تازيون خبرون

Daily Archives: February 21, 2015

حڪومت پوليو جي خاتمي جو پڪو پهه ڪري ڇڏيو آهي: نواز شريف

اسلام آباد (بيورو) وزيراعطم محمد نوازشريف سمورين صوبائي حڪومتن کي هدايت ڪئي آهي ته بهتر خوراڪ ۽ حفاظتي ٽڪن ذريعي ماءُ ۽ ٻارڙي جو تحفظ پهرين ترجيحي هئڻ گهرجي معمول جا حفاظتي ٽڪا ۽ ويڪسين نهايت اهم آهي عمل تيز ڪرڻ لاءِ خاص اپاءُ ورتا وڃن هو جمعي تي هتي گلوبل الائنس فار ويڪسين اينڊ ايمونائيزيشن جي اعليٰ سطحي وفد سان ملاقات ۾ ڳالهه ٻولهه ڪري رهيو هو ان موقعي تي وفاقي وزير احسن اقبال پڻ موجود هو وفد چيف ايگزيڪيوٽو آفيسر ڊاڪٽر سمٿ برڪلي جي سربراهي ۾ وزيراعطم هائوس ۾ ملاقات ڪئي وفد ۾ ڊبليو ايڇ او جا نمائندا ۽ بل گيٽس فائونڊيشن جا نمائدا پڻ شامل هئا وزيراعظم گاوي پاران پاڪستان ۾ حفاظتي ٽڪن ۽ ويڪسين لاءِ مدد کي ساراهيندي چيو ته پاڪستان جي ايندڙ نسلن کي محفوط بنائڻ لاءِ گاوي پاران فراهم ڪيل تعاون سان وڌ ۾ وڌ فائدو وٺڻ لاءِ قدم کڻنداسين وزيراعظم چيو ته معمول جا  حفاظتي ٽڪا ۽ ويڪسين نهايت اهم آهي ۽ ان ڏس ۾ سمورين صوبائي حڪومتن کي هدايت ڪئي ويئي ته اهي هن عمل کي تيز ڪرڻ لاءِ اثرائتا قدم کڻن ته جيئن ويڪسين ۽ حفاظتي ٽڪن ۾ رهجي ويل علائقا ترقياتي يافته علائقن جي برابر اچي سگهن.

 

آصف زرداري جي سنڌ سرڪار کي امن امان جي بحالي لاءِ وفاق سان گڏجي ڪم ڪرڻ جي هدايت

ڪراچي(اسٽاف رپورٽر) اڳوڻي صدر پاڪستان ۽ پاڪستان پيپلز پارٽي جي شريڪ چيئرمين آصف علي زرداري جي صدارت هيٺ اعليٰ سطحي اجلاس جمعي تي بلاول هائوس ڪراچي ۾ ٿيو. قومي اسيمبلي ميمبر فريال ٽالپر، وزيراعليٰ سنڌ سيد قائم علي شاهه، وزير بلديات ۽ اطلاعات سنڌ شرجيل انعام ميمڻ، چيف سيڪريٽري سنڌ، آئي جي پوليس ۽ ايڊووڪيٽ جنرل سنڌ شريڪ ٿيا. اجلاس ۾ صوبي جي امن امان ۽ صوبي جي سياسي صورتحال سميت ٻين معاملن جو جائزو ورتو ويو. اڳوڻي صدر آصف علي زرداري کي ان سلسلي ۾ سنڌ حڪومت پاران ورتل اپائن کان آگاهه ڪيو ويو. ان موقعي تي اڳوڻي صدر ۽ پيپلز پارٽي جي شريڪ چيئرمين آصف علي زرداري چيو ته سنڌ حڪومت دهشتگردن کي منهن ڏيڻ لاءِ فوري طور تي صوبي ۾ ”ڪائونٽر ٽيرريزم فورس“ (دهشتگردي جي تڪڙي خاتمي لاءِ فورس) جو قيام آڻي ۽ گڏوگڏ دهشتگردي خلاف ويمن فورس جو قيام به عمل ۾ آندو وڃي. هن هدايتون ڏنيون ته صوبي ۾ امن جي قيام کي هر حالت ۾ يقيني بڻايو وڃي ۽ امن جي قيام جي سلسلي ۾ سمورن وسيلن کي استعمال ۾ آندو وڃي. آصف علي زرداري اها به هدايت ڪئي ته سنڌ حڪومت وفاقي حڪومت ۽ امن امان جي بحالي جي وفاقي ادارن سان گڏجي دهشتگردي جو هميشه هميشه لاءِ خاتمو ڪرڻ ۾ پنهنجو ڀرپور ڪردار ادا ڪري. ان موقعي تي هن صوبي ۾ پوليس، رينجرز ۽ امن امان جي بحالي وارن ادارن جي خدمتن کي به ساراهيو ۽ وڏي وزير کي هدايتون ڏنيون ته صوبي ۾ امن جي قيام لاءِ سنڌ حڪومت، پوليس رينجرز ۽ ٻين امن امان جي بحهالي وارن ادارن سان مڪمل رابطو رکي ۽ اهڙي طرح وفاقي ادارن سان به سمورن معاملن کي شيئر ڪيو پيو وڃي. ان موقعي تي وڏي وزير چيو ته دهشتگردي جي خاتمي ۽ امن جي قيام لاءِ صوبي ۾ لائوڊ اسپيڪر جي غيرقانوني استعمال ۽ مسواڙ تي گهر حاصل ڪرڻ جي حوالي سان سنڌ اسيمبلي ۾ فوري طور تي قانون سازي ڪئي وڃي. هن چيو ته سنڌ حڪومت عورت فورسز سان گڏوگڏ دهشتگردي خلاف ويمن فورس جي قيام جي حوالي سان به تياريون مڪمل ڪري ورتيون آهن ۽ جلد ئي ان فورس جو قيام عمل ۾ آندو ويندو

