تازيون خبرون

Daily Archives: February 11, 2015

بجلي منصوبن ۾ غير ضروري دير جا ذميدار احتساب لاءِ تيار رهن، وزير اعظم جو الٽيميٽم

اسلام آباد (بيورو) وزيراعظم نواز شريف لاڳاپيل کاتن کي بجلي جي پيداوار جا منصوبا مقرر ٿيل وقت ۾ مڪمل ڪرڻ جي هدايت ڪندي چيو آهي ته منصوبن ۾ غير ضروري دير جا ذميدار احتساب لاءِ تيار رهن، عوام کي گهٽ قيمتن تي بجلي جي فراهمي اولين ترجيح آهي، جلد کان جلد لوڊشيڊنگ ختم ڪرڻ لاءِ قدم کنيا وڃن، نيلم جهلم منصوبو مقرر ٿيل وقت ۾ مڪمل ٿيڻ گهرجي. هو توانائي جي ڪابينا ڪميٽي جي اجلاس ۾ خطاب ڪري رهيو هو. وزيراعظم جي سربراهي ۾ اجلاس ۾ گذريل اجلاسن جي فيصلن تي عملدرآمد جو جائزو ورتو ويو، اجلاس ۾ وفاقي وزيرن اسحاق ڊار، سعد رفيق، خواجا آصف، شاهد خاقان عباسي، احسن اقبال، وڏي وزير شهباز شريف، ڄام ڪمال، عابد شير علي، پرڏيهي صلاحڪار سرتاج عزيز، خاص مددگار طارق فاطمي ۽ واپڊا چيئرمين ظفر محمود شرڪت ڪئي. اجلاس کي خطاب ڪندي وزيراعظم  نواز شريف چيو ته عوام کي گهٽ قيمتن تي بجلي جي فراهمي اولين ترجيح آهي، جلد کان جلد لوڊشيڊنگ گهٽائڻ لاءِ قدم کنيا وڃن. وزيراعظم لاڳاپيل کاتن کي هدايت ڪئي ته بجلي جي پيداوار جا منصوبا مقرر ٿيل وقت ۾ مڪمل ڪيا وڃن، منصوبن ۾ غير ضروري دير جا ذميدار احتساب لاءِ تيار رهن. هن چيو ته لوڊشيڊنگ ۾ گهٽتائي لاءِ هر ممڪن قدم کڻي رهيا آهيون، نيلم جهلم پن بجلي منصوبو مقرر ٿيل وقت ۾ پورو ٿيڻ گهرجي، نيلم جهلم منصوبو بروقت مڪمل ڪرڻ لاءِ فنڊ فراهم ڪيا وڃن. ان موقعي تي پاڻي ۽ بجلي سيڪريٽري يونس ڊاگانا بريفنگ ڏيندي ٻڌايو ته جنوري ۾ بلن جي وصولي 5 7  سيڪڙو رهي آهي جڏهن ته رهتن جي وصولين ۾ نمايان واڌ ٿي آهي ۽ رهتن جي وصولي 8 9  سيڪڙو رهي آهي جڏهن ته گردشي قرض هاڻ گهٽجي 4 5 2  ارب رپين جا رهجي ويا آهن ۽ گردشي قرضن ۾ وڌيڪ لاٿ آڻڻ لاءِ ڪئين سخت قدم کنيا ويا آهن. وفاقي سيڪريٽري بريفنگ ڏيندي ٻڌايو ته آءِ پي پيز کي واجب الادا رقم هاڻ گهٽجي 4 4 1  ارب 0 5  ڪروڙ رپين جي سطح تي اچي وئي آهي ۽ ان ۾ وڌيڪ نمايان گهٽتائي آندي ويندي. ان موقعي تي ٽرانسميشن لائين سسٽم کي اپ ڊيٽ ڪرڻ لاءِ ڪئين تجويزن جي منظوري ڏني وئي. پاڻي ۽ بجلي جي مملڪتي وزير عابد شير علي اجلاس ۾ سرڪاري ۽ خانگي ادارن کان بجلي جي رهتن جي وصولي لاءِ کنيل هاڻوڪي قدمن تي بريفنگ ڏني ۽ تجويز ڏني ته وفاقي ۽ صوبائي حڪومتن کان 2 8 3  ارب رپين جي رهتن جي وصولي لاءِ جامع حڪمت عملي بنائي وئي آهي پرپوءِ صوبن کان وصولي جو عمل تيز ڪرڻ لاءِ صوبائي وڏن وزيرن سان رابطا ڪرڻ جي ضرورت آهي، جڏهن ته تمام ڪمپنين کان خانگي ڪمپنين جي ڊيفالٽرز کان به وصولين جو عمل تيز ڪيو ويو آهي. اجلاس ۾ ايم ڊي پرائيويٽ پاور انفراسٽرڪچر بورڊ ڪوئلي مان هلندڙ منصوبن تي بريفنگ ڏني. توانائي متعلق اجلاس ۾ واپڊا چيئرمين ظفر محمود نيلم جهلم پاور منصوبي تي بريفنگ ڏيندي ٻڌايو ته نيلم جهلم منصوبي تي 0 7  سيڪڙو ڪم مڪمل ٿي چڪو آهي. منصوبي مان منگلا جي ڀيٽ ۾ وڌيڪ بجلي پيدا ٿيندي.

