تازيون خبرون

Daily Archives: February 18, 2015

ڪشمير مسئلو گڏيل قومن جي ٺهرائن موجب حل ٿيڻ گهرجي: نواز شريف

اسلام آباد (بيورو) وزيراعظم نواز شريف سان يورپي پارليامينٽ جي وفد ۽ برطانوي ڪابينا جي وزير ڌار ڌار ملاقاتون ڪيون آهن،  وزيراعظم چيو آهي ته پنهنجي سرزمين تان دهشتگردي جي خاتمي لاءِ پر عزم آهيون، ڪشمير مسئلو گڏيل قومن جي ٺهرائن موجب حل ٿيڻ گهرجي. وزيراعظم هائوس اسلام آباد ۾ وزيراعظم نواز شريف سان يورپي پارليامينٽ جي وفد ملاقات ڪئي. ملاقات دوران يورپي  وفد دهشتگردي خلاف جنگ ۾ پاڪستان جي ڪوششن جي ساراهه ڪندي پشاور سانحي تي ڏک جو اظهار ڪيو. وزيراعظم نواز شريف چيو ته پاڪستان يورپي يونين سان لاڳاپن کي اهميت ڏئي ٿو، ٻنهي ملڪن جي پارليامينٽ ۾ طريقيڪار واضح ٿيڻ گهرجي. وزيراعظم چيو ته جي ايس پي پلس جو درجو ملڻ سان پاڪستان کي فائدو ٿيندو ۽ هڪ ڪروڙ ڊالر جي روانگي واپار ۾ واڌ پڻ ٿيندي. وزيراعظم نواز شريف جو چوڻ هو ته پاڪستان پنهنجي سرزمين تان دهشتگردي جي خاتمي لاءِ پر عزم آهي ۽ دهشتگردي خلاف جنگ کي انجام تائين پهچايو ويندو. وزيراعظم، يورپي وفد تي زور ڏنو ته ڪشمير مسئلو گڏيل قومن جي ٺهرائن ۽ اتان جي عوام جي خواهشن موجب حل ٿيڻ گهرجي. وزيراعظم نواز شريف سان برطانوي ڪابينا جي وزير فرانس مائوڊي پڻ ملاقات ڪئي، جنهن ۾ پاڪ-برطانيه لاڳاپن سميت مختلف معاملن تي غور ڪيو ويو. وزيراعظم نواز شريف چيو ته پاڪ-برطانيه ۾ سهڪار تي اطمينان جو اظهار ڪندي چيو ته ٻنهي ملڪن ۾ لاڳاپا جوڳي بنيادن تي قائم آهن، اعلي سطحي تي وفد جي مٽا سٽا ۽ مشارت عمل ٻنهي ملڪن جي لاڳاپن جي خاصيت آهي.  وزيراعظم چيو ته دهشتگردي خلاف جنگ جي خاتمي لاءِ قومي ايڪشن پلان جوڙيو ويو آهي.

 