 

چونڊ سڌاري تي اتفاق راءِ لاءِ تمام سياسي پارٽين سان مشاورت ڪئي ويندي: اسحاق ڊار

اسلام آباد (مانيٽرنگ ڊيسڪ) ناڻي جي وفاقي وزير سينيٽر اسحاق ڊار چيو آهي ته حڪومت چونڊ سڌاري تي اتفاق راءِ پيدا ڪرڻ لاءِ تمام سياسي پارٽين سان مشاورت ڪندي. پنهنجي هڪ انٽرويو ۾ اسحاق ڊار چيو ته پارلياماني ڪميٽي چونڊ سڌاري لاءِ تجويزن جو جائزو وٺندي ته جيئن ايندڙ چونڊن جو وڌيڪ شفاف طريقي سان ٿيڻ يقيني بنائي سگهجي. وفاقي  وزير اسحاق ڊار تحريڪ انصاف جي قيادت تي زور ڀريو ته اها نظام ۾ سڌاري ۽ مسئلن جي حل لاءِ سياسي بالغ نظري جو مظاهرو ڪري. هن چيو ته تحريڪ انصاف جي اڳواڻن طرفان نظام تي تنقيد ۽ الزام لڳائڻ سان مسئلا حل ڪرڻ ۾ مدد نه ملندي.

 

 

ڀارت سمجهوتا ايڪسپريس واقعي جي جوابدارن کي قانون جي ڪٽهڙي ۾ آڻي:پاڪستان

اسلام آباد (بيورو) پاڪستان، ڀارت کان سمجهوتا ايڪسپريس واقعي جي جوابدارن کي قانون جي ڪٽهڙي ۾ آڻڻ جو مطالبو ڪندي چيو آهي ته پاڪ ڀارت پرڏيهي سيڪريٽريز ملاقات ۾ سمورن مسئلن تي ڳالهايو ويندو پر ان حوالي سان اڃا تاريخ طئي ناهي ٿي. پرڏيهي کاتي جي ترجمان تسنيم اسلم هفتيوار پريس بريفنگ ۾ چيو ته سمجهوتا ايڪسپريس تي حملي کي 8 سال گذري ويا پر ڀارت ان ۾ ملوث جوابدارن خلاف اڃا تائين ڪارروائي ناهي ڪئي. تسنيم اسلم چيو ته ڀارت سمجهوتا ايڪسپريس واقعي ۾ ملوث دهشتگردن کي قانون جي ڪٽهڙي ۾ آڻــَي. پرڏيهي ترجمان چيو ته ڀارتي وزيراعظم نريندر مودي طرفان پنهنجو پرڏيهي سيڪريٽري اسلام آباد موڪلڻ وارو بيان سٺو سنئوڻ آهي. تسنيم اسلم چيو ته پاڪ ڀارت پرڏيهي سيڪريٽريز ملاقات ۾ سمورن مسئلن تي ڳالهايو ويندو پر ان حوالي سان اڃا تاريخ طئي ناهي ٿي. هن چيو ته افغانستان جو امن ۽ استحڪام پاڪستان لاءِ اهم آهي، ان ڪري هــُو افغانستان ۾ امن عمل ۾ سهولتڪار طور ڪردار ادا ڪرڻ لاءِ تيار آهن ۽ افغان قيادت سان مفاهمتي عمل جي حمايت جاري رکي ويندي.

