تازيون خبرون

Daily Archives: February 28, 2015

تعليم حاصل نه ڪرڻ تي شرمندگي جو احساس اڄ تائين آهي: سونم ڪپور

لاهور(شوبز نيوز) پاڪستان جي ڪنهن نئين فلم آڏو ڀارت جي فلم کي رليز ڪرڻ جي روايت برقرار. تفصيل مطابق نئين پاڪستاني اردو فلم ”ديوداس” جي نمائش جي مقابلي ۾ پراڻي ڀارتي فلم ”ديوداس” کي به رليز ڪرڻ جو فيصلو ڪيو آهي. ان فيصلي تي فلمي حلقن جي سنجيده ڌرين ڪاوڙ جو اظهار ڪندي چيو آهي ته جڏهن به ڪا سٺي پاڪستاني فلم ٺهندي آهي ته ان جي آڏو ڀارتي فلم کي پيش ڪيو ويندو آهي. انهن چيو ته ”ديو داس” فلم جي مرڪزي ڪردار نديم شاهه جي محنت جي ڪمائي سان ٺهيل ان فلم کي اڪيلي سر بزنيس جو موقعو ملڻ گهرجي. واضح رهي ته 1980ع ۾ به پاڪستان جي مشهور فلم ”هم دونون” جي سامهون ڀارتي فلم ”نورجهان” کي پيش ڪيو ويو هو پر ”هم دونون” ڪامياب رهي ۽ ”نورجهان” فلاپ ٿي وئي

 

ڏکڻ آفريڪا ورلڊ ڪپ 2015ع جي سڀ کان وڏي ڪاميابي حاصل ڪري ورتي

سڊني(اسپورٽس نيوز)ڏکڻ آفريڪا ويسٽ انڊيز کي 257 رنسن تان شڪست ڏئي ورلڊ ڪپ 2015 جي سڀ کان وڏي ڪاميابي پنهنجي نالي ڪري ورتي آهي ڏکڻ آفريڪا ويسٽ انڊيز جي بالرن جي سٺي خاطر توازه ڪندي 409 رنسن جو هدف ڏنو جنهن ۾ سڀ کان وڏو ڪردار ڏکڻ آفريڪا جي ڪپتان اي بي ڊويليئرز جو رهيو جنهن 66 بالن تي تاريخ جي سڀ کان تيز ترين اننگ کيڏيندي 162 رنسون ٺاهيون، ويسٽ انڊيز جي بالرن کان علاوه بيٽسمين به ڪا خاص ڪارڪردگي نه ڏيکاري سگهيا ۽ هڪ هڪ ڪري 33.1 اوورن ۾ 151 رنسن تي پويلين واپس هليا ويا ان کان اڳ ڏکڻ آفريڪا 2010ع ۾ زمبابوي کي 272 رنسن تان شڪست ڏني هئي.

 

زخمي احمد شهزاد زمبابوي خلاف ڪليئر قرار

برسبن(اسپورٽس نيوز)زمبابوي خلاف ورلڊ ڪپ جي گروپ ميچ لاءِ پريڪٽس سيشن دوران زخمي ٿيندڙ احمد شهزاد کي ڪليئر قرار ڏنو ويو آهي، اطلاعن مطابق پريڪٽس سيشن دوران احمد شهزاد کي کاٻي پير جي کڙي ۾ ڌڪ لڳو جنهن سبب هو زخمي ٿي پيو جنهن کي فوري طور اسپتال منتقل ڪيو ويو جتي ان جو ايم آءِ آر ٽيسٽ به ڪرايو ويو جڏهن ته ڊاڪٽرن جو چوڻ هو ته احمد شهزاد جي انجري سنجيده نوعيت جي ناهي جڏهن ته ان کي آرام جو مشورو ڏنو ويو، ٻئي طرف ٽيم مينيجمينٽ تصديق ڪئي آهي ته احمد شهزادي معمولي انجري جو شڪار ٿيو هو جڏهن ته ان کي ڌڪ اهڙو ناهي لڳو جو ان کي زمبابوي خلاف ميچ ۾ ڊراپ ڪيو وڃي.

