تازيون خبرون

Daily Archives: February 24, 2015

قومي ادارن جو وقار مجروع ڪندڙن کي بخش نه ڪيو ويندو: وزيراعظم

اسلام آباد (بيورو) وفاقي ڪابينا، سينيٽ چونڊن دوران هارس ٽريڊنگ روڪڻ لاءِ سياسي پارٽين سان رابطن جو فيصلو ڪندي 2 ڪميٽيون قائم ڪري ڇڏيون آهن، وزيراعظم نواز شريف، سينيٽرن جي چونڊ ڳجهي راءِ شماري بدران هٿ مٿي کڻڻ ڪرڻ بابت  آئيني ترميم آڻڻ لاءِ سياسي پارٽين سان رابطن جي ڪندي چيو آهي ته سٺو ماحول بڻجي چڪو آهي، عمران خان سميت سڀ اڳتي اچي هارس ٽريڊنگ روڪڻ لاءِ ڪردار ادا ڪن. اسلام آباد  ۾ وزيراعظم نواز شريف جي صدارت هيٺ وفاقي ڪابينا جو اجلاس ٿيو، جنهن ۾ سينيٽ چونڊن دوران هارس ٽريدنگ، پاڪ چين اقتصادي راهداري منصوبي ۽ توانائي بحران سميت اهم معاملن تي غور ڪيو ويو. اجلاس ۾ خيبرپختونخواهه سميت چئني صوبن ۾ سينيٽ چونڊن دوران هارس ٽريڊنگ کي روڪڻ لاءِ تفصيلي مشاورت ڪئي وئي. ڪابينا، سينيٽ چونڊن دوران هارس ٽريڊنگ بابت آيل خبرن تي  سخت ڳڻتي ظاهر ڪئي وئي، جڏهن ته اهڙي عمل کي روڪڻ لاءِ ترميم آڻڻ جو فيصلو ڪيو ويو آهي، ان سلسلي ۾  2 ڪميٽيون قائم ڪيون ويون آهن. هڪ ڪميٽي ۾ وفاقي وزير پرويز رشيد، خواجه سعد رفيق ۽ مملڪتي وزير  انوشا رحمان شامل هوندا، جڏهن ته وفاقي وزير احسن اقبال، خيبرپختونخواهه جو گورنر سردار مهتاب عباسي، بئريسٽر ظفر الله شامل هوندا. ڪميٽيون، سينيٽرن جي چونڊ ڳجهي راءِ شماري بدران هٿ مٿي کڻي ڪرڻ لاءِ سياسي پارٽين کي تجويزون پيش ڪندي، جنهن بعد رپورٽ وزيراعظم نواز شريف کي پيش  ڪئي ويندي. اجلاس کي خطاب ڪندي وزيراعظم نواز شريف چيو ته هـُو 1985 کان سينيٽ چونڊن دوران هارس ٽريڊنگ کي روڪڻ لاءِ ڪوشش ڪري رهيو آهي، ان سلسلي ۾ هر ممڪن قدم کنيا ويندا. هن چيو ته قومي ادارن جو وقار مجروع ڪندڙن کي ڪنهن به ريت بخش نه ڪيو ويندو، سياسي پارٽيون اهڙن عنصرن جو پتو لڳائين، جيڪي هارس ٽريڊنگ ۾ ملوث آهن. وزيراعظم نواز شريف چيو ته سينيٽ چونڊن لاءِ ماحول سٺو بڻجي چڪو آهي، عمران خان سميت سمورين سياسي پارٽين جا اڳواڻ اڳتي اچن ۽ هارس ٽريڊنگ روڪڻ لاءِ ڪردار ادا ڪن. اجلاس  ۾ ڪابينا پاران پاڪ-چين اقتصادي راهداري منصوبي ۽ ڪراچي ۾ ايٽمي پاور پلانٽ لڳائڻ لاءِ چين کان قرض وٺڻ جي به منظوري ڏني وئي.وزيراعظم نواز شريف ايل اين جي تي هلندڙ 360 ميگاواٽ جي پاور پلانٽ کي جلد مڪمل ڪرڻ جي هدايت ڪندي چيو ته حڪومت پنهنجي دور مان ئي لوڊشيڊنگ ختم ڪرڻ جو عزم ورجايو آهي. اجلاس ۾ پاڻي ۽ بجلي واري سيڪريٽري، چين جي هاڻوڪي دوري بابت پڻ ڪابينا کي بريفنگ ڏني.

