تازيون خبرون

Daily Archives: February 27, 2015

ڪراچي ۾ امن امان لاءِ آپريشن کي منطقي انجام تائين پهچائينداسين: وزيراعظم

ڪراچي(اسٽاف رپورٽر)وزيراعظم نواز شريف چيو آهي ته ڪراچي ۾ امن امان لاءِ آپريشن کي منطقي انجام تائين پهچائينداسين، ڪراچي ۾ نائين پاڪستان ايڪسپو نمائش جي افتتاحي تقريب کي خطاب دوران وزيراعظم جو چوڻ هو ته ملڪ جي معاشي ترقي اسان جي پهرين ترجيح آهي پاڪستان هڪ اڀرندڙ معاشي طاقت آهي اسان کي خطي ۾ معاشي سرگرمين جو مقابلو ڪرڻ لاءِ وڌيڪ توجهه جي ضرورت آهي يورپي يونين طرفان جي ايس پي پلس پاڪستان جي وڏي ڪاميابي آهي پاڪستان جي برآمدات 25 ارب جي لڳل ڀڳ آهي جنهن کي ايندڙ 3 سالن ۾ 50 ارب ڊالر تائين آندو ويندو، هن چيو ته حڪومت توانائي جي بحران تي قابو آڻڻ لاءِ به ڀرپور قدم کڻي رهي آهي، حڪومت ان سلسلي ۾ ايندڙ 25 سالن کي نظر ۾ رکندي منصوبابندي ڪئي آهي، پاڪستان ايندڙ 3 سالن ۾ بجلي جي بحران تي قابو ڪري وٺندو، وزيراعظم جو چوڻ هو ته حڪومت جا ڏيڍ سال مسئلن تي قابو آڻڻ ۾ گذريا آهن، ان سلسلي ۾ اسان ٺوس فيصلا ڪيا آهن جن ۾ آپريشن ضرب عضب به شامل آهي، ڪراچي ۾ امن امان لاءِ تمام گهڻو اڳ فيصلو ڪرڻ گهرجن ها ڪراچي سان ان جون تمام گهڻيون سٺيون يادون جڙيل آهن ڏيڍ سال اڳ ڪراچي ۾ امن امان جي صورتحال انتهائي خراب هئي، حڪومت سمورين سياسي پارٽين کي اعتماد ۾ وٺي آپريشن جو فيصلو ڪيو جنهن سبب هاڻ صورتحال تمام بهتر آهي ۽ آئنده ان ۾ وڌيڪ بهتري ايندي شهر ۾ مان لاءِ آپريشن کي منطقي انجام تائين پهچائينداسين 2018ع تائين ڪراچي هڪ پرامن شهري بڻجي ويندو.

 

لائين آف ڪنٽرول تي بنا جواز جي فائرنگ جو منهن ٽوڙ جواب ڏنو ويندو: آرمي چيف

سيالڪوٽ (مانيٽرنگ ڊيسڪ) آرمي چيف جنرل راحيل شريف چيو آهي ته لائين آف ڪنٽرول تي بنا جواز جي فائرنگ جو منهن ٽوڙ جواب ڏنو ويندو. هن اهڙو اظهار سيالڪوٽ بائونڊري جي دوري دوران ڪيو. ان موقعي تي هن فوجي جوانن سان ملاقات ڪئي. هن چيو ته ملڪي مفاد لاءِ متحد ۽ پرعزم آهيون. هن چيو ته ڀارتي فوج جي فائرنگ جو مقصد دهشتگردنخلاف آپريشن تان ڌيان هٽائڻ آهي. فوج جي سربراهه چيو ته ايل او سي تي مسلسل ڀڃڪڙي سبب علائقي ۾ ڇڪتاڻ ۾ اضافو ٿيو آهي.

