تازيون خبرون

Daily Archives: March 6, 2015

سينيٽ چونڊون: پنجاب ۾ ن ليگ، سنڌ ۾ پ پ ۽ ايم ڪيو ايم جا سمورا ميمبر ڪامياب

اسلام آباد (بيورو) سينيٽ جي غير حتمي ۽ غير سرڪاري نتيجن موجب اسلام آباد جي ٻن سيٽن ۽ پنجاب جي 11 ئي سيٽن تي  نواز ليگ جا سينيٽر ڪامياب ٿي ويا آهن. غيرحتمي ۽ غير سرڪاري نتيجن موجب نواز ليگ جي اسلام آباد مان اميدوار اقبال ظفر جهڳڙا 211 ووٽ کڻي ڪاميابي حاصل ڪئي آهي، عورتن جي سيٽ تي نوازليگ جي اميدوار راحيلا مگسي 205 ووٽ کڻي ڪامياب ٿي وئي آهي. اقبال ظفر جهڳڙا جي سامهون بيٺل پ پ اميدوار عمران اشرف کي 68 ووٽ مليا ۽ راحيلا مگسي سامهون بيٺل پيپلزپارٽي جي اميدوار نرگس فيض ملڪ رڳو 71 ووٽ حاصل ڪري سگهي. اسلام آباد ۾ جنرل سيٽ تي ڪاسٽ ڪيل ووٽن مان 11 ۽ عورتن واري مخصوص سيٽ تي ڪاسٽ ٿيل ووٽن مان 14 ووٽ رد ڪيا ويا. سينيٽر طور ڪاميابي بعد ميڊيا سان ڳالهائيندي اقبال ظفر جهڳڙا ۽ راحيلا مگسي چيو ته هو وزيراعظم نواز شريف جي اعتماد تي پورا لهندا. غيرحتمي ۽ غير سرڪاري نتيجن موجب نوازليگ پنجاب مان سينيٽرز جون 11 ئي سيٽون حاصل ڪري ورتيون آهن. پنجاب مان عورتن جي سيٽن تي نواز ليگ جي عائشه رضا فاروق ۽ بيگم نجمه حميد ڪاميابي ماڻي آهي. پنجاب ۾ سينيٽرز جي جنرل سيٽن تي نواز ليگ جي نهال هاشمي، سليم ضياءَ، چوڌري تنوير خان، مشاهدالله، پرويز رشيد، عبدالقيوم ۽ ڊاڪٽر غوث محمد ڪامياب ٿي ويا آهن، ٽيڪنوڪريٽ جي سيٽن تي نواز ليگ جو راجا ظفر الحق ۽ پروفيسر ساجد مير ڪامياب ٿيا آهن. اسلام آباد جي ٻن سيٽن لاءِ 260 ميمبرن ووٽ ڪاسٽ ڪيو، پنجاب ۾ 338 ووٽن مان 335 ووٽ ڪاسٽ ڪيا ويا ، ٻئي طرف سنڌ مان سينيٽ جي 7 جنرل سيٽن لاءِ پ پ ۽ ايم ڪيو ايم جا سمورا اميدوار ڪامياب ٿي ويا آهن، اپوزيشن جي واحد اميدوار امام الدين شوقين کي صرف 13 ووٽ مليا آهن ۽ هو هارائي ويٺو آهي، هي اعلان خميس تي سنڌ اسيمبلي ۾ سنيٽ جي چونڊن کانپوءِ صوبائي اليڪشن ڪمشنر سنڌ ۽ ريٽرنگ آفيسر ايس ايم طارق قادري پريس ڪانفرنس ۾ ڪيو، ان موقعي تي پولنگ آفيسر تنوير زڪي، عطاءُ الرحمان، نعيم احمد، نديم حيدر، مسعود قريشي، سيد راشد حسين ۽ اليڪشن ڪميشن سنڌ جو ٻيو عملو موجود هو، نتيجن مطابق 7 جنرل سيٽن تي پ پ جا 5 اميدوار اسلام الدين شيخ، سليم مانڊي والا، گيانچند، عبدالطيف انصاري، عبدالرحمان ملڪ ۽ ايم ڪيو ايم جا 2 اميدوار ميان عتيق ۽ خوش بخت شجاعت ڪامياب ٿيا. ٽيڪنوڪريٽس جي ٻن سيٽن تي پيپلز پارٽي جو فاروق ايڇ نائڪ ۽ ايم ڪيو ايم جو بئريسٽري سيف، عورتن لاءِ مخصوص ٻن سينيٽ تي پ پ جي سسئي پليجو ۽ ايم ڪيو ايم جي نگهت مرزا اڳواٽ ئي بنا مقابلي ڪامياب ٿي چڪا آهن، اهڙي طرح پ پ 7 ۽ ايم ڪيو ايم 4 سيٽون حاصل ڪيون آهن. صوبائي اليڪشن ڪمشنر پريس ڪانفرنس ۾ چيو ته ڪل 167 مميبر ووٽ جا اهل هئا جن مان 163 ميمبرن ووٽ ڪاسٽ ڪيو، نيتجن مطابق پهرين ترجيح ۾ اسلام الدين شيخ 24، خوش بخت شجاعت 22 ۽ ميان محمد عتيق 22، گيانچند 21 ووٽن سان ڪامياب ٿيا، پهرين ترجيح ۾ رحمان ملڪ 20 ووٽن سان ستين ۽ عبدالطيف انصاري 20 سان ڇهين پوزيشن تي رهيو، جڏهن ته ٻي ترجيح ۾ هنن ٻنهي کي ڪامياب قرار ڏنو ويو، مسلم ليگ فنڪشنل ۽ مسلم ليگ ن جي گڏيل اميدوار کي امام الدين شوقين کي فقط 13 ووٽ مليا، ريٽرنگ آفيسر مطابق فارمولا 20.38 هو ۽ ووٽ ڪاسٽنگ جي شرح 97.60 سيڪڙو رهي، ايس ايم طارق قادري مطابق سمورن اميدوارن جي پولنگ ايجنٽن رزلٽ تي اعتماد جو اظهار ڪيو آهي ۽ حتمي زرلٽ اليڪشن ڪميشن آف پاڪستان گوشوارا جمع ڪرائڻ کانپوءِ ڪندو، صوبائي اليڪشن ڪمشنر چيو ته اسان گذريل رات پولنگ اسٽيشن کي پنهنجي ڪنٽرول ۾ وٺي ڇڏيو هو ۽ هتي صبح کان ئي اسان جو عملو موجود رهيو، صبح 9 وڳي پولنگ قرآن پاڪ جي تلاوت سان شروع ٿي، هڪ وڳي تائين پولنگ جو عمل سست نظر آيو ۽ هڪ وڳي کانپوءِ تيز ٿيو، سوا چار وڳي تائين 163 ووٽ ڪاسٽ ٿيا، غير حتمي نتيجن مطابق ڪامياب ٿيندڙ مان 5 جو تعلق پ پ ۽ 2 جو ايم ڪيو ايم سان آهي، نتيجن کانپوءِ پ پ ۽ ايم ڪيو ايم جي ميمبرن اسيمبلي ۾ جشن ملهايو ۽ نعرا هنيا، پ پ جا مميبر نه جهڪڻ وارو آصف زرداري نه وڪامڻ وارو آصف زرداري سڀ پي ڀاري جا نعرا هڻندا رهيا، جڏهن ته ايم ڪيو ايم جا ميمبر جئي متحده، جئي الطاف جا نعرا هڻي رهيا هئا، انهن ڪاميابي جي خوشي ۾ مٺائي به ورهائي.

