تازيون خبرون

Daily Archives: February 19, 2015

نيشنل ايڪشن پلان تي عملدرآمد جا نتيجا نظر اچڻ گهرجن: وزيراعظم

ڪوئيٽا(م.ڊ) وزيراعظم نواز شريف چيو آهي ته قومي ايڪشن پلان جا ڪجهه نقطا ڏکيا آهن سڀني تي عمل ڪرڻ آسان ناهي، ايڪشن پلان تي فوج ۽ سول قيادت هڪ پچ تي آهن، صوبا پلان تي اثرائتي نموني عمل ڪن، وفاق صوبن جي هر قسم جي مدد ڪرڻ لاءِ تيار آهي. وزيراعظم نواز شريف جي صدارت هيٺ گورنر هائوس بلوچستان ۾ ايپڪس ڪميٽي جي اجلاس ۾ وزيراعليٰ عبدالمالڪ بلوچ، آرمي چيف جنرل راحيل شريف، ڊي جي آءِ ايس آءِ، ڊي جي آءِ ايس پي آر ۽ ٻين عملدارن شرڪت ڪئي. وزيراعظم نواز شريف اجلاس کي خطاب ڪندي چيو آهي ته پارليامينٽ فوجي عدالتن جي منظوري ڏئي چڪي آهي، قومي ايڪشن پلان اتفاق راءِ سان جوڙيو ويو آهي ان تي عمل ڪيو وڃي، بلوچستان حڪومت جي مڪمل مدد ڪئي ويندي. وزيراعظم چيو ته ايڪشن پلان جا ڪجهه نقطا ڏکيا آهن پر قومي سلامتي لاءِ انهن تي عمل ڪرڻو پوندو. وزيراعظم وڌيڪ چيو ته خوشي آهي ته وفاقي ۽ صوبائي حڪومت ۽ فوجي قيادت گڏ ويٺي آهي، سياسي ۽ فوجي قيادت وڏي غور ويچار کانپوءِ ايڪشن پلان جوڙيو، قومي حڪمت عملي تحت 21 هين آئيني ترميم جي منظوري ڏني وئي، سمورا صوبا پلان تي اثرائتي نموني عمل ڪن.. اجلاس ۾ صوبائي حڪومت ايڪشن پلان تي عمل جي حوالي سان بريفنگ ڏني، اجلاس ۾ ايپڪس ڪميٽي جي فيصلن تي غور ويچار ڪيو ويو. ايپڪس ڪميٽي جي اجلاس ۾ دفاع وارو وزير خواجه آصف، وفاقي وزير خواجه سعد رفيق، اڳوڻو وزيراعظم ظفرالله خان جمالي، مسلم ليگ ن جو صوبائي صدر ثناءُ الله زهري ۽ ٻيا شريڪ آهن..

 

آمريڪي وفد جي آرمي چيف سان ملاقات، افغان صورتحال تي ويچار

راولپنڊي (م.ڊ) آمريڪي ڪانگريس جي وفد دهشتگردي خلاف جنگ ۾ پاڪستان جي ڪردار ۽ آپريشن ضرب عضب ۾ حاصل ٿيندڙ ڪاميابين کي ساراهيو آهي آءِ ايس پي آر مطابق اربع تي هتي چيف آف آرمي اسٽاف جنرل راحيل شريف سان آمريڪي ڪانگريس جي وفد سينيٽ آرمڊ سروس ڪميٽي جي ريڪنگ ميمبر سينيٽر جيڪ ريڊ جي اڳواڻي ۾ ملاقات ڪئي ملاقات ۾ گڏيل دلچسپي جا معاملا ۽ افغانستان جي صورتحال تي ڳالهيون ڪيون ويون آمريڪي وفد جي سربراهه ان موقعي تي ڳالهائيندي چيو ته دهستگردي خلاف پاڪستان جو ڪردار نهايت واکاڻ جوڳو آهي هن آپريشن ضرب عضب دوران پاڪستان جو سيڪ يورٽي فورسز جي ڪاميابين کي ساراهيو ذريعن مطابق آمريڪي پرڏيهي وزارت پاڪستان جي آرمي چيف جنرل راحيل شريف جي افغانستان جي دوري جي آجيان ڪندي چيو ته آمريڪا افغان تعاون وڌائڻ لاءِ وڌيڪ ڪوششن جي حمايت ڪندو ترجمان جين ساڪي چيو ته افغانستان ۽ پاڪستان ۾ تعاون جي آجيان ڪيون ٿا آرمي چيف جي دوري سان آفغانستان ۽ پاڪستان جا ٻطرفو لاڳاپا بهتر ۽ تعاون وڌڻ جي ڪوششن ۾ اضافو ٿيندو جنهن جي اسان حمايت ڪنداسين هن چيو ته پاڪ افغان تعاون وڌائڻ لاءِ وڌيڪ ڪوششن جي ضرورت آهي.