 

ڪراچي سميت پوري سنڌ ۾ صاف سرسبز سنڌ، پرامن سنڌ جي مهم هڪ سال تائين جاري رهندي:شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته ڪراچي سميت پوري سنڌ ۾ صاف سرسبز سنڌ، پرامن سنڌ جي مهم هڪ هفتو نه بلڪ هڪ سال تائين جاري رهندي ۽ ان مهم جي تحت صوبي جي هر گهٽي ۽ پاڙي تائين صفائي کي يقيني بڻايو ويندو. سمورن ضلعن ۾ ڪمشنرز، ڊپٽي ڪمشنرز ۽ ميونسپل آفيسرن جي مانيٽرنگ ڪميٽيون جوڙيون ويون آهن، جڏهن ته ڪراچي ۾ ڪي ايم سي جي هيلپ لائن 1339 کي فعال ڪيو ويو آهي، جتي عوام پنهنجون شڪايتون داخل ڪرائي ۽ ان کان پنهنجو شڪايتي نمبر حاصل ڪري. صوبي ۾ امن جي قيام ۾ ڪجهه حد تائين هتان جي ماحول کي درست نه ٿيڻ جو به حصو آهي ان لاءِ اسان هن صوبي کي صاف ۽ شفاف، سرسبز ۽ پرامن ماحول جي ذريعي امن جو گهوارو بڻائي سگهون ٿا. منهنجي خواهش آهي ته سمورن ننڍن ۽ وڏن پارڪن ۾ قانون مطابق فوڊ ڪارنرز ۽ اسٽريٽ قائم ڪئي وڃي ۽ وڏن وڏن پارڪن ۽ تفريحي هنڌن تي سيمينا گهر تعمير ٿين ته جيئن عوام ۽ خاص ڪري نوجوان نسل کي تفريح جا موقعا ميسر ٿي سگهن. ميڊيڪيم نالي خانگي ڪمپني پاران ٽريفڪ جي نظام کي بهتر بڻائڻ لاءِ اڄ جنهن مهم جي شروعات ڪئي آهي ان کان پوءِ آئون انهن سمورن مستحڪم ڪمپنين کي به گذارش ڪندس ته هو به اڳتي اچن ۽ هن صوبي کي صاف سٿرو بنائڻ ۾ پنهنجو ڪردار ادا ڪن. ڪي ايم سي جي زير انتظام هلندڙ سمورن اسڪولن جي خراب حالت جو سروي ڪرايو پيو وڃي ۽ انهن کي سموريون سهولتون ڏيارڻ لاءِ ڀرپور قدم کنيا ويندا. هو خميس تي صاف سرسبز سنڌ، پرامن سنڌ جي چوٿين ڏينهن آئي آئي چندريگر روڊ تي خانگي ڪمپني ميڊيڪيم پاران رستن تي زيبره ڪراسنگ ۽ ٽريفڪ مينيجمينٽ لاءِ شروع ڪيل مهم جي افتتاح، هل پارڪ ڪراچي ۾ وڻڪاري ۽ صفائي مهم جي شروعات ۽ بعد ۾ سنڌي مسلم هائوسنگ سوسائٽي ۾ ڪي ايم سي جي زير انتظام هلندڙ اسڪولن جي دوري جي موقعي تي ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ميٽروپوليٽن ڪمشنر مسعود عالم، ايم ڊي واٽر بورڊ قطب الدين شيخ، ڊي جي پارڪس نياز احمد سومرو، ايدمنسٽريٽر سائوٿ افضل زيدي، محمد رئيسي ، محمد عاصم کان علاوه ٻيا اعليٰ آفيسر  به ساڻس گڏ هئا. شرجيل انعام ميمڻ ڪمشنر سان گڏ آئي آئي چندريگر روڊ تي خانگي ڪمپني جي تعاون سان ٽريفڪ مينيجمينٽ پلان تحت رستن تي ٽريفڪ جي رواني کي برقرار رکڻ ۽ پنڌ هلندڙ عوام لاءِ زيبره ڪراسنگ بڻائڻ واري مهم جو افتتاح ڪيو. ان موقعي تي ميڊيا سان ڳالهائيندي هن چيو ته اڄ اسان کي ان ڳالهه جي خوشي آهي ته اسان جي مهم ۾ خانگي