سمورا الزام رد، پ پ پاران ذوالفقار مرزا کان لاتعلقي جو اعلان

ڪراچي(اسٽآف رپورٽر) سنڌ جي اطلاعات ۽ بلديات واري وزير ۽ پاڪستان پيپلز پارٽي جي مرڪزي ڊپٽي سيڪريٽري اطلاعات شرجيل انعام ميمڻ چيو آهي ته اڳوڻي گهرو وزير ذوالفقار مرزا پاران پارٽي قيادت، وزيرن ۽ پارٽي اڳواڻن تي تنقيد ۽ انهن تي الزام سندس ڪا ذاتي رنجش ٿي سگهي ٿي. ذوالفقار مرزا اخلاق جون سموريون حدون اورانگهي ڇڏيون آهن،  جنهن جو وڏو افسوس آهي. عزير بلوچ سميت ڪنهن به ڪرمنل چاهي ان جو تعلق ڪنهن به جماعت يا گروپ سان هجي ڪنهن قسم جي رعايت نه ڏني ويندي. جيڪڏهن ذوالفقار مرزا پارٽي قيادت تي اهڙي طرح جي تنقيد ڪري ٿو ته پوءِ پيپلز پارٽي به ان کي ڊس اون ڪري  ٿي. وفاقي ۽ صوبائي حڪومتن ۽ پاڪ فوج سميت سمورن امن امان جي بحالي جا ادارا هڪ نڪتي تي متحد آهن ته هن ملڪ مان دهشتگردي جو خاتمو ٿئي ۽ هتي امن امان قائم ٿئي. گورنر راڄ سميت ٻين افواهن ۽ تجزيه نگارن جي تجزين سان ملڪ ناهي هلندو. هو اڱاري تي پيپلز ميڊيا سيل ڪراچي ۾ پريس ڪانفرنس ڪري رهيو هو. ان موقعي تي سينيٽر مولابخش چانڊيو، صوبائي وزير ڄام مهتاب ڏهر، قومي اسيمبلي ميمبر سردار ڪمال چانگ، شاهده رحماني، سنڌ اسيمبلي ميمبر مڪيشن ڪمار چاولا، امداد پتافي، طارق مسعود آرائين، ذوالفقار قائمخاني، منظور عباس ۽ ٻيا به ساڻس گڏ موجود هئا. شرجيل انعام ميمڻ چيو ته پيپلز پارٽي جي قيادت ۽ پيپلز پارٽي خلاف ڪوڙن الزامن جي شروعات اڳوڻي گهرو وزير ذوالفقار مرزا پاران ڪئي وئي آهي. اها ڪا نظرياتي سوچ جي ناهي بلڪ ان جي ذاتي رنجش ۽ ذاتي روش جي عڪاسي ڪري ٿي. هن چيو ته نظرياتي سوچ جي حامل ڪنهن جي زبان اهڙي طرح جي ناهي هوندي. هن چيو ته پيپلز پارٽي تي ماضي ۾ الزام لڳايا ويا. اسان جي شهيد قائد محترمه بينظير ڀٽو ۽ پارٽي جي شريڪ چيئرمين آصف علي زرداري تي الزام ۽ ڪوڙا ڪيس به ڪيا ويا ۽ انهن جي پاداش ۾ ان مرد مجاهد 12 سال قيد ۽ سختيون ڪاٽيون. هن چيو ته ملڪ جي سمورن ادارن ۽ عدالتن اسان جي قيادت خلاف لڳايل الزامن جي جاچ ڪئي ۽ اسان انهن الزامن کان نه صرف آزاد ٿياسين بلڪ اسان سرخرو به ٿياسين. هن چيو ته ذوالفقار مرزا هڪ طرف پاڻ ان ڳالهه کي تسليم ڪري ٿو ته ان وٽ اڄ جيڪو ڪجهه آهي اهو آصف علي زرداري ۽ پيپلز پارٽي جي ڪري آهي ۽ ٻي طرف هو پنهنجي ئي قيادت ۽ پارٽي خلاف جهڙي طريقي جي زبان ۽ رويو اختيار ڪيو آهي اهو اخلاق جون سموريون حدون اورانگهي ويو آهي. هن چيو ته ان خلاف ايڪشن وٺڻ يا نه وٺڻ جي حوالي سان پارٽي جي اعليٰ قيادت جلد فيصلو ڪندي. شرجيل ميمڻ چيو ته سنڌ جي ثقافت ۽ هتي جي روايت جي برخلاف ذوالفقار مرزا اسان جي ڀيڻ ۽ پارٽي جي اهم رڪن ادي فريال ٽالپر صاحبه لاءِ جهڙي طرح جي زبان استعمال ڪئي اها شايد کيس زيب نه ڏيندي هجي. هن چيو ته ادي فريال ٽالپر صاحبه پارٽي کي منظم ڪرڻ ۽ پارٽي جي ڪارڪنن ۽ عوام جي مسئلن جي حل ۾ ڏينهن رات ڪوشان آهي. هن چيو ته انور مجيد تي لڳايل سمورا الزام به بي بنياد آهن. هن جيڪڏهن سالن کان بند ملون سمورن قاعدن ضابطن کي پورو ڪندي خريد ڪيون، انهن جي شروع ٿيڻ سان جتي ملڪ جي معيشيت کي استحڪام مليو ۽ هزارين ماڻهن کي روزگار مليو آهي ۽ حڪومت کي ٽيڪس جي مد ۾ فائدو ٿيو ته هن ڪهڙو ڏوهه ڪيو آهي. شرجيل ميمڻ چيو ته ذوالفقار مرزا مون سميت وزيرن ۽ اسيمبلي ميمبرن تي جيڪي الزام لڳايا آهن اسان ان کان اهو ضرور پڇڻ چاهيون ٿا ته جيستائين هو اسان سان گڏ هو ته ان کي اسان ۾ ڪابه برائي ڇو نه نظر آئي. شرجيل ميمڻ چيو ته گذريل ڏينهن پارٽي جي چيئرمين بلاول ڀٽو زرداري پاران سماجي ويب سائيٽ تي پيغام