 

کاتي مان گوسڙو ملازم ختم ڪندس يا پاڻ ختم ٿيندس، شرجيل ميمڻ جو اعلان

ڪراچي(اسٽاف رورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته سنڌ صوبي کي صاف سٿرو ۽ پرامن بڻائڻ واري ارادي سان اڄ کان جنهن مهم جي شروعات ڪئي پئي وڃي اها مهم هڪ سال تائين جاري رکي ويندي. هاڻ بلديات کاتي ۾ ڪنهن به گوسڙو ملازم کي برداشت نه ڪيو ويندو ۽ انهن جي خاتمي تي ئي ساهه پٽيندس. ڪمشنر ڪراچي جي سربراهي ۾ مانيٽرنگ ٽيم جوڙي وئي آهي ۽ ڪنهن به قسم جي ڪوتاهي تي ڪنهن کي معاف نه ڪيو ويندو. مهم صرف صفائي تائين ئي محدود نه رهندي بلڪ ان دوران غيرقانوني بل بورڊز، قبضن جو خاتمو ۽ ڪراچي سميت پوري سنڌ جي سمورن ضلعن ۾ وڻڪاري مهم به سال تائين جاري رکي ويندي. اهڙن خيالن جو اظهار هن ڪراچي جي قديمي علائقي پاڪستان چوڪ تي پاڻ ٻهارو ڏئي مهم جي شروعات ڪرڻ کان پوءِ ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، آرٽس ڪائونسل آف پاڪستان جي صدر ميونسپل ڪمشنر ڪراچي مسعود عالم، ڊپٽي ڪمشنر سائوٿ سليم راجپوت، ايڊمنسٽريٽر سائوٿ افضال زيدي، ميونسپل ڪمشنر سائوٿ محمد رئيسي، اي سي سائوٿ محمد عاصم کان علاوه ٻيا به ساڻس گڏ هئا. ان کان اڳ شرجيل ميمڻ سنڌ اسيمبلي ۾ ٻوٽو لڳائي وڻڪاري مهم جي شروعات ڪئي. ان موقعي تي اسپيڪر سنڌ اسيمبلي آغا سراج دراني، سينيئر وزير تعليم نثار احمد کهڙو، ايم ڪيو ايم جي اڳواڻ خواجه اظهار الحسن، فيصل سبزواري، ايم پي اي امداد پتافي، فياض ٻُٽ ۽ ٻيا به موجود هئا. صفائي مهم جي شروعات جي موقعي تي صوبائي وزير شرجيل انعام ميمڻ پاڻ ٻهارو ڏئي رستي تي صفائي جي مهم جي شروعات ڪئي. ميڊيا سان ڳالهائيندي هن چيو ته عوام جي بنيادي مسئلن جي حل جي ذميواري اسان جي آهي ۽ اسان پنهنجي ان ذميواري کي پورو ڪري رهيا آهيون. هن چيو ته صفائي سٿرائي جي ذريعي اسان پنهنجي شهر ۽ صوبي جي ماحول کي جتي آلودگي کان پاڪ ڪري سگهون ٿا اتي هن شهر ۽ صوبي ۾ ٻوٽو لڳائي اسان هن صوبي کي خوبصورت ۽ پرفضا به بڻائي سگهون ٿا ۽ ان سلسلي ۾ سمورن سياسي جماعتن سان گڏوگڏ سول سوسائٽي، اين جي اوز، ميڊيا ۽ خود عوام کي به پنهنجو ڀرپور ڪردار ادا ڪرڻو پوندو. هن چيو ته هي مهم هڪ هفتي لاءِ نه پر ايندڙ هڪ سال تائين جاري رهندي ۽ پهرين مرحلي ۾ صوبي ۾ 6 لک جڏهن صرف ڪراچي ۾ هڪ لک کان وڌيڪ ٻوٽا شهر ۾ لڳايا پيا وڃن ۽ ان کان پوءِ ماهوار سمورن ضلعن ۾ هڪ هڪ لک ٻوٽا لڳايا ويندا. هن