ڪمپنيون به ڀرپور حصو وٺڻ شروع ڪري ڇڏيو آهي. هن چيو ته مون مهم جي شروعات واري ڏينهن ئي سول سوسائٽي، سياسي ۽ مذهبي جماعتن، شاگردن ۽ عوام کي اپيل ڪئي هئي ته هو هن مهم کي پاڻ اوون ڪن ۽ هن شهر ۽ صوبي کي مثالي ۽ سرسبز صوبو بڻائڻ ۾ پنهنجو ڪردار ادا ڪن ۽ اڄ مونکي ان ڳالهه جي خوشي آهي ته عوام نه صرف ان مهم کي اوون ڪرڻ ڪرڻ شروع ڪيو آهي بلڪ عملي طور تي ميدان ۾ نڪري آيو آهي. جنهن کان پوءِ هاڻ هن صوبي کي سرسبز ۽ پرامن بڻجڻ کان ڪير به روڪي نٿو سگهي. هن چيو ته ٻين مستحڪم ڪمپنين ۽ شخصيتن کي به هن مهم ۾ شرڪت جي دعوت ڏيان ٿو ته هو جيڪڏهن ڪا گهٽي يا رستي کي پنهنجي بلي وٺي اتي صفائي سٿرائي کي پنهنجي هٿن ۾ وٺن ته اسان انهن کي ڏيڻ لاءِ تيار آهيون. هڪ سوال جي جواب ۾ شرجيل ميمڻ چيو ته چار ڏينهن کان هن مهم ۾ پاڻ رستن تي موجود آهيان مون سان گڏ ڪمشنر ڪراچي ۽ سمورا اعليٰ آفيسر به رستن تي آهن ان جي باوجود آئون اها دعويٰ نٿو ڪريان ته 100 سيڪڙو ڪجهه ٺيڪ ٿي ويو آهي البته اهو ضرور چوندس ته انهن چئن ڏينهن ۾ صفائي سٿرائي ۾ گهڻي حد تائين فرق ٿيو آهي. هن چيو ته جيستائين هن صوبي کي قبضن گند ڪچري کان پاڪ ۽ صاف سٿرو صوو نٿو بڻايان ايستائين سک سان نه ويهندس. هن چيو ته اهو تاثر بلڪل غلط آهي ته قبضن جي خاتمي ۾ ڪنهن قسم جو ڪو سياسي دٻاءُ آهي. آئون ان کان اڳ به ۽ اڄ به ميڊيا جي موجودگي ۾ پنهنجن آفيسرن کي هدايت ڏيان ٿو ته هو ڪنهن قسم جو ڪوبه سياسي دٻاءُ قبول نه ڪن ۽ جيڪڏهن ان سلسلي ۾ منهنجو نالو به استعمال ڪري ته سڀ کان پهرين ان قبضي کي ختم ڪيو وڃي. هن چيو ته گذريل ڏينهن به سموري گرين بيلٽ، فٽ پاٿ، رفاهي پلاٽس تي قبضا قائم ڪندڙن کي وارننگ ڏني هئي ته هو ازخود پنهنجا قبضا هٽائين جيڪڏهن اسان ڪارروائي ڪئي ته انهن جي دڪانن کي سيل به ڪنداسين ۽ انهن کي ڪيسن کي به منهن ڏيڻو پوندو. هڪ سوال جي جواب ۾ شرجيل ميمڻ چيو ته لياري هجي يا سنڌ جي ڪنهن به ننڍي ڳوٺ جي گهٽي هجي آئون اتان جو دورو ڪندس ۽ جيڪڏهن مونکي ڪنهن به هنڌ ڪا ڪوتاهي نظر آئي ته لاڳاپيل آفيسر کي نه ڇڏيندس. ان کان پوءِ هن هل پارڪ ۾ صفائي مهم ۽ ٻوٽو لڳائي وڻڪاري مهم ۾ حصو ورتو ۽ هل پارڪ جو دورو ڪيو. ان موقعي تي هن هل پارڪ جي آسپاس سرڪاري زمينن تي ٺهيل بنگلن جو سختي سان نوٽيس وٺندي ميٽروپوليٽن ڪمشنر کي هدايتون ڏنيون ته فوري طور تي هل پارڪ جو ماسٽر پلان ڪڍي اتي جي زمينن تي قائم قبضن کي ختم ڪري کيس رپورٽ ڪري. ان موقعي تي ميڊيا سان ڳالهائيندي هن چيو ته منهنجي خواهش آهي ته هل پارڪ ۽ ان جهڙن ٻين