 

عالمي برادري سامونڊي قانونن جي ڀارتي ڀڃڪڙي جو نوٽيس وٺي: خواجه آصف

اسلام آباد(بيورو) دفاع واري وفاقي وزير خواجه آصف چيو آهي ته عالمي برادري سامونڊي قانونن جي ڀارتي ڀڃڙي جو نوٽيس وٺي خطي ۾ امن جي خواهش کي ڪمزور نه سمجهيو وڃي، دفاع واري وزير خواجه آصف طرفان جاري ڪيل بيان ۾ چيو ويو آهي ته ڀارتي ڊي آءِ جي ڪوسٽ گارڊ پنهنجي حڪومتي دعويٰ کي رد ڪري ڇڏيو ۽ هڪ ڀيرو ٻيهر ثابت ٿي ويو ته ڀارت عالمي قانونن جي ڀڃڪڙي ڪئي، دفاع واري وزير جو چوڻ آهي ته عالمي برادري ان واقعي جو نوٽيس وٺي، خطي ۾ امن جي خواهش کي اسان جي ڪمزوري نه سمجهيو وڃي.

 

حڪومت نجڪاري جي شيطاني کان پاسو ڪري: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه گلگت بلتستان ۾ وفاقي وزير کي گورنر بنائڻ تي سخت ڪاوڙ جو اظهار ڪندي چيو آهي ته گلگت بلتستان ۾ مسلم ليگ (ن) اليڪشن کان اڳ ڌانڌلي ڪري رهي آهي (ن) ليگ عام چونڊن ۾ ڌانڌلين جي الزامن کان عمران خان مان جان ناهي ڇڏائي سگهي وزير کي گورنر بنائڻ قانوني طور تي غلط آهي حڪومت پنهنجو پاڻ کي تڪراري نه بڻائي اسيمبلي جو مدو 4 سال ڪيو وڃي ته ڪيترائي مسئلا گهٽجي ويندا مسلم ليگ (ن) نظام کي پنهنجي مرضي مطابق نه هلائي سڄي دنيا ۾ اپوزيشن ليڊر جي خط جو جواب ڏنو وڃي ٿو نوازشريف کي به منهنجي خطن جو جواب ڏيڻ گهرجي اسحاق ڊار ۽ شاهه محمود قريشي سان ملاقاتون ٿي چڪيون آهن حڪومت ۽ پي ٽي آءِ وچ ۾ ڳالهيون بحال ٿيڻ لاءِ پراميد آهيان اربع تي پارليمينٽ هائوس ٻاهران ميڊيا سان ڳالهائيندي خورشيد شاهه چيو ته گلگت بلتستان ۾ پاڪستان مسلم ليگ (ن) اليڪشن کان اڳ ڌانڌلي ڪري رهي آهي نگران حڪومت ۾ به 10 مان 7 وزير مسلم ليگ (ن) لاءِ ويا آهن چيف اليڪشن ڪمشنر به مسلم ليگ (ن) جي هڪ ورڪر کي بڻايو ويو اهي اڃا گورنر گلگت بلتستان به مسلم ليگ (ن) جي هڪ وزير کي بڻايو ويو آهي هن چيو ته مسلم ليگ (ن) اڃا تائين گذريل ڌانڏلي جي