 

پاڪستان سان ميچ کي ڀارت ۾ رڪارڊ 288 ملين ماڻهن ٽي وي تي ڏٺو

ممبئي(اسپورٽس نيوز)ورلڊ ڪپ ۾ پاڪستان خلاف ميچ کي ڀارت ۾ رڪارڊ 288 ملين ماڻهن ٽي وي تي ڏٺو 15 فيبروري تي ايڊليڊ ۾ منعقد مقابلي کي مجموعي طور تي 288 ملين ماڻحن ڏٺو جيڪو ڀارتي ٽي وي جي تاريخ ۾ هڪ اهم رڪارڊ آهي اسٽار انڊيا جي چيف ايگزيڪٽو ادي شنڪر جو چوڻ آهي ته ورلڊ ڪپ کان وڏو ڪوبه ايونٽ ناهي پاڪستان سان ميچ ۾ ڏسندڙن جي تعداد جو رڪارڊ ٽٽي ويو.

 

ورلڊ ڪپ 2015، ڏکڻ آفريڪا پاران ويسٽ انڊيز کي 409 رنسن جو هدف، گيل 3 رنسن تي آئوٽ

سڊني(اسپورٽس نيوز)ورلڊ ڪپ جي اهم گروپ ميچ ۾ ڏکڻ آفريڪا ويسٽ انڊيز کي ڪاميابي لاءِ 409 رنسن جو هدف ڏنو آهي اي بي ڊي ويليئرز طوفاني اننگز کيڏندي 66 بالن تي 162 رنسن جي اننگ کيڏي، هاشم آملا 65، ڊوپليسي 62 ۽ روسو 61 رنسون ٺاهيون، ويسٽ انڊيز جي ڪپتان جيسن هولڊر پنهنجن 10 اوورن ۾ 104 رنسون ڏنيون، ويسٽ انڊيز طرفان هولڊر هڪ، رسل ۽ گيل 2، 2 رانديگرن کي آئوٽ ڪيو هدف جي حاصلات ۾ ويسٽ انڊيز اوپنر ڪرس گيل 3 رنسون ٺاهي ڪائل ايبٽ جي بال تي آئوٽ ٿي ويو.

 

سنڌ ۾ 21 مدرسا سيل ڪيا ويا

 