اچڻ کان پوءِ ذوالفقار مرزا پاران مختلف چئنلز تي انٽرويو ۽ ان پاران پارٽي ۾ انتشار پکيڙڻ وارين سموريون ڪوششن دم ٽوڙي چڪيون آهن ۽ پارٽي قيادت وچ ۾ اختلافن جون خبرون پکيڙڻ جون سموريون سازشون دم ٽوڙي ويون. هن چيو ته اسان به ذوالفقار مرزا جي الزامن جي جواب م سموريون شاهديون ۽ ٺوس دليلن سان گڏ ان تي الزامن لڳائي سگهون ٿا، پر اها اسان جي روايت نه رهي آهي ۽ نه ئي اسان جي پارٽي جي قيادت پاران ان قسم جي اسان کي اجازت آهي. هن چيو ته الزامن جي ڀرمار ۽ ذوالفقار مرزا جي لفظن جي استعمال ان جي شخصيت کي متنازعه بڻائي ڇڏيو آهي. شرجيل ميمڻ چيو ته پارٽي جي چيئرمين پاران واضح پيغام کي ذوالفقار مرزا سوچي سمجهي پڙهي وٺي ۽ اهو واضح پيغام پارٽي ۽ بدين جي عوام لاءِ آهي. هڪ سوال جي جواب ۾ شرجيل انعام ميمڻ چيو ته اخلاق اسان کي ڪنهن صورت ۾ ان ڳالهه جي اجازت نٿو ڏي ته اسان ڪنهن چينل تي ويهي گاريون ۽ غلط رويو اختيار ڪريون. هن چيو ته ذوالفقار مرزا ذاتي رنجش کي پارٽي جي اعليٰ قيادت خلاف غلط زبان جو استعمال ڪري نه صرف پارٽي ڊسيپلين خلاف ورزي ڪئي آهي بلڪ اخلاق جون سموريون حدون به اورانگهي ڇڏيون آهن ۽ ان تي پارٽي جي اعليٰ قيادت ئي فيصلو ڪندي. هن واضح لفظن چيو ته جيڪڏهن ذوالفقار مرزا پارٽي جي اعليٰ قيادت تي اعتماد نٿو رکي ته پوءِ پارٽي به کيس ڊس اون ڪري ٿي. هڪ سوال جي جواب ۾ شرجيل انعام ميمڻ چيو ته هن وقت ملڪ سنگين چئلينجن کي منهن ڏئي رهيو آهي. ملڪ ۾ دهشتگردي سبب امن امان جي صورتحال انتهائي نازڪ آهي ۽ اهڙي موقعي تي اسان جي سول ۽ فوجي قيادت هڪ پچ تي متحد آهي ته ڪنهن به صورت ۾ هن ملڪ مان دهشتگردي جو خاتمو ٿئي ۽ ملڪ ۾ امن امان قائم ٿئي. هن چيو ته گذريل ڏينهن چيف آف آرمي اسٽاف جنرل راحيل شريف، وزيراعظم ميان محمد نواز شريف، پيپلز پارٽي جو شريڪ چيئرمين آصف علي زرداري پاران هڪ ڀيرو ان عزم جو ارادو ڪيو ويو ته هن ملڪ کي دهشتگردي جي لعنت مان ڇوٽڪارو ڏياري ئي ساهه پٽبو ۽ ان سلسلي ۾ ڪيترائي فيصلا به ٿيا آهن ۽ آصف علي زرداري پاڻ ان تي زور ڀريو ته پوليس ۾ ڀرتين جي سليڪش بورڊ ۾ رينجرز ۽ پاڪ فوج جي سٺن آفيسرن کي شامل ڪيو وڃي ته جئين پوليس ۾ سٺا جوان ۽ آفيسر سامهون اچي سگهن. هن چيو ته وزيراعليٰ سنڌ به آرمي چيف کي ان ڳالهه جو يقين ڏياريو ته سنڌ حڪومت ان سلسلي ۾ مڪمل تعاون ڪرڻ لاءِ تيار آهي ته جيئن امن امان جي قيام لاءِ ورتل ڪوششن جا خاطر خواهه نتيجا سامهون اچي سگهن. هڪ ٻي سوال جي جواب ۾ شرجيل انعام ميمڻ چيو ته عزير بلوچ هڪ ڪرمنل آهي ۽ پيپلز پارٽي ڪنهن به دٻاءُ ۾ اچي ان جي حوالي جي راهه ۾ ڪابه رڪاوٽ نه وجهندي. هن چيو ته ڪرمنل ڪنهن به جماعت يا گروپ سان تعلق هجي ان سان ڪابه رعايت نه ڪئي ويندي. هڪ ٻي سوال جي جواب ۾ هن چيو ته افواهن ۽ تجزيه نگارن جي تبصري تي آئون ڪنهن قسم جو ڪوبه تبصرو نه ڪندس. اسان جي وفاقي ۽ صوبائي حڪومتون يا آرمي ان سسٽم کي ڊي ريل نٿيون ڪرڻ چاهن. انهن سڀني جو هڪ ئي ايجنڊا آهي ته هر حالت ۾ ملڪ ۾ امن قائم ٿئي ۽ دهشتگردي جو خاتمو ٿئي ۽ ملڪ ۾ امن امان جي بحالي جي راهه ۾ ڪابه رڪاوٽ نه ٿئي. الزامن جي جواب ۾ پيپلز پارٽي پاران عدالتن سان رجوع ڪرڻ جي سوال تي شرجيل انعام ميمڻ چيو ته الزام لڳائڻ تمام گهڻو آسان آهن ۽ انهن کي ثابت ڪرڻ ايترو ئي مشڪل آهي، جيڪڏهن ڪنهن وٽ اسان خلاف شاهديون آهن ته هو عدالت ۾ وڃي اسان وٽ وڪيل کي ڏيڻ لاءِ فالتو رقم نه آهي. هڪ ٻي سوال جي جواب م هن چيو ته اسان ماڻهن جي خواهشن تي نه بلڪ پنهنجي خواهش تي ڪم ڪريون ٿا ۽ نه ئي پيپلز پارٽي ڪنهن جي ڊڪٽيشن تي ڪم ڪري ٿي.