 

ايم ڪيو ايم پاران سنڌ حڪومت ۾ شامل ٿيڻ جو فيصلو

ڪراچي (اسٽاف رپورٽر) ايم ڪيو ايم جي سنڌ حڪومت ۾ شموليت جو معاهدو طئي ڪرائڻ لاءِ پيپلزپارٽي ۽ ايم ڪيو ايم وچ ۾ ڪور ڪميٽين جي قيام تي اتفاق ڪيو ويو آهي هي ڪور ڪميٽيون ٻنهي جماعتن وچ ۾ حڪومت سازي جو فارمولا طئي ڪنديون ۽ معاهدي جي نقطن تي عملدرآمد ڪرائڻ جي معاملن جي به نگراني ڪنديون پيپلزپارٽي جي ڪور ڪميٽي جي سربراهه سنڌ جو وڏو وزير سيد قائم علي شاهه هوندو جڏهن ته ڪور ڪميٽي جي ميمبر نثاراحمد کهڙو، شرجيل ميمڻ ۽ ڊاڪٽر سڪندر مينڌرو هوندو ايم ڪيو ايم جي ڪور ڪميٽي جو سربراهه ڊاڪٽر خالد مقبول صديقي هوندو ڪميٽي ۾ ڊاڪٽر فاروق ستار سيد  سردار احمد ۽ ڪنور نويد جميل شامل هوندا ايم ڪيو ايم پاران گورنر ڊاڪٽر عشرت العباد خان ۽ پيپلزپارٽي پاران رحمان ملڪ رابطو ڪرائڻ طور زميواريون نڀائيندا معاهدي جي توثيق آصف علي زرداري ۽ الطاف حسين ڪندا ايم ڪيو ايم جي قائد الطاف حسين سان رحمان ملڪ جي ملاقات کان پوءِ ايم ڪيو ايم سنڌ حڪومت ۾ شامل ٿيڻ جو فيصلو ڪيو آهي ۽ ٻنهي جماعتن ۾ معاهدو طئي ڪرائڻ لاءِ ڪور ڪميٽي جي قيام تي به اتفاق ڪيو ويو آهي معاهدي تحت 60، 40 جي تناسب تي عمل ڪرايو ويندو معاهدي ۾ اهو طئي ڪيو ويندو ته سمورين حڪومتي ۽ انتظامي پاليسين ۾ ايم ڪيو ايم جي مشاورت شامل هوندي شهري علائقن جي نوڪرين جي ڪوٽا تي ميرٽ تي عملدرآمد ڪرايو ويندو بلدياتي ادارن ۾ مقرريون مشاورت ۽ ميرٽ تي ڪيون وينديون ترقياتي منصوبن جا فنڊ بروقت جاري ڪيا ويندا ايم ڪيو ايم جي عدالت کان مٿانهين قتل ٿيندڙ ڪارڪنن جي جاچ لاءِ سنڌ حڪومت ڀرپور قدم کڻندي ۽ جيڪڏهن ان حوالي سان ڪي شڪايتون آيون ته قانون مطابق ان جو ازالو ڪيو ويندو ايم ڪيو ايم پيپلزپارٽي ڪراچي آپريشن کي ڪامياب بنائڻ لاءِ پنهنجون ڪردار ادا ڪيون ٻئي جماعتون ان ڳالهه تي عمل ڪنديون ته شهر ۾ ڏوهارين جي خلاف ٿيندڙ ڪارروائي جي مڪمل تائيد ڪئي وڃي ۽ شهر جون رونقون بحال ڪرڻ سان گڏ ان جي ترقي لاءِ ٻئي جماعتون گڏجي ڪم ڪنديون پيپلزپارٽي ايم ڪيو ايم جي مارجي ويل ڪارڪنن کي قانون مطابق معاوضو ادا ڪندي امن امان جي صورتحال بهتر ڪرڻ لاءِ جوڙيل پاليسي ۾ ايم ڪيو ايم جي مشاورت کي شامل ڪيو ويندو. ايم ڪيو ايم کي ٻه وزير ٻه صلاحڪار ۽ هڪ معاون خصوصي جا عهدا ڏنا ويندا جڏهن ته ان ۾ ڦير ڦار به ڪري سگهجي ٿي جڏهن ته ان جو حتمي فيصلو ڪور ڪميٽيون ڪنديون ٻنهي جماعتن جي اعليٰ قيادت پاران گرين سگنل ملڻ کان پوءِ ٻئي ڪميٽيون پنهنجو ڪم شروع ڪنديون سنڌ ڪابينه ۾ ايم ڪيو ايم کي بلديه پلاننگ اينڊ ڊيولپمينٽ صحت صنعت ۽ تجارت رانديون مذهبي معاملا ۽ ليبر جا کاتا ڏيڻ تي ڳالهه ٻولهه ڪئي ويندي مشاورت سان سنڌ ڪابينه جا قلمدان ايم ڪيو ايم کي ڏنا ويندا معاهدو طئي ٿيڻ کان پوءِ سنڌ ڪابينه ۾ ايم ڪيو ايم جا وزير حلف کڻندا معاهدي ۾ ڪراچي جا وڏا ميگا پروجيڪٽ مڪمل ڪرڻ لاءِ ٻئي جماعتون پنهنجو ڪردار ادا ڪنديون هي معاهدو لکت ۾ ڪيو ويندو.