 

سپريم ڪورٽ مڪاني چونڊن جو نظرثاني شيڊول به رد ڪري ڇڏيو

اسلام آباد (بيورو) سپريم ڪورٽ مڪاني چونڊن جو نظرثاني شيڊول رد ڪندي واضح ڪيو آهي ته اليڪشن ڪميشن کي آئين نافذ ناهي ڪرڻو ته ٻڌائي ڇڏي خميس تي جسٽس جواد ايس خواجه جي سربراهي ۾ سپريم ڪورٽ جي ٽه رڪني بئنچ ڪنٽومينٽ ايريا ۾ مڪاني چونڊن جي حوالي سان وزيراعظم جي خلاف توهين عدالت جي درخواست جي ٻڌڻي ڪئي ٻڌني شروع ٿيڻ تي اٽارني جنرل سلمان اسلم بٽ مڪاني چونڊن بابت نظرثاني ٿيل اليڪشن شيڊول پيش ڪيو شيڊول مطابق ڪنٽومينٽ بورڊ ۾ مڪاني چونڊون 25 اپريل جڏهن ته خيبرپختونخواهه ۾ 7 جون تي بلدياتي چونڊون ٿينديون شيڊول تحت سنڌ ۽ پنجاب ۾ مڪاني چونڊون ٽن مرحلن ۾ ٿينديون پهرين مرحلي ۾ مڪاني چونڊون 3 سيپٽمبر جڏهن ته ٻئي مرحلي ۾ مڪاني چونڊون 4 نومبر تي ٿينديون جسٽس جواد ايس خواجه نظرثاني ٿيل شيڊول تي تحفظات جو اظهار ڪندي پڇاڻو ڪيو ته پنجاب ۽ سنڌ ۾ ٽن مرحلن ۾ بلدياتي چونڊن جو ڇا مطلب آهي آخر هي احسان ڪنهن تي ٿي رهيو آهي جنهن تي اليڪشن ڪميشن جي نمائندي چيو ته ان کي ان جي خبر نه آهي کيس ته چيو ويو ته پيش ٿي وڃو ۽ هو عدالت آڏو حاضر ٿي ويو اليڪشن ڪميشن جي نمائندي جي جواب تي جسٽس جواد ايس خواجه ڪاوڙ ڪندي چيو ته عدالت سان مذاق ڪري رهيا آهيو جيڪڏهن اليڪشن ڪميشن کي آئين نافذ ناهي ڪرڻو ته ٻڌائي ڇڏي جيڪڏهن سيڪريٽري اليڪشن ڪميشن نه ايندو ته ڇا اليڪشن ڪميشن کي تالو لڳي ويندو اسان کي اهڙو ماڻهو نه گهرجي جنهن کي ڪا خبر ئي نه هجي بيشڪ نائب قاصد اماڻيو پر هي ٻڌايو ته ٽن مرحلن جو ڇا مطلب آهي.

 

بلوچستان ۾ ن ليگ ۽ پختونخواهه ميپ جا 3، 3 اميدوار ڪامياب، ڪي پي ڪي ۾ پي ٽي آءِ سوڀاري: غير سرڪاري نتيجا

ڪوئيٽا/پشاور(م.ڊ) بلوچستان اسيمبلي ۾ سينيٽ جي 12 سيٽ نلاءِ پولنگ ٿي مسلم ليگ ن لاءِ هڪ وڏو اپ سيڊ سردار يعقوب ناصر جي شڪست جي صورت ۾ سامهون آيو ان کي صرف 6 ووٽ مليا، ان جي مقابلي ۾ آزاد اميدوار يوسف باديني حيران ڪندڙ طور تي ڪامياب ٿي ويو، اسپيڪر جان محمد جمالي جي ڌيءَ ثنا جمالي به هارائي وئي پر هن 15 ووٽ کڻي ن ليگ کي وڏو نقصان پهچايو ، جنرل سيٽن تي نيشنل پارٽي جو مير حاصل بزنجو، پختونخواهه ميپ جو محمد عثمان ڪاڪڙ  اعظم موسيٰ خيل، جي يو آءِ جو مولانا عبدالغفور حيدري، مسلم ليگ ن جو نعمت الله زهري، بي اين پي مينگل جو جهانزيب جمالديني ۽ آزاد اميدوار يوسف باديني ڪاميابي حاصل ڪري ورتي، ٽيڪنوڪريٽ جي 2 سيٽن تي نيشنل پارٽي جو ڪبير محمد شهي ۽ مسلم ليگ ن جو آغا شهباز دراني ڪامياب ٿي ويو، عورتن جي 2 سيٽن تي پختونخواهه ميپ جي گل بشريٰ ۽ مسلم ليگ ن جي ڪلثوم پرويزن ڪامياب ٿي وئي. ٻئي طرف صدارتي آرڊيننس جاري ٿيڻ سبب فاٽا ۾ چونڊ عمل مڪمل ٿي نه سگهيو جنهن کي معطل ڪيو ويو، هوڏانهن خيبرپختونخواهه ۾ چونڊن دوران بدمضگي سبب اليڪشن نه ٿي سگهي هئي جنهن جو ٽائن 4 وڳي بجاءِ رات 8 وڳي تائين وڌايو ويو هو آخري اطلاعن تائين چونڊن ۾ پاڪستان تحريڪ انصاف کي ڪامياب کي قرار ڏنو ويو .