 

آمريڪي پرڏيهي وزير سان چوڌري نثار جي ملاقات، دهشتگردي خلاف گڏجي ڪم ڪرڻ تي اتفاق

واشنگٽن (م.ڊ) آمريڪا دهشتگردي خلاف جنگ ۾ پاڪستاني قربانين پاڪ فوج جي ڪردار کي ساراهيندي چيو ته افغانستان مان پرڏيهي فوج جي واپسي کان پوءِ خطي ۾ امن لاءِ پاڪستان جو ڪردار نهايت اهم هوندو آمريڪا شدت پسندي ختم ڪرڻ لاءِ پاڪستان جي مدد ڪندو رهندو جڏهن ته چوڌري نثارعلي خان چيو ته پشاور سانحو پاڪستاني تحريڪ ۾ دهشتگردي جو سڀ کان خراب مثال آهي دهشتگردي خلاف پاڪستاني قوم رڪ جي ديوار وانگر بيٺي آهي دهشتگردي ڪنهن هڪ ملڪ جو نه پر سڄي دنيا جو مسئلو آهي دهشتگردي روڪٿام بابت عالمي ڪانفرنس جو اهتمام واکاڻ جوڳوآهي دهشتگردي جي خلاف جنگ ۾ آمريڪا ۽ پاڪستان گڏجي ڪم ڪندا نثارعلي خان جان ڪيري سان ملاقات ڪئي جنهن ۾ دهشتگردي خلاف جنگ ٻطرفو لاڳاپا ۽ افغانستان جي صورتحال سميت مختلف معاملن تي خيالن جي ڏي وٺ ڪئي ويئي.

 

