تازيون خبرون

Daily Archives: February 14, 2015

وفاق خيبر پختون خواهه حڪومت کي ناڪام بڻائڻ چاهي ٿو:عمران خان

پشاور (بيورو) تحريڪ انصاف جي چيئرمين عمران خان چيو آهي ته وفاق خيبر پختون خواهه حڪومت کي ناڪام بڻائڻ چاهي ٿو، جيڪڏهن ننڍن صوبن کي حق ملن ته وفاق مضبوط ٿيندو. پشاور ۾ صحت جو اتحاد مهم جو افتتاحڪرڻ بعد ميڊيا سان ڳالهائيندي عمران خان جو چوڻ هو ته پنجاب ۾ هڪ وڏو صوبو بڻجي وڃي ته سمورا صوبا برابر ٿي ويندا ۽ قومي مسئلن ۾ گهٽتائي ٿيندي. هن چيو ته هميشه ننڍن صوبن کان انهن جا حق کسيا ويا آهن ۽ اهو ئي سبب آهي جو اڄ بلوچستان جون حالتون خراب آهن. عمران خان چيو ته جيڪڏهن بلوچستان جي عوام کي انهن جا حق ڏنا وڃن ها ته اتي حالتون معمول موجب هجن ها. سندس چوڻ هو ته وفاق طرفان خيبر پختون خواهه حڪومت کي ناڪام بڻائڻ جي ڪوشش ڪئي پئي وڃي پر وڏي وزير پرويز خٽڪ جي قيادت ۾ تحريڪ انصاف جي حڪومت ڪي پي ڪي کي مثالي صوبو بڻائي ڏيکاريندي.

 

متحده کي سنڌ سرڪار ۾ شامل ڪرڻ سان سنڌ کي فائدو پهچي ٿو ته اهڙو قدم ڇو نه کڻجي: نثار کهڙو

ڪراچي (اسٽاف رپورٽر) سنڌ جي سينيئر وزير نثار کهڙي چيو آهي ته متحده کي سنڌ سرڪار ۾ شامل ڪرڻ سان سنڌ کي فائدو پهچي ٿو ته اهڙو قدم ڇو نه کڻجي، 60-40 واري فارمولا کي پ پ سان منسوب ڪندڙن کان عوام پاڻ پڇي سگهي ٿو. ڪراچي ۾ هڪ تقريب کي خطاب ڪندي نثار کهڙي چيو ته ايم ڪيو ايم سان هڪ ويزن تحت سرڪار ۾ شموليت لاءِ ڳالهيون شروع ڪيون ويون آهن، ڪنهن قدم سان سنڌ جو فائدو ٿئي ٿو ته ڇو نه کڻجي؟ هن چيو ته پ پ پاڻ 60/40 واري فارمولا تي عمل جا مطالبا ڪندي رهي آهي، اهو فارمولا رڳو ڪراچي لاءِ نه پر سنڌ جي ٻين شهري علائقن لاءِ به آهي. صوبائي وزير جو چوڻ هو ته جيڪي ماڻهو ان فارمولا کي پ پ سان منسوب ٿا ڪن، عوام انهن کان پاڻ پڇي سگهي ٿو. ڊاڪٽر ذوالفقار مرزا جي الزامن بابت پڇيل سوال جي جواب ۾ نثار کهڙي چيو ته کيس اعتراض هئا ته حڪومت ۾ شامل ڇو رهيو، حسنين مرزا ۽ ڊاڪٽر فهيده مرزا سندس بيانن جي حمايت ڪن ٿا يا نه، اهو پاڻ ئي ٻڌائي سگهن ٿا. تعليم واري وزير جو وڌيڪ چوڻ هو ته سرڪار معياري تعليم لاءِ ڪوششون ڪري رهي آهي، جلد بند پيل اسڪول به کولرايا ويندا.