 

 

حڪومت ۽ عوام پاڪ چين اقتصادي راهداري رٿا مقرر وقت تي مڪمل ڪرڻ لاءِ حالتون سازگار بڻائي: صدر ممنون حسين

لاهور (م.ڊ) پاڪستان جي صدر ممنون حسين چيو آهي ته پاڪ چين اقتصادي راهداري جي رٿا سان صرف پاڪستاني نه پر سڄي خطي ۾ اقتصادي ترقي شروع ٿي ويندي حڪومت ۽ عوام اقتصادي راهداري رٿا جي مقرر وقت تي مڪمل ڪرڻ لاءِ حالتون سازگار بڻائي حڪومت ورلڊ بئنڪ ۽ چين جي سهڪار سان بجلي پيدا ڪرڻ جي 15 منصوبن تي ڪم شروع  ڪري ڇڏيو آهي جنهن سان ايندڙ ٽن سالن ۾ ملڪ مان لوڊشيڊنگ ختم يا صرف نالي ماتر وڃي رهندي آپريشن ضرب عضب ڪاميابي سان ٿي رهيو آهي ۽ پاڪ فوج دهشتگردن جو ان وقت تائين پيڇو ڪندي رهندي جيستائين اهي مڪمل ختم نه ٿيندا ڪرپشن سبب اسان سخت مسئلن ۾ ڦاٿل آهيون ۽ انهيءَ ڪري خزانو خالي ۽ ملڪ قرضي ٿي ويو ڪرپٽ ماڻهو جيڪڏهن پنهنجي اصلاح نه ڪن ته قوم انهن جو سماجي بائيڪاٽ ڪري اهڙن خيالن جو اظهار گذريل ڏينهن فورٽريس اسٽيڊيم ۾ نيشنل هارس اينڊ ڪيٽل شو 2015 جي افتتاحي تقريب کي خطاب ڪندي ڪيو ان موقعي تي وقتي گورنر پنجاب رانا محمد اقبال ڊي جي رينجرز پنجاب خان طاهر جاويد خان صوبائي وزير ۽ ٻيون شخصيتون به موجود هيون صدر چيو ته لاهور ۾ پاڪستان جي سڀ کان وڏي ميلي جو افتتاح ڪري جيڪي جذبا محسوس ڪري رهيو آهيان اهي بيان ڪرڻ سولو نه آهي هي ميلو جتي بهار جي مند اچڻ جي آجيان آهي اتي پاڪستان ۾ ترقي ۽ خوشحالي جي خبر به آهي هن چيو ته هن قوم غير معمولي محنت ڪئي آهي نئون سج ماضي جي تنهائين مان نڪري قومن سان هلڻ جو پرامن پاڪستان جو سج آهي هي دهستگردي ۽ انتهاپسندي کي ختم ڪرڻ ۽ پرامن ۽ پرعزم پاڪستان جو سج آهي هن چيو ته آپريشن ضرب عضب ڪاميابي سان ٿي رهيو آهي ۽ پاڪ فوج دهشتگردن جو ان وقت تائين پيڇو ڪندي رهندي جيستائين اهي مڪمل ختم نه ٿي ويندا هن چيو ته حڪومت ورلڊ بئنڪ ۽ چين جي سهڪار سان بجلي جي 15 رٿائن تي ڪم شروع ڪري ڇڏيو آهي ٽن سالن ۾ ملڪ مان لوڊشيڊنگ مڪمل ختم ٿي ويندي يا نه هئڻ جي برابر وڃي بچندي جنهن سان اسان جي صنعت ترقي ڪندي ۽ مان سٺي خبر ڏيئي رهيو آهيان ته ايندڙ سالن ۾ فورٽريس اسٽيڊيم ۾ ميلي جي صنعتي نمائش جي شان ئي ڪجهه ٻيو هوندو مان اهو ٻڌائڻ ۾ به خوشي محسوس ڪري رهيو آهيان ته ملڪ ۾ نون ڊيمن تي ڪم شروع ٿي ويو آهي ۽ پاڻي جا ذخيرا وڌڻ سان اسان جي زراعت ترقي ڪندي هن چيو ته الله تعاليٰ اسان کي بهترين بيهڪ سان نوازيو آهي پر هن ڪرم نوازي کي نظرانداز ڪري ناشڪري ڪئي ويئي آهي هاڻي حالتون تبديل ٿي رهيون آهن پاڪ چين اقتصادي راهداري جي منصوبي سان پاڪستان ئي نه پر سڄي خطي ۾ اقتصادي ترقي شروع ٿي ويندي هي اهڙو منصوبو آهي جنهن سان پاڪستان ۾ اقتصادي بحالي جو مڪمل دارومدار آهي.