سنڌ ۾ غيرقانوني مدرسن کي سيل ڪرڻ جو سلسلو ڪالهه به جاري رهيو جڏهن ته پابندي پيل دهشتگرد تنظيمن جا اڳواڻ به گرفتار ڪيا ويا آهن. ان سلسلي ۾ گذريل ڏينهن حيدرآباد پوليس ڪالهه ٻي ڏينهن به ضلعي جي مختلف علائقن ۾لائوڊ اسپيڪر ايڪٽ جي ڀڃڪڙي ڪرڻ جا وڌيڪ 6 ڪيس داخل ڪري ورتا آهن، اهڙي ريت حيدرآباد ضلعي ۾ ٻن ڏينهن اندر لائوڊ اسپيڪر ايڪٽ جي ڀڃڪڙي جي داخل ڪيل ڪيسن جو تعداد 17 ٿي ويو آهي، جڏهن ته حيدرآباد پوليس پاران سيل ڪيل غير رجسٽرڊ 25 مدرسن مان 10 مدرسن کي رجسٽرڊ ڪرايو ويو آهي. جڏهن ته دادو جي اي سيڪشن پوليس شهر جي مختلف علائقن ۾ هلندڙ 5 غير رجسٽر مردسن مدرسه القادريه، مدرسه اويسيه، مدرسه جامع عربيه مصطفيٰ، مدرسه القادريه عربيه، سميت عورت جي مدرسي مدرسه فاطمته الزهره ليڊيز، کي پڻ سيل ڪري ڇڏيو، بي سيڪشن پوليس شهر جي مختلف علائقن ۾ ڪارروائي ڪندي 6 غير رجسٽرڊ مدرسن کي سيل ڪيو جن ۾ مدرسا داروالعلوم، مدرسه جامعه انوار الشرفيا، مدرسه عربيه مدينت العلوم، مدرسه صاحب العصر جوهي لنڪ روڊ، مدرسه العريبه انوار القران، مدرسه عربيه اسلاميه انوار العلوم شامل آهن.ٻئي پاسي ڏهرڪي مان پابندي پيل جهادي تنظيمن سان واسطو رکندڙ شڪي گرفتار ڪيو ويو پريس ڪانفرنس ڪندي ايس ايس پي گهوٽڪي ابرار حسين نيڪوڪار ٻڌايو ته ڏهرڪي پوليس ڪاروائي ڪري محمد سعيد ولد همت علي راجپوت کي گرفتار ڪيو آهي، جيڪو پنجاب جي تعلقي رينالا ڪرد جو رهواسي آهي، جنهن وٽان هڪ خنجر، جهادي مواد، جيڪٽ ۽ ٻيو سامان هٿ ڪيو ويو آهي، هن چيو ته گرفتار شخص پنهنجو تعلق جيش محمد ۽ تحريڪ انصاف سان ٻڌائي رهيو آهي، جنهن جا هٿيار کڻي بيٺل مختلف ماڻهن سان فوٽو پڻ نڪتل آهن، ان موقعي تي گرفتار سعيد راجپوت ٻڌايو ته عبدالقادر منهنجو دوست آهي، سندس گهر واري فاطمه دايو پڻ جيش محمد لاءِ ڪم ڪري رهي آهي ۽ٻيا ساٿي به هتي ڪم ڪن پيا. عبدالقادر ٻڌائيندو آهي ته اسان جي تنظيم ڪشمير، افغانستان ۽ ٻين ملڪن ۾ جهاد ڪندي آهي. ان سلسلي ۾ پوليس وڌيڪ ڪارروائي لاءِ ٽيمون جوڙي رهي آهي. هوڏانهن ڏوڪري ۾ ايئرپورٽ پوليس هڪ شخص کي گرفتار ڪيو جيڪو پنهنجو نالو قاسم ۽ رهائش پنجاب جي ٻڌائي ٿو، جيڪو شهر ۾ ڪيترن ئي ڏينهن کان موجود هو، ان شخص بابت طالبان هجڻ جو شڪ ظاهر ڪيو پيو وڃي جنهن بابت پوليس وڌيڪ جاچ ڪري پئي. مٽياري ضلعي اندر نيشنل ايڪشن پلان تحت ضلعي ۾غير رجسٽرڊ مدرسن خلاف ڪارروائي ڪندي 10 مدرسن جن ۾ مدرسه عثمانيه مٽياري، مدرسه عربيه دارالعلوم امينه پنج مورو، مدرسه تعليم القرآن پنج مورو، مدرسه الفلاح ڀٽ شاهه، مدرسه جامع صديقي مٽياري، درگاه سيد ڏنو مٽياري، مدرسه جامع اماميه بچل وريه لڳ اڏيرو لال، مدرسه دارالعلوم قاسميه بچل وريه لڳ اڏيرو لال، تجويزالقرآن لڳ الهڏنو ساند کي سيل ڪيو ويو .

 

سنڌ ۾ بدعنوانيءَ جا اعليٰ درجا ؛عاجز جمالي

سنڌ گذريل ڏينهن هڪ عظيم ايماندار ۽ بي باڪ سنڌي کان محروم ٿي وئي. راڻا ڀڳوانداس هن صديءَ جو تمام وڏو ماڻهو هو ۽ سنڌ جو هڪ مثالي ڪردار هو. سنڌ جي سنڌي هندن جو شاندار ماضي ته سنڌ جي تاريخ جو جرڪندڙ باب آهي پر حال ۾ راڻا ڀڳوانداس جهڙا ڪردار تمام گهٽ ملندا. ڇو ته سنڌي سماج کي حڪمرانن هڪ اهڙي بدعنوان سماج ۾ تبديل ڪرڻ ۾ ڪا به ڪسر نه ڇڏي آهي، جتي ايمانداري، صلاحيت، سچائي، اهليت ۽ انسانيت تيزيءَ سان بدعنوانين هٿان قتل ٿي رهيون هجن، اُتي راڻا ڀڳوانداس جهڙن ماڻهن جو وڇوڙو تاريخ لاءِ وڏي صدمي کان گهٽ ناهي.

