي بااختيار بنائڻ لاءِ عملي طور قدم کڻي رهي آهي: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه عورتن جي عالمي ڏينهن جي موقعي تي پنهنجي پيغام ۾ چيو آهي ته پيپلز پارٽي ۽ سنڌ حڪومت عورتن کي اقتصادي ۽ سماجي طور تي بااختيار بنائڻ لاءِ عملي طور تي ڪوشان آهي. هن چيو ته اسان جي ملڪ جي اڌ آبادي عورتن تي ٻڌل آهي جن جا حوصلا وڌائڻ، تعليم ۽ تربيت سان ملڪ اندر وڏي تبديلي ٿي سگهي ٿي هن چيو ته سنڌ حڪومت عورتن کي مالي طور خودمختيار بنائڻ لاءِ کين مفت زمينون، ٻج ۽ ڀاڻ به مهيا ڪيو آهي ۽ بينظير انڪم سپورٽ جي تحت انهن جي مالي مدد به ڪري رهي آهي. هن چيو ته عورتن کي تعليم ڏيارڻ لاءِ سنڌ حڪومت هن وقت به ڇوڪرين جي تعليم ۽ حوصلو ڏيڻ لاءِ نه صرف مفت ڪتاب پر وظيفو به ڏئي رهي آهي. هن ڇوڪرين جي تعليم تي زور ڏيندي ماڻهن کي چيو ته اهي پنهنجي سمورين ٻارڙين کي تعليم جي عظيم زيور سان مالا مال ڪن. هن چيو ته حڪومت عورتن کي سماجي تحفظ فراهم ڪرڻ لاءِ ڪيترائي ادارا فعال رکيا آهن جتي انهن جي تحفظ کي نظر ۾ رکندي کين ڇادر ۽ چارديواري سان گڏوگڏ قانوني تحفظ به فراهم ڪيو وڃي ٿو.

 

جنرل راحيل شريف لاءِ استنبول ايوارڊ جو اعلان

اسلام آباد (بيورو) آرمي چيف جنرل راحيل شريف جي بي مثال قيادت ۾ پاڪ فوج دهشتگردي خلاف جنگ ۾ ڪاميابين جو سلسلو جاري رکندي پئي اچي ان جي اعتراف ۾ آرمي چيف کي استنبول ايوارڊ سان نوازڻ جو اعلانڪيو ويو آرمي چيف جنرل راحيل شريف کي اهو ايوارڊ گذريل رات ايوان صدر ۾ ٿيندڙ ڇهين اسلامي ملڪن ٿنڪ ٽينڪس فورم جي تقريب ۾ ڏنو ويو، استنبول ايوارڊ دهشتگردي خلاف پاڪ فوج جي بي مثال ڪاميابين ۽ آرمي چيف جنرل راحيل شريف جي قائدانه صلاحيتن جي اعتراف ڏنو ويو آهي اسلامي ملڪن جي ٿنڪ ٽينڪس فورم ۾ پاڪستان، سعودي عرب، ترڪي، ايران، بنگلاديش، آذربائيجان، مصر، ملائيشيا ۽ سوڊان شامل آهن، ڇهين ٿنڪ ٽينڪس فورم جي ميزباني پاڪستان ڪري رهيو آهي.

 

سينيٽ چيئرمين ۽ ڊپٽي چيئرمين جي چونڊ، ايم ڪيو ايم سياسي پارٽين سان رابطن لاءِ ڪميٽي جوڙي ڇڏي

ڪراچي (اسٽاف رپورٽر)ايم ڪيو ايم جي سربراهه الطاف حسين سينيٽ چيئرمين ۽ ڊپٽي چيئرمين جي چونڊ جي سلسلي ۾ سياسي پارٽين سان رابطن لاءِ ڪميٽي قائم ڪري ڇڏي آهي. ايم ڪيو ايم سربراهه الطاف حسين پاران جوڙيل ڪميٽي ىخالد مقبول صديقي، رئوف صديقي، فاروق ستار، ڪنور نويد جميل ۽ بابر غوري شامل آهن. ايم ڪيو ايم جي ڪميٽي سينيٽ چيئرمين ۽ ڊپٽي چيئرمين جي چونڊ لاءِ سياسي پارٽين سان رابطا ڪندي. متحده جي ڪميٽي سياسي پارٽين سان رابطن بعد پنهنجي رپورٽ الطاف حسين کي موڪليندي، جنهن بعد سينيٽ چيئرمين ۽ ڊپٽي چيئرمين لاءِ ڪنهن پارٽي جي حمايت جو فيصلو ڪيو ويندو.