 

چونڊ عمل شروع ٿيڻ کان ڪجهه ڪلاڪ اڳ آرڊيننس جاري ڪرڻ ناانصافي آهي: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته چونڊ عمل شروع ٿيڻ کان ڪجهه ڪلاڪ اڳ آرڊيننس جاري ڪرڻ ناانصافي آهي حڪومت جو قدم جمهوريت لاءِ خطرناڪ هوندو اليڪشن شيڊول اچڻ کان پوءِ قانون تبديل نٿو ٿي سگهي اليڪشن ڪميشن صدارتي آرڊيننس جو نوٽيس وٺي خميس تي هتي ميڊيا سان غير رسمي ڳالهه ٻولهه ڪندي مخالف ڌر اڳواڻ سيد خورشيد شاهه چيو ته حڪومت هارس ٽريڊنگ جو عمل ڪري ڏيکاري ڇڏيو جيڪا  شئي پنهنجي مفاد ۾ لڳي ان تي آرڊيننس آندو چيف اليڪشن ڪمشنر ان آرڊيننس آڻڻ جو نوٽيس وٺي خورشيد شاهه چيو ته هن آرڊيننس کي غير قانوني سمجهيو ويندو فاٽا وارا پريشان آهن جيڪو اليڪشن ڪميشن ويل آهي اليڪشن شيڊول اچڻ کان پوءِ قانون تبديل نٿو ٿي سگهي سيد خورشيد شاهه چيو ته حڪومت پاران فاٽا جي حوالي سان رات جي اونداهي ۾ جاري ايس آر او جي مذمت ڪيون ٿا فاٽا جي عوام جي حقن لاءِ اسان ان سان گڏ آهيون هڪ سوال جي جواب ۾ هن چيو ته چونڊ عمل شروع ٿيڻ کان ڪجهه ڪلاڪ اڳ آرڊيننس جاري ڪرڻ ناانصافي آهي حڪومت جو هي قدم جمهوريت لاءِ خطرناڪ هوندو صدارتي آرڊيننس جاري ڪرڻ آئين جي خلاف ورزي آهي حڪومت پنهنجي مرضي جو قانون جاري ڪري رهي آهي جيڪو قانون ان کي پسند آهي اهو لاڳو ڪيو وڃي ٿو. خورشيد شاهه صدارتي آرڊيننس کي رد ڪندي چيو ته هي آرڊيننس فاٽا ميمبرن جي حق تلفي آهي.

 

سنڌ ۾ شفاف چوندون عوامي نمائندن جو پ پ تي اعتماد جو اظهار آهي: وڏو وزير

ڪراچي (اسٽآف رپورٽر) سنڌ جي وڏي وزير سيد قائم علي شاهه چيو آهي ته سنڌ ۾ شفاف چونڊن سان هڪ دفعو ٻيهر عوامي نمائندن پ پ تي مڪمل اعتماد جو اظهار ڪيو آهي، اسان ڌانڌلي تي يقين نٿا رکون، پ پ ۽ ايم ڪيو ايم ووٽن جي بنياد تي ڪامياب ٿيون آهن، اهڙن خيالن جو اظهار هن سينيٽ چونڊن جي نتيجي کانپوءِ ميڊيا سان ڳالهائيندي ڪيو، هن چيو ته سنڌ جي شفاف چونڊن ۾ هي ثابت ٿي ويو آهي ته سنڌ جو عوام ۽ نمائندا ڌانڌلي تي يقين نٿا رکن، مان ان موقعي تي پ پ جي ڪو چيئرمين آصف زرداري، چيئرمين بلاول ڀٽو زرداري ۽ ايم ڪيو ايم جي سربراهه الطاف کي واڌايون ڏيان ٿو، اڄوڪي ڪاميابي جمهوريت لاءِ آهي، جمهوريت لاءِ گهڻيون قربانيون ڏنيون آهن، چونڊون شفاف ٿيون آهن، هي ان ڳالهه جو ثبوت آهي ته جمهوريت مضبوط ٿي رهي آهي.

 