ڪراچي لاءِ 4 ميگا پروجيڪٽس تي ڪم جلد شروع ڪرڻ جو اعلان

ڪراچي (اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته ڪراچي لاءِ چئن ميگا پروجيڪٽس تي ڪم جلد شروع ڪيو ويندو. ڪراچي جي شهرين کي خوشخبري ملندي. ڪمشنرز ۽ ڊپٽي ڪمشنرز کي اختيار ڏنا ويا آهن ته هو بلدياتي ادارن جي حساب ڪتاب کي چيڪ ڪن ۽ فنڊز جي غلط استعمال ۽ خرد برد تي ڪارروائي ڪن. 23 فيبروري کان ”صاف سرسبز ۽ پرامن سنڌ“ مهم ڪامياب بڻائڻ لاءِ عوام ۽ انهن جا چونڊيل نمائندا پنهنجو ڪردار ادا ڪن. هو جمعي تي سنڌ اسيمبلي ۾ (ن) ليگ جي ميمبر سيد امير علي شيرازي جي مختصر سوال جو جواب ڏئي رهيو هو. شرجيل انعام ميمڻ چيو ته ٽائون ميونسپل ايڊمنسٽريشنز (ٽي ايم ايز) جي حوالي سان ماضي ۾ تمام گهڻيون شڪايتون ملي رهيون آهن. انهن کي تمام گهڻا فنڊز ڏنا ويا، پر اها خبر نٿي پوي ته ڪٿي خرچ ٿيا ۽ انهن جي علائقن ۾ ڪهڙا ڪم ٿيا. اسان پهرين سنڌ جي ٻين ضلعن ۾ ڪمشنرز ۽ ڊپٽي ڪمشنرز کي اهي اختيار ڏنا هئا ته هو ڊسٽرڪٽ ميونسپل ڪارپوريشنز (ڊي ايم سيز) ۽ ٽي ايم ايز جي فنڊز کي چيڪ ڪن. جيڪڏهن ڪٿي بي ضابطگي نظر اچي ته لاڳاپيل آفيسرن خلاف ڪارروائي ڪن ۽ کين برطرف به ڪري سگهن ٿا. هاڻ اسان ڪراچي ۾ به ڪمشنرز ۽ ڊپٽي ڪمشنرز کي بلدياتي ادارن جو حساب ڪتاب چيڪ ڪرڻ جا اختيار ڏنا آهن. هاڻ انهن آفيسرن جي ذميواري آهي. مون پنهنجا اختيار بيورو ڪريٽس کي منتقل ڪري ڇڏيا آهن ته جيئن هيٺين سطح تي کين ذميواري سونپي سگهجي. هن چيو ته ڪراچي جي چار ميگا پروجيڪٽس تي جلد ڪم شروع ٿيندو. انهن ۾ شاهراهه فيصل تي مهراڻ انڊر پاس جي تعمير، جناح برج سان قائد آباد تائين 26 ڪلوميٽر جي فلاءِ اوورز، نيشنل هاءِ وي کي سپرهاءِ تائين ملائڻ لاءِ ڊيوئل ڪيريج وي، بس ريپڊ سروس ۽ ٻيا منصوبا شامل آهن. جناح برج کان قائدآباد تائين فلاءِ اوور ڪيريج جي تعمير اڍائي سالن ۾ مڪمل ٿي ويندي. هن چيو ته صوبي جي سمورن ٽي ايم اوز کي هدايتون ڏنيون ويون آهن ته هو هر سومر تي پنهنجن علائقن جي حوالي سان کليل ڪچهريون منعقد ڪن. شرجيل ميمڻ چيو ته اسان اهو به فيصلو ڪيو آهي ته ڪي ايم سي، ڊسٽرڪٽ ميونسپل ڪارپوريشن (ڊي ايم سيز) ۽ واٽر بورڊ جي صرف انهن ملازمن کي پهرين اپريل کان پگهارون ملنديون جن جا بئنڪ اڪائونٽس سنڌ بئنڪ ۾ هوندا ۽ جن جي اڪائونٽس جي بائيو ميٽرڪ تصديق ٿيندي. ان کانپوءِ ڪنهن کي پگهار نه ملندي. چاهي ان جي لاءِ ڪو  مظاهرو ڪري يا احتجاج ڪري. هن چيو ته سمورن اسيمبلي ميمبرن، سنڌ جي سمورن سياسي جماعتن کي آئون اپيل ڪريان ٿو ته هو ”صاف، سرسبز ۽ پرامن سنڌ“ مهم کي ”اوون“ ڪن ۽ ان کي ڪامياب بڻائين. اسان نيڪ نيتي سان اها مهم شروع ڪري رهيا آهيون، هر ڪو پنهنجي علائقي کي صاف سٿرو ۽ سرسبز بڻائڻ لاءِ پنهنجو ڪردار ادا ڪري. هن چيو ته مهم جي شروعات ۾ ڪراچي ۾ هڪ لک کان وڌيڪ، جڏهن ته پوري صوبي ۾ 6 لک کان وڌيڪ ٻوٽا لڳايا ويندا ۽ ان کان پوءِ هر مهيني انهي حساب سان ٻوٽا صوبي ۾ لڳايا ويندا. هن چيو ته ان جو ڪريڊٽ حڪومت کي نه ڏنو وڃي بلڪ پاڻ ڪريڊٽ کنيو وڃي. ڪچهريون ڪوٺائين. جيڪي آفيسر کليل ڪهچريون نه ڪوٺائيندا ان خلاف ڪارروائي ٿيندي.

 

