تازيون خبرون

Daily Archives: March 5, 2015

وزيراعظم جي سعودي فرمانروا سان ملاقات، ٻه طرفن معاملن تي ڳالهيون

اسلام آٻاد/رياض(م.ڊ) رياض پهچڻ تي وزيراعظم نواز شريف جو شاندار استقبال ڪيو ويو وزيراعظم نواز جو سعودي عرب جو هي پهريون سرڪاري دورو آحي جنهن جي دعوت سعودي فرمانروا شاهه سلمان بن عبدالعزيز ڏني هئي رياض اچڻ کانپوءِ وزيراعظم نواز شريف سعودي فرمانروا سلمان بن عبدالعزيز سان ملاقات ڪئي سڌ سماءَ واري وزير پرويز رشيد جو چوڻ هو ته شاهه سلمان بن عبدالعزيز طرفان استقبال ڪرڻ پاڪستان ۽ سعودي عرب جي ويجهن لاڳاپن جي اهميت جو مظهر آهي نواز شريف پنهنجي دوري ۾ عمري جي ادائيگي ۽ رسول اڪرم صه جي روضي تي حاضري به ڏيندو. وزيراعظم نواز شريف  ٽن ڏينهن جي سرڪاري دوري تي سعودي عرب روانو پهچي ويو آهي، سندس چوڻ آهي ته پاڪستان ۽ سعودي جا مذهبي ۽ تاريخي لاڳاپا آهن، وقت گذرڻ سان لاڳاپا وڌيڪ مضبوط ٿيندا. وزيراعظم نواز شريف سعودي بادشاهه شاهه سلمان بن عبدالعزيز جي دعوت تي سعودي عرب جي گادي واري هنڌ رياض پهتو، جتي پنجاب جو وڏو وزير شهباز شريف، ناڻي وارو وزير اسحاق ڊار ۽ ٻيو اعليٰ سطحي وفد ساڻس گڏ آهن. رياض پهچڻ تي سعودي بادشاهه سلمان بن عبدالعزيز وزيراعظم نواز شريف جي آجيان ڪئي. وزيراعظم نواز شريف دوري دوران سعودي بادشاهه سميت ٻين اعليٰ اختيارين سان ملاقاتون ڪندو. وزيراعظم هائوس جي ترجمان پاران جاري ڪيل پڌرائي موجب، وزيراعظم دوري دوران عمرو پڻ ادا ڪندو. وزيراعظم سعودي قيادت سان ملاقاتن دوران ٻه طرفن دلچسپيءَ وارن معاملن سميت خطي جي صورتحال تي ڳالهيون ڪندو. سعودي روانگي کان اڳ جاري ڪيل بيان ۾ وزيراعظم نواز شريف چيو ته پاڪستان ۽ سعودي جا مذهبي ۽ تاريخي لاڳاپا آهن، وقت گذرڻ سان لاڳاپا وڌيڪ مضبوط ٿيندا. وزيراعظم نواز شريف چيو ته سعودي بادشاهه شاهه سلمان بن عبدالعزيز پاڪستاني عوام جي دلين ۾ رهي ٿو.

 