 

ترڪ وزيراعظم جي پي ايم هائوس آمد، شاندار آجيان، گارڊ آف آنر پيش، نواز شريف سان ملاقات

اسلام آباد (بيورو) ٻِن ڏينهن جي سرڪاري دوري تي اسلام آباد پهتل ترڪ وزيراعظم احمد دائود اوغلو وزيراعظم نواز شريف سان ملاقات ڪئي،جنهن ۾ گڏيل دلچسپي وارن معاملن تي خيالن جي ڏي وٺ ڪئي وئي. ترڪ وزيراعظم احمد دائود اوگلو وزيراعظم هائوس پهتو ته سندس شاندار آجيان ڪئي وئي. خاص مهمان کي پاڪ فوج جي دستن کي سلامي ڏني، جنهن بعد هن گارڊ آف آنر جو معائنو به ڪيو. ان موقعي تي پاڪستان ۽ ترڪي جا قومي ترانا به وڄايا ويا. وزيراعظم نواز شريف ترڪ وزيراعظم سان ڪابينا ميمبرن جي ملاقات ڪرائي ۽ ترڪ هم منصب به پنهنجي وفد جو وزيراعظم کي تعارف ڪرايو. بعد ۾ ٻنهي ملڪن جي سربراهن نويڪلائيءَ ۾ ملاقات ڪئي جنهن دوران ٻه طرفن لاڳاپن، خطي جي صورتحال ۽ گڏيل دلچسپي وارن معاملن تي خيالن جي ڏي وٺ ڪئي وئي.

 

صدر، وزيراعظم، آصف زرداري، الطاف حسين، عمران خان ۽ ٻين پاران لاهور ڌماڪي جي مذمت

اسلام آباد (بيورو)  وزيراعظم نواز شريف، صدر ممنون حسين، آصف علي زرداري، عمران خان، الطاف حسين ۽ ٻين لاهور ڌماڪي جي سخت لفظن ۾ مذمت ڪئي آهي، وزيراعظم نواز شريف، شهباز شريف کان رپورٽ طلب ڪندي چيو آهي ته دهشتگردي جي پاڙ پٽي ئي سک جو ساهه کڻنداسين. وزيراعظم نواز شريف، لاهور ڌماڪي ۾ جاني نقصان تي افسوس جو اظهار ڪندي زخمين کي هر ممڪن سهولتون فراهم ڪرڻ جي هدايت ڪئي آهي. وزيراعظم، پنجاب جي وڏي وزير شهباز شريف کي ڌماڪي جي جاچ جو حڪم ڏيندي رپورٽ طلب ڪري ورتي آهي. صدر ممنون حسين، اڳوڻي صدر آصف علي زرداري، پي ٽي آءِ سربراهه عمران خان، ايم ڪيو ايم سربراهه الطاف حسين ۽ ٻين پڻ ڌماڪي جي مذمت ڪندي جاني نقصان تي افسوس جو اظهار ڪيو آهي. صدر ممنون حسين، پنجاب حڪومت کي هدايت ڪئي آهي ته زخمين کي بهتر طبي سهولتون فراهم ڪيون وڃن.