تفريحي هنڌن تي پبلڪ پرائيويٽ پارٽنرشپ تحت سٺا سينيما گهر ۽ ملٽي نيشنل ڪمپنيون فوڊ ڪارنرز تعمير ڪيا وڃن، جڏهن  ته ان لاءِ قانون کي ڏسڻو پوندو ۽ قانون اجازت ڏي ته سمورن قانوني تقاضائن کي پورو ڪري هتي اهي سهولتون فراهم ڪري سگهجن ٿيون. هن چيو ته هن وقت اسان جنهن دهشتگردي کي منهن ڏئي رهيا آهيون ۽ جهڙي طرح اسان جو نوجوان نسل ان جي ور چڙهي رهيو آهي ضروري آهي ته نوجوان نسل کي سٺي ۽ بهتر تفريحي سهولتون فراهم ڪيون وڃن. ان موقعي تي ميڊيا پاران مختلف پارڪن ۾ سياسي جماعتن ۽ آفيسرن جي نشاندهي ته هن چيو ته ان سلسلي ۾ هو پهريان ئي اها هدايت جاري ڪري چڪو آهي ته بغير ڪنهن فرق جي ڪارروائي ڪئي وڃڇي ۽ ڪنهن به سياسي دٻاءُ ۾ نه اچڻ گهرجي. شيشه پالر ۽ ٻين ممنوعه شين جي استعمال جي شڪايتن تي هن موقعي تي موجود ڊي سي ايسٽ کي حڪم ڏنا ته هو فوري طور تي اهڙن سمورن مرڪزن کي سيل ڪري ۽ انهن خلاف ڪيس داخل ڪرائي. صوبائي وزير اوچتو سنڌي مسلم هائوسنگ سوسائٽي ۾ قائم گورنمينٽ بوائز اينڊ گرلز پرائمري اينڊ سيڪنڊري اسڪول جي دوري تي پهچي ويو ۽ هن اتي هڪ هڪ ڪلاس ۾ وڃي پڙهائي سميت ٻين انتظامن جو جائزو ورتو. ان موقعي تي هن ڪلاس روم ۾ لائٽس ۽ پکن جي کوٽ جي شڪايتن تي ڊائريڪٽر ايجوڪيشن جي سرزرش ڪئي ۽ فوري طور تي ڪي ايم سي جي زير انتظام هيٺ هلندڙ اسڪولن جي خراب هحالت ۽ اتي جي مسئلن جي رپورٽ طلب ڪئي. ان موقعي تي هن اسڪول جي پرنسپل کي پنهنجي کيسي مان روڪ رقم ڏني ۽ تاڪيد ڪئي ته فوري طور تي ڪلاس رومن ۾ لائٽس ۽ پکن جو انتظام ڪيو وڃي ۽ هو ڪنهن ڏينهن به واپس اچي انهن سمورين شين کي مانيٽر ڪندو. هن ان موقعي تي ميونسپل ڪمشنر ۽ بلديات کاتي جي ايجوڪيشن کاتي جي لاڳاپيل آفيسرن کي سختي سامن هدايتون ڪئي ته هو ڪي ايم سي جي زير انتظام هلندڙ اسڪولن کي مڪمل طور تي صاف سٿرو بنائي ۽ اتي پيش ايندڙ مسئلن جي خاتمي لاءِ قدم ڪري ان جي رپورٽ هڪ هفتي اندر اندر موڪلي وڃي. هن چيو ته هو صاف سرسبز سنڌ، پرامن سنڌ مهم جو دائرو صرف صفائي سٿرائي ۽ وڻڪاري تائين نه اهي بل ادارن ۾ ڪرپشن ۽ گوسڙو ملازمن جي خاتمي تائين وسيع ڪندو ۽ بلديات کاتي جي زير انتظام هلندڙ اسڪولن، اسپتالن ۽ ڊسپينسرين کي به ماڊل بڻائي ساهه کڻندو. ان موقعي تي صوبائي وزير پاران ازخود سمورين شين جي مانيٽرنگ تي اتي موجود عوام ان جي ڪاوشن کي ساراهيو ۽ ڪيترن هنڌن تي عوام پاران صوبائي وزير کي شڪايتون ڪيون ويون، جنهن جو هن فوري طور نوٽيس وٺندي لاڳاپيل آفيسرن کي 24 ڪلاڪن اندر اندر انهن شڪايتن جي ازالي جي هدايت ڪئي.