اربعا ڏينهن شام جو ڪراچي ۾ تعليم کاتي جي ڊائريڪٽر وهاب عباسي جي آفيس تي ڇاپو هڻي اينٽي ڪرپشن پوليس کيس گرفتار ڪيو آهي. مٿس ڪروڙين رپين جي بدعنوانين جا ڪيترائي ڪيس آهن. هن کان اڳ سنڌ هاءِ ڪورٽ نيب جي ڪيس ۾ وهاب عباسي کي سزا ڏيئي چُڪي آهي ۽ حُڪم ڏنو آهي ته کانئس ننڍڙين نياڻين جي اسڪالرشپس جا لڳ ڀڳ هڪ ڪروڙ رپيا وصول ڪيا وڃن. اينٽي ڪرپشن کاتي جي ڊائريڪٽر آصف اعجاز موجب وهاب عباسي پينشن جي مد ۾ ڪروڙين رپين جي بدعنواني ڪئي آهي. سنڌ جي وڏي وزير کي عباسي جي برطرفي جي هڪ سمري به موڪلي وئي آهي. ڇو ته تازو اهو به انڪشاف ٿيو آهي ته موجوده دور ۾ به ماسترن جون خفيا ڀرتيون ٿيون آهن، جن ۾ وهاب عباسي به ملوث آهي. ان کان سواءِ مٿس ٻيا به ڪيترائي الزام آهن.

جنهن ڏينهن وهاب عباسي شام جو گرفتار ٿيو، اُن منجهند جو ئي ڪراچي پريس ڪلب اڳيان پرائمري استادن جو سندس خلاف احتجاجي مظاهرو ٿي رهيو هو. پ ٽ الف پريس رليز ۾ به وهاب عباسي تي ڪيترائي الزام هنيا هُئا، پر ڪجهه اهڙا الزام آهن جيڪي عالم آشڪار آهن. مثال پي اسڪيل، ٽائيم اسڪيل تي هر استاد کان ٻه کان ٽي هزار رپيا ورتا وڃن ٿا. اها شڪايت ڪراچي ۾ عام آهي. ٻي شڪايت اها هئي ته عباسي هر ماسترياڻي کي فون ڪري چوندو آهي ته منهنجي آفيس اچو ته اوهان جي بدلي ٿي ويندي.

وهاب عباسي پنهنجي هڪ ڪلرڪ سميت گرفتار ٿي ويو پر اُن جي گرفتاري کان پوءِ به سوال موجود آهي ته ڇا ٿيندو؟ هرڪو ڄاڻي ٿو ته ڪرپشن جو خاتمو ته ڪونهي ٿيڻو. ڇو ته سڄو تعليم کاتو وهاب عباسين سان ڀريل آهي. ٻيو سوال اِهو آهي ته ڇا وهاب عباسي ڏي وٺ ڪري واپس اچي ويندو؟ ممڪن آهي ته ساڳئي عهدي تي ويهي رهي. ٽيون سوال اهو آهي ته ڇا هن ڪرپشن جو مهندار اڪيلو ڊائريڪٽر تعليم ئي هوندو؟ تعليم کاتي اندر ٿيندڙ ڪرپشن ۾ وزير، سيڪريٽري، ايڊيشن سيڪريٽري ۽ ٻيا ماڻهو به شامل نه هوندا؟