 

اجتماعي قبرن بابت ڪيس ۾ چئني صوبن لاوارث لاشن بابت رپورٽون سپريم ڪورٽ ۾ جمع ڪرائي ڇڏيون

اسلام آباد (بيورو) اجتماعي قبرن بابت ڪيس ۾ چئني صوبن لاوارث لاشن بابت رپورٽون سپريم ڪورٽ ۾ جمع ڪرائي ڇڏيون خانگي ٽي وي مطابق پنجاب ۾ گذريل ٻن سالن ۾ 1299 سنڌ ۾ گذريل ڇهن سالن ۾ 398 خيبرپختونخواهه ۾ گذريل پنجن سالن ۾ 2600 بلوچستان ۾ پنجن سالن ۾ 153 لاوارث لاش هٿ آيا سڄي ملڪ مان گذريل ڇهن سالن ۾ جملي طور تي 4450 لاوارث لاش هٿ آيا سپريم ڪورٽ ۾ اجتماعي قبرن بابت ڪيس ۾ سنڌ حڪومت پنهنجي رپورٽ عدالت ۾ جمع ڪرائي ڇڏي رپورٽ ايڊيشنل ايڊووڪيٽ جنرل عدنان ڪريم، سپريم ڪورٽ ۾ جمع ڪرائي رپورٽ ۾ چيو ويو ته ڪراچي ۾ گذريل 6 سالن دوران 398 لاوارث لاش مليا آهن جن مان 304 جي سڃاڻپ ٿي سگهي آهي رپورٽ ۾ ٻڌايو ويو آهي ته لاوارث لاشن جي سڃاڻپ لاءِ 6 سالن دوران 48 اشتهار به ڏنا ويا ايڊيشنل ايڊووڪيٽ جنرل خيبرپختونخواهه به رپورٽ ڪورٽ ۾ جمع ڪرائي آهي خيبرپختوخنواه جي رپورٽ ۾ چيو ته گذريل پنجن سالن ۾ خيبرپختونخواهه ۾ 2600 لاوارث لاش مليا آهن پر ڪيترن ئي لاشن جي سڃاڻپ ٿي ۽ ڪيترن جي سڃاڻپ ناهي ٿي سگهي انگ اکر به مهيا نه آهن اسسٽنٽ ايڊووڪيٽ جنرل بلوچستان به رپورٽ جمع ڪرائي رپورٽ مطابق بلوچستان مان گذريل پنجن سالن دوران 153 لاوارث لاش مليا آهن جن مان 107 لاشن جي سڃاڻپ ٿي جڏهن ته 46 جي سڃاڻپ ناهي ٿي سگهي پنجاب صوبي پاران جمع ڪرايل رپورٽ ۾ انڪشاف ڪيو ويو ته پنجاب سال 14-2013 دوران 1299 لاوارث لاش مليا آهن. ايڊيشنل ايڊووڪيٽ جنرل پنجاب مطابق انهن مان 1248 لاشن جي سڃاڻپ ٿي آهي پنجاب صوبي مان مليل 1178 لاوارث لاشن جو پوسٽ مارٽم ٿيو 1204 لاوارث لاشن جون تصويرون ڪڍيون ويون جڏهن ته 985 لاشن جا فنگرپرنٽس ورتا ويا رپورٽ ۾ چيو ويو ته 51 لاوارث لاشن کي پنجاب جي صحت کاتي جي ايناٽمي ڊپارٽمينٽ جي حوالي ڪيو ويو.

 

قومي اسيمبلي ۾ مخالف ڌر جو جي ايس ٽي ۾ واڌ خلاف احتجاج، اجلاس جو بائيڪاٽ، واڪ آئوٽ

اسلام آباد (بيورو) قومي اسيمبلي جي اجلاس مان گڏيل اپوزيشن پيٽروليم شين تي جي ايس ٽي ۾ واڌ خلاف بائيڪاٽ ڪيو ويو، خورشيد شاهه چيو آهي ته  ايوان جي منظوري کانسواءِ ڪا به ٽيڪس نٿي لاڳو ٿي سگهي، پارليامينٽ کي ختم ڪرڻ جون سازشون ٿي رهيون آهن، مسئلا حل نه ٿيا ته روڊن تي هونداسين. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ پيٽروليم شين تي جي ايس ٽي ۾ واڌ ۽  پي آءِ اي جي ڪارڪردگي سميت مختلف معاملن تي بحث ڪيو ويو. اجلاس ۾ پوائنٽ آف آرڊر تي ڳالهائيندي اپوزيشن ليڊر خورشيد شاهه چيو ته پيٽروليم تي 10 سيڪڙو جي ايس ٽي لڳائڻ پارليامينٽ جي خودمختيار تي حملو آهي. هن چيو ته آمريڪا ۽ يورپي ملڪن ۾ بجيٽ هڪ ڀيرو پيش ٿئي پئي پر پاڪستان ۾ اهو رواج ختم ڪيو ويو آهي. خورشيد شاهه چيو ته هر مهيني حڪومت نئون ٽيڪس لاڳو ڪري رهي آهي، گذريل ڏينهن ٿيل اقتصادي رابطه ڪميٽي جي اجلاس ۾ به هڪ سئو 85 شين تي ٽيڪس لاڳو ڪيو ويو. هن چيو ته فرنس آئل تي به 5 سيڪڙو ڊيوٽي لاڳو ڪئي وئي آهي، جيڪڏهن سڀ ٽيڪس پارليامينٽ کان ٻاهر ئي لاڳو ٿين پيا ته “ اسان” جو هتي ويهڻ جو ڪهڙو جواز آهي، ڇا هـُو خان صاحب وٽ دانهن کڻي وڃن. اپوزيشن ليڊر چيو ته سيف الرحمان کي هڪ ڀيرو ٻيهر ملڪ کي ڦرڻ لاءِ گهرايو ويو آهي، وزيراعظم نواز شريف ميون جي دڪان تي اگهه معلوم ڪرڻ وڃي ٿو پر کيس سبزي وارن وٽ وڃڻ گهرجي ها، جتي غريب عوام هوندو آهي. خورشيد شاهه چيو ته ملڪي تاريخ ۾  رڳو هڪٻئي جا پير ڪڍڻ جون ڪوششون ٿيون آهن، پهريون ڀيرو سڀني متحد ٿي پارليامينٽ کي مضبوط ڪيو پر حڪومت ايوان کي اهميت نه پئي ڏئي. هن چيو ته حڪمرانن کي آءِ ايم ايف جي غلامي بند ڪرڻ گهرجي، شينهن جي نشان وارا حڪمران گدڙن وارو ڪم ڇو ڪري رهيا آهن.  ايم ڪيو ايم جي رشيد گوڊيل چيو ته ملڪ ۾ رڳو صنعتڪارن کي تحفظ ڏنو ويو آهي، غريب عوام اڄ به بک مري پيو. خورشيد شاهه ۽ رشيد گوڊيل جي خطاب کانپوءِ مخالف ڌر پاران گڏيل طور اڄوڪي اجلاس جو بائيڪاٽ ڪيو ويو، جن ۾ جماعت اسلامي، ايم ڪيو ايم، پ پ پ ۽ قومي وطن پارٽي جا ميمبر شامل هئا. مملڪتي وزير شيخ آفتاب چيو ته اپوزيشن رڳو بهانا بڻائي واڪ آئوٽ ڪري رهي آهي، نان ايشوز تي سياست ڪئي پئي وڃي. اپوزيشن جي واڪ آئوٽ بعد اسپيڪر اجلاس سڀاڻي 11 هين وڳي تائين ملتوي ڪري ڇڏيو. اجلاس کانپوءِ ميڊيا سان ڳالهائيندي خورشيد شاهه چيو ته پارليامينٽ جي منظوري کانسواءِ جي ايس ٽي لاڳو ڪيا پيا وڃن، جيڪڏهن مسئلا ايوان ۾ حل نه ٿيا ته هو روڊن تي ايندا.

