تازيون خبرون

Daily Archives: February 26, 2015

بهتر حڪمراني لاءِ ايماندار ۽ بدعنواني کان پاڪ انتظاميه لازمي عنصر آهيۡ: منظور وساڻ

ڪراچي(اسٽاف رپورٽر) سنڌ جي صوبائي وزير اينٽي ڪرپشن، جيل، معدنيات ۽ معدني ترقي منظور حسين وساڻ چيو آهي ته بهتر حڪمراني لاءِ ايماندار ۽ بدعنوانين کان پاڪ انتظاميه لازمي عنصر آهي. هن چيو ته بدعنوانين ۾ ملوث ماڻهن خلاف مضبوط شاهدين جي روشني ۾ ڪيس ٺاهيا وڃن ته جيئن ملوث جوابدرن کي سزائون ملن ۽ سزا يافته ماڻهن جي حشر کان ٻيا سبق پرائين ۽ بدعنواني کي سختي سان چيڀاٽي سگهجي. اهڙن خيالن جو اظهار صوبائي وزير منظور حسين وساڻ اڄ پنهنجي آفيس ۾ ڪوٺايل انڪوائريز اينڊ اينٽي ڪرپشن اسٽيبلشمينٽ سنڌ جي سينيئر آفيسرن جي اجلاس جي صدرت ڪندي ڪيو. پنهنجي هدايتن ۾ هن چيو ته سموري ڪارروائي قاعدن ۽ ضابطن جي سختي سان پابندي ڪري عمل ۾ آندي وڃي. صوبائي وزير آفيسرن کي هدايت ڪئي ته هو پنهنجي مثالي ڪارڪردگي ذريعي گڊ گورننس ۾ حڪومت جو هٿ ونڊائين. هن ڊائريڪٽرز، سرڪل آفيسرز ۽ ٻين آفيسرن جي ڪارڪردگي جو تفصيلي جائزو ورتو ۽ واضح ڪيو ته جيڪڏهن ڪنهن آفيسر جي باري ۾ شڪايت ملي ته سخت ڪارروائي ڪئي وڃي. اجلاس ۾ چيئرمين انڪوائريز اينڊ اينٽي ڪرپشن اسٽيبلشمينٽ سيد ذاڪر حسين سمورن ڪيسن جي باري ۾ تفصيلي بريفنگ ڏني. ان موقعي تي صوبائي وزير منظور حسين وساڻ هدايت ڪئي ته ڪارڪردگي کي مناسب طريقي سان نمايان به ڪيو وڃي ته جيئن ماڻهن کي ان جي باري ۾ آگاهي ملي سگهي.  اجلاس م سمورن ڊائريڪٽرز انڪوائريز، ڊائريڪٽر سنڌ، ڊائريڪٽر ليگل، ڊپٽي سيڪريٽري ۽ ٻين سينيئر آفيسرن شرڪت ڪئي.

 

ڪراچي جي دهشتگردي ٽوڙ عدالت لياري گينگ وار جي ٻن جوابدارن کي موت جي سزا ٻڌائي ڇڏي

ڪراچي (اسٽاف رپورٽر) ڪراچي جي دهشتگردي ٽوڙ عدالت لياري لينگ وار جي ٻن جوابدارن کي موت جي سزا ٻڌائي ڇڏي، جوابدار ڀتو نه ڏيڻ تان ملير بار جي اڳوڻي صدر صلاح الدين حيدر ۽ سندس پٽ کي قتل ڪيو هو. دهشتگردي ٽوڙ عدالت 7 ۾ سال 2002 دوران قتل ڪيل ملير بار جي اڳوڻي صدر صلاح الدين حيدر ۽ سندس پٽ ارسلان جي قتل ڪيس جي ٻڌڻي ٿي. عدالت قتل جو ڏوهه ثابت ٿيڻ تي لياري گينگ وار سان تعلق رکندڙ محسن علي ۽ عابد عرف ڪلو کي موت جي سزا جو حڪم ٻڌايو. جوابدارن سال 2002 ۾ ڀتو نه ڏيڻ تان فائرنگ ڪري ملير بار جي اڳواڻي صدر صلاح الدين حيدر ۽ سندس پٽ ارسلان کي قتل ڪيو هو.

