تازيون خبرون

Daily Archives: February 20, 2015

دهشتگردن جا ڏينهن ڳڻجي چڪا، کين لکڻ نه ڏينداسين: نواز شريف

ڪوئيٽا (م.ڊ) وزيراعظم ميان نواز شريف چيو آهي ته دهشتگرد جيتري به ڪوشش ڪن پاڪستاني قوم کي شڪست نٿا ڏئي سگهن، ظالمن کي هاڻي لڪڻ جــِي جاءِ به نه ملندي. ڪوئيٽا ۾ دهشتگردي ٽوڙ فورس جي پاسنگ آئوٽ پريڊ تقريب کي خطاب ڪندي نواز شريف چيو ته دهشتگرديءَ خلاف سڄي قوم متحد ٿي چڪي آهي. وزيراعظم چيو ته پاڪستاني قوم کي شڪست ڏيڻ جا خواب ڏسندڙن کي ڪجهه به پلئه نه پوندو. ميان نواز شريف چيو ته وفاق جيان صوبائي حڪومتون به قومي ايڪشن پلان تي عمل ڪري رهيون آهن، دهشتگردن کي هاڻي لڪڻ جي به جاءِ نه ملندي. وزيراعظم چيو ته سڄي ملڪ ۾ هڪ ڀيرو ٻيهر دهشتگرد ڪارروايون تيز ٿي چڪيون آهن، جيڪو ان ڳالهه جو ثابت آهي ته شدت پسند هاڻي بوکلاهٽ جو شڪار ٿي ويا آهن. نواز شريف چيو ته دهشتگرديءَ خلاف جنگ ايندڙ نسل جي بقا جي جنگ آهي، جنهن ۾ قوم کي هر صورت ۾ ڪاميابي ماڻڻي آهي. ان کان اڳ دهشتگردي ٽوڙ فورس جي پهرين دستي جي پاسنگ آئوٽ پريڊ تقريب دوران بهادر جوانن پنهنجي صلاحيتن جو عملي مظاهرو پڻ ڪيو. تقريب ۾ آرمي چيف جنرل راحيل شريف، بلوچستان جو گورنر محمد خان اچڪزئي، وڏو وزير عبدالمالڪ بلوچ، سرحدي معاملن وارو وزير عبدالقادر بلوچ، نون ليگ جو سينيئر اڳواڻ ثناءُ الله زهري سميت بلوچستان اسيمبلي جا ميمبر به موجود هئا. پاسنگ آئوٽ پريڊ تقريب دوران ڪائونٽر ٽيرر ِازم فورس جي پهرين دستي ۾ شامل بهادر جوانن پنهنجي صلاحيتن جو عملي مظاهرو پڻ ڪيو جنهن جي تقريب ۾ شريڪ شخصيتن ڀرپور ساراهه ڪئي. دهشتگردي ٽوڙ فورسز جي پهرين مرحلي ۾ پاس آئوٽ ٿيندڙن ۾ 200 اهلڪار شامل آهن جن ۾ 18 عورتون به آهن جڏهن ته سمورن اهلڪارن جو تعلق پوليس سان آهي.

 