 

پ پ پاران صرف سينيٽ چيئرمين جي سيٽ تي اميدوار آڻڻ جو فيصلو

اسلام آباد(بيورو) پيپلز پارٽي صرف سينيٽ چيئرمين جي اليڪشن ۾ اميدوار آڻڻ جو فيصلو ڪيو آهي، ڊپٽي چيئرمين جو عهدو اتحادين کي ڏنو ويندو، ذريعن مطابق پيپلزپارٽي جي اعليٰ سطحي مشاورت ۾ ان ڳالهه کي حتمي شڪل ڏني وئي آهي ته پيپلز پارٽي صرف سينيٽ چيئرمين لاءِ پنهنجو اميدوار ڏيندي ڊپٽي چيئرمين جو عهدو اتحادين کي ڏنو ويندو پيپلز پارٽي سينيٽ اليڪشن جي حوالي سان 2 رڪني ڪميٽي به قائم ڪري ڇڏي آهي جنهن ۾ سينيٽر رضا رباني ۽ سينيٽر ڊاڪٽر قيوم سومرو کي شامل ڪيو ويو آهي،  هي ڪميٽي گذريل ڏينهن کان پنهنجو ڪم شروع ڪري چڪي آهي ۽ اڄ وڌيڪ سياسي پارٽين سان رابطا ڪندي ڪميٽي جي ميمبر سينيٽر ڊاڪٽر قيوم سومرو پيپلز پارٽي جي اڳواڻ روبينا خالد کي ڊپٽي چيئرمين جي عهدي تي آڻڻ جي خبرن کي غلط قرار ڏيندي ان جي ترديد ڪري ڇڏي آهي هن جو چوڻ آهي ته پارٽي صرف سينيٽ چيئرمين جي اليڪشن وڙهندي.

 

جڊيشل ڪميشن لاءِ سياسي جرڳو جلد سڏايو ويندو، جماعت اسلامي ۽ پيپلز پارٽي ۾ اتفاق

اسلام آباد (بيورو) جماعت اسلامي ۽ پيپلز پارٽي ان ڳالهه تي اتفاق ڪيو آهي ته جڊيشل ڪميشن لاءِ سياسي جرڳو سڏايو ويندو، ذرين مطابق امير جماعت اسلامي سراج الحق ۽ پي پي اڳواڻ رحمان ملڪ وچ ۾ جڊيشل ڪميشن جي حوالي سان ٽيليفونڪ رابطو ٿيو رحمان ملڪ امير جماعت سان ڳالهه ٻولهه ۾ چيو ته جڊيشل ڪميشن جي قيام لاءِ سياسي جرڳو جلد سڏايو ويندو. هن چيو ته سندس ڪوشش آهي ته سنيٽ چيئرمين جي چونڊ کان اڳ ئي جڊيشل ڪميشن جو معاملو حل ٿي ويندو.

 

اميد آهي ڀارتي وزيراعظم پاڪستان ۾ ٿيندڙ سارڪ سربراهي ڪانفرنس ۾ شرڪت ڪندو: سرتاج عزيز

اسلام آباد (بيورو) وزيراعظم جي پرڏيهي ۽ قومي سلامتي جي صلاحڪار سرتاج عزيز چيو آهي ته کيس اميد آهي ته ڀارتي وزيراعظم نريندر مودي ايندڙ سال پاڪستان ۾ ٿيندڙ سارڪ سربراهي ڪانفرنس ۾ شرڪت لاءِ اسلام آباد ايندو، ٻنهي ملڪن وچ ۾ اصل مسئلو اعتماد جي بحالي جو آهي. ڀارت پاران دعوت ملي ته پاڪستاني پرڏيهي سيڪريٽري به ويندو. فوج ۽ سياسي ادارا چين ڀارت ۽ افغانستان جي معاملي تي هڪ صفحي تي آهن فوج حڪومت جو حصو آهي. بالادستي پارليامينٽ ۽ چونڊيل حڪومت کي حاصل آهي، چيني صدر 23 مارچ تي نه پر بعد ۾ ڦاڪستان ۾ ايندو، مولوي فضل الله جي حُوالي ڪرڻ سان افغانستان سان رابطي ۾ آهيون ڪا به اڳڀرائي ٿي ته ميڊيا کي خبر پئجي ويندي. آچر تي اسلام آباد ۾ اسلامي ملڪن جي ٿنڪ ٽينڪ جي اهتمام هيٺ سيمينار کانپوءِ صحافين سان ڳالهائيندي سرتاج عزيز چيو ته پاڪستان جي خواهش آهي ته هن دوري ۾ ٻظرفي ڳالهيون ٿيون ۽ هي دورو صرف روايتي دورو نه هجي پر ان بابت اڃا وڌيڪ ڪهجهه نه ٿو چئي سگهجي. هن چيو ته ڀارتي پرڏيهي سيڪريٽري جي تازي دوري کانپوءِ ڏسڻو آهي ته هاڻي ڪهڙا قدم کڻڻا آهن. هڪ سوال تي پاڪستان ۽ ڀارت وچ ۾ باضابطه ڳالهيون شروع ٿي سگهندين ته هن چيو ته پاڪستان جي خواهش آهي ته سمورن معاملن تي ڳالهيون ٿين. جن ۾ ڪشمير، پاڻي ۽ سرڪريڪ جهڙا مسئلا شامل آهن. هن چيو ته پاڪستان جي خواهش ۽ مطالبو اهو هوندو جڏهن به ٻيهر ڳالهيون شروع ٿين ته سمورا مسئلا ايجنڊا ڳالهين ۾ هجڻ گهرجن. جڏهن ته هن کان پڇي ڪئي وئي ته ڀارتي سيڪريٽري جي دوري کانپوءِ لائحه عمل ڪهڙو هوندو ته هن چيو ته هي دورو سارڪ ملڪن جي پس منظر هو جڏهن ان دوران ٻطرفي به ڳالهه ٻُولهه به ٿي آهي.