 

اسلام آباد سميت مختلف علائقن ۾ ڳڙي سان مينهن وسڻ ۽ برفباري جو سلسلو جاري، 2 فوت، اڏامو معطل

ڪراچي (مانيٽرنگ ڊيسڪ) اسلام آباد ۽ راولپنڊي سميت ملڪ جي مختلف علائقن ۾ ڳــَڙيَ سان مينهن وسڻ ۽ برفباريءَ جو سلسلو جاري آهي،جنهن سبب ٿڌ ۾ واڌ اچي وئي آهي، جڏهن ته ڪوئيٽا جي ٿڌين هوائن ڪراچي ۾ به ديرا ڄمائي ورتا آهن. پنجاب جي مٿانهن علائقن، خيبر پختونخواهه، فاٽا ۽ اتر اولهه بلوچستان ۾ برسات ۽ برفباري سبب ٿڌ ٻيهر موٽي آئي آهي. اسلام آباد،راولپنڊي ۽ ڀرپاسي وارن علائقن ۾ گذريل رات کان وقفي وقفي سان ڳڙي سان مينهن وسڻ جو سلسلو جاري آهي.موسم جي خرابي سبب اسلام آباد جي بينظير انٽرنيشنل ايئرپورٽ تي فلائيٽ آپريشن معطل ڪيو ويو،جيڪو ڪجهه وقت کانپوءِ بحال ڪيو ويو. خيبر پختونخواهه جي مختلف علائقن ۾ گذريل رات کان برسات ۽ برفباري جو سلسلو جاري آهي. سوات جي جابلو علائقن ۾ لاڳيتو ٽن ڏينهن کان برسات ۽ برفباري وقفي وقفي سان ٿي رهي آهي. شانگلا ۾ برسات ۽ برفباري سبب لينڊ سلائينڊنگ کانپوءِ شاهراهه قراقرم مختلف هنڌن تان بند آهي. خيبر ايجنسي ۽ ڀرپاسي وارن علائقن ۾ پڻ گذريل رات کان وقفي وقفي سان برسات جو سلسلو جاري آهي،جنهن سبب ندين ۽ نالن ۾ چاڙهه اچي ويو، جڏهن ته روڊن تي پاڻي گڏ ٿيڻ ڪري ٽريفڪ جي رواني متاثر ٿي رهي آهي. چارسده ۾ زوردار برسات سبب ڪابل درياهه ۾ پاڻي جي سطح وڌي وئي آهي، ان کانسواءِ برساتن سبب پشاور جي بڍني نالي ۾ پاڻي جي سطح وڌي رهي آهي. فلڊ سيل اختيارين علائقي جي آبادي کي پاڻي جي امڪاني ريلي کان محفوظ ڪرڻ لاءِ وارننگ جاري ڪري ڇڏي آهي. مهمند ايجنسي جي عليم زئي واري علائقي ۾ مينهن پوڻ سبب گهر جــِي ڇت ڪرڻ سبب 2 ڄڻا فوت ٿي ويا. آزاد ڪشمير جي مٿانهن علائقن ۾ برفباري سبب ريشيان کان ليپه لاءِ شاهراهه تي هر قسم جي ٽريفڪ لاءِ بند ٿي وئي آهي. گلگت بلتستان جي ضلعي غذر جي ميداني علائقن ۾ ٽن ڏينهن کان وقفي وقفي سان برسات جڏهن ته جبلن تي برفباري جاري آهي. استور شهر ۽ ڀرپاسي وارن علائقن ۾ چئن ڏينهن کان جاري برسات ۽ برفباري سبب مٿانهن علائقن جو زميني رابطو ڪٽجي ويو آهي. ڪوئيٽا ۾ برسات ۽ برفباري بعد ٿڌ هڪ ڀيرو ٻيهر موٽي آئي آهي، ان کانسواءِ زيارت، قلات، پشين، مستونگ سميت بلوچستان جي مختلف علائقن ۾ سخت ٿڌ آهي. ڪوئيٽا جي ٿڌين هوائن ڪراچي ۾ به ديرو ڄمائي ورتو آهي. موسميات کاتي موجب ايندڙ 24 ڪلاڪن دوران ڪراچي ۾ موسم جزوي طور جهــُڙالي رهندي ان سان گڏ تيز ٿڌيون هوائن به گهـُلنديون جنهن سبب گرمي پد 4 کان 6 ڊگري سينٽي گريڊ تائين پهچڻ جو امڪان آهي. ايندڙ 24 ڪلاڪن دوران اسلام آباد، لاهور، گوجرانوالا سميت پنجاب جي ميداني علائقن ۾ وڌيڪ برسات جڏهن ته گلگت بلتستان، ڪشمير ۽ خيبر پختون خواهه جي مٿانهن علائقن ۾ برسات سان گڏ ڳڙو ۽ جبلن تي برفباري جو امڪان آهي. موسميات کاتي امڪان ظاهر ڪيو آهي ته برسات ۽ برفباري سبب ملڪ جي مختلف علائقن ۾ ٿڌ جــِي لهر ايندڙ چئن ڏينهن تائين برقرار رکي سگهي ٿي.