سينيٽ چونڊن ۾ هارس ٽريڊنگ ناهي ٿي، ف ليگ وٽ 10 ووٽ هئا کيس 13مليا: شرجيل ميمڻ

ڪراچي (اسٽآف رپورٽر) اطلاعات ۽ بلديات واري صوبائي وزير شرجيل انعام ميمڻ چيو آهي ته سينيٽ جي چونڊن ۾ ڪنهن قسم جي هارس ٽريڊنگ نه ٿي آهي. مسلم ليگ فنڪشنل وٽ 10 ووٽ هئا ۽ انهن کي 13 ووٽ مليا آهن. مسلم ليگ ن ۽ ٻين جماعتن جو ڪوبه اميدوار نه هو ان لاءِ انهن جا ووٽرز آزاد هئا ته هو ڪنهن به اميدوار کي جنهني هو بهتر سمجهن انهن کي ووٽ ڏنا آهن. اسان انفرادي طور تي سڀني کان ووٽ گهريا هئا. هو خميس تي سنڌ اسيمبلي ٻاهران سينيٽ جي چونڊ نتيجن  جي اعلان کانپوءِ ميڊيا سان ڳالهائي رهيو هو. شرجيل انعام ميمڻ چيو ته سينيٽ جي چونڊن ۾ ڪامياب ٿيندڙ ۽ ناڪام ٿيندڙ پيپلز پارٽي ۽ متحده قومي موومينٽ (ايم ڪيو ايم) جي ميمبرن کي مبارڪون ڏيان ٿو. هن چيو ته مسلم ليگ فنڪشنل پاران هارس ٽريڊنگ جا الزام نه صرف رد ڪريان ٿو بلڪ انهن کان اهو پڇان ٿو ته انهن جي اميدوار کي انهن جي 10 ووٽن جي مقابلي ۾ 13 ووٽ ڪهڙي ريت مليا ويا. هن چيو ته سينيٽ جي چونڊن ۾ مسلم ليگ ن پنهنجي اميدوار کي پهريان ئي دستبردار ڪرائي ڇڏيو هو ۽ ان کان پوءِ پيپلز پارٽي، ايم ڪيو ايم ۽ مسلم ليگ فنڪشنل جائي اميدوار ميدان ۾ هئا ۽ عددي طور تي اها ڳالهه واضح هئي ته مسلم ليگ فنڪشنل جنهن وٽ 10 ووٽرز هئا جڏهن ته ان جي مقابلي ۾ پيپلز پارٽي ۽ ايم ڪيو ايم وٽ عددي طاقت پوري هئي. هن چيو ته مسلم ليگ ن سميت سنڌ اسيمبلي ۾ موجود ٻين سياسي جماعتن جو ڪوبه اميدوار ان چونڊن ۾ حصو نه وٺي رهيا هئا، جنهن کان پوءِ انهن جي ووٽرز ڪنهن به اميدوار کي ووٽ ڏيڻ لاءِ آزاد هئا. هڪ سوال جي جواب ۾ شرجيل انعام ميمڻ چيو ته ڪراچي سميت پوري سنڌ ۾ امن امان جي صورتحال کي بهتر بڻائڻ لاءِ وزيراعليٰ سنڌ پنهنجون ڀرپور ڪوششون ڪري رهيو آهي. هن چيو ته جلد ئي هن صوبي کي دهشتگردن، پابندي مڙهيل تنظيمن ۽ طالبان دهشتگردن کان پاڪ ڪري ئي ساهه کڻنداسين. هن چيو ته اسان جي پوليس ۽ رينجرز صوبي ۽ خاص ڪري ڪراچي ۾ امن امان جي قيام لاءِ مستقل ڪم ڪري رهي آهي ۽ انهن جي ڪارڪردگي جي ڪري ڪراچي ۾ سالن کان جاري بدامني ۾ وڏي حد تائين گهٽتائي ٿي آهي ۽ مختلف وڏن وڏن ڪيسن ۾ ملوث جوابدارن کي پڪڙيو پيو وڃي. هڪ ٻي سوال جي جواب ۾ هن چيو ته ايم ڪيو ايم جي حڪومت ۾ شموليت جي حوالي سان عبدالرحمان ملڪ ئي واضح طور تي ٻڌائي سگهي ٿو ڇو ته ايم ڪيو ايم بابت سموري معلومات اهو طئي ڪري رهيو آهي ۽ ان تي پيپلز پارٽي ۽ ايم ڪيو ايم ٻنهي جو مڪمل اعتماد آهي. اسان جا ايم ڪيو ايم سان رابطا پهريان به بهتر هئا ۽ هاڻ به بهتر آهن ۽ ڪنهن قسم جو ڪوبه ڊيڊ لاڪ نه آهي.

 

پاڪستان تي الزام هڻڻ کان اڳ دهشتگردي جي ڪنهن به واقعي جي جامع جاچ ڪرائڻ گهرجي: پرڏيهي ترجمان

