تازيون خبرون

Daily Archives: February 23, 2015

دهشتگردي خلاف جنگ ۾ ڪاميابي پاڪ فوج ۽ عوام جي ٿيندي: وزيراعظم

لاهور (بيورو) وزيراعظم نوازشريف سان پنجاب جي وڏي وزير شهباز شريف جي ملاقات، نيشنل ايڪشن پلان تي عملدرآمد ۽ ٻين معاملن تي خيالن جي ڏي وٺ ڪئي وئي. نوازشريف جو چوڻ هو ته دهشتگردي خلاف جنگ ۾ ڪاميابي پاڪ فوج ۽ عوام جي هوندي. رائيونڊ ۾ ٿيندڙ ملاقات ۾ شهباز شريف وزيراعظم کي امن امان تي تفصيي بريفنگ ڏيندي ٻڌايو ته نيشنل ايڪشن پلان موجب قانون لاڳو ڪندڙ ادارا گڏجي دهشتگردن جا ارادا مٽي ۾ ملائڻ لاءِ متحرڪ آهي. وزيراعظم جو چوڻ هو ته صوبائي حڪومتون امن امان کي يقيني بڻائڻ لاءِ قدم کڻن. ملاقات ۾ سينيٽ چونڊن،  پنجاب جي گورنر جي مقرري سميت ٻين معاملن تي غور ڪيو ويو.

 

