تازيون خبرون

Daily Archives: March 2, 2015

هارس ٽريڊنگ جو رستو روڪڻ لاءِ 22 هين ترميم آڻي رهيا آهيون: نواز شريف

لاهور: وزيراعظم نواز شريف چيو آهي ته هارس ٽريڊنگ جو رستو روڪڻ لاءِ 22 هين ترميم آڻي رهيا آهيون، جمهوريت جي استحڪام لاءِ هر ڪنهن سان ملنداسين، وزيراعظم ميان نواز شريف ۽ پنجاب جي وڏي وزير وچ ۾ رائيونڊ ۾جاتي امرا ۾ ملاقات ٿي جنهن ۾ اهم ملڪي معاملن تي خيالن جي ڏي وٺ ڪئي وئي ملاقات ۾ سينيٽ اليڪشن جي حوالي سان جاري صورتحال تي غور ڪيو ويو، ان موقعي تي وزيراعظم ميان نواز شريف جو چوڻ هو ته سياست ۾ ڪرپشن جو رستو هميشه لاءِ بند ڪرڻ چاهيون ٿا جمهوريت جي استحڪام ۾ ئي ملڪ جي فلاح آهي.

 

سنڌ ۾ گورنر راڄ جو ڪوبه امڪان ناهي: شرجيل ميمڻ

ڪراچي(اسٽاف رپورٽر) اطلاعات ۽ بلديات واري صوبائي وزير شرجيل انعام ميمڻ چيو آهي ته هاڻ بلديات کاتي سميت سمورن ادارن مان ڪرپشن جو خاتمو ڪري ئي ساهه پٽينداسين. پهرين اپريل کانپوءِ گوسڙو ملازمن جو باب هميشه جي لاءِ ختم ٿي ويندو، جڏهن ته ٻئي مرحلي ۾ ملازمن جي حاضري کي يقيني بڻائڻ جي حوالي سان بائيو ميٽرڪ سسٽم ادارن ۾ لاڳو ڪيو ويندو. سڄي صوبي ۾ سمورن ٽائونن جي ميونسپل ايڊمنسٽريٽرن، ڪراچي جي سڀني ڊي ايم سيز جي ايڊمنسٽريٽرن ۽ ڪي ايم سي پهرين مارچ کان پنهنجي سمورن خرچن، پگهارن جي حسابن ۽ ٻين خرچن جا مڪمل تفصيل ويب سائيڊ تي ظاهر ڪيا ويندا. شهر مان غيرقانوني اڏاوتون، سرڪاري زمينن تي قائم شادي هالن ۽ ٻين قبضن جي خاتمي جي شروعات ڪئي وئي آهي.  عوام کي شعور بابت آگاهي جي ڪامياب مهم جي ضامن آهي ۽ ان سلسلي ۾ سول سوسائٽي ۽ ميڊيا پنهنجو ڪردار ادا ڪن. هن آچر تي ”صاف سرسبز سنڌ، پر امن سنڌ“مهم جي سلسلي ۾ ضلعي ۽ تعلقي ۾ فتح باغ ۾لڳايل گلن جي نمائش جي افتتاح، اتي روڊن جي ٻنهي پاسن کان فٽ پاٿ تي رنگ ۽ نالن جي صفائي جي حوالي سان ڪيل ڪوششن جو جائزو وٺڻ بعد ميڊيا سان ڳالهائيندي ڪيو.ان موقعي تي صوبائي وزير فتح باغ جي بلڪل سامهون هاڪي ڪلب جي زمين تي قائم غيرقانوني ”ارينه شادي هال“ کي به سيل ڪرايو ۽ لاڳاپيل سمورن آفيسرن کي هدايتون جاري ڪيون ته ڊسٽرڪٽ سينٽرل ۾ قائم سمورن غيرقانوني شادي هالن ۽ ٻين اڏاوتن جو فوري خاتمو ڪيو وڃي ۽ کين ان بابت مڪمل رپورٽ پيش ڪئي وڃي. ان موقعي تي صوبائي وزير مڪيش چاولا، ميٽروپوليٽن ڪمشنر مسعود عالم، ڊي سي سينٽرل، ايڊمنسٽريٽر ۽ ميونسپل ڪمشنر سينٽرل ۽ ٻيا اعليٰ آفيسر به موجود هئا. شرجيل ميمڻ چيو ته اسان سڄي صوبي ۾ وڻڪاري مهم جي پهرين مرحلي ۾ 6 لک ٻوٽا پوکڻ جو ٽاسڪ ڏنو هو ۽ الحمد الله گذريل 6 ڏينهن کان اسان جي اها مهم ڪراچي سميت سڄي سنڌ ۾ زور ۽ شور سان جاري آهي. هن چيو ته اها مهم مستقل جاري رهندي. هن چيو ته ان مهم کان پهرين مون ڪيترائي ڀيرا آفيسرن کي صوبي ۾ صفائي سٿرائي جي حوالي سان هدايتون ڪيون ۽ ڪيترائي ڀيرا ٽاسڪ ڏنو پر بيورو ڪريسي ان تي سنجيدگي جو مظاهرو نه ڪيو. ان کانپوءِ مون پاڻ ان ڪم جو ٺيڪو کنيو آهي ۽ ان ڏينهن کان پاڻ روزانو صبح کان رات تائين مختلف علائقن ۾ وڃي پاڻ ٻُهارو ڏيندو آهيان ۽ ديوارن جي وال چاڪنگ به مٽائيندو آهيان. هن چيو ته اهو منهنجو يا آفيسرن جو ڪم ناهي بلڪه انهن ملازمن جو ڪم آهي جيڪي ڪروڙين رپين جون پگهارون کڻي رهيا آهن ۽ هاڻ جڏهن انهن تي سختي ڪئي وئي آهي ته نه صرف اهي ملازم به ڪمن تي لهي آيا آهن بلڪه پاڻ عوام به محسوس ڪرڻ شروع ڪري ڇڏيو آهي ته صفائي سٿرائي جو ڪم ٿي رهيو آهي. شرجيل ميمڻ چيو ته ڪرپشن سرڪاري ادارن ۾ به آهي  ۽ نجي ادارن ۾ به آهي ۽ سرڪاري ادارن مان ڪرپشن جي خاتمي لاءِ سنڌ حڪومت ڪوششون ڪري رهي آهي. هن چيو ته مان صوبي جي سمورن ٽي ايم ايز ۽ ڪراچي جي سمورن ڊي ايم سيز ۽ ڪي ايم سي کي به هدايتون ڏنيون آهن ته هو پهرين مارچ کان ٿيندڙ سمورن خرچن ايتري تائين پگهارن جي ادائيگي، ترقياتي  ڪمن جو   مڪمل تفصيل ۽ بلن  جي  اسڪين ٿيل ڪاپي به ويب سائيڊ تي رکي وڃي ته جيئن صرف ڪراچي يا صوبي سنڌ جي عوام ئي نه بلڪ ملڪ ۽ ٻاهر جي ملڪن ۾ موجود پاڪسانين کي به آگاهي ٿي سگهي ته ان جي ٽيڪس جي رقم ڪنهن ڪنهن مد ۾ ۽ ڪٿي ڪٿي خرچ ٿي رهي آهي. شرجيل ميمڻ چيو ته هاڻ سمورن ملازمن کي ڪم جي عادت وجهڻ گهرجي ڇو ته هاڻ ڪوبه گوسڙو ملازم يا ڪم چور ملازم سرڪاري پگهار نه کڻي سگهندو. هن چيو ته پهرين اپريل کان بلديات کاتي جي صوبي جي سمورن ملازمن کي پگهارون سنڌ بئنڪ جي معرفت سندن بائيو ميٽرڪ ۽ فزيڪل موجودگي ۾ کلندڙ اڪائونٽس مان ادا ڪئي ويندي ۽ جنهن کان پوءِ اميد آهي ته وڏي پيماني تي گوسڙو ملازمن کان اسان کي نجات ملي ويندي. هن چيو ته ٻي مرحلي ۾ ملازمن جي حاضري کي يقيني بڻائڻ لاءِ سمورن کاتن ۾ بائيو ميٽرڪ حاضري سسٽم کي متعارف ڪرايو پيو وڃي، جنهن جي ذريعي ملازمن کي پنهنجي آفيس ۾ صبح ۽ شام ٻنهي وقت ۾ پنهنجو آڱوٺو لڳائي ثابت ڪرڻو پوندو ته هو پنهنجي ڊيوٽي تي موجود آهن ۽ جيڪڏهن ايئن نه ڪيو ويو ته ان جي پگهار روڪي ويندي. ان موقعي تي