تازيون خبرون

Daily Archives: February 12, 2015

بينظير قتل ڪيس: جاچ ۾ بابر اعواڻ ۽ رحمان ملڪ کي شامل ڪيو وڃي: ذوالفقار مرزا

ڪراچي(اسٽاف رپورٽر) سنڌ جي اڳوڻي گهرو وزير ڊاڪٽر ذوالفقار مرزا جو چوڻ آهي ته بينظير ڀٽو جي قتل جي جاچ ۾ رحمان ملڪ ۽ بابر اعواڻ کي پڇا ڳاڇا ۾ شامل ڪيو وڃي، بلاول ڀٽو ۽ آصف زرداري وچ ۾ اختلافن جي تصديق ڪريان ٿو جيڪي سنڌ حڪومت جي ناقص ڪارڪردگي سبب ٿيا انٽرويو ۾ ڊاڪٽر ذوالفقار مرزا چيو ته پ پ جا وزير محترمه جي نالي تي لکين روپين عيوض نوڪريون وڪڻي ان جي رت سان غداري ڪري رهيا آهن ۽ ڏک جهڙي ڳالهه هي آهي ته ڦر لٽ ڪندڙن کي انهن جي ڪيسن جي پيروي ڪرڻ جو به وقت ناهي، بلاول پارٽي کي پنهنجي والده وانگر هلائڻ چاهي ٿو پر مفادپرستن کي اهو ڪڏهن به گوارا نه ٿيندو.

 

الطاف حسين جو معافي وارو عمل ٺيڪ آهي پر بلديه سانحي جو ڪيس فوجي عدالت ۾ هلايو وڃي: عمران خان جو مطالبو

نوشهروه(م.ڊ) پي ٽي آءِ سربراهه عمران خان بلديا سانحي جي ذميوارن خلاف فوري ڪارروائي ڪرڻ جو مطالبو ڪندي چيو آهي ته ڀتو نه ڏيڻ تي 250 کان وڌيڪ پورهيتن کي جيئرو ساڙيو ويو، هاڻي وزيراعظم جي ذميواري آهي ته هنن خلاف ڪارروائي شروع ڪري، الطاف جو معافي وارو عمل ٺيڪ آهي، پر حالتون اڃا به انتهائي سنگين آهن. نوشهره ۾ ايليٽ فورسز جي پاسنگ آئوٽ پريڊ کانپوءِ ميڊيا سان ڳالهائيندي عمران خان چيو ته ڪو به برطانيا ۾ ويهي پاڪستانين کي ڌمڪيون نٿو ڏئي سگهي، جيڪا برطانوي قانون جي ڀڃڪڙي آهي. پي ٽي آءِ سربراهه عمران خان چيو ته بلديا سانحي جي گڏيل جاچ رپورٽ تي عمل ٿيڻ گهرجي، الطاف جو معافي وارو عمل ٺيڪ آهي، پر حالتون اڃا به انتهائي سنگين آهن. عمران خان جو اهو به چوڻ هو ته  زهره شاهد کي ڌمڪيون ڏيڻ بعد قتل ڪيو ويو، جنهن جي قاتلن کي به وائکو ڪيو وڃي. پي ٽي آءِ سربراهه جو اهو به چوڻ هو ته بلديا سانحي جي ذميوارن خلاف فوري ڪارروائي ڪرڻ وزيراعظم جي ذميواري آهي، جنهن کي فوري طور ڪارروائي شروع ڪرڻ گهرجي.

 

ايم ڪيو ايم ۽ ف ليگ اتحادي رهي چڪيون آهن، ساڻن ڳالهيون ڪرڻ ۾ ڪو حرج ناهي: نثار کهڙو