شڪارپور شهداءَ ڪميٽي جون حڪومت سان ڳالهيون ڪامياب، ڌرڻو ختم ڪرڻ جو اعلان

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته شڪارپور سانحي جهڙو واقعو صوبي ۾ ڪڏهن به نه ٿيو آهي، واقعي تي تمام گهڻو افسوس آهي، دهشتگردي خلاف ڀرپور ڪارروائيون ڪنداسين، ڌرڻو ختم ڪرڻ تي شهداءِ شڪارپور ڪاميٽي جو ٿورائتو آهيان ۽ جيڪي 20 نڪتا پيش ڪيا ويا آهن، انهن تي عمل ڪيو ويندو. اهڙن خيالن جو اظهار هن خميس ڏينهن چيف منسٽر هائوس ۾ شهداءِ ڪاميٽي جي ميمبرن علامه مقصود علي ڊومڪي ۽ علامه المجيد بهشتي سان گڏ پريس ڪانفرنس دوران ڪيو. سنڌ جي وڏي وزير چيو ته دهشت گرد سڄي ملڪ ۾ بزدلاڻا حملا ڪري رهيا آهن، پر وفاقي ۽ صوبائي حڪومتن جو فوج سان گڏجي دهشتگردن جي خاتمي جو عزم ڪيل آهي. هن چيو ته شڪارپور سانحي بعد سنڌ حڪومت پاران متاثرن لاءِ ڀرپور امدادي ڪارروائيون ڪيون ويون ۽ شهداءِ ڪاميٽي پاران پيش ڪيل 20 نڪتن تي عمل ڪيو ويندو ۽ شڪارپور سوڌو سڄي صوبي ۾ جتي به دهشتگردن جون پناهه گاهون هونديون، انهن کي ختم ڪيو ويندو. سيد قائم علي شاه چيو ته محبت ،ڀائپي ۽ ڳالهين سان سڀ معاملا حل ٿي ويندا آهن. شهداءِ ڪاميٽي جي اڳواڻ علامه مقصود علي ڊومڪي چيو ته شڪارپور سانحي بعد ڪيل مارچ دهشتگردن خلاف هو ۽ امن لاءِ هو. هن چيو ته سنڌ جي وڏي وزير سيد قائم علي شاهه سان ڪامياب ڳالهين بعد ڪراچي نمائش چورنگي ۾ جاري ڌرڻو ختم ڪرڻ جو اعلان ڪيون ٿا. هن چيو ته اميد آهي ته سنڌ حڪومت شهيدن جي وارثن کي هڪ – هڪ نوڪري ڏيڻ جو واعدو پاڙيندي ۽ 20 نڪتن تي عمل ڪندي. ان موقعي تي اطلاعات واري صوبائي وزير شرجيل انعام ميمڻ گڏيل طور تي منظور ڪيل 20 نڪتا پڙهي ٻڌايا جن ۾ سڄيءَ سنڌ ۾ خاص طور تي شڪارپور ضلعي ۾ ايپيڪس ڪاميٽي جي نگراني هيٺ پاڪ رينجرز ۽ پوليس جو گڏيل آپريشن ڪيو ويندو، دهشتگردن جي مدد ڪندڙ سڀني مرڪزن ۽ مدرسن خلاف آپريشن ڪيو ويندو، شڪارپور سانحي جي ايف آءِ آر سان گڏائي دهشتگردن کي جاچ ۾ شامل ڪيو ويندو. شڪارپور سانحي جو ڪيس فوجي عدالت ۾ موڪليو ويندو، شڪارپور سانحي جي جي آءِ ٽي جوڙي ويندي ۽ انڪوائري جا تفصيل شهداءِ ڪاميٽي سان شيئر ڪيا ويندا. ان کان علاوه ٻيا نڪتا پن شامل آهن.

 