تعليم اندر ٿيندڙ بدعنوانين ۾ پرائمري اسڪول کان وٺي سنڌ سيڪريٽريٽ تائين هڪ ڊگهي زنجير آهي، جنهن جون ڪڙيون سڄي سماج سان مليل آهن. گوسڙو ماسترن خلاف شروع ڪيل جدوجهد جو مقصد ئي اهو آهي ته هيٺ کان وٺي مٿي تائين بدعنوانين کي منظر تي آڻجي. اسين سڀ پنهنجي اندر ۾ جهاتي پائي ڏسون ته اسان سڀ ڪٿي نه ڪٿي سنڌ ۾ تعليم جي تباهيءَ جا ذميوار بڻجي رهيا آهيون ٻيو ته تعليم جي تباهي يا ڪرپشن خلاف آواز اُٿاريندڙ ڪجهه ماڻهن کي سماج ۾ ڪا وڏي پذيرائي ڪانه پئي ملي. پذيرائي نه ملڻ جا ٽي مقصد ٿي سگهن ٿا. هڪ اهو ته اسان جي سماج ۾ ڪرپشن ئي ڪونهي، ڪجهه مٿي ڦريل ماڻهو هروڀرو بڪواس پيا ڪن ۽ سرڪار کي بدنام پيا ڪن. ٻيو مقصد اهو ٿي سگهي ٿو ته اسان سڀ پنهنجي تعليم سان سچا ئي ناهيون. اسان ڳالهيون تمام گهڻيون ڪريون ٿا، لٻاڙون هڻون ٿا، اسان جون سياسي پارٽيون، اسان جا دانشور، اسان جي نام نهاد سول سوسائٽي، قوم پرست، محب وطن، سنڌ پرست، وطن دوست، مُلڪ جا خير خواهه سڀ جو سڀ سمجهن ٿا ته اسان جو تعليمي نظام ٺيڪ آهي ته پوءِ آواز ڇو اُٿاريون؟ ٽيون مقصد اهو ٿي سگهي ٿو ته اسان سڀ ان ڪرپشن جو حصو آهيون، جنهن کي حڪمرانن پنهنجي فائدي لاءِ وجود ۾ آندو، پر ان ڪرپشن جي رقم مان سڌي يا اڻ سڌي ريت اسان سڀ فيضياب ٿي رهيا آهيون. اسين سڀ پنهنجي اندر ۾ چور آهيون، ان ڪري ماٺ ڀلي سمجهي ماٺ ۾ ويٺا آهيون.

سنڌ کي حاڪمن هڪ ڪرپٽ سماج ۾ تبديل ڪري ڇڏيو آهي، جيڪو مڪمل طور تي حڪمرانن جي فائدي ۾ آهي. سندن لٽ مار کي اهڙي سماج ۾ فطري طور تحفظ ملي ويندو آهي. اهو هينئن ته هڪ سؤ رپئي جي ڪرپشن ۾ هڪ رپيو عوام کي به هڏيءَ جي صورت ۾ اڇلائي ڏجي، باقي نوانوي رپيا ڳڙڪائي ڇڏجن. هاڻي عوام جي نالي ڪرپشن جي هڪ رپئي جا وري اسان ڪيترائي ڀاڱي ڀائيوار آهيون، جن ۾ صحافي، ميڊيا، دانشور، اين جي اوز ۽ ننڍا سرڪاري ملازم شامل آهن، جيڪي هڪ رپئي خاطر نوانوي رپيا کائيندڙ حڪمرانن خلاف آواز اُٿارڻ لاءِ تيار نه هوندا آهن. اهڙي ريت سنڌي سماج مسلسل بدعنوان سماج بڻجي رهيو آهي.

ايئن ناهي ته ڪو باقي پاڪستان براين کان بچيل آهي، سڄو مُلڪي نظام ڪرپٽ آهي، پر سنڌ ۾ ڪرپشن جي شرح مسلسل وڌي رهي آهي. هر سرڪاري کاتو ڪرپٽ آهي. اُن ڪري سنڌ ۾ ڪرپشن ۽ بدعنوانين خلاف عوامي سطح تي جدوجهد ڪرڻ وقت جي اهم ضرورت آهي. ڇو ته تاريخ شاهد آهي ته جن به سماجن ۾ رشوت، بدعنواني، بداخلاقي ۽ ڪرپشن جي انتها ٿيندي آهي، اهي سماج ڏيوالپڻي جو شڪار ٿي ويندا آهن. سنڌ پاڪستان جو خوشحال خطو آهي پر اُن باوجود بُک، بدحالي، غربت، بيروزگاري، مايوسي مسلسل وڌي رهي آهي. ماڻهن جي رهڻي ڪهڻي، خريداري جي سگهه مسلسل گهٽ ٿي رهي آهي. جيڪڏهن ڪنهن جو ڀلو ٿي رهيو آهي ته اهو صرف ڪرپٽ حڪمران ٽولي جو، جيڪو امير کان امير بڻجي رهيو آهي. سڄي سنڌ ۾ اهڙا هڪ هزار ماڻهو ئي هوندا، جيڪي مال ميڙڻ لاءِ ڪروڙين سنڌين جي قسمتن ۾ زهر ڀري رهيا آهن، جيڪي پنهنجي ٻار کي غير مُلڪي تعليمي ادارن ۾ موڪلڻ لاءِ سڄي سنڌ جي تقدير جهالت سان لکي رهيا آهن. سنڌ جي هڪ وزير گذريل سال پنهنجي هڪ گرل فرينڊ جي سالگرهه تي کيس هڪ ڪروڙ رپين جي گاڏي سوکڙي ۾ ڏني. اها رقم سنڌ جي ڏتڙيل عوام جي ڪنهن ترقياتي اسڪيم جي هوندي. سڄو ڏينهن بُک بُک ڪندڙ اين جي اوز رُڳو سنڌ جي گذريل ڏهن سالن ۾ منظور ٿيل بجيٽ جا ڪاغذ ڏسن، اُنهن تي ڪا ريسرچ ڪن ته کين اندازو ٿي ويندو ته سنڌ جي ترقياتي اسڪيمن جا پئسا ڪٿي خرچ ٿين ٿا. ڪا هڪ به اهڙي بجيٽ تقرير ناهي جنهن تي پنجاهه سيڪڙو به عمل ٿيو هُجي. مان سنڌ سرڪار جي ذميوارن کي چئلينج ٿو ڪريان ته هو بجيٽ دستاويز کڻي اچن ته مان سندن آڏو ثابت ڪندس ته سنڌ ۾ ڪيترا پئسا ترقياتي اسڪيمن تي خرچ ٿيا آهن ۽ ڪيترا بدعنوانين جي نظر ٿيا آهن.

