تازيون خبرون

Daily Archives: March 3, 2015

سينيٽ چونڊن ۾ هارس ٽريڊنگ کي روڪڻ سٺي ڳالهه آهي: شهريار مهر

ڪراچي (اسٽاف رپورٽر) سنڌ اسيمبلي ۾ مخالف ڌر جي اڳواڻ شهر يار مهر چيو آهي ته سينيٽ چونڊن ۾ هارس اسٽينڊنگ کي روڪڻ سٺي ڳالهه آهي ۽ سينيٽ چونڊن لاءِ نوازليگ ميمبرن سان ڳالهيون جاري آهن. سنڌ اسيمبلي جي اجلاس بعد ميڊيا سان ڳالهائيندي شهر يار مهر چيو ته سڌ سماءَ واري کاتي جا  ڪيس نيب ۾ موڪلڻ يا نه موڪلڻ بابت سنڌ سرڪار پاران جواب نه پيو ملي. هن چيو ته سينيٽ چونڊن لاءِ نوازليگ ميمبرن سان ڳالهيون هلندڙ آهن ۽ نوازليگ جي ڪجهه ميمبرن کي پارٽي قيادت سان خدشا آهن. شهر يار مهر چيو ته پيپلزپارٽي جو چيئرمين ۽ شريڪ چيئرمين سنڌ اسيمبلي جي اسپيڪر ۽ ڊپٽي اسپيڪر کي قانون موجب ڪارروائي هلائڻ لاءِ پابند بڻائن.

 

پابندي مڙهيل تنظيم جا دهشتگرد ايم ڪيو ايم جي ڪارڪنن کي نشانو بڻائي رهيا آهن: حيدر عباس رضوي

ڪراچي (اسٽاف رپورٽر) ايم ڪيو ايم جي رابطا ڪميٽي جي اڳواڻن جو چوڻ آهي ته پابندي مڙهيل تنظيمون سندن ڪارڪنن ۽ هڪ مخصوص فرقي جي ماڻهن کي نشانو بڻائي رهيون آهن وزيراعظم، وڏي وزير، گورنر ۽ ٻي قيادت اهڙا واقعا روڪڻ لاءِ ڪردار ادا ڪن. ايم ڪيو ايم اڳواڻ حيدر عباس رضوي ٻين اڳواڻن سان گڏ نائين زيرو تي پريس ڪانفرنس ڪندي چيو ته  ڪارڪنن کي نشانو بڻائڻ معمول بڻجي ويو آهي ۽ ٽن ڏينهن ۾ ايم ڪيو ايم جي چئن ڪارڪنن ۽ همدردن کي ٽارگيٽ ڪلنگ جو نشانو بڻايو ويو آهي. هن چيو ته پابندي مڙهيل تنظيم جا دهشتگرد ايم ڪيو ايم ۽ هڪ مخصوص مذهبي فرقي جي ماڻهن کي نشانو بڻائي رهيا آهن. حيدرعباس رضوي چيو ته دهشتگردن جا هٿ روڪڻ وارو ڪوبه نه آهي پر ايم ڪيو ايم جي عهديدارن جي گهرن تي ڇاپن جو سلسلو جاري آهي. حيدرعباس رضوي شهرين کي پنهنجي خرچ محلا ڪميٽيون ٺاهڻ ۽ ڳجهيون ڪئمرائون لڳائڻ جي صلاح ڏيندي چيو ته ڪراچي ۾ وڪيلن، ڊاڪٽرن ۽ ٻين پروفيشنلز کي نشانو بڻايو پيو وڃي. هن وزيراعظم، وڏي وزير، گورنر ۽ ٻي قيادت کان مطالبو ڪيو ته ايم ڪيو ايم جي ڪارڪنن ۽ همدردن جي ٽارگيٽ ڪلنگ جو سلسلو بند ڪرايو وڃي.