سپريم ڪورٽ سنڌ ۾ اغوا وارڌاتن تي ڳڻتي ظاهر ڪري ڇڏي

اسلام آباد (بيورو) ســُپريم ڪورٽ، سنڌ ۾ ڀنگ عيوض اغوا جي وارداتن بابت ڪيسن جو انگ وڌڻ تي ڳڻتي جو اظهار ڪيو آهي، عدالت، اهڙن ڏوهن جي خاتمي لاءِ قدم کڻڻ بابت حڪومت کان جواب طلب ڪري ڌرين کي نوٽيس جاري ڪري ڇڏيا. سنڌ ۾ ڀنگ عيوض اغوا ٿيندڙ ماڻهن جي ڪيس جي ٻڌڻي جسٽس اعجاز افضل جي سربراهي ۾ 2 رڪني بينچ ٻڌڻي ڪئي. عدالت، سنڌ ۾ اغوا جون وارداتون وڌڻ تي ڳڻتي جو اظهار ڪيو. جسٽس اعجاز افضل ريمارڪس ڏنا ته اهڙن ڏوهن جي خاتمي  لاءِ ڪهڙا قدم کنيا پيا وڃن، ان بابت عدالت کي ٻــُڌايو وڃي. جسٽس اعجاز افضل چيو ته جڳهه جڳهه تي ڪئمرائون لڳائڻ سان ڏوهن جو خاتمو نه ٿو آڻي سگهجي، ان لاءِ اڃا وڌيڪ اثرائتا قدم کڻڻا پوندا. هن چيو ته ملڪ اندر فوجداري ڪيسن ۾ فنگر پرنٽس ٽيڪنالوجي تي ڪم نه پيو وڃي، شڪايت ڪندڙ ٻيهر پوليس وٽ نه ٿو پيش ٿئي ته اها سڌي ريت پوليس جي ناڪامي آهي. جسٽس اعجاز افضل چيو ته پوليس ۾ سياسي بنيادن تي مقرريون ۽ بدليون ڪيون پيون وڃن. عدالت، اغوا جي وارداتن جي خاتمي لاءِ ڪهڙا قدم کنيا پيا وڃن ۽ ڏوهن واري سوچ ڪيئن ختم ڪجي، ان بابت عدالت کي آگاهه ڪيو وڃي. عدالت، سنڌ ۾ اغوا جي ڪيسن جي ٻڌڻي مارچ جي ٽئين هفتي تائين ملتوي ڪندي قانون جي وفاقي سيڪريٽري، چئني صوبن جي سيڪريٽريز ۽ لا ڪميشن کي نوٽيس جاري ڪري ڇڏيا آهن.

 

سنڌ اسيمبلي ۾ شهلا رضا جي رويي خلاف اپوزيشن جو احتجاج، ايم ڪيو ايم پاران جماعت اسلامي تي پابندي جو مطالبو