چيو ته هن مهم سان گڏوگڏ سمورا غيرقانوني بل بورڊز، پوري شهر ۾ قائم قبضن ۽ وال چاڪنگ جو به خاتمو ڪيو ويندو ۽ بغير ڪنهن فرق جي ان مهم کي ڪامياب بڻائڻ لاءِ اپاءٌ ورتا پيا وڃن. هن چيو ته هن مهم جي نگراني لاءِ ڪمشنر ڪراچي، جڏهن ته ٻين ضلعن ۾ ڊي سيز جي سربراهي ۾ مانيٽرنگ ٽيمون جوڙيون ويون آهن ۽ اهي نه صرف صفائي سٿرائي ۽ قبضن جي خاتمي لاءِ تعلقي ۽ ٽائونز سطح تي ورتل اپائن جي نگراني ڪندا بلڪ ڪنهن به شڪايت جي صورت ۾ لاڳاپيل ايڊمنسٽريٽر، ميونسپل ڪمشنر يا ٽائون ميونسپل ڪمشنرز خلاف ڪارروائي ۽ کين اتان هٽائڻ لاءِ به مجاز هوندا. هن چيو ته ڪراچي سميت پوري سنڌ جي عوام ۽ خاص ڪري ميڊيا کي ان مهم کي اوون ڪرڻو پوندو ۽ ميڊيا مالڪ جتي جتي اسان جي ڪوتاهيون هجن اتي ضرور نشاندهي ڪن ۽ جتي جتي ڪم ٿي رهيو آهي ان کي به هاءِ لائٽ ڪن. هن ميڊيا کي گذارش ڪئي ته هو 24 ڪلاڪن ۾ صرف 5 منٽ هن صوبي جي عوام ۾ شعور کي اجاگر ڪرڻ ۽ کين صفائي سٿرائي، وڻڪاري سميت ٻين مسئلن جي آگاهي لاءِ خصوصي پروگرام نشر ڪن. هڪ سوال جي جواب ۾ شرجيل انعام ميمڻ چيو ته هن مهم کي وڌ کان وڌ ڪامياب بڻائڻ جي حوالي سان اسان سول سوسائٽي، تاجرن، صنتعڪارن، رانديگرن، فنڪارن سميت سمورن شعبن سان تعلق رکندڙن سان رابطا شروع ڪري ڏنا آهن ۽ خاص ڪري اسان جي تعليمي ادارن ۾ به ان مهم جي شروعات ڪئي پئي وڃي. هڪ ٻي سوال جي جواب ۾ هن چيو ته اسان کي سڀ کان وڌيڪ مشڪلاتون گوسڙو ملازمن سبب پيش اچي رهيون آهن ۽ ان سلسلي ۾ هاڻ سخت فيصلا ڪيا ويا آهن ۽ ان ڳالهه جو هتمي فيصلو ڪيو ويو آهي ته يا ته اهي گوسڙو ملازم ختم ٿي ويندا ورنه آئون پاڻ ان وزارت کي ڇڏي ڏيندس. هن چيو ته هاڻ جيڪو به سرڪاري ملازم ڪم نه ڪندو يا پنهنجي ڊيوٽي تي نه ايندو اهو سرڪاري ملازم نه رهندو ۽ نه ئي سرڪار اهڙن گوسڙون ملازمن کي پگهارون ڏيندي ۽ ان سلسلي ۾ ڪمشنر ۽ ڊپٽي ڪمشنرز کي سمورا اختيار ڏنا ويا آهن ته هو سياسي يا ڪنهن ٻي دٻاءُ کان اچڻ کانسواءِ خلاف ڪارروائي ڪري. هن چيو ته اسان جي جذبي ۽ نيت کي ڏٺو وڃي ۽ عوام به اسان جي جذبي ۽ نيت کي ڏسندي پنهنجو ڀرپور ڪردار ادا ڪري ۽ هن شهر ۽ صوبي کي صاف سٿرو بڻائيندي هتي خوبصورتي لاءِ اسان جو ساٿ ڏنو وڃي، هڪ ٻي سوال جي جواب ۾ شرجيل انعام ميمڻ چيو ته هو روزانو جي بنياد تي ان مهم ۾ شامل هوندو ۽ ڪنهن به ڪوتاهي تي لاڳاپيل ذميوار آفيسر کي ڪنهن صورت ۾ معاف نه ڪيو ويندو.