سينيٽ اليڪشن، ن ليگ جي 4 اميدوارن جي نامزدگي ڪاغذن تي اعتراض، فيصلو محفوظ

اسلام آباد (بيورو) سينيٽ چونڊ لاءِ اميدوارن جي ڪاغذن جي جانچ پڙتال جو عمل جاري آهي جڏهن ته حڪمران جماعت جي اميدوارن پرويز رشيد، راجا ظفرالحق ۽ پروفيسر ساجد مير جي نامزدگي ڪاغذن تي اعتراض واريا ويا جنهن کانپوءِ اليڪشن ڪميشن فيصلو محفوظ ڪري ورتو آهي. جڏهن ته فاٽا جي 21 اميدوارن جا نامزدگي ڪاغذ رد ڪيا آهن. سينيٽ چونڊن لاءِ نامزدگي ڪاغذن جي جاچ جي پهرئين ڏينهن لاهور ۾ 12 اميدوارن جا ڪاغذ منظور ۽ 2 جا رد ٿي ويا جڏهن ته مسلم ليگ ن جي راجا ظفرالحق، پرويز رشيد، سعود مجيد، عبدالقيوم ۽ سجاد مير جي ڪاغذن تي اعتراض سامهون اچي ويا، سينيٽ اليڪشن لاءِ نامزدگي ڪاغذن جي جاچ جو سلسلو شروع ٿيندي ئي اليڪشن ڪميشن پنجاب آفيس گهما گهمي جو مرڪز بڻجي ويو پهرئين ڏينهن جن اميدوارن جا ڪاغذ منظور ٿيا انهن ۾ مسلم ليگ ن جو مشاهد الله خان، چوڌري تنوير، غوث محمد نيازي، نهال هاشمي، خواجه محمود احمد، سليم ضياءَ، ملڪ نوشير، نجمه حميد، ڪرن ڊار، عائشه رضا فاروق شامل آهن پيپل زپارٽي جي اميدوارن مان نديم افضل چن ۽ ثروت ملڪ جا ڪاغذ به منظور ڪيا ويا، مسلم ليگ ن جي راجا ظفرالحق، پرويز رشيد، سعود مجيد، عبدالقيوم ۽ ساجد مير جي ڪاغذن تي اعتراض سامهون آيا آهن جڏهن ته آزاد اميدوارن ملڪ عبدالرحمان ۽ سرفراز قريشي جا ڪاغذ رد ڪيا ويا آهن.

 

13سالن ۾ پاڪستان ڪيترائي نائين اليون ڏٺا، پر امن ملڪ جنگي علائقي ۾ تبديل ٿي ويو: چوڌري نثار