 

 

اسلام ۾ 4 نڪاح جائز آهن، متحده سان 7 دفعا نڪاح ٿيو ۽ ٽٽو خبر نه آهي ته اڃا ڪيترا نڪاح ٿيندا: منظور وساڻ

خيرپور (ڊ.ر) صوبائي وزير منظور وساڻ چيو آهي ته پيپلز پارٽِي جو متحده سان ست ڀيرا نڪاح ٿيو ۽ ٽٽو آهي پر اسلام ۾ 4 ڀيرا نڪاح جائز آهن خبر ناهي متحده سان اڃا ڪيترا نڪاح ٿيندا، پرويز مشرف جو مستقبل اونداهو ٿي چڪو آهي، اتحاد جوڙڻ جو ڪو فائدو نه ٿيندو، ذوالفقار مرزا جي پارٽي قيادت تي لڳايل الزام ڪوڙ تي ٻڌل آهن، قائم علي شاهه سندس بيانن تي غور ڪري رهيو آهي جنهن کانپوءِ ان جي خلاف ڪارروائي ٿيندي، ڪراچي کانپوءِ خيرپور ضلعو لينڊ مافيا جو ڳڙهه  بڻجي چڪو آهي، بلديا ٽائون سانحي ۾ جيڪو ملوث هوندو ان خلاف سخت ڪارروائي ٿيندي، سانحي ۾ 3 سئو کان وڌيڪ ماڻهو سڙي ويا، سڄي ملڪ جي جيلن ۾ 8 هزار کان وڌيڪ دهشتگرد ڦاهي جي سزا تي ويٺل آهن، ڪجهه دهشتگردن کي ڦاهي ڏيڻ کانپوءِ دهشتگردن ۾ ڦڙ ڦوٽ آهي، ڦاهيون ڏيڻ سان جيلن ۾ دهشتگردي جي حملن جا خطرا وڌي ويا آهن جنهن سبب سنڌ جي جيلن ۾ سخت سيڪيورٽي جا انتظام ڪيا ويا آهن، شڪارپور سانحي ۾ 60 کان وڌيڪ ماڻهو شهيد جنهن جي جيتري مذمت ڪئي وڃي گهٽ آهي، 20-20 لک رپيا انسان جي جان جي قيمت نه آهي، اهڙن خيالن جو اظهار هن خيرپور پريس ڪلب جي نون چونڊيل عهديدارن سان ڳالهائيندي ڪيو، هن چيو ته خيرپور ضلعي ۾ سرڪاري زمينن تي قبضا ٿي رهيا آهن، قبضا مافيا طاقتور آهي، بي لغام گهوڙي وانگر اربين رپين جي زمينن تي قابض آهي، سنڌ حڪومت هنگامي بنيادن تي انهن خلاف ڪارروائي ڪندي، خيرپور جي تاريخي ناز هاءِ سيڪنڊري اسڪول سميت ٻين سرڪاري اسڪولن جي نجڪاري جيڪڏهن سٺا ڪم ۽ تعليم کي هٿي وٺرائڻ لاءِ آهي ته اها سٺي ڳالهه آهي، جيڪڏهن قيمتي تاريخي جاين تي قبضي جي رٿابندي ٿي رهي آهي ته ان جي سخت مذمت ڪريان ٿو، سنڌ جي زراعت تباهه ٿي رهي آهي، شگر مالڪ مستي ڪري رهيا آهن، 182 رپيا في مڻ آبادگارن جو حق آهي پر هي مسئلو سپريم ڪورٽ ۾ ٻڌڻي هيٺ آهي، ان سان گڏ پيپلز پارٽي سنڌ ڪونسل جو ميمبر منور وساڻ ۽ ٻيا موجود هئا.