هڪ سوال جي جواب ۾ هن چيو ته اسان وٽ مسئلا تمام گهڻا آهن. شهر جي ماسٽر پلان جي برعڪس اڏاوت ڪئي وئي آهي، جڳهه جڳهه تي قبضن ۽ خاص ڪري برساتي نالن تي سالن کان قبضن اسان لاءِ مشڪلاتون ڪيترائي ڀيرا وڌائي ڇڏيون آهن. هن چيو ته صرف گجر نالي اندر 2 لک کان وڌيڪ آبادي رهائش پذير آهي، جڏهن ته ڪيترن نالن تي سرڪاري آفيسون به قائم ڪيون ويون آهن. هن چيو ته شهر جو انفرااسٽرڪچر تباهه ڪيو ويو آهي ۽ اسان هن شهر ۾ جئين ماسٽر پلان ۽ ان جي انفرااسٽرڪچر کي بهتر بڻائڻ لاءِ ڪوشان آهيون. هڪ ٻي سوال جي جواب ۾ هن چيو ته اسان جي هي مهم ان وقت تائين مڪمل ڪامياب نٿي ٿي سگهي جيستائين عوام ان ۾ پنهنجو ڀرپور ڪردار ادا نه ڪندو. هن چيو ته عوام جهڙي طرح پنهنجن گهرن کي صاف سٿرو رکي ٿو اهڙي طرح انهن کي پنهنجن گهٽين ۽ پاڙن کي به صاف سٿرو رکڻو پوندو ۽ ان ڳالهه جو شعور اجاگر ڪرڻو پوندو ته ڪچري کي ان جي مقرر ڪيل جاءِ تي اڇلايو وڃي. هن چيو ته اسان بل بورڊز جي خاتمي جي مهم شروع ڪري ڇڏي آهي ان لاءِ ٻه ڪمپنيون جيڪي پنهنجو برانڊ جي پلبسٽي چاهين ٿيون اهي ننڍا ننڍا ڪچري دان ٺهرائين ۽ انهن کي مختلف هنڌن تي لڳرائين، جنهن سان عوام کي ڪچرو هڪ هنڌ اڇلڻ ۾ آساني ٿيندي ته ٻي طرف انهن ڪمپنين کي به پنهنجي برانڊ کي مشهور ڪرڻ ۾ مدد ملندي. هڪ ٻي سوال جي جواب ۾ هن چيو ته ايم ڪيو ايم ۽ پيپلز پارٽي وچ ۾ ڪوبه ڊيڊ لاڪ نه آهي ۽ سمورا معاملا سهڻي نموني حل ڪيا پيا وڃن. ايم ڪيو ايم جي حڪومت ۾ شموليت جي سوال تي هن چيو ته سينيٽ جي چونڊ کان پوءِ ٻيهر ڳالهين کان پوءِ سموريون ڳالهيون سامهون اچي وينديون. هن چيو ته ايم ڪيو ايم سميت سموري سياسي جماعتن سان اسان جي ورڪنگ ريليشن شپ سٺي آهي ۽ اسان گڏجي ڪري هن صوبي ۽ ملڪ جي خدمت جو ارادو رکون ٿا. صوبي ۾ گورنر راڄ جي افواهن جي سوال جي جواب ۾ هن چيو ته سموريون ڳالهيون بي بنياد آهن. سول ۽ آرمي قيادت هڪ صفحي تي آهن ته هن ملڪ ۾ جمهوريت مستحڪم ٿئي ۽ دهشتگردي جو خاتمو ٿئي. صوبائي وزير شرجيل ميمڻ مڪيش ڪمار چاولا، نادر مگسي ۽ ٻين سان گڏ فريئر هال ڪراچي ۾ وينيٽج اينڊ ڪلاسڪ ڪار ڪلب تحت ڪوٺايل ڪارن جي نمائش جو افتتاح ڪيو ۽ اتي موجود 1920 کان ايستائين 150 کان وڌيڪ ڪارن جي ان نمائش جي بندوبست تي انهن جي منتظمين کي مبارڪباد پيش ڪئي ۽ کين يقين ڏياريو ته حڪومت اهڙي طرح جي اپائن ۾ پنهنجو ڀرپور ساٿ ڏيندي، جنهن سان پاڪستان ۽ عالمي سطح تي پاڪستاني ڪارن جي پذيرائي ٿي سگهي.