عوام جا حق هڙپ ٿيڻ نه ڏبا، ڀلي ڇو نه 10 وزير اعظم گهر ڀيڙا ٿين: سپريم ڪورٽ

اسلام آباد (بيورو) سپريم ڪورٽ، اليڪشن ڪميشن کان رات پوڻي اَٺين وڳي تائين ڪينٽومينٽ بورڊز، اسلام آباد ۽ ٽنهي صوبن ۾ مڪاني چونڊن جو شيڊول طلب ڪري ورتو، عدالت ريمارڪس ڏنا آهن ته ڀلــَي 10 وزيراعظم گهر هليا وڃن پرواهه ناهي پر عوام جا حق هڙپ ڪرڻ نه ڏنا ويندا. جسٽس جواد ايس خواجا جي سربراهي ۾ سپريم ڪورٽ جي ٽه رڪني بينچ، ڪينٽومينٽ بورڊز ۾ مڪاني چونڊون نه ڪرائڻ بابت توهين عدالت واري ڪيس جي ٻــُڌڻي ڪئي. ٻڌڻي دوران اٽارني جنرل چيو ته چونڊون ڪرائڻ حڪومت جي نه پر اليڪشن ڪميشن جي ذميواري آهي، عدالت حڪومت کي 48 ڪلاڪن جو وقت ڏئي، ڪينٽومينٽ بورڊز ۾ بلدياتي اليڪشن جو آرڊيننس تيار ٿي چــُڪو آهي. جسٽس جواد ايس خواجا پڇاڻو ڪيو ته ڇا اٽارني جنرل عدالت سان سهڪار ڪري رهيو آهي؟ هن ڪيس جون 23 ٻڌڻيون ٿي چڪيون آهن،وڌيڪ وقت جي درخواست ڪندڙن کي هــُو چوي ٿو ته 23 ڀيرا وقت ملي ويو آهي ته 24 هون ڀيرو به وقت ملي ويندو. جسٽس جواد ايس خواجا چيو ته عدالت جڏهن آئيني ذميواريون پوريون ڪندي آهي ته اهو چيو ويندو آهي ته اختيار اورانگهيا پيا وڃن پر هاڻي آئين سان مذاق جو سلسلو بند ڪرڻ جو وقت اچي ويو آهي. جسٽس جواد ايس خواجا چيو ته عوام جا حق هڙپ ٿي رهيا آهن، ان صورتحال ۾ هڪ وزيراعظم گهر هليو وڃي يا 10، کين پرواهه ناهي. سپريم ڪورٽ اليڪشن ڪميشن کي اڄ رات پوڻي اٺين وڳي تائين ڪينٽومينٽ بورڊز، اسلام آباد ۽ ٽنهي صوبن ۾ مڪاني چونڊن جو شيڊول طلب ڪري ورتو. عدالت چيو آهي ته جيڪڏهن ته شيڊول نه مليو ته رات اٺين وڳي ٻيهر ٻڌڻي شروع ڪئي ويندي.

 

سينيٽ چونڊون: پ پ حڪومتي پچ تي نه پئي کيڏي: خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته پيپلز پارٽي سينيٽ چونڊن جي حوالي سان حڪومتي پچ تي نه کيڏي رهي آهي. اسلام آباد ۾ ميڊيا سان غيررسمي ڳالهه ٻولهه ڪندي سيد خورشيد شاهه چيو ته عمران خان کي پارليامينٽ ۾ اچڻ گهرجي. هن چيو ته حڪومت چاهي ٿي ته پارليامينٽ جي عزت کي اورانگهيو وڃي. هن چيو ته ٻاويهين ترميم آڻي ثابت ڪيو پيو وڃي ته چونڊيل ميمبر ڪرپٽ ۽ چور آهن. سيد خورشيد شاهه چيو ته مولانا فضل الرحمان ۽ عمران خان جي وچ ۾ سٺا لاڳاپا آهن. هن چيو ته گڏيل مخالف ڌر وٽ ستونجاهه ميمبر آهن. اسان سينيٽ جو چيئرمين پنهنجو آڻڻ لاءِ ڪوششون ڪيون پيا.

قبضا ڪراچي لاءِ ناسور بڻجي چڪا آهن، اڪائونٽ نه کولرائيندڙ ملازمن کي پگهار نه ملندي: شرجيل ميمڻ