 

ترڪ وزير اعظم جي آرمي چيف سان ملاقات، سيڪيورٽي صورتحال ۽ دفاعي سهڪار تي ڳالهيون

اسلام آباد(بيورو) آرمي چيف جنرل راحيل شريف جي ترڪي جي وزيراعظم احمد داوت اوگلو سان ملاقات ڪئي آهي. ٻنهي اڳواڻن جي وچ ۾ ٿيل گڏجاڻي ۾ علائقائي سلامتي، گڏيل دلچسپي، فوجي لاڳاپن ۽ دفاعي سهڪار جي حوالي سان معاملن تي تفصيلي خيالن جي ڏي وٺ ٿي. آءِ ايس پي آر مطابق ترڪ وزيراعظم پاڪ فوج طرفان دهشتگردي خلاف جاري آپريشن ضرب عضب جي ڪاميابي جي واکاڻ ڪئي. ترڪ وزيراعظم چيو ته اسان پنهنجي برادر ملڪ پاڪستان جي سيڪيورٽي کي ترڪي جي سيڪيورٽي ۽ پاڪستان جي جهنڊي کي ترڪيءَ جو جهنڊو سمجهون ٿا.

 

لاهور ۾ آپگهاتي بم حملو، ٻن پوليس اهلڪارن سميت 5 ڄڻا شهيد، ڌماڪي جي ذميواري الحرار قبولي ورتي

لاهور (بيورو) لاهور ۾ قلعه گجر سنگهه پوليس لائينز ٻاهران آپگهاتي بم حملي جــَي نتيجي ۾ پوليس اهلڪارن سميت 5 ڄڻا شهيد ۽ 25 ڄڻا زخمي ٿي پيا، جڏهن ته ڌماڪي سبب ٽن گاڏين کي باهه وڪوڙي وئي ۽ ڀرپاسي وارين عمارتن کي به نقصان پهتو. لاهور جي علائقي ايجرٽن روڊ تي واقع قلعه گوجر سنگهه پوليس لائنز وٽ هوٽل ٻاهران ڌماڪو ٿيو. ڌماڪي جي نتيجي ۾5 ڄڻا شهيد ۽ 25 زخمي ٿيا، جڏهن ته شهيد ٿيلن ۾ 2 پوليس اهلڪار وقار ۽ يوسف به شامل آهن. ڌماڪي بعد شهر جي سمورين اسپتالن ۾ ايمرجنسي لاڳو ڪئي وئي. زخمين مان چئن ڄڻن کي گنگا رام، ٻن کي سروسز ۽ ڇهن زخمين کي ميو اسپتالن ۾ منتقل ڪيو ويو جتي زخمين جي حالت نازڪ هئڻ سبب فوتين جو انگ وڌڻ جو خدشو آهي. ڌماڪي سبب ڪجهه گاڏين کي باهه وڪوڙي وئي جڏهن ته ڀرپاسي وارين عمارتن جا شيشا ٽــُٽي پيا. واقعي بعد پوليس علائقي کي ڪڙو چاڙهي ڇڏيو آهي جڏهن ته ڀرپاسي وارين عمارتن تي ايليٽ فورس جا اهلڪار مقرر ڪيا ويا آهن. سي سي پي او لاهور جو چون آهي ته ڌماڪو آپگهاتي هو ۽ بمبار سخت سڪيورٽي سخت هئڻ ڪري پوليس لائينز اندر نه پهچڻ سبب پاڻ کي ٻاهر ئي ڌماڪي سان اڏائي ڇڏيو. آپگهاتي بم حملي ۾ مارجي ويل 5 ڄڻن مان 4 ڄڻن جي سڃاڻپ ٿي وئي آهي جڏهن ته هڪ ڄڻي جي اڃا تائين سڃاڻپ نه ٿي سگهي آهي. اسپتال جي ذريعن مطابق اسپتال ۾ آندل لاشن مان 20 ورهين جي ايم عباس پٽ محمد رمضان، 35 ورهين جي وقار احمد پٽ محمد اسلم، 35 ورهين جي محمد امجد پٽ مختار احمد ۽ 47 ورهين جي راڻا ايم يوسف پٽ محمد منشي جي نالن سان سڃاڻپ ٿي آهي جڏهن ته هڪ فوتي جي اڃا تائين سڃاڻپ نه ٿي سگهي آهي. ميو اسپتال جي 11 زخمين کي آندو ويو آهي جن ۾ ايم اشرف، عبدالرزاق، اسلم جاويد، عامر افضل، صائمه عمران، شمائله ايوب، محمد احسان، ڪمال جلال مسيح، رمضان عبدالخالق، حافظ زاهد افضل ۽ عبدالله عمران شامل آهن. سمورن زخمين کي معمولي زخم رسيا آهن ۽ کين علاج بعد هڪ يا ٻن ڏينهن اندر فارغ ڪيو ويندو. صدر ممنون حسين، وزيراعظم نواز شريف، پنجاب جي وڏي وزير شهباز شريف، آصف علي زرداري، عمران خان، وفاقي وزير پرويز رشيد، شيري رحمان ۽ ٻين ڌماڪي جي مذمت ڪئي آهي. وزيراعظم واقعي جو نوٽيس وٺندي پنجاب حڪومت کان واقعي جي رپورٽ طلب ڪري ورتي آهي. هوڏانهن ڪالعدم تحريڪ طالبان پاڪستان کان الڳ ٿيندڙ جماعت الاحرار خودڪش ڌماڪي جي ذميواري قبول ڪئي آهي