هوسٽن (م.ڊ) وفاقي گهرو وزير چوڌري نثار چيو آهي ته گذريل 13 سالن ۾ پاڪستان ڪيترائي نائين اليون ڏٺا پاڪستان مڪمل طور تي پرامن ملڪمان جنگي علائقي ۾ تبديل ٿي ويو دهشتگردي ٽوڙ جي ڪوششن ۾ پاڪستان جي سياسي ۽ فوجي قيادت متحد آهي حڪومت دهشتگردي جي لعنت ۽ انتهاپسنداڻي سوچ جي انت لاءِ جامع قومي ايڪشن پلان تي چڱي طرح عمل ڪري رهي آهي عبادتگاهون ۽ اسڪول بند نٿا ڪري سگهجن ماڻهن کي مارڪيٽ ۾ وڃڻ کان نٿو روڪي سگهجي دهشتگردي جي مڪمل خاتمي ۾ وقت لڳندو هو يو ايس انسٽيٽيوٽ آف پيس کي خطاب ڪري رهيو هو چوڌري نثار چيو ته جنگيون ڪڏهن به مسئلي جو حل ناهن هونديون نائين اليون واقعي ۾ ڪوئي پاڪستاني ملوث نه هو گهرو وزير چيو ته پاڪستان 30 لک افغان مهاجرن جي مهمان نوازي ڪري رهيو آهي خطي ۾ امن ۽ استحڪام لاءِ پاڪ افغان لاڳاپا اهم آهن پاڪستان ۽ افغانستان جا تعلقات تاريخي طور تي ڪڏهن به بهتر ناهن رهيا هن چيو ته نائين لايون واقعي ۾ ڪوئي پاڪستاني ملڪث نه هو پاڪستان تي اڳ ايتري توجهه نه ڏني ويئي جيڪا هاڻي ڏني پئي وڃي دهشتگردي خلاف جنگ کي جنهن شئي سڀ کان گهڻو متاثر ڪيو اهو اتحاد جو فقدان هو پاڪستان جهڙي طرح هاڻي متحد آهي گذريل 13 سالن ۾ نه ٿيو هو چوڌري نثارعلي خان چيو ته 16 ڊسمبر تي پشاور ۾ آرمڊ پبلڪ اسڪول جي شاگردن جي دهشتگردن جي حملي ۾ شهادتن سياسي جماعتن سول سوسائٽِ ميڊاي ۽ سيڪيورٽي فورسز سميت پوري پاڪستاني قوم کي متحرڪ ڪيو ۽ ملڪ فيصلو ڪيو ته مشڪل صورتحال جو مقابلو ڪرڻ لاءِ پهريون قدم کنيو وڃي هن چيو ته شدت پسندن سافٽ ٽارگيٽ کي نشانو بڻائين ٿا جهڙوڪ اسڪول عبادتگاهه ۽ مارڪيٽ آهن هن چيو ته فرقيواراڻي تشدد جي خاتمي ۾ وقت لڳندو پاڪستان ۾ فرقيواريت گذريل 30 سالن کان آهي ۽ ان جي خاتمي ۾ وقت لڳندو هن چيو ته دولت اسلاميه بابت ڳالهائيندي چيو ته دولت اسلاميه سينٽرل اوڀر ۾ آهي هن چيو ته مان واضح ڪري سگهان ٿو ته دولت اسلاميه نه ته پاڪستان ۽ نه ئي افغانستان ۾ موجود آهي. چوڌري نثار ٻڌايو ته دهشتگردن خلاف آپريشن شروع ٿيڻ کان پوءِ انٽيليجنس ادارن ۾ تعاون وڌي چڪو آهي. ڪالعدم تنظيمن جي حوالي سان ڳالهائيندي هن چيو ته مون کي هي ڳالهه ڪندي شرم اچي رهيو آهي ته ڪالعدم تنظيمن جي حوالي سان ڪائي واضح پاليسي نه هئڻ سبب ڪيتريون ئي ڪالعدم تنظيمون نالو مٽائي پاڪستان ۾ فعال آهن. چوڌري نثار ڊينمار فرانس ۽ آسٽريليا ۾ دهشتگردي کان پوءِ ٿيندڙ ڪانفرنس ۾ شرڪت لاءِ آمريڪا ۾ آيو.

 

پاڪستان افغان حڪومت ۽ طالبان وچ ۾ امن ۽ استحڪام لاءِ مصالحتي عمل جي حمايت ڪري ٿو: ترجمان پاڪ فوج

راولپنڊي (بيورو) پاڪ فوج جي ترجمان چيو ته پاڪستان افغان حڪومت ۽ طالبان وچ ۾ امن ۽ استحڪام لاءِ مصالحتي عمل جي حمايت ڪري ٿو ۽ هي معاملو افغانستان سان لاڳاپيل هر اجلاس ۾ غور هيٺ آندو وڃي ٿو ڳالهين جي ڪاميابين جي ذميواري لاڳاپيل ڌرين تي آهي پاڪستان خلوص سان اهڙي عمل جي حمايت ڪندو اميد آهي ته ڌريون ذميواري جو مظاهرو ڪنديون خميس تي آءِ ايس پي آر جي هڪ ترجمان افغان حڪومت ۽ افغان طالبان وچ ۾ امن ڳالهين جي حوالي سان ميڊيا ۾ ڪجهه حصن  ڇپيل خبرن تي تبصرو ڪندي چيو آهي ته افغان حڪومت ۽ افغان طالبان وچ ۾ افغانستان ۾ جٽادار امن ۽ استحڪام لاءِ مصالحتي عمل جو معاملو افغانستان سان لاڳاپيل هر اجلاس ۾ غور هيٺ آندو وڃي ٿو. ترجمان چيو ته اسان کي اميد آهي ته سموريون ڌريون ذميواري جو مظآهرو ڪنديون ته جيئن امن جي مخالف پنهنجن ارادن ۾ ناڪام ٿي سگهن.