بجلي، پاڻي ۽ بهتر حفاظتي انتظام صنعتي ادارن جون بنيادي ضرورتون آهن: وڏو وزير

خيرپور(ڊ.ر) سنڌ جي وڏي وزير سيد قائم علي شاهه چيو آهي ته موجودہ دور ۾ بجلي، پاڻي ۽ بهتر حفاظتي انتظام صنعتي ادارن جون بنيادي ضرورتون آهن جڏهن ته سنڌ حڪومت پاران اهڙين بنيادي ضرورتن جي فراهمي جي لاءِ هر ممڪن ڪوششون ڪري رهي آهي. جڏهن ته خيرپور اسپيشل اڪنامڪ زون ملڪ جو واحد زون آهي جنهن سان صوبي جي زرعي صنعتن کي فروغ ملندو ۽ علائقي معاشي خوشحالي ايندي. هي زون ملڪي سطح تي اقتصادي سرگرمين کي هٿي وٺرائڻ جي لاءِ قائم ڪيل اڪنامڪ ڪوآرڊينيشن کان منظور ٿيل واحد صنعتي زون آهي. هن اهڙو اظهار خيرپور اسپيشل اڪنامڪ زون ۾ زون جي ايڊمنسٽ ريشن بلاڪ، مسجد جي افتتاح ۽ سچل انجنيئرنگ ڪمپني پاران قائم ٿيندڙ ٻن صنعتي پروجيڪٽس جي سنگِ بنياد جي موقعي تي هڪ تقريب کي خطاب ڪندي ڪيو. هن چيوته اڄ جو دور مقابلي جو دور آهي هر هڪ ماڻهو کي اعلى مقام حاصل ڪرڻ جي لاءِ سخت محنت ڪرڻي پوي ٿي جڏهن ته ماضي ۾ نوجوان گهر يا پنهنجي ضلعي کان ٻاهر نوڪري يا بزنس ڪرڻ کان گهٻرائيندا هئا جڏهن ته هاڻي نوجوان ڪراچي سميت ملڪ کان ٻاهر نه صرف اعلى تعليم حاصل ڪري رهيا آهن پر بزنس پڻ ڪري رهيا آهن. هن چيو ته خيرپور سميت صوبي جا ڪيترائي صنتعڪار آهن جيڪي پنهنجون خدمتون توڙي اقتصادي سرگرميون ملڪ کان ٻاهر ڪري رهيا آهن ۽ بهتر ناڻو ڪمائي رهياآهن پر سندن علائقي واسين جي خدمت ڪرڻ پڻ انهن تي فرض آهي جنهن جي ڪري کين پنهنجو سرمايو پنهنجن لاڳاپيل علائقن ۾ لڳائين ۽ سنڌ حڪومت پاران پبلڪ پرائيويٽ پارٽنر شپ تحت کين وڌ ۾ وڌ سهولتون فراهم ڪيون وينديون. وزير اعلى چيوته سنڌ حڪومت پاران صوبي اندر تعليم ۽ صحت جي شعبن ۾ بهتري آڻي عوام جي وڌ ۾ وڌ خدمت ڪري رهي آهي ان سلسلي ۾ جيڪڏهن خيرپور ۾ ميڊيڪل ڪاليج قائم ڪيو ويو آهي ته سکر ۾ وومين يونيورسٽي، ايس آءِ يو ٽي توڙي صوبي جي ٻين ضلعن سميت ڪراچي جي لياري واري علائقي ۾ پڻ يونيورسٽي قائم ڪئي وئي آهي. وڏي وزير چيو ته ڪراچي ۾ پڻ اربين روپين جون اسڪيمون ڏنيون آهي صرف پاڻي جي مسئلي جي حل لاءِ ڪي 4 اسڪيم تي 26 ارب روپيه خرچ ڪيا پيا وڃن جڏهن ته سويريج ۽ سوڪ سروسز جي ٻين اسڪيمن تي پڻ اربين روپيه خرچ ڪيا پيا وڃن. هن چيو ته ٿر جي عوام جي خدمت لاءِ مٺي ۾ بهترين اسپتال قائم ڪئي وئي  آهي جنهن سان پوري علائقي جي عوام کي صحت جون جديد سهولتون مهيا ٿي رهيون آهن. وڏي وزير چيو خيرپور اسپيشل اڪنامڪ زون ۾ هتان جي مقامي ماڻهن کي سيڙپڪاري ڪرڻ گهرجي جنهن سان نه صرف سندن بزنس ۾ بهتري ايندي پر هتان جي مقامي ماڻهن کي روزگار جا موقعا ملندا ۽ علائقي ۾ اهڙين اقتصادي سرگرمين کي هٿي ملندي. تقريب ۾ خيرپور اسپيشلڪ اڪنامڪ زون جي پروجيڪٽ ڊائريڪٽر ڪئپٽن انوارالحق خطاب ڪندي چيو ته خيرپور اسپيشل اڪنامڪ زون 140 ايڪڙن تي مشتمل ملڪ جو واحد ۽ پهريون ايگرو بيسڊ اڪنامڪ زون آهي جنهن ۾ 90 پلاٽ آهن ان سلسلي ۾ 50 کان وڌيڪ صنعتڪارن پلاٽن جي الاٽمينٽ جون درخواستون جمع ڪرايون هيون پر اسٽرينگ ڪاميٽي پاران جاچ پڙتال کانپوءِ وڌيڪ دلچسپي اهليت رکندڙ 10 صنعتڪارن کي پلاٽ الاٽ ڪيا ويا آهن جڏهن ته سچل انجنيئرنگ ڪمپني پاران صنعتون لڳائڻ جي شروعات پڻ ڪري ڇڏي آهي. هن چيو ته هتي صنتعون لڳائيندڙن کي وڌ ۾ سهولتون مهيا ڪيون وينديون سندن 10 سالن جي لاءِ ٽئڪس ۾ ڇوٽ ڏني ويندي جڏهن ٻاهران مشينري امپورٽ ڪرڻ تي ڪسٽم ڊيوٽي ٽئڪس معاف ڪئي ويندي. هن چيو ته زون اندر جلد پاور پلانٽ قائم ڪيو ويندو جڏهن ته سپيڪو پاران 5 ميگا واٽ جو بجلي گهر پڻ تعمير ڪيو ويندو. ان موقعي تي ايم اين اي ڊاڪٽر نفيسه شاهه ، ڪمشنر سکر ڊويزن ۽ اسٽيرنگ ڪاميٽي جي چيئرمين محمد عباس بلوچ  ۽ ٻين پڻ خطاب ڪيو ۽ اڪنامڪ زون جي پروجيڪٽ تي روشني وڌي. ان کان اڳ وڏي وزير سيد قائم علي شاهه اڪنامڪ زون ۾ سچل انجنيئرنگ ڪمپني پاران قائم ٿيندڙ ڊيٽس ڊي هائيڊريٽنگ پلانٽ ۽ ڪولڊ اسٽوريج ڪارخانن جو سنگِ بنياد وڌو. جڏهن ته ان کان وڏي وزير گوشه تسڪين واري هنڌ تي 77.95 ملين روپين جي لاڳت سان تعمير ٿيل شهيد بينظير ڀُٽو پارڪ جو افتتاح ڪيو. جڏهن وڏي وزير خيرپور جي مختلف علائقن ۾ پيپلز پارٽي اڳواڻن سان سندن مائٽن ۽ عزيزن جي وفات تي پڻ تعزيتون ڪيون.