 

مهمد ايجنسي ۽ لاهور ۾ گهرن جون ڇتيون ڪرڻ سبب ٻارڙن سميت 5 ڄڻا دٻجي فوت

مهمند ايجنسي (مانيٽرنگ ڊيسڪ) مهمند ايجنسي جي علائقي سندو خيل ۾ گهر جي ڇت ڪرڻ جي نتيجي ۾ ٻارڙن سميت 3 ڄڻا دٻجي فوت ٿي ويا، جڏهن ته لاهور ۾ برسات دوران  گهر جي ڇت ڪرڻ سبب 2 ڄڻا فوت ٿي ويا ۽ هڪ ڄڻو سخت زخمي ٿي پيو. مهمند ايجنسي ۾ تعلقي صافي جي علائقي سندو خيل ۾ گهر جي ڇت ڪرڻ سبب هڪ عورت ۽ 2 ٻارڙا دٻجي فوت ٿي ويا. ڇت ڪرڻ سبب 2 ٻارڙا سخت زخمي پڻ ٿي پيا، جن کي اسپتال منتقل ڪيو ويو آهي. لاهور جي شاهدره واري علائقي ۾ برسات سبب گهر جي ڇت ڪري پئي، جنهن جي نتيجي ۾ 2 ماڻهو ملبي هيٺيان اچي دٻجي فوت ٿي ويا. حادثي سبب هڪ ڄڻو زخمي ٿي پيو، پوليس ۽ ريسڪيو ادارن واقعي واري هنڌ  پهچي  ملبي دٻجي فوت ٿي ويل ۽ زخمي کي ٻاهر ڪڍي اسپتال منقتل ڪيو. لاش پوسٽ مارٽم ڪرائڻ کان وارثن حوالي ڪيا ويا، جڏهن ته زخمي جي حالت ڳڻتي جوڳي ٻڌائي پئي وڃي ، جنهن کي طبي امداد ڏني وئي .

 

بلوچستان ۾ سينيٽ اليڪشن کي ڪمرشلائيز ڪري بدنام ڪيو پيو وڃي: سردار اختر مينگل

ڪوئيٽا (بيورو) بلوچستان اسيمبلي ۾ اپوزيشن جماعتن سينيٽ چونڊن دوران هارس ٽريدنگ کي روڪڻ لاءِ مختلف پارٽين سان رابطن تي اتفاق ڪري ورتو، سردار اختر مينگل چيو آهي ته بلوچستان ۾ سينيٽ اليڪشن کي ڪمرشلائيز ڪري بدنام ڪيو پيو وڃي، اهڙي داغ کي صاف ڪرڻ سڀني جي ذميواري آهي. ڪوئيٽا ۾ جي يو آءِ اڳواڻ مولانا عبدالغفور حيدري سان گڏيل پريس ڪانفرنس ڪندي سردار اختر مينگل چيو ته سينيٽ چونڊن دوران هارس ٽريدنگ کي روڪڻ سڀني پارٽين جي ذميواري آهي. هن چيو ته بلوچستان  اسيمبلي ۾ اپوزيشن پارٽيون هارس ٽريڊنگ روڪڻ لاءِ هڪ پليٽ فارم تي آهن. سردار اختر مينگل چيو ته بلوچستان ۾ سينيٽ اليڪشن کي ڪمرشلائيز ڪري بدنام ڪيو پيو وڃي، اهڙي داغ کي ختم ڪرڻ سڀني جي ذميواري آهي. ان موقعي تي ڳالهائيندي عبدالغفور حيدري چيو ته هارس ٽريڊنگ روڪڻ لاءِ سڀني پارٽين سان رابطا جاري آهن. غفور حيدري چيو ته گوادر بلوچستان جو معاشي حب آهي، ان تي سڀ کان پهريان حق بلوچستان جو ئي هئڻ گهرجي.