حيرت جي ڳالهه اها به آهي ته اسان جي ميڊيا، اخبارون، ٽي وي، دانشور، صحافي ڪرپشن جي واقعن تي خاموش ڇو آهن؟ تبديلي جي هام هڻندڙ سنڌ ۾ انتها تي پهچندڙ ڪرپشن تي ماٺ ڇو آهن؟ تبديلي جو بنيادي نقطو ئي ڪرپشن جو خاتمو آهي. سماج مان ڪرپشن جو خاتمو ٿيندو ته ترقي ٿيندي، ترقي ٿيندي ته عوام جو ڀلو ٿيندو. ميرٽ ۽ ايمانداري کي جڳهه ملندي، پر وقت جي بدعنواني خلاف آواز اُٿارڻ سان ظاهر آهي ته وقت جي حاڪمن سان سڌي ريت ٽڪر کائڻو پوندو ۽ سڌي ريت ٽڪر کائڻ کان پوءِ حڪمران اوهان کي به اهوئي طعنو ته هڻندا نه، ته اوهان به ان ڪرپشن جو حصو آهيو. بلڪل اوهان ۽ اسان سڀ ان هڪ رپئي جي ڪرپشن ۾ شامل آهيون، جيڪو حاڪم اسان کي کارائي، نوانوي رپين جي بدعنواني ڪئي.

سو اڄ اسان سڀني کي سنڌ ۾ بدعنواني خلاف گڏيل آواز اُٿارڻ جي ضرورت آهي. سڄي سماج کي ڪرپٽ سماج بڻجڻ کان بچائڻ لاءِ اچو ته پنهنجو پنهنجو فرض نڀايون.

 