 

سينيٽ چونڊن لاءِ هڪ پليٽفارم تي آهيون: زرداري، فضل الرحمان

اسلام آباد(بيورو): پيپلز پارٽي جي شريڪ چيئرمين ۽ اڳوڻي صد رآصف علي زرداري ۽ مولانا فضل الرحمان جي ملاقات ٿي آهي ملاقات کانپوءِ ٻنهي اڳواڻن ميڊيا سان ڳالهائيندي چيو آهي ته سينيٽ چونڊن جي معاملي تي جي يو آءِ ف، پيپلز پارٽي ۽ اي اين پي هڪ پليٽ فارم تي آهن، ان موقعي تي آصف علي زرداري جو چوڻ هو ته مولانا فضل الرحمان اڄ دعوت ڏني ان جو شڪريو ادا ڪريان ٿو، هن وقت ماحول سينيٽ اليڪشن جو آهي، ان تي به ڳالهيون ٿيون، پيپلز پارٽي 22 هين ترميم جي مخالفت ڪئي آهي هميشه جمهوري تجو ساٿ ڏنو جمهوريت کي اڳتي وڌائڻ لاءِ پرعزم آهيون اسان سڀني جو پاڪستان آهي، سڀني کي سنڀالڻو آهي، عام چونڊن جي حوالي سان ان جو چوڻ هو ته اسان کي خبر آهي ته ڪهڙي قسم جي اليڪشن ٿي پر سڀني کي خبر آهي ته ڪهڙي طرح چونڊون ٿيون چونڊون خدشن سان قبول ڪوين، چونڊن تي وائٽ پپير جاري ڪنداسين، آصف زرداري جو ان موقعي تي اهو به چوڻ هو ته ڪالهه تائين جيڪي وزيراعظم هائوس سامهون بيٺل هئا اڄ اسيمبلي اچن چاهين ٿا تحريڪ انصاف کي پارليامينٽ ۾ آڻن منهنجي ذ۾يواري ناهي هن ميڊيا کي طاقتور قرار ڏيندي چيو ته  ميڊيا سڀني کان وڏي طاقت آهي، ميڊيا جمهوريت کي بچائي، مولانا فضل الرحمان ميڊيا سان ڳالهائيندي چيو ته آصف زرداري سان ملاقات خير سگالي طور تي ٿي آهي، ملاقات جي وڏي سياسي ايجنڊا نه هئي، موجوده صورتحال تي ڳالهه ٻولهه ڪئي وئي.

 

ملڪ مان ڪرپشن ۽ بدعنواني سميت دهشتگردي جي خاتمي لاءِ ترجيحي بنيادن تي ڪم هلي رهيو آهي: ماروي ميمڻ