اسلام آباد(بيورو) پاڪستان چيو آهي ته اهو دهشتگردي خلاف جنگ ۾ اثرائتا قدم کڻي رهيو آهي   ان لعنت کي ختم ڪرڻ لاءِ بين الاقوامي برادري جو سهڪار پڻ حاصل ڪري رهيو آهي. پرڏيهي آفيس جي ترجمان تسنيم اسلم خميس تي پنهنجي هفتيوار پريس بريفنگ دوران ٻڌايو ته پاڪستان دهشتگردي خلاف پنهنجي جنگ ۾ عالمي برادري سان سهڪار ڪري رهيو آهي ۽ پاڪستان تي الزام هڻڻ کان اڳ دهشتگردي جي ڪنهن به واقعي جي جامع جاچ ڪرائڻ گهرجي. تسنيم اسلم چيو ته ڪو به ملڪ دهشتگردي سان اڪيلي سر مهاڏو نه ٿو اٽڪائي سگهي ۽ عالمي برادري کي ان برائي جي پاڙ پٽڻ لاءِ ساٿ ڏيڻ کپي. هن چيو ته دهشتگردي جي حوالي سان پاڪستان کي پنهنجا خدشا آهن ته ڀارت کي وري پنهنجا خدشا تنهن ڪري ان معاملي کي سهڪار وسيلي نبيرڻ گهرجي. هڪ سوال جو جواب ڏيندي پرڏيهي ترجمان پاڪستان جي ان موقف جو ورجاءُ ڪيو ته اهو افغان قيادت ۽ افغان عوام جي خواهشن موجب جاري مفاهمتي عمل ۾ سهڪار جاري رکندو. افغانستان ۾ 2016ع کان پوءِ به امريڪي فوجين جي موجود رهڻ بابت تسنيم اسلم چيو ته ان ڳالهه جو فيصلو افغانستان کي ڪرڻو آهي ته اهي ڪيتري مدي تائين امريڪي فوج جي اتي موجودگي چاهين ٿا. پاڪستان جي امداد جي حوالي سان پاڪستان ۽ امريڪا جي مستقبل جي سهڪار بابت هڪ سوال تي پرڏيهي ترجمان چيو ته اوباما انتظاميه ڪانگريس کي ان حوالي سان بجيٽ تجويزون ڏئي ڇڏيون آهن. هن چيو ته اسان سمجهون ٿا ته امريڪي پرڏيهي کاتي ۾ پاڪستان بابت تجويز ڪيل بجيٽ جو ڪاٿو 803.8 ملين ڊالر آهي ۽ ان ۾ معيشت، سيڪيورٽي ۽ ٻين شعبن ۾ مالي مدد جون درخواستون پڻ شامل آهن. هن چيو ته پاڪستان دهشتگردي خلاف جنگ جي ڪوششن ۾ اهم ڪردار ادا ڪري رهيو آهي جنهن جو اعتراف عالمي برادري کي به ڪرڻ گهرجي. هن چيو ته اسان جو ان ڳالهه تي يقين آهي ته امريڪا سميت اسان جا دوست ملڪ ان برائي کي اثرائتي نموني منهن ڏيڻ ۾ پاڪستان لاءِ گهربل سهڪار بهتر نموني فراهم ڪن. هڪ سوال جو جواب ڏيندي پرڏيهي ترجمان چيو ته پاڪستان ۽ ڀارت وچ ۾ پرڏيهي سيڪريٽرين جي سطح تي اسلام آباد ۾ ٿيل ڳالهين کي ناڪام نه تصور ڪيو وڃي ڇاڪاڻ ته اهي ڳالهيون تعميري ۽ خوشگوار ماحول ۾ ٿيون آهن ۽ انهن ڳالهين سان ٻنهي ملڪن وچ ۾ جامع ڳالهين جي راهه هموار ٿي آهي. وزيراعظم محمد نواز شريف طرفان سعودي بادشاهه سلمان بن عبدالعزيز جي دعوت تي سعودي عرب جي دوي بابت پرڏيهي ترجمان چيو ته ان دوري جو مقصد ٻنهي ملڪن جي ِٻه طرفن ۽ ڀائپي وارن ناتن کي وڌيڪ سگهار ۽ جٽادار بڻائڻ آهي.هن چيو ته ان دوري سان سعودي عرب سان توانائي، واپار ۽ سيڪيورٽي جي شعبن ۾ ناتن کي وڌيڪ مستحڪم ڪرڻ ۾ به مدد ملندي. ايران پاران ڪوئيٽا ۾ گرفتار ڪيل ايراني شهري کي حوالي ڪرڻ بابت هڪ سوال تي تسنيم اسلم چيو ته ميڊيا ۾ آيل رپورٽن مطابق ڄاڻايل ايراني شهري عبدالستار ريگي کي 28 فيبروري تي گرفتار ڪيو ويو هو پر ميڊيا جون اهي رپورٽن غير تصديق شده آهن ۽ حڪومت طرفان اهڙن اطلاعن جي تصديق جو عمل جاري آهي.