 

شروتي هاسن فلم ”مين گبر“ ۾ پنهنجي ڳايل گاني تي پرفارم ڪندي

ممبئي(شوبز نيوز)ڀارتي فلم انڊسٽري جي سينيئر اداڪار ڪمل هاسن جي ڌيءَ اداڪاره شروتي هاسن نئين فلم ”مين گبر“ ۾ ڳائڻي طور به پنهنجين صلاحيتن کي نکارڻ لاءِ تيار آهي ۽ هوءَ فلم ۾ پنهنجي هيرو اڪشي ڪمار سان گڏ پنهنجي ئي ڳايل گاني تي پرفارم ڪندي هلندڙ سال جا اڃان صرف ٻه مهينا ئي گذريا آهن ته شروتي هاسن جون فلمي مصروفيتون وڌي ويون آهن شروتي وٽ پهريان ئي هندي ۽ سائوٿ جون 6 فلمون آهن ۽ ان سان گڏوگڏ ڳائڻ جي ميدان ۾ به بهترين انداز ۾ پير ڄمايا آهن جڏهن ته ان کان اڳ به هوءَ ٻن فلمن لاءِ ٻه گانا ڳائي چڪو آهي جن مان هڪ جوگنيا فلم تيور ۾ ۽ سناٽا فلم شميتاڀ ۾ ڳائي چڪي آهي هاڻ هوءَ هلندڙ سال پنهنجي ٽئين گاني جي تياري ۾ آهي جنهن کي رليز ڪيو ويندو ۽ هن ڀيري هوءَ پنهنجي نئين فلم مين گبر ۾ اڪشي ڪمار سان پنهنجو گانو جاري ڪري رهي آهي.

 

سونم ڪپور ۾ سوائن فلو جي تصديق کان پوءِ دبنگ خان به خوف جو شڪار

ممبئي(شوبز نيوز)ڀارتي ميڊيا جي مطابق اداڪار سلمان خان ڀارتي رياست گجرات جي شهر راج ڪوٽ ۾ فلم” پريم رتن ڌن پايو” جي شوٽنگ ۾ مصروف هئا ته ان دوران فلم جي هيروئن سونم ڪپور جي طبيعت خراب ٿيڻ جي ڪري اسپتال آندو ويو جتي ان جون ڪجهه ٽيسٽون ٿيون جنهن ۾ ان کي سوائن فلو جي تصديق ٿي، جنهن کان پوءِ سونم ڪپور کي اسپتال داخل ڪيو ويو، جڏهن ته فلم جي شوٽنگ به روڪي وئي. رپورٽ جي مطابق سونم ڪپور جي ٽرينر به سوائن فلو  سبب اسپتال ۾ داخل آهي، جنهن جي ڪري سلمان خان پنهنجي صحت جي حوالي سان تمام پريشان ڏسڻ ۾ آيو ۽ ان اسپتال وڃي ان حوالي سان ڪجهه ٽيسٽون ڪرايون.

 

بالي ووڊ ۾ ڪم ڪرڻ جي مخالف رهندڙ پاڪستاني اسٽار شان بابت حيران ڪندڙ خبر سامهون اچي وئي

ڪراچي(شوبز نيوز)بالي ووڊ ۾ ڪم ڪرڻ جي مخالف رهندڙ پاڪستاني اسٽار شان بابت حيران ڪندڙ پر خوشگوار خبر سامهون آئي آهي، اطلاع آهن ته لنڊن ۾ آباد ٿي ويندڙ هڪ ڀارتي فلمساز شان سان حيدرآباد ۾ شوٽ ٿيندڙپنهنجي فلمن مان هڪ ۾ ڪم ڪرڻ لاءِ رابطو ڪيو آهي ظاهري طور هي هدايتڪار شان سان گڏ انوشڪار شرما کي سائن ڪرڻ جو خواهشمند آهي ۽ ان حوالي سان ان جي انوشڪا سان ڳالهه ٻولهه به جاري آهي

 

معين خان جي طبيعت ناساز ٿي پئي چيئرمين پي سي بي سان ملاقات ملتوي (اڄ وضاحت پيش ڪندو