ڀٽ شاهه (رپورٽر) بينظير انڪم سپورٽ پروگرام جي چيئرپرسن ماروي ميمڻ آچر ڏينهن هتي ڀٽ ڌڻي جي درگاهه تي پهچي گلن جي چادر چاڙهي ۽ دعا گهري، درگاهه تي حاضري بعد اي پي پي سان ڳالهائيندي ماروي ميمڻ چيو ته وزيراعظم محمد نواز شريف طرفان کيس وڏي ذميواري ڏني وئي آهي، جيڪا اڻ ٿڪ ڪوشش ۽ ايمانداري سان نڀائڻي آهي، ڀٽائي جي فلسفي تي عمل ڪندي ملڪ مان ڪرپشن ۽ بدعنواني سميت دهشتگردي جي خاتمي لاءِ ترجيحي بنيادن تي ڪمهلي رهيو آهي، ملڪ مان غربت جي پاڻ پٽڻ ضروري آهي، هن چيو ته بي آءِ ايس پي پروگرام جو مقصد ملڪ جي غريب طبقي کي بهتر زندگي ۽ مالي طور مستحڪم بڻائڻ آهي، هن پروگرام ۾ ايماندار ۽ محنتي عملدار موجود آهن، جيڪي پروگرام کي ڪامياب بڻائڻ لاءِ ڏينهن رات ڪوششون ڪري رهيا آهن، ماروي ميمڻ چيو ته بي آءِ ايس پي پروگرام ۾ اڃا به بهتري جي ضرورت آهي جنهن تي وڌيڪ ڪم جاري آهي، هن چيو ته وزيراعظم محمد نواز شريف جو ڄاڻايل پروگرام جي سلسلي ۾ چٽو موقف آهي ۽ 3 نقاطي فارمولا تي عمل جاري آهي، جنهن ۾ پروگرام کي صاف ۽ شفاف نموني هلائڻ، محنت ڪرڻ ۽ پروگرام کي ڪارائتو بڻائڻ آهي، هن چيو ته شاهه لطيف ڀٽائي جي فلسفي تي عمل ڪري ملڪ مان دهشتگردي جو خاتمو آڻي سگهجي ٿو، ملڪ ۾ ادارن کي خانگائڻ بابت سوال تي هن چيو ته موجوده حڪومت اهو سمورو ڪجهه ڪندي جيڪو ملڪ لاءِ بهتر هوندو، ٿر ۾ معصوم ٻارڙن جي فوت ٿيڻ جي شرح کي روڪڻ ۽ ٿر واسين جي هر ممڪن مدد ڪرڻ لاءِ موجوده حڪومت ڪيترائي پروگرام شروع ڪري رهي آهي. بعد ۾ ماروي ميمڻ ڀٽائي جو راڳ پڻ ٻڌو، ان موقعي تي بينظير انڪم سپورٽ پروگرام جو ڊائريڪٽر جنرل راجا ظفر الله سومرو ۽ مسلم ليگ (ن) يوٿ ونگ سنڌ جو صدر راجا خليق الزمان انصاري، بلاول راجپوت، ڊاڪٽر حما شاهه، عادل رشيد، حاجي فيض محمد، ڀٽائي درگاهه جو گادي نشين سيد وقار حسين شاهه لطيفي ۽ ٻيا پڻ ساڻس گڏ هئا

 

برساتن پوڻ سبب تاريخي ماڳ موهن جو دڙي جي آثارن کي سخت نقصان، آرڪيالاجي ملازم ڊيوٽي تان غائب

باڊھه(رپورٽر)بھار جي پھرين برسات جي وسڪاري سبب ٿڌ ۾ واڌ اچي وئي، گذريل رات کان مسلسل تيز برسات سبب تاريخي ماڳ موھن جي دڙي جي آثارن کي سخت نقصان پھتو، برسات دوران آرڪيالاجي کاتي جا ملازم ڊيوٽين تان غائب رھيا جنھن سبب تاريخي ماڳ جي ڪيترين ئي سائيٽن تي پاڻي بيھجي ويو، تيز برسات سبب موھن جي دڙي جي دل اسٽوپا، ڊي ڪي ايريا، ايڇ آر ايريا، ايل ايريا، منير ايريا ۽ ٻين سائيٽن تي برسات جو پاڻي بيھجي ويو برسات جو پاڻي بيھڻ جي نتيجي ۾ قديم آثارن کي سخت نقصان رسيو جڏھن تاريخي ماڳن جون ديوارون پڻ جھري پيون ٻئي طرف برسات دوران موھن جي دڙي تي مقرر آرڪيالاجي کاتي جو ڪو ملازم موجود نه ھيو ۽ برسات سبب ھزارين سالن جي پراڻي تھذيب جا آثار سخت متاثر ٿيا ٻئي طرف علائقي جي مختلف سياسي سماجي تنظيمي اڳواڻن مھراڻ عرف الھ يار چانڊيو، صفر مغيري، محمد موسى، حاڪم علي گوپانگ ۽ ٻين ميڊيا سان ڳالھائيندي چيو ته ثقافت کاتي جي بي ڌياني ۽ لاپرواھي سبب قديم تھذيب موھن جي دڙي جي آثارن کي تازين برساتن سبب سخت نقصان رسيو آھي جنھن جو زميوار سنڌ سرڪار ۽ ثقافت کاتو آھي ھنن وڌيڪ ھڪ ته اڳ ئي علائقي جا بااثر آرڪيالاجي کاتي جي عملدارن سان ملي ڀڳت ڪري تاريخي ماڳن جي آثارن سان ھٿ چراند ڪري قبضا ڪرڻ جي ڪوشش ڪري رھيا آھن ۽ وري تازين برساتن سبب عملدارن جي نااھلي سبب تاريخي ماڳن جي سائيٽن تي برسات جو پاڻي جمع ٿيڻ سبب آثارن کي سخت نقصان رسيو آھي ٻئي طرف ھنن چتاءُ ڏيندي چيو ته موھن جو دڙو تي مقرر نااھل عملدارن خلاف نوٽيس وٺي ڪري سندس خلاف سخت کان سخت ڪاروائي ڪئي وڃي نه ته ٻئي صورت ۾ احتجاجي تحريڪ ھلائي ويندي.