ڪراچي (اسٽاف رپورٽر) سنڌ اسيمبلي جي اجلاس دوران وقتي اسپيڪر شهلا رضا جي رويي خلاف مخالف ڌر ميمبرن هڪ ڀيرو ٻيهر احتجاج ڪيو جنهن سبب ايوان ۾ گوڙ پيدا ٿي ويو، جڏهن ته ايم ڪيو ايم هڪ ڀيرو ٻيهر پابندي مڙهيل تنظيمن خلاف ڪريڪ ڊائون ۽ جماعت اسلامي تي پابندي لاڳو ڪرڻ جو مطالبو ڪيو آهي. سنڌ اسيمبلي جو اجلاس وقتي اسپيڪر شهلا رضا جي صدارت هيٺ ٿيو. اجلاس جي شروعات ۾ ايم ڪيو ايم ڪارڪن دانش ڪليم جي قتل تي فاتحه خواني ڪرائي وئي جڏهن ته راولپنڊي جي امام بارگاهه قصر سڪينه تي حملي ۾ شهيد ٿيلن لاءِ پڻ مغفرت جي دعا گهــُري وئي. ٿر ۾ ڏڪار جي خاتمي ۽ رحمت لاءِ سنڌ اسيمبلي ۾ دعا ڪرائي وئي. پ پ ميمبر سهراب سرڪي ٺل شهر کي گئس فراهم ڪرڻ وارو ٺهراءُ پيش ڪيو جيڪو ايوان منظور ڪري ورتو. متحده ميمبر سيد سردار احمد پاران پيش ڪيل سنڌ ڪنزيومر پروٽيڪشن بل به اسيمبلي ميمبرن پاس ڪري ڇڏيو. وقتي اسپيڪر شهلا رضا جي رويي خلاف اپوزيشن ميمبرن هڪ ڀيرو ٻيهر ايوان ۾ احتجاج ڪيو. ميمبرن چيو ته مخالف ڌر کي مسئلا اٿارڻ جو موقعو نه ٿو ڏنو وڃي، شهلا رضا سندن پوائنٽ آف آرڊر نه ٿي وٺي جڏهن ته احتجاج ۾ مسلم ليگ نون ۽ فنڪشنل ليگ ميمبر به شامل ٿيا ۽ ايوان ۾ گوڙ پيدا ٿي ويو. شهلا رضا خلاف احتجاج باوجود ايوان جي ڪارروائي جاري رکي وئي. حڪومتي ميمبر عبدالستار راڄپر ايس ڊي او ورڪس اينڊ سروسز نوشهروفيروز خلاف استحقاق واري رٿ پيش ڪئي جيڪا ڪميٽي حوالي ڪئي وئي. ن ليگ ميمبر سورٺ ٿيٻو چيو ته صفائي لاءِ ٻهارو کڻڻ سٺي ڳالهه آهي، شرجيل ميمڻ کي ڪرپشن خلاف به ٻهارو کڻڻ گهــُرجي. سورٺ ٿيٻو چيو ته اسيمبلي ميمبرن کي صفائي لاءِ مڪاني ادارن واري وزير ٻهارو کڻڻ لاءِ تي چيو آهي پر جيڪڏهن شرجيل ميمڻ ڪرپشن خلاف به ٻهارو کڻي ته عوام کي فائدو ٿيندو. کــُليل آسمان هيٺ پيل ڪڻڪ جي معاملي تي نصرت سحر عباسي مهملي واري رٿ پيش ڪئي. فنڪشنل ليگ ميمبر نصرت سحر عباسي چيو ته 3 لک ڪڻڪ جون ٻوريون ڀولاري گودام ۾ پيل آهن. حڪومتي بينچن تي ويٺل ميمبرن طرفان مخالفت تي نصرت سحر عباسي، جذباتي ٿي وئي ۽ چيو ته کيس خبر هئي ته سرڪاري بينچن وارا مخالفت ڪندا. سوالن جوابن جي وقفي دوران صوبائي وزير سڪندر مينڌري چيو ته ليبر قانونن ۾ وڌيڪ ترميمن لاءِ حڪومت غور ڪري رهي آهي. سڪندر مينڌري چيو ته پورهيتن لاءِ 8 کان وڌيڪ قانون متعارف ڪرايا ويندا، جڏهن ته مزدورن جي حقن جي تحفظ ۽ صحت جي سهولتن جي فراهمي يقيني بڻائي ويندي. ڪراچي جي بلديا، ڪياماڙي، لانڍي ۽ ڪورنگي سميت مختلف علائقن ۾ اسڪولن جي سڪيورٽي تي ايم ڪيو ايم ميمبر ڪامران اختر ڌيان ڇڪايو نوٽيس پيش ڪيو. ڪامران اختر چيو ته اسڪولن کي نه چار ديواري آهي ۽ نه ئي ايمرجنسي کي منهن ڏيڻ لاءِ انتظام ڪيا ويا آهن. ڪامران اختر هڪ ڀيرو ٻيهر مطالبو ڪيو ته پابندي مڙهيل تنظيمن خلاف ڪريڪ ڊائون ۽ جماعت اسلامي تي پابندي مڙهي وڃي. ان موقعي تي صوبائي وزير شرجيل ميمڻ چيو ته ڪورنگي، اتحاد ٽائون، بلديا سميت مختلف اسڪول تعمير هيٺ ۽ چوڪيدار مقرر آهن. شرجيل ميمڻ چيو ته ڪياماڙي، ملير ٽائون ۾ مختلف اسڪول بائونڊري وال کانسواءِ ڪم ڪري رهيا آهن. هن چيو ته بائونڊري وال کانسواءِ ڪي ايم سي اسڪولن جي چار ديواري جلد ڪرائي ويندي جڏهن ته چوڪيدارن کي هٿيارن جا لائسنس ڏنا ويندا. ٽنڊو ڄام ۽ ڊيٿا ٽول پلازه تي مقرر سرڪاري ٽيڪس کان اضافي رقم وصول ڪرڻ تي فنڪشنل ليگ ميمبر نند ڪمار ڌيان ڇڪايو نوٽيس پيش ڪيو. نندڪمار چيو ته چاليهه رپين بدران 50 رپيا وصول ڪيا وڃن ٿا جنهن تي صوبائي وزير شرجيل ميمڻ چيو ته مقامي ماڻهن کي ٽيڪس کان آجو ڪرڻ لاءِ قدم کنيا پيا وڃن جڏهن ته ڪمرشل گاڏين جي مالڪن کي ٽيڪس ڏيڻي پوندي ۽ وڌيڪ وصولي تي ڪارروائي ٿيندي. ايم ڪيو ايم ميمبر خواجا اظهار الحسن اسيمبلي ۾ ڳالهائيندي چيو ته هائوس بزنس ايڊوائزري ڪميٽي جي جوڙجڪ دير جو شڪار آهي. نصرت سحر عباسي چيو ته انتهائي سخت طريقيڪار سبب ميمبر پنهنجا مسئلا ايوان ۾ نه ٿا اٿاري سگهن، بزنس ايڊوائزري ڪميٽي بنا دير جوڙي وڃي. ايوان ۾ مختلف معاملن تي بحث جاري هو ته وقتي اسپيڪر اجلاس سومر تائين ملتوي ڪري ڇڏيو.