 

سپريم ڪورٽ جو اڳوڻو وقفي چيف جسٽس راڻا ڀڳوانداس ديهانت ڪري ويو، صدر، وزير اعظم ۽ ٻين پاران ڏک جو اظهار

اسلام آباد (بيورو) سپريم ڪورٽ جو اڳوڻو وقتي چيف جسٽس جسٽس  ۽ فيڊرل پبلڪ سروس ڪميشن جو اڳوڻو چيئرمين  راڻا ڀڳوان داس ڪراچي جي نجي اسپتال ۾ ديهانت ڪري ويو، صدر، وزير اعظم، چيف اليڪشن ڪمشنر ۽ ٻين اڳواڻن جسٽس رٽائرڊ راڻا ڀڳوان داس جي لاڏاڻي تي ڏک جو اظهار ڪيو آهي. رٽائرڊ جسٽس راڻا ڀڳوان داس  کي دل جي تڪليف سبب ڪراچي جي نجي اسپتال ۾ داخل هو، جتي هن اڄ  73 ورهين جي ڄمار ۾ دم ڏنو.راڻا ڀڳوان داس کي ڪجهه  عرصي کي دل جي تڪليف هئي، جنهن سبب کيس نجي اسپتال ۾ داخل ڪرايو ويو  هو. قمبر شهداد ڪوٽ ضلعي جي شهر نصير آباد سان تعلق رکندڙ راڻا ڀڳوان داس 20 ڊسمبر 1942  تي پيدا ٿيو ۽ هن  1967 ۾ لاڙڪاڻي ۾  وڪالت جي شروعات ڪئي. هو 1994 ۾ سنڌ هاءِ ڪورٽ جو جسٽس ۽ 2000 ۾ سپريم ڪورٽ جو جسٽس بڻيو. راڻا ڀڳوان داس سپريم ڪورٽ جو وقتي چيف جسٽس، اليڪشن ڪميشن جو وقتي سربراهه ۽ فيڊرل پبلڪ سروس ڪميشن جو چيئرمين به رهيو. فخرالدين جي ابراهيم جي استعفيٰ بعد خالي ٿيل  چيف اليڪشن ڪمشنر جي عهدي لاءِ وزيراعظم ۽ اپوزيشن ليڊر راڻا ڀڳوانداس جي نالي تي اتفاق ڪيو پر هن عهدو سنڀالڻ کان معذرت ڪئي. راڻا ڀڳوان داس  کي ٻن پٽن ۽ هڪ نياڻي جو اولاد آهي، سندس ٻئي پٽ آمريڪا ۾ رهائش پذير آهن پر اهي پي ءِ جي بيماري سبب ڪراچي ۾ ترسيل آهن. راڻا ڀڳوان داس جو اگني سنسڪار  اڄ شام ڪراچي جي  گوليمار  واري علائقي ۾ ڪيو ويندو. جسٽس راڻا ڀڳوان دا س جي لاڏاڻي تي پاڪستان هندو ڪائونسل پاران 3 ڏينهن سوڳ جو اعلان ڪيو ويو آهي. جسٽس راڻا ڀڳوان داس جي لاڏاڻي تي صدر ممنون حسين، وزير اعظم نواز شريف، چيف اليڪشن ڪمشنر جسٽس رٽائرڊ سردار رضا خان، عمران خان، شهباز شريف، پرويز خٽڪ ۽ ٻين اڳواڻن ڏک جو اظهار ڪيو آهي. پي سي او تحت حلف کڻڻ کان انڪار ڪرڻ تي ٻين ججز سان گڏ راڻا ڀڳوان داس کي به  گهر ۾ نظر بند ڪيو ويو هو.

 

هارس ٽريڊنگ روڪڻ لاءِ 5 مارچ کان پهريان قانونسازي ٿيندي: پرويز رشيد

اسلام آباد(بيورو) اطلاعات کاتي جي وفاقي وزير پرويز رشيد چيو آهي ته هارس ٽريڊنگ روڪڻ لاءِ 5 مارچ کان پهرين قانونسازي ٿيندي، هن ميڊيا سان ڳالهائيندي چيو ته سينيٽ چونڊن کان اڳ هارس ٽريڊنگ روڪڻ جون ڪوششون ڪيون پيون وڃن، هن اهو به چيو ته ايم ڪيو ايم ۽ تحريڪ انصاف سميت سڀني پارلياماني پارٽين سان ربطو ڪيو ويندو،