 

وڏي وزير سڀني ضلعي بار ايسوسيئيشنن لاءِ سالياني گرانٽ باقاعدگيءَ سان رکڻ جو اعلان ڪري ڇڏيو

ڪراچي (اسٽاف رپورٽر) سنڌ جي وڏي وزير سنڌ هاءِ ڪورٽ بار ايسوسيئيشن ۽ صوبي جي سڀني ڊسٽرڪٽ بار ايسوسيئيشنز لاءِ سنڌ حڪومت جي سالياني بجيٽ ۾ باقاعدگي سان مالي گرانٽ رکڻ ۽ صوبي ۾ ڪانٽريڪٽ تي ڪم ڪندڙ سڀني ڊپٽي ڊسٽرڪٽ اٽارنيز کي به هڪ ٻن هفتن ۾ ريگيولر ڪرڻ جو اعلان ڪيو آهي. وڏي وزير اهو به اعلان ڪيو آهي ته ڪراچي بار ايسوسيئيشن کي خاص گرانٽ ۽ 17 شهيد وڪيلن جي وارثن کي مالي مدد ٻن هفتن ۾ ڏني ويندي. اهي اعلان هن خميس ڏينهن ڪراچي بار ايسوسي ايشن (ڪي بي اي) جي 18 رڪني وفد کي سي ايم هائوس ۾ خطاب ڪندي ڪيا. وفد جي اڳواڻي ڪي بي اي جو صدر ايڊووڪيٽ نعيم قريشي ڪري رهيو هو. وڏي وزير جو خاص مددگار ضياءُ الحسن لنجار جيڪو سنڌ بار ڪائونسل جو وائيس چيئرمين به آهي، اجلاس ۾ شريڪ هو. اجلاس کي خطاب ڪندي سنڌ جي وڏي وزير سيد قائم علي شاهه چيو ته وڪيل اسان جا مشڪل وقت جا ساٿي آهن ۽ هنن ملڪ ۾ جمهوريت ۽ انساني حقن جي بالادستي لاءِ مثالي قربانيون ڏنيون آهن. وڏي وزير وفد کي خاطري ڪرائي ته ٽارگيٽ ڪلنگ جي مختلف واقعن ۾ شهيد ٿيل 17 وڪيلن جي پونئرن لاءِ مالي سهائتا جا چيڪ تيار ٿي چڪا آهن جيڪي ٻن هفتن اندر سندن وارثن حوالي ڪيا ويندا. هن چيو ته وڪيلن کي پنهنجي تحفظ لاءِ هٿيارن جا لائيسنس به ڏنا ويندا. ان کان علاوه سنڌ جي وڏي وزير صوبي ۾ ڪانٽريڪٽ تي ڪم ڪندڙ سڀني ڊپٽي ڊسٽرڪٽ اٽارنيز کي مستقل ڪرڻ، سٽي ڪورٽ ۾ قائم ڊسپينسري لاءِ هڪ ايمبولينس، 2 ڊاڪٽر ۽ دوائون فراهم ڪرڻ جو به اعلان ڪيو. وڏي وزير ڪي بي اي جي سفارش تي ڪي بي اي جي 11 ميمبرن کي جسٽس آف پيس جو لائيسنس جاري ڪرڻ جي منظور ڏني. ان کان علاوه وڪيل برادري جي سهولتن ۽ عدالتي ڪم جي رفتار وڌائڻ لاءِ سٽي ڪورٽ ڪراچي کان هاءِ ڪورٽ تائين 16 سيٽر شٽل سروس شروع ڪرڻ جو به اعلان ڪيو.