 

شڪارپور سانحي خلاف سنڌ جي مختلف شهرن ۾ شٽربند هڙتال ، احتجاجي مظاهرا، ڌرڻا

ڪراچي (نمائندن وٽان) شڪارپور سانحي ۾ ملوث جوابدار گرفتار نه ٿيڻ خلاف شھداءَ ڪميٽي ۽ شيعا تنظيمن جي سڏ تي سنڌ جي مختلف شهرن ۾ شٽربند هڙتال ڪري احتجاجي مظاھرا ڪيا ويا. ھڙتال سبب مختلف شھرن جا سمورا ننڊا وڏا ڪارباري مرڪز بند رھيا. شڪارپور ۾ لکيدر چوڪ، ھاٿيدر، ھزاريدر، صدر بازار ۽ مينا بازار سميت ٻيا ڪاروباري مرڪز بند رهيا. مدئجي ۾ شھر جا مک ڪاروباري مرڪز شاهي بازار، اسٽيشن روڊ ۽ بس اسٽاپ مڪمل طور بند ڪيا ويا. بدين ۾ھڙتال سبب شھباز روڊ، شاھي بازار ڪڍڻ روڊ ۽ قائداعظم روڊ بند سميت شھر جو سمورو ڪاروبار بند رکيو ويو. دادو ۾ شهر جا ڪاروباري مرڪز اسٽيشن روڊ، شاهي بازار، ريشم گلي، نئون چوڪ، ڪچهري روڊ، چاندني چونڪ مڪمل بند رهيا جڏھن ته ڪنھن به اڻوڻندڙ واقعي کي منھن ڏيڻ لاءِ سڪيورٽي پڻ سخت ڪئي وئي آھي. جوهي ۾ مجلس وحدت المسلمين جي سڏ تي شٽربند هڙتال ڪرڻ بعد علي نواز مهدوي، احسان علي ۽ اعجاز حسيني هي اڳواڻي ۾ ڪارڪنن احتجاجي مظاهرو ڪري ڌرڻو هنيو. ڪوٽڙيءَ ۾ شھر مڪمل بند رھيو جڏھن ته روڊن تان ٽريفڪ به معمول کان گھٽ رھي. شھداد ڪوٽ ۾ ڪاروبار بند رکي، مجلس وحدت المسلمين ۽ شيعا علماءَ ڪائونسل جي ڪارڪنن، سيد اڪبر شاھه، سردار مگسي ۽ حسين علي شاھه جي اڳواڻي ۾ شھر جي مک چوڪ تي احتجاجي مظاھرو ڪيو. ڳڙهي خيري ۾ ڪاروبار بند ڪري، سيد بشير احمد شاھه، قمر عباس جمالي، جاويد لغاري ۽ غضنفر علي کنڊ جي اڳواڻي ۾ احتجاجي مظاهرو ڪري مرڪزي امام بارگاھه قصر حسين کان ريلي ڪڍي پنج گلا چوڪ تي ڌرڻو هنيو. ميھڙ ۾ شعيا تنظيمن جي سڌ تي ڪاروبار بند رکيو ويو جڏھن ته منور جعفري، امير علي جوئي جي اڳواڻي ۾ مجلس وحدت المسلمين جي ڪارڪنن مرڪزي امام بارگاھه وٽ احتجاجي مظاھرو ڪيو. ڪنڌڪوٽ ۾ گھنٽا گهر چوڪ، سبزي منڊي، پيٽرول پمپس ۽ شھر جا ٻيا ڪارو باري مرڪز بند ڪرائي، ايم ڊبليو ايم پارٽي جي ڪارڪنن، مير فائق علي جکراڻي جي اڳواڻي ۾ احتجاجي ريلي ڪڍي. چوھڙ جمالي ۾ اصغريه آرگنائيزيشن پاران شھر جا ڪاروباري مرڪز شاھي بازار، سونارا بازار، حيدري چوڪ بند رھيا. دولتپور ۾ شھر اندر مڪمل شٽربند هڙتال رھي، جڏهن ته سوين ڪارڪنن پاران شفقت حسين لانگا ۽ ظهير عباس لانگا جي اڳواڻي ۾ مين روڊ کان پريس ڪلب تائين ريلي ڪڍي احتجاجي مظاھرو ڪيو ويو. ڊگھڙي ۾ شٽربند ھڙتال ڪري، ايم ڊبليو ايم جي ڪارڪنن، بشير شاھه جي اڳواڻي ۾ احتجاجي مظاھرو ڪيو. جاتي ۾ سرڪاري توڙي خانگي اسڪولن جو بائيڪاٽ ڪيو ويو، جڏھن ته مختلف تنظيمن جي ڪارڪنن احتجاجي مظاھرو ڪري نعريبازي ڪئي. جيڪب آباد، ٽنڊي محمد خان، قاضي احمد، ھالا، عمرڪوٽ، دوڙ، منھڙي، نصيرآباد، ميرپور بٺوري، ٻڍي قمبراڻي، فريدآباد، تلھار، ڪنڌرا، ڊکڻ، دڙي ۽ ٻين شھرن ۾ پڻ ڪاروبار بند رھيو. مختلف شھرن ۾ مظاھرن دوران ميڊيا سان ڳالھائيندي اڳواڻن چيو ته سنڌ حڪومت شڪارپور سانحي جا جوابدار گرفتار ڪرڻ ۾ مڪمل طور ناڪام ٿي وئي آھي. احتجاج ڪندڙن، مطالبو ڪيو ته شڪارپور ۾ ٿيل دھشتگرديءَ جي واقعي جا جوابدار جلد گرفتار ڪري، کين سرعام ڦاھي ڏني وڃي.