 

پاڪ ڀارت ڳالهين جي ٻيهر شروعات آجيان جوڳي آهي: سرتاج عزيز

لاهور(بيورو) قومي سلامتي ۽ پرڏيهي معاملن بابت وزيراعظم جي صلاحڪار سرتاج عزيز چيو آهي ته پاڪ ڀارت ڳالهين جي ٻيهر شروعات آجيان جوڳي آهي، جنهن سان سرحدن تي حالتن ۾ ڇڪتاڻ گهٽجندي، ڀارت سان ڪشمير جي معاملي ۾ اسان جو موقف واضح آهي، ڪشمير مسئلي کان بغير ڳالهيون بي معنيٰ آهن، پاڪستان اسلحي جي ڊوڙ ۾ شامل نه ٿو ٿيڻ چاهي پر روايتي هٿيارن جو توازن رکڻ ضروري آهي. هو آچر ڏينهن شاهد برڪي انسٽيٽيوٽ آف پبلڪ پاليسي جيافتتاحي تقريب کي خطاب ۽ ميڊيا سان ڳالهائي رهيو هو. سرتاج عزيز چيو ته حڪومت ڏکيائين هوندي به دفاعي ضرورتن کي پورو ڪيو آهي ۽ اڳتي به ڪندي رهندي، سيڪيورٽي پرڏيهي پاليسي جو اهم جزو آهي، سيڪيورٽي ۽ قومي مفاد تي ڪا سوديبازي نه ڪنداسين. صلاحڪار چيو ته ڀارت پاڻ ئي ڳالهيون معطل ڪيون هيون ۽ هاڻي ڀارتي وزيراعظم نريندر مودي پاڪستان جي وزيراعظم محمد نواز شريف کي فون ڪري باقاعده ڳالهيون ٻيهر شروع ڪرڻ جي دعوت ڏني آهي، ڳالهيون جتان معطل ٿيون هيون اتان شروع ٿينديون. اي پي پي/ن – ش /ر – ڪ 18:39

 

ڀارت ورڪنگ بائونڊري جي مسلسل ڀڃڪڙي ڪري رهيو آهي: خواجه آصف

سيالڪوٽ(بيورو) ڀارت گذريل ڪيترن ئي مهينن کان ورڪنگ بائونڊري جي مسلسل ڀڃڪڙي ڪري رهيو آهي، بچاءُ واري وفاقي وزير خواجه آصف چيو آهي ته ڀارت کي ڳالهين لاءِ ورڪنگ بائونڊري تي درجه حرارت گهٽ ڪرڻي پوندي، ڀارت جي دفاعي بجيٽ ۾ خطرناڪ حد تائين اضافو جنگي جنون جو چٽو ثبوت آهي ڀارت امن ڳالهين ۾ مخلص ناهي ۽ نه ئي ڀارت امن کي هٿي ڏيڻ چاهي ٿو، انهن خيالن جو اظهار هن سيالڪوٽ جي اراضي يعقوب محلي ۾ ورڪرنر سان ڳالهائيندي ڪيو  خواجه آصف وڌيڪ چيو ته پيٽرول ۽ بجلي جي قيمتن ۾ اضافو صرف عوامي مفاد لاءِ نه ڪيو، پيٽرول ۽ بجلي جون قيمتون عوام خاطر نه وڌايون حڪومت عوام کي سهولتون ۽ بهتر معياري زندگي فراهم ڪرڻ چاهي ٿي.