 

ن ليگ جي حڪومت پنهنجي منشور موجب بجلي بحران جي خاتمي تي ڪم ڪري رهي آهي: خواجه آصف

اسلام آباد(بيورو) وفاقي حڪومت، بجلي بچائڻ لاءِ مارڪيٽس دير تائين کـــــُليل رکڻ بدران جلدي بند ڪرڻ جي تجويز ڏئي ڇڏي آهي، خواجه آصف چيو آهي ته توانائي بحران ايندڙ 2 کان ٽن سالن اندر بند ٿي ويندو، مارڪيٽس رات جو اٺين وڳي تائين بند ٿي وڃن ته 1600 ميگاواٽ بجلي جي بچت ٿي سگهي ٿي. واپڊا هائوس لاهور ۾ تقريب کي خطاب  ڪندي پاڻي ۽ بجلي واري وفاقي وزير خواجه آصف چيو ته حڪومت توانائي بحران جي خاتمي لاءِ ڪوششون ڪري رهي آهي. هن چيو ته ماضي ۾ توانائي بحران جي خاتمي لاءِ ڪي به جوڳا قدم نه کنيا ويا، پر ن ليگ جي حڪومت پنهنجي منشور موجب بجلي بحران جي خاتمي تي ڪم ڪري رهي آهي. خواجه آصف چيو ته ڀاشا ڊيم جي تعمير لاءِ ٻيڻي قيمت تي بجلي خريد ڪئي پئي وڃي، ڊيمن مان بجلي جي پيداوار سان ايندڙ نسلن کي فائدو ٿيندو. پاڻي ۽ بجلي واري وفاقي وزير چيو ته مارڪيٽس رات جو 8 وڳي تائين بند ڪرڻ بدران هڪ وڳي تائين کـُليل رهن ٿيون، جنهن سبب بجلي ضايع ٿي رهي آهي. خواجه آصف چيو ته جيڪڏهن مارڪيٽس 8 وڳي تائين بند رکيون وڃن ته هڪ اندازي موجب 16 سئو ميگاواٽ بجلي جي بچي ٿي سگهي ٿي.