 

 

 

عمران خان سياسي ڀاڄوڪڙن کي گڏائي نئين پارٽي ٺاهي رهيو آهي: پرويز رشيد

اسلام آباد(بيورو) سڌ سماءَ واري وفاقي وزير پرويز رشيد جو چوڻ آهي ته عمران خان تبديلي آڻڻ جي دعويٰ ڪري رهيو آهي پر ٻين پارٽين جي سياسي ڀاڄوڪڙن کي گڏائي نئين پارٽي ٺاهي رهيو آهي، آزاد ڪشمير جي 50 سياسي اڳواڻن جي تحرڪي انصاف ۾ شموليت تي خيالن جو اظهار ڪندي پرويز رشيد جو چوڻ هو ته عمران خان تبديلي جي ڳالهه ڪري رهيو آهي پر ووٽ وٺڻ کانپوءِ هو گلگت بلتستان ۽ آزاد ڪشمير کي به وساري ڇڏيندو ۽ ان کي پهروين ڀيرو صرف چونڊن جي موقعي تي گلگت  بلتستان ۽ آزاد ڪشمير ۾ پنهنجي پارٽي ٺاهڻ جو خيال آيو، هن چيو ته تحريڪ انصاف جي سينيٽ چونڊن جي ٽڪيٽ هولڊرن ۾ ڪوبه اميدوار هيٺين طبقي سان تعلق نه ٿو رکي، سمورا اميدوار يا ته ارب پتي آهن يا اعليٰ ترين آفيسر شاهي جا نمائندا آهن جڏهن ته مسلم ليگ ن ۾ ٽڪيٽ قابليت، اهليت ۽ جمهوري جدوجهد تي ڏني وئي آهي.

 

پيءُ پٽ ۾ اختلاف ختم، پ پ چيئرمين بلاول ڀٽو زرداري مارچ ۾ پاڪستان ايندو

ڪراچي (اسٽاف رپورٽر) پ پ جو چيئرمين بلاول ڀٽو زرداري مارچ ۾ پاڪستان ايندو، پاڪستان پيپلز پارٽي جي ڪو چيئرمين ۽ اڳوڻي صدر آصف علي زرداري سان بلاول ڀٽو جي مفاهمت ٿي وئي آهي، آصف زرداري جي وڏي ڌي بختاور ڀٽو زرداري پي پٽ وچ ۾ مفاهمت ۾ اهم ڪردار ادا ڪيو، آصف زرداري بلاول ڀٽو زرداري سان ملاقات لاءِ لنڊن پهچي ويو آهي، ذريعن مطابق اڄ سومر تي آصف علي زرداري ۽ بلاول وچ ۾ هڪ ڊگهي مدي کانپوءِ ملاقات جو امڪان آهي، بلاول ڀٽو زرداري مارچ ۾ پاڪستان ايندو.