 

2050ع تائين ٺٽو ۽ بدين ضلعه سنڌ جي نقشي تي ئي نه هوندا: رسول بخش پليجو

حيدرآباد(رپورٽر): قومي عوامي تحريڪ جي سربراهه رسول بخش پليجو چيو ته ايل بي او ڊي جي تباهڪارين خلاف وقت سر قدم نه کنيا ويا ته 2050ع تائين ٺٽو ۽ بدين ضلعا سنڌ جي نقشي تي ئي نه هوندا. صحافي الهبچايو جمالي ايل بي او ڊي جي تباهڪارين بابت ڪتاب لکي ورلڊ بئنڪ سميت عالمي قوتن سان مهاڏو اٽڪائيندي، انهن کي ڪوڙو ثابت ڪيو آهي. اهڙو اظهار هن حيدرآباد پريس ڪلب ۾ صحافي الهبچايو جمالي جي ايل بي او ڊي بابت لکيل ڪتاب ”ايل بي او ڊي هڪ مها آفت“ جي ڪوٺايل مهورتي تقريب کي خطاب ڪندي ڪيو. هن چيو ته آمريڪا ماضيءَ ۾ نائن اليون وارو ڊرامو رچائي لکين ماڻهن کي قتل ڪري چڪو آهي، آمريڪا سدائين ان موقف جو رهيو آهي ته سموري دنيا جا ملڪ سندس اڳيان امداد جي لاءِ هٿ ٽنگيندا رهن. آمريڪا جي هڪ تنظيم جهموريت جي نالي تي وظيفو ڏئي دهشتگرديءَ کي هٿي ڏئي رهي آهي. هن چيو ته ايم آر ڊي تحريڪ کي ڪنهن جنم ڏنو ۽ انهن سان ڪهڙو حشر ڪيو ويو، ان بابت ڪو ليکڪ لکي ئي نٿو. هن چيو ته اڄ ڪجهه ڌريون قومي عوامي تحريڪ جي ختم ٿيڻ جون دعوائون ڪري رهيون آهن، اسان انهن ڌرين کي اهو ٻڌائڻ چاهيون ٿا ته قومي عوامي تحريڪ کانسواءِ ملڪ ۾ ٻي ڪابه اهڙي پارٽي ناهي، جيڪا سڀني کي گڏ کڻي هلي. ڪتاب جي ليکڪ صحافي الهبچايو جمالي چيو ته هن ڪتاب جي لکڻ دوران کيس ڪيترين ئي پريشانين کي منهن ڏيڻو پيو، مخالفت ۾ صحافي دوست پهرين صف تي رهيا. هن چيو ته مون سدائين اصولن واري صحافت ڪئي آهي، اهو ئي سبب آهي جو مون وٽ ڪا به ملڪيت نه آهي. هن چيو ته هي ڪتاب منظر عام تي اچڻ تي تمام گهڻي خوشي محسوس ٿي آهي. ليکڪ دستگير ڀٽي چيو ته 1947ع کان اسان کي سامراجي سوچ ۾ ڦاسايو ويو آهي. موجوده حڪمران سامراجي ايجنٽ آهن، جيڪي وسيلن جي ڦرلٽ ڪرڻ ۾ مصروف آهن، هن چيو ته هاڻ اسان کي سامراجي سوچ خلاف هڪ سگهارو آواز بلند ڪرڻو پوندو، سنڌ جي عوام کي گهرجي ته مقامي سطح تي تنظيمون جوڙي سنڌ جي وسيلن ۽ حقن جي مالڪي ڪن، هاڻ قربانيءَ کانسواءِ سنڌ کي بچائي  نٿو سگهجي، سماجي اڳواڻ اشفاق ميمڻ چيو ته ايل بي او ڊي لاڙ سميت سنڌ لاءِ موتمار منصوبو آهي، هن چيو ته حڪمران سنڌ جي اصل مسئلي کان عوام جو ڌيان هٽائڻ لاءِ هٿرادو سياسي مسئلا پيدا ڪري رهيا آهن، هن چيو ته سنڌ جي تباهيءَ جا سمورا پيرا حڪمرانن ڏانهن وڃن ٿا، جڏهن به سنڌ جو عوام ترقي جي راهن ڏانهن روان ٿئي ٿو ته سنڌ جي ماڻهن کي برادريءَ ۽ انتهاپسندي جي ورچاڙهيو وڃي ٿو. ان موقعي تي سينيئر صحافي اسحاق مڱريو، ڊاڪٽر عالم دين انصاري، اقبال حيدر، پروفيسر اسماعيل ڪنڀر، غلام رسول ٽالپر سميت ۽ ٻين پڻ خطاب ڪيو.