 

14-2013 دوران ملڪي اميرن دبئي ۾ 430 ارب رپيا سيڙپڪاري ڪئي: عمران خان

اسلام آباد (بيورو) چيئرمين تحريڪ انصاف عمران خان گذريل ٻن سالن ۾ بيروني ملڪ منتقل ٿيندڙرقم جو تفصيل جاري ڪري ڇڏيو سماجي رابطي جي ويب سائيٽ ٽيوٽر تي پنهنجي پيغام ۾ عمران خان چيو ته 14-2013 جي دوران ملڪي اميرن دبئي ۾ 430 ارب رپيا سيڙپڪاري ڪئي جڏهن ته وزيراعظم نوازشريف ۽ اڳوڻي صدر آصف علي زرداري جا آمريڪا يورپ ۽ خليجي ملڪن ۾ پراپرٽي بئنڪ اڪائونٽ ۽ زيور پيا آهن ٻنهي وڏين جماعتن جي سربراهن پنهنجي غير قانوني دولت بچائڻ لاءِ هڪٻئي سان مفاهمت ۽ ڳٺجوڙ ڪئي آهي هن چيو ته اميرن پاران 859.7 ملين آمريڪي ڊالر سوئس بئنڪن ۾ جمع ڪرايا ويا جڏهن ته حڪمران جماعت سوئس بئنڪ ۾ آصف زرداري ۽ بينظير ڀٽو جا 60 ملين ڊالر واپس آڻڻ لاءِ هن وقت تائين ڪجهه ناهي ڪيو عمران خان اسحاق ڊار تي به تنقيد ڪندي چيو ته رڪارڊ تي موجود آهي ته اسحاق ڊار چيو هو ته هن پنهنجي پٽ جي دبئي ڪائونٽ ۾ 40 لک آمريڪي ڊالر منتقل ڪيا هئا. جيڪي ٽيڪس کان بچڻ لاءِ منتقل ڪيا ويا جڏهن ته هن ايف بي آر کي به پئسا واپس آڻڻ کان روڪي ڇڏيو آهي عمران خان چيو ته سمورن سياستدانن کي پنهنجا اثاثا ۽ بيروني ملڪ موجودب پراپرٽي ظاهر ڪرڻ گهرجي ۽ وزيراعطم نوازشريف ۽ آصف زرداري کان شروعات ڪرڻ گهرجي. عمران خان چيو ته پي ٽِ آءِ اقتدار ۾ اچڻ کان پوءِ سمورن پاڪستانين جا ملڪ ۽ ملڪ کان ٻاهر اثاثا ظاهر ڪري ڏيکاريندي ۽ صرف لٽيل رقم واپس نه آڻيندي پر ملڪ ۾ سيڙپڪاري جا بهتر موقعا فراهم ڪيا ويندا ۽ ٻاهرين ملڪن ۾ رهندڙ پاڪستانين کي به ملڪ ۾ سيڙپڪاري جي دعوت ڏينداسين.

 

اتر وزيرستان : فورسز ۽ دهشتگردن وچ ۾ چڪريو، 5 دهشتگرد مارجي ويا

اُتر وزيرستان (مانيٽرنگ ڊيسڪ) فوج جي سڌسماءَ جي شعبي آئي ايس پي آر مطابق اتروزيرستان جي علائقي دتا خيل ۾ فورسز ۽ دهشتگردن وچ ۾ چڪرين دوران پنج دهشتگرد مارجي ويا. ترجمان ان ڳالهه جي تصديق ڪئي آهي ته چڪرين دوران هڪ اهلڪار به شهيد ٿي ويو آهي. فوج پاران دهشت گردن خلاف ڪاررواين ۾ هينئر تائين ڪيترائي ويڙهاڪ مارجي چڪا آهن. جڏهن ته دهشت گردن جي قبضي هيٺ علائقن کي به خالي ڪرايو ويو آهي.