الزامن مان عمران خان کان جند ئي ناهي ڇڏائي سگهي گورنر گلگت بلتستان کي هٽائڻ کان اڳ ان کان نه پڇيو ويو ۽ نه ئي ٻڌايو ويو ته هڪ وزير کي گورنر مقرر ڪرڻ قانوني طور تي غلط آهي اسان قمرزمان ڪائره کي ان وقت گورنر بڻايو هو جڏهن گلگت بلتستان ۾ سسٽم نه ٺهيو هو سسٽم بڻجڻ کان پوءِ اسان هڪ عورت کي گورنر بڻايو آهي عورت گورنر جي لاڏاڻي کان پوءِ اسان منظور وٽو کي گورنر نه بڻايو پر گلگت بلتستان جي شهري کي گورنر بڻايو جيتوڻيڪ منظور وٽو جي خواهش به هئي ته کيس گورنر بڻايو وڃي هن چيو ته اها ڳالهه به سمجهه کان ٻاهر آهي ته نوازشريف حڪومت آخر ايڏا مسئلا ڇو ڪري رهي آهي گلگت بلتستان ۾ هڪ وفاقي وزير کي گورنر مقرر ڪرڻ سان اتي چونڊ ڌانڌلي جي نيت ظاهر ٿئي ٿي ان سلسلي ۾ ان وزيراعظم نوازشريف کي هڪ خاص خط به لکيو آهي ۽ ان خط جو جواب به ناهي آيو خورشيد شاهه چيو ته سڄي دنيا ۾ جيڪڏهن اپوزيشن ليڊر خط لکي ٿو ته وزيراعظم کي جواب لکڻو پوي ٿو نوازشريف کي به منهنجي خط جو جواب ڏيڻ گهرجي هن چيو ته مان هاڻي به نوازشريف کي چوڻ چاهيان ٿو ته هو ڌانڌلي کان پاسو ڪري ڇو ته ڌانڌلي سان ڪجهه نه ملندو پر ثابت ٿي ويندو ته هي حڪومت ڌانڌلي جي پيداوار آهي هن چيو ته نوازشريف کي ڌانڌلي کان پاسو ڪرڻ گهرجي ڇو ته ان سان هڪ نئون پنڊورا باڪس کلندو هن چيو ته پاڪستان مسلم ليگ (ن) ڌانڌلي ڪري پنهنجي حڪومت کي تقراري نه بڻائي هڪ سوال جي جواب ۾ خورشيد شاهه چيو ته اسان پاڪستان مسلم ليگ (ن) جي حڪومت کي نه پر جمهوريت بچائڻ لاءِ حمايت ڪئي پاڪستان مسلم ليگ (ن) جي هڪ وزير مون کي چيو هو ته شاهه صاحب اوهان اسان کي حڪومت بچائي ڏني آهي پر اسان مان نيڪ اميد نه رکندا سيد خورشيد شاهه چيو ته اسان پاڪستان مسلم ليگ (ن) کي اپيل ڪيون ٿا ته نظام کي پنهنجي مرضي مطابق نه هلائي هن چيو ته مان سڀني کي اپيل ڪيان ٿو ته اهڙيون حالتون پيدا نه ڪيو جنهن سان ملڪ کي نقصان ٿئي.

 