 

مظفر ڳڙهه: کوهه جي کوٽائي دوران ڪرنٽ لڳڻ سبب 8 پورهيت فوت، 2 زخمي

مظفر ڳڙهه(اي پي پي) پنجاب جي شهر مظفر ڳڙهه لڳ ڳوٺ گوڌپور کوهه جي کوٽائي دوران بجلي جي شاڪ لڳڻ سبب 8 پورهيت فوت ٿي ويا جڏهن ته 2 ڄڻا زخمي ٿي پيا. خميس ڏينهن مظفر ڳڙهه کان 35 ڪلوميٽر پري شاهه جمال ٿاڻي جي حد ۾ واقع ڳوٺ ۾ بدنصيب پورهيت کوهه جي کوٽائي بعد ان ۾ هڪ لوهه جو پائيپ لڳائي رهيا هئا ته اهو پائيپ مٿان کان گذرندڙ هاءِ پاور بجلي جي لائين سان ٽڪرائجي ويو جنهن جي نتيجي ۾ ڪرنٽ لڳڻ سبب 8 پورهيت فوت ٿي ويا ۽ 2 زخمي ٿي پيا. فوت ٿيل پورهيت جي سڃاڻپ ظفر حسين، محمد نذر، قادر بخش، منظور احمد، الهداد، محمد اسلم، محمد شاهد ۽ محمد رياض جي نالن سان ٿي آهي جڏهن ته زخمين ۾ محمد حفيظ ۽ عبدالله شامل آهن. واقعي بعد فوتين جا مڙهه ۽ زخمين کي ضلعي هيڊڪوارٽر اسپتال مظفر ڳڙهه پهچايو ويو آهي.

 

پرويز رشيد نامزدگي ڪاغذن تي اعتراضن جو جواب ڏئي ڇڏيو

اسلام آباد (بيورو) سڌ سماءَ واري وفاقي وزير پرويز رشيد نامزدگي ڪاغذن تي اعتراضن جو تحريري جواب ڏئي ڇڏيو، لاهور ۾ ميڊيا سان ڳالهائيندي هن جو چوڻ هو ته هن جي ڪرائي جي گهرن کي به ذاتي سمجهي ويو جيڪڏهن اهي  گهر ان جا آهن ته هو ٽي ئي گهر اعتراض ڪندرن جي نالي ڪرڻ لاءِ تيار آهي.

 

سنڌ حڪومت مرزا خاندان جي سيڪيورٽي واپس وٺي ڇڏي

بدين (ڊ ر) پيپلزپارٽي پاران باضابطا طور تي لاتعلقي ظاهر ڪرڻ جي اڳئين ڏينهن ڊاڪٽر ذوالفقار مرزا جي فارم هائوس ۽ بدين ضلعي ۾ ان جي خانداني پراپرٽي تي مقرر پوليس فورس هٽائي ويئي پوليس ذريعن ٻڌايو ته بدين ۾ مرزا ۽ سندس زال اڳوڻي قومي اسيمبلي ميمبر ڊاڪٽر فهميده مرزا جي زمينن تان پوليس هٽائڻ جو حڪم صوبائي حڪومت جي وڏڙن ڏنو ذريعن ٻڌايو ته خادان ٽائون جي ويجهو مرزا خاندان جي فارم ۽ ان سان لاڳاپيل شگرمل بدين ۾ مور جهاڙ ۽ ٻين علائقن ۾ موجود پراپرٽي تي سيڪيورٽي مقرر ڪئي ويئي هئي جڏهن ته هاڻي اتي مقرر پوليس اهلڪارن کي جلد بدين ايس ايس پي دفتر رپورٽ ڪرڻ لاءِ چيو ويو پاڪستان جي اڳوڻي صدر آصف علي زرداري جي ماضي ۾ بلڪل ويجهو رهندڙ ڊاڪٽر ذوالفقار مرزا کي ڪجهه ڏينهن اڳ پارٽي قيادت خلاف مختلف ٽي وي چينلن تي جارحاڻا بيان ڏيڻ تي پ پ پ سينٽرل ايگزيڪيوٽو ڪائونسل مان معطل ڪيو ويو هڪ سينيئر پوليس آفيسر نالو نه ظاهر ڪرڻ جي شرط تي ٻڌايو ته مرزا خاندان کي مليل غير ضروري پروٽوڪول واپس ورتو ويو هن وضاحت ڪئي ته قومي اسيمبلي ميمبر ڊاڪٽر فهيمده مرزا ۽ صوبائي اسيمبلي ميمبر حسنين مرزا کي قانون مطابق پروٽوڪول ۽ سيڪيورٽي ملندي رهندي بدين ايس ايس پي خالد مصطفيٰ رابطو ڪرڻ تي ڪجهه پوليس اهلڪارن کي دفتر رپورٽ ڪرڻ جا حڪم ڏيڻ جي تصديق ڪئي سندس موقف هو ته هي پوليس اهلڪار ضلعي ۾ ڪجهه غير ضروري هنڌن ۽ چيڪ پوسٽن تي مقرر هئا ٻئي پاسي ڊاڪٽر مرزا جي ٻين ساٿين پوليس اهلڪارن کي واپس گهرائڻ تي حڪومت تي سخت تنقيد ڪندي ان کي انتقامي ڪارروائي ڪوٺيو ٽنڊوباگو ۾ صحافين سان ڳالهائيندي انهن الزام مڙهيو ته صوبائي حڪومت ڊاڪٽر مرزا کي ڪرپشن ۽ نااهل پ پ پ وزيرن جي خلاف آواز اٿارڻ تي سزا ملي رهي آهي.