 

ڪراچي جي گلشن اقبال واري علائقي ۾ باهه لڳڻ سبب 200 جهوپڙيون سڙي ويون

ڪراچي(اسٽاف رپورٽر): ڪراچي جي علائقي گلشن اقبال ۾ باهه لڳڻ سبب 200 کان وڌيڪ جهوپڙيون سڙي ويون فائر برگيڊ باهه تي قابو آڻي ورتو آهي، گلشن اقبال ۾ ايڪسپو سينٽر ويجهو جوپڙين ۾ اوچتو باهه لڳي وئي جنهن سبب جهوپڙين ۾ موجود سامان ۽ چوپايو مال به سڙي ويو، ماڻهن پنهنجي مدد پاڻ تحت باهه وسائڻ جي ڪوشش ڪئي جڏهن ته شهر ۾ وي آءِ پي موومينٽ سبب فائر برگيڊ جون گاڏيون دير سان پهتيون، باهه لڳڻ سبب ڪوبه جاني نقصان نه ٿيو، فائر برگيڊ جي 7 گاڏين هڪ ڪلاڪ ۾ باهه تي قابو آڻي ورتو.

 

بينظير جي قتل ۾ دارالعلوم حقانيه اڪوڙه خٽڪ جو شاگرد ملوث هو: سرڪاري شاهد

راولپنڊي(بيورو)دهشتگردي جي خاص عدالت جي جج پرويز اسماعيل جوئيه اڳوڻي وزيراعظم بينظير ڀٽو جي قتل ڪيس ۾ وڌيڪ 2 شاهد ايف آءِ اي جي انسپيڪٽر نصير علي خان ۽ سب انسپيڪٽر محمد عدنان جا بيان رڪارڊ ڪري ورتا، دهشتگردي جي خاص عدالت ۾ ايف آءِ اي جي انسپيڪٽر نصير احمد پنهنجو بيان رڪارڊ ڪرائيندي ٻڌايو ته اڳوڻي وزيراعظم جي قتل ڪيس ۾ گرفتار ۽ ملوث سمورا جوابدار مدرسه دارالعلوم حقانيه اڪوڙه خٽڪ جا شاگرد هئا سڀئي گڏجي پڙهندا رهيا، انهن ۾خودڪش بمبار عبدالله عف صدام، نادر عرف قاري اسماعيل، رشيد احمد عرف ترابي، فيض محمد ڪسڪٽ شامل آهن، نصير احمد ٻتايو ته انهن چئن جو انهن مدرسي وڃي رڪارڊ چيڪ ڪيو ۽ ان رڪارڊ جي نقل به عدالت ۾ پيش ڪري ڇڏي انهن چئن ئي جوابدارن جي مدرسي ۾ رجسٽرين نمبر 18642، 17816، 21716 ۽ 23629 هئي، سمورا جوابدار ڊي آءِ جي سعود عزيز، ايس پي خرم شهزاد، اعتزاز شاهه، شير زمان، رفاقت، حسنين ۽ عبدالرشيد به عدالت ۾ موجود هئا، انهن شاهدن تي جرح به مڪمل ڪرڻ کانپوءِ عدالت ٻڌڻي هڪ ڏينهن لاءِ ملتوي ڪندي وڌيڪ 5 شاهدن کي طلب ڪري ورتو آهي.