ڪراچي (اسٽاف رپورٽر) سنڌ جي سينيئر وزير نثار احمد کهڙو چيو آهي ته متحده قومي موومينٽ ۽ مسلم ليگ فنڪشنل پيپلز پارٽيءَ جون اتحادي جماعتون رهيون آهن ان ڪري انهن سان ڳالهيون ڪرڻ ۾ ڪو به حرج ناهي،ڳالهيون ڪرڻ سان جمهوريت جي فضا وڌيڪ بهتر ٿيندي.سينيٽ جون چونڊون جيڪڏهن بنا مقابلي ٿينديون ته اها سٺي ڳالهه هوندي ۽ ان عمل سان هارس ٽريڊنگ جو رستو بند ٿي ويندو.اهڙن خيالن جو اظهار هن اربع ڏينهن سنڌ اسيمبليءَ ۾ واقع پنهنجي آفيس ۾ يورپي  يونين جي سفير لارس گنار وگي مارڪ سان ملاقات ڪرڻ کان اڳ ميڊيا سان ڳالهائيندي ڪيو. نثار احمد کهڙو چيو ته پيپلز پارٽي پنهنجي عددي اڪثريت موجب سنڌ مان سينيٽ جون 6 سيٽون حاصل ڪري سگهندي پر جيڪڏهن ستين سيٽ لاءِ  ٻين جماعتن سان رابطا ڪري ڳالهيون ڪري رهيا آهيون ته ان ۾ ڪو حرج ناهي. ان عمل سان جمهوريت جي فضا وڌيڪ بهتر ٿيندي ڇاڪاڻ ته بهتر فضا کي خراب نه ٿا ڪرڻ چاهيون.هن چيو ته سينيٽ چونڊن بابت ڳالهين لاءِ مسلم ليگ فنڪشنل جي دوستن سان پڻ رابطا ٿيا آهن پر سينيٽ چوندون بنا مقابلي ٿيڻ بابت ڪجهه چوڻ وقت کان اڳ هوندو جيڪڏهن سينيٽ چونڊون بنا مقابلي ٿينديون ته ان عمل سان ڪنهن کي به اهو موقعو نه ملندو ته نمائندن تي هارس ٽريڊنگ ڪرڻ ۽ ووٽن جي خريد فروخت جا الزام هڻي ۽ اهڙو رستو بند ٿي ويندو. هن چيو ته اڃان تائين سينيٽ چونڊن لاءِ نامزدگيءَ وارا ڪاغذ پڻ جمع نه ٿيا آهن ان ڪري اهو چوڻ پڻ وقت کان اڳ هوندو ته فنڪشنل ليگ کي سينيٽ چونڊن ۾ سيٽ ملندي يا نه؟ وقت کان اڳ اهڙيون ڳالهيون نه ڪيون وڃن. هن چيو ته ان بابت پڻ خبر ناهي ته اپوزيشن جون جماعتون سينيٽ چونڊن لاءِ پنهنجو گڏيل اميدوار آڻي رهيون آهن يا نه؟ ان بابت ڪا خبر ناهي. ڪور ڪميٽي جو اجلاس ٿيڻ بابت هڪ سوال جي جواب ۾ هن چيو ته پيپلز پارٽي ۽ ايم ڪيو ايم ۾ ڳالهين لاءِ ڪور ڪميٽي جو اجلاس جڏهن ٿيو ته ان بابت سڀني کي خبر پئجي ويندي. هڪ سوال جي جواب ۾ هن چيو ته 18هين ترميم کان پوءِ تعليم صوبائي سبجيڪٽ آهي ۽ صوبي کي پنهنجو نصاب جوڙڻ جو اختيار آهي ان ڪري وفاق پاران قومي نصابي ڪائونسل جوڙڻ صوبائي خودمختياري جي خلاف آهي ۽ صوبائي خودمختيار کسڻ جي ڪوشش آهي. ان ڪري سنڌ قومي نصابي ڪائونسل کي رد ڪري ٿي.

 