 

نوري آباد حادثو: سڙي فوت ٿيل 10 ڄڻن مان 8 مسافرن جا لاش ايڌي سرد خاني حوالي

ڪراچي (اسٽاف رپورٽر) نوري آباد ويجهو هانءُ ڏاريندڙ روڊ حادثي ۾ سڙي فوت ٿيل 10 مان 8 مسافرن جا لاش ڊي اَين اي سيمپل وٺڻ بعد ايڌي سردخاني حوالي ڪيا ويا، 2 لاش سڃاڻپ بعد وارث کڻائي ويا، جڏهن ته زخمين جو ڪراچي جي جناح اسپتال ۾ علاج جاري آهي. ٽرانسپورٽ واري وزير جي دعوائن باوجود سپر هاءِ وي تي موت جو رقص جاري آهي، گذريل رات ڪراچي کان حيدرآباد ويندڙ وين جو سي اين جي سلينڊر ڦاٽڻ سبب 2 عورتن ۽ 2 ٻارڙن سميت 10 ڄڻا سڙي فوت ٿي ويا ۽ 10 زخمي ٿي پيا هئا. حادثي ۾ سڙي فوت ٿيل 10 مان 8 ڄڻن جا لاش جناح اسپتال ۾ ڊي اين اي سيمپل وٺڻ بعد ايڌي سردخاني حوالي ڪيا ويا، جڏهن ته ٻن ڄڻن محمد اقبال قريشي ۽ نصرت خاتون جا لاش سڃاڻپ بعد وارث اباڻي شهر حيدرآباد کڻائي ويا. حادثي ۾ سڙي زخمي ٿيل سحر، امبر، اقبال، عديل محمد امين، طلحيٰ، اسما، حميره ۽ مبشر جو ڪراچي جي جناح اسپتال ۾ علاج جاري آهي. ذريعن جو چوڻ آهي ته وين ٽائر برسٽ ٿيڻ سبب ڪلٽي ٿي جنهن کانپوءِ گئس سلينڊر ڦاٽن سبب وين کي باهه لڳي، جڏهن ته علائقي واسين پهچي 9 ماڻهن کي وين مان زنده ٻاهر ڪڍيو. هوڏانهن، واقعي جي جاچ لاءِ ٽرانسپورٽ واري وزارت جاچ ڪميٽي جوڙي ڇڏي آهي، ٻئي پاسي سنڌ جي گورنر ڊاڪٽر عشرت العباد نوري آباد واقعي جو نوٽيس وٺندي آءِ جي سنڌ کان رپورٽ طلب ڪري ورتي آهي. هوڏانهن ٽرانسپورٽ واري صوبائي وزير وزير ممتاز جکراڻي وين واقعي جو نوٽيس وٺندي سيڪريٽري ٽرانسپورٽ جي سربراهي ۾ 3 رڪني جاچ ڪاميٽي جوڙي ڇڏي آهي. جڏهن ته سنڌ حڪومت نوري آباد حادثي کانپوءِ سنڌ ۾ ناقص گيس سلينڊر رکندڙ گاڏين خلاف ڪارروائي جو فيصلو ڪيو آهي.

 

ايندڙ 5 سالن تائين لوڊشيڊنگ جو خاتمو ممڪن ناهي: نيپرا رپورٽ ۾ انڪشاف

اسلام آباد (بيورو) نيپرا حڪومتي دعوائن جي پول پڌرا ڪندي انڪشاف ڪيو آهي ته ايندڙ پنجن سالن تائين ملڪ مان لوڊشيڊنگ جو خاتمو ممڪن ناهي، 2020 تائين به بجلي جو شارٽ فال 12 سئو ميگاواٽ تائين رهندو. نيپرا پاران بجلي جي طلب ۽ گهرج اسٽيٽ آف انڊسٽري رپورٽ منظر عام تي اچي وئي آهي. رپورٽ ۾ انڪشاف ڪيو ويو آهي ته ملڪ مان ايندڙ پنجن سالن تائين به لوڊشيڊنگ جو خاتمو ممڪن ناهي، 2020ع تائين به 12 سئو ميگاواٽ تائين بجلي جو شارٽ فال موجود رهندو.  نيپرا رپورٽ موجب، ڪي اليڪٽرڪ کي ايندڙ سال 11 سئو 32 ميگا واٽ جو شارٽ فال هوندو، جڏهن ته 4 سئو 80 ارب رپين جي ادائيگي باوجود عوام کي رليف نه ملي سگهيو آهي. واضح رهي ته حڪمرانن 2018تائين ملڪ مان لوڊشيڊنگ جي خاتمي جي دعويٰ ڪئي آهي.