ڪراچي(اسٽآف رپورٽر) اطلاعات ۽ بلديات واري صوبائي وزير شرجيل انعام ميمڻ چيو آهي ته قبضا ڪراچي شهر لاءِ ناسور بڻجي چڪا آهن. انهن جو مڪمل خاتمو ڪيو ويندو. بلدياتي ادارن جا جيڪي ملازم اهو چون ٿا ته هو پگهارن لاءِ بئنڪ اڪائونٽس نه کولرائيندا ته کين ٻڌائڻ چاهيان ٿو ته انهن کي پگهار به ملندي. اسيمبلي ميمبر به صفائي مهم ۾ آفيسرن کي هدايتون ڏئي سگهن ٿا. هو اربع تي متحده قومي موومينٽ جي عورت ميمبر ارم عظيم فاروق ۽ اپوزيشن ليڊر شهر يار خان مهر جي ڌيان ڏياريو نوٽيس تي بيان ڏئي رهيو هو. شرجيل انعام ميمڻ چيو ته صرف سول اسپتال ۾ ئي نه بلڪ پوري شهر ۾ قبضا موجود آهن. ماڻهن ڪنڪريٽ سان اڏاوت ڪري قبضا قائم ڪري ورتا آهن. ڪجهه ماڻهن فٽ پاٿن، رستن، آئي لينڊز ۽ گرين بيلٽس کي پيءُ جي جاگير سمجهي رکيو آهي. رڪشائن چنگچي، پٿارن ۽ ريڙهن جي ڪري رستا بلاڪ ٿي وڃن ٿا. اسان ڪراچي جي علائقي صدر ۾ قبضن خلاف مهم شروع ڪئي آهي. قانون لاڳو ڪندڙ ادارن تي ماڻهن فائرنگ به ڪئي آهي، پر اسان روزانو جي بنياد تي قبضا هٽائي رهيا آهيون. ڪلفٽن جي علائقي ۾ گرين بيلٽس  تي ريسٽورنٽس ختم ڪيا ويا آهن. هن چيو ته اسان قبضا هٽائڻ لاءِ ان ڳالهه کي به نظر رکي رهيا آهيون ته غريب ماڻهن جو ڪاروبار متاثر نه ٿئي ۽ کين متبادل جاءِ فراهم ڪئي وڃي، پر نالن تي به ماڻهن چار چار منزلا عمارتون ٺاهي ورتيون آهن. هن چيو ته قبضا هٽائڻ لاءِ عوام اسان جو ساٿ ڏي. ايئن نٿو ٿي سگهي ته جنهن جو جڏهن ۽ جتي دل چاهي اهو پٿارا لڳائي ڇڏي. هن چيو ته اسان بل بورڊز ۽ وال چاڪنگ به ختم ڪنداسين. شرجيل انعام ميمڻ چيو ته اسان جي مهم ڪامياب وڃي پئي ۽ اسان جيڪو ڪم ڪيو آهي اهو نظر اچي رهيو آهي اسان مين شاهراهن کي صاف ڪري ڇڏيو آهي. گهٽين جي صفائي لاءِ آفيسرن هڪ هفتو گهريو آهي. اسان بلديه عظميٰ ڪراچي جون گاڏيون ڊسٽرڪٽ ميونسپل ڪارپوريشنز کي ڏئي ڇڏيون آهن ڇو ته صفائي انهن جي ذميواري آهي. هن چيو ته اسان ڪراچي ۽ حيدرآباد سميت هر هنڌ قبضا هٽائڻ جو ڪم شروع ڪري ڇڏيو آهي. اسان انهن بل بورڊز کي به هٽائينداسين جيڪي قبضن جي زمري ۾ اچن ٿا. اسان جلد سمورا بل بورڊز هٽائينداسين. جن رستن تي وڌيل بل بورڊز نظر اچن ٿا اهي ڪنٽونمينٽ بورڊز جي حد ۾ اچن ٿا. هن چيو ته اسان جي نيت صاف آهي ۽ اسان جو ڪم نظر ايندو.

 