 

پرويز مشرف خلاف غداري ڪيس هلائيندڙ خاص عدالت کي ڪم کان روڪڻ وارو حڪم سپريم ڪورٽ ۾ چيلينج

اسلام آباد (بيورو) پرويز مشرف خلاف سنگين غداري ڪيس هلائيندڙ خاص عدالت کي ڪم کان روڪڻ وارو حڪم سپريم ڪورٽ ۾ چيلينج ڪيو ويو آهي، درخواست ۾ موقف اختيار ڪيو ويو آهي ته اسلام آباد هاءِ ڪورٽ وٽ خاص عدالت کي ڪم کان روڪڻ جو اختيار ناهي.  اسلام آباد هاءِ ڪورٽ پاران، خاص عدالت کي ڪم کان روڪڻ واري حڪم خلاف سپريم ڪورٽ ۾ درخواست داخل ڪرائي وئي. درخواستگذار موقف اختيار ڪيو ته خاص عدالت، پرويز مشرف خلاف ٽرائل ڪرڻ لاءِ قائم ڪئي وئي آهي،خاص عدالت جي غير معمولي ڪارروائي کي معطل نٿو ڪري سگهجي. درخواستگذار موقف اختيار ڪيو ته اسلام آباد هاءِ ڪورٽ وٽ اهو اختيار ناهي ته خاص عدالت کي ڪم کان روڪڻ جو حڪم جاري ڪري. اعليٰ عدالت کي استدعا ڪئي وئي ته اسلام آباد هاءِ ڪورٽ جو حڪم معطل ڪري خاص عدالت کي ڪم جاري رکڻ جو حڪم جاري ڪيو وڃي.  واضح رهي ته اسلام آباد هاءِ ڪورٽ پاران خاص عدالت کي ڪم کان روڪڻ جو حڪم جاري ٿيل آهي.

 

عبيره قتل ڪيس، اسلام پوره جو ڊي ايس پي مهر ممتاز جاچ ڪندو

لاهور(م ڊ)لاهور ۾ ماڊل گرل عبيره جي موت وارو معاملو اڃان تائين حل ناهي ٿي سگهيو مقتولا جي لاش جو 12 ڏينهن تائين پوسٽ مارٽم ئي نه ڪيو ويو ماڊلنگ جو شوق رکندڙ 22 سالا مقتولا عبيره جي لاش جو پوسٽ مارٽم 12 ڏينهن تائين نه ڪيو يوو سستي هئي يا ڪو ٻيو سبب جاچ ۾ دير جو سبب ضرور بڻجيويو ايس ايس پي انويسيگيشن راڻا اياز سليم جاچ آفيسر محمد جاويد ۽ انچارج اڪمل کي معطل ڪري ڇڏيو ڪيس جي جاچ هاڻ ڊي ايس پي رينڪ جو آفيسر ڪندو، هاڻ هي جاچ اسلام پوره جو ڊي ايس پي مهر ممتاز ڪندو ڪيس جي ڪاپي ان جي حوالي ڪئي وئي آهي عبيره جي لاش جي قبر ڪشائي جو اڃان فيصلو سامهون ناهي آيو لاش کي ايڌي طرفان مياڻي صاحب قبرستان ۾ دفن ڪيو ويو هو.

 

سڄي ملڪ ۾ 3 کان وڌيڪ موبائل سِمن جي بائيو ميٽرڪ جي تصديق لاءِ ڏنل ڊيڊلائين ختم

اسلام آباد (بيورو) سڄي ملڪ ۾ 3 کان وڌيڪ موبائل سِمن جي بائيو ميٽرڪ جــِي تصديق لاءِ ڏنل ڊيڊلائين اڄ ختم ٿي رهي آهي. 26فيبروري کانپوءِ 14 اپريل تائين هڪ قومي سڃاڻپ ڪارڊ تي رڳو ٻن سمن جي تصديق ڪرائي سگهبي. پاڪستان ٽيلي ڪميونيڪيشن اٿارٽي جي ذريعن موجب پاڪستان ۾ استعمال ٿيندڙ 10 ڪروڙ 30 لک سمن مان هن وقت تائين رڳو پنج ڪروڙ 80 لک سمن جي تصديق مڪمل ٿي سگهي آهي. موبائيل ڪمپنين بائيو ميٽرڪ سسٽم ذريعي 4 ڪروڙ 40 لک سڃاڻپ ڪارڊن تي 5 ڪروڙ 80 لک سمن جي تصديق مڪمل ڪئي، جڏهن ته 70 لک سمن کي بند ڪيو ويو آهي

 

جيڪب آباد پوليس پاران ڏوهارين خلاف سرچ آپريشن، گهربل ڏوهاري نه ملڻ تي عيوضي ۾ 3 عورتون گرفتار