 

آرمي پبلڪ اسڪول تي حملي ۾ ملوث اهم دهشتگرد تاج محمد عرف رضوان کي گرفتار ڪيو ويو آهي: آئي ايس پي آر

راولپنڊي (بيورو) فوج جي سڌسماءَ جي شعبي آئي ايس پي آر جي ترجمان مطابق آرمي پبلڪ اسڪول تي حملي ۾ ملوث اهم دهشتگرد تاج محمد عرف رضوان کي گرفتار ڪيو ويو آهي. آئي ايس پي آر جي پڌرائي موجب دهشتگرد تاج محمد کي ڳجهن ادارن جي اطلاع تي گرفتار ڪيو ويو. وڌيڪ ڄاڻايو ويو آهي ته تاج محمد اي پي ايس حملي جي ٻئي گروپ جوڪمانڊر هو. ترجمان وضاحت ڪندي ڄاڻايو ته حملي ڪندڙ پهرين گروپ جو دهشتگرد عتيق الرحمان اڳ ۾ گرفتار ٿي چڪو آهي. ترجمان مطابق تاج محمد کي خيبرايجنسي جي هڪ ڀرپاسي جي ڳوٺ ۾ آئي ڊي پي بڻجي رهي رهيو هو.

 

سنڌ اسيمبلي جو اجلاس، خيرپور ضلعي ۾ امن امان جي صورتحال تي ميمبرن ۾ منهن ماري، اسپيڪر ڳالهايل لفظ حذف ڪري ڇڏيا

ڪراچي(اسٽاف رپورٽر) فنڪشنل ليگ ميمبر نصرت سحر عباسي چيو ته سنڌ اسيمبلي مان ٺهراءُ منظور ٿيڻ باوجود سي اين جــِي سلينڊر واريون گاڏيون روڊن تي هلي رهيون آهن. اسيمبلي ميمبرن مطالبو ڪيو ته غير معياري سي اين جــِي تي هلندڙ گاڏين خلاف ڪارروائي ڪئي وڃي. مير هزار خان بجاراڻي چيو ته گئس تي هلندڙ مسافر گاڏين کي حفاظتي قدمن جو پابند بڻايو وڃي. اجلاس دوران خيرپور ۾ پوليس آفيسرن جي بدلين واري معاملي تي صوبائي وزير منظور وساڻ ۽ فنڪشنل ليگ ميمبرن ۾ سخت جملن جي ڏي وٺي. نصرت سحر عباسي چيو ته خيرپور ۾ سٺن پوليس آفيسرن سبب امن امان جي صورتحال بهتر ٿي. هن چيو ته خيرپور ضلعي جو عوام جن پوليس آفيسرن جي ڪارڪردگي سان مطمئن آهي انهن جي بدلي ڪئي وئي. نصرت سحر عباسي مطالبو ڪيو ته ايس ايس پي خيرپور جي سياسي بنيادن تي بدلي نه ڪئي وڃي. ان موقعي تي صوبائي وزير منظور وساڻ چيو ته موجوده ايس ايس پي کي پيپلز پارٽي ئي مقرر ڪيو. هن چيو ته ناري تعلقي ۾ پيپلز پارٽي جي ورڪرز سان زيادتيون ٿي رهيون آهن، امن امان قائم ڪرڻ پ پ حڪومت جي ذميواري آهي. منظور وساڻ چيو ته فنڪشنل ليگ ۽ پوليس آفيسرن جو ڳٺ جوڙ ختم ڪرائڻو پوندو. منظور وساڻ جي فنڪشنل ليگ بابت بيان تي مخالف ڌر ميمبرن احتجاج ڪيو جڏهن ته ڊپٽي اسپيڪر، منظور وساڻ جا تڪراري لفظ ڪارروائي مان حذف ڪرڻ جي رولنگ ڏئي ڇڏي.