وفاقي ۽ صوبائي حڪومتون بلدياتي نظام کان ڊنل آهن: الطاف حسين

ڪراچي(اسٽآف رپورٽر) اطلاعات ۽ بلديات واري صوبائي وزير شرجيل انعام ميمڻ چيو آهي ته قبضا ڪراچي شهر لاءِ ناسور بڻجي چڪا آهن. انهن جو مڪمل خاتمو ڪيو ويندو. بلدياتي ادارن جا جيڪي ملازم اهو چون ٿا ته هو پگهارن لاءِ بئنڪ اڪائونٽس نه کولرائيندا ته کين ٻڌائڻ چاهيان ٿو ته انهن کي پگهار به ملندي. اسيمبلي ميمبر به صفائي مهم ۾ آفيسرن کي هدايتون ڏئي سگهن ٿا. هو اربع تي متحده قومي موومينٽ جي عورت ميمبر ارم عظيم فاروق ۽ اپوزيشن ليڊر شهر يار خان مهر جي ڌيان ڏياريو نوٽيس تي بيان ڏئي رهيو هو. شرجيل انعام ميمڻ چيو ته صرف سول اسپتال ۾ ئي نه بلڪ پوري شهر ۾ قبضا موجود آهن. ماڻهن ڪنڪريٽ سان اڏاوت ڪري قبضا قائم ڪري ورتا آهن. ڪجهه ماڻهن فٽ پاٿن، رستن، آئي لينڊز ۽ گرين بيلٽس کي پيءُ جي جاگير سمجهي رکيو آهي. رڪشائن چنگچي، پٿارن ۽ ريڙهن جي ڪري رستا بلاڪ ٿي وڃن ٿا. اسان ڪراچي جي علائقي صدر ۾ قبضن خلاف مهم شروع ڪئي آهي. قانون لاڳو ڪندڙ ادارن تي ماڻهن فائرنگ به ڪئي آهي، پر اسان روزانو جي بنياد تي قبضا هٽائي رهيا آهيون. ڪلفٽن جي علائقي ۾ گرين بيلٽس  تي ريسٽورنٽس ختم ڪيا ويا آهن. هن چيو ته اسان قبضا هٽائڻ لاءِ ان ڳالهه کي به نظر رکي رهيا آهيون ته غريب ماڻهن جو ڪاروبار متاثر نه ٿئي ۽ کين متبادل جاءِ فراهم ڪئي وڃي، پر نالن تي به ماڻهن چار چار منزلا عمارتون ٺاهي ورتيون آهن. هن چيو ته قبضا هٽائڻ لاءِ عوام اسان جو ساٿ ڏي. ايئن نٿو ٿي سگهي ته جنهن جو جڏهن ۽ جتي دل چاهي اهو پٿارا لڳائي ڇڏي. هن چيو ته اسان بل بورڊز ۽ وال چاڪنگ به ختم ڪنداسين. شرجيل انعام ميمڻ چيو ته اسان جي مهم ڪامياب وڃي پئي ۽ اسان جيڪو ڪم ڪيو آهي اهو نظر اچي رهيو آهي اسان مين شاهراهن کي صاف ڪري ڇڏيو آهي. گهٽين جي صفائي لاءِ آفيسرن هڪ هفتو گهريو آهي. اسان بلديه عظميٰ ڪراچي جون گاڏيون ڊسٽرڪٽ ميونسپل ڪارپوريشنز کي ڏئي ڇڏيون آهن ڇو ته صفائي انهن جي ذميواري آهي. هن چيو ته اسان ڪراچي ۽ حيدرآباد سميت هر هنڌ قبضا هٽائڻ جو ڪم شروع ڪري ڇڏيو آهي. اسان انهن بل بورڊز کي به هٽائينداسين جيڪي قبضن جي زمري ۾ اچن ٿا. اسان جلد سمورا بل بورڊز هٽائينداسين. جن رستن تي وڌيل بل بورڊز نظر اچن ٿا اهي ڪنٽونمينٽ بورڊز جي حد ۾ اچن ٿا. هن چيو ته اسان جي نيت صاف آهي ۽ اسان جو ڪم نظر ايندو.

 

تحريڪ انصاف جي ايم پي ايز ووٽ وڪرو ڪيا ته اسيمبلي ٽوڙي ڇڏيندس: عمران خان

اسلام آباد (بيورو) پي ٽي آءِ سربراهه عمران خان سينيٽ جي سيٽ لاءِ 15 ڪروڙ رپين جي آڇ ڪندڙ ماڻهوءَ جو نالو ٻڌائڻ کان هڪ ڀيرو ٻيهر انڪار ڪندي چيو آهي ته تحريڪ انصاف جي ايم پي ايز ووٽ وڪرو ڪيا ته اسيمبلي ٽوڙي ڇڏيندس، پيپلزپارٽي، جي يو آءِ، نوازليگ، اي اين پي ۽ شيرپائو کي ووٽ نه ڏينداسين. اسلام آباد ۾ پريس ڪانفرنس ڪندي عمران خان چيو ته سينيٽ چونڊ لاءِ تياري مڪمل آهي، ميرٽ تي اميدوارن جي چونڊ ڪئي وئي آهي. عمران خان چيو ته هيءَ ڪهڙي جمهوريت آهي، جنهن ۾ ضمير وڪرو ٿين ٿا، اليڪشن ڪميشن هن صورتحال جو نوٽيس ڇو نه ٿي وٺي. پي ٽي آءِ سربراهه چيو ته سينيٽ چونڊن ۾ پارٽين جا ليڊر پيسا ٺاهين ٿا، پيپلزپارٽي، جي يو آءِ، شيرپائو ۽ نواز ليگ کي ووٽ نه ڏينداسين، رڳو اتحادين کي ڏينداسين. عمران خان چيو ته تحريڪ انصاف جي ايم پي ايز ووٽ وڪرو ڪيا ته اسيمبلي ٽوڙي ڇڏيندس، جاويد نسيم خلاف ڪارروائي شروع ڪري ڇڏي آهي. عمران خان چيو ته سندس ضمير کي ڪير به خريد نه ٿو ڪري سگهي، جمعي تي پارٽي جي ڪورڪميٽي جي اجلاس ۾ اهم فيصلا ڪيا ويندا. پي ٽي آءِ سربراهه چيو ته ايندڙ سال نين چونڊن جو آهي، اقتدار ۾ اچي سينيٽ چونڊ سڌي ووٽ ذريعي ڪرائي ويندي.