 

سچائي سان ڪم ڪندڙ اداڪارن جي حوصلا افزائي ڪندي آهيان: وديا بالن

ممبئي (شوبز نيوز)بالي ووڊ اداڪاره وديا بالن چيو آهي ته هوءَ سچائي سان ڪم ڪندڙ اداڪارن جي هميشه حوصلا افزائي ڪندي آهي، ڀارتي ميڊيا مطابق وديا بالن پنهنجي انٽرويو ۾ ان ڳالهه جو اظهار ڪيو ته بالي ووڊ ۾ ڪاميابي جو سفر آسان نه آهي، ان کي شروع ۾ اڳيان وڌڻ لاءِ ڪا مدد حاصل نه هئي، ان کان غلطيون به ٿيون ۽ مايوسي به ٿي پر آخرڪار ڪاميابي ملي، اداڪاره وڌيڪ چيو ته هو هاڻي بالي ووڊ ۾ نون اداڪارن جي رهنمائي ڪندي آهي ۽ انهن کي ٻڌائيندي آهي ته ڇا ڪرڻ گهرجي ۽ ڇا نه. هن وڌيڪ چيو ته اداڪاري کي صرف ڪمائي جو ذريعو نه بڻائڻ گهرجي.

 

رنبير ڪپور ڪار ڪيمرا مين جي پيرن مٿان چاڙهي ڇڏي

ممبئي(شوبز نيوز)رنبير ڪپور ايوارڊ  ۾ شرڪت کانپوءِ گهر وڃڻ لڳو ته ان جي گاڏي ڪيمرا مين جي پيرن مٿان گذري وئي رنبير ان ايڪسيڊنٽ کان اڻڄاتل بڻجي گهر روانو ٿي ويو، ڪيمرا مين پيرن تي ڌڪ  لڳڻ سبب مڪمل بيڊ ريسٽ تي آهي رنبير کان جڏهن ان ايڪسيڊنٽ جي باري ۾ پڇيو ويو ته ان پريشاني جو اظهار ڪندي فوري ڪيمرا مين جي خيريت دريافت ڪئي.

 

فيض احمد فيض جو 104 يوم پيدائش جمعي تي ملهايو ويو

فيصل آباد(شوبز نيوز) اردو جي ناليواري شاعر فيض احمد فيض جو 104 يوم پيدائش گذريل ڏينهن (جمعي) تي ملهايو ويو. نالي وارو شاعر 13 فيبروري 1911ع تي پيدا ٿيو هو. يوم پيدائش جي موقعي تي سڄي ملڪ جي مختلف شهرن ۾ تقريبون منعقد ڪيون ويون جن ۾ عظيم شاعر جي خدمتن کي خراج عقيدت پيش ڪيو ويو. فيض احمد فيض جي سالگره جي موقعي تي اليڪٽرانڪ ميڊيا تي خاص پروگرام نشر ڪيا ويا جڏهن ته پرنٽ ميڊيا ۾ پڻ خاص مضمون شايع ڪيا ويا.