 

دهشتگردن جي چيلهه چٻي ٿي وئي آهي، اهي وڌيڪ ڪارروايون ڪري حڪومت کي ڊيڄاري نٿا سگهن: عابد شير علي

حيدرآباد(بيورو) پاڻي ۽ بجليءَ واري مملڪتي وزير عابد شير علي لاهور بم ڌماڪي جي سخت لفظن ۾ مذمت ڪندي چيو آهي ته دهشتگردن جي چيلهه چٻي ٿي وئي آهي، اهي وڌيڪ ڪارروايون ڪري حڪومت کي ڊيڄاري نٿا سگهن. حيدرآباد ۾ حيسڪو جي اجلاس بعد پريس ڪانفرنس کي خطاب ڪندي هن چيو ته لاهور پوليس بهتر حڪمت عملي اختيار ڪئي جنهن سبب دهشتگرد پنهنجي اصل هدف ڏانهن نه وڃي سگهيا پر تنهن هوندي جيڪو نقصان ٿيو آهي ان تي تمام گهڻو افسوس ٿيو آهي ۽ هو شهيدن جي پونئيرن سان تعزيت ڪري ٿو ۽ يقين ڏياري ٿو ته وزيراعظم محمد نواز شريف جو پڻ عزم آهي ته دهشتگردن کي ختم ڪري ئي ساهه کڻندا. هن وڌيڪ چيو ته بلديه ٽائون علي انٽر پرائيز گارمينٽس فيڪٽري جو واقعو پڻ حڪومت لاءِ هڪ چئلينج آهي، جيتوڻيڪ اهو واقعو گذريل حڪومت ۾ ٿيو آهي تنهن هوندي به ان واقعي بابت انڪشاف جي آءِ ٽي ڪيا آهن. وزيراعظم محمد نواز شريف ان جو سخت نوٽيس ورتو آهي ۽ ان سانحي جي ذميوارن کي قانون جي ڪٽهڙي ۾ آڻڻ لاءِ هڪ ڪميشن قائم ڪرڻ جي هدايت ڪري ڇڏي آهي. هن چيو ته اها پهرين حڪومت آهي جنهن پاڪ فوج سان گڏجي دهشتگردن خلاف جنگ جو اعلان ڪيو آهي، قوم کي به ان حوالي سان تيار رهڻو پوندو، وحشي عنصرن پاڪستان جي معيشت کي نقصان پهچايو آهي ۽ دنيا ۾ اسان جي قوم جو تاثر خراب ڪيو آهي، ان خوفناڪ راند جي خاتمي لاءِ وحشين کي سرعام ڦاهيون ڏنيون وينديون. هن چيو ته حڪومت جي وڌ کان وڌ ڪوشش آهي ته لوڊشيڊنگ ۾ گهٽتائي آندي وڃي ۽ 2017ع ۾ پاڪستان لوڊشيڊنگ فري ملڪ ٿي ويندو. هن چيو ته نيلم- جهلم پاور پراجيڪٽ لاءِ رقم جي فراهميءَ بابت وزيراعظم فنانس ڊويزن کي هدايتون جاري ڪري ڇڏيون آهن جنهن مان 2016ع تائين بجليءَ جي پيداوار شروع ٿي ويندي، جڏهن ته نندي پور پراجيڪٽ مان تمام جلد پيداوار شروع ٿيڻ واري آهي. هن چيو ته هن وقت واپڊا جي صارفين جي بلن ۾ گهٽتائي آئي آهي ۽ جيڪي به ملازم يا عملدار بلن جي صورت ۾ ڪرپشن ۾ ملوث هوندا انهن کي گهر ڀيڙو ڪيو ويندو. هن چيو ته ڪراچيءَ ۾ عوام جي مسئلن کي نظر ۾ رکندي اتي لڳاتار بجليءَ جي فراهم جاري رکي ويندي ۽ قانون مطابق پوري ملڪ جي قوم کي سهولتون فراهم ڪيون وينديون. هن چيو ته ايران سان ٿيل معاهدو التوا جو شڪار ناهي ان تي ڪم جاري آهي. نواز شريف جي حڪومتي دؤر ۾ ڪنهن کي به بي روزگار نه ڪيو ويندو جيڪڏهن ڪنهن هنڌ ڪنهن اداري کي خانگايو ويو ته ملازمن جا مسئلا ترجيحي بنيادن تي حل ڪيا ويندا. احتجاج ڪندڙ ڪم ڏانهن ڌيان ڏين انهن جا مسئلا حل ڪيا ويندا. هن چيو ته بجلي چوريءَ کي روڪڻ لاءِ ڊجيٽل ميٽر لڳايا پيا وڃن. هڪ سوال تي هن چيو ته پيٽرول جا اگهه گهٽايا ويا آهن پر مهانگائيءَ تي ضابطو آڻڻ صوبائي حڪومتن جو ڪم آهي، پيٽرول جا اگهه گهٽجڻ جو فائدو عوام کي پهچڻ گهرجي.