 

سينيٽ چونڊن لاءِ ڇپائي مڪمل، بيلٽ پيپرز صوبن ڏانهن موڪليا ويا

اسلام آباد (بيورو) اليڪشن ڪميشن سينيٽ چونڊن لاءِ ڇپائي مڪمل ڪري بيلٽ پيپرز صوبن ڏانهن موڪلي ڇڏيا، وفاق ۽ فاٽا لاءِ هڪ هزار بيلٽ پيپرز ڌار ڇپرايا ويا  آهن، اليڪشن ڪميشن چيو آهي ته چونڊن جي نگراني ريٽرننگ آفيسر ڪندا، ميمبرز کي ووٽ ڪاسٽ ڪرڻ لاءِ بيچ لازمي آڻڻو پوندو. سڀاڻي ٿيندڙ سينيٽ چونڊن لاءِ اليڪشن ڪميشن بيلٽ پيپرز جي ڇپائي مڪمل ڪري ورتي آهي، چئني صوبن لاءِ 4 هزار کان وڌيڪ بيلٽ ڇاپي صوبائي اسيمبلين جي سيڪريٽريٽ ڏانهن موڪليا ويا آهن. اليڪشن ڪميشن موجب، وفاق ۽ فاٽا لاءِ هڪ هزار ڌار بيلٽ پيپر ڌار ڇاپيا ويا آهن، جڏهن ته عورتن جي مخصوص سيٽ لاءِ ڇاپيل بيلٽ پيپرز جو رنگ گلابي آهي. اليڪشن ڪميشن موجب، چونڊن دوران اسيمبلين کي پولنگ هال جو درجو ڏنو ويندو ۽ چونڊن جي نگراني ريٽرننگ آفيسر ڪندا. اليڪشن ڪميشن، چونڊن دوران ووٽر جي موبائيل فون سميت ڪا به  اليڪٽرانڪ ڊوائيس کڻي اچڻ تي پابندي  لاڳو ڪري ڇڏي آهي. اليڪشن ڪميشن جي ترجمان چيو آهي ته چونڊن دوران ووٽرن لاءِ بيچ لازمي قرار ڏنو ويو آهي، بيچ نه کڻي ايندڙ ميمبرز کي ووٽ ڪاسٽ ڪرڻ جي اجازت نه هوندي.

 

ڪرڪيٽ ورلڊڪپ ۾ پاڪستان گڏيل عرب امارتن کي شڪست ڏئي ڇڏي

نيپيئر (اسپورٽس نيوز) آءِ سي سي ڪرڪيٽ ورلڊڪپ جي 25 هين گروپ مئچ ۾ پاڪستان گڏيل عرب امارتن کي 129 رنسن تان شڪست ڏئي ڇڏي، احمد شهزاد کي مين آف دي مئچ قرار ڏنو ويو. نيوزيلينڊ جَي شهر نيپيئر ۾ کيڏيل مئچ ۾ پاڪستان پهرين بيٽنگ ڪندي مقرر 50 اوورن ۾ 6 وڪيٽن جي نقصان تي 340 رنسون ٺاهيون. پاڪستان طرفان احمد شهزاد ۽ ناصر جمشيد اننگ جي شروعات ڪئي پر ناصر جمشيد هڪ ڀيرو ٻيهر ناڪام رهيو ۽ 12 بالن تي 4 رنسون ٺاهي آئوٽ ٿي ويو. انکانپوءِ حارث سهيل احمد شهزاد سان گڏجي ٽيم جو اسڪور 170 رنسن تائين پهچايو. اوپنر احمد شهزاد 8 چوڪن ۽ هڪ ڇڪي جي مدد سان 93 رنسن جي شاندار اننگ کيڏي، جڏهن ته حارث سهيل 70 ۽ صهيب مقصود 45 رنسون ٺاهيون. ڪپتان مصباح الحق به ميگا ايونٽ ۾ ٽئين ففٽي ٺاهي ورتي،هن ٻن ڇڪن ۽ 4 چوڪن جي مدد سان 68 بالن تي 65 رنسون ٺاهيون. 2 شاندار ڇڪا هڻي 21 رنسون ٺاهيندڙ بوم بوم آفريدي ون ڊي ڪرڪيٽ ۾ 8 هزار رنسون پڻ مڪمل ڪري ورتيون. يو اي اي جَي فاسٽ بالر منجولا گروج پاڪستان جون 4 وڪيٽون ڪيرايون،جڏهن ته محمد نويد به هڪ وڪيٽ ورتي. 340 رنسن جي جواب ۾ گڏيل عرب امارتن جي ٽيم 8 وڪيٽن جي نقصان تي رڳو 210 رنسون ٺاهي سگهي. يــُو اَي اِي طرفان شائمان انور 62 رنسون ٺاهي نمايان اسڪورر رهيو جڏهن ته امجد جاويد 40، خــُرم خان 43 ۽ ايس پي پٽيل 34 رنسون ٺاهيون. پاڪستان طرفان شاهد آفريدي، سهيل خان ۽ وهاب رياض 2 – 2 وڪيٽون حاصل ڪيون جڏهن ته راحت علي ۽ صهيب مقصود هڪ هڪ رانديگر آئوٽ ڪيو. پاڪستاني اوپنر احمد شهزاد کي 93 رنسون ڪرڻ تي مين آف دي مئچ قرار ڏنو ويو.