 

سنڌ ۾ ڌانڌلي ۽ هارس ٽريڊنگ پارليامينٽ کي شرمسار ڪري ڇڏيو: اپوزيشن جو الزام

ڪراچي (اسٽآف رپورٽر) سنڌ اسيمبلي ۾ مخالف ڌر اڳواڻ شهر يار خان مهر چيو آهي ته سينيٽ چونڊن ۾ سنڌ ۾ ڌانڌلي ۽ هارس ٽريڊنگ جو اهو مثال ڪيو ويو آهي جنهن سان پوري پارليامان کي شرمساري ٿي رهي آهي، اسان جي 5 ميمبرن کي هارس ٽريڊنگ ذريعي ٽوڙيو ويو آهي ڪنهن پنهنجي ضمير جو سودو ڪيو جلد خبر پئجي ويندي، جيتوڻڪ منجهند جي ماني اسان 18 ماڻهن گڏجي کاڌي مان صرف پ پ جي ڪمند جو ريٽ پورو نه ملندڙ ميمبرن کي مليان هان ته اسان ڪامياب ٿي وڃون ها، اهڙن خيالن جو اظهار هن سينيٽ چونڊ نتيجن کانپوءِ پريس ڪانفرنس کي خطاب ڪندي ڪيو، ان موقعي تي نند ڪمار، امتياز شيخ ۽ نصرت سحر عباسي به موجود هئي، شهر يار مهر چيو ته اليڪشن ۾ اليڪشن ڪميشن جو ڪردار مشقوق هو، جنهن وقت پولنگ شروع ٿي پولنگ باڪس خالي هو پر جڏهن ڳڻپ پوري ٿي ته ان مان 2 خالي پنا نڪتا، سوال پيدا ٿو ٿئي ته هي پنا ڪنهن وڌا ۽ ڇو وڌا، اليڪشن ڪميشن جي ان پاسي توجهه ڏياري وئي پر ڪو ايڪشن نه ورتو ويو، هن چيو ته حقيقت ۾ جن ميمبرن پنهنجي ضمير جو سودو ڪيو، انهن اصل بيلٽ پيپر جي جاءِ تي خالي ڪاغذ بلٽ باڪس ۾ وجهي ڇڏيو ۽ اصل بلٽ پيپر ٻاهر ڀري ٻئي ميمبر ذريعي بلٽ باڪس ۾ وڌو ويو، هي عمل 2 ڀيرا ٿيو آهي، هن چيو ته بدترين هارس ٽريڊنگ ۽ ڌانڌلي ذريعي 5 ميمبر خريد ڪيا ويا، اسان پنهنجي جاءِ تي متحد هئاسين ۽ منجهند جي ماني گڏ کاڌي، في الحال اهو چوڻ ته انهن جو تعلق ن ليگ يا ف ليگ سان هو وقت کان اڳ آهي ۽ ڪجهه ڏينهن ۾ سمورا نالا آڏو اچي ويندا، جيڪڏهن فنڪشنل ليگ جو ڪو ميمبر هن خريد ۽ وڪري ۾ هوندو ته ان خلاف سخت ڪارروائي ڪئي ويندي، نيشنل پيپلز پارٽي اڳواٽ اسان کي ٻڌائي ڇڏيو هو ته ووٽ پ پ کي ڏيندا، انهن کان اسان کي ڪا شڪايت نه آهي، اهو چوڻ غلط آهي سنڌ ۾ مسلم ليگ فنڪشنل جي سياست تباهه ٿي رهي آهي، اسان پنهنجي پاليسين مطابق ڪم ڪري رهيا آهيون، جيڪڏهن اسان چاهيون ها ته اسان به ڏيتي ليتي ڪري پئي سگهياسين، پ پ هڪ غلط روايت وڌي آهي جنهن جو نقصان پوري پارليامان کي ٿيندو.

 

سينيٽ چونڊن ۾ هارس ٽريڊنگ ثابت ٿي ته سخت ڪارروائي ڪنداسين: چيف اليڪشن ڪمشنر

اسلام آباد (بيورو) چيف اليڪشن ڪمشنر سردار رضا خان چيو آهي ته سينيٽ چونڊن ۾ هارس ٽريڊنگ ثابت ٿي ته سخت ڪارروائي ڪئي ويندي، اسلام آباد مان جاري هڪ بيان ۾ چيف اليڪشن ڪمشنر سردار رضا خان جو چوڻ آهي ته هارس ٽريڊنگ جون ڳالهيون ته سڀ ڪري رهيا آهن جڏهن ته سينيٽ اليڪشن ۾ هارس ٽريڊنگ جا ثبوت پيش ڪيا وڃن، هن چيو ته هارس ٽريڊنگ ثابت ٿي ته سخت ڪارروائي ڪنداسين.