نواب شاهه ڀرسان وين ۽ موٽر سائيڪل ۾ ٽڪر، هڪ فوت، 15 ڄڻا زخمي

نوابشاھ (ڊ.ر) نوابشاھ دوڙ روڊ جي چوڌري جميل اسٽاپ ڀرسان موٽر سائيڪل ۽ ڪنڊيارو کان نوابشاھ ايندڙ تيز رفتار وين جو ٽڪر ٿي پيو جنهن جي نتيجي ۾ 15 ماڻهو زخمي ٿي پيا، انهن مان هڪ موٽر سائيڪل سوار 27 ورهين جو شوڪت علي خاصخيلي فوت ٿي ويو، جڏهن ته 14 زخمين 16 ورهين جي مهڪ شيخ، 55 ورهين جي زاهده،  ورهين جي زينب شيخ،  75 ورهين جو نظام الدين ڀريا روڊ واسي آهي، 44 ورهين جو محمد عهد آرائين ڀريا روڊ، 22 ورهين جي ذڪيه عزيز ميراثي، دوڙ، 21 ورهين جو عمران ڪراچي، 27 ورهين جو شفيع محمد بروهي ، 22 ورهين جو اعظم حسين کوکر، ٻانڌي جا، 23 ورهين جو محمد ارشاد ملڪ نوابشاھ، موٽر سائيڪل سوار 25 ورهين جو راشد خاصخيلي ڳوٺ جمال شاھ، 22 ورهين جي ريما ڪيريو، 21 ورهين جي شازيه ڪيريو، 20 ورهين جي عنوا عزيز، ميراثي، ٽئي جا رهواسي آهن، زخمين جو چوڻ آهي ته ٻه وينون تيز رفتاري سان هڪ ٻئي کان اڳ وٺڻ جي ڪوشش ڪري رهيون هئيون ته اچانڪ موٽر سائيڪل سان ٽڪر ٿي پيو ۽ وين ڪلٽي ٿي پئي، جڏهن ته ٽريفڪ پوليس جي طرفان ڪا به سختي يا قانون تي عمل ڪرائڻ لاءِ ڪوبه هتي سزا جو عمل بند آهي.

 

فيض احمد فيض جي 100 هين سالگره جون تقريبون 14 فيبروري کان شروع ٿينديون

لاهور(شوبز نيوز) انقلابي شاعر فيض احمد فيض جي 100 هين سالگره جي حوالي سان تقريبن جو سلسلو 14 فيبروري کان شروع ٿيندو. ان سلسلي ۾ مرحوم جي ڳوٺ واقع ڪالا قادر (نارروال) ۾ مشاعري جي محفل ٿيندي. 14 فيبروري جي ڏينهن ٿيندڙ ان مشاعري ۾ مقامي ۽ لاهور جا ناميارا شاعر حصو وٺندا ان کان علاوه ريڊيو ۽ ٽي وي چئنلن تان فيض احمد فيض جي حوالي سان خاص پروگرام نشر ڪيا ويندا. نارروال ۾ ٿيندڙ مشاعري جي صدارت منيزه هاشمي ۽ سليمه هاشمي ڪنديون

 

پاڪستاني فلم ”دختر” برلن فلمي ميلي ۾ ڏيکاري ويندي

اسلام آباد(شوبز نيوز) پاڪستاني فلم ”دختر” برلن ۾ امريڪن انڊپينڊنٽس فلمي ميلي ۾ ڏيکاري ويندي. امريڪي انڊيپينڊنٽس آزاد فلمسازن جي تنظيم آهي جيڪا 1979ع ۾ قائم /ڪئي وئي هئي. اها تنظيم هر سال سڄي دنيا ۾ آزاد فلمسازن جي ٺاهيل فلمن جي چونڊ ڪري انهن جي نمائش ڪرائيندي آهي. ياد رهي ته فلم ”دختر” جو پريميئر ٽورنٽو ۾ به ٿي چڪو آهي

 

ڪومل رضوي جو نئون گانو ”تو ڀي گيا“ ويلنٽائن ڊي جي موقعي تي رليز ڪيو ويندو

اسلام آباد(شوبز نيوز) گلوڪاره ڪومل رضوي جو نئون گانو ”تو ڀي گيا“ ويلنٽائن ڊي جي موقعي تي 14 فيبروري تي رليز ڪيو ويندو. ڪومل رضوي چيو ته سندس گاني جي وڊيو ۾ ان سان گڏ علي ڪاظم نظر ايندو، جڏهن ته گاني جي موسيقي عدنان سميع خان جي پٽ اذان سميع خان ترتيب ڏني آهي.