 

لورالائي: کاڻ اندر گيس ڀرجڻ سبب ڌماڪو، 7 مزدور فوت

لورالائي (م.ڊ) لورالائي جي تعلقي دڪي ۾ دمڙ ڪول ڪمپني جي کاڻ ۾ زهريلي گيس ڀرجڻ سبب 19 ڄڻا دٻجي ويا، مزدورن ۽ ليويز اهلڪارن پنهنجي مدد پاڻ تحت هڪ مزدور جو لاش جڏهن ته 11 ٻين مزدورن کي بيهوش واري حالت ۾ ڪڍي ڇڏيو هو گذريل چئن ڏينهن کان جاري آپريشن سبب وڌيڪ 7 مزدورن جا لاش ڪڍيا ويا، دڪي ۾ هر ڏينهن حادثا ٿيندا آهن پر هتي نه حادثن جي روڪٿام ۽ نه ئي مزدونر کي بچائڻ لاءِ ڪو سسٽم موجود آهي، گذريل هڪ سال ۾ ان طرح جا واقعا ٿيا ۽ ڪيتريون ئي جانيون ضايع ٿيون گذريل ڏينهن ڪوئيٽا کان مددگار ٽيم گهرائي وئي، انهن امدادي ڪارروائي سان چئن ڏينهن جي آپريشن کانپوءِ اڄ چئن مزدورن جن ۾ بخت، مير عالم، عقل زمان،  عظمي خان جا لاش ڪڍي ورتا، ٻين ٽن مزدورن جا لاش ڪڍڻ لاءِ آپريشن جاري آهي مزدورن جا ڪڍيل لاش سڙيل آهن، بلوچستان جي وڏي وزير ڊاڪٽر عبدالمالڪ بلوچ فوت ٿيل هر پورهيت جي ڪٽنب لاءِ 8، 8 لک رپين جي معاوضي جو اعلان ڪيو آهي. هن فوت ٿيل پورهيتن جا لاش هيلي ڪاپٽر وسيلي انهن جي اباڻن علائقن ڏانهن موڪلڻ جو حڪم پڻ ڏنو آهي

 

وزيراعظم ڪجهه به ڪري وٺي آزاد ڪشمير ۽ گلگت بلتستان ۾ چونڊون کٽي ڏيکارينداسين: عمران خان

اسلام آباد (بيورو) آزاد ڪشمير جا 60 کان وڌيڪ سياسي اڳواڻ تحريڪ انصاف ۾ شامل ٿي ويا، عمران خان چيو آهي ته نواز شريف گلگت بلتستان ۾ پنهنجو امپائر بيهاري ڇڏيو آهي ۽ آزاد ڪشمير ۾ چونڊون ملتوي ڪرائڻ جي ڪوشش ڪئي پئي وڃي پر وزيراعظم ڪجهه به ڪري وٺي آزاد ڪشمير ۽ گلگت بلتستان ۾ هــُو چونڊون کٽي ڏيکاريندا. آزاد ڪشمير جي 60 کان وڌيڪ پيپلز پارٽي، قاف ليگ ۽ نواز ليگ جي اڳواڻن، عمران خان جي موجودگي ۾ تحريڪ انصاف ۾ شامل ٿيڻ جو اعلان  ڪيو آهي. اسلام آباد ۾ آزاد ڪشمير جي سياسي اڳواڻن جي پي ٽي آءِ شموليت دوران ميڊيا سان ڳالهائيندي عمران خان چيو ته هــُو پ پ اڳواڻن کي پي ٽي آءِ ۾ شامل ٿيڻ تي ڀليڪار چوي ٿو. هن چيو ته سنڌ ۽ پنجاب صوبا پوليس اسٽيٽ بڻيل آهن، جڏهن ته ن ليگ ۽ پيپلز پارٽي مڪاني نظام کي ختم ڪري سمورا اختيار پاڻ وٽ رکي ڇڏيا آهن. عمران خان چيو ته تحريڪ انصاف خيبر پختون خواهه ۾ مڪاني چونڊون ڪرائي ڳوٺن جي سطح تي عوام کي انهن جا اختيار منتقل ڪندي. هن چيو ته پيپلز پارٽي ۽ نواز ليگ صاف، شفاف، منصفاڻين ۽ اڻ ڌرين تي يقين نه ٿي رکي. سندس چوڻ هو ته نواز شريف اهو شخص آهي جيڪو ڪرڪيٽ به ان وقت تائين نه ٿو کيڏي جيسيتائين پنهنجو امپائر نه ٿو بيهاري. عمران خان چيو ته نواز شريف گلگت بلتستان ۾ پنهنجو امپائر بيهاري ڇڏيو آهي جڏهن ته آزاد ڪشمير ۾ چونڊون ملتوي ڪرائڻ جي ڪوشش ڪئي پئي وڃي. هن چيو ته گلگت بلتستان ۾ به مئچ فڪسنگ شروع ٿي وئي آهي، گلگت جو نگران وڏو وزير بينڪ جو ملازم آهي. پي ٽي آءِ سربراهه چيو ته نواز شريف جيڪو چاهي ڀلي ڪري وٺي پر آزاد ڪشمير ۽ گلگت بلتستان جي چونڊن ۾ ڪاميابي تحريڪ انصاف جي هوندي. عمران خان وڌيڪ چيو ته نجم سيٺي کي پي سي بي ۾ غير قانوني طور عهدو ڏنو ويو آهي.