 

شهر ۾ پابندي مڙهيل تنظيمن خلاف ڪا به ڪارروائي نه ٿي ڪئي وڃي: ايم ڪيو ايم

ڪراچي (اسٽاف رپورٽر) ايم ڪيو ايم رابطا ڪميٽي ڪارڪنن جي گرفتارين جو سلسلو بند ڪرڻ جي گهر ڪندي چيو آهي ته شهر ۾ پابندي مڙهيل تنظيمن خلاف ڪا به ڪارروائي نه ٿي ڪئي وڃي پر سندن ڪارڪنن جي گرفتارين جو سلسلو جاري آهي. ايم ڪيو ايم جي مرڪز نائين زيرو تي پريس ڪانفرنس ڪندي حيدر عباس رضوي، قمر منصور ۽ ٻين چيو ته سندن ڪارڪن نجم الحسن کي قتل ڪيو ويو  آهي. متحده اڳواڻن چيو ته اورنگي ٽائون، ڪٽي پهاڙي ۽ منگهوپير جهڙا علائقا پابندي مڙهيل تنظيمن جو ڳڙهه بڻيل آهن پر اتي ڪارروائي نه پئي ڪئي وڃي. هنن چيو ته سندن ڪارڪنن جي گهرن تي ڇاپن ۽ ڪارڪنن جي گرفتارين جو سلسلو جاري آهي. اڳواڻن صدر، وزيراعظم، آرمي چيف، سنڌ جي گورنر ۽ وڏي وزير کان ايم ڪيو ايم ڪارڪنن جي گرفتارين واري معاملي جو نوٽيس وٺڻ جي گهر ڪئي.

 

ڪورنگي ۾ هٿياربندن وڪيل علي حسنين بخاري ايڊووڪيٽ کي قتل ڪري ڇڏيو، عدالتي ڪاررواين جو بائيڪاٽ

ڪراچي (اسٽاف رپورٽر) ڪراچي جي علائقي ڪورنگي ۾ اڻڄاتل هٿياربندن مقامي وڪيل علي حسنين بخاري ايڊووڪيٽ کي فائرنگ ڪري قتل ڪري ڇڏيو اطلاعن مطابق ڪراچي جي علائقي ڪورنگي ۾ علي حسنين بخاري عدالت وڃڻ لاءِ گهر کان ٻاهر ئي نڪتو هو ته موٽر سائيڪل سوار اڻڄاتل هيٿاربندن مٿس فائرنگ ڪري فرار ٿي ويا فائرنگ ۾ علي حسنين بخاري سخت زخمي ٿيو جنهن کي اسپتال نيو ويو جڏهن ته هو رستي ۾ ئي فوت ٿي ويو علي حسنين بخاري متحده قومي وومينٽ  جي ليگل ايڊ ڪميٽي جو ميمبر ۽ ايم ڪيو ايم جي غائب ڪارڪنن جي ڪيسن جي پيروي ڪري رهيو هو علي حسنين بخاري جي قتل کان پوءِ ڪراچي ۾ وڪيلن جو عدالتي ڪارروائين جو بائيڪاٽ ڪيو ويو جڏهن ته عام نوعيت جا ڪيس جج صاحبان جي چيمبر ۾ ٻڌا ويا ايم ڪيو ايم ترجمان مطابق علي حسنين خباري ايم ڪيو ايم جو ڪارڪن ۽ متحده ليگل ايڊ ڪميٽي جو ميمبر هو شيعا ڪميونٽي سان تعلق رکندڙ علي حسنين بخاري ايم ڪيو ايم ڪارڪنن جا ڪيس به وڙهي رهيو هو.