 

ڊيره بگٽي ۾ شرپسندن 2 گيس پائپ لائنون تباهه ڪري ڇڏيون

ڊيره بگٽي(م ڊ): شرپسندن مختلف علائقن ۾ گيس جي 2 پائپ لائنن کي ڌماڪيدار مادي سان اڏائي ڇڏيو ليويز اختيارين مطابق ڊيره بگٽي جي علائقي پير ڪوهه ۾ شرپسندن لوٽي گيس فيلڊ جي کوهه نمبر 10 ۽ 12 تان گيس پلانٽ ويندڙ 8، 8 انچ قطر جي پائپ لائنن کي ڌماڪيدار مادي سان اڏائي ڇڏيو ڌماڪن جي نتيجي ۾ پائپ لائن ۾ باهه لڳي وئي، واقعي جي اطلاع ملندي ئي امدادي ڪارڪنن ٻنهي کوهن مان گيس جي پيداوار بند ڪري پائپ لائنن جي بحالي لاءِ آپريشن شروع ڪري ڇڏيو

 

دهشتگردن ۽ انهن کي سهولتون ڏيندڙن کي نشان عبرت بڻائينداسين: شهبازشريف

لاهور (بيورو) پنجاب جي وڏي وزير محمد شهبازشريف چيو آهي ته ملڪ کي معاشي خوشهالي سان ڪامياب ڪرڻ لاءِ دهشتگردي انتهاپسندي ۽ فرقيواريت کي ختم ڪرڻ اڻٽر آهي قوم جي اتحاد جي طاقت سان دهشتگردي جي ڀلا جي منڍي چٿي ويندي دهشتگردي جي خلاف جنگ کٽڻ قوم جي هر فرد جو عزم ۽ مشن آهي دهستگردي جي خاتمي جي جنگ ۾ پاڪستان جو بهادر عوام ڪاميابي ماڻيندو ايندڙ نسلن جي محفوظ مستقبل ۽ پاڪستان جي بقا جي جنگ کٽڻ تائين سک سان نه ويهنداسين دهشتگردي خلاف جنگ ۾ وفاقي ۽ صوبائي حڪومت مڪمل هم آهنگي سان اڳتي وڌي رهيون آهن وڏي وزير شهبازشريف اهڙن خيالن جو اظهار هتي مختلف ضلعن سان تعلق رکندڙ قومي ۽ صوبائي اسيمبلي ميمبرن سان ڳالهائيندي ڪيو. وڏي وير چيو ته پرامن مضبوط ۽ خوشحال پاڪستان جي منزل حاصل ڪرڻ لاءِ ڏينهن رات هڪ ڪري ڇڏيو آهي ۽ دهشتگردن جي ناپاڪ ارادن کي ناڪام بڻائڻ جا قدم کنيا پيا وڃن ملاقات ڪندڙن ۾ قومي اسيمبلي ميمبر ميان ايم رشيد صوبائي اسيمبلي ميمبر حسن رياض علي عباس چوڌري افتخار حسين ۽ ٻيا شامل هئا.