 

جسٽس فيصل عرب سنڌ هاءِ ڪورٽ جي چيف جسٽس جي عهدي جو حلف کڻي ورتو

ڪراچي(اسٽآف رپورٽر) سنڌ هاءِ ڪورٽ جي جسٽس فيصل عرب چيف جسٽس آف سنڌ هاءِ ڪورٽ جي عهدي جو قسم کڻي ورتو آهي. گورنر سنڌ ڊاڪٽر عشرت العباد خان کيس قسم کڻايو. سنڌ هاءِ ڪورٽ ۾ ڪوٺايل حلف برداري واري تقريب ۾ وزيراعليٰ سنڌ سيد قائم علي شاهه، چيف سيڪريٽري سنڌ سجاد سليم هوتيانه، آءِ جي سنڌ، گهرو سيڪريٽري، صوبائي محتسب سنڌ، ڪمشنر ڪراچي، اعليٰ آفيسرن، وڪيلن ۽ صحافين جي وڏي تعداد شرڪت ڪئي.

 

سنڌ اسيمبلي سکر ڊيولپمينٽ اٿارٽي جي قيام جو ٺهراءُ منظور ڪري ورتو

ڪراچي (اسٽاف رپورٽر) سنڌ جي  ناڻي واري  وزير مراد علي شاهه چيو آهي ته وفاق پاران يوڪرين مان گھرايل غيرمعياري ڪڻڪ جي وڪري سبب صوبن وٽ اسٽاڪ بچي ويو ۽ هيل 2 لک ٽن گهٽ ڪڻڪ خريد ڪئي ويندي، صوبائي وزير نثار کهڙي  شڪارپور مان نڪتل لانگ ۾ اڻ وڻندڙ واقعي جو خدشو ظاهر ڪيو آهي. سنڌ اسيمبلي جو اجلاس ڊپٽي اسپيڪر شهلا رضا جي صدارت هيٺ ٿيو، صوبائي وزير مراد علي شاهه ايوان کي آگاهي ڏيندي چيو ته وزيراعظم ڪڻڪ معاملي تي اسحاق ڊار  کي سنڌ سرڪار سان ڳالهيون ڪرڻ لاءِ چيو هو پر هن اڃا  ڳالهيون  نه ڪيون آهن. مراد علي شاهه چيو ته صوبن وٽ وڏي مقدار ۾ ڪڻڪ موجود هئڻ باوجود وفاقي سرڪار يوڪرين مان غير معياري ڪڻڪ خريد ڪئي. هن چيو ته ڪڻڪ ايڪسپورٽ نه ٿيڻ سبب  لکين مڻ گدامن ۾ پيل آهي ۽ گذريل سال ڀيٽ ۾  هلندڙ سال 2 لک ٽن گهٽ  ڪڻڪ خريد ڪرڻ جو فيصلو ڪيو آهي. اهڙي آگاهي بعد پ پ ايم پي اي مراد علي شاهه چيو ته  سارين ۽ ڪمند کانپوءِ ڪڻڪ  جي آباد گارن کي تباهه ڪرڻ  جا سانڀاها ٿي رهيا آهن . هن چيو ته گذريل سال جي ڀيٽ ۾ 2لک ٽن گهٽ ڪڻڪ خريد ڪرڻ سان ننڍن آبادگارن کي تمام گهڻو نقصان پهچندو ۽ ڪڻڪ  جو مڻ 1300 بدران 5 کان 6سئو رپين ۾ وڪرو ٿيندو. اجلاس دوران صوبائي وزير نثار کهڙي ايوان کي ٻڌايو ته هنن لانگ مارچ ڪندڙن سان ڀٽ شاهه ۾ ڳالهيون ڪيون پر لانگ مارچ ڪندڙ ضد تي آهن ته هو هر صورت ۾ ڪراچي پهچندا. نثار کهڙي چيو ته سنڌ سرڪار لانگ مارچ ۾ شامل ماڻهن جا مطالبا مڃڻ لاءِ تيار آهي . هن خدشو ظاهر ڪيو ته