 

ڪيترائي ماڻهو ڪنهن فلم کي هدف بڻائي سٺي شهرت حاصل ڪرڻ جي ڪوشش ڪندا آهن: عامر خان

ممبئي (شوبز نيوز)بالي ووڊ اداڪار عامر خان چيو آهي ته ڪيترائي ماڻهو ڪنهن فلم کي هدف بڻائي سٺي شهرت حاصل ڪرڻ جي ڪوشش ڪندا آهن، ذريعن مطابق پنهنجي هڪ انٽرويو ۾ عامر خان چيو ته سندس فلم پي ڪي هٽ ثابت ٿي آهي ۽ هٽ جو مطلب ڪامياب هجڻ آهي ۽ عوام ان کي پسند ڪيو آهي، عامر خان چيو ته جيڪڏهن عوام ڪنهن فلم کي ڏسڻ پسند ڪري ته ان جي خلاف مهم بي معنيٰ ٿي ويندي آهي، هن چيو ته هاڻي ڳالهيون ڪندڙن لاءِ فلم انڊسٽري ”سافٽ ٽارگيٽ“ بڻجي چڪي آهي، جڏهن به ڪو سٺي شهرت حاصل ڪرڻ چاهي ٿو ته اهو ڪنهن سٺي فلم کي هدف بڻائي بيانن جو سلسلو شروع ڪري ٿو.

 

ناصر جمشيد کان سٺي فٽنيس ته منهنجي 70 سالا پڦي جي آهي: شعيب اختر

ڪراچي(اسپورٽس نيوز)قومي ٽيم جي اڳوڻي فاسٽ بالر شعيب اختر اوپننگ بيٽسمين ناصر جمشيد کي تنقيد جو نشانو بڻائيندي چيو ته ان کان سٺي فٽنيس ته منهنجي 70 سالا پڦي جي آهي پنهنجي هڪ انٽرويو ۾ هن چيو ته ناصر  پريڪٽس ميچ ۾ غير ذميواري سان کيڏندي وڪيٽ وائي، فيلڊ ۾ به هو وڌيڪ متحرڪ ڏسڻ ۾ نه پئي آيو، ان جي سليڪشن تي سواليه نشان آهي ان کان سٺي فٽنيس ته منهنجي 70 سالا پڦي جي آهي هن چيو ته يونس  خان کي ون ڊي اسڪواڊ ۾ واپس آڻڻ به صحيح فيصلو نه ٿو لڳي.

 

وارم اپ ميچ ۾ افغانستان هٿان يو اي اي کي شڪست

ميلبورن(اسپورٽس نيوز)ورلڊ ڪپ وارم اپ ميچ ۾ افغانستان گڏيل عرب امارتن کي 14 رنسن تان هارائي ڇڏيو ميلبورن ۾ کيڏي ويندڙ ميچ ۾ افغانستان ٽاس کٽي پهريان بيٽنگ ڪندي مقرر 50 اوورن ۾ 9 وڪيٽن جي نقصان تي 308 رنسون ٺاهيون سميع الله شنواري 58 رنسن سان نمايان بيٽسمين رهيو جڏهن ته نجيب الله زادران 46، مير واعث اشرف 34، اصغر سانڪزئي 33 ۽ ڪپتان محمد نبي 30 رنسون ٺاهي سگهيا، گڏيل عرب امارتن طرفان امجد جاويد 4 جڏهن ته محمد نويد ۽ ڪرشنا چندرن 2، 2 وڪيٽون حاصل ڪيون، گڏيل عرب امارتن جي ٽيم 309 رنسن جي هدف جي حاصلات ۾ 49 هين اوور ۾ 294 رنسن تي آئوٽ ٿي وئي خرم خان جون 86 رنسون  به ڪاميابي نه ڏياري سگهيون ۽ افغانستان ميچ 14 رنسن تان کٽي ورتي، افغانستان طرفان سڀ کان وڌيڪ وڪيٽون وٺندڙ آفتاب عالم هو جنهن 3 رانديگر آئوٽ ڪيا.