 

لنڊن: رحمان ملڪ جي الطاف حسين سان ملاقات ، مفاهمتي عمل جاري رکڻ تي اتفاق

لنڊن (مانيٽرنگ ڊيسڪ) اڳوڻي وفاقي گهرو وزير ۽ پيپلزپارٽي اورسيز جي صدر سينيٽر رحمان ملڪ لنڊن ۾ متحده قومي موومينٽ جي اڳاوڻ الطاف حسين سان تفصيلي ملاقات ڪئي ملاقات ٽن ڪلاڪن تائين جاري رهي جنهن ۾ سينيٽ اليڪشن ايم ڪيو ايم پيپلزپارٽِ لاڳاپا سياسي صورتحال ۽ ملڪ جي جملي صورتحال تي ڳالهيون ڪيون ويون ملاقات ۾ فيصلو ڪيو ويو ته سياسي ماحول بهتر بنائڻ لاءِ پيپلزپارٽي ۽ ايم ڪيو ايم وچ ۾ سياسي مفاهمت جو عمل اڳتي وڌايو ويندو ملاقات ۾ طئي ڪيو ويو ته ايم ڪيو ايم ۽ پيپلزپارٽي سينيٽ اليڪشن ۾ هڪ ٻئي سان تعاون ڪنديون ٻنهي جماعتن وچ ۾ سيٽ ايڊجسٽمينٽ ٿيندي هن سيٽ ايڊجسٽمينت فارمولا موجب پيپلزپارٽي کي 7 ۽ ايم ڪيو ايم کي 4 سيٽون ملنديون ملاقات ۾ 4 ڏينهن اڳ آصف علي زرداري ۽ الطاف حسين وچ ۾ ٿيل ڳالهه ٻولهه جي روشني ۾ فيصلو ڪيو ويو ته سنڌ ۾ امن ۽ ڀائپي ۽ بهتر ماحول جوڙڻ لاءِ ايم ڪيو ايم جلد ئي سنڌ حڪومت ۾ شامل ٿيندي ان ڏس ۾ هن دفعي ٻنهي پارٽين وچ ۾ باقاعده لکت ۾ معاهدو ٿيندو. ملاقات ۾ طئي ڪيو ويو ته ٻنهي جماعتن وچ ۾ ئي ٿيندڙ معاهدي تي عملدرآمد ۽ ورڪنگ رليشن شپ کي بهتر بنائڻ لاءِ هڪ ڪميٽي قائم ڪئي ويندي جنهن ۾ ٻنهي پاران 2-2 ميمبر شامل هوندا ته جيئن مستقبل ۾ ٻنهي جماعتن وچ ۾ پيدا ٿيندڙ مسئلا گڏيل مشاورت سان حل ڪيا وڃن حڪومتي معاملن جي حل لاءِ ٻنهي جماعتن سان تعلق رکندڙ ميمبرن تي ٻڌل هڪ وزارتي ڪميٽي به جوڙي ويندي انموقعي تي سينيٽر رحمان ملڪ آصف علي زرداري پاران الطاف حسين کي پڪ ڏياري ته هن دفعي ايم ڪيو ايم کي سندس جائز حق اڳ جيان ملندو ۽ هر شعبي ۾ 40.60 جي فارمولا تي عملدرآمد کي يقيني بڻايو ويندو ملاقات ۾ ان ڳالهه تي اتفاق ڪيو ويو ته ٻئي جماعتون گڏجي سنڌ کي ترق يڏيڻ ۽ عوام جا مسئلا حل ڪڻ لاءِ گڏيل ڪوششون ڪنديون ان موقعي تي ٻنهي اڳواڻن الله تعالي کان دعا ڪئي ته پاڪستان ۾ وڌندڙ دهشتگردي جي پاڙ پٽجي ۽ پاڪستان اڄڪلهه جن مسئلن جي ور چڙهيل آهي انهن مسئلن مان نڪري ۽ ترقي ڪري آخر ۾ رحمان ملڪ الطاف حسين کي ٻڌايو ته هو ڪراچي پهچندي ئي هن ملاقات جي تفصيلي رپورٽ آصف علي زرداري کي پيش ڪندو ان پاران توثيق ٿيندي ئي ان تي عملدرآمد شروع ڪيو ويندو.