شڪارپور سانحو: شهداءِ ڪميٽي ۽ سنڌ حڪومت ۾ ڳالهيون ڪامياب، ڪميٽي قائم

ڪراچي(اسٽاف رپورٽر) شڪارپور سانحي خلاف احتجاجي ڌرڻو نمائش چورنگي تي جاري آهي ڌرڻي ۾ شريڪ ماڻهن کي وزيراعليٰ هائوس وڃڻ کان روڪڻ لاءِ حڪومت شهداءَ ڪميٽي کي ڳالهين جي دعوت ڏني هئي جنهن تي شهداءَ ڪميٽي جو وفد وزيراعليٰ هائوس پهتو ڳالهين لاءِ سنڌ جو وڏو وزير، شرجيل ميمڻ، آءِ جي ۽ ڊي جي رينجرز به شريڪ هئا، اجلاس ۾ حڪومتي ۽ شهداءَ ڪميٽي تي ٻڌل 6 رڪني ڪميٽي جوڙي وئي، حڪومتي ٽيم جي سربراهي شرجيل ميمڻ جڏهن ته شهداءَ ڪميٽي جي سربراهي مولانا مسعود ڊومڪي  ڪئي ملاقات ۾ سنڌ جي وڏي وزير ۽ ڊي جي رينجرز شهداءَ ڪميٽي جي وفد کي ٽارگيٽيڊ آپريشن ۾ تيزي آڻڻ ۽ امام بارگاهن ۽ مقدس جاين جي حفاظت لاءِ ڀرپور قدم کڻڻ جو يقين ڏياروي جڏهن ته فوجي آپريشن تي سنڌ حڪومت جو چوڻ هو ته معاملو وفاق جو آهي، شهداءَ ڪميٽي جا ڪيترائي مطالبا مڃي وڃڻ کانپوءِ نمائش چورنگي تي ڌرڻو ختم ٿيڻ جو امڪان آهي.اطلاعات کاتي جي صوبائي وزير شرجيل انعام ميمڻ چيو آهي ته ڌرڻو هڻندڙ پشاور سانحي جي شهيدن جي وارثن سان ڳالهيون ڪامياب ٿيون آهن، مسعودي کي حتمي شڪل ڏيڻ بعد اعلان ڪيو ويندو.

 

نيپرا بجلي قيمتن ۾ 3.24 رپيا في يونٽ گهٽتائي جي منظوري ڏئي ڇڏي

اسلام آباد(بيورو) نيشنل اليڪٽرڪ پاور ريگيوليٽري اٿارٽي (نيپرا) بجليءَ جي قيمتن ۾ 3.24 رپيا في يونٽ گهٽتائيءَ جي منظوري ڏئي ڇڏي آهي. نيپر اموجب اها گهٽتائي مهيني وار فيول پرائيس ايڊجسٽمينٽ فارمولي تحت ڪئي وئي آهي. سينٽرل پاور پرچيزنگ ايجنسي (سي پي پي اي) عالمي مارڪيٽ ۾ فرنس آئل ۽ هاءِ اسپيڊ ڊيزل جي قيمتن ۾ گهٽتائي کانپوءِ گذريل مهيني نيپرا کي بجليءَ جي قيمتن ۾ گهٽتائيءَ جي درخواست ڏني هئي. ڪراچي اليڪٽرڪ کان سواءِ بجلي فراهم ڪندڙ سمورين ڪمپنين جي صارفين کي ان سلسلي ۾ مارچ کان رليف ملندو. اهو فيصلو سينٽرل پاور پرچيزنگ ايجنسي طرفان داخل پٽيشن جي ٻُڌڻيءَ کان پوءِ ڪيو ويو.

 

اي او بي آءِ ڪيس، خريد ڪيل ملڪيتن جو ڪاٿو لڳائڻ لاءِ آڊٽ ڪرائي رپورٽ پيش ڪرڻ جو حڪم

اسلام آباد(بيورو) سپريم ڪورٽ، اِي او بي آءِ پاران خريد ڪيل ملڪيتن جو ڪاٿو لڳائڻ لاءِ آڊٽ ڪرائي مهيني اندر رپورٽ پيش ڪرڻ جو حڪم ڏئي ڇڏيو آهي. جسٽس ثاقب نثار جي سربراهي ۾ سپريم ڪورٽ جي 3 رڪني بئنچ اِي او بي آءِ ڪيس جي ٻڌڻي ڪئي. ٻڌڻي دوران عدالت پاران ريمارڪس ۾ چيو ويو ته اي او بي آءِ پاران اسلام آباد، ڪراچي ۽ لاهور ۾ ملڪيتون خريد ڪيون ويون آهن. اعليٰ عدالت حڪم ڏنو ته اي او بي آءِ پاران خريد ڪيل ملڪيتن جو ڪاٿو لڳائڻ لاءِ آڊٽ ڪرائي هڪ مهيني اندر رپورٽ پيش ڪئي وڃي. حڪم نامي ۾ اهو به چيو ويو آهي ته اي او بي آءِ جي ملڪيتن جو ڪاٿو ايماندار سان لڳايو وڃي، ٻي صورت ذميوار آڊٽ ڪرڻ وارا هوندا…

 