لانگ مارچ وارا ڪراچي آيا ته ڪوبه واقعو پيش اچي سگهي ٿو. نثار کهڙي چيو ته شڪارپور سانحي کانپوءِ زخمين جي بهتر سارسنڀال لڌي وئي ۽ فوتين جي وارثن کي معاوضو به ڏنو ويو آهي. اجلاس دوران نصرت سحر عباسي اسيمبلي ۾ پاس ٿيندڙ ٺهرائن تي عملدآمد لاءِ خصوصي ڪميٽي جوڙڻ جو ٺهراءُ پيش ڪرڻ جي ڪوشش ڪئي، جنهن جي اجازت نه ملڻ تي فنڪشنل ليگ ميمبرن احتجاج ڪندي ايوان مان واڪ آئوٽ ڪيو.  اجلاس دوران ايم ڪيو ايم جي خالد احمد انٽرسٽي پبلڪ ٽرانسپورٽ ۾ مسافرن جي سيڪيورٽي لاءِ اپاءُ وٺڻ جو ٺهراءُ پيش ڪيو، جنهن جي به منظوري ڏني وئي. ٺهراءُ تي ڳالهائيندي  ميمبرن  چيو ته پبلڪ ٽرانسپورٽ ۾ سيڪيورٽي جامناسب بندوبست نه هئڻ سبب قيمتي جانيون ضايع ٿين ٿيون. متحده جي ظفر ڪمالي ميڊيڪل ڪاليجن ۾ داخلا  واري ِ ٽيسٽ اين ٽي ايس ۽ آ ءِ بي اي جهڙن ادارن کان ڪرائڻ وارو ٺهراءُ پيش ڪيو، جنهن جي به منظوري ڏني وئي. ايم ڪيو ايم جي ناهيد بيگم سکر جي ترقي لاءِ سکر ڊيولپمينٽ اٿارٽي جي قيام وارو ٺهراءُ پيش ڪيو، جنهن جي  اتفاق راءِ سان منظوري ڏني وئي. سنڌ اسيمبلي ۾ مختلف معاملن تي بحث جاري هو ته اسپيڪر ڪارروائي 23 فيبروري تائين ملتوي ڪري ڇڏي.

 

ڪراچي ۾ فائرنگ ۽ پرتشدد واقعا، 3 ڄڻا مارجي ويا، 3 ٽارگيٽ ڪلرز گرفتار

ڪراچي (اسٽاف رپورٽر) ڪراچي ۾فائرنگ ۽ پــُرتشدد جي واقعن ۾ 3 ڄڻا مارجي ويا،جڏهن ته پوليس ٽن ٽارگيٽ ڪلرز کي گرفتار ڪرڻ جي دعويٰ ڪئي آهي. پوليس موجب پاپوش نگر ۾ موٽر سائيڪل سوارن جي فائرنگ ۾ ايم ڪيو ايم جو همدرد عامر خان عرف بابو پان والا مارجي ويو،جڏهن ته گوليون لڳڻ سبب نويد نالي شخص زخمي پڻ ٿيو. گارڊن جي علائقي شو مارڪيٽ وٽ هٿياربندن جي فائرنگ ۾ هڪ ڄڻو مارجي ويو، جنهن جي سڃاڻپ نه ٿي سگهي هئي. جنجال ڳوٺ مان عبدالقادر  نالي شهري جو تشدد ٿيل لاش هٿ آيو،جڏهن ته منگهي پير ۾ اڻڄاتل هٿياربندن جي فائرنگ ۾ اعجاز نالي شخص زخمي ٿي پيو. ٻئي طرف پوليس فيڊرل بي ايريا ۾ ڇاپو هڻي ٽن ٽارگيٽ ڪلرز کي گرفتار ڪرڻ جي دعويٰ ڪئي آهي. پوليس موجب جوابدار نادر، صلاح الدين ۽ آصف ٽارگيٽ ڪلنگ سميت سنگين ڏوهن جي ڪيترين ئي وارداتن ۾ ملوث آهن.