 

ماڊل اريبيه قتل ڪيس ۾ اڳڀرائي، پوليس جاچ جو دائرو وڌائي ڇڏيو

لاهور (بيورو) ماڊل اريبيه قتل ڪيس ۾ اڳڀرائي ٿي آهي جنهن کان پوءِ پوليس جاچ جو دائرو وڌيڪ وڌائي ڇڏيو آهي پوليس مقتوله جي مبينه قاتل طوبا سميت ٻين دوستن جي موبائيل فون ڪالز جي رڪارڊ جو ڊيٽا حاصل ڪري ورتو طوبا جي گهر مان ڪيميائي مواد به هٿ ڪيو ويو جڏهن ته طوبا جي هڪ بئنڪر دوست فاروق کي به گرفتار ڪيو ويو مقتوله جي گهر مان اهم تصويرون ۽ ثبوت گڏ ڪيا ويا جسماني عضوا فرانزڪ ليب کي اماڻيا ويا ميڊيا رپورٽ مطابق لاهرو ۾ قتل ٿيل مقتوله اربيه بابت وڌيڪ حقيقتون آڏو اچي ويون آهن اريبه جو اصل نالو ابيرا هو ۽ هو گهرڀاتين سان ناراض ٿيڻ کان پوءِ ماڊلنگ جي شعبي ۾ قدم رکيو ٻه سال اڳ گهرڀاتين سان ناراضگي تي سندس خرچ بند ٿيو ته اريبه کي مسئلي جو حل ماڊلنگ ۾ نظر آيو انهيءَ دوران اريبه جي موعيز نالي ڇوڪري سان ملاقات ٿي جنهن ماڊلنگ ڇڏڻ جي شرط تي شادي جو واعدو ڪيو جڏهن ته اريبه جي زندگي ۾ مٺ ۾ واري وانگر سموريون خوشيون هٿن ۾ کسڪي ويون معيز شادي کان انڪار ڪيو ته هو ٻيهر ماڊلنگ ۾ قسمت آزمائڻ لڳي پوليس جاچ ۾ اها ڳالهه به آڏو آئي آهي ته پراسرار طور تي غائب ٿيل حيدر نالي جوابدار سان اريبه جي ڪوئي مٽي مائٽي نه آهي پوليس مطابق اريبه جي قتل جي ماردات ماڊل ٽآئون ۾ ٿي هئي ماڊل ٽائون ۾ قتل جي مبينه ملزمه طوبا جي گهر مان ڪيميائي مواد جون ٻه بوتلون مليون آهن مواد کي ٽيسٽ جي فرانزڪ سائنس ليبارٽري اماڻيو ويو آهي اريبه قتل ڪيس ۾ حراست هيٺ ملزم طوبا جي ملازمه جي انڪشاف تي طوبا جي هڪ بئنڪر دوست بئنڪ جي اسسٽنٽ وائيس پريزيڊنٽ فاروق کي به قتل جي هن ڪيس ۾ گرفتار ڪري ورتو آهي پوليس کيس جاچ لاءِ اڻڄاتل هنڌ منتقل ڪري ڇڏيو آهي جاچ ۾ پوليس اريبه جي گهر مان اهم تصويرون ۽ ثبوت به گڏ ڪري ورتا.