 

الطاف حسين ڳجهن ادارن خلاف سخت لفظ استعمال ڪرڻ تي معذرت ڪري ڇڏي

لنڊن (مانيٽرنگ ڊيسڪ) ايم ڪيو ايم سربراهه الطاف حسين تقريرن ۾ ڳجهن ادارن خلاف سخت لفظ استعمال ڪرڻ تي معذرت ڪندي چيو آهي ته سندس مقصد ڪنهن جي دل آزاري ڪرڻ نه هو. لنڊن مان جاري ڪيل بيان ۾ الطاف حسين چيو  آهي ته  هن هميشه قانون لاڳو ڪندڙ ادارن جو احترام ڪيو آهي ۽ ڪندو رهندس. الطاف حسين سخت جملن تي قانون لاڳو ڪندڙ ادارن کان معذرت ڪندي چيو آهي ته سندس سخت جملن سان ڪجهه قانون لاڳو ڪندڙ ادارن جي عملدارن جي دل آزاري ٿي آهي پر سندس مقصد ڪنهن جي دل آزاري ڪرڻ نه هو.

 

عمران خان پاران الطاف حسين خلاف برطانيه ۾ ڪيس داخل ڪرائڻ جو مطالبو

اسلام آباد (بيورو) تحريڪ انصاف جـَي سربراهه عمران خان، عورتن خلاف گٿا لفظ ڳالهائڻ تي الطاف حسين خلاف ڪارروائي جو مطالبو ڪندي چيو آهي ته 23 سالن کان هڪ شخص لنڊن ۾ ويهي ماڻهن کي ڊيڄاري ڌمڪائي رهيو آهي، کيس موت جو خوف ناهي، جلد ڪراچي جو دورو ڪندس. اسلام آباد ۾ بني گالا واري رهائشگاهه ٻاهران ميڊيا سانڳالهائيندي عمران خان چيو ته الطاف حسين خلاف سندس ڪاوڙ ختم ناهي ٿي، متحده سربراهه جهڙي ريت پي ٽي آءِ جي عورتن خلاف گٿا لفظ ڳالهايا، ان تي هو تفصيلي ڳالهه ٻولهه ڪندو.  هن چيو ته ايم ڪيو ايم وارن تحريڪ انصاف جي عورتن خلاف گندي زبان استعمال ڪئي، الطاف حسين سميت سندس پارٽي قيادت کي ڳالهائڻ جي تميز ئي ناهي. عمران خان چيو ته پيمرا رڳو حڪومت مٿان خراب وقت اچڻ تي جاڳندو آهي پر جهڙي ريت الطاف حسين تقرير ڪئي، ان وقت اداري جا عملدار ڪٿي هئا،  پيمرا کي الطاف حسين جي گٿن لفظن جو نوٽيس  وٺي ڪارروائي ڪرڻ گهرجي. پي ٽي آءِ سربراهه چيو ته الطاف حسين بزدل ۽ دهشتگرد آهي، جيڪو لنڊن مان ويهي ماڻهن کي ڊيڄاري ۽ ڌمڪائي رهيو آهي. ڪراچي وڃڻ بابت سوال جي جواب ۾ عمران خان چيو ته کيس ڪو به خوف ناهي، هو بغير سڪيورٽي جي جلد ڪراچي جو دورو ڪندو.

 

سنڌ اسيمبلي جو اجلاس 16 فيبروري تائين ملتوي، هڪٻئي تي الزام لڳائڻ سان جمهوريت کي نقصان رسندو: نثار کهڙو