 

اسپائيڊر مين سيريز جي نئين فلم جولاءِ 2017 ۾ ريليز ڪئي ويندي

آمريڪا(شوبز نيوز)سپر هيرو اسپائيڊر مين جي مداحن کي هاڻي گهڻو انتظار نه ڪرڻو پوندو، اسپائيڊر مين سيريز جي نئين فلم جون تياريون شروع ٿي ويون آهن. سوني پڪچرز ۽ ماروَل اسٽوڊيوز ۾  سپر هيرو اسپائيڊر مين سيريز ج ي نئين فلم لاءِ 4 ارب ڊالرز جو معاهدو ٿي ويو آهي. اسپائيڊر مين سيريز جي نئين فلم جولاءِ 2017ع ۾ ريليز ڪئي ويندي، والٽ ڊزني ڪمپني جي مارويل اسٽوڊيو جو صدر ڪيوَن فيگي سوني پڪچر سان گڏ فلم جو ڪو پروڊيوسر هوندو. معاهدي تحت اسپائيڊر مين نئين ايندڙ مارويل فلم ۾ ايندو ۽ آئرن مين، ٿور ۽ ڪيپٽن امريڪا سميت ٻيا مارويل ڪريڪٽر وري اسپائيڊر مين فلمن ۾ نظر ايندا. معاهدي بابت جاري ڪيل بيان ۾ چيو ويو آهي ته اسپائيڊرمين مارويل جي دنيا ۾ 50 سالن جي تاريخ رکي ٿو، هن ڊيل سان مداحن کي ٻين سمورن هيروز سان گڏ اسپائيڊر مين کي ان جي اصل پنهنجي جاءِ تي ڏسڻ جو موقعو ملندو.

 

ورلڊ ڪپ وارم ميچز: زمبابوي سريلنڪا کي 7 وڪيٽن تان هارائي مخالف ٽيمن لاءِ خطرو بڻجي ويو

ڪرائسٽ(اسپورٽس نيوز) آءِ سي سي ورلڊ ڪپ وارم اپ ميچز ۾ زمبابوي سريلنڪا کي 7 وڪيٽن تان هارائي ڪري مخالف ڌُرين لاءِ خطرو بڻجي ويو. ميزبان نيوزيلينڊ ڏکڻ آفريڪا کي 134 رنسن تان شڪست ڏني. گذريل ڏينهن تي لنڪولن ۾ کيڏيل وارم اپ ميچ ۾ سريلنڪا پهرين کيڏندي مقرر اوورن ۾ 8 وڪيٽن تي 279 رنسون ٺاهيون. جواب ۾ زمبابوي ٽيم گهربل هدف 46هين اوور جي ٻي بال تي رڳو 3 وڪيٽن جي نقصان تي حاصل ڪيون. جڏهن ته ڪرائسٽ چرچ ۾ کيڏيل ميچ ۾ نيوزيلنڊ ڏکڻ آفريڪا کي 134 رنسن جي ڳري مارجن تان هارايو. ڪيوي ٽيم پهرين کيڏندي مقرر اوورن ۾ 8 وڪيٽن 331 رنسون ٺاهيون. جواب ۾ ڏکڻ آفريڪا جي ٽيم گهربل هدف حاصل ڪرڻ ۾ ناڪام رهي سموري ٽيم 44.2 اوورن ۾ 197 رنسون ٺاهي آئوٽ ٿي وئي.

 

عورتن جي 3 رڪني قومي ٽينس ٽيم جونيئر فيڊ ڪپ ۾ شرڪت ڪندي: خالد رحماني

اسلام آباد(اسپورٽس نيوز) پاڪستان ٽينس فيڊريشن جي سيڪريٽري خالد رحماني چيو آهي ته 3 رڪني قومي ٽينس ٽيم جونيئر فيڊ ڪپ جو پري ڪواليفائنگ رائوڊ ۾ شرڪت ڪندي. جڏهن ته ايونٽ 2 مارچ کان ملائيشيا ۾ شرو ع ٿيندو. ٽه رڪني ٽيم ۾ مبين آفتاب، حنا نويد ۽ علينه آفتاب شامل آهن، جڏهن ته محبوب احمد خان ٽيم سميت ڪوچ نان پلينگ ٿيندو. هن چيو ته ٽيم جي رانديگرن جي چونڊ ٽرائلز کانپوءِ ميرٽ جي بنياد تي ڪئي ويندي. اُميد آهي ته رانديگر پري ڪواليفائنگ رائونڊ ۾ شاندار ڪارڪردگيءَ جو مظاهرو ڪندا.