 

سينيٽ چونڊن ۾ پ پ ۽ ايم ڪيو ايم ۾ سيٽ ايڊجسٽمنٽ ٿي چڪي آهي: رحمان ملڪ

اسلام آباد(بيورو) اڳوڻي گهرو وزير رحمان ملڪ چيو آهي ته سينيٽ چونڊن ۾ پ پ ۽ متحده ۾ سيٽ ايڊجسٽمينٽ ٿي چڪي آهي، ايم ڪيو ايم سنڌ حڪومت ۾ ضرور شامل ٿيندي، پي ٽي آءِ حڪومت سان ڳالهين لاءِ ڪجهه لچڪ ڏيکاري. اسلام آباد ۾ ميڊيا سان ڳالهائيندي رحمان ملڪ چيو ته سينيٽ چونڊن لاءِ ايم ڪيو ايم ۽ پيپلز پارٽي سان سيٽ ايڊجسٽمينٽ ٿي چڪي آهي، ٻين پارٽين سان اڃان ڳالهيون هلندڙ آهن، متحده سنڌ حڪومت ۾ ضرور شامل ٿيندي ان لاءِ فارمولي تي ڪم ڪيو پيو وڃي. هن چيو ته حڪمومت ۽ تحريڪ انصاف ۾ ڊيڊ لاڪ ختم ٿيڻ خوشي جي ڳالهه آهي اميد ته هو حڪومت ۽ پي ٽي آءِ جي وچ ڪميشن جي معاملي تي اتفاق راءِ پيدا ڪرڻ ۾ ڪامياب ٿي ويندو. هن چيو ته وفاقي حڪومت ڪنهن به جج تي ٻڌل ڪميشن جوڙي سگهي ٿي، تحريڪ انصاف ڳالهين لاءِ لچڪ ڏيکاري…….

 

ٽربيونل اين اي 122 تي بحث جو حڪم ڏئي ڇڏيو، اياز صادق آڳوٺڻ جي تصديق جي مخالفت ڪري ڇڏي

لاهور (بيورو) لاهور جي اليڪشن ٽربيونل، اين اي هڪ سئو 22 تي مبينا ڌانڌلين خلاف درخواست تي 27 فيبروري تي حتمي بحث جو حڪم ڏئي ڇڏيو، اسپيڪر اياز صادق جي وڪيل اڱوٺن جا نشان تصديق لاءِ نادرا ڏانهن موڪلڻ جي مخالفت ڪندي چيو آهي ته عمران خان جي اهڙي درخواست دير وارا هربا استعمال ڪرڻ جي ڪوشش آهي. اليڪشن ٽربيونل لاهور جي سربراهه جسٽس رٽائرڊ ڪاظم ملڪ اين اي هڪ سئو 22 تي اسپيڪر اياز صادق جي ڪاميابي خلاف عمران خان جي درخواست تي ٻڌڻي ڪئي. ٻڌڻيءَ دوران اسپيڪر اياز صادق جي وڪيل، تڪ جي هڪ سئو 84 پولنگ اسٽيشنز جا ووٽن تصديق لاءِ نادرا ڏانهن موڪلڻ بابت عمران خان جي درخواست تي جواب داخل ڪرايو. اياز صادق جي وڪيل موقف اختيار ڪيو ته عمران خان جي درخواستن سبب ڪيس جي فيصلي ۾ دير ٿي رهي آهي، اهڙي درخواستن جو ڪو به جواز ناهي. اياز صادق جي وڪيل چيو ته ٿيلها کـُلي چڪا آهن، ووٽن جي اڱوٺن جا نشان نادرا ڏانهن موڪلڻ جي ڪا به ضرورت ناهي، ان بابت عمران خان جي درخواست دير وارا هربا استعمال ڪرڻ جي ڪوشش آهي. عمران خان جي وڪيل دليل ڏيندي چيو ته ڌانڌلي ۾ اليڪشن ڪميشن جو عملو به ملوث هو، ان ڪري ووٽن جي اڱوٺن جا نشان نادرا ڏانهن موڪليا وڃن. اليڪشن ٽربيونل، ٻنهي وڪيلن کي 27 فيبروري تي حتمي بحث جو حڪم ڏيندي ٻڌڻي ملتوي ڪري ڇڏي.