ذوالفقار مرزا جي پ پ جي سينٽرل ايگزيڪيوٽو ڪميٽي واري ميمبرشپ رد

ڪراچي(م.ڊ) پيپلز پارٽي جي ليڊرشپ ۽ اڳواڻن خلاف بيان بازي کانپوءِ ذوالفقار مرزا ۽ پارٽي وچ ۾ ڏار پئجي ويو آهي، پارٽي قيادت ذوالفقار مرزا جي سينٽرل ايگزيڪيوٽو ڪميٽي جي ميمبرشپ رد ڪري ڇڏي ذوالفقار مرزا سي اي سي جو سينيئر ميمبر هو ذوالفقار مرزا جي ميمبرشپ رد ڪرڻ جو فيصلو بلاول هائوس ۾ پارٽي اڳواڻن جي اجلاس ۾ ڪيو ويو.

 

بلديه ٽائون سانحي جي نئين سر جاچ لاءِ جوائنٽ انويسٽيگيشن ٽيم جوڙي وئي

ڪراچي (اسٽاف رپورٽر) ڪراچي جي علائقي بلديه ٽائون ۾ فيڪٽري ۾ باهه لڳڻ سبب اڍائي سئو کان وڌيڪ ماڻهو اجل جو شڪار بڻيا سانحي جي حوالي سان جي آءِ ٽي جي پهرين جاچ رپورٽ واويلا مچائي ڇڏي هئي جنهن کانپوءِ ان تي اعتراض شروع ٿي ويا ۽ ايم ڪيو ايم طرفان خدشن جو اظهار به ڪيو ويو وزيراعظم ۽ آرمي چيف جي ڪراچي دوري کانپوءِ نئين جوائنٽ انويسٽيگيشن ٽيم جوڙي وئي آهي،  سنڌ پوليس جو ايڊيشنل آءِ جي خادم حسين ڀٽي کي ٽيم جو سربراهه مقرر ڪيو ويو آهي جيڪا بلديه ٽائون سانحي جي پاڻمرادو جاچ ڪندي ۽ پنهنجي رپورٽ وفاقي حڪومت کي پيش ڪندي، ٽيم ۾ ڊي آءِ جي مشتاق مهر، ڊائريڪٽر ايف آءِ آي سنڌ شاهد حيات به شامل آهن جڏهن ته رينجرز جو ونگ ڪمانڊر به جي آءِ ٽي جو حصو هوندو.

 

ڪراچي : هٿياربندن جي فائرنگ ۾ 2 ڄڻا مارجي ويا، هڪ ٽارگيٽ ڪلر گرفتار

ڪراچي (اسٽاف رپورٽر) نارٿ ناظم آٻاد ۾ گاڏي تي فائرنگ جي نتيجي ۾ 2 ڄڻا مارجي ويا جڏهن ته پوليس واقعي ۾ ملوث هڪ ٽارگيٽ ڪلر کي گرفتار ڪرڻ جي دعويٰ ڪئي آهي ڪراچي جي علائقي نارٿ ناظم آباد ۾ حيدري پوليس اسٽيشن ويجهو موٽرسائيڪل تي سوار 2 ڄڻا گاڏي تي فائرنگ ڪري فرار ٿي ويا، فائرنگ جي نتيجي ۾ گاڏي   سوار ٻئي ڄڻا موقعي تي ئي مارجي ويا امدادي رضاڪارن لاشن کي عباسي اسپتال منتقل ڪري ڇڏيو جتي انهن جي سڃاڻپ نواز ۽ محمد ڪريم جي نالن سان ڪئي وئي، ٻئي طرف پوليس فائرنگ  ۾ ملوث هڪ ٽارگيٽ ڪلر کي گرفتار ڪري ان جي قبضي مان واردات ۾ استعمال ٿيندڙ هٿيار ۽ موٽرسائيڪل هٿ ڪرڻ جي دعويٰ ڪئي آهي، پوليس جوابدار جي سڃاڻپ حيدر جي نالي سان ڪئي آهي آءِ جي سنڌ به ٽارگيٽ ڪلر کي گرفتار ڪندڙ اهلڪارن لاءِ 5 لک روپيا انعام جو اعلان ڪيو آهي.