 

انوشڪار شرما به سينسر بورڊ جو نشانو بڻجي وئي

ممبئي(شوبز نيوز) بالي ووڊ اداڪاره انوشڪار شرما جي نئين فلم اين اي 10 جي رليز تڪراري زبان ۽ اعتراض جوڳن منظرن سبب مشڪلاتون جو شڪار ٿي وئي هي هن فلم بابت بالي ووڊ لائف هڪ رپورٽ شايع ڪئي آهي جنهن ۾ ٻڌايو ويو آهي ته ڀارتي سينسر بورڊ جي نون قانونن مطابق فلمن ۾ غير اخلاقي زبان تي پابني مڙهي وئي آهي ۽ انوشڪا شرما جي فلم به پابني جي زد ۾ اچي وئي آهي هن فلم جي ڪهاڻي ڏوهن تي ٻڌل آهي ۽ اهو ئي سبب آهي جو هن ۾ غير اخلاقي زبان ۽ منظر ڏيکاريا ويا آهن.

 

سريلنڪن بيوٽي هڪ ڀيرو ٻيهر اداڪاريءَ جا جوهر ڏيکاريندي نظر ايندي

ممبئي (شوبز نيوز) سيڪوئل جو دور آهي، جنهن دوران ”هائوس فل ٿري“ به ٺهي رهي آهي، جنهن جي لاءِ هڪ ڀيرو ٻيهر سريلنڪن بيوٽي جيڪولين فرنينڊس جو نالو ورتو پيو وڃي، هدايتڪار ساجد خان جي ڪاميڊيءَ سان ڀرپور ان فلم سڀني کي کلڻ تي مجبور ڪيو هو، ان فلم جا هن وقت تائين ٻه حصا ٺهي چڪا آهن ۽ ٻنهي حصن ئي باڪس آفيس تي سٺي ڪمائي ڪئي هئي، نئين ايندڙ هائوس فل جو ٽيون حصو ٺهي رهيو آهي، جنهن ۾ سريلنڪن بيوٽي هڪ ڀيرو ٻيهر اداڪاريءَ جا جوهر ڏيکاريندي نظر ايندي، ”هائوس فل-2“ ۾ جيڪولين فرنينڊس ان کان پهريان جان ابراهيم جي هيروئن بڻجي چڪي آهي ۽ هاڻي ان جي لاءِ نئين هيرو جي چونڊ ٿيندي، ذريعن جو چوڻ آهي ته فلم جي ايندڙ سيڪوئل ۾ ايلي اورام ۽ ايمي جيڪسن کي به ڪاسٽ ڪيو ويندو.

 

بالي ووڊ اداڪار شاهد ڪپور 34 سالن جو ٿي ويو آهي

ممبئي (شوبز نيوز) بالي ووڊ اداڪار شاهد ڪپور 34 سالن جو ٿي ويو آهي. شاهد ڪپور اربع تي پنهنجي سالگره خاندان جي ماڻهن ۽ ويجهن دوستن سان گڏ سادگي سان ملهائي. شاهد ڪپور فلمساز ۽ اداڪار پنکج ڪپور ۽ نيلما عظيم جو پٽ آهي. بالي ووڊ ۾ سندس انٽري 10 سال اڳ ٿي هئي پر شاهد ڪپور جون فلمون غلط چونڊ ۽ ان کان پوءِ ايندڙ ماڻهن لاءِ ڪامبين جا در کوليا ۽ شاهد ڪلاس ون ايڪٽر چورائڻ کان محروم ٿي ويو. شاهد ڪپور پنهنجي پهرين فلم فيئر ايوارڊ پنهنجي فلم ”عشق و عشق“ تي 2003ع ۾ حاصل ڪيو جن هن کان پوءِ سندس هٽ فلم ”جب وي ميٽ“ هئي ۽ 2009ع ۾ سندس فلم ”ڪميني“ ڪامياب رهي. گذريل سال ڪشمير جي موضوع تي ٺهيل فلم ”حيدر“ جي هيستائين بهترين فلم ثابت ٿي . ان فلم کي اسٽار گلڊ، اسٽار ڊسٽ، اسڪرين ۽ فلم فيئر ايوارڊن سان نوازيو ويو آهي.