 

لياري ٻيهر ميدانِ جنگ ۾ تبديل، فائرنگ، بم حملا، 4 مارجي ويا ، 7 زخمي

ڪراچي (اسٽاف رپورٽر) سائيٽ ايريا مان پابندي تنظيم جي اهم ڪمانڊر کي گرفتار ڪيو ويو آهي. لياري جي علائقي ڪلاڪوٽ ۾ رينجرز ۽ پوليس جي مبينا مقابلن ۾ عزير بلوچ گروپ جي وقتي سربراهه سميت گينگ وار جا 4 جوابدار مارجي ويا. شهر ۾ ڏوهارين خلاف ڪارروايون جاري آھن. سائيٽ ايريا ۾ رينجرز پابندي تنظيم تحريڪ طالبان سميت گروپ جي اهم ڪمانڊر کي گرفتار ڪري ورتو آهي. جوابدار فرقيواراڻي ٽارگيٽ ڪلنگ، پوليس ۽ رينجرز تي حملن سميت سنگين ڏوهن ۾  گهربل هو. لياري جي علائقي ڪلاڪوٽ ۾ ڏوهارين جي موجودگي جي اطلاع تي رينجرز علائقي ۾ سرچ آپريشن ڪيو. تلاشي دوران جوابدارن رينجرز تي فائرنگ ڪئي جوابي فائرنگ ۾ گينگ وار جا جوابدار سهيل عرف خوف ۽ شهريار عرف شيري مارجي ويا ٻنهي جو تعلق بابا لاڊلا گروپ سان هو. ڪلاڪوٽ ۾ پوليس سان مقابلي ۾ عزير بلوچ گروپ جي 2 جوابدار مختار عرف لونڊ ۽ عارف مارجي ويا.ل پوليس موجب جوابدارن بڪتربند گاڏين تي حملو ڪيو ۽ جوابي فائرنگ ۾ مارجي ويا. ايس ايس پي سٽي موجب عزير بلوچ جي غير موجودگي ۾ عرف لونڊ هن گروپ کي هلائي رهيو هو. ٻئي پاسي لياري ۾ گينگ وار جي ٻن گروپن ۾ ڇڪتاڻ تيز ٿي وئي آهي فائرنگ ۽ دستي بم حملن ۾ 7 ڄڻا زخمي ٿي پيا آهن. جن کي اسپتال منتقل ڪيو ويو آهي.