باهمت ڪردار ؛مختيار علي وڪو

هونئن ته سڄي سنڌ ۾ امن امان جي حوالي سان صورتحال تمام گهڻي خراب آهي. پر حيدرآباد سنڌ جو ٻيو نمبر وڏو شهر آهي، جنهن جي صورتحال امن امان جي حوالي سان تمام گهڻي خراب ٿيندي پئي وئي. ڦرن، چورين، گهرن مان ڦرلٽ،  ڀتاخوري، ڏينهون ڏينهن ايتري قدر وڌندي وئي هئي جو ماڻهو پنهنجن  گهرن ۾ به محفوظ نه هئا، روزانو 15 کان 16 ڦرن ۽ ڌاڙن جون وارداتون ٿينديون رهنديون هيون، انهن ڦرن ۽ ڌاڙن دوران 3 کان 4 ماڻهو ڦورن سان مزاحمت ڪرڻ تي مارجي پڻ ويندا هئا. اها ته حيدرآباد شهر جي شهر وارن علائقن جي حالت هئي پر حيدرآباد ضلعي جي ٻهراڙين وارن علائقن جي به حالت ساڳي هئي، اتي به سج لهڻ شرط يا ڏينهن جو منجهند جي وقت ٻهراڙين جي لنڪ روڊن تي ڏوهاري ايندڙ ويندڙ غريب مسڪين ماڻهن کان موٽر سائيڪلون ۽ پئسا سرعام بنا ڪنهن ڊپ ڊاءَ جي ڦريندا رهندا هئا ۽ اهو سلسلو روزاني جاري هوندو هو، پر پوليس رڳو جاءِ واردات تي پهچندي هئي، بس پوءِ ٻن يا ٽن ڪلاڪن کان پوءِ اهو مسئلو لئه مٽي ٿي ويندو هو. ان کان علاوه رات جو وري چور پنهنجي ٻرن مان ٻاهر نڪري ايندا هئا ۽ ٻهراڙين جي غريب مسڪين ماڻهن جي ڳوٺن جو رُخ ڪندا هئا ۽ هٿيارن جي زور تي انهن غريب مسڪين ماڻهن جي گهرن ۾ گهڙي انهن جو پنهنجن ٻچن جي گذر سفر جي لاءِ پاليل چوپايو مال ڪاهي ويندا هئا پر پوليس انهن غريب مسڪين ماڻهن جي چوري واپس ڪرائڻ بدران انهن ئي غريب مسڪين ماڻهن کان نامعلوم چورن خلاف رڳو اين سي داخل ڪرائڻ جا به پئسا وٺي، انهن کي اهو جواب ڏئي ڇڏيندي هئي ته بس هاڻي توهان وڃو، اسان چورن کي ڳوليون ٿا. پر انهن چورن کي پوليس ڳولڻ بدران ٿاڻي کان ٻاهر نه نڪرندي هئي. ڏوهارين حيدرآباد ضلعي ۾ پنهنجا ديرا ڄمائي ورتا هئا. پر پوليس طرفان انهن تي ڪوبه اهڙو شديد ردعمل نه ٿي رهيو هو.  جنهن جي ڪري ڏوهاري بنا ڪنهن ڊپ ۽ ڊاءَ جي سرعام روڊن رستن تان ۽ گهرن مان هٿيارن جي زور تي غريب ماڻهن کان لکين روپيا ڦريندا رهندا هئا. ڪيترائي پوليس آفيسر حيدرآباد ضلعي ۾ آيا ۽ ويا پر ڪنهن به پوليس آفيسر حيدرآباد ضلعي کي ڪرائيم کان پاڪ نه ڪيو. گذريل 2 مهينن کان حيدرآباد ضلعي ۾ آيل هڪ نوجوان ايس ايس پي عرفان بلوچ کي جيئن ئي حيدرآباد ضلعي جي ايس ايس پي جي چارج ملي ته هُن نوجوان ايس ايس پي اچڻ سان ئي ڏوهارين خلاف سخت قسم جو آپريشن شروع ڪيو. جنهن جي نتيجي ۾ هن ڪيترن ئي ڏوهارين جي ٺڪاڻن تي ڇاپا هنيا ۽ ڪيترائي ڏوهاري گرفتار ڪيا.  