 

ممبئي جي عدالت اداڪار سلمان خان خلاف ڪيس جي شنوائي مڪمل ڪرڻ بعد فيصلو 3 مارچ تائين محفوظ ڪري ورتو

ممبئي(شوبز نيوز) ممبئيءَ جي عدالت اداڪار سلمان خان خلاف ڪيس جو فيصلو محفوظ ڪري ورتو آهي، جيڪو 3 مارچ تي ٻُڌايو ويندو. ممبئي جي عدالت سلمان خان خلاف اسلحه ايڪٽ تحت ڪيس جي شنوائي مڪمل ٿيڻ بعد فيصلو 3 مارچ تائين محفوظ ڪيو. سلمان خان خلاف ڪاري هرڻ جي غير قانوني شڪار جو ڪيس 1998ع کان شنوائيءَ هيٺ هيو، ان کان اڳ عدالت سلمان خان جي وڪيل طرفان درخواست منظور ڪندي سلمان کي پيشيءَ جي موقعي تي حاضريءَ کان ڇوٽ ڏني هئي.

 

پاڪستان جي ٽيم ڪرڪيٽ ورلڊڪپ ۾ پنهنجي ٽين پول ميچ پهرين مارچ تي زمبابوي خلاف کيڏندي

برسبين (اسپورٽس نيوز) آسٽريليا ۽ نيوزيلينڊ ۾ گڏيل طور جاري يارهين ورلڊڪپ ڪرڪيٽ ٽورنامينٽ ۾ پهرين ڪاميابي جي ڳولا لاءِ پاڪستاني ٽيم جي زمبابوي خلاف ميچ لاءِ پريڪٽس جو سلسلو جاري آهي. پاڪستان ۽ زمبابوي جون ٽيمون اهم ميچ ۾ پهرين مارچ تي آمهون سامهون ٿينديون. شروعاتي ٻن ميچن ۾ ناڪامين کانپوءِ ڪوارٽر فائينل جي ڊوڙ م شامل رهڻ لاءِ ان ميچ ڪاميابي گرين شرٽس لاءِ انتهائي اهم آهي. جيڪڏهن هو اها ميچ هارائي ٿي وڃي ته ان جا لاسٽ ايٽ ۾ پهچن جا امڪان پڻ گهٽجي ويندا. گرين شرٽس کي پهرين ميچ ۾ ڀارت ۽ ٻين ميچ ۾ ويسٽ انڊيز هٿان شڪست کي منهن ڏيڻو پيو هو. سومر تي پاڪستاني ٽيم جي پهرين پريڪٽس سيشن رد ڪيو ويو هو ۽ ٽيم مينجمينٽ ۽ رانديگر سڄو ڏينهن ميٽنگز ۾ مصروف رهيا هئا جنهن جو مقصد تيم جي انتهائي مايوس ڪندڙ ڪارڪردگي کان پوءِ رانديگرن کي حوصلو ڏيڻ ٻڌايو پيو وڃي.

 

ورلڊ ڪپ تاريخ: شيمن انور سينچري ٺاهيندڙ گڏيل عرب امارات جو پهريون بيٽسمين بڻجي ويو

برسبين(اسپورٽس نيوز) شيمن انور عالمي مقابلي جي تاريخ ۾ سينچري ٺاهيندڙ گذريل عرب امارات جو پهريون بيٽسمين بڻجي ويو. انور آئرلينڊ خلاف ميچ ۾ اهو سنگ ميل عبور ڪيو. گذريل ڏينهن هلندڙ ورلڊ ڪپ جي سلسلي ۾ آئرلينڊ خلاف کيڏيل ميچ ۾ شيمن انور مشڪل وقت ۾ انتهائي شاندار ۽ ذميدارانه بيٽنگ جو مظاهرو ڪيو. هن ڊٽجي مخالف بالرن جو مقابلو ڪيو ۽ شاندار سينچري ٺاهي پنهنجي ٽيم جي پوزيشن مستحڪم ڪئي. هو عالمي مقابلن جي تاريخ ۾ سينچري ٺاهيندڙ عرب امارات جو پهريون بيٽسمين بڻجي ويو. انور 106 رنسون ٺاهي نمايان بيٽسمين رهيو، سندس اننگز ۾ 10 چوڪا ۽ هڪ ڇڪو پڻ شامل آهي.