 

دهشتگردي جي لعنت جو مقابلو ڪرڻ لاءِ ميڊيا ۽ تعليمي ادارن کي پنهنجو ڀرپور ڪردار ادا ڪرڻو پوندو: سعودي مفتي اعظم

جده (اي پي پي) سعودي عرب جي مفتي اعظم شيخ عبدالعزيز چيو آهي ته دهشتگردي جو مقابلو ڪرڻ اسلامي فرض آهي ۽ ان لعنت جو مقابلو ڪرڻ لاءِ ميڊيا ۽ تعليمي ادارن کي پنهنجو ڀرپور ڪردار ادا ڪرڻو پوندو. سعودي اخباري جي رپورٽ موجب گذريل ڏينهن پنهنجي هفتيوار ڳالهه ٻولهه ۾ هن چيو ته انتهاپسندن طرفان مذهب جي غلط استعمال سان اسلام جي ساک خراب طريقي سان متاثر ٿي آهي.هن چيو ته دهشتگرد پنهنجي غير انساني ڪمن کي اسلام سان ڳنڍين ۽ الله ڏسي ٿو ته اهي ڪوڙ ڳالهائي رهيا آهن. هن چيو ته دهشتگردي خلاف جنگ اسلامي فرض آهي ۽ ان جنگ ۾ ٻين ادارن سان گڏ ميڊيا ۽ تعليمي ادارن کي پڻ پنهنجو ڀرپور ڪردار ادا ڪرڻو پوندو.

 

قومي ٽيم تي ميڊيا ۽ عوام جو تمام گهڻو دٻاءُ آهي:نجم سيٺي

لاهور (بيورو) پي سي بي جي گورننگ بورڊ جي ميمبر نجم سيٺي چيو آهي ته قومي ٽيم تي ميڊيا ۽ عوام جو تمام گهڻو دٻاءُ آهي، دنيا ۾ ڪا به ٽيم ايتري دٻاءَ ۾ ناهي کيڏندي جيترو پاڪستاني ٽيم تي آهي. لاهور ۾ ميڊيا سان ڳالهائيندي نجم سيٺي جو چوڻ هو ته هــُو مڃي ٿو ته ٽيم جي ڪارڪردگي ٺيڪ ناهي. هن چيو  ته کين قومي ٽيم ۾ موجود رانديگرن جي تجربي ۽ ڪارڪردگي تي به نظر رکڻ گهرجي. نجم سيٺي چيو ته هن وقت ملڪ جا اڪثر فاسٽ بالر اَن فٽ آهن جڏهن ته بيٽسمين به وڌيڪ تجربي ڪار ناهن. پي سي بي جي گورننگ بورڊ جي ميمبر جو چوڻ هو ته قومي ٽيم تي ميڊيا ۽ عوام جو تمام گهڻو دٻاءُ آهي، دنيا ۾ ڪا به ٽيم ايتري دٻاءَ ۾ ناهي کيڏندي جيترو پاڪستاني ٽيم تي آهي. نجم سيٺي چيو ته اهڙي صورت ۾ ڪو رانديگر ڪارڪردگي نه ٿو ڏيکاري سگهي جڏهن کيس معلوم ٿئي ته ناڪامي تي کيس گارين سان نوازيو ويندو.

 

چمن ۾ تاج روڊ تي ڌماڪي سبب هڪ ڄڻو مارجي ويو، ڪيترائي زخمي

چمن (م.ڊ) تاج روڊ تي زوردار بم ڌماڪي جي نتيجي ۾ هڪ ڄڻو مارجي ويو ۽ ڪيترائي زخمي ٿي پيا، چمن جي تاج روڊ تي شهري علائقي ۾ بم ڌماڪو ٿيو جنهن جي نتيجي ۾ هڪ ڄڻو مارجي ويو ۽ ڪيترائي زخمي ٿي پيا ڌماڪي کان فوري پوءِ امدادي ٽيمون واقعي واري جاءِ تي پهچي ويون جڏهن ته سيڪيورٽي فورسز علائقي کي گهيري ۾ آڻيندي بم ڊسپوزل اسڪواڊ کي طلب ڪري ورتو چمن جي سول اسپتال ذريعن مطابق هينئر تائين اسپتال ۾ 4 زخمين کي آندو ويو آهي جن کي امداد فراهم ڪئي پئي وڃي.