ڪراچي (اسٽاف رپورٽر) سنڌ اسيمبليءَ جو اجلاس ڪورم پورو نه هئڻ سبب 16 فيبروري تائين ملتوي ڪيو ويو، سينيئر صوبائي وزير نثار کهڙي جو چوڻ آهي ته ڪورم پورو نه هئڻ تي اسپيڪر کي اجلاس ملتوي ڪرڻ جو اختيار آهي. سنڌ اسيمبلي جو اجلاس شروع ٿيو ته ايوان ۾ رڳو 2 حڪومتي ميمبر ويٺل هئا. ڪورم پورو نه هئڻ سبب اسپيڪر اجلاس سومر تائين  ملتوي ڪري ڇڏيو. اجلاس ملتوي ٿيڻ بعد اسيمبلي ٻاهران ميڊيا سان ڳالهائيندي سينيئر صوبائي وزير نثار احمد کهڙي چيو ته ڪورم پورو نه هئڻ تي اسپيڪر کي اجلاس ملتوي ڪرڻ جو اختيار آهي. هن چيو ته ايوان جو ڪورم پورو ڪرڻ سڀني ميمبرن جي ذميواري آهي، اجلاس جو وقت 10 وڳي هئڻ باوجود اسپيڪر ڪجهه منٽن تائين ميمبرن کي اچڻ لاءِ موقعو ڏنو ۽ گهنٽيون وڄنديون رهيون. هن چيو ته ماضيءَ ۾ ته حڪومت مخالف ڌر جي غير حاضري ۾ 10 منٽن اندر 12 بل منظور ڪيا،پر هــُنن اها روايت نه ورجائي آهي. نثار کهڙي وڌيڪ چيو ته 12 مئي سانحي بابت جـَي آءِ ٽي رپورٽ جاچ کانپوءِ عدالت ۾ پيش ٿي هوندي، هڪٻئي تي الزام لڳائڻ سان جمهوريت کي نقصان رسندو. سينيئر صوبائي وزير چيو ته ايم ڪيو ايم سان ڳالهيون ڪرڻ ۾ ڪو به حرج ناهي، ڇاڪاڻ ته سياست ۾ ڳالهين جا دروازا ڪڏهن به بند ناهن ٿيندا. عمران خان پاران زهره شاهد جو قتل ڪيس فوجي عدالت ڏانهن اماڻڻ واري مطالبي واري سوال جي جواب ۾ نثار کهڙي چيو ته ڪا به سياسي پارٽي ڪو به ڪو مطالبو ڪري سگهي ٿي. هن چيو ته عمران خان ڪراچي واري جلسي ۾ زهره شاهد جي قتل واري واقعي تي هڪ لفظ به نه ڳالهايو ۽ هاني فوجي عدالتون قائم ٿيون آهن تنهن ڪري هــُن اهڙو مطالبو ڪيو آهي.

 

ايم ڪيو ايم عمران خان خلاف مذمتي ٺهراءُ سنڌ اسيمبلي ۾ جمع ڪرائي ڇڏيو

ڪراچي (اسٽاف رپورٽر) ايم ڪيو ايم، عمران خان پاران الطاف حسين خلاف اڻوڻندڙ ٻولي استعمال ڪرڻ تي سنڌ اسيمبلي ۾ مذمتي ٺهراءُ جمع ڪرائي ڇڏيو،متحده ميمبرن جو چوڻ آهي ته اسيمبلي جو اڄوڪو اجلاس ملتوي ڪرڻ غيرآئيني هو. سنڌ اسيمبلي ۾ ايم ڪيو ايم جي ميمبر خواجا اظهار الحسن ۽ سيد سردار  احمد، پي ٽي آءِ چيئرمين عمران خان طرفان الطاف حسين خلاف اڻوڻندڙ ٻولي استعمال ڪرڻ تي مذمتي ٺهراءُ اسيمبلي سيڪريٽريٽ ۾ جمع ڪرايو. مذمتي ٺهراءُ جمع ڪرائڻ بعد متحده ميمبرن سيد سردار احمد، خواجا اظهار الحسن ۽ ٻين ميڊيا سان ڳالهائيندي چيو ته سنڌ اسيمبلي جو اڄوڪو اجلاس غير آئيني طور ملتوي ڪيو ويو آهي. سيد سردار احمد چيو ته سنڌ اسيمبلي جو اجلاس ملتوي ڪرڻ لاءِ 5 منٽ گهنٽي وڄائڻ گهــُرجي ها. سردار احمد چيو ته ايوان ۾ حڪومت جا رڳو 2 ميمبر موجود هئا، جڏهن ته اڄوڪي اجلاس ۾ کين عمران خان جي بيان تي ڳالهائڻو هو. هن چيو ته عمران خان الطاف حسين خلاف غلط زبان استعمال ڪئي آهي. سيد سردار احمد چيو ته ايندڙ سومر تي ايوان جو ڪورم پورو ڪرڻ حڪومت جي ذميواري آهي.