جيڪب آباد(رپورٽر)جيڪب آباد ۾ گذريل ڏينهن جيڪب آباد جي مخلتف ٿاڻن صدر، سٽي، سول لائين، ائيرپورٽ ۽ سي آءِ اي پوليس سميت مخلتف ٿاڻن جي پوليس اٽالن شهر ۾ ڦر ۽ چوري ڪندڙ ڏوهارين جي گرفتاري لاءِ جيڪب آباد ۽ شڪارپور ضلعي جي مختلف علائقن تي چڙهائي ڪئي وئي پوليس ذريعن وٽان مليل ڄاڻ موجب ته شهر ۾ وڌندڙ بدامني کي روڪڻ لاءِ ايس ايس پي پاران ڏوهارين خلاف ڪاروائي تيز ڪرڻ جو حڪم ڏنو ويو آهي جنهن سلسلي ۾ ڪالهه جاڳڻ جي علائقي ميرا شاخ لڳ هڪ ڳوٺ تي چڙهائي ڪئي جتي گهربل جوابدار نه ملڻ تي مارفاڻي قبيلي سان تعلق رکندڙ ٽن عورتن 50 ورهين جي مسمات ليلا، 28 ورهين جي مسمات مومل ۽ 32 ورهين جي مائي ڀائتي کي گرفتار ڪري سي آءِ اي سينٽر تي رکيو ويو آهي پوليس کي گهربل جوابدار پيش نه پوڻ تائين عورتون پوليس تحويل ۾ رکيون وينديون. هوڏانهن سي آءِ اي پوليس سميت مخلتف ٿاڻن جي پوليس سان رابطو ڪرڻ تي پوليس عورتن جي گرفتاري واري معاملي کان لاتعلقي جو اظهار ڪري ڇڏيو ۽ تفصيل ٻڌائڻ کان انڪار ڪري ڇڏيو.

 

سکر ويجهو ڪڪڙن جي ميل تي رينجرز جي چڙهائي، فائرنگ ۾ هڪ ڄڻو مارجي ويو، 2 زخمي

سکر(رپورٽر)ڪنڌرا ويجھو روشن آباد ۾ ڪڪڙن جي ميل تي رينجرز جي چڙهائي، فائرنگ ۾ هڪ ڄڻو مارجي ۽ 2 ڄڻا زخمي ٿي پيا. ڪنڌرا ويجھو ررشن آباد ۾ درگاھ حسين شاھ شهيد تي رينجرز چڙهائي ڪري گرفتاريون ڪرڻ جي ڪوشش ڪئي ته هٿياربندن مزاحمت ڪندي فائرنگ ڪري ڏني. رينجرز ۽ هٿياربندن ۾ اڌ ڪلاڪ تائين فائرنگ جي ڏي وٺ ٿي، جنهن جي نتيجي ۾ جاويد پٽ مهيوال جانوري مارجي ويو. جڏهن ته لال ڏنوپٽ محمد سليمان جانوري ۽ ظفرعلي عرف ظفرو جانوري زخمي ٿي پيا. زخمين کي علاج لاءِ سکر سول اسپتال آندو ويو. اتان لاش جو پوسٽ مارٽم ڪرائڻ بعد وارثن حوالي ڪيو ويو. ٻئي پاسي رينجرز اختيارين جو چوڻ آهي ته، ڳوٺ علي شير جانوري ويجھو ڏوهارين جي مو جودگي جي اطلاع تي رينجرز ڇاپو هنيو ته هٿياربندن سان مقابلو ٿي پيو. جنهن ۾ هڪ ڄڻو مارجي ۽ 2 ڄڻا زخمي ٿي پيا. رينجرز موجب مارجي ويل جاويد جانوري ۽ زخمي ٿيلن لال ڏنو ۽ ظفرعلي جانوري تي ڌار ڌار قتل ڪيس سميت 2 ڪيس داخل آهن. زخمي لا ل ڏنو ۽ ظفر علي جانوري موجب، انهن تي ڪيس داخل آهن هو انهن ڪيسن مان ضمانت تي آزاد آهن. رينجرز 5 ڳوٺاڻن کي گرفتار پڻ ڪيو آهي.