 

رحمان ملڪ ڏکڻ پنجاب ۾ آپريشن جو مطالبو ڪري ڇڏيو

ڪراچي(اسٽاف رپورٽر) پ پ اڳواڻ رحمان ملڪ ڏکڻ پنجاب ۾ آپريشن ڪرڻ جو مطالبو ڪندي چيو آهي ته ڏکڻ پنجاب ۾ دهشتگردن کي منظم طريقي سان مدد ملي رهي آهي جنهن ڪري فوري طور آپريشن شروع ڪيو وڃي… ڪراچي ۾ صوبائي اليڪشن ڪمشنر آڏو سينيٽ جي نامزدگي فارمن جي ڇنڊ ڇاڻ جي موقعي تي ميڊيا سان ڳالهائيندي رحمان ملڪ چيوته افغانسان کي عالمي سياست جي هٿن ۾ کيڏڻ بجاءِ پاڪستان حڪومت سان ٽيبل تي ويهي دهشتگردي جي خاتمي لاءِ ڳالهيون ڪرڻ گهرجن. هڪ سوال جي جواب ۾ رحمان ملڪ چيو ته ايڪشن پلان کي اڃان ڏيڍ مهينو گذريو آهي، دهشتگردي جي خاتمي لاءِ مائينڊ سيٽ تبديل ڪرڻ جي ضرورت آهي، افغان حڪومت جو رويو دهشتگردي جي خاتمي لاءِ اڃان مڪمل سهڪاري ناهي. هن وڌيڪ چيو ته پشاور سانحي جي معصوم ٻارن جا قاتل ملا فضل الله ۽ فقير محمد افغانستان ۾ ويهي ٻارن کي قتل ڪرڻ جون دعوائون ڪري رهيا آهن، آرمي چيف جنرل راحيل شريف پاران انهن خلاف ڪارروائي لاءِ افعان حڪومت تي دباءُ وجهڻ وقتائتو آهي ۽ اڃان به دٻاءُ وڌائڻ گهرجي. هڪ سوال جي جواب ۾ رحمان ملڪ چيو ته پ پ ۽ ايم ڪيو ايم جو گڏ هلڻ ضروري آهي جن کي هڪ ٻي جي مينڊيٽ جو احترام ڪرڻ گهرجي، 40- 60 سيڪڙو واري فارمولي تي ڳالهيون هلي رهيون آهن ۽ ترت مثبت نتيجا سامهون ايندا……