لاهور (اسپورٽس نيوز) جوئا جي اڏي تي وڃڻ کان پوءِ وطن واپس گهرايا قومي ڪرڪيٽ ٽيم جي چيف سليڪٽر معين خان جي طبيعت ناساز ٿيڻ سبب چيئرمين پي سي بي سان ملاقات ملتوي ٿي ويئي اڱاري تي ملاقات۾ معين خان جوئا جي اڏي تي وڃڻ تي چيئرمين پي سي بي کي پنهنجي وضاحت ۾ پيش ڪندو چيئرمين پي سي بي شيريارخان قومي ٽيم جي چيف سليڪٽر معين خان کي جوئا جي اڏي تي وڃڻ تي وضاحت لاءِ سومر جي ڏينهن گهرايو هو پر معين خان جي اوچتو طبيعت خراب ٿي پئي جنهن کان پوءِ پي سي بي عملدارن جو چوڻ آهي ته چيئرمين پي سي بي ۽ چيئرمين سليڪٽر جي اڄ ٿيندڙ ملاقات هاڻي اڱاري تي ٿيندي. ورلڊ ڪپ ۾ ڀارت ۽ ويسٽ انڊيز جي خلاف اهم مئچن کان اڳ معين خان پنهنجي گهرواري ۽ دوستن سان گڏ جوئا جي اڏي تي ويو هو جتي هڪ پاڪستاني جوڙي ان جون تصويرون ڪڍڻ کان پوءِ سوشل ميڊيا تي جاري ڪري ڇڏيون هيون جنهن کان پوءِ چيئرمين شيريارخان ٽيم مئنيجر نويد اڪرم چيما کي جاچ ڪرڻ جو حڪم ڏنو هو.

 

ايران جي ٽيم ويسٽ ايشيا بيس بال ڪپ ۾ شرڪت کان پوءِ وطن رواني ٿي وئي

اسلام آباد (اسپورٽس نيوز) ايران جي ٽيم 12 ويسٽ ايشيا بيس بال ڪپ ۾ شرڪت کان پوءِ گذريل ڏينهن صبح جو ايران لاءِ رواني ٿي وئي، بينظيرانٽر نيشنل ايئرپورٽ تي ايراني ٽ:م جي 23 رڪني جٿي کي پاڪستان بيس بال جي نمائندي رائو آصف ۽ اسلام آباد بيس بال ايسوسيئيشن جي صدر الوداع ڪيو، روانگي کان اڳ ميڊيا سان ڳالهائيندي ايراني رانديگرن جو چوڻ هو ته پاڪستان اچڻ سٺو لڳو ۽ هتي جا ماڻهو محبت ڪندڙ آهن

 

ڪرڪيٽ ورلڊ ڪپ ۾ سخت مقابلن جو سلسلوجاري، اڄ ڏکڻ آفريقا ۽ آئرلينڊ آمهون سامهون ٿيندا

ڪينبرا (اسپورٽس نيوز) يارهين آءِ سي سي ورلڊ ڪپ ۾ (اڄ) اڱاري تي پول بي جون ٽيمون ڏکڻ آفريقا ۽ آئرلينڊ منوڪا اوول ڪينبرا ۾ آمهون سامهون ٿينديون، تفصيل موجب ورلڊ ڪپ جي دلچسپ مقابلن جو سلسلو آسٽريليا ۽ نيوزيلينڊ ۾ جاري آهي، ميگا ايونٽ ۾ گذريل ڏينهن ڪا ميچ نه کيڏي وئي، جڏهن ته (اڄ) اڱاري تي واحد ميچ ۾ پول بي جون ٽيمون ڏکڻ آفريقا ۽ آئرلينڊ آمهون سامهون ٿينديون، پول بي ۾ ڏکڻ آفريقا ۽ آئرلينڊ جون 4، 4 پوائنٽس آهن پر بهتر رن ريٽ سبب ڏکڻ آفريقا ٻئين ۽ آئرلينڊ ٽئين نمبر تي آهي.