انهن ڏوهارين خلاف هڪ سزا پڻ مقرر ڪئي وئي آهي، جيڪا سزا ڏوهارين کي گوڏن ۾ گوليون هڻي زخمي ڪرڻ آهي. ان سزا کي اڪثر پوليس آفيسر هڪ محاوري طور پڻ استعمال ڪن ٿا ته اڄ جيڪي ڏوهاري پڪڙيا آهن، اهي جلد هاف فرائي ٿيندا. ان کان علاوه هن ڪيترن ئي بدنام ڏوهارين سان مقابلا پڻ ڪيا، جيڪي ڏوهاري عوام مٿان عذاب بڻيل هئا. ڪيترائي ڏوهاري پوليس مقابلن ۾ مارجي پڻ ويا آهن. اهڙين ڪاررواين کانپوءِ حيدرآباد ضلعي مان ڏوهارين جو 95 سيڪڙو خاتمو اچي ويو آهي. عرفان بلوچ حيدرآباد ضلعي ۾ امن امان قائم ڪرايو آهي ته وري حيدرآباد ضلعي جي شهرين ۽ واپارين به کيس بهترين موٽ ڏني آهي. جنهن جو مثال اهو آهي ته حيدرآباد ضلعي ۾ هر جڳهه تي سندس بينر لڳايا ويا آهن ۽ انهن بينرن تي اهو لکيو ويو آهي ته اسان حيدرآباد جي شير ايس ايس پي عرفان بلوچ کي حيدرآباد ضلعي ۾ امن امان قائم ڪرائڻ تي ڀليڪار چئون ٿا. ان کان علاوه ايس ايس پي عرفان بلوچ جو آپريشن رڳو ڏوهارين خلاف نه آهي پر  حيدرآباد ضلعي ۾ ڀتاخورن ۽ منشيات فروشن خلاف پڻ سخت ڪارروائي شامل آهي. جنهن جي ڪري حيدرآباد ضلعي مان ڀتاخوري پڻ 75 سيڪڙو گهٽجي وئي آهي ۽ ڪافي ڪاروباري ماڻهو، فيڪٽرين جا مالڪ پڻ هن ايس ايس پي مان تمام گهڻو خوش آهن. ايس ايس عرفان بلوچ جي اهم ڳالهه اها پڻ آهي ته هو هر ماڻهو جي فون پڻ اٽينڊ ڪري ٿو پوءِ ڇو نه اهو غريب، مسڪين، پورهيت ماڻهو هجي.  ڀلي ڪير به هجي پر هي آفيسر ان جو جائز مسئلو هر حال ۾ حل ڪرڻ جي ڪوشش ڪري ٿو. سندس کاتي جي ماڻهن جا پروموشن ۽ ٻيا مسئلا حل ٿيندا رهن ٿا. انهن ۾ پوليس خلاف شڪايتن جو ازالو پڻ ٿئي ٿو.  حيدرآباد جو ڊي آءِ جي ثناءَ الله عباسي پڻ هڪ ايماندار آفيسر آهي، جنهن جو پڻ هن  ايس ايس پي  سان تمام گهڻو تعاون شامل آهي.  هونئن به چوڻي آهي ته هڪ هٿ سان تاڙي نه وڄندي آهي. اهڙي نموني ڪارروايون  اڪيلو ايس ايس پي شايد نه ڪري سگهي ها. جهڙي نموني ثناءَ الله عباسي جي سهاري هجڻ سبب هو ڪري سگهيو آهي. حيدرآباد جي شهرين جو اهو به چوڻ آهي ته ايس ايس پي عرفان بلوچ کي گهٽ ۾ گهٽ 2 سال حيدرآباد ضلعي ۾ ڏنا وڃن ته جيئن هو ڏوهارين ۽ ڀتاخورن جو حيدرآباد ضلعي مان مڪمل خاتمو آڻي سگهي. حيدرآباد ضلعي جي ايس ايس پي عرفان بلوچ جي ڏوهارين خلاف ڪارروائي کانپوءِ خيرپور ضلعي ۾ اي ايس پي مسعود بنگش به ڏوهارين خلاف سخت ڪاروائي ڪئي آهي، جنهن کي سياسي مداخلت سبب هٽايو ويو هو. پر شهرين پاران ايس ايس پي  جي بدلي روڪرائڻ جي لاءِ مسلسل 3 ڏينهن شهر ۾ هڙتال ڪئي وئي ۽ شهر بند ڪرايو ويو. وزيراعليٰ سنڌ خيرپور پهچڻ تي شهرين پاران ان جو گهيراءُ  ڪري اي ايس پي مسعود بنگش جي بدلي روڪرائڻ جو مطالبو ڪيو ويو.  جنهن کان پوءِ و زيراعليٰ سنڌ پڻ بدلي روڪرائڻ جو حڪم ڏنو ۽ آءِ جي سنڌ غلام حيدر جمالي  خيرپور ۾ وساڻ هائوس پهتو،  جتي  اي ايس پي خيرپور جي بدلي روڪي وئي. سنڌ حڪومت  کي گهرجي ته سنڌ پوليس مان سياسي مداخلت فوري طور تي ختم ڪري ته جيئن امن امان قائم ٿي سگهي.